Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія, въ 1-й де́нь.
Слу́жба преподо́бному Ага́питу Пече́рскому, врачу́ безме́здному.

НА МАЛѢЙ ВЕЧЕРНИ,
На Го́споди, воззва́хъ, стихи́ры на 4, гла́съ 8. Подо́бенъ: О, пресла́внаго чудесе́.

Преподо́бне о́тче Ага́пите,* ты́ въ Пече́рстѣй оби́тели* Бо́гу до́брѣ послужи́лъ еси́,* въ пеще́рѣ те́мнѣй подвиза́лся еси́* и досто́йный первонача́льниковъ на́шихъ учени́къ бы́лъ еси́,* тѣ́мже тя́ Христо́съ Госпо́дь* во сла́вѣ небе́снаго Ца́рствія вчини́,* тѣ́ло твое́ многоподви́жное нетлѣ́ніемъ и чудотворе́ніи просла́ви,* Тому́ помоли́ся, преподо́бне, спасти́ ду́ши на́ша. [Два́жды.]

Преподо́бне о́тче Ага́пите,* во всю́ страну́ Россíйскую* изы́де сла́ва равноа́нгельнаго твоего́ житія́,* и́мже оби́тель Пече́рскую духо́вно облагоуха́лъ еси́,* я́ко кри́нъ благово́ненъ, въ пеще́рѣ насажде́нный* и водо́ю Бо́жія благода́ти ороше́нный,* тѣ́мже возра́слъ еси́ въ дре́во чудото́чное* Вы́шняго вертогра́да Христо́ва* и прино́сиши плоды́, вои́стинну спаси́тельныя душа́мъ на́шимъ.

Преподо́бне о́тче Ага́пите,* твоя́ труды́ и по́двиги,* бдѣ́нія и поще́нія* и пеще́рная злострада́нія кто́ изочте́тъ?* Въ святѣ́й же па́мяти твое́й* дне́сь Ла́вра свѣ́тло лику́етъ,* такова́го избра́нника духо́вно возрасти́въ* и и́стиннаго уго́дника Христа́ Бо́га;* Тому́ помоли́ся, богоно́сне, спасти́ ду́ши на́ша.

Сла́ва, гла́съ 6:

Иже по о́бразу Ева́нгелія Христо́ва житіе́ твое́ поста́вивъ, по́стнически пребыва́лъ еси́, му́жески естество́ пону́дивъ, да пло́ть порабо́тиши ду́ху, вся́кое злострада́ніе съ любо́вію терпѣ́лъ еси́, я́ко и́стинный учени́къ небе́снаго Учи́теля Христа́, и ны́нѣ, на небеса́ пресели́вся, лице́ Того́ пресвѣ́тлое зри́ши, о́тче на́шъ Ага́пите, и мо́лишися благопрія́тно о вѣ́рою и любо́вію чту́щихъ святу́ю па́мять твою́.

И ны́нѣ, богоро́диченъ, гла́съ то́йже:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ага́пите, о́тче на́шъ,* въ житіи́ подо́бяся Христу́,* по сме́рти си́лу Того́ воскресе́нія* нетлѣ́ніемъ тѣ́ла показу́еши,* моля́ся о душа́хъ на́шихъ.

Сти́хъ: Честна́ предъ Го́сподемъ* сме́рть преподо́бныхъ Его́.

Приста́нище немяте́жное* Пече́рскія оби́тели дости́глъ еси́,* послушли́въ бы́въ уста́вомъ* преподо́бныхъ оте́цъ Анто́нія и Ѳеодо́сія.* Съ ни́миже моли́ся о душа́хъ на́шихъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Гла́дъ и жа́жду* терпѣли́вно поне́слъ еси́,* поко́й тѣле́сный возненави́девъ,* а́нгелъ во пло́ти и человѣ́къ небе́сный бы́въ,* Ага́пите, о́тче на́шъ.

Сла́ва, гла́съ 8:

Мона́ховъ о́бразъ и пра́вило извѣ́стное, почита́емъ тя́, о́тче на́шъ Ага́пите, Ла́вры Пече́рскія сла́ва и похвало́. Въ не́йже трудолю́бно подвиза́вся, Бо́гу до́брѣ угоди́лъ еси́, а́нгеловъ собесѣ́дниче и преподо́бныхъ удобре́ніе, съ ни́миже моли́ся Го́сподеви поми́ловати ду́ши на́ша.

И ны́нѣ, богоро́диченъ, гла́съ то́йже:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Тропа́рь, гла́съ 5:

Богоно́снаго Анто́нія ревну́я смиренному́дрію, а́ки нѣ́кіимъ врачевство́мъ — зе́ліемъ снѣ́днымъ, исцѣля́лъ еси́ боля́щія, преподо́бне Ага́пите, тѣ́мъ и врача́ невѣ́рна увѣ́ривъ, наста́вилъ еси́ на пу́ть спасе́нія. Уврачу́й и на́ша болѣ́зни и моли́ся Го́сподеви о воспѣва́ющихъ тя́.

