Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 16 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 1-й де́нь.
Свята́го му́ченика Іусти́на Филосо́фа, и друга́го му́ченика Іусти́на, и и́же съ ни́ми.

Аллилу́ія или́ тропа́рь.

[ВЕЧЕРЪ,]
На Го́споди воззва́хъ... Аще по́стъ: пое́мъ стихи́ры Богоро́дицы 3, гла́съ 2, подо́бенъ: Егда́ отъ дре́ва.., и свята́го 3, гла́съ и подо́бенъ то́йже.

Егда́ манове́ніемъ боже́ственнымъ* къ вышеесте́ственнымъ подвиго́мъ отлучи́стеся,* тѣлесе́ тлѣ́ющаго отве́ргшеся,* тогда́, си́лою укрѣпля́еми Всеси́льнаго,* огня́ не ужасо́стеся, ни меча́ посѣка́ющаго.* Тѣ́мже, Бо́гу вы́и прекло́ньше, блаже́нніи,* кончи́ну съ ра́достію прія́сте.

Пео́нъ, до́блій страда́лецъ,* Валеріа́нъ, и Харито́нъ, и Хари́та съ ни́мъ,* и боже́ственный Іусти́нъ, Еве́лпистъ и Іера́ксъ сла́вный,* оде́жду отъ крове́й боже́ственныхъ обагри́вшіи,* и, одѣ́явшеся вку́пѣ,* Влады́цѣ всѣ́хъ на небесѣ́хъ со а́нгелы,* Царю́ Христу́, предстоя́тъ.

Ины стихи́ры Богоро́дицы, гла́съ и подо́бенъ то́йже:

Ра́дуйся, солнцезра́чная звѣздо́,* ра́дуйся, вино́вная всѣ́хъ до́брыхъ, Пренепоро́чная;* ра́дуйся, вмѣсти́вшая Бо́га Невмѣсти́маго,* я́же кла́съ прозя́бшая безсме́ртія;* ра́дуйся, боже́ственное носи́ло и две́ре всесвѣ́тлая;* ра́дуйся, кля́твы убіе́ніе прароди́тельныя на́шея, Отрокови́це,* благи́хъ Хода́таица су́щи.

Всѣ́хъ скорбя́щихъ ра́досте,* и оби́димыхъ предста́тельнице,* и убо́гихъ пита́тельнице,* стра́нныхъ же утѣше́ніе и же́зле слѣпы́хъ,* немощны́хъ посѣще́ніе,* тружда́ющихся покро́ве и засту́пнице* и си́рыхъ помо́щнице,* Ма́ти Бо́га Вы́шняго* Ты́ еси́, Пречи́стая,* потщи́ся, мо́лимся, спасти́ся рабо́мъ Твои́мъ.

Покро́въ и заступле́ніе на́мъ, христіа́номъ, Ты́ еси́* и прибѣ́жище держа́вно,* Ма́ти Бо́га Вы́шняго.* Но и ны́нѣ, я́ко при́сно, бо́дренною Твое́ю моли́твою* не преста́й моля́ спасти́ рабы́ Твоя́ отъ обстоя́ній всѣ́хъ,* я́ко Тя́ съ Бо́гомъ и́мамы* заступле́ніе, вси́ христіа́не, и прибѣ́жище.

Сла́ва, и ны́нѣ, богоро́диченъ:

Ино́го держа́внаго прибѣ́жища,* и крѣ́пости столпа́, и стѣны́ необори́мыя* вои́стинну не стяжа́хомъ,* ра́звѣ Тебе́, Пречи́стая,* къ Тебѣ́ прибѣга́емъ и Тебѣ́ вопіе́мъ:* Влады́чице, помози́, да не поги́бнемъ,* покажи́ Твою́ благода́ть на ны́, и крѣ́пости сла́ву,* и милосе́рдія Твоего́ вели́чество.

Крестобогоро́диченъ:

Дре́ву кре́стному Тя́, Іису́се,* пригвожде́на зря́щи Неискусобра́чная,* пла́чущи, глаго́лаше:* Ча́до сла́дкое,* почто́ оста́вилъ еси́ Мене́, ро́ждшую Тя́, еди́ну,* Свѣ́те непристу́пный Пребезнача́льнаго Отца́?* Потщи́ся и просла́вися,* я́ко да сла́ву получа́тъ боже́ственную* и́же боже́ственныя стра́сти Твоя́ сла́вящія.

На стихо́внѣ окто́иха.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости; тѣ́хъ моли́твами спаси́ ду́ши на́ша.


[НА УТРЕНИ,]
Кано́нъ, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Му́ченическими укра́шени свѣтлостьми́, чи́стому предстоите́, му́ченицы, престо́лу Влады́ки всѣ́хъ, на́шихъ согрѣше́ній разрѣше́ніе подаю́ще.

Благочести́віи и́стины побо́рницы, предъ мучи́тельскимъ суди́щемъ подви́гшеся единому́дренно, низложи́ша пре́лесть діа́волю си́лою духо́вною.

