Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 4-й де́нь.
Иже во святы́хъ отца́ на́шего Митрофа́на, патріа́рха Константи́на гра́да.

[ВЕЧЕРЪ,]
На Го́споди воззва́хъ: стихи́ры, гла́съ 6. Подо́бенъ: Все́ отло́жше.

Просвѣти́ся житіе́ твое́* добродѣ́тельными свѣтлостьми́,* вѣ́рныя просвѣти́лъ еси́* и ле́сти тму́ разгна́лъ еси́,* и́стинное бо яви́лся еси́ свѣтоза́рное со́лнце,* святи́телю преблаже́нне Митрофа́не,* и ны́нѣ всели́лся еси́,* идѣ́же сія́етъ Свѣ́тъ невече́рній,* и сы́нъ дне́ благода́тію Ду́ха Свята́го бы́въ.* Тѣ́мже твою́ боже́ственную па́мять и свѣтоно́сную* че́стно соверша́юще, приснопа́мятне,* любо́вію почита́емъ.

Умъ тво́й, манове́ніемъ е́же къ Бо́гу,* богому́дре, вѣ́рою удобря́емь,* свѣ́телъ яви́ся, всесла́вне:* въ ме́ртвеннѣмъ тѣ́лѣ и тлѣ́ннѣмъ, прему́дре,* нетлѣ́нію поучи́вся,* притяжа́лъ еси́ безпло́тныхъ свѣ́тлости* и страсте́й внѣ́ бы́въ,* безстра́стіемъ украша́яся, Митрофа́не,* о́тче святи́телю прему́дре,* свѣ́тлый свѣти́льниче* и моли́твенниче о чту́щихъ любо́вію па́мять твою́.

Сла́ва, и ны́нѣ, пра́здника или́ богоро́диченъ:

Ра́дуйся, зако́на исполне́ніе;* ра́дуйся, хра́ме Святы́я Тро́ицы,* Невѣ́сто нетлѣ́нная;* ра́дуйся, боже́ственное носи́ло всѣ́хъ Царя́;* ра́дуйся, огню́ невеще́ственный,* я́ко клеща́, нося́щи на рука́хъ Твои́хъ Угля,* но́вый раю́, вертогра́дъ затворе́нный,* трапе́за боже́ственная пресвѣ́тлая,* голуби́це нескве́рная,* престо́ле Вы́шняго,* о́дръ боже́ственный мы́сленный,* Юже Ду́хъ Святы́й, Отрокови́це, осѣни́.

Крестобогоро́диченъ:

Агнца своего́* Агница нескве́рная дре́вле* и непоро́чная Влады́чица* на крестѣ́ воздви́жена я́ко узрѣ́,* ма́терски восклица́ше* и, дивя́щися, вопія́ше:* Ча́до сладча́йшее,* что́ видѣ́ніе сіе́* но́вое и пресла́вное?* Ка́ко собо́ръ безблагода́тный* суди́щу Пила́тову предаде́ Тя* и осужда́етъ на сме́рть всѣ́хъ Живота́?* Но воспѣва́ю Твое́ неизрече́нное,* Сло́ве, схожде́ніе.

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́ Яже веще́й Истина: сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Митрофа́не, моли́ Христа́ Бо́га спасти́ся душа́мъ на́шимъ.


[НА УТРЕНИ,]
Кано́нъ, его́же краегране́сіе: Вели́каго Митрофа́на пою́ сла́ву. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Съ вы́шними ли́ки я́ко святи́тель, я́ко Бо́жій служи́тель предстоя́, о на́съ прилѣ́жно моли́ся, получи́ти на́мъ вѣ́чная блага́я моли́твами твои́ми.

Избра́нъ бы́въ Го́сподеви служи́ти честно́му Ева́нгелію, блаже́нне Митрофа́не, во благоразу́міи лю́ди уче́ніи прему́дрыми, о́тче, возрасти́лъ еси́.

Ра́зумомъ Бо́жіимъ обога́щся, сло́во живо́тное отъ се́рдца источи́лъ еси́, напоя́я ду́ши, олядѣ́вшія страстьми́, прему́дре святи́телю Бо́жій, Митрофа́не богоблаже́нне.