Сла́ва, и ны́нѣ, богоро́диченъ, гла́съ то́йже:

Ра́дуйся, две́ре Госпо́дня непроходи́мая; ра́дуйся, стѣно́ и покро́ве притека́ющихъ къ Тебѣ́; ра́дуйся, необурева́емое приста́нище и неискусобра́чная, ро́ждшая пло́тію Творца́ Твоего́ и Бо́га, моля́щи не оскудѣва́й о воспѣва́ющихъ и кла́няющихся Рождеству́ Твоему́.


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 4. Подо́бенъ: Яко до́бля.

Духо́вныя благода́ти дарова́ніе* изоби́льно пріе́мь свы́ше,* Ага́пите преподо́бне,* а́ки рѣ́чными струя́ми, всѣ́хъ напая́еши* и моли́твами твои́ми подае́ши исцѣле́ніе* всѣ́мъ, съ вѣ́рою къ тебѣ́ притека́ющимъ.* Сего́ ра́ди и мы́, дерзнове́ніе пріе́мше,* кла́няемся ра́цѣ моще́й твои́хъ и про́симъ,* да пода́си душа́мъ и тѣлесе́мъ на́шимъ исцѣле́ніе. [Три́жды.]

Стра́сти безслове́сныя ума́ чистото́ю* и непреста́нными въ моли́твахъ стоя́ніи* покори́въ ду́ху, всеблаже́нне,* прія́лъ еси́ благода́ть исцѣле́нія* и подае́ши неоску́дно всѣ́мъ прося́щимъ отъ тебе́ по́мощи.* Тѣ́мже и мы́, твое́ почита́юще успе́ніе,* мо́лимтися прилѣ́жно:* я́ко вра́чь безме́здный* пода́ждь душа́мъ и тѣлесе́мъ на́шимъ исцѣле́ніе. [Три́жды.]

Ра́ка моще́й твои́хъ,* о́тче преподо́бне Ага́пите,* свѣтоза́рное не́бо явля́ется,* показу́я чудеса́, я́ко лучено́сныя звѣ́зды,* и подае́тъ благода́тное исцѣле́ніе* съ наде́ждою къ не́й притека́ющимъ.* Сего́ ра́ди и мы́, упова́ніе иму́ще,* мо́лимтися прилѣ́жно* дарова́ти душа́мъ и тѣлесе́мъ на́шимъ въ страсте́хъ поможе́ніе. [Два́жды.]

Сла́ва, гла́съ 2:

Благода́ть исцѣле́нія свы́ше пріе́мый, живы́й еще́ въ маловре́менной се́й жи́зни, преблаже́нне Ага́пите, подава́лъ еси́ всѣ́мъ прося́щимъ исцѣле́ніе незави́стно. Ны́нѣ бо́льшія благода́ти сподо́бивыйся, предстоя́ Вы́шняго престо́лу, низпосли́ отъ твои́хъ дарова́ній на́мъ, поклоня́ющимся многочуде́снымъ твои́мъ моще́мъ и па́мять твою́ хвала́ми почита́ющимъ, я́ко да пріи́мемъ неду́гомъ на́шимъ исцѣле́ніе твои́ми, о́тче, къ Бо́гу моли́твами.

И ны́нѣ, богоро́диченъ, гла́съ то́йже:

Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.

Вхо́дъ. Проки́менъ дне́ и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи, стихи́ра хра́ма. Сла́ва, гла́съ 6:

Преподо́бне о́тче Ага́пите, измла́да навы́кнувъ благоче́стію, яре́мъ Христо́въ на ра́мо твое́ возложи́лъ еси́ трудолю́бно, и вслѣ́дъ Влады́ки твоего́ поте́клъ еси́, ра́дуяся. Пече́рская оби́тель духо́вно тя́ воспита́, въ не́йже тѣ́ло твое́ нетлѣ́нное оста́вилъ еси́, я́ко наслѣ́діе бога́тое, ду́хъ же тво́й въ селе́ніихъ небе́сныхъ упокое́ніе получи́, идѣ́же со святы́ми Бо́гу предстоя́, проси́ на́мъ спасе́ніе и ве́лію ми́лость.

И ны́нѣ, богоро́диченъ, гла́съ то́йже:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Егда́ пріи́де на тя́ зва́ніе Боже́ственное,* преподо́бне о́тче на́шъ Ага́пите,* мíръ оста́вилъ еси́* и благооти́шіе оби́тели Пече́рскія возлюби́лъ еси́,* въ не́йже трудолю́бно подвиза́лся еси́,* въ пѣ́ніихъ, бдѣ́ніихъ и поще́ніихъ,* а́ки безпло́тный, пребыва́я,* и вели́кимъ отце́мъ Анто́нію и Ѳеодо́сію во все́мъ подража́я.* Тѣ́мже прія́лъ еси́ да́ръ исцѣле́нія отъ Христа́ Бо́га* и сподо́бился еси́ предстоя́нія престо́лу Его́ небе́сному,* идѣ́же помяни́ въ моли́твахъ богопрія́тныхъ* чту́щихъ святу́ю па́мять твою́.

