Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 3-й де́нь.
Слу́жба свято́му блговѣ́рному царе́вичу Дими́трію на пренесе́ніе честны́хъ моще́й его́ отъ гра́да Углеча въ ца́рствующій гра́дъ Москву́
[1].

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди возва́хъ, стихи́ры на 8, гласъ 5. Подо́бенъ: Ра́дуйся.

Ра́дуйся, до́брый вѣне́чниче, благовѣ́рный царе́виче Дими́тріе, я́ко сугу́бый да́ръ прія́лъ еси́ отъ Бо́га: духо́внымъ бо вку́пѣ и тѣле́снымъ сія́еши дѣ́йствомъ, и у́бо на небесѣ́хъ свята́я душа́ твоя́, я́ко со́лнце, сія́етъ, здѣ́ же мо́щи твоя́ въ нетлѣ́ніи пребыва́юще, просвѣще́ніе подаю́тъ всѣ́мъ, приходя́щимъ въ ни́мъ съ вѣ́рою, и Христа́ воспѣва́ющимъ усе́рдно, и прося́щимъ отъ Него́ грѣхо́въ проще́ніе. Тѣ́мже моли́ Его́ дарова́ти на́мъ въ де́нь Су́дный ми́лость.

Ра́дуйся, но́вый предста́телю къ Бо́гу, благоро́дне царе́виче Дими́тріе, я́ко предстои́ши Ему́, Безсме́ртному Царю́ и Влады́цѣ, наслажда́яся отъ Него́ боже́ственнаго свѣтосія́нія, и мо́лишися о держа́вѣ сро́дникъ твои́хъ, о е́же е́й ненавѣ́тней бы́ти отъ вся́каго зла́го нахожде́нія, и всѣ́мъ честны́я твоя́ мо́щи почита́ющимъ и пра́зднующимъ де́нь честна́го и́хъ пренесе́нія. Тѣ́мъ мо́лимъ тя́: непреста́нно моли́ о душа́хъ на́шихъ.

Ины стихи́ры, гла́съ 1. Подо́бенъ: Прехва́лніи му́ченицы.

Весели́ся ны́нѣ, гра́де Москва́, иму́щи въ себѣ́ мо́щи но́ваго сего́ на́шего предста́теля и моле́бника къ Бо́гу, благовѣ́рнаго царе́вича Дими́трія, и́же вы́ну предстои́тъ Невече́рнему Свѣ́ту, и зри́тъ неизрече́нную Его́ сла́ву, и мо́литъ И при́сно, дарова́ти душа́мъ на́шимъ ми́ръ и ве́лию ми́лость. [Дважды.]

Красу́йся ты́, Це́ркве Бо́жія, ликовству́йте, вси́ моско́встіи наро́ди, зря́ще ве́щь ди́вну и пресла́вну — лежа́щія во святѣ́мъ хра́мѣ се́мъ мо́щи благоро́днаго царе́вича Дими́трія, исцѣле́ніе подаю́ща всѣ́мъ, приходя́щимъ къ ни́мъ съ вѣ́рою, и любо́вію почита́ющимъ я́, и Христа́ усе́рдно воспѣва́ющимъ.

Возра́довашася чи́ни а́нгельстіи, возвесели́шася пра́ведныхъ ли́цы, зря́ще сію́ пра́ведную ду́шу, возноси́му на не́бо, и покланя́ющуся Боже́ственному престо́лу, и причте́ну съ му́ченическими ли́ки, съ ни́ми же ны́нѣ славосло́витъ и мо́литъ Бо́га, дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 6:

Пріиди́те, вси́ благоче́стія рачи́теліе, во святу́ю сію́ и вели́кую це́рковь небе́сныхъ си́лъ воево́ды, Архистрати́га Михаи́ла, идѣ́же лежа́тъ мо́щи пра́веднаго сего́, благовѣ́рнаго царе́вича Дими́трія. И припаде́мъ къ ра́цѣ моще́й его́, и возопіе́мъ къ нему́, си́це глаго́люще: ра́дуйся, благочести́вая ца́рская о́трасле, благовѣ́рный царе́виче Дими́тріе, я́ко вели́кому да́ру отъ Бо́га сподо́бился еси́ здѣ́ и во о́номъ вѣ́цѣ, и у́бо въ го́рнихъ, я́ко со́лнце, сія́еши благоро́дною свое́ю душе́ю, здѣ́ же въ до́лнихъ, пра́ведныя твоя́ мо́щи цѣ́лы и невреди́мы пребыва́ютъ, и, я́ко арома́та благово́нны, лежа́ще во святѣ́мъ хра́мѣ се́мъ, благода́ть подаю́тъ всѣ́мъ, приходя́щимъ къ ни́мъ съ вѣ́рою, и Христа́ усе́рдно воспѣва́ющимъ, Его́ же моли́ дарова́ти на́мъ ве́лію ми́лость.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́ и чте́нія му́ченическая три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава 4.]

