Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія во 2-й де́нь.
Слу́жба свята́го великому́ченика Іоа́нна Но́ваго, му́ченаго въ Бѣлѣгра́дѣ.

НА МАЛѢЙ ВЕЧЕРНИ,
Поста́вимъ стихи́ 4 и пое́мъ стихи́ры, гласъ 1. Подо́бенъ: Небе́сныхъ чино́въ.

Христіа́нъ забра́ло крѣ́пкое,* столпа́, непоколеби́маго мучи́тельскими ласка́ніи,* купца́ всеизря́днаго,* на нетлѣ́нныхъ измѣни́вшаго тлѣ́нная* и на́съ свы́ше назира́юща,* вѣ́рно ублажи́мъ.

Пе́рваго пострада́теля вси́ Іоа́нна,* свѣ́тлаго храбо́рника,* ны́нѣ на́мъ возсія́вшаго* и́стиннаго страда́нія луча́ми,* воспое́мъ, веселя́щеся* и того́ моще́мъ кла́няющеся.

Сла́ва, гла́съ 6:

Пріиди́те, мучениколю́бцы вси́, пріиди́те, ли́къ соста́вимъ, вѣнцы́ похвала́ми плету́ще и честну́ю главу́ Іоа́нна вѣнча́юще: се́й бо всехрабо́рникъ, Христо́вою вооружи́вся вѣ́рою, въ по́двигъ вни́де му́жественнѣ и Христа́ исповѣ́да, Сы́на Бо́жія и Бо́га, Творца́ и Судію́ вся́ческихъ, пе́рсскую до конца́ горды́ню низложи́въ и мучи́теля попра́въ свои́мъ терпѣ́ніемъ, му́чениковъ бы́сть о́бразъ и надписа́ніе. И ны́нѣ, Христу́ мо́лится о душа́хъ на́шихъ.

И ны́нѣ, богоро́диченъ. Аще Пятдеся́тница: И ны́нѣ, пра́здника.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Отъ восто́чныхъ къ сѣ́вернымъ,* я́коже со́лнце, возсія́лъ еси́* заря́ми страда́нія,* всѣ́хъ привлача́* сердца́ и помышле́нія* къ твои́мъ чудесе́мъ, сла́вне.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Сѣ́верная племена́ вся́,* ели́ко благочести́вая,* духо́внѣ ликовству́йте пѣ́сньми,* Іоа́нна сла́вяще,* ва́съ возлю́бльшаго.

Сти́хъ: Насажде́ни въ дому́ Госпо́дни* во дво́рѣхъ Бо́га на́шего процвѣту́тъ.

Послѣ́днимъ си́мъ времено́мъ,* ты́ красота́ показа́лся еси́,* му́чениковъ страда́нія обновля́я* и до конца́ низлага́я* пре́лесть, блаже́нне, душегуби́тельную.

Сла́ва, и ны́нѣ, богоро́диченъ:

Богоро́дицу Тя́ и́стинную* му́ченицы исповѣ́даша,* со Іоа́нномъ сла́внымъ,* Марíе Богоневѣ́сто:* мы́ же Ти́ припа́даемъ,* грѣхо́въ прося́ще проще́нія.


НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: поста́вимъ стихо́въ 8 и пое́мъ стихи́ры, гла́съ 2. Подо́бенъ: Кíими похва́льными.

Кíими благохва́льными пѣ́сньми* воспое́мъ Іоа́нна?* истиннаго во́ина Царя́ вели́каго,* свѣ́тлаго храбо́рника,* Христо́ва всеизря́днаго страда́льца,* утверди́теля вѣ́ры* и низложи́теля ле́сти,* терпѣли́ваго во искуше́ніихъ* и въ му́кахъ непристра́шнаго,* нечести́выхъ наказа́теля стра́шнаго* и благочести́вымъ помо́щника те́плаго,* и́мже Христо́съ на́мъ да́руетъ ве́лію ми́лость. [Два́жды.]

Кíими похва́льными вѣнцы́* вѣнча́емъ Іоа́нна?* му́чениковъ обновле́ніе,* иску́снаго борца́,* благоче́стія бори́теля,* врага́ низложи́вшаго,* кро́вію зе́млю освя́щшаго,* и возду́шныя кня́зи устраши́вшаго,* и небе́снымъ причта́вшагося а́нгеломъ,* столпа́ всезлата́го,* о не́мже содержа́тся страны́ сѣ́верныя,* и́мже Христо́съ си́хъ враги́ побѣжда́етъ,* имѣ́яй ве́лію ми́лость. [Два́жды.]