Сти́хъ: Честна́ предъ Го́сподемъ* сме́рть преподо́бныхъ Его́.

Егда́ изше́лъ еси́ отъ мíра, о́тче Ага́пите,* и въ оби́тель Пече́рскую прите́клъ еси́,* тогда́ осѣни́ тя вседѣ́тельная благода́ть Ду́ха Свята́го* и въ по́двизѣхъ духо́вныхъ му́жественна и терпѣли́ва тя́ сотвори́,* да, я́ко до́брый во́инъ Христо́въ,* возмо́жеши бра́тися со враги́ неви́димыми,* и́хже искуше́нія вся́ посрами́лъ еси́* и, я́ко побѣдоно́сецъ,* нетлѣ́ненъ вѣне́цъ отъ руки́ Вседержи́теля Бо́га прія́лъ еси́.* Тѣ́мже тя́ чте́мъ и ублажа́емъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Егда́ приспѣ́ вре́мя отше́ствія твоего́ къ Бо́гу,* преподо́бне о́тче на́шъ Ага́пите,* тогда́ а́нгели пресвѣ́тліи* пріидо́ша взя́ти святу́ю ду́шу твою́,* я́ко невѣ́сту чи́сту,* и Са́мъ Христо́съ Госпо́дь, а́нгеловъ и человѣ́ковъ Влады́ка,* прія́тъ тя́ въ небе́сное Свое́ Ца́рство.* Тебѣ́, си́це просла́вленному горѣ́* и нетлѣ́ніемъ чудотво́рнымъ почте́нному на земли́,* пѣ́снь хвале́бную съ любо́вію прино́симъ,* я́ко засту́пнику на́шему и предста́телю непосты́дному.

Сла́ва, гла́съ 3:

Отъ духо́вныхъ дарова́ній струи́ исцѣле́ній изводя́, сла́вне, мно́гими страстьми́ содержи́мымъ, твоего́ тре́бующимъ заступле́нія, пода́ждь ско́рую по́мощь свы́ше, струя́ми чуде́съ твои́хъ прохлажда́я и прогоня́я отъ лука́ваго наноси́мыя болѣ́зни, я́ко да, почерпа́юще исцѣле́нія вси́ ту́не, сла́вимъ Отца́ Небе́снаго, и велича́емъ Безлѣ́тнаго Сы́на Его́, съ Присносу́щнымъ Ду́хомъ Его́, и тя́, о́тче Ага́пите, вси́ ублажа́емъ.

И ны́нѣ, богоро́диченъ, гла́съ то́йже:

Безъ сѣ́мене отъ Боже́ственнаго Ду́ха во́лею же Отчею зачала́ еси́ Сы́на Бо́жія, отъ Отца́ безъ ма́тере пре́жде вѣ́къ су́ща, на́съ же ра́ди, изъ Тебе́ безъ отца́ бы́вша, пло́тію родила́ еси́ и Младе́нца млеко́мъ пита́ла еси́. Тѣ́мже не преста́й моли́ти изба́витися отъ бѣ́дъ душа́мъ на́шимъ.

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1:

Ангельская ликостоя́нія собесѣ́дника тя́ и́мутъ, о́тче богоно́се Ага́пите, и Са́мъ Влады́ка а́нгелъ Христо́съ Госпо́дь, тобо́ю на земли́ просла́вленный житія́ чистото́ю, увѣнча́ тя вѣнце́мъ нетлѣ́ннымъ сла́вы небе́сныя, Ему́же со дерзнове́ніемъ мо́лишися о душа́хъ на́шихъ. [Два́жды.]

Сла́ва, и ны́нѣ, богоро́диченъ, гла́съ то́йже:

Гла́съ Гавріи́ловъ прино́симъ Ти́, Чи́стая Дѣ́во: ра́дуйся, заче́ншая Творца́ всѣ́хъ Бо́га и обно́вльшая обетша́вшее человѣ́ческое естество́; ра́дуйся, я́ко была́ еси́ въ рождествѣ́ Дѣ́ва, и по рождествѣ́ Дѣ́ва па́ки пребыва́еши.

По 2-мъ стихосло́віи сѣда́ленъ, гла́съ 4:

Отре́кся пло́ти угожде́нія любве́ ра́ди Христа́ Бо́га, о́тче Ага́пите, въ оби́тель Пече́рскую всели́лся еси́ и копіе́мъ моли́твы непреста́нныя главу́ всезло́бнаго змíя сокруши́лъ еси́, богоно́снымъ отце́мъ Анто́нію и Ѳеодо́сію спо́стникъ и собесѣ́дникъ бы́въ, тѣ́хъ стезя́мъ неукло́нно послѣ́довалъ еси́, съ ни́миже блаже́нство ра́йское обрѣ́тъ, моли́ся Христу́ Бо́гу о чту́щихъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ то́йже:

Кто́ досто́йно восхва́литъ рождество́ Твое́, Пречи́стая? Безсѣ́менно бо зачала́ еси́ отъ Ду́ха Свята́го и пре́жде вѣ́къ отъ Отца́ рожде́нное Сло́во въ лѣ́то родила́ еси́, тѣ́мъ Тя́, я́ко и́стиннаго Бо́га на́шего Ма́терь, въ пѣ́снѣхъ чту́ще, пое́мъ и велича́емъ.