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. Узрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо къ себѣ́, ка́ющеся, и въ тѣснотѣ́ ду́ха воздо́хнутъ, и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ и во святы́хъ жре́бій его́ е́сть? Убо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Свѣ́тлое украше́ніе це́ркве, пра́ведныя твоя́ мо́щи, благоро́дный царе́виче Дими́тріе, сія́ютъ бо па́че зла́та и сапфи́ра, созыва́ющи на духо́вное торжество́, и просвѣща́ющи всѣ́хъ, приходя́щихъ къ ни́мъ вѣ́рою.

Сти́хъ: Пра́ведникъ, я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится.

Похвала́ еси́ земли́ Россíйстѣй и ца́рствующему гра́ду Москвѣ́ крѣ́пкое основа́ніе, благовѣ́рному же Импера́тору на́шему [и́мярекъ] [2] щи́тъ и побѣ́да на сопроти́вныя, и всѣ́мъ на́мъ побо́рникъ и засту́пникъ, и моли́твенникъ о душа́хъ на́шихъ.

Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ.

Пріиди́те па́ки, моско́встіи наро́ди, возра́дуемся и возвесели́мся дне́сь, въ честны́й се́й де́нь, пренесе́нія честны́хъ моще́й благовѣ́рнаго царе́вича Дими́трія, и сла́ву и хвалу́ Бо́гу воздади́мъ, да́вшему на́мъ такова́го къ Нему́ предста́теля и моли́твенника о душа́хъ на́шихъ.

Сла́ва, гла́съ 6:

Дне́сь вои́стинну подоба́етъ соверша́тися духо́вному торжеству́, и сла́вѣ и хвалѣ́ Бо́гу приноси́тися во святѣ́мъ хра́мѣ се́мъ, благовѣ́рному же Импера́тору на́шему [и́мярекъ] [3] ра́доватися духо́внѣ и весели́тися, зря́ своего́ сро́дника, въ толи́цѣй сла́вѣ у Бо́га пребыва́юща, и мощми́ свои́ми вѣ́рныя лю́ди просвѣща́юща. Да ликовству́етъ же и все́ правосла́вное мно́жество, я́ко дарова́ на́мъ Госпо́дь предста́теля къ Нему́ и моли́твенника о душа́хъ на́шихъ.

И ны́нѣ, богоро́диченъ: Богоро́дице, Ты́ еси́ лоза́ и́стинная...

Тропа́рь, гла́съ 3:

Дне́сь [вельми́] хва́лится ца́рствующій гра́дъ Москва́, имѣ́я пра́ведныя твоя́ въ себѣ́ мо́щи, блговѣ́рный царе́виче Дими́тріе, я́ко цвѣ́ти благоуха́нніи, пребыва́еми во святѣ́мъ хра́мѣ се́мъ, просвѣще́ніе подаю́щія душа́мъ и тѣлесе́мъ на́шимъ. Тѣ́мъ ра́достно тя́ восхваля́емъ, и честно́е пренесе́ніе моще́й твои́хъ вѣ́рно почита́емъ и мо́лимъ тя́: моли́ Христа́ Бо́га, дарова́ти на́мъ ве́лію ми́лость.

Сла́ва, и ны́нѣ, богоро́диченъ: Тя́, хода́тайствовавшую...



НА УТРЕНИ,
На Бо́гъ Госпо́дь: тропа́рь свята́го, два́жды. Сла́ва, и ны́нѣ, богоро́диченъ [пи́санъ на вече́рни].

По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й, Спа́се.

Свѣ́тлый и всепра́зднственный се́й де́нь пренесе́нія честны́хъ моще́й твои́хъ, благоро́дне Дими́тріе, созыва́етъ на́съ духо́внѣ пра́здновати, и честны́я твоя́ мо́щи вѣ́рно почита́ти, и сла́вити Еди́наго Бо́га въ Тро́ицѣ; сего́ ра́ди мы́, соше́дшеся дне́сь, псало́мски вопіе́мъ ти́: возвесели́тся пра́ведникъ о Го́сподѣ и упова́етъ на Него́. [Два́жды.]

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́ Бо́га, па́че ума́ и сло́ва, непреста́нно моли́ съ го́рними си́лами, пода́ти оставле́ніе грѣхо́въ на́шихъ всѣ́хъ, и исправле́ніе житія́, вѣ́рою и любо́вію при́сно сла́вящимъ Тя́.

По 2-й стихоло́гіи сѣда́ленъ, гла́съ 4. Подо́бенъ: Ско́ро превари́.

Прему́дрый Бо́гъ прему́дростію Свое́ю все́ содѣва́етъ и, я́коже вѣ́сть, святы́я Своя́ прославля́етъ. Та́ко и на тебѣ́, страда́льче Дими́тріе, сотвори́въ, просла́ви тя́ на небеси́ и на земли́; и и́маши къ Нему́ дерзнове́ніе, моли́ за Импера́тора [4] и за вся́ лю́ди, я́ко да пода́стъ на́мъ ми́лость въ де́нь Су́дный. [Дважды.]

Слава, и нынѣ, богородиченъ:

Дѣ́во Всенепоро́чная, Яже пресу́щнаго Бо́га ро́ждшая, Того́ непреста́нно моли́, оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Та́же: Хвали́те и́мя Госпо́дне, и велича́ніе му́ченическое.

