Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 5-й де́нь.
Свята́го священному́ченика Дороѳе́я, епи́скопа Ти́рскаго.

[ВЕЧЕРЪ,]
Стихи́ры, гла́съ 8. Подо́бенъ: Му́ченицы Твои́, Го́споди.

Крове́й боже́ственными тече́ніи обагри́въ твою́ свяще́нную оде́жду, Дороѳе́е, вше́лъ еси́, ра́дуяся, въ небе́сный хра́мъ, ны́нѣ яви́тися Бо́гу на́шему, подаю́щему вѣнцы́ страда́вшимъ. Того́ прилѣ́жно моли́ всѣ́мъ низпосла́ти ве́лію ми́лость.

Житіе́ твое́ равноа́нгельно, муче́ніе же просвѣще́нно, и́мже сподо́бился еси́ со а́нгелы ликова́ти въ ра́дости, чудесы́ зе́млю, о́тче Дороѳе́е, боже́ственными озаря́я и уче́ньми. Тѣ́мъ твои́ми моли́твами проси́ дарова́ти всѣ́мъ ве́лію ми́лость.

Ины стихи́ры Богоро́дицы, гла́съ и подо́бенъ то́йже:

Исхити́ мя, Влады́чице, изъ руки́ змíя человѣкоубíйцы, борю́щаго мя́ ле́стію пожре́ти до конца́, сокруши́ че́люсти сего́, молю́ся, и кова́рствія разори́, я́ко да, изба́влься сего́ ногте́й, велича́ю си́лу Твою́.

Азъ е́смь дре́во непло́дное, Всенепоро́чная, неплодя́щее плода́ спаси́тельнаго, тѣ́мже и трепе́щу посѣче́нія, да не ка́ко вве́рженъ бу́ду во о́гнь негаси́мый, окая́нный. Тѣ́мже Ти́ припа́даю: сего́ изба́ви мя́ и плодоно́сна покажи́, Чи́стая, Сы́ну Твоему́ хода́тайствомъ Твои́мъ.

Уязви́ се́рдце мое́ стрѣла́ жела́нія смертоно́сная, и уязви́хся отъ неразу́мія, и неисцѣ́льно болю́: Ма́ти Бо́жія, не пре́зри мене́, отча́яннаго, но исцѣле́ніе да́ждь ми́, я́ко ро́ждши Го́спода и Спа́са, еди́наго Милосе́рдаго.

Сла́ва, и ны́нѣ, богоро́диченъ:

Помышле́нія нечи́ста, и устны́ льсти́вы, дѣла́ же моя́ вся оскверне́на, и что́ сотворю́? Ка́ко усря́щу Судію́? Влады́чице Дѣ́во, моли́ Сы́на Твоего́, и Зижди́теля, и Го́спода, я́ко да въ покая́ніи пріи́метъ ду́хъ мо́й, я́ко еди́нъ Благоутро́бенъ.

Крестобогоро́диченъ:

Юница нескве́рная, Юнца́ ви́дящи, на дре́вѣ пригвожда́ема во́лею, рыда́ющи жа́лостнѣ: — увы́ Мнѣ́, — вопія́ше, — люби́мѣйшее Ча́до, что́ Ти́ со́нмъ воздаде́ безблагода́тный евре́йскій, хотя́ Мя́ обезча́дствовати отъ Тебе́, Вселюбе́зне?

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ, апо́столомъ бы́въ, дѣя́ніе обрѣ́лъ еси́, богодохнове́нне, въ видѣ́нія восхо́дъ; сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Дороѳе́е, моли́ Христа́ Бо́га спасти́ся душа́мъ на́шимъ.


[НА УТРЕНИ,]
Кано́нъ, его́же краегране́сіе: Да́ра Бо́жія тя́, всеблаже́нне о́тче, честву́ю. Творе́ніе Іо́сифово, гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Да́ръ Бо́гу, всеблаже́нне, тебе́ сама́го прине́слъ еси́ чистѣ́йшій, житіе́мъ соверше́ннымъ и честны́мъ муче́ніемъ, Дороѳе́е.

Якоже зрѣ́лъ гро́здъ, о́тче, изгне́тъ мы́сль, весе́лія ча́шу — вѣ́рнымъ уче́нія предложи́лъ еси́.