Велича́ніе:

Ублажа́емъ тя́, преподо́бне о́тче Ага́пите, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...

По поліеле́и сѣда́ленъ, гла́съ 8:

Труды́ и по́двиги твоя́ кто́ исповѣ́сть преблаже́нне Ага́пите? Вѣ́ренъ бо ра́бъ Го́споду своему́ бы́въ и вѣ́рнѣ Тому́ служа́, ввѣ́ренный тебѣ́ тала́нтъ умно́жилъ еси́ и съ благи́ми дѣ́латели дина́рій жи́зни вѣ́чныя прія́лъ еси́. Тѣ́мже, я́ко имѣ́я дерзнове́ніе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ то́йже:

Въ лѣ́ности проводя́ живота́ моего́ вре́мя, погуби́хъ тала́нтъ, ввѣ́ренный ми́ отъ Го́спода моего́, и ны́нѣ, лише́нъ Бо́жія благода́ти, къ Тебѣ́ зову́, Чи́стая: Ма́терними Твои́ми моли́твами бу́ди ми́ Хода́таица бла́га къ Человѣколю́бцу Бо́гу, помяни́ сро́дное Свое́ помышле́ніе о рабѣ́хъ Твои́хъ и испроси́ согрѣше́ній проще́ніе любо́вію чту́щему и благоче́стно поклоня́ющемуся Всесвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Свѣти́льникъ пресвѣ́телъ блгоче́стія изъ по́дъ спу́да пеще́рнаго на́мъ дне́сь возсія́. Пріиди́те, вѣ́рніи, того́ сія́нія благода́тнаго наслади́мся, рачи́тель бо Христо́въ бы́сть и вѣ́рный исполни́тель Его́ за́повѣдей. Тѣ́мже, о́тче на́шъ Ага́пите, помина́ющихъ тя́ любо́вію въ де́нь свята́го твоего́ торжества́ помяни́ въ моли́твахъ твои́хъ у престо́ла Спа́сова.

Кано́нъ моле́бный Пресвяты́я Богоро́дицы, гла́съ 8: Во́ду проше́дъ... И кано́нъ преподо́бнаго, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Яко нѣма́го дре́вле прикоснове́ніемъ устро́илъ еси́ пра́во глаго́лати, си́це и мнѣ́, Христе́, мо́й язы́къ разрѣши́, у́мъ отве́рзи, да принесу́ въ па́мять уго́дника Твоего́ хвале́ніе, любо́вію пою́щи.

Не могу́ воспѣ́ти я́сно благода́ти твоея́, преподо́бне, а́ще не ты́ моли́твами твои́ми пода́си мнѣ́ по́мощь, да просла́влю Влады́ку, да́вшаго тебѣ́ благода́ть исцѣле́ній, во хвале́ніи пою́щи.

По предувѣ́дѣнію воззва́нъ бы́лъ еси́, свя́те, въ слѣ́дъ Влады́ки своего́ ше́ствовати и, Тому́ послѣ́дуя, вся́ кра́сная мíра оста́вль, любо́вію прише́лъ еси́ къ вели́кому Анто́нію и съ ни́мъ пожи́лъ еси́, непреста́нное хвале́ніе Бо́гу пою́щи.

Земно́му а́нгелу и небе́сному человѣ́ку послѣ́дуя, и са́мъ а́нгельское житіе́ стяжа́лъ еси́, о́тче преподо́бне. Тѣ́мъ твоя́ исправле́нія почита́емъ и прославля́емъ всѣ́хъ Влады́ку, о тебѣ́ пѣ́снь Ему́ пою́ще.

Богоро́диченъ: Отъ земны́хъ и небе́сныхъ си́лъ сла́вимая, Приснодѣ́во, въ дне́шній де́нь хвале́ніе Тебѣ́ дерза́ющихъ приноси́ти, отъ всѣ́хъ прило́говъ сохраня́й, да вы́ну Тя́ воспое́мъ, Обра́дованная.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Во мно́гихъ лѣ́тѣхъ мно́жайшія проше́лъ еси́ труды́, Ага́пите, подвиза́яся во бдѣ́ніи и поще́ніи, до́ндеже единонра́венъ показа́лся еси́ наста́внику своему́ и отъ него́ утверди́лся еси́ на ка́мени тве́рдаго житія́.

Ничто́же и́но, то́кмо нищету́ имѣ́я, обнища́вшему на́съ ра́ди Христу́ послѣ́довалъ еси́, о́тче, и, Того́ за́повѣди храня́, служи́лъ еси́ больны́мъ, посѣща́я, и упокоева́я, и здра́віе тѣ́мъ моли́твою свое́ю подава́я.