Кíими благососта́вными гла́сы* просла́вимъ Іоа́нна?* высокопа́рнаго орла́* слове́съ прему́дростію,* его́же крило́ма зла́та междора́мія,* трубу́ благоче́стія,* Бо́жія Сло́ва* та́инства возгремѣ́вшаго,* меча́, изощре́ннаго* проро́ческими велѣ́ніи,* и́мже пе́рсское возноше́ніе* Христо́съ низложи́,* имѣ́яй ве́лію ми́лость. [Два́жды.]

Кíими пѣ́сньми и добро́тами* увязе́мъ Іоа́нна чу́днаго?* пло́ть да́вшаго* къ ра́намъ содробле́нія* на́съ ра́ди плещи́ на ра́ны Да́вшаго* и кро́вь неща́дно Излія́вшаго,* за истощи́вшаго Себе́ до ра́бія о́браза,* мучи́теля уди́вльшаго* преесте́ственнымъ терпѣ́ніемъ* и того́ посра́мльша* сопротивле́ніемъ крѣ́пкимъ,* его́же Христо́съ Бо́гъ вѣнцы́ нетлѣ́нія вѣнча́,* имѣ́яй ве́лію ми́лость. [Два́жды.]

Сла́ва, гла́съ 8:

Дне́сь честно́е торжество́ небе́сная пра́зднуютъ мы́сленно, земна́я къ весе́лію созыва́юще въ па́мять до́бляго подви́жника Іоа́нна, терпѣли́ваго адама́нта: изнемого́ша бо ру́ки бію́щихъ, и судія́ утруди́ся, му́ки умышля́я. Онъ же вы́ше всѣ́хъ пребыва́ше, стоя́, я́ко ле́въ, посредѣ́ по́двига и мучи́теля устраша́я исповѣ́даніемъ Христо́вымъ, благодерзнове́нно къ нему́ вопія́ше: не косни́, о епа́рше, се́ ти́ пло́ть къ томле́нію! Ты́ у́бо дово́льны ра́ны наноси́, Христо́съ же вѣнцы́ нетлѣ́нны да́руетъ мнѣ́, Его́же проповѣ́даю со Отце́мъ и Святы́мъ Ду́хомъ.

И ны́нѣ, богоро́диченъ. Аще Пятдеся́тница: И ны́нѣ, пра́здника.
Вхо́дъ. Проки́менъ дне́. Чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1. Самогла́сны:

Сѣ́верная вся́, ра́дуйтеся и, веселя́щеся, взыгра́йте, посредѣ́ себе́ иму́ще звѣзду́ незаходи́мую и многосвѣ́тлую, со́лнечныя зари́ превосходя́щую, Іоа́нна великоимени́таго, благочести́ваго ко́рене му́ченическую вѣ́твь многопло́дную и избра́нную, мно́го Христа́ возлю́бльшаго, и отъ Него́ мно́жае возлю́бленна бы́вшаго, и на́мъ прося́ща ве́лія ми́лости.

Благочести́выхъ ро́дове вси́, духо́вно ликовству́юще, о́бщую по́льзу восхвали́те въ наро́читомъ дни́ сего́ пра́здника, посредѣ́ себе́ иму́ще, я́ко ши́покъ благово́нный, того́ свято́е и многострада́льное тѣ́ло, ны́нѣ просла́вленное сла́вою нетлѣ́нія и цѣльбы́ подаю́ща душе́внымъ страсте́мъ и тѣле́снымъ.

Восто́чная, сѣ́вернымъ сликовству́йте, и не высо́кая му́дрствуйте и́бо со́лнце друго́е здѣ́ пресла́вно показа́ся, не къ за́падомъ творя́ще тече́ніе и подъ зе́млю устремля́ющеся, но къ небесе́мъ восхо́дъ имѣ́юще отъ земли́, невеще́ственнымъ спребыва́юще умово́мъ, и отту́ду на́съ озаря́етъ, соблюда́етъ, и освяща́етъ, и отъ Христа́ про́ситъ ве́лія ми́лости.