По поліеле́и сѣда́ленъ, гла́съ 8. Подо́бенъ: Прему́дрости.

Отъ млады́хъ ногте́й предъизбра́ Тя́ Госпо́дь въ небе́сное селе́ніе, благоро́дне Дими́тріе, и отъ вседержи́тельныя Его́ десни́цы, нетлѣ́нный вѣне́цъ на версѣ́ твое́мъ положи́ся, и осія́лъ еси́ отъ Него́ боже́ственнымъ свѣтозаре́ніемъ, и вы́ну насыща́ешися неизрече́нныя ра́дости и весе́лія, и мо́лишися за свое́ оте́чество и за вся́ въ правосла́віи живу́щія, и честны́я твоя́ мо́щи съ вѣ́рою почита́ющія, и вопію́щія: сла́ва Бо́гу, творя́щему ди́вная Своя́ чудеса́. [Дважды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рожество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти, покланя́ющимся вѣ́рою пресвято́му Рождеству́ Твоему́.

Та́же степе́нна 4-го гла́са и проки́менъ и Ева́нгеліе му́ченическая: [Проки́менъ, гла́съ 4: Пра́ведникъ, я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Вся́кое дыха́ніе... Ева́нгеліе Луки́, зача́ло 63.]

По 50-мъ псалмѣ́:

Сла́ва: Моли́твами страстоте́рпца Дими́трія, Ми́лостиве, очи́сти мно́жество согрѣше́ній на́шихъ. И ны́нѣ: Моли́твами Богоро́дицы... Поми́луй мя́, Бо́же, по вели́цѣй ми́лости Твое́й. Стихи́ра, гла́съ 6: Дне́сь вои́стинну подоба́етъ соверши́тися... [Се́й сти́хъ пи́санъ въ сла́вникѣ на вече́рни въ стихо́внѣ.]

Кано́нъ Богоро́дицѣ со ирмосы́ на 6 и свято́му на 8.

Кано́нъ, гла́съ 1, ему́же краегране́сіе по ря́ду. Про́чая же имѣ́яй измара́гдъ, да разумѣ́етъ.
Пѣ́снь 1.

Ирмо́съ: Го́рькія рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пѣ́снь я́ко Благодѣ́телю пое́тъ Бо́гу, чудодѣ́ющему мы́шцею высо́кою, я́ко просла́вися.

Агнче Бо́жій, Отчее Сло́во, отве́рзи ми́ устнѣ́ и вразуми́ ми смы́слъ, да досто́йно воспою́ но́ваго Твоего́ вѣне́чника царе́вича Дими́трія, и вопію́ Ти, я́ко просла́вися.

Благода́ть прія́лъ еси́ отъ Бо́га, благоро́дне Дими́тріе, я́ко обрѣто́шася мо́щи твоя́ цѣ́лы и нетлѣ́нны, благода́ти своея́ посли́ ми́ ка́плю, я́ко да досто́йно воспою́ тя, и возопію́ Го́сподеви моему́, я́ко просла́вися.

Въ пра́ведныхъ ли́цѣхъ предстоя́ и неизрече́нно добро́ту Влады́чню зря́, блгоро́дне Дими́тріе, моли́ за ны́ смире́нныя рабы́ своя́, я́ко да твои́ми моли́твами, получи́мъ вся́ блага́я и поле́зная.

Богоро́диченъ: Гора́ высо́кая, въ ню́же всели́ся Христо́съ, Ты́ еси́ Дѣ́во Пречи́стая, я́коже Дави́дъ боже́ственный вопіе́тъ; Ея́ же ра́ди мы́ вознесо́хомся къ небеси́, усыновле́ни Ду́хомъ, Всеблаже́нная.

Пѣ́снь 3.

Ирмо́съ: Не му́дростію и бога́тствомъ да хва́лится сме́ртный свои́мъ, но вѣ́рою Госпо́днею, правосла́вно взыва́я Христу́ Бо́гу и поя́ при́сно: на ка́мени Твои́хъ за́повѣдей утверди́ мя, Влады́ко.

Ди́венъ въ высо́кихъ Госпо́дь, ди́венъ и во святы́хъ, чу́до ве́ліе въ послѣ́дняя на́ша времена́ показа́, я́ко мо́щи твоя́ сія́юще, исцѣле́ніе подаю́тъ всѣ́мъ приходя́щимъ къ ни́мъ съ вѣ́рою, и Христу́ вопію́щимъ: на ка́мени за́повѣдей Твои́хъ, утверди́ ны́, Влады́ко.

Ей, вѣ́сть Госпо́дь просла́вити Своя́ уго́дники, и показа́ти на ни́хъ си́лу Свою́, та́ко и на тебѣ́, благоро́дне Дими́тріе, показа́ благода́ть Свою́: мо́щи бо твоя́ такова́я дѣ́йствуютъ, всѣ́мъ приходя́щимъ къ ни́мъ съ вѣ́рою.