Съ преподо́бнымъ жи́тельствуя, стяжа́лъ еси́ преподо́бство, достохва́льне Ага́пите, и исцѣле́нія даро́въ сподо́бился еси́, я́ко моли́твою и зе́ліемъ снѣ́днымъ здра́віе подава́лъ еси́ боля́щимъ, тѣ́мже и вра́чь наре́клся еси́ безме́здный.

Просла́вилъ еси́ Бо́га во удесѣ́хъ твои́хъ, преподо́бне, тѣ́мже и Бо́гъ тя́ просла́ви благода́тію исцѣле́нія, и́мже и на́ша неду́ги уврачу́й душе́вныя и тѣле́сныя, да утверди́мся на ка́мени исповѣ́данія Бо́жія.

Богоро́диченъ: Израсти́вшая живо́тное Дре́во, того́ плодо́мъ на́съ, умерщвле́нныхъ грѣха́ми, оживи́ и да́руй на́мъ, Ма́ти Чи́стая, крѣ́пкое бла́гости Твоея́ исповѣ́даніе.

Сѣда́ленъ, гла́съ 4:

Яко ту́не пріе́мый отъ Бо́га да́ръ исцѣле́нія, стра́ждущимъ исцѣле́ніе ту́не подае́ши, съ вѣ́рою къ тебѣ́ притека́ющимъ. Тѣ́мже и мы́, кла́няющеся ра́цѣ моще́й твои́хъ, о́тче преподо́бне, про́симъ прія́ти отъ тебѣ́ неду́гомъ на́шимъ исцѣле́ніе. [Два́жды.]

Сла́ва, и ны́нѣ, богоро́диченъ:

Къ Твоему́ благоутро́бію въ ско́рбехъ притека́юще, мо́лимся, Всенепоро́чная: пода́ждь преподо́бнаго Твоего́ ра́ди на́мъ, неду́ги одержи́мымъ, ско́рое исцѣле́ніе.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Бу́ія мíра сего́ Христо́съ избра́, да прему́дрыя посрами́тъ, е́же и на тебѣ́ сбы́стся, о́тче всеблаже́нне: благода́тію бо, а не хи́тростію прему́драго посрами́лъ еси́ врача́. Тѣ́мъ тя́ сла́вимъ, о Го́сподѣ пра́зднующи.

Прельсти́ся, и́же пе́рвѣе больны́хъ прельща́ше, извѣща́я и́мъ де́нь и ча́съ сме́рти, ему́же ты́ поноси́въ, преподо́бне, боля́щаго исцѣли́лъ еси́ моли́твою и зе́ліемъ снѣ́днымъ, ре́къ: да́ждь сла́ву Бо́гу, иму́щему клю́чь живота́ и сме́рти.

За́висти стрѣло́ю злочести́вый армени́нъ уя́звенъ, поноша́ше ти́, свя́те, и, посла́въ на сме́рть осужде́ннаго, повелѣ́ предъ тобо́ю умертви́ти бы́ліемъ смертоно́снымъ. Но ты́ сего́ моли́твою и зе́ліемъ исцѣли́въ, посрами́лъ еси́ еретика́, хотя́щаго тя́ посрами́ти.

Претыка́ющемуся, да́нная ти́ благода́ть бы́сть паде́ніе, преблаже́нне, наипа́че бо на тя́ вооружи́вся злочести́вый армени́нъ, наусти́ да́ти тебѣ́ отра́ву, но ты́, и сме́ртно испи́въ, невреди́мь бы́лъ еси́, я́ко Бо́жія благода́ть сохрани́ тя къ бо́льшему чудодѣ́йствію.

Богоро́диченъ: Ра́дуйся, сосу́де, носи́вшій мѵ́ро, исцѣли́вшее ро́дъ человѣ́ческій; я́домъ мя́ грѣхо́внымъ умерщвле́нна оживи́, да про́чее вре́мя цѣ́лъ поживу́, Тя́, Дѣ́во, восхваля́ющи.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Отъ Бо́га благода́ть исцѣле́нія пріе́мь, исцѣли́лъ еси́ кня́зя, и́же а́ще и врачу́емь бѣ́ отъ армени́на, но не получа́ше отра́ды, твоего́ же зе́лія вкуси́въ, отъ неду́га изба́вися.

Зри́те, и́ночествующіи, и добродѣ́тельному терпѣ́нію богоно́снаго отца́ почуди́теся, ка́ко со отрече́ніемъ мíра во́ли своея́ отрече́ся, и не изы́де никогда́же внѣ́ вра́тъ монасты́рскихъ, е́же ви́дяще, сему́ поревну́йте.

Еди́ну любо́вь ко всѣ́мъ иму́щи, а не на лице́ зря́щи, а́ще кня́зь, а́ще про́стъ къ тебѣ́ прихожда́ше, преподо́бне, всѣ́мъ приходя́щимъ подава́лъ еси́ исцѣле́ніе ту́не, еди́наго ища́ возме́здія отъ Бо́га.