Сла́ва, гла́съ 5:

Востру́бимъ духо́вною цѣвни́цею въ пра́зднственнѣй па́мяти Іоа́нна, доблему́дреннаго во́ина, я́же о́крестъ созыва́юще съ высо́кимъ проповѣ́даніемъ и глаго́люще: се́ и́же на земли́ пострада́вый и ны́нѣ на небесѣ́хъ ца́рствуяй. Пріиди́те, бра́тіе, сему́ поревну́йте и, поревнова́вше, послѣ́дуйте усе́рдію, му́ченицы бы́вше произволе́ніемъ, се́ ми́лостыни сокро́вище пребога́тое, пріиди́те, ца́ріе и кня́зи, сего́ подража́йте, да и подо́бнымъ вѣнце́мъ пріобщите́ся; бога́тіи и ни́щіи, здра́віи и неду́жніи, почерпи́те оби́льно исцѣле́нія отъ ковче́га свяще́ннаго, я́ко отъ нетлѣ́нна исто́чника, въ сла́ву Бо́гу и Спа́су, просла́вляющему Того́ просла́вльшаго.

И ны́нѣ, богоро́диченъ. Аще Пятдеся́тница: И ны́нѣ, пра́здника.

На стихо́внѣ стихи́ры, гла́съ 4. Подо́бенъ: Яко до́бля.

Яко благонаро́читъ ове́нъ,* морску́ю преплы́лъ еси́ пучи́ну* и же́ртва прине́слся еси́, жива́ и одушевле́нна,* на́съ ра́ди, сла́вне, закла́вшемуся* Бо́жію Агнцу,* отъ Него́же пріе́мь трудо́въ твои́хъ по́чести,* моли́ отъ тли́ и бѣ́дъ изба́вится* вѣ́рою и любо́вію творя́щимъ* пречестну́ю па́мять твою́.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Ни суровство́ мучи́теля,* ни же́зленная біе́нія,* ни пло́ти содробле́нія,* ни крове́й пото́цы* твою́ тве́рдость возмого́ша, сла́вне,* отъ Христа́ отврати́ти,* па́че же вопія́лъ еси́ къ му́чащимъ:* раждежи́те мя́ му́ками,* я́коже горни́ломъ искуси́тельнымъ,* да зла́то искуше́но явлю́ся Созда́вшему.

Сти́хъ: Насажде́ни въ дому́ Госпо́дни* во дво́рѣхъ Бо́га на́шего процвѣту́тъ.

Ни вери́гъ тя́жести,* ни темни́цы злосмра́діе,* ни влача́щихъ безчеловѣ́чіе* твое́ благостоя́ніе отъ твоего́ Влады́ки,* блаже́нне, поколеба́ша:* темни́цу бо черто́гъ свѣ́телъ,* вери́ги же гри́вну зла́ту,* влаче́ніе же го́рькое колесни́цу ца́рскую* Христа́ ра́ди вмѣня́лъ еси́.

Сла́ва, гла́съ 3:

Страстоте́рпческія лучи́ возсія́вше, прите́кше, наслади́теся, бра́тіе: отъ небе́съ бо къ на́мъ соше́дъ неви́димо, избра́нный во́инъ Христо́въ Іоа́ннъ, и трапе́зу предложи́въ духо́вную, всѣ́хъ учрежда́етъ оби́льно, проти́ву коего́ждо проше́нія, и припаде́мъ вѣ́рою, того́ мо́щи объе́млюще и моле́бнѣ глаго́люще: многострада́льне и треблаже́нне, це́рковь, ю́же возлюби́лъ еси́, въ не́йже честны́мъ твои́мъ моще́мъ ста́ти изво́лилъ еси́, съ боговѣнча́нными господа́ми на́шими, возлю́бльшими тя́ и прине́сшими, сохраня́й и покрыва́й твои́мъ къ Бо́гу дерзнове́ніемъ.

И ны́нѣ, богоро́диченъ. Аще Пятдеся́тница: И ны́нѣ, пра́здника.

Тропа́рь, гла́съ 4:

Житіе́ на земли́ до́брѣ окормля́я, страда́льче, ми́лостынями, и ча́стыми моли́твами, и слеза́ми, па́ки же ко страда́нію му́жески устреми́вся, пе́рсское обличи́лъ еси́ нече́стіе. Тѣ́мже Це́ркве бы́лъ еси́ утвержде́ніе и христіа́нъ похвало́, Іоа́нне приснопа́мятне.


НА УТРЕНИ,
По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й.

Гро́бъ тво́й, свя́те, другíй бы́сть Силоа́мъ вѣ́рою приходя́щимъ, исцѣле́ніе точа́ неду́гомъ тѣле́снымъ и страсте́мъ душе́внымъ. Тѣ́мже дне́сь, соше́дшеся, твою́ святу́ю соверша́емъ па́мять, сла́вяще еди́наго Бо́га на́шего. [Два́жды.]

