Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія во 2-й де́нь.
Иже во святы́хъ отца́ на́шего Ники́фора, патріа́рха Константи́на гра́да, исповѣ́дника.

[ВЕЧЕРЪ,]
Стихи́ры исповѣ́дника, гла́съ 4. Подо́бенъ: Яко до́бля.

Апо́столовъ прее́мника,* страда́льцевъ единонра́вна,* по́стниковъ единоревни́теля восхваля́емъ тя́,* и учи́телей печа́ть,* и боже́ственное изображе́ніе,* Христо́ва тайноводи́теля,* святи́телю блаже́нне,* и богото́чную рѣ́ку разумѣ́ній,* беззако́нниковъ и ху́льниковъ мы́сли потопля́юща, прему́дре.

Прему́дрости тала́нтъ* умно́живъ, пребога́те,* ра́дости сподо́бился еси́ Го́спода твоего́,* испещре́нъ благода́тію* боже́ственнаго сія́нія,* и, заре́ю мы́сленно сія́я духо́вною,* ны́нѣ предстои́ши десни́цѣ жизноно́снѣй,* отту́ду луча́ми* всегда́ облиста́емь, сла́вне.

Ины стихи́ры, гла́съ 8. Подо́бенъ: О, пресла́внаго чудесе́!

Въ боже́ственныхъ незаходи́мыхъ вну́трь,* и́стинныя же ски́ніи,* ю́же Госпо́дь водрузи́,* я́ко свяще́нникъ зако́ненъ* вше́лъ еси́, преподо́бне,* не чужде́ю, о́тче, кро́вію, но твое́ю* Христу́ подо́бяся,* совѣ́тному не поко́рься томле́нію,* е́юже Бо́гу, о́тче, угоди́лъ еси́ до конца́.

Сло́вомъ и дѣя́ніемъ укра́шенъ,* и свяще́нною твое́ю оде́ждею,* и уче́нія пра́востію,* Ники́форе всему́дре,* прему́дрости пита́телю,* исповѣ́даніемъ си́хъ прія́лъ еси́,* заточе́ніи истяза́емь,* терпѣ́лъ еси́ усе́рдно* по́мысла крѣ́постію лю́тая,* вся́ приходя́щая, блаже́нне.

Орга́нъ яви́лся еси́ Ду́ха,* богодохнове́нными гла́сы оглаша́емь свы́ше* и возглаша́я несказа́нное Спа́са та́инство,* и боже́ственная труба́,* вои́стинну и наро́читая,* велегла́сно на́мъ проповѣ́дающи Сло́ва воплоще́ніе,* е́же па́че достиже́нія,* и вы́ше ума́ вся́,* и по́мысла, прече́стне.

Сла́ва, и ны́нѣ, богоро́диченъ:

Спаси́ мя, Влады́чице Пречи́стая,* Яже Спа́са Христа́ неизрече́нно ро́ждшая:* Тя́ бо еди́ну стяжа́хъ предста́тельницу,* и необори́мую стѣ́ну,* и покро́въ, и ра́дованіе,* и души́ моея́ боже́ственное утѣше́ніе.* Ты́ у́бо мя́ изба́ви неусыпа́ющаго че́рвія* и огня́ вѣ́чнующаго,* Ма́ти Христа́ Бо́га.

Крестобогоро́диченъ:

Тя ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, —* Ча́до сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый милосе́рдіемъ Твои́мъ?

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́ Яже веще́й Истина: сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Ники́форе, моли́ Христа́ Бо́га спасти́ся душа́мъ на́шимъ.


[НА УТРЕНИ,]
Кано́нъ, его́же краегране́сіе: Ники́фора я́ко побѣдоно́сца пѣ́сньми пою́. Ѳеофа́нъ, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Дѣя́ніе видѣ́нія показа́лъ еси́, я́вѣ восхожде́ніе: ду́шу бо согласи́лъ еси́ дѣ́тельно, Ники́форе пребога́те, къ видѣ́нію изря́дно кра́йнему возлетѣ́лъ еси́.

