Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 21 сентября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 1-й де́нь.
Слу́жба преподо́бнаго отца́ на́шего Діони́сія, Глуши́цкаго чудотво́рца.

ВЕЧЕРЪ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 6, гла́съ 4. Подо́бенъ: Да́лъ еси́ зна́меніе.

Струя́ми сле́зъ твои́хъ* сѣ́мя боже́ственное напои́лъ еси́,* я́ко земля́ благоплодови́та, богодухнове́нне,* стори́цею воздая́,* преподо́бія пло́дъ прозя́блъ еси́ вои́стинну* и въ жи́тницы собра́лъ еси́ мы́сленныя,* си́лою духо́вною* тебе́ претво́ршаго премѣне́ніемъ лу́чшимъ,* Діони́сіе пресла́вне. [Два́жды.]

Вѣ́рою и любо́вію,* о празднолю́бцы, соше́дшеся дне́сь,* псалмы́ и пѣ́сньми восхва́лимъ* небе́снаго человѣ́ка, земна́го а́нгела.* Къ нему́же возопіе́мъ:* о всеблаже́нне преподо́бне,* пусты́нный жи́телю,* по́стниковъ похвало́,* о на́съ моли́ся ко Го́споду, о́тче Діони́сіе,* спасти́ся душа́мъ на́шимъ. [Два́жды.]

Сла́ва, гла́съ 8:

Преподо́бне и богоблаже́нне о́тче Діони́сіе вои́стинну сподо́бился еси́ боже́ственныя жи́зни, посто́мъ и бдѣ́ніемъ изнуря́я тѣ́ло твое́, о́бразъ бы́въ мона́хомъ: а́ще бо и тѣле́сный язы́къ умолче́, но чудеса́ свидѣ́тельствуютъ, пусты́ня, проповѣ́дающи, хва́лится, имѣ́ющи въ себѣ́ неотъе́млемое сокро́вище; лю́діе бо, зря́ще честну́ю ра́ку моще́й твои́хъ и чудеса́ быва́емая, прославля́ютъ просла́вльшаго тя́ Го́спода. Ему́же моли́ся непреста́нно дарова́ти правосла́вному Импера́тору на́шему [и́мярекъ] на враги́ побѣ́ды и вселе́ннѣй ми́ръ и ве́лію ми́лость.

И ны́нѣ, богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Аще Пятьдеся́тница: И ны́нѣ, пра́здника.
Вхо́дъ. Проки́менъ дне́, чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яви́вся* отъ ма́тернихъ пеле́нъ,* богоно́се преподо́бне Діони́сіе,* сосу́дъ, о́тче, бы́лъ еси́* и до́мъ Пресвята́го Ду́ха.

Сти́хъ: Честна́ предъ Го́сподемъ* сме́рть преподо́бныхъ Его́.

Нося́ на ра́му твое́ю Госпо́день кре́стъ,* Діони́сіе, о́тче преподо́бне,* бѣсо́вское мечта́ніе* до конца́ потреби́лъ еси́* и вѣ́рнымъ исцѣле́ніе дарова́лъ еси́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Пре́лесть лука́выхъ бѣсо́въ* обличи́лъ еси́ кре́стною си́лою,* бо́дренными моли́твами и сле́зными исто́чники,* Це́ркви вѣ́рныхъ обогати́лъ еси́,* богоблаже́нне Діони́сіе.

Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію, я́ко мо́щно, возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, жи́тель пусты́нный, благотеку́щихъ обучи́тель, пра́вило добродѣ́тели извѣ́стнѣйшее. И ны́нѣ на небесѣ́хъ зерца́ломъ разрѣ́шшимся, о́тче на́шъ Діони́сіе, чи́стѣ зри́ши Святу́ю Тро́ицу, моля́ся несре́дственнѣ о и́же вѣ́рою и любо́вію чту́щихъ тя́.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Аще Пятьдеся́тница: И ны́нѣ, пра́здника.