Жи́знь твоя́ на земли́, не во мно́зѣ вре́мени пребы́сть, благоро́дне царе́виче Дими́тріе, въ небе́сныхъ же селе́ніихъ во вѣ́ки пребыва́еши, и мо́лиши Бо́га за ны́, рабы́ своя́, да получи́мъ вѣ́чныхъ и неконча́емыхъ бла́гъ.

Богоро́диченъ: Забра́ло имѣ́я Ца́рскій гра́дъ, Тя́ Цари́цу и Госпожу́, побѣжда́етъ ва́рварская звѣри́ная стремле́нія, и избавля́ется вся́кихъ напа́стей и страсте́й, Дѣ́во, Ма́ти, Всенепоро́чная.

Сѣда́ленъ, гла́съ 8. Подо́бенъ: Прему́дрости.

Яко цвѣ́тъ прекра́сенъ процвѣ́лъ еси́, во оте́чествіи свое́мъ, блгоро́дне Дими́тріе, имѣ́я сія́ мо́щи своя́ во святѣ́мъ хра́мѣ се́мъ, лежа́щія въ честнѣ́й ра́цѣ, я́коже рече́ся, цѣ́лы и невреди́мы, я́ко кри́ни блгоуха́нни, и я́ко ши́пки доброво́нни, всѣ́мъ приходя́щимъ къ ни́мъ съ вѣ́рою обонѣва́ютъ и удивля́ютъ всѣ́хъ зря́щихъ на ня́, и вопію́щихъ: сла́ва Бо́гу, прославля́ющему Своя́ уго́дники. [Два́жды.]

Сла́ва и ны́нѣ, богоро́диченъ:

Помышля́ю су́дъ, боя́ся испыта́нія, и ужа́сныя му́ки и огня́, болѣ́зни, тмы́ же и та́ртара. Увы́, что́ сотворю́, ка́ко претерплю́ студа́, егда́ кни́ги разгну́тся и дѣя́нія облича́тся? Сего́ ра́ди припа́даю Ти́, Богоро́дице Пречи́стая: тогда́ предста́ни ми́, ну́жды о́ныя изыма́ющи, Тебе́ бо и́мамъ прибѣ́жище, Влады́чице.

Пѣ́снь 4.

Ирмо́съ: Слы́ша дре́вле Авваку́мъ, Христе́, чу́дный Тво́й слу́хъ и стра́хомъ взыва́ше: отъ ю́га Бо́гъ пріи́детъ и Святы́й отъ горы́ пріосѣне́нныя ча́щи спасти́ пома́занныя. Сла́ва си́лѣ Твое́й, Го́споди.

Земля́ Россíйская вся́ хва́лится тобо́ю, благоро́дне Дими́тріе, я́ко ца́рствующій гра́дъ Москва́, имѣ́етъ въ себѣ́ мо́щи твоя́, я́ко нѣ́кое сокро́вище дра́го, обогаща́юще вѣ́рныя лю́ди, и вопію́щія Христу́: сла́ва си́лѣ Твое́й, Го́споди.

Иже надъ всѣ́ми ца́рствуяй, Ца́рь въ вы́шнихъ, То́й вдохну́ въ се́рдце царю́, ца́рству тезоимени́ту, пренести́ честны́я твои́ мо́щи отъ гра́да Углеча въ ца́ртвующій гра́дъ Москву́, я́ко нѣ́кое бога́тство вели́кое. Яже тогда́ ви́дѣвше вси́ лю́діе возра́довашася, и воспѣ́ша Христу́: сла́ва си́лѣ Твое́й, Го́споди.

Истинныя чудеса́ вои́стинну въ прихо́дъ честны́хъ твои́хъ моще́й бя́ху свидѣ́тельствомъ непра́веднаго твоего́ заколе́нія: мно́зи бо неду́жніи исцѣлева́хуся, и здра́вы быва́ху, и ра́дующеся въ до́мы своя́ отхожда́ху, Христу́ вопію́ще: сла́ва си́лѣ Твое́й, Го́споди.

Богоро́диченъ: Крѣ́пость на́мъ и сто́лпъ непоколеби́мъ, бу́ди Богора́дованная, и щи́тъ и ору́жіе непобѣди́мое, мы́сленныхъ враго́въ полки́ отъ на́съ отгоня́ющи, Богоро́дице Пречи́стая, вѣ́рою и любо́вію почита́ющихъ Тя́.

Пѣ́снь 5.

Ирмо́съ: Свѣ́тъ Тво́й незаходи́мый возсія́й, Христе́, въ сердца́ вѣ́рно пою́щихъ Тя́, ми́ръ подава́яй на́мъ па́че ума́; тѣ́мъ, отъ но́щи невѣ́дѣнія ко дню́ свѣ́томъ Твои́мъ теку́ще, славосло́вимъ Тя́, Человѣколю́бче.

Любо́вію притека́ющимъ къ ра́цѣ моще́й твои́хъ и любе́зно цѣлу́ющимъ я́, благоро́дне Дими́тріе, пода́ждь душа́мъ спасе́ніе и тѣлесе́мъ здра́віе и изба́ви лю́тыхъ бѣ́дъ и обстоя́ній свои́ми къ Бо́гу моли́твами.

