Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 4-й де́нь.
Слу́жба преподо́бному и богоно́сному отцу́ на́шему Меѳо́дію, игу́мену Пѣ́шношскому, чудотво́рцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Небе́сныхъ чино́въ.

Дави́дски, о́тче, на вся́къ де́нь* посте́лю твою́ слеза́ми омыва́лъ еси́,* очища́я ду́шу твою́ отъ скве́рны грѣхо́вныя,* до́ндеже всели́ся въ тя́ Пресвяты́й Ду́хъ,* Его́же сосу́дъ освяще́нъ бы́лъ еси́* и таи́нникъ ве́лій Бо́жія благода́ти.

Помина́я, о́тче, исхо́дъ души́ твоея́,* вся́ красоты́ мірскíя презрѣ́лъ еси́,* и, въ пусты́ню всели́вся,* труды́ святоподви́жными до́брѣ Бо́гу угоди́лъ еси́,* и яви́лся еси́, я́ко са́дъ прекра́сенъ,* цвѣта́ми добродѣ́телей процвѣ́тшій.

Пусты́ни кра́сное прозябе́ніе,* преподо́бнаго и богоно́снаго отца́ Се́ргія учениче́,* о́тче Меѳо́діе,* ты́ съ учи́телемъ твои́мъ до́брѣ подвиза́лся еси́,* ревну́я того́ добродѣ́телемъ,* и отъ бѣсо́въ ско́рби мно́ги претерпѣ́лъ еси́,* моли́твою непреста́нною на ни́хъ вооружи́вся,* вся́ искуше́нія и́хъ побѣди́лъ еси́,* тѣ́мъ ны́нѣ со а́нгелы лику́еши.

Сла́ва, гла́съ 6:

Преподо́бне о́тче Меѳо́діе, ты́ отъ млады́хъ ногте́й за́повѣди Ева́нгелія Христо́ва возлюби́лъ еси́ и, кре́стъ тво́й взе́мъ, Христу́ послѣ́довалъ еси́, умо́мъ чи́стымъ вы́ну помина́я Того́ воздая́ніе, дѣ́лателемъ за́повѣдей Его́ обѣтова́нное, и при́сно размышля́я о сла́вѣ невече́рней Ца́рствія небе́снаго, тѣ́мже тя́ ублажа́емъ.

И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы, и преподо́бнымъ Меѳо́діемъ, поми́ловати ду́ши на́ша.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́ма Бо́жія строи́теля богому́драго* и па́стыря слове́сныхъ ове́цъ Христо́выхъ до́браго,* яви́ тя́ Христо́съ въ странѣ́ Россíйстѣй,* о́тче Меѳо́діе,* моли́твенниче усе́рдный о душа́хъ на́шихъ.

Сти́хъ: Честна́ предъ Го́сподемъ* сме́рть преподо́бныхъ Его́.

До́мъ Ду́ха Свята́го душа́ твоя́ бы́сть,* о́тче Меѳо́діе,* въ не́й бо добродѣ́тели высо́кія возрасти́лъ еси́* и дости́глъ еси́ въ му́жа соверше́нна о Христѣ́,* си́льна и непобѣди́ма въ бра́нехъ со враги́ неви́димыми.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

До́ма Госпо́дня благолѣ́піе возлюби́лъ еси́* и въ само́мъ себѣ́ хра́мъ Тріѵпоста́сному Бо́гу угото́валъ еси́,* въ не́мже Христо́съ со Отце́мъ и Ду́хомъ всели́ся,* Меѳо́діе богоблаже́нне,* моли́твенниче о душа́хъ на́шихъ.

Сла́ва, гла́съ 8:

Кто́ изрещи́ возмо́жетъ твоя́ по́двиги и труды́, о́тче преподо́бне, бдѣ́нія и сухояде́нія и непреста́нныя моли́твы, и́миже въ пусты́ни многолѣ́тнѣ подвиза́лся еси́? Вои́стинну дре́внимъ богоно́снымъ отце́мъ подо́бенъ бы́лъ еси́, съ ни́миже ра́вное воздая́ніе отъ Го́спода пріе́мъ, вы́ну моли́ся, о́тче Меѳо́діе, поми́ловатися душа́мъ на́шимъ.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Тропа́рь, гла́съ 8:

Боже́ственною любо́вію отъ ю́ности распала́емь, вся́, я́же въ мíрѣ кра́сная, возненави́дѣвъ, Христа́ еди́наго возлюби́лъ еси́, и, сего́ ра́ди въ пусты́ню всели́вся, въ не́й оби́тель сотвори́лъ еси́, и, собра́въ и́нокъ мно́жество, прія́лъ еси́ отъ Бо́га чуде́съ да́ръ, о́тче Меѳо́діе, и бы́лъ еси́ о Христѣ́ собесѣ́дникъ и спо́стникъ преподо́бному Се́ргію, съ ни́мже у Христа́ Бо́га испроси́ Благовѣ́рному Импера́тору на́шему [имярекъ] здра́віе, и спасе́ніе, и душа́мъ на́шимъ ве́лію ми́лость.

Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, [и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Въ странѣ́ полуно́щнѣй свѣти́льникъ Бо́жія благода́ти возсія́,* преподо́бный и богоно́сный оте́цъ Меѳо́дій,* пусты́ни Пѣ́шношскія святопроцвѣ́тшее прозябе́ніе* и всея́ Россíйскія страны́ духо́вное украше́ніе.* Къ нему́же, вопію́ще, рце́мъ:* о преподо́бне, помоли́ся ко Го́споду,* Ему́же соверше́нно угоди́лъ еси́,* дарова́ти на́мъ ми́ръ и ве́лію ми́лость. [Три́жды.]

О, пресла́внаго чудесе́!* Въ странѣ́ хла́днѣй цвѣ́тъ прекра́сный добродѣ́телей возрасте́* и Це́рковь Христо́ву благоуха́нія духо́внаго испо́лни* преподо́бный и богоно́сный оте́цъ Меѳо́дій,* вели́каго во отце́хъ Се́ргія спо́стникъ и учени́къ* и того́ подвиго́въ подража́тель.* Къ нему́же, взыва́юще, глаго́лемъ:* о преподо́бне, помоли́ся ко Го́споду* вку́пѣ съ преподо́бнымъ Се́ргіемъ* дарова́ти на́мъ ми́ръ и ве́лію ми́лость. [Три́жды.]

О, пресла́внаго чудесе́!* Ка́ко ты́, о́тче Меѳо́діе,* въ бре́ннѣй пло́ти* а́нгельское житіе́ проходи́лъ еси́* и, сме́ртенъ тѣ́ломъ,* отъ сме́рти грѣхо́вныя ду́ши человѣ́ческія свобожда́лъ еси́* уче́ньми твои́ми и чудесы́?* Моли́ся вы́ну, о́тче преподо́бне,* о на́съ, ча́дѣхъ твои́хъ духо́вныхъ,* е́же упасе́ннымъ бы́ти на́мъ во спасе́ніе* и получи́ти тобо́ю ми́ръ и ве́лію ми́лость. [Два́жды.]

Сла́ва, гла́съ 6:

Егда́, о́тче преподо́бне, по мно́зѣхъ по́двизѣхъ и трудѣ́хъ уразумѣ́лъ еси́ ду́хомъ твое́ ко Го́споду отше́ствіе, тогда́ со слеза́ми Бо́гу помоли́лся еси́ о оби́тели твое́й и ученицѣ́хъ твои́хъ и вся́, ну́ждная и́мъ ко спасе́нію, изре́клъ еси́; тíи же го́рцѣ пла́каху и вопія́ху: о па́стырю на́шъ до́брый, не оста́ви на́съ, си́рыхъ, но моли́твами твои́ми сохраня́й на́съ отъ вся́каго зла́! Ты́ же, о́тче, благослове́ніе твое́ и́мъ да́въ и моли́тися о ни́хъ обѣща́вся, съ ми́ромъ ду́шу твою́ Го́сподеви пре́далъ еси́, Ему́же помоли́ся нелише́ннымъ бы́ти и на́мъ наслѣ́дія небе́снаго.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? [Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ, Проки́менъ дне́. И чте́нія три́ преподо́бническія.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма, и свята́го стихи́ры, гла́съ 2. Подо́бенъ: Егда́ отъ дре́ва.

Егда́ Боже́ственное зва́ніе пріи́де на тя́, преподо́бне, е́же рабо́тати Го́сподеви въ безмо́лвіи пусты́ни, тогда́ къ настоя́телю твоему́, преподо́бному отцу́ Се́ргію, прише́лъ еси́ и твое́ жела́ніе ему́ возвѣсти́лъ еси́, о́нъ же тя́ благослови́, глаго́ля: иди́, ча́до, а́може Бо́гъ наста́витъ тя́. Ты́ же, о́тче, въ пусты́ню непроходи́мую отше́лъ еси́, и, въ не́й всели́вся, жесто́кое житіе́ пожи́лъ еси́, и мно́гимъ путеводи́тель ко спасе́нію бы́лъ еси́, и ны́нѣ моли́ся, преподо́бне, ко Христу́ Бо́гу, да спасе́тъ и просвѣти́тъ ду́ши на́ша.

Егда́ Боже́ственная благода́ть призва́ тя́ въ пусты́ню, Меѳо́діе преблаже́нне, тогда́, я́ко безпло́тенъ, мно́га лѣ́та въ не́й пожи́лъ еси́ въ постѣ́, моли́твахъ и слеза́хъ непреста́нныхъ, бдѣ́ніемъ и сухояде́ніемъ изнуря́я пло́ть твою́, у́зкимъ и приско́рбнымъ путе́мъ ше́ствовалъ еси́ и мно́жество и́нокъ собра́лъ еси́, подража́ти тебѣ́ въ по́двизѣхъ пусты́нныхъ, и́хже Христу́ вслѣ́дъ себе́ приве́лъ еси́, Ему́же помоли́ся, преподо́бне, спасти́ и просвѣти́ти ду́ши на́ша.