Тропа́рь, гла́съ 1:

Боже́ственною любо́вію отъ ю́ности распала́емь, Діони́сіе преподо́бне, вся́, я́же въ мíрѣ кра́сная, возненави́дѣвъ, Христа́ еди́наго возлюби́лъ еси́, и сего́ ра́ди во вну́треннюю пусты́ню всели́лся еси́, со звѣрьми́ живы́й, ве́сь Христу́. Отону́дуже и Всеви́дящее Око, твоя́ труды́ ви́дѣвъ, да́ромъ чуде́съ и по преставле́ніи обогати́лъ тя́ е́сть. Тѣ́мже вопіе́мъ ти́: моли́ непреста́нно о всѣ́хъ на́съ, честну́ю па́мять твою́ при́сно въ пѣ́снехъ почита́ющихъ.

Сла́ва, и ны́нѣ, богоро́диченъ:

Гавріи́лу вѣща́вшу Тебѣ́, Дѣ́во, [ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ].


НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.]

По 1-й стихоло́гіи сѣда́ленъ, гла́съ 3. Подо́бенъ: Красотѣ́.

Сою́зомъ любве́ привяза́вся Христу́, земна́я же и мимотеку́щая возненави́дѣвъ, пусты́нное озлобле́ніе усе́рдно подъя́лъ еси́, бѣсо́вская же ополче́нія и и́хъ многоко́зненную си́лу до конца́ посрами́лъ еси́, и Подвигополо́жникъ Христо́съ дарова́ніемъ чуде́съ обогати́ тя́. Тѣ́мже тя́ почита́емъ, Діони́сіе богому́дре. [Два́жды.]

Сла́ва, и ны́нѣ, богоро́диченъ:

Яко невоздѣ́ланная, Дѣ́во, лоза́, краснѣ́йшій Гро́здъ прозябла́ еси́, источа́ющь на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже, я́ко вину́ Тя́ до́брыхъ блажа́ще при́сно, со а́нгеломъ вопіе́мъ Ти́: ра́дуйся, Благода́тная.

По 2-й стихоло́гіи сѣда́ленъ, гла́съ 1. Подо́бенъ: Ли́къ а́нгельскій.

Житіе́ благоче́стно на земли́ стяжа́въ, прія́телище чи́сто Ду́ху ты́ яви́лся еси́, просвѣща́я вѣ́рою къ тебѣ́ притека́ющія, блаже́нне. Тѣ́мже моли́ твоего́ Влады́ку просвѣти́ти ду́ши на́съ, воспѣва́ющихъ тя́, Діони́сіе, преподо́бне о́тче на́шъ. [Два́жды.]

Сла́ва, и ны́нѣ, богоро́диченъ:

Всѣ́хъ Творца́, и Бо́га, и Содѣ́теля, Всенепоро́чная Чи́стая, Ду́хомъ Боже́ственнымъ въ ложесна́хъ заче́нши, безъ истлѣ́нія родила́ еси́. Его́же сла́вяще, Тя́ воспѣва́емъ, Дѣ́во, я́ко пала́ту Царя́ всѣ́хъ и мíру заступле́ніе.

[Велича́ніе:

Ублажа́емъ тя́, преподо́бне о́тче Діони́сіе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8. Подо́бенъ: Прему́дрости.

Окормля́емь си́лою вседѣ́тельною и вѣ́триломъ кре́стнымъ обложе́нъ, легко́ преплы́лъ еси́ житія́ мо́ре и къ Боже́ственнымъ вои́стинну приста́нищемъ дости́глъ еси́, добродѣ́телей ку́плю мно́гу стяжа́въ, ю́же всѣ́хъ Влады́цѣ прине́слъ еси́, и́же, благíй ра́бе, слы́шалъ еси́. Неду́гующихъ исцѣли́лъ еси́, ско́рчившихся ру́цѣ испра́вилъ еси́, слѣпы́я просвѣща́я, нѣмы́мъ повелѣ́лъ еси́ вопи́ти. Діони́сіе преподо́бне, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Степе́нна, 1-й антифо́нъ 4-го гла́са. Проки́менъ, [гласъ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Матѳе́я, зача́ло 43. Псало́мъ 50-й.