Богоро́диченъ: Свяще́нный ли́къ проро́ческій проявля́ше издале́ча хотя́щую Тя́ бы́ти Бо́жію и́стинную Роди́тельницу, Чи́стая, вы́шшую херуви́мъ и всея́ тва́ри.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Иска́пая боже́ственную сла́дость изъ усте́нъ твои́хъ, о́тче, и го́рькаго безбо́жія изсуши́лъ еси́ ка́пли, напои́въ благочести́выхъ питіе́мъ Бо́жіяго ра́зума, блаже́нне.

Бо́жіимъ судо́мъ произбра́нъ бы́въ, святи́тель показа́лся еси́, безкро́вны же́ртвы Бо́гу принося́, поже́ршемуся на́съ ра́ди, о́тче святи́телю Митрофа́не.

Гро́бъ, идѣ́же лежи́тъ честно́е тѣ́ло твое́, благово́ніе источа́етъ, я́ко ра́й Бо́жій, облагоуха́я вѣ́рныя, святи́телю пресла́вне и всече́стне Митрофа́не.

Богоро́диченъ: Разумѣ́ти рождества́ Твоего́, Чи́стая, неизрече́нныя глубины́ недоумѣ́етъ у́мъ человѣ́чь: Бо́гъ бо, Себе́ смири́въ щедро́тъ ра́ди, во чре́вѣ Твое́мъ всего́ мя́ обнови́.

Конда́къ, гла́съ 2. Подо́бенъ: Вы́шнихъ ища́.

Вѣ́ру Христо́ву я́сно ты́ проповѣ́далъ еси́ и, сію́ соблюда́я, во мно́жество вои́стинну возрасти́лъ еси́ вѣ́рное твое́ ста́до. Тѣ́мже со а́нгелы, Митрофа́не, сра́дуешися, Христу́ моля́ся непреста́нно о всѣ́хъ на́съ.

Та́же сѣда́ленъ, гла́съ 8. Подо́бенъ: Прему́дрости.

Надъ страстьми́ ца́рствовавъ плотски́ми, святи́тель яви́лся еси́ богоподо́бенъ и ца́рствующій гра́дъ пресла́вно упа́слъ еси́, отгна́въ полки́ ерети́ческія, преподо́бне, па́лицею слове́съ боже́ственныхъ, богодохнове́нне, тѣ́мже по кончи́нѣ неконча́емую благода́ть досто́йно наслѣ́довалъ еси́, святи́телю блаже́нне. Сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе дарова́ти чту́щимъ всечестну́ю твою́ па́мять.

Сла́ва, и ны́нѣ, пра́здника или́ богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, Иже изъ Тебе́ воплоще́нному безъ сѣ́мени, моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Ты́ испо́лненъ Свята́го Ду́ха, свяще́нный о́тче Митрофа́не, лука́выя ду́хи отъ человѣ́къ отгна́лъ еси́, вѣ́рны же духо́вными уче́ніи твои́ми сотвори́лъ еси́.

Еди́ницу несозда́нную богосло́вилъ еси́, Треми́ Ли́цы раздѣля́ему, непресѣко́му и несмѣ́сну, просвѣща́я благочести́выя свяще́нными богосло́віи твои́ми.

Умертви́въ пе́рвѣе плотска́я мудрова́нія воздержа́ніемъ и труды́, святи́тель боже́ственъ показа́лся еси́ и предста́тель Тро́ицѣ всесвяще́нъ.

Богоро́диченъ: Кля́тва разори́ся пра́бабняя Тобо́ю, Богома́ти: Ты́ бо на́мъ, Пречи́стая, Исто́чника породила́ еси́ святы́ни, присносу́щнаго Живота́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Бо́жія боже́ственнѣ соверша́я и чистѣ́йшимъ по́мысломъ чи́стымъ прикаса́яся, непоро́ченъ яви́лся еси́, служа́ Бо́гу, я́ко Бо́жій святи́тель свяще́ннѣйшій.