Сла́ва, и ны́нѣ, богоро́диченъ:

Тебе́, Богома́ти, Іоа́ннъ вѣнцено́сецъ посреди́ суди́ща свѣ́тло и́стинную Богоро́дицу исповѣ́да, отъ Тро́ицы Еди́наго ро́ждшую и Дѣ́ву пребы́вшую. Тѣ́мже, Всепѣ́тая, съ ни́мъ Твоего́ Сы́на и Бо́га моли́ грѣхо́въ дарова́ти проще́ніе.

По 2-й стихоло́гіи сѣда́ленъ, гла́съ 3. Подо́бенъ: Красотѣ́.

Красе́нъ на́мъ вои́стинну отъ Бо́га дарова́лся еси́, па́че зла́та и топа́зія, Іоа́нне честнѣ́йшій, всѣ́хъ о́чи у́мныя и серде́чныя привлача́ къ разумѣ́нію чуде́съ твои́хъ страда́ній. Тѣ́мже любо́вію зове́мъ ти́: ра́дуйся, на́ша похвало́ пресвѣ́тлая. [Два́жды.]

Сла́ва, и ны́нѣ, богоро́диченъ:

Красотѣ́ дѣ́вства Твоего́ и пресвѣ́тлой чистотѣ́ Твое́й Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возымену́ю Тя́? Недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти: ра́дуйся, Благода́тная.

По поліеле́и сѣда́ленъ, гла́съ 4. Подо́бенъ: Удиви́ся.

Удиви́ся мучи́тель, пачеесте́ственное зря́ въ тебѣ́ терпѣ́ніе, воспрія́ша тя́ а́нгели, вѣнцы́ облага́юще, посрами́шася бѣ́сове твое́ю до́блестію: его́же бо мня́ху ласка́ньми низложи́ти, си́мъ побѣжде́ни бы́ша и падо́ша, утверди́шася вѣ́рніи твои́мъ исповѣ́даніемъ. Иже сего́ тогда́ укрѣпи́вый, просвѣти́ ду́ши на́ша. [Два́жды.]

Сла́ва, и ны́нѣ, богоро́диченъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по рождествѣ́ па́ки Дѣ́вою пребыва́етъ.

Степе́нна, 1-й антифо́нъ 4-го гла́са. Проки́менъ, [гла́съ 4]: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Ева́нгеліе Луки́, зача́ло 106.

По 50-мъ псалмѣ́ стихи́ра, гла́съ 6:

Дне́сь Це́рковь торжеству́етъ, страстоте́рпца крася́щися по́двиги, я́ко многоцѣ́нною оде́ждею, и вопіе́тъ, хва́лящися: сицева́ моя́ рожде́нія, таковы́ мои́ сы́нове, и́хже пе́рвѣе породи́хъ креще́ніемъ, воспита́хъ же стра́хомъ Госпо́днимъ, и ны́нѣ му́ченики ви́жду, и́стинѣ вѣне́чники избра́нны, да мо́лятся о вселе́ннѣй ко Го́споду.

Кано́нъ Богоро́дицы на 6, гла́съ 2: Нетре́ну, необы́чну... И свята́го на 8, его́же краегране́сіе: Но́вому му́ченику но́ву приношу́ хвалу́. Въ Богоро́дичнахъ же: Григо́ріе. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Новоявле́нъ му́ченикъ, блаже́нне Іоа́нне, вселе́ннѣй напослѣ́докъ яви́лся еси́, тѣ́мже ми́ пода́ждь сло́во твое́ю благода́тію, твоя́ по́двиги воспѣ́ти по достоя́нію.

Очи́ма мы́сленныма, предстоя́ на суди́щи, му́чениковъ зрѣ́лъ еси́ честно́е сосло́віе, тебе́ призыва́ющихъ ра́достно, Іоа́нне, и подо́бными вѣнцы́ украша́ющихъ.

Во́инствомъ досточу́днымъ твоего́ сопротивле́нія побѣ́дная прія́хомъ на мучи́теля естеству́: соверше́ннѣ бо посра́мленъ бы́въ, не ктому́ мучи́тельская дерза́ти начина́етъ.

Одѣ́явся въ броня́ исповѣ́данія вѣ́ры и шле́мъ возложи́въ благода́ти, свѣтлѣ́йшій язы́комъ, Іоа́нне, боговѣща́ннымъ и честны́мъ, я́коже мече́мъ, ссѣ́клъ еси́ безу́мнаго епа́рха.