Стихи́ра, гла́съ 2:

Ра́дуйся, преподо́бне о́тче Діони́сіе всече́стне, и́же зако́нъ Госпо́день до́брѣ извы́клъ еси́ и вѣ́ру соблю́лъ еси́ невреди́му, хода́тай яви́вся о ста́дѣ твое́мъ Христу́ Бо́гу. Того́ моли́ умири́ти мíръ и спасти́ ду́ши на́ша.

Кано́нъ Богоро́дицы на 6 и свята́го на 8, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Озаре́ніемъ Свята́го Ду́ха озари́ благоче́стно любо́вію пѣ́сньми восхваля́ющихъ тя́, по́стниковъ похвало́, мона́шествующихъ сла́во, пусты́ни украси́телю, благоче́стія учи́телю, Діони́сіе.

Отъ ю́ности жела́ніе къ Бо́гу возложи́въ, и къ Нему́, ра́дуяся, возше́лъ еси́, имѣ́я все́ твое́ помышле́ніе, взыгра́ніе пло́ти и страсте́й нахожде́ніе воздержа́ніемъ умертви́лъ еси́, Діони́сіе прехва́льне.

Попра́въ змíя, того́ сѣ́ти легко́ прелетѣ́лъ еси́, кри́лы благоче́стія впери́вся, о́тче: живо́тъ бо, ра́дуяся, объя́лъ еси́ отъ са́да кре́стнаго, блаже́нне Діони́сіе.

Богоро́диченъ: Уста́ви неуста́вное помышле́ніе смуще́нія, Пречи́стая Дѣ́во, Ма́ти Бо́жія, къ Сы́ну Твоему́ направля́ющи движе́нія.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Во свѣ́тѣ невеще́ственнѣ и мы́сленнѣ, отъ печа́лей веще́ственныхъ восте́къ къ небе́снымъ невеще́ственнымъ чино́мъ, преподо́бне, моли́твами твои́ми на́съ просвѣти́.

Воздержа́нія сла́дость иска́павъ, отри́нулъ еси́ го́ресть страсте́й, тѣ́мже па́че ме́да и со́та наслади́лъ еси́, о́тче, чу́вствія на́ша.

Возше́дъ на высоту́ добродѣ́телей, до́лу влеку́щія оплева́лъ еси́ сла́сти, сла́дость показа́вся спасе́нія, о́тче преподо́бне, ста́ду твоему́ проси́ грѣхо́въ оставле́нія.

Богоро́диченъ: Прему́дрость и Сло́во Отчее несказа́нно родила́ еси́, души́ моея́ лю́тую исцѣли́ я́зву и серде́чную болѣ́знь утоли́.

Сѣда́ленъ, гла́съ 8:

Красоты́ мірскíя отъ млады́хъ ногте́й, преподо́бне, возненави́дѣвъ, еди́наго Христа́ отъ се́рдца возлюби́лъ еси́ и, Тому́ все́ю душе́ю прилѣпи́вся, я́ко безпло́тенъ, на земли́ пожи́лъ еси́ съ пло́тію, сла́ву же мимотеку́щую и бога́тство ни во что́же вмѣни́въ, небе́сное бога́тство воспрія́лъ еси́ и сла́ву вѣ́чную. Тѣ́мже и ублажа́емъ свято́е твое́ успе́ніе и, въ не́мъ торжеству́юще, вопіе́мъ ти́: богоблаже́нне о́тче на́шъ Діони́сіе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Душе́вное очища́я чу́вство и разширя́я Боже́ственными видѣ́ніи, Боже́ственныхъ дарова́ній сподо́бился еси́, богоблаже́нне, къ ра́цѣ моще́й Твои́хъ притека́ющимъ, Діони́сіе преподо́бне, подае́ши ско́рое исцѣле́ніе.

Зако́номъ Бо́жіимъ повину́яся, преподо́бне, къ смотре́нію безпло́тныхъ и мы́сленныхъ твое́ худо́жество упра́вилъ еси́, преходя́ вы́ну отъ сла́вы въ сла́ву, отъ си́лы, о́тче, въ си́лу.

Богоуго́дно пожи́въ, пусты́ни, я́ко гра́ды, сотвори́лъ еси́ потре́бны и душеполе́зны, исто́чникъ исцѣле́ній пролива́я вѣ́рою покланя́ющимся ра́цѣ моще́й твои́хъ.