Пріе́мь кня́зь тобо́ю исцѣле́ніе, всеблаже́нне, уразумѣ́, я́ко и́стиненъ ра́бъ Бо́жій еси́, и ви́дѣти тя́ жела́ше, тѣ́мже пріи́де къ тебѣ́ съ да́ры. Ты́ же, Еди́наго имѣ́я Бо́га, ничто́же отъ тѣ́хъ даро́въ восхотѣ́лъ еси́ прія́ти.

Богоро́диченъ: Хва́лимъ Тя́, Пречи́стая Дѣ́во, я́ко отверза́еши на́мъ две́ри ми́лости Твоея́ и подае́ши всѣ́мъ незави́стный исто́чникъ исцѣле́нія, отъ я́да грѣхо́внаго избавля́ющій.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Вся́ тлѣ́нная мíра сего́ оста́вивъ, принесе́нное зла́то изве́рглъ еси́, блаже́нне, предъ враты́ ке́лліи своея́, изверга́я вку́пѣ любоимѣ́ннаго врага́ и стира́я душегу́бную того́ главу́.

Еди́нъ би́серъ стяжа́въ многоцѣ́нный — Іису́са, вся́ во уме́ты вмѣни́лъ еси́, свя́те, и тѣ́мъ купи́лъ еси́ себѣ́ селе́ніе въ небе́сныхъ, е́же и мы́ получи́ти мо́лимся твои́ми, о́тче, моли́твами.

Мно́гими лѣ́ты постя́ся, изнемо́глъ еси́ тѣ́ломъ, преподо́бне, но ду́хомъ пребы́лъ еси́ крѣ́покъ, а́ки сто́лпъ, вся́ наноси́мая терпя́ и благодаря́ Бо́га, къ Нему́ взыва́лъ еси́: возведи́ отъ тли́ живо́тъ мо́й, Многоми́лостиве.

Тѣ́ломъ болѣ́знуя, ду́хомъ бра́лся еси́ съ злочести́вымъ армени́номъ, и́же по тріе́хъ дне́хъ сме́рть тебѣ́ провозвѣща́ше, сего́ ты́, блаже́нне, одолѣ́лъ еси́, по тріе́хъ мѣ́сяцѣхъ отше́ствіе свое́ къ Бо́гу возвѣща́я.

Богоро́диченъ: Во Твое́ чре́во, Пренепоро́чная Дѣ́во, все́льшееся Сло́во, ро́дъ человѣ́ческій въ небе́сныхъ дво́рѣхъ всели́. Умоли́ Того́ отъ тлѣ́нія мя́ сея́ жи́зни пресели́ти, идѣ́же пото́комъ сла́дости пита́ются святíи.

Конда́къ, гла́съ 6:

Вра́чь сы́й изря́денъ, чу́дне, явля́я несумне́нную твою́ вѣ́ру, облича́я же армени́ново невѣ́ріе и приводя́ его́ къ благоче́стію, себѣ́, бли́зъ сме́рти бы́вшу, испроси́лъ еси́ отъ Бо́га продолже́ніе живота́ и, си́мъ чу́домъ того́ увѣ́ривъ, приве́лъ еси́ Христо́ви, Ему́же въ весе́ліи предстоя́, моли́ся о на́съ, преподо́бне.

Икосъ:

Ангеловъ подража́теля и безпло́тныхъ си́лъ собесѣ́дника, а́нгельскими язы́ки подоба́етъ ублажи́ти тя́, преподо́бне, оба́че пріими́, а́ще и отъ человѣ́ческихъ бре́нныхъ усте́нъ, сію́ достодо́лжную тебѣ́ похвалу́: ра́дуйся, преподо́бне, во всѣ́хъ за́повѣдехъ Госпо́днихъ пра́во ходи́вый; ра́дуйся, богоно́сне, и́го благо́е и ле́гкое на ра́менахъ твои́хъ носи́вый. Ра́дуйся, въ моли́твѣ преуспѣ́вый; ра́дуйся, пеще́рною тѣсното́ю простра́нства небе́снаго дости́гнувый. Ра́дуйся, равноа́нгельно во пло́ти пожи́вый; ра́дуйся, нетлѣ́ніемъ благода́тнымъ просла́вленный. Ра́дуйся, чудотворе́нія да́ромъ обогаще́нный; ра́дуйся, цѣле́бниче вся́кихъ неду́говъ. Ра́дуйся, помо́щниче въ бѣда́хъ и напа́стѣхъ; ра́дуйся, Анто́нія богоно́снаго подража́телю. Ра́дуйся, Ѳеодо́сія богому́драго послѣ́дователю; ра́дуйся, Ага́пите, моли́твенниче о душа́хъ на́шихъ.

Пѣ́снь 7.