Моли́твъ ра́ди твои́хъ, я́же къ Бо́гу, благоро́дне Дими́тріе, лю́тое колеба́ніе въ Россíйстѣй земли́ Бо́гъ укроти́лъ е́сть, отъ злы́хъ и растлѣ́нныхъ умы́ человѣ́къ, хотя́щихъ здѣ́ вре́менныя сла́вы наслади́тися наноси́мое, я́же во о́номъ вѣ́цѣ, и́мутъ вѣ́чнѣ му́читися.

Непостижи́мый Бо́гъ, недовѣ́домыми Свои́ми судьба́ми вся содѣва́етъ, и уго́дниковъ Свои́хъ прославля́етъ, я́коже и на тебѣ́, благоро́дне Дими́тріе, неиспы́таннымъ Свои́мъ смотре́ніемъ сотвори́, и сицевы́мъ да́ромъ мо́щи твоя́ обогати́.

Богоро́диченъ: Освяти́ на́ша помышле́нія, утверди́ всѣ́хъ ду́ши, Ма́ти Бо́жія, твори́ти до́брѣ оправда́нія за милосе́рдіе неизрече́нное воплоще́ннаго изъ Тебе́, Дѣ́во, Сло́во Безнача́льнаго Отца́.

Пѣ́снь 6.

Ирмо́съ: Ве́сь отъ страсте́й безмѣ́рныхъ содержу́ся и ки́томъ зо́лъ снизпадо́хъ, но возведи́ изъ нетлѣ́нія мя́, Бо́же, я́коже пре́жде Іо́ну, и вѣ́рою безстра́стіе ми́ да́руй, я́ко да во гла́сѣ хвале́нія и спасе́нія ду́хомъ пожру́ Ти.

Пренесе́нію моще́й твои́хъ, зѣло́ возра́довася са́мъ ца́рь, и архіере́й вели́кій, и вси́ моско́встіи наро́ди ра́достно срѣто́ша я́, и вну́трь самаго́ ца́рствующаго гра́да Москвы́ несо́ша, и положи́ша я́, въ честнѣ́мъ хра́мѣ се́мъ, я́же и ны́нѣ зря́тся.

Ре́вностію Боже́ственнною содержи́мь бы́въ сро́дникъ тво́й, нося́й зва́ніе ца́рское, и ца́рь надъ все́ю Россíею, прихо́дитъ къ ра́цѣ моще́й твои́хъ, и цѣлу́я и́хъ любе́зно, отхо́дитъ благода́рно и ра́достно, сла́ву и хвалу́ Бо́гу возсыла́я.

Совѣ́тъ злы́хъ и лука́выхъ человѣ́къ, хотя́щихъ наслѣ́довати оте́чество твое́, благоро́дне Дими́тріе, и сѣ́сти на престо́лъ ца́рствія твоего́, Бо́гъ же моли́твъ ра́ди твои́хъ разори́, и до конца́ всѣ́хъ погуби́, и я́ко пра́хъ развѣ́я.

Богоро́диченъ: Тебе́, Всепѣ́тая, Пречи́стая, раби́ Твои́, всегда́ во дни́ и въ нощи́ мо́лимъ, сокруше́нною мы́слію, прося́ще отпуще́нія грѣхо́въ на́шихъ да́ти, Твои́ми моли́твами, Чи́стая.

Конда́къ, гла́съ 4. Подо́бенъ: Вознесы́йся.

Яко пресвѣ́тлая звѣзда́, яви́лся еси́ дне́сь, въ ца́рствующемъ гра́дѣ Москвѣ́, благовѣ́рне царе́виче Дими́тріе, сія́я пра́ведными свои́ми мощми́. Къ ни́мже притека́юще исцѣле́нія да́ръ пріе́млемъ, и глаго́лемъ: ра́дуйся, всекра́сне душе́ю, благоро́дне Дими́тріе, я́ко прія́лъ еси́ отъ Бо́га ве́лій се́й да́ръ, и вѣне́цъ нетлѣ́нный.

Икосъ:

Пріиди́те вѣ́рніи, соше́дшеся, восхва́лимъ но́ваго предста́теля и моли́твенника о на́съ къ Бо́гу, ца́рскую о́трасль, благовѣ́рнаго царе́вича Дими́трія, и возопіи́мъ къ нему́ си́це, глаго́люще: ра́дуйся, но́вый вѣне́чниче, благовѣ́рный царе́виче Дими́тріе, я́ко предстои́ши Свѣ́ту Трисо́лнечному, насыща́яся отъ Него́ Боже́ственнаго свѣтосія́нія, и мо́лишися о держа́вѣ сро́дникъ твои́хъ, о е́же ненавѣ́тнѣй е́й бы́ти въ злы́хъ; ра́дуйся, я́ко мо́щи твоя́, толи́цѣми дарми́ отъ Бо́га обогаще́ны су́ть, и просвѣща́ютъ всѣ́хъ приходя́щихъ къ ни́мъ съ вѣ́рою; ра́дуйся, я́ко моли́твъ ра́ди твои́хъ, всѣ́хъ враго́въ, и навѣ́тныхъ человѣ́къ, нарица́ющихся и́менемъ твои́мъ во лжу́, и смуща́ющихъ держа́ву оте́чествія твоего́, до конца́ Бо́гу погуби́лъ е́сть, и лю́тое колеба́ніе отъ ни́хъ въ Ру́сстѣй земли́ укроти́лъ е́сть; ра́дуйся, оте́честву своему́ похвала́ и утверже́ніе, и ца́рствующему гра́ду Москвѣ́ кра́сное удобре́ніе; ра́дуйся, я́ко прія́лъ еси́ отъ Бо́га ве́лій се́й да́ръ и вѣне́цъ нетлѣ́нный.