Богоро́диченъ: Новора́сленный безсме́ртія ра́й и красе́нъ вои́стинну показа́лася еси́, Дѣ́во: дре́во бо жи́зни въ Тебѣ́ насади́ся богонача́льно, е́же, во чре́вѣ Твое́мъ нося́щи, родила́ еси́, всѣ́мъ иска́пающее спасе́нія наде́жду, вѣ́рно, Богоро́дице, исповѣ́дающимъ Тя́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Угаси́въ пла́мень страсте́й росо́ю подвиго́въ твои́хъ, о́тче блаже́нне Діони́сіе, бога́тно вже́глъ еси́ огне́мъ любве́ вѣ́ры воздержа́нія свѣти́льникъ, просвѣще́ніе безстра́стія, и сы́нъ дне́ яви́лся еси́.

Вѣ́ры гро́здъ боже́ственнымъ дѣ́ланіемъ, о́тче, воспита́лъ еси́, и, въ точи́лѣхъ поста́вивъ, изгнѣ́лъ еси́ болѣ́зньми поще́нія, и ча́шу напо́лнилъ еси́ духо́вную воздержа́нія, весели́ши сердца́ ста́да твоего́.

До́блественнѣ претерпѣ́въ біе́нія неви́димыхъ враго́въ, показа́лся еси́ сто́лпъ непоколеби́мь, утвержда́я ста́до твое́ па́лицею боже́ственною, словесы́ медото́чными, блаже́нне Діони́сіе преподо́бне.

Богоро́диченъ: Еди́на ро́ждши дѣ́вою, еди́на муженеиску́сная яви́лася еси́, Всенепоро́чная, во утро́бѣ Сло́во Отчее пріе́мши безнача́льное, млеко́мъ дои́ши, Чи́стая, чу́до стра́шно! Дѣ́вствуеши и зако́ны обновля́еши естества́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Исцѣле́ній рѣ́ки источа́еши, стра́сти земноро́дныхъ боже́ственно очища́еши, ра́дующеся вѣ́рою, восхваля́емъ твоя́ по́двиги, чу́дне.

Зако́нно отъ всѣ́хъ Содѣ́теля десни́цею вѣнча́лся еси́, преподо́бне Діони́сіе, небе́сный граждани́не, а́нгеломъ равностоя́телю.

Нетлѣ́ннаго и боже́ственнаго пребыва́нія и непости́жныхъ наслажда́яся ны́нѣ благи́хъ, а́нгеломъ собесѣ́дниче, Діони́сіе богому́дре, восхваля́ющія тя́ спаса́й.

Богоро́диченъ: Бо́га ро́ждши, вся́кія тва́ри, Влады́чице, я́ко вои́стинну еди́на, Богоро́дице, превы́шши яви́лася еси́.

Конда́къ, гла́съ 8:

Все́ твое́ у́мное жела́ніе къ Бо́гу впери́въ, Тому́ невозвра́тно отъ души́ послѣ́довалъ еси́, въ пусты́ню всели́вся, и, та́мо а́нгельски пожи́въ, мно́гимъ пу́ть бы́лъ еси́ ко спасе́нію; сего́ ра́ди и Христо́съ тебе́ просла́ви и да́ромъ чуде́съ обогати́. Тѣ́мже вси́ вопіе́мъ ти́: ра́дуйся, Діони́сіе преподо́бне, пусты́нный жи́телю.

Икосъ:

Хра́мъ Бо́гу я́ко вои́стинну себе́ содѣ́лавъ, о́тче, и вы́шняго Іерусали́ма яви́вся граждани́нъ, боже́ственными добродѣ́тельми твои́ми безпло́тныхъ че́сти сподо́бился еси́. Тѣ́мже и мы́ зря́ще чудеса́, похвале́нію досто́йная, я́же удивля́ютъ на́съ и науча́ютъ тебѣ́ зва́ти такова́я: ра́дуйся, благочести́ваго отца́ о́трасль и ма́тере благоговѣ́йныя вѣ́твь; ра́дуйся, цѣлому́дрія сто́лпе, и́мже бѣсо́вская шата́нія искорени́шася; ра́дуйся, свѣти́льниче многосвѣ́тлый; ра́дуйся, я́ко увяди́лъ еси́ плотска́я мудрова́нія; ра́дуйся, пусты́ни до́брое прозябе́ніе; ра́дуйся, пра́ведныхъ боже́ственное наслажде́ніе; ра́дуйся, я́ко презрѣ́лъ еси́ теку́щая и тлѣ́нная; ра́дуйся, я́ко на небесѣ́хъ со а́нгелы живе́ши; ра́дуйся, я́ко мона́шествующихъ извѣ́стное пра́вило; ра́дуйся, лѣня́щихся къ Бо́гу дерзнове́ніе; ра́дуйся, исто́чниче чуде́съ богото́чный; ра́дуйся, честны́й Ду́ха сосу́де, наста́вниче на́шего спасе́нія. Ра́дуйся, Діони́сіе преподо́бне, пусты́нный жи́телю.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Вре́менная отложи́въ, вѣ́чными украси́лся еси́, со а́нгелы лику́еши, я́ко а́нгельское пожи́въ житіе́, съ ни́миже пое́ши: благослове́нъ Бо́гъ оте́цъ на́шихъ.

Непреста́нно мо́лимъ, Діони́сіе богому́дре, о ста́дѣ твое́мъ прилѣ́жно моли́ся, тебе́ на моли́тву призыва́ющихъ, и плоды́ принося́щихъ, и любо́вію пою́щихъ: благослове́нъ Бо́гъ оте́цъ на́шихъ.

Въ зла́цѣ вы́шняго Ца́рствія ста́до твое́, о́тче, воспита́лъ еси́ и жезло́мъ уче́ній упа́слъ еси́ вѣ́рно пою́щія: благослове́нъ Бо́гъ оте́цъ на́шихъ.

Богоро́диченъ: Изба́ви на́съ, Христе́, отъ страсте́й, и бѣ́дъ, и обстоя́ній, и неду́говъ многообра́зныхъ моли́твами Пречи́стыя Твоея́ Ма́тере и преподо́бнаго Діони́сія, взыва́ющихъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Сто́лпъ тя́ одушевле́нъ я́ко вои́стинну и о́бразъ воздержа́нія, о́тче, стяжа́вше, вси́ твою́, Діони́сіе, па́мять почита́емъ.

Собо́ръ ра́дуется мона́шескій, и лику́етъ преподо́бныхъ со́нмъ, съ ни́миже пра́ведныхъ вѣне́цъ досто́йно воспрія́лъ еси́.

Укра́шенъ добродѣ́тельми, въ невѣ́стницѣ неизрече́нныя сла́вы возле́глъ еси́, пѣ́снь воспѣва́я Христу́ во вѣ́ки вся́.

Богоро́диченъ: Поглоще́на болѣ́зньми и па́дша возста́ви, Богома́ти, я́ко да Тя́ сла́влю во вся́ вѣ́ки.

Пѣ́снь 9.

Ирмо́съ: Чи́стую сла́вно почти́мъ, лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ.

Неду́гующихъ въ паде́ніи вра́чь отъ Бо́га показа́лся еси́, и очи́стникъ, блаже́нне, и прогони́тель лука́выхъ духо́въ, богоно́се Діони́сіе, тѣ́мъ тя́ вси́ велича́емъ.

Яко тлѣ́нно жили́ще, зе́млю оста́вивъ, о́тче, всели́лся еси́ въ зе́млю кро́ткихъ и съ ни́ми ра́дуешися, Боже́ственнаго наслажда́яся, о́тче, сія́нія.

Неукло́ненъ къ вѣ́рѣ предѣ́лъ и о́бразъ воздержа́нія иму́ще по́двиги твоя́ къ Зижди́телю вои́стинну, пѣ́сньми тя́ велича́емъ.

Богоро́диченъ: Въ Тя́ всели́вся, Всенепоро́чная, пе́рвѣе родонача́льныя злообра́зно запе́ншаго человѣкоубíйцу низложи́ Роди́выйся и всѣ́хъ на́съ спасе́.