Умертви́въ я́же на земли́ мудрова́нія воздержа́ніемъ, ты́ и ду́шу напра́вилъ еси́ прилѣжа́ніемъ, Ники́форе богодохнове́нне, ко приста́нищемъ дости́глъ еси́ невла́емаго наслажде́нія.

Неду́говавъ мамо́ны е́ресію Ле́въ окая́нный и къ тве́рдому тебѣ́ ка́мени прира́жся, Ники́форе богопрія́тне, разсы́пася вско́рѣ при а́дѣ пребезу́мный.

Богоро́диченъ: Исцѣли́ сокруше́ніе, Пренепоро́чная, человѣ́чества, Творца́ ро́ждши, вся́ ны́ испра́вльшаго, низве́рженныя паде́ніемъ пра́отецъ, Богоневѣ́стная.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Украси́въ добродѣ́тельми твои́ми житіе́ твое́ и свѣти́льникъ сло́ва жи́зни я́вѣ храни́тель бы́въ, Христо́во всесвяще́нное ста́до наста́вль.

Богоглаго́ливый о́гненный язы́къ тво́й боже́ственный огне́мъ разу́мнымъ терно́вныя попали́ е́реси, богому́дре о́тче сла́вне.

Любому́дріемъ прему́дрости глубину́ испыта́въ, уче́ній твои́хъ плени́цами отмета́ющіяся о́браза Христо́ва я́сно придави́лъ еси́, досточу́дне.

Богоро́диченъ: Исповѣ́дающе Отцу́ Превѣ́чному Сы́на Собезнача́льна, напослѣ́докъ изъ Твоея́ утро́бы ро́ждшася, Пречи́стая, вои́стинну сла́вимъ Тя́, Бо́жію Ма́терь.

Сѣда́ленъ, гла́съ 8. Подо́бенъ: Прему́дрости.

Слове́съ твои́хъ благода́ть разу́мныхъ и уче́ній высота́ та́йныхъ боже́ственнаго на́мъ бы́сть восхожде́нія лѣ́ствица: духо́вну бо, о́тче, стяжа́въ трубу́, се́ю проповѣ́далъ еси́ боже́ственная уче́нія. Тѣ́мже и на мѣ́стѣ всели́лся еси́ зла́чнѣ, звѣ́ря отгна́лъ еси́ пра́щею слове́съ твои́хъ, Ники́форе блаже́нне, моли́ Христа́ Бо́га грѣхо́въ оставле́ніе пода́ти чту́щимъ всечестну́ю твою́ па́мять.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Си́лою боже́ственною че́люсти, священноявле́нне, нечести́выхъ сокруши́лъ еси́, тве́рдымъ твои́мъ сло́вомъ си́хъ побѣди́въ, и чествова́ти научи́лъ еси́ боже́ственный Спа́са о́бразъ.

Исповѣ́даніемъ боже́ственное свяще́нство свѣ́тло уясни́лъ еси́, о́тче Ники́форе, Льво́во суровство́ загражда́я, таи́нниче неизрече́нныхъ богопрія́тне.

Юношески проти́влься, Ники́форе, благочести́выми уче́ніи честны́я Це́ркве, ра́ною слове́съ твои́хъ во́лки отгна́лъ еси́, вѣ́ру пра́вую корче́мствующія.

Богоро́диченъ: Воплоще́на Безпло́тнаго пе́рвѣе ро́ждши, Сло́ва Бо́жія, Всенепоро́чная Обра́дованная, мíръ обнови́ла еси́. Тѣ́мже Тя́, Богоневѣ́сто, вѣ́рою правосла́вною почита́емъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Умъ имѣ́я чи́стъ, на небеса́ восходя́щъ, ра́зума и прему́дрости неувяда́ющій цвѣ́тъ объя́лъ еси́, всеблаже́нне.