Ирмо́съ: Росода́тельну у́бо пе́щь содѣ́ла Ангелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Дарова́ніе имы́й свы́ше неду́ги исцѣля́ти, преподо́бне, боля́ща мя́ небреже́ніемъ благи́хъ дѣя́ній уврачу́й, я́коже иногда́ принесе́ннаго въ неду́зѣ уврачева́лъ еси́, моли́твою пода́въ тому́ здра́віе и воспѣ́въ: благослове́нъ Бо́гъ оте́цъ на́шихъ.

Чудодѣ́йствуя святы́ми, тва́ри Созда́тель внеза́пу поста́ви тя́ здра́ва предъ злочести́вымъ, и́же ви́дѣвъ, удиви́ся ско́рому твоему́ отъ болѣ́зни въ здра́віе премѣне́нію. Му́чима мя́ я́звами сту́дныхъ дѣ́лъ, во измѣне́ніе исправле́нія приведи́ твои́мъ, о́тче, свы́ше посѣще́ніемъ, да пою́: благослове́нъ Бо́гъ оте́цъ на́шихъ.

Болѣ́знь твоя́ и зе́ліе снѣ́дно пону́ди исповѣ́сти врача́ свое́ злоче́стіе, его́же укори́лъ еси́, я́ко дерзну́ осяза́ти святу́ю твою́ ру́ку; се́ дерза́ю и а́зъ къ тебѣ́, о́тче, приступи́ти, но молю́ тя: не отри́ни мя́ въ ну́ждахъ мои́хъ, да пою́: благослове́нъ Бо́гъ оте́цъ на́шихъ.

Трудо́въ свои́хъ собра́въ плоды́ съ весе́ліемъ, а́ки до́бръ земледѣ́лецъ, блаже́нною кончи́ною отше́лъ еси́ къ го́рнимъ, прія́ти отъ Христа́ Бо́га дая́ніе и прія́лъ еси́ отъ Него́ неконча́емую ра́дость, многочу́дне Ага́пите.

Богоро́диченъ: Къ Твоему́ приста́нищу прибѣга́емъ, Богоневѣ́стная Дѣ́во, носи́ми жите́йскихъ страсте́й волна́ми, я́же Ты́ укроти́, да воспое́мъ Тебѣ́: ра́дуйся, приста́нище жите́йскихъ пла́ваній.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Вра́чь бы́лъ еси́, о́тче, преди́венъ, тѣле́сныя болѣ́зни врачу́я, въ жи́зни се́й живы́й тѣ́ломъ, по кончи́нѣ же твое́й душе́вное врачевство́ подава́я, я́коже сіе́ на армени́нѣ яви́лъ еси́, души́ того́ да́въ цѣльбу́ и ко благоче́стію наказа́ніе.

Ви́дѣвъ тя́, свя́те, армени́нъ въ видѣ́ніи чу́дномъ, исповѣ́да я́сно, я́ко свя́тъ еси́ и преподо́бенъ, и въ вѣ́ру изъ невѣ́рія прело́жся, бы́сть и́нокъ твои́мъ направле́ніемъ, его́же и на́съ не лиши́, пою́щихъ Го́спода во вѣ́ки.

Мно́гое имы́й дарова́ніе, чудодѣ́йствовалъ еси́, исцѣля́я боля́щихъ, ны́нѣ же, сподо́бивыйся бо́льшихъ дарова́ній, приложи́ пла́стырь на ра́ны души́ моея́, да, получи́въ осла́бу, превозношу́ Го́спода во вѣ́ки.

Изъ пламенови́днаго свѣ́та святы́мъ струи́ благода́ти подая́й, Христе́ Бо́же, паля́щія мя́ стра́сти угаси́ щедро́тъ Твои́хъ росо́ю, разгоня́я тму́ страсте́й. Се́ бо преподо́бный мо́литъ съ на́ми Тебе́, Го́спода, превозноси́маго отъ всѣ́хъ во вѣ́ки.

Богоро́диченъ: Просвѣти́вшая мíръ пречи́стымъ Рождество́мъ Твои́мъ, мра́къ злодѣя́нія моего́ разжени́, излива́я мнѣ́ на благотворе́ніе щедро́тъ Твои́хъ бога́тую ми́лость, да превозношу́ Тя, Ма́терь Бо́жію, во вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Богодарова́ннаго цѣле́бника лю́діе иму́ще, никто́же да гряде́тъ къ су́етнымъ враче́мъ, и́же имѣ́ніе и здра́віе врежда́ютъ, но тре́буяй съ вѣ́рою да гряде́тъ къ ра́цѣ богоно́снаго отца́ и ту́не пріи́метъ исцѣле́ніе.

Мы́сленныя ура́ниша ны́ разбо́йницы ны́нѣ, неисцѣ́льныя у́бо иму́ще я́звы, несумнѣ́нно къ многочуде́снѣй припа́даемъ ра́цѣ твое́й, преподо́бне, и про́симъ: пода́ждь цѣльбу́ тре́бующимъ, да вси́ тя хва́лимъ и велича́емъ.