Егда́ благода́ть Свята́го Ду́ха тя́ осѣни́, преподо́бне о́тче, тогда́ наста́вникъ душеспаси́тельный мно́гимъ бы́лъ еси́, ни́щія же, и вдови́цы, и сиро́ты препита́лъ еси́ во дни́ гла́да, я́ко вои́стинну подража́тель милосе́рдія Спа́сова, себе́ же сама́го, въ постѣ́ и воздержа́ніи мно́зѣ, къ небе́сному Ца́рствію пріугото́валъ еси́, е́же по достоя́нію и получи́лъ еси́, и мо́лишися непреста́нно Го́сподеви, спасти́ и просвѣти́ти ду́ши на́ша.

Сла́ва, гла́съ 6:

Пріиди́те, и́нокъ мно́жество, пѣ́сньми духо́вными восхва́лимъ до́браго па́стыря слове́сныхъ Христо́выхъ ове́цъ, преподо́бнаго отца́ на́шего Меѳо́дія, его́же раче́ніемъ Христу́ уневѣ́стишася ду́ши мно́ги. Тѣ́мже всечестну́ю па́мять его́ похвала́ми ублажи́мъ: мо́литъ бо ся Христу́ Бо́гу дарова́ти мíру ми́ръ и душа́мъ на́шимъ ве́лію ми́лость.

И ны́нѣ, богоро́диченъ:

Творе́цъ и Изба́витель мо́й, Пречи́стая, [Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 1:

Въ честнѣ́й па́мяти твое́й, преподо́бне о́тче Меѳо́діе, чуде́съ сія́ньми вѣ́рныя озаря́еши: даде́ся бо тебѣ́ отъ Христа́ Бо́га ве́лія благода́ть, неду́ги исцѣля́ти и бѣ́сы отъ человѣ́къ изгоня́ти, я́ко вои́стинну подража́телю апо́стольскому. Тѣ́мъ, припа́дающе къ ра́цѣ моще́й твои́хъ, уми́льно глаго́лемъ: о́тче преподо́бне, моли́ся Тріѵпоста́сному Бо́гу поми́ловати ду́ши на́ша.

Сти́хъ: Честна́ предъ Го́сподемъ сме́рть преподо́бныхъ Его́.

Преподо́бне о́тче Меѳо́діе, ты́ измла́да Христа́ возлюби́въ, все́ плотско́е мудрова́ніе въ себѣ́ умертви́лъ еси́, потща́вся ху́ждшее покори́ти лу́чшему и пло́ть порабо́тати ду́ху, тѣ́мъ сосу́дъ чи́стъ и освяще́нъ Бо́гови яви́лся еси́ и, мѵ́ро Ду́ха Свята́го въ себе́ пріе́мъ, чуде́съ исто́чникъ содѣ́лался еси́. Моли́ся о на́съ, преподо́бне, Тріѵпоста́сному Бо́гу, поми́ловати ду́ши на́ша.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Чу́вственныя стра́сти побѣди́въ воздержа́ніемъ, въ пусты́ни возсія́лъ еси́ чуде́съ заря́ми и ту́ю уплодоноси́лъ еси́ труда́ми подвиго́въ твои́хъ духо́вныхъ, просвѣща́я ду́ши, грѣхо́вною тмо́ю помраче́нныя. И ны́нѣ на́съ, о́тче, твои́ми моли́твами озари́, и просвѣти́ сердца́ на́ша къ дѣ́ланію за́повѣдей Госпо́днихъ.

Сла́ва, гла́съ 8:

По́стниковъ собо́ры, по́стника Госпо́дня пѣ́сньми духо́вными почти́мъ, преподо́бнаго отца́ Меѳо́дія, и къ нему́ моле́бно возопіе́мъ: а́нгеловъ подо́бниче и человѣ́ковъ наста́вниче, наста́ви ны́ ходи́ти путе́мъ подвиго́въ твои́хъ и моли́твами твои́ми содѣ́лай на́съ прича́стники бы́ти Ца́рствія небе́снаго.

И ны́нѣ, богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, [Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь [свята́го], два́жды. Сла́ва, и ны́нѣ, богоро́диченъ: Иже на́съ ра́ди рожде́йся отъ Дѣ́вы...

По 1-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Зва́нію Госпо́дню послѣ́довавъ, о́тче преподо́бне, въ пусты́ню всели́лся еси́ и та́мо оби́тель и́нокомъ сооруди́лъ еси́, въ не́йже и́мя Бо́жіе сла́вится благоче́стно. И ны́нѣ моли́ся, преподо́бне Меѳо́діе, сохране́ннѣй бы́ти оби́тели твое́й отъ вся́каго зла́ и спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Богоро́дице, Ты́ обнови́ла еси́, Пречи́стая, святы́мъ Рождество́мъ Твои́мъ земны́хъ человѣ́къ па́дшее естество́ и сіе́ па́ки Бо́гу присво́ила еси́, сего́ ра́ди Тя́ пѣ́сненно велича́емъ.

По 2-й стихоло́гіи сѣда́ленъ, гла́съ 6. Подо́бенъ: Ангельскія си́лы.

Кре́стъ Христо́въ на ра́мо взе́мъ, къ боре́нію со врага́ми неви́димыми устреми́лся еси́, преподо́бне, и полки́ бѣсо́вскія въ пусты́ни побѣди́лъ еси́, сего́ ра́ди, я́ко побѣдоно́сецъ, по́чести вѣне́цъ прія́лъ еси́ отъ Христа́, Человѣколю́бца и Спа́са ду́шъ на́шихъ. [Два́жды.]