Исцѣле́ніе душа́мъ правосла́внымъ ороси́лъ еси́, слове́съ твои́хъ, богоявле́нне, зе́млю же неразу́мныхъ опрове́рглъ еси́ твои́ми уче́ніи.

Сло́во дѣ́ятельно и живо́тъ имѣ́я неотъе́млемь, я́ко со́лнце облиста́я, честны́я Це́ркве просвѣща́еши утвержде́ніе.

Богоро́диченъ: Разрѣше́ніе кля́твы прама́тере Ты́ была́ еси́, Пренепоро́чная, заче́нши на́съ благослове́ньми боже́ственными Вѣнча́вшаго.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Свѣтоно́сно заря́ми сія́я духо́вными, Це́рквамъ, богому́дре, яви́лся еси́ сто́лпъ, небеси́ ра́венъ, и о́блакъ, къ наслѣ́дію веды́й небе́сному.

Всю́ твою́ жи́знь Бо́гу освяти́лъ еси́, пребыва́я по все́й вселе́ннѣй нача́льникъ, просла́вился еси́, священноявле́нне о́тче блаже́нне.

Растерза́етъ плете́нія безбо́жныхъ ересе́й твое́ богодохнове́нное сло́во обою́ду о́стрымъ мече́мъ Утѣ́шителя, свѣ́тъ же и́стины всѣ́мъ предпоказа́.

Богоро́диченъ: Зако́ны пресла́вно естества́ разрѣша́ются: Дѣ́ва бо ражда́етъ и пита́етъ Отрокови́ца, неискусобра́чно заче́нши всѣ́хъ Зижди́теля и Го́спода.

Конда́къ, гла́съ 4. Подо́бенъ: Яви́лся еси́ дне́сь.

Побѣ́ды вѣне́цъ, о Ники́форе, съ небесе́, пресла́вне, я́ко пріе́мъ отъ Бо́га, спаса́й вѣ́рою почита́ющія тя́, я́ко священнонача́льника Христо́ва и учи́теля.

Икосъ:

Якоже невоева́нъ гра́дъ Бо́жій на горѣ́, вели́кій іера́рхъ стоя́ водруже́нъ яви́ся, соблюда́я мíръ моли́твами, полки́ безбо́жныхъ побѣди́въ, пребы́сть невреди́мь, отъ враго́въ стрѣля́ній неуя́звенъ, всѣ́хъ Царя́ и Го́спода вну́трь въ се́рдцы нося́. Тѣ́мже и уясня́етъ чту́щія Христа́ на ико́нѣ, съ высоты́ добродѣ́телей и столпа́ дѣ́лъ пра́щею мета́етъ на полки́ враго́въ, две́ри же милосе́рдіемъ отверза́етъ вѣ́рою пою́щимъ сего́, я́ко святи́теля Христо́ва и учи́теля.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Це́рковь тя́ жи́ву Бо́га Жива́го вѣ́мы, вну́трь я́ко свѣти́льника иму́ща златоза́рна, Тро́ицы позна́ніе: благослове́нъ еси́ въ хра́мѣ сла́вы Твоея́, Го́споди.

Ерети́чествующихъ языкобо́лія низложи́лъ еси́, увѣря́я чти́ти ико́ну Христо́ву, Ники́форе, взыва́ющія: благослове́нъ еси́ въ хра́мѣ сла́вы Твоея́, Го́споди.

Прему́дрости бога́тство и житіе́ имѣ́я боже́ственно, все́ премину́лъ еси́ чу́вство мы́сленно, Христу́ ны́нѣ бесѣ́дуеши: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Не раздѣля́юще соедине́нная, ниже́ слива́юще, еди́наго Христа́ сла́вимъ, изъ Тебе́ воплоще́ннаго Сло́ва, зову́ще: благослове́нъ еси́ въ хра́мѣ сла́вы Твоея́, Го́споди.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Кро́вію Христо́вою изба́вленъ, ра́зумомъ и́же Его́ ра́ди подъя́тъ сме́рть, со́вѣсти прине́слъ еси́ муче́ніе, исповѣ́данія благода́тію сія́я: Го́спода по́йте, дѣла́, взыва́я, и превозноси́те Его́ во вся́ вѣ́ки.