Пѣ́снь 7.

Ирмо́съ: Образу служи́ти мусикíйскому согла́сію созыва́ющу лю́ди, отъ пѣ́сней сіо́нскихъ пою́ще оте́чески, о́троцы Дави́довы мучи́телево разори́ша злочести́вое велѣ́ніе и пла́мень въ ро́су преложи́ша, пѣ́снь воспѣва́юще: превозноси́мый отце́въ и на́шъ Бо́же, благослове́нъ еси́.

Удивля́ются вси́ россíйстіи наро́ди, зря́ще мо́щи твоя́, толи́кою сла́вою отъ Бо́га просла́влени, и такова́я дѣ́йствующа исцѣле́нія, и подаю́ща всѣ́мъ приходя́щимъ къ ни́мъ съ вѣ́рою благода́ть, Христу́ вопію́щимъ: благослове́нъ Бо́гъ оте́цъ на́шихъ.

Ѳиміа́мъ благово́ненъ обоня́етъ человѣ́комъ чу́вства, та́ко и твоя́ мо́щи, благоро́дне, объюха́ютъ на́съ, а́ки нѣ́кіимъ обоня́ніемъ сла́дкимъ, и благода́ть свою́ подаю́тъ на́мъ, приходя́щимъ къ ни́мъ съ вѣ́рою, и Христу́ вопію́щимъ: благослове́нъ Бо́гъ оте́цъ на́шихъ.

Храни́тъ Госпо́дь ца́рствующій гра́дъ Москву́, пребыва́ющихъ ра́ди въ не́мъ чудотво́рныхъ твои́хъ моще́й, благоро́дне царе́виче Дими́тріе, сего́ ра́ди ра́дуются лю́діе, и веселя́щеся вопію́тъ Христу́: благослове́нъ Бо́гъ оте́цъ на́шихъ.

Отъ благочести́ваго ца́рскаго ко́рене, отъ благода́тнаго зва́нія рожде́нъ еси́, благоро́дне Дими́тріе, и я́ко пе́рвенецъ яви́лся въ ро́дѣ свое́мъ, и ны́нѣ хва́лятся тобо́ю сро́дницы твоя́, ви́дяще тя́ та́ко просла́влена отъ Бо́га, Ему́же пое́мъ: благослове́нъ Бо́гъ оте́цъ на́шихъ.

Богоро́диченъ: Це́рковь освяще́нная Бо́гови яви́ся, въ Тя́ все́льшемуся, Дѣ́во, па́че ума́. Того́ моли́ грѣхо́въ на́шихъ скве́рну очи́стити, я́ко да хра́мы пока́жемся, и жили́ще Свято́му Ду́ху.

Пѣ́снь 8.

Ирмо́съ: Чу́да преесте́ственнаго показа́ о́бразъ огнеро́сная пе́щь дре́вле: о́гнь бо не опали́ ю́ныя дѣ́ти, Христо́во явля́я безсѣ́менное отъ Дѣ́вы Боже́ственное рождество́. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Честна́я ра́ка моще́й твои́хъ, благоро́дне, па́че сапфи́ра сія́етъ, къ не́й бо притека́юще, ца́ріе и кня́зи, и мно́гое правосла́вное христіа́нство, бла́гостное осѣне́ніе отъ моще́й твои́хъ пріе́млютъ и пою́тъ: вся́ дѣла́ Госпо́дня, Го́спода по́йте и превозноси́те Его́ во вся́ вѣ́ки.

Шу́мъ пою́щихъ красе́нъ быва́етъ, во святѣ́мъ хра́мѣ се́мъ, въ де́нь честна́го пренесе́нія пра́ведныхъ моще́й твои́хъ. Ца́рь же и архіере́й вели́кій, со свяще́нными собо́ры, свѣ́тло пра́зднуютъ, и вси́ лю́діе сра́дуются, и веселя́тся, пою́ще: вся́ дѣла́ Госпо́дня, Го́спода по́йте, и превозноси́те Его́ во вся́ вѣ́ки.

Ще́дрый Госпо́дь на́шъ и Бо́гъ, твои́хъ ра́ди къ Нему́ моли́твъ, ще́дритъ и ми́луетъ на́съ, и подае́тъ на́мъ вся́ блага́я и поле́зная; тѣ́мъ ра́дуемся и весели́мся, и хвалу́ Ему́, я́ко Творцу́ своему́ воздае́мъ, пою́ще: вся́ дѣла́ Госпо́дня, Го́спода по́йте, и превозноси́те Его́ во вся́ вѣ́ки.

