Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 3-й де́нь.
Свята́го му́ченика Лукилліа́на и и́же съ ни́мъ.

[ВЕЧЕРЪ,]
Стихи́ры, гла́съ 1. Подо́бенъ: Всехва́льніи му́ченицы.

Дѣ́ти всесвяще́нныя,* я́коже отцу́, повину́ющеся тебѣ́,* съ тобо́ю пострада́ша тве́рдо,* и сла́вная и преподо́бная Па́вла,* му́ченица досточу́дная,* съ ни́миже ны́нѣ живе́ши на небесѣ́хъ,* Христа́ моли́* дарова́ти душа́мъ на́шимъ ми́ръ* и ве́лію ми́лость.

Исцѣле́ній во́ды* твоя́ ра́ка притека́ющимъ источа́етъ всегда́,* му́чениче многострада́льне,* и омыва́етъ стра́сти,* и потопля́етъ полки́ де́монскія* дѣ́йствомъ Ду́ха Свята́го.* Тѣ́мже моли́ся* дарова́ти душа́мъ на́шимъ ми́ръ* и ве́лію ми́лость.

Стихи́ры Богоро́дицы, гла́съ и подо́бенъ то́йже:

Ра́дуйся, стра́нное слы́шаніе, Чи́стая;* ра́дуйся, дре́во свято́е,* рая́ богосажде́нное;* ра́дуйся, потребле́ніе лука́выхъ де́моновъ;* ра́дуйся, ору́жіе обою́ду о́строе,* врага́ главу́ отсѣ́кши* стра́ннымъ рождество́мъ Твои́мъ,* Всесвята́я Пренепоро́чная,* устра́ншіяся ны́ воззови́.

Неду́говавшую, Пресвята́я, лю́тѣ* ду́шу мою́ страстьми́ лука́выми исцѣли́,* Яже Цѣли́теля и Спа́са* всѣ́хъ Христа́ ро́ждшая,* вся́ку я́зю исцѣли́вшаго* уя́звленныхъ діа́вольскимъ зломы́сліемъ* и сме́рти на́съ измѣ́ншаго.

Пресвяты́й хра́ме Бо́жій,* небе́съ ши́ршій* и херуви́мъ святѣ́йшій,* богора́дованная Всесвята́я Отрокови́це,* у́мъ мо́й облагодати́* и просвѣти́ серде́чныя о́чи,* подаю́щи ми́ благопрія́тными хода́тайствы Твои́ми* согрѣше́ній всѣ́хъ проще́ніе.

Сла́ва, и ны́нѣ, богоро́диченъ:

Увы́ мнѣ́, что́ бу́ду,* у́мъ, и ду́шу,* и тѣ́ло же оскверни́въ прегрѣше́ньми?* Что́ сотворю́?* ка́ко же избѣжу́ пла́мене нестерпи́маго,* нерѣши́мыхъ у́зъ и вѣ́чныхъ?* Но, о Всенепоро́чная,* пре́жде конца́ моли́ Сы́на Твоего́* пода́ти ми́ оставле́ніе.

Крестобогоро́диченъ:

Своего́ Агнца* Агница и Непоро́чная Влады́чица* на Крестѣ́ я́ко ви́дѣ,* зра́ка не иму́ща, ниже́ добро́ты,* увы́ Мнѣ́, рыда́ющи, глаго́лаше,* гдѣ́ добро́та Твоя́ за́йде, Сладча́йшій?* гдѣ́ благолѣ́піе,* гдѣ́ благода́ть блиста́ющая* о́браза Твоего́,* Сы́не Мо́й любе́знѣйшій?


[НА УТРЕНИ,]
Кано́нъ, его́же краегране́сіе: Лукилліа́на му́ченика пою́ сла́ву. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Сло́ва тя́ Бо́жія уго́дника, му́чениковъ же сла́ву, воспѣва́ю, Лукилліа́не, тѣ́мже мнѣ́ моли́твами твои́ми пода́ждь очище́ніе злы́хъ и исцѣле́ніе.