Свѣти́ленъ:

Пристра́стія мірска́го, я́ко отъ скве́рны, уклони́лся еси́, разу́мнаго Со́лнца свѣтоза́рная луча́ возсія́, свѣти́льникъ многосвѣ́тлый, пусты́нное воспита́ніе и чистоты́ оби́телище, Христо́вы добро́ты я́сно зря́, Его́же сія́ніемъ у́мъ тво́й озари́лъ еси́ и сла́вою обогати́лся еси́ небе́сною, Діони́сіе сла́вне. Мо́лимъ тя́, въ ми́рѣ сохране́нымъ бы́ти па́мять твою́ почита́ющимъ. [Два́жды.]

Сла́ва, и ны́нѣ, богоро́диченъ:

Яко иму́щи милосе́рдіе и ми́лость ве́лію, при́зри, Препѣ́тая Богоро́дице Дѣ́во, на мое́ смире́ніе, и страсте́й молву́, и собла́знъ житія́ разори́, Отрокови́це, и огня́ гее́нскаго изба́ви мя́ моли́твами Твои́ми.

На хвали́техъ стихи́ры на 4, гла́съ 2. Подо́бенъ: Егда́ отъ дре́ва.

Діони́сіе, мона́ховъ удобре́ніе,* прозябе́ніе кра́сное пусты́ни,* преподо́бныхъ похвало́,* вѣ́рныхъ утвержде́ніе,* любо́вію творя́щихъ твою́ всечестну́ю па́мять* и къ ра́цѣ моще́й твои́хъ приступа́ющихъ,* изба́ви обстоя́нія вся́каго* и о́гненнаго осужде́нія. [Два́жды.]

Тро́ицѣ хра́мъ са́мъ себе́ содѣ́лалъ еси́,* о́тче богоблаже́нне,* въ пусты́ни непрохо́дныя заше́дъ,* я́ко Моисе́й, въ Сина́йскую го́ру всели́лся еси́,* идѣ́же пріи́мъ Боже́ственный зако́нъ,* мона́ховъ мно́жество вои́стинну* научи́лъ еси́ изря́дному житію́.* Прикаса́ющимся къ ра́цѣ моще́й твои́хъ* подае́ши всѣ́мъ исцѣле́ніе.

Имѣ́я дерзнове́ніе ко Христу́ Бо́гу,* моли́ся о ста́дѣ твое́мъ, преподо́бне,* сохрани́тися отъ искуше́ній вра́жіихъ и язы́ческихъ нахожде́ній,* огня́ и меча́, и вся́каго прило́га,* и навѣ́та лука́ваго:* тебе́ бо гра́дъ и покро́въ иму́ще,* на тя́ наде́жду съ Бо́гомъ стяжа́хомъ, блаже́нне.

Сла́ва, гла́съ 8. Самогла́сенъ:

На не́бо теку́щую возше́дъ колесни́цу, чу́дне, добродѣ́телей дости́глъ еси́ кра́йнее житія́ воздержа́ніемъ, изъ пусты́ни смотря́я вы́шняго Іерусали́ма красоты́ и болѣ́зненныхъ подвиго́въ досто́йно по́чести воспріи́мъ, съ небе́сными ра́дуешися чинонача́ліи, преблаже́нне, вѣ́чныхъ бла́гъ наслѣ́дникъ яви́лся еси́, небе́снаго Ца́рствія жи́тель бы́въ. Моли́ся, богоно́се Діони́сіе, Спа́су всѣ́хъ, умири́ти мíръ и спасти́ ду́ши на́ша.

И ны́нѣ, [богоро́диченъ, гла́съ то́йже]:

Влады́чице, пріими́ моли́твы [ра́бъ Твои́хъ и изба́ви на́съ отъ вся́кія ну́жды и печа́ли].

Аще ли Пятьдеся́тница: И ны́нѣ, пра́здника.
Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на [преподо́бнаго], пѣ́снь 3 и 6. Проки́менъ, [гла́съ 7]: Честна́ предъ Го́сподемъ* [сме́рть преподо́бныхъ его́]. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. [Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 5 об. – 12.

/ Къ оглавленію раздѣла /


Наверхъ / Къ титульной страницѣ

0