Богоро́диченъ: Гора́ превысо́кая, ю́же ви́дѣ Даніи́лъ, ка́мень отъ горы́ же отсѣче́ся му́жеску руку́ кромѣ́, Тебе́ прообразова́, Богоро́дице: безъ му́жа бо на́мъ пло́тію родила́ еси́ Емману́ила.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Му́ками, я́ко зла́то честно́е, искуси́лся еси́, страда́льче сла́вне, и Царю́ си́лъ прине́слся еси́, всепло́діе словеси́ и́стинно, вмѣ́сто огня́ олта́рнаго мече́мъ истнѣ́емо.

О Влады́цѣ пе́рвѣе и Го́сподѣ не насы́тишася іуде́е законопресту́пніи и пророкоубíйственніи, но и Того́ му́ченика влачи́ма неми́лостивно, отъ слу́гъ нече́стія теку́ще закала́ху.

Епа́рхъ сѣ́ти простира́ше словесы́ ласка́тельными къ ловле́нію страда́льца прему́драго. Но о́нъ вопія́ше къ нему́: преста́ни на мно́зѣ буесло́вія, а́зъ бо тва́ри не поклоню́ся, па́че Созда́вшаго.

Ма́слина плодови́тая въ це́ркви Жива́го Бо́га твои́хъ моще́й ра́ка ны́нѣ яви́ся, отъ нея́же обира́емъ разли́чная неду́говъ исцѣле́нія, и́же тобо́ю обога́щшіися и чудесы́ твои́ми крася́щіися.

Богоро́диченъ: Рече́ боже́ственный Іезекíиль: и бу́детъ две́рь затворе́на. И сіе́ на Тебѣ́ испо́лнися, Влады́чице: вни́де бо несказа́нно въ Тя́ Отчее Сло́во и мíру яви́ся Плотоно́сецъ изъ Тебе́, Дѣ́во, сохрани́въ Тя́ во обои́хъ.

Сѣда́ленъ, гла́съ 8. Подо́бенъ: Прему́дрости.

Прему́дрости рачи́тель бы́въ, сокро́вище добродѣ́телей, отону́дуже и поче́рплъ еси́ боже́ственная разумѣ́нія. Тѣ́мже и, вре́мени призва́вшу, къ подвиго́мъ усе́рдно совле́клся еси́, пріе́мля му́ченическія ра́ны, пло́ти содробле́ніе и крове́й истоща́ніе, и ны́нѣ живе́ши въ неизрече́ннѣ свѣ́тѣ съ му́ченики. Сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе дарова́ти покланя́ющимся вѣ́рою святы́мъ моще́мъ твои́мъ. [Два́жды.]

Сла́ва, и ны́нѣ, богоро́диченъ:

Помышля́ю су́дъ и бою́ся, испыта́нія трепе́щу стра́шнаго и ужаса́юся му́ки и огня́ болѣ́зни, тмы́ же и та́ртара. Увы́, что́ сотворю́? Сту́дъ ка́ко претерплю́, егда́ кни́ги разгну́тся и дѣя́нія облича́тся? Сего́ ра́ди припа́даю Ти́, Богоро́дице Пречи́стая: предста́ни ми́ тогда́, ну́жды о́ныя изыма́ющи, Тебе́ бо и́мамъ прибѣ́жище, Влады́чице.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Удица льсти́вая язы́къ бя́ше мучи́теля, вра́жіими подви́жимь ко́зньми, преложи́ти великоду́шнаго спѣша́щь, но бездѣ́ленъ обличи́ся, страда́льцу въ ра́дости зову́щу: сла́ва си́лѣ Твое́й, Го́споди.

Что́ ми мно́гая словеса́ и обѣща́нія тлѣ́емая, я́же безу́мнѣ предлага́еши? — Іоа́ннъ къ мучи́телю вопія́ше, — сія́ вся́ мнѣ́ же́лчи горча́йша, сла́достно взыва́ющу: сла́ва си́лѣ Твое́й, Го́споди.

Егда́ ра́ны мно́жайшія на мои́хъ процвѣту́тъ пло́техъ, тогда́ вѣнце́мъ свѣтлѣ́йшимъ упова́ю сподо́битися, — страда́лецъ къ пе́рсу глаго́лаше, — не косни́ про́чее, о злому́дренне, а́зъ бо вопію́: сла́ва си́лѣ Твое́й, Го́споди.