Все́ю мы́слію же и душе́ю ве́сь прилѣпи́лся еси́ любви́ Христо́вѣ и и́дольскія пре́лести, и не́мощи, му́дре, пренебре́глъ еси́.

Па́че всея́ сла́вы земны́я томи́тельнаго безсла́вія жела́я, нестарѣ́емую сла́ву, богоблаже́нне, небе́сную наслѣ́дилъ еси́.

Богоро́диченъ: Лѣ́ствица, ю́же ви́дѣ Іа́ковъ, Ты́ еси́, Богоро́дице: Тобо́ю бо су́щимъ на земли́ Сло́во соедини́ся и на высоту́ человѣ́ческое существо́ привлече́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Іу́да предаде́ Изба́вителя Христа́ дре́вле богоубíйцамъ, ты́ же ны́нѣ беззако́ннымъ іуде́емъ пре́данъ бы́лъ еси́.

Словесы́ тя́ льсте́цъ прельсти́ти ласка́тельными покуша́яся, яви́ся твои́ми словесы́, я́коже ка́меніемъ, страда́льче, біе́мь.

Свѣти́льникъ пресвѣ́телъ стра́ждущимъ съ тобо́ю бы́лъ еси́, свѣ́тло наставля́я на боже́ственныя стези́ та́мошняго наслажде́нія.

Богоро́диченъ: Ми́лостиву бы́ти ми́ молю́ся, Твои́ми, Влады́чице, дерзнове́ньми, изъ Тебе́ рожде́нному, въ де́нь Суда́.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Огню́ приближа́яся, ника́коже опали́лся еси́, о Лукилліа́не, страда́льче доблему́дренне, ро́су бо стяжа́лъ еси́ Бо́жію устужа́ющую. Тѣ́мже соверши́лъ еси́ е́же па́че естества́ по́двиги, ра́дуяся со младе́нцы святы́ми, съ ни́миже на́съ помина́й.

Сла́ва, и ны́нѣ, пра́здника или́ богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ вы́шними си́лами пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

Крестобогоро́диченъ:

Зря́щи Тя́, Христе́, Всенепоро́чная Ма́ти ме́ртва на Крестѣ́ просте́рта, вопія́ше: Сы́не Мо́й, собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Блиста́еши словесы́ твои́ми и просвѣща́еши мíръ страда́ніи твои́ми, мучи́телей же сопротивле́ніе, я́ко мглу́, отгоня́еши, непостоя́нную.

Но́вый яви́лся еси́ вѣ́рою Авраа́мъ, и́же дре́вле оправда́ся о Христѣ́: позна́ніемъ бо Зижди́теля твоего́ отве́рглъ еси́ все́ су́етство.

Всегуби́теля тя́ ле́сти и болѣ́зненныхъ страсте́й исцѣли́теля, вѣ́рніи, стяжа́вше, му́чениче сла́вне, насыща́емся всегда́ исцѣле́ній.

Богоро́диченъ: Па́че ума́ та́инство рождества́ Твоего́, Приснодѣ́во: во утро́бѣ бо заче́нши Бо́га, неизрече́ннымъ сло́вомъ породила́ еси́.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Еди́не врачу́ ду́шъ и тѣле́съ, Христе́, му́чениковъ мольба́ми страсте́й мои́хъ болѣ́зни исцѣли́.

Цвѣ́тъ свяще́ненъ дѣ́ланіемъ Ду́ха показа́лся еси́, му́чениче сла́вне, благопло́дія во страда́ніяхъ предлага́я.

Глаго́лы живо́тныя въ се́рдцы имѣ́я, му́дре, мучи́тельская преще́нія твои́мъ сопротивле́ніемъ умертви́лъ еси́, сла́вне.