То́ки ле́стныя уста́вилъ еси́, Дороѳе́е, тече́ньми прему́драго твоего́ язы́ка и вѣ́рныхъ мы́сли напои́лъ еси́.

Богоро́диченъ: Одожди́ ми, Дѣ́во, молю́ся, ка́пли умиле́нія, прибы́вшую ми́ скве́рну отмыва́ющія, я́ко да сла́влю Тя́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Но́щь отгна́лъ еси́ су́етства вся́ку блиста́ніи, о́тче святи́телю, прему́драго проповѣ́данія.

Чудесы́ утверди́лъ еси́ и свяще́нными, му́дре, уче́ніи вѣ́рныхъ всѣ́хъ мы́сли, я́ко па́стырь свяще́ненъ.

Пома́за тя́ Госпо́дь свяще́ннымъ, о́тче, пома́заніемъ и Своея́ боже́ственныя Це́ркве пастыренача́льника поста́ви.

Богоро́диченъ: Все́ се́рдце мое́ боже́ственнымъ свѣ́томъ просвѣти́, две́ре Свѣ́та, грѣхо́вное омраче́ніе отгоня́щи.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственными догма́ты при́сно сія́ющь да́ръ святы́й, тебе́ сама́го прине́слъ еси́ Безсме́ртному Царю́, пострада́въ, Дороѳе́е, и обита́еши ны́нѣ, при́сно веселя́ся, перворо́дныхъ въ го́рнѣй митропо́ліи. Отче преподо́бне, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственнаго естества́ не отлу́чся, пло́ть бы́въ во чре́вѣ Твое́мъ, но Бо́гъ вочеловѣ́чся и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чну, еди́нъ Госпо́дь. Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, Нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Возноси́мую оплева́лъ еси́, преподо́бне, зи́му безбо́жія и теплото́ю Боже́ственнаго Ду́ха невреди́мо се́рдце соблю́лъ еси́.

Сокруши́шася, Дороѳе́е блаже́нне, предъ лице́мъ твои́мъ го́ры ну́ждныя де́монскія и иста́яша злочести́выхъ человѣ́къ шата́нія.

Терпѣ́лъ еси́, оскорбля́емь, отъ гра́да во гра́дъ изгони́мь, тѣ́мже блаже́нную улучи́лъ еси́ му́ченикъ сла́ву и свѣ́тлость.

Богоро́диченъ: Искуше́ній мя́ спаси́ и душетлѣ́нныя страсте́й бу́ри, я́ко да вѣ́рою ублажа́ю Тя́, Пресвята́я Отрокови́це, Ма́ти Дѣ́во.

Пѣ́снь 5.

Ирмо́съ: Отъ но́щи невѣ́дѣнія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Смотря́я разу́мно воздая́нія боже́ственная, Дороѳе́е, вели́кія бѣды́ и напа́сти претерпѣ́лъ еси́.

Еди́нствомъ Божества́ проповѣ́дая Тро́ицу, Дороѳе́е, многобо́жнаго неи́стовства су́етное погуби́лъ еси́ шата́ніе.

Не поклони́вся, му́чениче, дѣло́мъ ру́къ беззако́нныхъ, терпѣ́лъ еси́ искуше́нія, и бѣды́, и ра́ны, и болѣ́зни, Дороѳе́е.

Богоро́диченъ: Восто́къ Со́лнца, пре́жде денни́цы возсія́вшаго, была́ еси́, Имже свѣ́тъ су́щій во тмѣ́ лю́тыхъ, Чи́стая, ви́дѣша.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Се́рдце, разжже́но дыха́ніи Ду́ха, стяжа́лъ еси́, духо́въ, Дороѳе́е, сопроти́вныхъ стремле́ніе разруша́ющо.

Святы́хъ житія́ свяще́нными списа́ньми яви́лъ еси́, о́тче богодохнове́нне, боже́ственнымъ ра́зумомъ ду́шу просвѣща́я.

Глаго́лъ твои́хъ веща́ніе и кра́сныхъ уче́ній си́ла всю́ обтече́, преблаже́нне, зе́млю Боже́ственною благода́тію.