Сла́ва, и ны́нѣ, богоро́диченъ:

Кíйждо, идѣ́же ча́етъ спасти́ся, та́мо пра́ведно и притека́етъ; мы́ же, обрѣ́тше тя́ прибѣ́жище спаси́тельное, Богоро́дице, прилѣ́жно мо́лимся Тебѣ́: покры́й на́съ ма́тернимъ покро́вомъ Твои́мъ отъ вся́каго зла́ и спаси́ ду́ши на́ша.

По поліеле́и сѣда́ленъ, гла́съ 4. Подо́бенъ: Ско́ро предвари́.

Егда́ благода́ть Свята́го Ду́ха тя́ осѣни́, о́тче преподо́бне, тогда́ благослове́ніемъ богоно́снаго Се́ргія утвержде́нный, оби́тель пусты́нную соста́вилъ еси́ и въ сооруже́ніи ея́ са́мъ труди́лся еси́, трудолю́бцемъ о́бразъ и пра́вило бы́въ. Тѣ́мже моли́, Меѳо́діе преблаже́нне, Подвигополо́жника Христа́ Бо́га спасти́ ду́ши на́ша. [Два́жды.]

Сла́ва, и ны́нѣ, богоро́диченъ:

При́зри, Влады́чице, на рабы́ Твоя́ и умилосе́рдися на лю́ди согрѣши́вшія: мо́жеши бо, ели́ка хо́щеши, я́ко Ма́ти всѣ́хъ Творца́ Христа́ Бо́га. Тѣ́мже Тя́ по до́лгу ублажа́емъ.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе да хва́литъ Го́спода... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Богоно́сне и преблаже́нне о́тче Меѳо́діе, ты́ усе́рдно претерпѣ́лъ еси́ пусты́нное озлобле́ніе, страхова́нія бѣсо́вская му́жески побѣди́лъ еси́ и, я́ко со́лнце, луча́ми чуде́съ просія́лъ еси́ въ мíрѣ, сего́ ра́ди почита́емъ святу́ю и всечестну́ю па́мять твою́.

Кано́нъ Богоро́дицы со ирмосо́мъ на 6 и свята́го на 8, гла́съ 8.
Пѣ́снь 1.

Ирмо́съ: Мо́ре огусти́лъ еси́, погрузи́вый со ору́жіемъ го́рдаго фарао́на, и лю́ди спа́слъ еси́ немо́кренно, Го́споди, и вве́лъ еси́ я́ въ го́ру святы́ни, вопію́щія: пои́мъ Тебѣ́, Бо́гу на́шему, пѣ́снь побѣ́дную, я́ко просла́вися.

Мо́ря страстна́го пучи́ною обурева́емы, къ Тебѣ́, Іису́се Всеблагíй, прибѣга́юще, вопіе́мъ: отъ тимѣ́нія страсте́й на́съ изба́ви, да въ тишинѣ́ ду́ха уго́днику Твоему́ пѣ́снь хвале́бную принесе́мъ, его́же чудесы́ сла́вно просла́вилъ еси́.

Мо́рю песо́къ предѣ́лъ положи́вый Госпо́дь, тя́ избра́, преподо́бне о́тче Меѳо́діе, отъ ю́ности Ему́ благоугожда́ти, и сего́ ра́ди къ вели́кому Се́ргію тя́ наста́ви, отъ него́же подвиго́мъ духо́внымъ научи́вся, въ ни́хъ сла́вно просла́вился еси́.

Мо́ря жите́йскаго треволне́ніе не потопи́ ладьи́ твоея́, о́тче преподо́бне, но, вѣ́яніемъ Ду́ха Бо́жія управля́емый, въ ти́хое приста́нище спасе́нія вше́лъ еси́ и чудесы́ мно́гими отъ Го́спода просла́вился еси́.

Богоро́диченъ: Мо́ре сле́зъ испроси́ на́мъ, Влады́чице Преблага́я, у Ми́лостиваго Сы́на Твоего́ и Бо́га на́шего, да, и́ми угаси́вше пе́щь страсте́й, омы́емъ скве́рну грѣхо́вную ду́шъ на́шихъ и, спасе́ніе вѣ́чное улучи́вше, воспои́мъ Христу́ пѣ́снь побѣ́дную, я́ко просла́вися.

Пѣ́снь 3.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Утверди́лъ еси́ на ка́мени за́повѣдей Христо́выхъ се́рдце твое́, преподо́бне о́тче Меѳо́діе, у́зкимъ и приско́рбнымъ путе́мъ ше́ствовалъ еси́, а́лчбою и жа́ждею пло́ть свою́ изнуря́я блаже́ннаго ра́ди бу́дущаго поко́я, его́же получи́въ, весели́шися вѣ́чно со святы́ми.

Утвержде́нный благослове́ніемъ и моли́твою преподо́бнаго Се́ргія, въ пусты́ню удали́лся еси́, о́тче Меѳо́діе, и, въ не́й многолѣ́тнѣ потруди́вся, оби́тель и́нокомъ возгради́лъ еси́, я́же спасе́нія хода́таица бы́сть мно́гимъ.