Идольстіи уго́дницы бы́ша уго́дницы Бо́гу твои́ми уче́ніи честны́ми, и́хже отъ недосто́йныхъ изыма́я, досто́инъ яви́лся еси́ уго́дникъ Бо́гу Вседержи́телю.

Благода́тію призва́нъ бы́въ, разруши́лъ еси́ безбо́жія и́дольская одожде́ніемъ слове́съ твои́хъ, преподо́бне, оляденѣ́вшая сердца́ плодоно́сна содѣ́лалъ еси́ Бо́жіею благода́тію.

Богоро́диченъ: По рождествѣ́ Твое́мъ стра́ннѣмъ пребыла́ еси́ Дѣ́вою, я́коже пре́жде: Бо́гъ бо бѣ́ рожде́йся и претворя́яй вся́ во́лею, безму́жная Марíе Богоневѣ́стная.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Язы́къ тво́й, Ду́хомъ изощре́нъ разу́мно, я́ко тро́сть скоропи́сца, написа́ въ сердца́хъ благочести́выхъ сло́во благода́тное, всесвяще́нне о́тче, Бо́жіимъ манове́ніемъ.

Боже́ственнымъ поуча́яся, я́ко входя́ въ мы́сленная Свята́я святы́хъ, вѣ́рныхъ соверша́еши Ду́хомъ, Тро́ическою заре́ю, свяще́нный о́тче всесоверше́ннѣйшій Митрофа́не.

Струя́ми велѣ́ній твои́хъ загради́въ му́тная нечести́выхъ велѣ́нія, я́ко рѣка́ показа́лся еси́ ми́рная, благоче́стіемъ напоя́я составле́нія вѣ́рныхъ, святи́телю всече́стне.

Богоро́диченъ: Сло́во во чре́вѣ Твое́мъ всели́ся безъ сѣ́мене, и Человѣ́къ яви́ся соверше́нъ, обновля́я естество́ боголѣ́пно, я́коже Са́мъ вѣ́сть еди́нъ, Богопрія́тная Отрокови́це Всенепоро́чная.

Конда́къ, гла́съ 4. Подо́бенъ: Яви́лся еси́ дне́сь.

Отъ младе́нства яви́лся еси́ че́стенъ сосу́дъ, святи́тель бы́въ избра́нъ Бо́гу, Ему́же съ весе́ліемъ взыва́лъ еси́: ра́венъ еси́, Христе́, Отцу́ и Ду́ху.

Икосъ:

Тако́въ подоба́ше на́мъ архіере́й, и таи́нникъ Сло́ва, и служи́тель, я́коже Па́велъ взыва́етъ, боже́ственный орга́нъ Христо́въ, слу́жбы принося́ всегда́ Бо́гу, я́ко непоро́ченъ и че́стенъ: тѣ́ломъ у́бо тлѣ́ннымъ ви́димь обложи́мь, со безпло́тными же бесѣ́дуя въ служе́ніи и лю́демъ согрѣше́нія отъе́мля мѣ́риломъ пра́веднымъ, я́коже вели́кій святи́тель ны́нѣ Митрофа́нъ яви́ся на́мъ, проповѣ́давъ со дерзнове́ніемъ: ра́венъ еси́, Христе́, Отцу́ и Ду́ху.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Просвѣща́емь духо́вною благода́тію я́же къ боже́ственному манове́нію причаще́ніи, свѣтода́тельная бы́лъ еси́ звѣзда́, просвѣща́я, му́дре, пою́щія: благослове́нъ Бо́гъ оте́цъ на́шихъ.

Святѣ́йшая це́рковь бы́въ, озаря́ема добродѣ́тельными дѣя́ніи, живу́щу имѣ́лъ еси́ въ тебѣ́, свяще́нне, Тро́ицу несозда́нную, вопія́: благослове́нъ Бо́гъ оте́цъ на́шихъ.