Ра́нами, и я́звами, и скорбьми́ благозва́нніи искупи́ша великому́ченицы Христо́во Ца́рство, въ не́мже вѣнцено́сцы ны́нѣ живу́тъ.

Богоро́диченъ: Ущедря́я Твои́хъ ру́къ созда́ніе, въ ми́лости Бога́тый, во утро́бу всели́лся еси́ Неискусому́жныя Дѣ́вы и Сію́ Предста́тельницу на́мъ показа́лъ еси́.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Утвержде́ніе Христа́ въ се́рдцы твое́мъ нося́, му́жески сопроти́вился еси́, Іусти́не, истяза́ющему, беззако́нновати пребеззако́нно тебѣ́ веля́щему.

Ли́къ богосія́ненъ, во́инство богоизбра́нное святы́хъ му́ченикъ, святы́й собо́ръ собра́вся ны́нѣ, побѣди́ враги́ безпло́тныя съ тѣ́ломъ.

Тѣ́ло ра́намъ веледу́шніи преда́вше, ра́довахуся, прозря́ще вѣ́чное наслажде́ніе, и бу́дущую сла́ву, и свѣ́тлость.

Богоро́диченъ: Облаки души́ моея́ разори́, Со́лнца сла́вы ле́гкій о́блаче, и у́мъ мо́й свѣ́томъ наста́ви, почерне́ніемъ зло́бы омраче́нный.

Сѣда́ленъ, гла́съ 5. Подо́бенъ: Собезнача́льное Сло́во.

Іусти́нъ и Харито́нъ, Пео́нъ, Еве́лпистъ, Хари́та, и Іера́ксъ, и Валеріа́нъ, свѣти́льницы свѣ́тліи, озаря́ющіи концы́ земны́я луча́ми подвиго́въ свои́хъ, велегла́сно да восхва́лятся вѣ́рою, Христу́ молящеся спасти́ся на́мъ.

Сла́ва, и ны́нѣ, богоро́диченъ:

Те́плая Предста́тельнице и непобѣди́мая, упова́ніе извѣ́стное и непосты́дное, стѣно́, и покро́ве, и приста́нище прибѣга́ющимъ къ Тебѣ́, Приснодѣ́во Чи́стая, Сы́на Твоего́ и Бо́га моли́ со а́нгелы умире́ніе да́ти мíрови, и спасе́ніе, и ве́лію ми́лость.

Крестобогоро́диченъ:

На Крестѣ́ зря́щи Тя́, Христе́, Ма́ти Твоя́, во́лею посредѣ́ разбо́йнику ви́сяща, растерза́ющися утро́бою ма́терски, глаго́лаше: безгрѣ́шный Сы́не, ка́ко непра́ведно на Крестѣ́, я́коже злодѣ́й, пригвожде́нъ еси́, человѣ́ческій ро́дъ хотя́ оживи́ти, я́ко Благоутро́бенъ?

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Іусти́на, и Харито́на, и Хари́ты, и Пео́на страда́ніемъ а́нгельстіи чи́нове удиви́шася.

Сокруша́ема тѣлеса́ ра́нами боже́ственное исхода́тайствоваша до́блимъ блаже́нство.

Якоже мы́сленное у́гліе, боже́ственнымъ огне́мъ попали́сте ле́сть и свѣти́ла мíра, му́ченицы, яви́стеся.

Еве́лписта, Іера́кса, непрекло́нныхъ му́ченикъ му́жеству тмы́ кня́зи убоя́шася.

Богоро́диченъ: Иже о́гнь Божества́ во утро́бѣ, Дѣ́во, пріе́мшая, огня́ мя́ изба́ви и му́ки.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Ду́ха Боже́ственнаго испо́лнився, лука́вствія лю́тыя ду́хи тече́ніи крове́й твои́хъ, му́чениче Іусти́не, удави́лъ еси́, блаже́нне, пострада́въ крѣ́пко.

Благода́ти тезоимени́тая, благода́ти Бо́жія испо́лнена бы́сть, и, же́нскую забы́вши я́вѣ не́мощь, пострада́ зако́нно, и сла́ву получи́.

Облагода́тивъ ду́шу исповѣ́даніи свяще́нными, притупи́лъ еси́ ве́тхаго врага́ зло́бу, Харито́не страда́льне, боже́ственныхъ страстоте́рпецъ честно́е удобре́ніе.

Богоро́диченъ: Яже Спа́са Христа́, уподо́бльшася земны́мъ, ро́ждшая, премно́жествомъ бога́тства милосе́рдія, Того́, я́ко Бо́га, Чи́стая, моли́ спасти́ рабы́ Твоя́.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Іусти́на и Харито́на, Пео́на и Валеріа́на, Хари́ты же, и Іера́кса, и Еве́лписта вси́ пресвѣ́тлую па́мять просла́вимъ.

Безво́лненно муче́нія пучи́ну боже́ственнымъ правле́ніемъ проидо́сте, му́ченицы, и ко приста́нищу благоути́шному Христо́ва Ца́рства доидо́сте.