Утвержда́лъ еси́ словесы́ твои́ми душеспаси́тельными бра́тію твою́, преподо́бне о́тче, и бы́лъ еси́ о́бразъ благоче́стія твои́мъ ученико́мъ, и́же, тобо́ю наставля́еми, подража́тели бы́ша твоему́ житію́ свято́му и вку́пѣ съ тобо́ю получи́ша спасе́ніе.

Богоро́диченъ: Утвержде́ніе на Тя́ надѣ́ющихся, Пресвята́я Богоро́дице Влады́чице, не посрами́ упова́нія на́шего, е́же по Бо́зѣ на Тя́ возлага́емъ, но бу́ди на́мъ Засту́пница отъ нападе́ній діа́вольскихъ, да, Тобо́ю помоществу́еми, возвесели́мся о спасе́ніи на́шемъ.

Сѣда́ленъ, гла́съ 4. Подо́бенъ: Ско́ро предвари́.

Ско́рый помо́щникъ явля́ешися, преподо́бне о́тче Меѳо́діе, съ вѣ́рою въ моли́твахъ тя́ призыва́ющимъ: даде́ся бо тебѣ́ отъ Го́спода благода́ть неду́ги врачева́ти и ско́рби утоля́ти, оби́тель же твою́ святу́ю и по сме́рти назира́ти. Сего́ ра́ди съ любо́вію почита́емъ святу́ю и всера́достную па́мять твою́. [Два́жды.]

Сла́ва, и ны́нѣ, богоро́диченъ:

Ско́рый Тво́й покро́въ, и по́мощь, и ми́лость покажи́ на рабы́ Твоя́, и во́лны, Чи́стая, укроти́ су́етныхъ по́мысловъ, и па́дшую мою́ ду́шу возста́ви, Богоро́дице: вѣ́мъ бо, вѣ́мъ, Дѣ́во, я́ко мо́жеши, ели́ко хо́щеши.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́!

Проро́комъ Бо́жіимъ Иліи́ и Крести́телю уподо́бился еси́, преподо́бне о́тче Меѳо́діе, пусты́нный жи́тель бы́въ, я́ко го́рлица уедине́нная, славосло́вія пѣ́сни еди́нъ Еди́ному Христу́ возноси́лъ еси́, воспѣва́я Того́ Боже́ственное снизхожде́ніе.

Проро́чески прови́дѣвъ преподо́бный Се́ргій имѣ́вшую устро́итися въ пусты́ни твое́й оби́тель, прише́дъ къ тебѣ́, о́тче Меѳо́діе, избра́ и благослови́ мѣ́сто, на сооруже́ніе оби́тели удо́бное, его́же посѣще́ніемъ обра́дованъ бы́въ, вку́пѣ съ ни́мъ воспѣва́лъ еси́ Спа́сово Боже́ственное снизхожде́ніе.

Проро́ка и царя́ Дави́да словесе́мъ послѣ́дуя, преподо́бне о́тче, жи́ти бра́тіи вку́пѣ въ оби́тели твое́й законоположи́лъ еси́ и о́бщаго житія́ ревни́тель бы́лъ еси́ вели́кій, примѣ́ръ собо́ю всѣ́мъ подава́я и немо́лчно воспѣва́я Христо́во Боже́ственное снизхожде́ніе.

Богоро́диченъ: Проро́ческая рече́нія на Тебѣ́ сбы́шася, Дѣ́во Богоро́дице, Ты́ бо Сло́во Бо́жіе нетлѣ́нно воплоти́ла еси́, и Невмѣсти́маго во утро́бѣ Твое́й дѣ́вственнѣй нетѣ́сно вмѣсти́ла еси́; тѣ́мъ Тя́ хвале́бно ублажа́емъ и воспѣва́емъ спаси́тельное Христо́во снизхожде́ніе.

Пѣ́снь 5.

Ирмо́съ: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди, ра́звѣ Тебе́, ино́го не вѣ́мы, и́мя Твое́ имену́емъ.

Го́спода Бо́га освяти́лъ еси́ въ души́ твое́й, преподо́бне о́тче, и же́ртвенникъ мы́сленный ду́шу твою́ содѣ́лалъ еси́, на не́мже же́ртву хвалы́ Го́сподеви возноси́лъ еси́ во смире́ніи ду́ха, немо́лчно призыва́я и́мя Бо́жіе спаси́тельное.

Госпо́дни за́повѣди животво́рныя имѣ́лъ еси́ напи́санныя на скрижа́лѣхъ се́рдца твоего́, преподо́бне о́тче, и проповѣ́дникъ бра́тіи твое́й бы́лъ еси́ ева́нгельскаго уче́нія, къ небеси́ возводя́щаго человѣ́ки, и́же, послу́шающе сего́, моли́твенно призыва́ютъ Боже́ственное Христо́во и́мя.

Госпо́день ра́бъ бы́лъ еси́, Меѳо́діе богому́дре, де́нь и но́щь труди́выйся во сла́ву Бо́жію и на по́льзу душе́вную бли́жнихъ твои́хъ, и́хже, я́ко сама́го себе́, возлюби́въ усе́рдно, гла́дныя пита́лъ еси́, ни́щія, сироты́ и вдови́цы удовля́лъ еси́, подвиза́я и́хъ сла́вити о тебѣ́ Христо́во и́мя.