Яко свѣща́ свѣ́тлая, непоро́чная твоя́ душа́ Го́сподеви предста́, и во угото́ванное е́й мѣ́сто несе́на бы́сть, идѣ́же Онъ Са́мъ Жизнода́вецъ бы́сть, Ему́же ны́нѣ пое́мъ и славосло́вимъ: вся́ дѣла́ Госпо́дня, Го́спода по́йте, и превозноси́те Его́ во вся́ вѣ́ки.

Богоро́диченъ: Иже дре́вле прама́терь Твою́ созда́вый, ны́нѣ изъ Тебе́ зи́ждется, тоя́ преслуша́ніе и осужде́ніе исцѣля́я, и разрѣша́я, я́ко Ще́дръ, и Влады́ка всѣ́хъ, Богороди́тельнице Ма́ти Дѣ́во.

Пѣ́снь 9.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.

Кра́ткаго и недоумѣ́ннаго ума́ моего́, пѣ́ніе пріими́ благоро́дне, а́ще бо нелѣ́по и гру́бо соста́вихъ ти́ сія́ ма́лыя пѣ́сни, но отъ любве́, я́же къ тебѣ́ по Бо́зѣ, и Пречи́стѣй Его́ Ма́тери, а́ки двѣ́ ца́ты, убо́гая моя́ душа́ прино́ситъ ти́ въ да́ръ, ты́ же пріе́мъ я́ и свои́мъ предста́телствомъ, я́же къ Бо́гу, преудо́бренны сотвори́, и во благо́е почти́ я.

Аще и недосто́йными устна́ми, сія́ ма́лыя краегране́сія прино́симъ къ тебѣ́, благоро́дне: но честны́я твоя́ мо́щи велми́ похваля́емъ, и Христа́ Бо́га на́шего велича́емъ, да́вшаго ти́ такову́ю благода́ть и си́лу.

Во дни́ на́ша яви́ Госпо́дь благода́ть Свою́ на лю́дехъ Свои́хъ, во все́й вели́цѣй Россíи, я́ко мо́щи твоя́ сицевы́мъ да́ромъ отъ Него́ почте́ны су́ть, тѣ́мъ вси́ лю́діе пою́тъ и велича́ютъ, и удивля́ются, и сла́вятъ [Го́спода].

Аще Бо́гъ тя́ просла́ви на небеси́ и на земли́, благоро́дне Дими́тріе, то мы́, гру́біи, ка́ко не воспое́мъ и не похва́лимъ сего́ вели́чія Бо́жія, сбы́вшагося на тебѣ́, благоро́дне. Тѣ́мже ра́дуйся и весели́ся, предстоя́ Невече́рнему Свѣ́ту.

Богоро́диченъ: Свѣ́томъ Дѣ́во, из Тебе́ возсія́вшимъ, у́мъ мо́й озари́, и се́рдце просвѣти́, тму́ отгоня́ющи грѣхо́вную, и уны́нія моего́ вся́кую мглу́.

Свѣти́ленъ:

Прославля́етъ тя́ вся́ Россíйская земля́, и восхваля́етъ тя́ ца́рствующій гра́дъ Москва́, я́ко отъ ца́рскаго ко́рене произше́лъ еси́, и къ Самому́ Царю́ царе́мъ возше́лъ еси́, и и́маши къ Нему́ дерзнове́ніе. Тѣ́мъ вы́ну моли́ Его́ дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ:

Незаходи́маго Свѣ́та носи́ло, Приснодѣ́во, просвѣти́вшаго сѣдя́щія во тмѣ́ невѣ́дѣнія пре́лести, озари́ и на́мъ грѣ́шнымъ свѣ́тъ Сы́на Твоего́.

На хвали́техъ стихи́ры на 6, гла́съ 2. Подо́бенъ: О, пресла́внаго чудесе́!

О, велики́хъ боже́ственныхъ даро́въ, ца́рствующему гра́ду Москвѣ́, я́ко имѣ́етъ въ себѣ́ сокро́вище пребога́тое — мо́щи и тѣлеса́ нетлѣ́нны святы́хъ вели́кихъ чудотво́рцевъ Петра́, Алексíя и Іо́ны, съ ни́ми же и сего́ благовѣ́рнаго царе́вича Дими́трія, и́же вку́пѣ мо́лятъ о на́съ, дарова́ти на́мъ ве́лію ми́лость. [Два́жды.]

О, вели́кое Бо́жіе дарова́ніе на тебѣ́, благовѣ́рный царе́виче, бы́вшее, я́ко сочета́лся еси́ числу́ си́хъ тріе́хъ вели́кихъ іера́рховъ, вку́пѣ же и блаже́ннѣй дво́ицѣ вели́кихъ князе́й россíйскихъ Рома́на и Дави́да, и́же вы́ну предстоя́тъ Бо́гу Вседержи́телю, и моле́ніе творя́тъ о Импера́торѣ [5] и о всѣ́хъ лю́дехъ, е́же бы и́мъ получи́ти вся́ блага́я и поле́зная. Тѣ́мъ о ни́хъ вку́пѣ моли́, дарова́ти на́мъ ве́лію ми́лость.