Богоро́диченъ: Дѣ́во, Его́же родила́ еси́, Бо́га, Человѣ́ка бы́вша, Того́ моли́ изба́вити мя́ огня́ и му́ки.

Конда́къ, гла́съ 5:

Добродѣ́тельми сія́я, и боже́ственными уче́ніи па́че со́лнца, и страда́ніи, блаже́нне, облиста́лъ еси́, просвѣти́лъ еси́ зе́млю, Дороѳе́е, отгна́въ мглу́ многобо́жія и лю́тыя е́реси. Сего́ ра́ди па́мять твою́ свѣ́тло пра́зднуемъ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Звѣзда́ многосвѣ́тлая яви́лся еси́, свѣтлостьми́ страда́ній твои́хъ просвѣща́я ду́ши вѣ́рно, Дороѳе́е, вопію́щихъ: благослове́нъ еси́, Го́споди Бо́же, во вѣ́ки.

Стезя́ми пра́выми ходя́, низве́рглъ еси́ де́бри льсти́ваго, къ путе́мъ живо́тнымъ наставля́я вопію́щія: благослове́нъ еси́, Го́споди Бо́же, во вѣ́ки.

Угаси́лъ еси́ ту́чами крове́й твои́хъ, всесла́вне, пе́щь преле́стную и на водѣ́ жи́зни всели́лся еси́, взыва́я: благослове́нъ еси́, Го́споди Бо́же, во вѣ́ки.

Богоро́диченъ: Изба́ви соу́зъ грѣха́ окая́нную мою́ ду́шу, Богороди́тельнице, и любви́ Бо́жіей припрязи́ соверше́ннѣ, да вѣ́рно сла́влю Тя́, Богоро́дице, во вѣ́ки.

Пѣ́снь 8.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Хва́лящагося змíя въ зло́бѣ, смири́вся о Го́сподѣ, о́тче, смири́лъ еси́, вопія́: благослови́те, вся́ дѣла́ Госпо́дня, Го́спода.

Во глубо́цѣй тя́ ста́рости въ нестарѣ́ющихся поко́йныхъ мѣ́стѣхъ Зижди́тель всели́, свяще́нный о́тче, му́чениковъ украше́ніе.

Житіе́ равноа́нгельно имѣ́я, со а́нгелы Влады́ки твоего́ престо́лу ны́нѣ предстои́ши, вопія́: благослови́те, вся́ дѣла́ Госпо́дня, Го́спода.

Богоро́диченъ: Кра́сная, Дѣ́во, яви́лася еси́, прекра́сное Сло́во поро́ждши, Ему́же пое́мъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Испра́вилъ еси́ ста́до Христо́во къ боже́ственнымъ приста́нищемъ, невре́дно соблю́дъ е́ отъ бу́ри сопроти́вныя, я́ко преизря́денъ святи́тель и боже́ственныхъ, о́тче, испо́лнитель, му́дре, повелѣ́ній.

Яко священнодѣ́йственникъ чи́стъ, я́ко му́ченикъ до́бль, я́ко чудодѣ́йственникъ чу́денъ, я́ко боже́ственныхъ словопи́сецъ, я́ко вѣ́ры непоколеби́мь сто́лпъ, сла́ву вѣ́чную, о́тче, улучи́лъ еси́.

На суди́щи подъе́мъ мно́ги труды́ и болѣ́зни, къ неболѣ́зненнѣй и боже́ственнѣй жи́зни, ра́дуяся, преше́лъ еси́, обоже́ніемъ ны́нѣ чи́сто прича́щся, му́чениче досточу́дне Дороѳе́е.

Богоза́рная па́мять твоя́ возсія́ мíру, озаря́ющи вѣ́рныя луча́ми дарова́ній, ю́же сла́вящія о́бщники ны́ покажи́, о́тче, въ тебѣ́ боже́ственныя свѣ́тлости.

Богоро́диченъ: Нося́щи Христа́ на рука́хъ, нося́щаго вся́ ма́ніемъ боже́ственнымъ, Чи́стая, Того́ при́сно моли́ ру́къ на́шихъ воздѣя́нія испра́вити, я́ко ѳиміа́мъ, предъ лице́мъ Его́.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 31 об. – 34 об.

/ Къ оглавленію раздѣла /


Наверхъ / Къ титульной страницѣ

0