Богоро́диченъ: Госпо́дня Ма́ти и Влады́чица всея́ тва́ри яви́лася еси́, Богоро́дице Марíе, нетлѣ́нно поро́ждши Еди́наго отъ Тро́ицы, Бо́га Сло́ва, Его́же моли́, Чи́стая, безслове́сныхъ страсте́й на́съ изба́вити, да въ тишинѣ́ безстра́стія се́рдцемъ и усты́ воспѣва́емъ Его́ свято́е и́мя.

Пѣ́снь 6.

Ирмо́съ: Яко во́ды морскíя, Человѣколю́бче, волна́ми жите́йскими обурева́юся. Тѣ́мже, я́ко Іо́на, та́ко вопію́ Ти: возведи́ отъ тли́ живо́тъ мо́й, Благоутро́бне Го́споди.

Яко кипари́съ высокове́рхій, возра́слъ еси́, преподо́бне Меѳо́діе, въ пусты́ни непло́днѣй и плодоноше́ніи духо́вными облагоуха́лъ еси́ Христо́ву Це́рковь, оби́тель созда́въ, и, въ не́й и́ноковъ мно́жество насели́въ, и́хже сло́вомъ и примѣ́ромъ твои́мъ ко Христу́ наста́вилъ еси́.

Яко при́сный учени́къ преподо́бнаго Се́ргія, о́тче Меѳо́діе, въ устрое́ніи оби́тели ему́ подража́лъ еси́ то́щно, слеза́ми моли́твенными па́че, не́же бога́тствомъ земны́мъ, сію́ созида́я и при́сно моля́ся ко Го́споду, да отъ тли́ грѣхо́вныя соблюде́тъ дѣ́ло руку́ твое́ю.

Яко воево́да благоиску́сный, о́тче, во́ины духо́вныя въ бране́хъ со врага́ми неви́димыми къ побѣ́дамъ руково́дствовалъ еси́: искуше́нъ бо бы́въ са́мъ въ по́двизѣхъ пусты́нныхъ, и искуша́емымъ удо́бно помога́лъ еси́ тли́ грѣхо́вныя избѣга́ти.

Богоро́диченъ: Яко вои́стинну прибѣ́жище непосты́дное христіа́номъ, и щи́тъ, и покро́въ, Ма́ти Бо́жія, воспѣва́ющія Тя́ бѣ́дъ и скорбе́й свободи́: Тя́ бо, еди́ну Благослове́нную въ жена́хъ, Тобо́ю тли́ грѣхо́вныя изба́вльшіися, немо́лчными хвала́ми ублажа́емъ.

Конда́къ, гла́съ 4:

Послуша́нія до́брый рачи́тель бы́въ, безпло́тныя враги́ сле́зными моли́твами твои́ми крѣ́пко посрами́лъ еси́ и яви́лся еси́ Пресвяты́я Тро́ицы жили́ще, Юже зря́, блаже́нне, я́сно, богому́дре Меѳо́діе преподо́бне, чуде́съ да́ръ отъ Нея́ прія́лъ еси́. Тѣ́мже исцѣля́еши съ вѣ́рою приходя́щихъ неду́ги, утоля́еши ско́рби и мо́лишися непреста́нно о всѣ́хъ на́съ.

Икосъ:

Возлюби́въ Христо́вы Боже́ственныя за́повѣди, возненави́дѣлъ еси́ мíра сего́ наслажде́ніе: пло́ть твою́, преподо́бне, во вре́меннѣй жи́зни посто́мъ, бдѣ́ніемъ и до́лу лега́ніемъ изнури́лъ еси́ и въ умерщвле́нномъ тѣлеси́ пѣ́сни немо́лчныя, хвалы́ и славосло́вія Тріеди́ному Бо́гу приноси́лъ еси́, Меѳо́діе о́тче на́шъ, отъ на́съ же слы́шиши пѣ́сни таковы́я: ра́дуйся, а́нгеле земны́й и человѣ́че небе́сный, а́нгелы удиви́вый житія́ твоего́ чистото́ю и человѣ́ки научи́вый благоугожда́ти Бо́гу; ра́дуйся, свѣти́льниче немерца́ющій Боже́ственныя благода́ти, въ животѣ́ и по сме́рти сія́яй чудесы́ и си́ми озаря́яй ду́ши и сердца́ человѣ́ческія. Ра́дуйся, при́сный на́шъ засту́пниче и о душа́хъ на́шихъ ко Го́споду моли́твенниче: мо́лишися бо непреста́нно о всѣ́хъ на́съ.

Пѣ́снь 7.

Ирмо́съ: Халде́йская пе́щь, огне́мъ распала́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Въ пещи́ искуше́ній пусты́нныхъ, о́тче Меѳо́діе, благода́ть Госпо́дню, тя́ ороша́ющую, стяжа́лъ еси́, преподо́бне, тѣ́мже непобѣди́мъ враго́мъ неви́димымъ показа́лся еси́ и вся́ прило́ги діа́вольскія крѣ́пко сокруши́лъ еси́, зовы́й немо́лчно: благослове́нъ еси́, Бо́же оте́цъ на́шихъ.