Дрема́ніе отъ о́чію отри́нувъ боже́ственными бодростьми́, Бо́жія сія́нія прія́лъ еси́ отъ а́нгела свѣ́та, сто́лпъ и подпо́ръ вѣ́рнымъ, святи́теля и́стинна соверша́юща тя́.

Богоро́диченъ: Сѣдя́й въ нѣ́дрѣхъ Роди́теля неопи́санъ, въ нѣ́дрѣхъ Твои́хъ, Пречи́стая, ны́нѣ сѣди́тъ опи́санъ, Твои́мъ обложе́нъ зра́комъ, за спасе́ніе Ада́мле опи́санъ бы́въ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Го́рдаго змíя смире́ніемъ твои́мъ смири́лъ еси́, блаже́нне, возвыша́емь къ Бо́гу чи́стыми твои́ми ра́зумы, тѣ́мже тя́ чти́мъ, Христа́ превознося́ще во вѣ́ки.

Воплоще́нно Сло́во богосло́вилъ еси́ и лю́ди отъ рабо́тныя ле́сти спа́слъ еси́; отгоня́я и́дольская нече́стія, о́тче святи́телю Митрофа́не, прему́дре и богоно́се.

Житіе́ твое́ Влады́цѣ твоему́ имѣ́я подо́бно и сло́во житію́ имѣ́я подо́бящееся, испо́лненъ бы́въ дне́й духо́вныхъ, о́тче, въ вы́шняя преше́лъ еси́ поко́ища.

Богоро́диченъ: Изба́вльшеся пе́рвыя кля́твы Твои́мъ Рождество́мъ, Преблагослове́нная Отрокови́це Богора́дованная, гла́съ Гавріи́ловъ возсыла́емъ Ти́: ра́дуйся, вина́ всѣ́хъ спасе́нія.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Въ зе́млю кро́ткихъ ты́ всели́лся еси́, святи́телю, кро́токъ и незло́бивъ бы́въ, съ вы́шними совокупля́яся во́инствы, ве́сь укра́шенъ добродѣ́тельными свѣтлостьми́ и свѣ́томъ добродѣ́телей преодѣ́янъ.

Зри́ши Бо́жія и а́нгельскія свѣ́тлости, патріа́рхъ и му́ченикъ, и апо́стольскія красоты́, моля́ съ ни́ми Человѣколю́бца оставле́ніе грѣхо́въ и житія́ исправле́ніе дарова́ти на́мъ, преподо́бне, хва́лящимъ тя́.

Явѣ престо́лъ пе́рвѣе украси́лъ еси́ свѣ́тло всѣ́хъ предсѣдя́щихъ градо́въ, въ не́мже пожи́въ, я́ко а́нгелъ, и, святи́тельствомъ се́й украси́въ, пома́завъ, освяти́лъ еси́, соверши́въ лю́ди богому́дры.

Богоро́диченъ: Якоже ка́пля небе́сная, во Твое́ чре́во, Дѣ́во, До́ждь сни́де и изсуши́ пото́ки ле́стныя, одожди́ нетлѣ́ніе всѣ́мъ человѣ́комъ, и избавле́ніе Тобо́ю, Богора́дованная, дарова́ся.

Свѣти́ленъ. Подо́бенъ: Жены́, услы́шите.

Звѣзду́ тя́ многосвѣ́тлую Це́ркве зна́емъ, Митрофа́не святи́телю, патріа́рховъ свѣ́тлость: Аріево бо хуле́ніе собо́рнѣ низложи́лъ еси́, правосла́вными уче́ніи Це́рковь уясни́въ. Тѣ́мже вѣ́рно тя́ пое́мъ.

Сла́ва, и ны́нѣ, богоро́диченъ:

Прему́дрость Ѵпоста́сную, и Сло́во Пресу́щное, и Врача́ ду́шъ и тѣле́съ ро́ждшая, гное́ніе и я́звы души́ моея́ исцѣли́ лю́тыя и лѣ́тныя, и се́рдца моего́ уста́ви болѣ́зни, Дѣ́во.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 27 об. – 31 об.

/ Къ оглавленію раздѣла /


Наверхъ / Къ титульной страницѣ

0