Въ го́рняя душе́ю возше́дъ, во всесвѣтя́щіяся черто́ги, оста́вилъ еси́, преблаже́нне, ра́ку моще́й свои́хъ въ пеще́рѣ; и́мже покланя́ющеся, про́симъ: пода́ждь неду́гомъ на́шимъ исцѣле́ніе, да тя́ пѣ́сньми велича́емъ.

По́мощи отъ тебе́ въ не́мощехъ прося́щихъ не пре́зри, но посѣще́ніемъ твои́мъ да́ждь душе́вное вку́пѣ и тѣле́сное исцѣле́ніе, преблаже́нне Ага́пите, я́ко сы́й вра́чь преизя́щный, да вы́ну тя́ велича́емъ.

Богоро́диченъ: По́мощи отъ Тебе́ тре́бующихъ не пре́зри, Дѣ́во, но подава́й съ вѣ́рою къ Тебѣ́ притека́ющимъ: Ты́ бо еси́ исто́чникъ цѣльба́мъ неоску́денъ, да Тя́ съ небе́сными си́лами при́сно велича́емъ.

Свѣти́ленъ:

Тлѣ́нная мíра оста́вивъ и нетлѣ́нная сподо́бився прія́ти, потща́лся еси́ ху́ждшая на лу́чшая премѣни́ти, обнища́въ любоимѣ́ніемъ стра́стнымъ, но обогати́вся дарова́ніемъ исцѣле́ній, и на́мъ сія́ пода́й, дне́сь па́мять твою́ почита́ющимъ, всеблаже́нне Ага́пите. [Два́жды.]

Сла́ва, и ны́нѣ, богоро́диченъ:

Спа́сшіися Тобо́ю, Чи́стую Тя́ Ма́терь исповѣ́дуемъ: родила́ бо еси́ Того́, Иже Кресто́мъ разруши́ сме́рть, и, возше́дъ на высоту́, вся́ привлече́ къ Себѣ́, и на́мъ дарова́ ве́лію ми́лость.

На хвали́техъ стихи́ры, гла́съ 4. Подо́бенъ: Да́лъ еси́ зна́меніе.

Стра́стная пло́ти взыгра́нія* увяди́въ по́стническими труды́* и возше́дъ на высоту́ добродѣ́телей,* свѣтлѣ́е со́лнца показа́лся еси́,* благода́тію исцѣле́ній сія́я* и просвѣща́я тѣ́хъ луча́ми къ тебѣ́ приходя́щихъ.* Тѣ́мже тя́ мо́лимъ, преподо́бне,* любо́вію па́мять твою́ почита́ющимъ,* пода́ждь неду́гомъ исцѣле́ніе. [Два́жды.]

Отъ Еди́наго Человѣколю́бца* свы́ше пріе́мь бога́тое дарова́ніе,* раздава́лъ еси́ то́ тре́бующимъ неоску́дно,* подая́ тѣ́мъ исцѣле́ніе,* но и ны́нѣ къ ра́цѣ моще́й твои́хъ припа́дающимъ,* низпосли́ цѣльбу́ въ неду́зѣхъ,* я́ко и́стинный вра́чь, преблаже́нне,* и моли́твенникъ о душа́хъ на́шихъ.

Вѣ́рою и любо́вію совоку́пльшеся,* лю́діе, въ па́мяти достоблаже́ннаго отца́,* пѣ́сненными гла́сы восхва́лимъ,* да исцѣле́нія въ не́мощехъ на́шихъ* отъ него́ сподо́бимся:* и́мать бо ско́рое преклоне́ніе* и подае́тъ исцѣле́ніе,* я́ко вра́чь безме́здный* и ско́рый въ ско́рбехъ помо́щникъ.

Сла́ва, гла́съ 2:

Безконе́чная Твоя́, Христе́ Царю́, благода́ть и дарова́ніе ве́ліе, е́же дарова́лъ еси́ преподо́бному Твоему́: не то́кмо бо живы́й тѣ́ломъ исцѣля́ше неду́ги, но и по сме́рти Боже́ственною си́лою Твое́ю ра́ка моще́й его́ нетлѣ́нныхъ подае́тъ съ вѣ́рою приходя́щимъ исцѣле́ніе. Тѣ́мъ мо́лимтися, благíй Влады́ко, свята́го Твоего́ приводя́ще во умилостивле́ніе, по мно́зѣй Твое́й бла́гости, душе́вныхъ и теле́сныхъ на́съ неду́говъ свободи́ и спаси́ ду́ши на́ша, я́ко Человѣколю́бецъ.

И ны́нѣ, богоро́диченъ, гла́съ то́йже:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.


НА ЛИТУРГІИ,

Блаже́нна отъ кано́на преподо́бнаго, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 84 – 89.

Дополнено по изданію: Пече́рская Минíа. [Часть вторая.] — Кíевъ: Въ тѵпогра́фіи Кíево-Пече́рскія Ла́ѵры, 2007. — С. 146-155.

/ Къ оглавленію раздѣла /


Наверхъ / Къ титульной страницѣ

0