Богоро́диченъ: Стѣ́ну необори́му, и приста́нище, и утверже́ніе, и наде́жду, Богома́ти Чи́стая, и боже́ственное ору́жіе иму́ще Тя́, спаса́емся.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Возвы́сивъ твое́ мы́сленно боже́ственное души́ жела́ніе, ко огню́ томи́тельному де́рзостнѣ устреми́лся еси́ и росо́ю Ду́ха съ дѣтьми́ прохлади́лся еси́, страда́льче всеблаже́нне.

Укрѣпи́вшися му́ченица му́драя Па́вла наказа́ніи твои́ми, му́жествовавши терпѣли́вно на льсти́ваго и вѣне́цъ прія́тъ пра́вды отъ руки́ Страстополо́жника Христа́.

Зря́ твое́ непрекло́нное, я́ко го́ру Сіо́нъ неподви́жиму, не терпя́ше вра́гъ, но ве́сь посрами́ся и, къ земли́ попира́емь, отъ тебе́, богому́драя, въ по́двизѣ стира́ется.

Богоро́диченъ: Зачала́ еси́ вои́стинну Боже́ственное Сло́во во утро́бѣ Твое́й и Сего́ па́че естества́ родила́ еси́, Пречи́стая, Его́же моли́твами Твои́ми ми́лостива сотвори́, отъ бѣ́дъ вся́ изба́вити рабы́ Твоя́.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Съ Па́вломъ вопія́лъ еси́, му́чениче: не разлучи́тъ мя́ отъ любве́ Христо́вы ни бѣда́, ни ско́рбь, ни ра́ны, ни ме́чь. Тѣ́мже и взыва́лъ еси́: оте́цъ на́шихъ Бо́же, благослове́нъ еси́. [Два́жды.]

На ка́мени утверди́лъ еси́ исповѣ́данія боже́ственнаго но́ги твоя́, непоколеби́мь яви́вся молво́ю бѣ́дъ. Тѣ́мже взыва́лъ еси́: оте́цъ на́шихъ Бо́же, благослове́нъ еси́.

Богоро́диченъ: Изба́вихомся, Дѣ́во, вси́ отъ страсте́й, и бѣ́дъ, и обстоя́ній, и неду́гъ многообра́зныхъ мольба́ми Твои́ми, Пречи́стая Богома́ти, взыва́ющіи: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

При боже́ственныхъ я́ко вои́стинну исхо́дищахъ насажде́нъ бы́въ вѣ́рою Госпо́днею, дре́во яви́лся еси́, преблаже́нне, живоно́сное. [Два́жды.]

Украси́вшеся страда́льцы добро́тою честна́го Христо́ва исповѣ́данія, вѣне́цъ съ небесе́ прія́ша досто́йно.

Богоро́диченъ: Прекло́ншагося болѣ́зньми и па́дшася, возста́ви мя́, Богома́ти, я́ко да Тя́ сла́влю во вся́ вѣ́ки.

Пѣ́снь 9.

Ирмо́съ: Велича́емъ Тя́, Всенепоро́чную Ма́терь Христа́ Бо́га на́шего, Юже осѣни́ Ду́хъ Святы́й.

Слове́снаго рая́ цвѣ́ты, ви́дяще Христо́вы благово́нныя му́ченики дне́сь, хвала́ми велича́емъ.

Свѣтоно́сцы я́вльшеся и́стинно Це́ркве Христа́ Бо́га, му́ченицы сія́ютъ исповѣ́данія свѣ́томъ.

Страсте́й болѣ́зни моли́твами страстоте́рпецъ исцѣли́вый, и моя́ ны́нѣ исцѣли́ болѣ́зни, Человѣколю́бче.

Богоро́диченъ: Тебе́, стѣ́ну, и покро́въ, и небу́рное приста́нище, Всенепоро́чная, вѣ́рніи, стяжа́хомъ, Еюже и спаса́емся.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 24 об. – 27 об.

/ Къ оглавленію раздѣла /


Наверхъ / Къ титульной страницѣ

0