Ника́коже тебе́ послу́шаю, къ па́губѣ привлача́ща, — огнеслужи́телю Іоа́ннй вѣща́ше. — Умру́ же па́че усе́рдно за Уме́ршаго мене́ ра́ди и съ му́ченики свѣ́тло вопію́: сла́ва си́лѣ Твое́й, Го́споди.

Богоро́диченъ: Изобразова́ше въ Чермнѣ́мъ проше́ствіе дре́вле Изра́илево безму́жное Твое́ рождество́, Всецари́це: я́коже бо о́нъ тогда́ про́йде немо́кренно, та́ко и Христо́съ безсѣ́менно отъ Твои́хъ пречи́стыхъ крове́й произы́де, Дѣ́во.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Изнемого́ша бію́ще слуги́ страстоте́рпческія пло́ти, утруди́ся и мучи́тель томле́нія изыску́я: но о́нъ до́блественнѣ терпя́ше, красу́яся ра́нами, я́же за любо́вь подъя́тъ Го́спода твоего́.

Ко́ль стра́шно же и пресла́вно о Христѣ́ сопротивле́ніе твое́, ему́же у́бо почуди́шася племена́, обрѣ́тшаяся на по́двизѣ, и похвали́ша терпѣ́ніе, пе́рсы же посрами́шася со іуде́и, студо́мъ облеко́шася.

Окрестъ стоя́ху мно́жества, зря́ще быва́емое, сла́вне, и мучи́тель предсѣдя́ше, тебе́ пріобрѣсти́ надѣ́яся, но погрѣши́ безу́мный тща́нія, всу́е претя́ непристра́шному и вотще́ бія́ адама́нта.

Епа́рха злочести́ваго безу́мному велѣ́нію руга́яся, боже́ственный Іоа́ннъ, пре́лесть облича́ше пе́рсскія горды́ни: со́лнцу, глаго́ля, не поклоню́ся, тва́ри су́щи, человѣ́комъ рабо́тающей, бо́льшему ру́къ Бо́жіихъ созда́нію.

Богоро́диченъ: Горѣ́ бя́ше соприсносу́щенъ, Отцу́ и Бо́гу, Бо́гъ Сло́во и съ на́ми Бо́гъ и Человѣ́къ, Богоро́дице, Тобо́ю соше́дъ къ на́шему смире́нію, свобожда́я отъ кля́твы пра́дѣднія: Тебе́ бо ви́дѣ патріа́рхъ Іа́ковъ лѣ́ствицу небе́сную.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Ника́коже поколеба́ша столпа́ благоче́стія свирѣ́пство повелѣва́ющаго, ниже́ па́лицами біе́нія, но ни ра́ны, ни сме́рть ну́жднѣйшая.

Оку херуви́мскому ума́ твоего́ чистота́ уподо́бися: до́лѣ бо му́жески терпѣ́лъ еси́ муче́нія, горѣ́ же предстоя́лъ еси́ Влады́цѣ, Иже посла́ тебѣ́ вѣне́цъ побѣди́тельный.

Взыгра́шася свѣ́тло му́ченичестіи тогда́ ли́кове, ви́дѣвше твое́ дерзнове́ніе, и, прини́кше ку́пно со а́нгелы, неви́димо укрѣпля́ху тя́ въ по́двизѣ.

Ужа желѣ́зная Іоа́ннъ, страда́лецъ изя́щный, зла́та ого́рлія вмѣня́ше я́, и я́же отъ іуде́й ка́меней мета́нія, — степе́ни къ небе́сному ше́ствію.

Богоро́диченъ: Обра́знѣ руно́ Гедео́нъ прія́тъ ороше́но, Твое́ предвозвѣща́я чу́до: сни́де бо, я́ко до́ждь на руно́, Богоро́дице, Еди́ный отъ Тро́ицы во утро́бу Твою́, воплоща́емь.

Конда́къ, гла́съ 4. Подо́бенъ: Вознесы́йся.

Морску́ю пла́вая пучи́ну ку́плею, отъ восто́ка тща́лся еси́ къ сѣ́веру, но Бо́гу призва́вшу тя́, я́коже Матѳе́й мы́тницу, ты́ же ку́плю оста́вль, и Тому́ послѣ́довалъ еси́ кро́вію муче́нія, вре́менными искупи́въ непроходи́мая, и вѣне́цъ прія́лъ еси́ непобѣди́мый.