Пріиди́те, моско́встіи наро́ди, воспое́мъ и возвели́чимъ Христа́, да́вшаго на́мъ ве́лію Свою́ благода́ть — тріе́хъ си́хъ вели́кихъ іера́рховъ, со блаже́нною то́ю дво́ицею, съ ни́ми же и сего́ благовѣ́рнаго царе́вича Дими́трія, таковы́мъ же да́ромъ почте́на су́щаго, и́же ны́нѣ, съ ни́ми мо́лятъ Его́ о на́съ, дарова́ти на́мъ ве́лію ми́лость.

Сла́ва, гла́съ то́йже, самоподо́бенъ:

Ра́дуйся па́ки и весели́ся, кра́сный душе́ю, благовѣ́рія вѣ́твь, царе́виче Дими́тріе, я́ко пе́рвенствующій яви́лся еси́ во оте́чествіи свое́мъ, я́коже мно́гажды реко́хомъ, я́ко вели́кому да́ру отъ Бо́га сподо́бился еси́ здѣ́ и въ бу́дущемъ вѣ́цѣ. И та́мо у́бо чи́стая твоя́ душа́, я́ко свѣ́тъ, возсія́, здѣ́ же мо́щи твоя́ всѣ́хъ удивля́ютъ и просвѣща́ютъ, приходя́щимъ къ ни́мъ съ вѣ́рою. Тѣ́мъ же, Пречи́стая, мо́лимъ Тя́: моли́ о на́съ Человѣколю́бца Бо́га, да пода́стъ на́мъ ве́лію ми́лость.

И ны́нѣ, богоро́диченъ: Влады́чице пріими́...
И славосло́віе вели́кое и отпу́стъ.



НА ЛИТУРГІИ,

[Блаже́нна, отъ кано́на свята́го, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ,* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Тимоѳе́ю, зача́ло 292. Аллилу́ія, гла́съ 4: Пра́ведникъ, я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Ева́нгеліе отъ Іоа́нна, зача́ло 52. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Примѣчаніе:
[1] Е. И. Соколовъ (авторъ публикаціи) о службѣ св. благ. царевичу Димитрію: «Въ печатной минеѣ этой службы не находится, не встрѣчается она и въ извѣстныхъ печатныхъ описаніяхъ рукописей. Празднованіе на перенесеніе св. мощей царевича Димитрія (на 3-е Іюня), за неимѣніемъ службы, не совершается въ Московскомъ Архангельскомъ соборѣ, гдѣ почиваютъ мощи этого святаго. По словамъ соборянъ названнаго собора (нынѣ Придворнаго вѣдомства), чтители православной святыни и почитатели памяти св. Димитрія царевича не разъ жаловались на нихъ (соборянъ), покойному митрополиту Московскому Іоанникію за ихъ, якобы небреженіе въ памяти царевича Димитрія, оставляя канунъ праздника (перенесенія мощей св. царевича Димитрія) безъ всенощнаго бдѣнія, а въ самый день праздника не совершая торжественной литургіи. Между тѣмъ, въ Угличѣ, служба эта (на 3-е Іюня) совершается во всѣхъ церквахъ по особому, одного содержанія списку, который, какъ мы узнали по справкамъ, одинаковъ съ нашимъ. Угличскіе списки относятся ко времени Императора Александра Павловича, имя котораго упоминается напр. въ стихирѣ по 50-мъ псалмѣ. Нашъ списокъ сдѣланъ со списка, относящагося ко времени царствованія Михаила Ѳеодоровича, потому что въ службѣ не разъ упонинается его имя. Въ канонѣ находится много историческихъ чертъ, а начальныя буквы канонныхъ тропарей составляютъ буквы славянской азбуки: а, б, в, г, д, е, ж, з, s, и, і, к, л, м, н, о, п, р, с, т, у, ф, х, отъ, ц, ч, ш, щ, я; далѣе буквы: с, и, т, а, в, а, с. Имѣя въ виду рѣдкость и важное значеніе позабытой Москвою этой службы, помѣщаемъ ее полностію...» (с. 290-291).
[2] Въ рукописи: «благовѣрному же царю нашему Михаилу...»
[3] Въ текстѣ: «благовѣрному же царю нашему Михаилу...»
[4] «за царя...»
[5] «о царѣ...»

Источникъ: Библіотека Императорскаго Общества Исторіи и Древностей Россійскихъ. Выпускъ второй. Описаніе рукописей и бумагъ, поступившихъ съ 1846 по 1902 г. Трудъ Дѣйствительнаго Члена Е. И. Соколова. // «Чтенія въ Императорскомъ Обществѣ Исторіи и Древностей Россійскихъ» при Московскомъ Университетѣ. 1906 годъ. Книга первая. [Двѣсти шестнадцатая.] / Издана подъ завѣдываніемъ Е. В. Барсова. — М.: Университетская типографія, 1905. — С. 291-300.

/ Къ оглавленію раздѣла /


Наверхъ / Къ титульной страницѣ

0