Поревнова́лъ еси́, преподо́бне о́тче, въ житіи́ твое́мъ вели́кимъ во отце́хъ Анто́нію, Пахо́мію и Евѳи́мію и, си́хъ нра́ву и чистотѣ́ вы́ну поуча́яся, я́ко безпло́тенъ, на земли́ подвиза́лся еси́, сего́ ра́ди сосу́дъ избра́нъ Ду́ху Свято́му сподо́бился еси́ бы́ти, Его́же дѣ́йствомъ чудеса́ пресла́вная содѣ́лалъ еси́ въ житіи́ и по сме́рти, о ни́хже вѣ́рніи благословля́ютъ Бо́га оте́цъ на́шихъ.

Яко кри́нъ въ пусты́ни, процвѣ́лъ еси́, преподо́бне, и благоуха́нія Христо́ва испо́лнилъ еси́ оте́чество твое́ земно́е: свѣ́томъ до́брыхъ дѣ́лъ твои́хъ озари́лъ еси́ сердца́ человѣ́ковъ, просвѣща́я и́хъ уче́ніи твои́ми и науча́я пѣ́ти Го́сподеви: благослове́нъ еси́, Бо́же оте́цъ на́шихъ.

Богоро́диченъ: Въ пещи́ халде́йской та́инство рождества́ Твоего́ проразумѣва́я, Богоро́дице, ро́ждшимся отъ Тебе́ Искупи́телемъ спасе́ніе обрѣто́хомъ и, подо́бно отроко́мъ богосло́вцемъ, Сы́ну Твоему́ и Го́споду благода́рно зове́мъ: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Ангели и небеса́, на Престо́лѣ сла́вы сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

Ангелы собесѣ́дники имѣ́лъ еси́, преподо́бне о́тче, и, си́ми укрѣпля́емый, въ пусты́ни безлю́днѣй многолѣ́тнѣ пребы́лъ еси́, еди́нъ Еди́ному Бо́гу рабо́тая. Сего́ ра́ди ны́нѣ со безпло́тными водворя́ешися и пое́ши хвале́бную пѣ́снь Тріеди́ному Бо́гу, Препѣ́тому и Превозноси́мому во вѣ́ки.

Ангела тя́ плотя́наго вѣ́мы, преподо́бне о́тче Меѳо́діе: ангелоподо́бно бо на земли́ пожи́лъ еси́, и чистоту́ души́ и тѣ́ла ре́вностно соблю́лъ еси́, ны́нѣ же водворя́ешися та́мъ, идѣ́же ничто́же скве́рно вхо́дитъ, и пое́ши немо́лчную пѣ́снь Бо́гу, Препѣ́тому и Превозноси́мому во вѣ́ки.

Ангеловъ Творе́цъ и всея́ тва́ри Созда́тель подви́жника добродѣ́телей яви́ тя́, Меѳо́діе, Его́же си́лою укрѣпля́емый, путе́мъ тѣ́снымъ ше́ствуя, дости́глъ еси́ соверше́нства духо́внаго, Ца́рствіе же Христо́во унаслѣ́довалъ еси́, и со святы́ми пое́ши ра́достно: Го́спода по́йте и превозноси́те Его́ во вѣ́ки.

Богоро́диченъ: Ангельское цѣлова́ніе прино́симъ Ти́ съ любо́вію, Богоро́дице Чи́стая: ра́дуйся, Благода́тная, Госпо́дь съ Тобо́ю. Ты́ же ра́дости нетлѣ́нныя сподо́би Тя́ по до́лгу ублажа́ющія, Ро́ждшагося же отъ Тебе́ Го́спода пою́щія и превознося́щія во вѣ́ки.

Пѣ́снь 9.

Ирмо́съ: Чу́жде ма́теремъ дѣ́вство, и стра́нно дѣ́вамъ дѣторожде́ніе, на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ.

Чу́ждъ бы́лъ еси́, преподо́бне, превозноше́нія тщесла́внаго и въ смире́ніи глубо́цѣмъ житіе́ твое́ препроводи́лъ еси́: о́бразъ смире́нія бы́лъ еси́ твои́мъ ученико́мъ, и́хже при́сно поуча́лъ еси́ бѣ́гати душепа́губныя горды́ни и во смире́ніи ду́ха велича́ти Христа́ Жизнода́вца.

Чу́ждымъ прише́льцемъ и стра́нникомъ убо́гимъ врата́ оби́тели твоея́ незатворе́на бы́ша, преподо́бне о́тче, но, Авраа́мово страннолю́біе стяжа́въ, сія́ съ любо́вію пріима́лъ и упокоева́лъ еси́, зря́ въ ни́хъ Самого́ Христа́, Его́же при́сно велича́лъ еси́.

Чу́ждъ пра́здности бы́лъ еси́, блаже́нне, но при́сно въ моли́твахъ и трудѣ́хъ тѣле́сныхъ подвиза́лся еси́, при сооруже́ніи же оби́тели твоея́ святы́я мно́гія вели́кія труды́ подъя́лъ еси́, си́лою Го́спода си́лъ укрѣпля́емый, Его́же гла́сы хвале́бными немо́лчно велича́лъ еси́.