Икосъ:

Прему́дрый Зижди́тель и Влады́ка, и Господи́нъ виногра́да мы́сленнаго, я́коже пресвяты́ми Свои́ми усты́ во при́тчи виногра́да глаго́летъ: я́ко во единыйна́десятъ ча́съ дѣ́лавшимъ подо́бную даде́ цѣ́ну, я́кожде и отъ пе́рваго дѣ́лавшимъ. Ны́нѣ дѣ́лы извѣсти́ въ при́тчи кры́емое, Іоа́нна показа́въ свѣ́тла му́ченика, на са́мый уже́ послѣ́докъ лѣ́тнымъ ты́сящамъ, подо́бно пе́рвымъ страда́льцемъ просла́ви нетлѣ́ніемъ и исцѣле́нія да́ромъ: вре́менными бо искупи́въ непроходи́мая, и вѣне́цъ но́ситъ непобѣди́мый.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Приноси́мая ти́ страда́нія, Іоа́нне досточу́дне, младе́нецъ стрѣля́нія му́жески вмѣня́лъ еси́, ра́достно поя́: препѣ́тый отце́въ Госпо́дь и Бо́гъ, благослове́нъ еси́.

Ру́ку ча́сто простира́я къ мучи́телю, Іоа́ннъ глаго́лаше: что́ всу́е труди́шися, безсту́дне? му́ки бо творя́ мнѣ́ — пестра́ одѣя́нія, и сме́рть — вѣне́цъ безсме́ртія.

Истиненъ а́зъ му́ченикъ и́стиннаго Христа́ Бо́га на́шего, — страда́лецъ взыва́ше, — влаче́нія бо цвѣ́ты благово́нны вмѣня́ю и кро́вныя струи́ — ба́ню креще́нія.

Но́щь отъ мене́ су́дится житіе́ е́же во пло́ти, — Іоа́ннъ любому́дрствоваше, — ско́ро у́бо про́чее пло́ти разрѣши́ мя́ соу́за, да я́же со Христо́мъ жи́знь наслѣ́дую.

Богоро́диченъ: Ри́торствующій язы́къ безгла́сенъ и недви́жимь, и́же о Тебѣ́ зри́мъ, Богора́дованная: не и́мать бо пости́гнути непостижи́маго зача́тія неизрече́нное рожде́ніе.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Ублажи́ша тя́ цари́, благослови́ша тя́ святи́тели, слы́шаще твое́ му́жественное терпѣ́ніе и ко Христу́ хода́тая стяжа́вше тя́. И ны́нѣ приходя́ще, честны́мъ твои́мъ моще́мъ покланя́ются.

Шата́шася иногда́ язы́цы съ людьми́ законопресту́пными, на Христа́ и Го́спода поуча́ющеся тще́тная, и ны́нѣ собра́шася, пе́рсы у́бо Іоа́нна влача́ще, іуде́и же закала́юще.

Ятъ бы́сть тобо́ю, и удержа́нъ, и до конца́ низложе́нъ змíй безпло́тный во пло́ти твои́мъ терпѣ́ніемъ. И того́ крѣ́пость угасе́ и лю́тое мучи́тельство, Христу́ въ пло́ть обо́лкшуся.

Хваля́ся я́звами Христо́выми, къ вѣ́чнымъ восте́клъ еси́ оби́телемъ, въ багряни́цу одѣ́янъ, му́чениче, отъ крове́й твои́хъ обагре́ную, и свѣ́тло Царю́ си́лъ предстои́ши, съ му́ченики лику́я.

Богоро́диченъ: Иса́іи у́гль дре́вле по́сланъ бы́сть, клеща́ми носи́мъ отъ Серафи́ма, каса́ющся тому́ и грѣхи́ оставля́ющь. Клеща́ же Ты́ еси́, Дѣ́во, боже́ственный Угль носи́вшая во оставле́ніе грѣхо́въ человѣ́честву.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Во́инъ и́стинный Христо́ва проповѣ́данія бы́лъ еси́, Іоа́нне, и ле́сти потреби́тель безбо́жія. Тѣ́мже и ны́нѣ моли́твами твои́ми потреби́ ва́рварское воста́ніе, Импера́тору на́шему подъ но́ги сіе́, сла́вне, низлага́я.

Аще и разсѣ́яни бы́ша свяще́нныя твоя́ пло́ти, му́дре, а́ще и кро́ви излія́шася, но побѣди́тельная на тебѣ́ преидо́ша. Тѣ́мъ на на́съ востаю́щихъ си́лою твое́ю посрами́ и Импера́тора на́шего яви́ побѣди́теля.