Тѣ́ломъ и душе́ю очище́нъ, Сло́ву Всеви́дцу сло́вомъ поже́рлъ еси́, Сіе́ пре́жде безпло́тно и безнача́льно показу́я и ми́лостивна бы́вша Человѣ́ка по́слѣжде, Го́спода по́йте, дѣла́, взыва́я, и превозноси́те Его́ во вся́ вѣ́ки.

Да наслѣ́діе небе́сное и сла́ву неизмѣ́нную улучи́ши, сла́вне, сла́ву увяда́емую, о́тче, оста́вилъ еси́, изгна́ніе и озлобле́ніе терпя́ до́блественнѣ, му́дре, взыва́я: Го́спода по́йте, дѣла́, и превозноси́те Его́ во вся́ вѣ́ки.

Богоро́диченъ: Еди́ну Голуби́цу чи́сту Тя́ Жени́хъ мы́сленный обрѣ́те, Всенепоро́чная, кри́нъ благово́ннѣйшій, цвѣ́тъ прекра́снѣйшій и свѣтоно́сенъ черто́гъ, Невѣ́сту приведе́. Тѣ́мже Тя́, Дѣ́ву, пое́мъ и превозно́симъ во вся́ вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Обрѣ́лъ еси́ блаже́нный коне́цъ, преше́дшимъ зерца́ломъ, и́стинѣ я́вльшейся, видѣ́ніемъ нетлѣ́нныя добро́ты, ея́же ны́нѣ насыща́яся, твои́ми моли́твами на́съ помина́й.

Ра́ку обступи́вше боже́ственную богоно́снаго Ники́фора, пріиди́те, христоно́сніи, усе́рдно я́ко побѣдоно́сца сего́ воспои́мъ и того́ торжество́ съ весе́ліемъ пра́зднуимъ.

Вся́ку добродѣ́тель удержа́въ, при кончи́нѣ подвиго́въ исповѣ́данія вѣнце́мъ, священному́чениче, яви́лся еси́ укра́шенъ, и́мже удобре́нъ, твоему́ Влады́цѣ ны́нѣ предстои́ши.

Богоро́диченъ: Яко ко́рень, и исто́чникъ, и вину́ нетлѣ́нія Тя́, Дѣ́во, вси́ вѣ́рніи, вѣ́дуще, хвала́ми почита́емъ: Ты́ бо ѵпоста́сное Безсме́ртіе на́мъ источи́ла еси́.

Свѣти́ленъ. Подо́бенъ: Ученико́мъ зря́щимъ.

Яко побѣдоно́сецъ изря́денъ страсте́й, Ники́форе, вѣне́цъ сугу́бъ прія́лъ еси́ отъ Христа́ Спа́са: я́ко е́ресь богобо́рную боже́ственныя ико́ны отмета́ющихъ, прему́дре, низлага́я, святи́телю, и страда́лецъ, я́ко благоче́стія побо́рникъ, о́тче. О на́съ у́бо моли́, чту́щихъ тя́, блаже́нне.

Сла́ва, и ны́нѣ, богоро́диченъ:

Оте́ческихъ не оста́вль нѣ́дръ, а́ще и воплоти́лся еси́ отъ Дѣ́вы, Го́споди, и́бо спасти́ мене́, па́дшаго, преклони́въ небеса́, соше́лъ еси́ и исхи́тити хотя́ отъ у́стъ звѣ́ря мы́сленнаго и его́ удавле́ніи держи́маго. Тѣ́мже, изба́влься, сла́влю Твою́ си́лу.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 12 – 16.

/ Къ оглавленію раздѣла /


Наверхъ / Къ титульной страницѣ

0