Якоже неле́стныя звѣ́зды, сія́юще Це́ркви честны́мъ утвержде́ніемъ, вселе́нную всю́ свѣтосія́ніемъ страда́нія просвѣща́ете.

Богоро́диченъ: Безмѣ́рнаго окамене́нія изба́ви мя́, одержи́маго мно́гими согрѣше́ніи, Богороди́тельнице Влады́чице, и гее́нскому огню́ подлежа́щаго.

Конда́къ, гла́съ 2:

Прему́дростію боже́ственныхъ твои́хъ слове́съ, Іусти́не, Це́рковь Бо́жія вся́ украси́вшися, житія́ твоего́ свѣ́тлостію мíръ освѣща́етъ, излія́нія же ра́ди кро́ве вѣне́цъ пріе́мъ и со а́нгелы предстоя́ Христу́, моли́ непреста́нно о всѣ́хъ на́съ.

Пѣ́снь 7.

Ирмо́съ: Тѣ́лу злато́му прему́дрыя дѣ́ти не послужи́ша, и въ пла́мень са́ми поидо́ша, и бо́ги и́хъ обруга́ша, среди́ пла́мене возопи́ша и ороси́ я́ а́нгелъ: услы́шася уже́ у́стъ ва́шихъ моли́тва.

Пре́лести глубину́ крове́й рѣко́ю изсуши́сте, то́ки чуде́съ источи́сте, угаша́юще у́гліе, му́ченицы, лю́тыхъ страсте́й вопію́щимъ всегда́: благослове́нъ Бо́гъ оте́цъ на́шихъ.

Божества́ огне́мъ любве́, му́дріи, ве́щь зло́бы доблему́дренно попали́сте и, я́ко огнесія́нни, возсія́вше, всѣ́хъ вопію́щихъ сердца́ благоче́стно просвѣти́сте: благослове́нъ Бо́гъ оте́цъ на́шихъ.

Му́дростію Бо́жіею Іусти́нъ му́дрый укра́шенъ, е́ллинское обуи́ мудрова́ніе благода́тію, увѣ́ривъ покланя́тися Тро́ицѣ и правосла́вно зва́ти: благослове́нъ Бо́гъ оте́цъ на́шихъ.

Богоро́диченъ: Дѣ́во Честна́я, Неискусобра́чная, Чи́стая, Благослове́нная, низпа́дающихъ исправле́ніе, согрѣша́ющихъ проще́ніе, спаси́ мя, блу́днаго, спаси́ Сы́ну Твоему́ зову́ща: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Якоже въ пещи́ о́гненнѣй, въ му́кахъ терпѣли́вно искуси́вшеся, страстоте́рпцы Госпо́дни, па́че зла́та вои́стинну боже́ственно, вопію́ще, облиста́сте: Христа́ превозно́симъ во вся́ вѣ́ки.

Со Іусти́номъ му́дрымъ да воспое́тся Хари́та, и Харито́нъ, и Пео́нъ, и Іера́ксъ вели́кій съ Валеріа́номъ, страда́ніемъ ле́сть отгна́вшіи и а́нгельскимъ лико́мъ совоку́пльшіися.

Къ вѣ́чнѣй жи́зни ведо́ми, му́дріи, доблему́дренно вы́и мечу́ единомы́сліемъ души́ вси́ преклони́сте, му́ченицы, я́ко же́ртвы, Бо́гу приве́дшеся.

Богоро́диченъ: Живота́ су́щи исто́чникъ, я́ко во́ду жи́зни поро́ждши, ду́шу мою́, иста́явшую грѣхо́внымъ пла́менемъ, Дѣ́во Богоро́дице, напо́й, да Тя́ сла́влю во вся́ вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Боже́ственною сія́юще сла́вою, сту́день пре́лести разруши́сте, до́бліи страда́льцы, и о́бщницы бы́сте свяще́нныхъ страсте́й пло́ть пріи́мшаго на́съ ра́ди, съ Ни́мъ вѣ́чно на небесѣ́хъ ра́дуетеся.

Іусти́новѣ му́дрости, и Хари́ты му́жеству, и Харито́новѣ де́рзости вои́стинну, Пео́ны же и Іера́кса до́блимъ подвиго́мъ и Валеріа́на къ лю́тымъ мно́гому терпѣ́нію и а́нгели чуди́шася.

Якоже на колесни́цу боже́ственную всѣ́дше сла́вно, кро́вію ва́шею къ небеси́ ра́достно востеко́сте и руко́ю живоно́сною побѣ́дныя прія́сте, му́дріи, вѣнцы́, непреста́нно о на́съ моля́щеся.

Богоро́диченъ: Неискусому́жно Сло́во па́че сло́ва ро́ждшая, Дѣ́во Неискусобра́чная, Чи́стая, напа́стей изми́ на́съ, и вся́кихъ бѣ́дъ, и вре́да душетлѣ́нна, и страсте́й, и вѣ́чнующаго пла́мене, и осужде́нія.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 2 – 5 об.

/ Къ оглавленію раздѣла /


Наверхъ / Къ титульной страницѣ

0