Богоро́диченъ: Чу́ждыхъ на́съ яви́, Влады́чице, вла́сти лю́таго міроде́ржца и въ ча́съ кончи́ны на́шея на по́мощь ускори́ къ на́мъ, безпомо́щнымъ: мно́го бо мо́жетъ Ма́терняя моли́тва Твоя́ ко Го́споду, и трепе́щутъ предъ Тобо́ю ду́си тмы́, и́хже наси́лія на́съ изба́ви, Всеблага́я, да Тя́ славосло́віи ра́достными велича́емъ.

Свѣти́ленъ:

Процвѣ́лъ еси́ въ по́стническихъ по́двизѣхъ, прехва́льне о́тче, и пло́дъ чудотворе́нія прине́слъ еси́ Христо́вой Це́ркви, я́же и́мать тя́, я́ко шипо́къ благово́ненъ, мѵ́ромъ Ду́ха Свята́го напо́лненный, и́мже злово́ніе страсте́й упраздня́ется и исцѣле́нія подаю́тся съ вѣ́рою и любо́вію къ тебѣ́ притека́ющимъ. [Два́жды.]

Сла́ва, и ны́нѣ, богоро́диченъ:

Тя́ пѣ́сньми немо́лчными ублажа́емъ, Дѣ́во, я́ко отъ Тро́ицы Еди́наго родила́ еси́, Богоро́дице, и яви́ла еси́ на́мъ, потемне́ннымъ, свѣ́тъ спасе́нія Боже́ственнымъ и Пречи́стымъ Твои́мъ Рождество́мъ.

На хвали́техъ стихи́ры на 4, гла́съ 5. Подо́бенъ: Ра́дуйся, по́стниковъ.

Ра́дуйся, о́тче Меѳо́діе, звѣздо́ пресвѣ́тлая, не́бо Россíйскія Це́ркве озари́вшая; ра́дуйся, вели́каго Се́ргія пресла́вный учениче́ и вселюби́мый, труда́ми подвиго́въ твои́хъ ему́ подража́вый; ра́дуйся, предста́телю и помо́щниче ско́рый въ моли́твахъ тя́ призыва́ющихъ: предвари́ и подви́гни святы́я моли́твы твоя́ о на́съ ко Го́споду и да́нною ти́ отъ Него́ благода́тію неду́ги на́ша душе́вныя и тѣле́сныя исцѣли́, прося́ дарова́ти на́мъ ве́лію ми́лость. [Два́жды.]

Ра́дуйся, главо́ освяще́нная, жили́ще Ду́ха Свята́го, сосу́де избра́нный Бо́жія благода́ти, наста́ви всѣ́хъ на́съ, о́тче, ходи́ти путе́мъ богоуго́дныхъ исправле́ній твои́хъ и преклони́ся ми́лостивно къ гла́сомъ хвале́бнымъ, и́миже честву́емъ святу́ю и всера́достную па́мять твою́. Боля́щихъ цѣли́телю и печа́льныхъ утѣ́шителю, помяни́ на́съ въ моли́твахъ твои́хъ ко Го́споду и проси́ на́мъ у бла́гости Его́ ве́лію ми́лость.

Ра́дуйся, и́ноковъ пра́вило, преподо́бныхъ красото́, чуде́съ боже́ственныхъ соверши́телю, Меѳо́діе богоно́сне, блиста́ньми чуде́съ твои́хъ озаря́яй оте́чество твое́ земно́е и си́ми утвержда́яй на́съ въ Правосла́внѣй вѣ́рѣ, честну́ю па́мять твою́ соверша́ющимъ, пода́ждь да́ры цѣле́бныя, коему́ждо по потре́бѣ, и моли́ Христа́ Бо́га дарова́ти на́мъ ве́лію ми́лость.

Слава, гласъ 6:

Преподо́бне о́тче Меѳо́діе, во вся́ концы́ страны́ Россíйскія изы́де вѣща́ніе чуде́съ твои́хъ и сла́ва сострада́нія твоего́ къ лю́демъ, сего́ ра́ди честву́емъ съ любо́вію святу́ю па́мять твою́, я́ко вели́каго уго́дника Бо́жія, чудотво́рца же пресла́внаго, и уми́льно глаго́лемъ: о́тче преподо́бне, моли́ся ко Го́споду о спасе́ніи ду́шъ на́шихъ.

И ны́нѣ, богоро́диченъ:

Никто́же, притека́яй къ Тебѣ́, посра́мленъ отъ Тебе́ исхо́дитъ, Пречи́стая Богоро́дице Дѣ́во, но про́ситъ благода́ти и пріе́млетъ дарова́ніе къ поле́зному проше́нію.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нны отъ кано́на, пѣ́сни 3-я и 6-я. [Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Слу́жба и ака́ѳистъ преподо́бному и богоно́сному отцу́ на́шему Меѳо́дію, игу́мену Пѣ́шношскому, чудотво́рцу. — М.: Въ Сѵнода́льной Тѵпогра́фіи, 1885. — Л. 2 – 13, 36 – 39 об.

/ Къ оглавленію раздѣла /


Наверхъ / Къ титульной страницѣ

0