Лу́къ сокруши́ нечести́выхъ, во́ине непобѣди́ме, непра́ведно дви́жимый на твое́ достоя́ніе, е́же себѣ́ избра́лъ еси́, возлюби́въ, и Импера́тору на́шему ски́птры утверди́, да и мы́ ти́хо и ми́рно препрово́димъ жи́тельство.

Юже жела́хомъ па́мять свѣтоза́рную твою́ и честну́ю, прія́хомъ и облобыза́хомъ, ра́дующеся ду́хомъ и игра́юще, мо́лимся, блаже́нне: мѣ́сто сіе́ и лю́ди, идѣ́же изво́ли сла́витися, сохраня́й невре́дно, съ боговѣнча́ннымъ Импера́торомъ.

Богоро́диченъ: Его́же проро́цы провозвѣсти́ша вси́ многообра́знѣ, воплоща́ема на́съ ра́ди, Тобо́ю ви́дѣхомъ, Богоро́дице, Бо́га, на́мъ соверше́нна, избавля́ющаго человѣ́ки отъ кля́твы пра́дѣднія, мы́ же Твои́ми моли́твами вѣ́чныя гее́нны да изба́вимся.

Свѣти́ленъ. Подо́бенъ: Пло́тію усну́въ.

Свѣ́ту невече́рнему предстоя́, блаже́нне, съ му́ченическими ли́ки, воспѣва́ющія тя́ въ па́мяти твое́й отъ искуше́нія спаса́й моли́твами твои́ми. [Два́жды.]

Сла́ва, и ны́нѣ, богоро́диченъ:

Незаходи́маго Свѣ́та носи́ло, Приснодѣ́во, просвѣ́щшаго сѣдя́щихъ во тмѣ́ невѣ́дѣнія пре́лести, озари́ и на́мъ, грѣ́шнымъ, свѣ́тъ Сы́на Твоего́.

На хвали́техъ, Вся́кое дыха́ніе.., поста́вимъ стихи́ 4 и пое́мъ стихи́ры, гла́съ 1. Подо́бенъ: Всехва́льніи му́ченицы.

Прехва́льне Іоа́нне,* тебе́ ни свирѣ́пство мучи́теля,* ни слове́съ ласка́нія,* ни му́къ преще́нія,* ни го́рькая біе́нія* отъ Христа́ отторго́ша,* Его́же отъ младе́нства возлюби́лъ еси́,* Ему́же и моли́ся* дарова́ти душа́мъ на́шимъ* ми́ръ и ве́лію ми́лость. [Два́жды.]

Мнѣ́ ничто́же сладча́йше,* ниже́ предпочте́ннѣйше, —* Іоа́нне, глаго́лалъ еси́ му́чащимъ, —* ни сла́ва преходя́щая,* ни бога́тство тлѣ́нное,* па́че Христа́, небе́снаго Царя́.* Его́же моли́* дарова́ти душа́мъ на́шимъ* ми́ръ и ве́лію ми́лость.

Образъ бы́сть му́ченичеству* въ лѣ́тѣхъ послѣ́днихъ* благоро́днѣйшій му́ченикъ,* къ ре́вности распала́я* ду́ши боголюбе́зныхъ страда́ній свои́хъ* сла́вою пребога́тою,* Христу́ же мо́лится* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 2:

Пріиди́те, мучениколю́бцы, наслади́мся мы́сленно духо́вныя дне́сь трапе́зы, ю́же на́мъ предложи́ му́ченикъ Іоа́ннъ, ея́же и а́нгели наслажда́ются, по ре́кшему проро́ку: хлѣ́бъ а́нгельскій яде́. Съ ни́миже и ду́хомъ водворя́ется, и на́мъ про́ситъ отъ Спа́са Христа́ грѣхо́въ оставле́нія, того́ честну́ю па́мять соверша́ющимъ.

И ны́нѣ, богоро́диченъ.
Славосло́віе вели́кое, и ектеніи́, и отпу́стъ.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, [гла́съ 7]: Возвесели́тся пра́ведникъ о Го́сподѣ,* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ ко Ефесе́емъ, зача́ло 233. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь]. Ева́нгеліе отъ Матѳе́я, зача́ло 36. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 16 – 24 об.

/ Къ оглавленію раздѣла /


Наверхъ / Къ титульной страницѣ

0