Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 31-й де́нь.
Предпра́зднство происхожде́нія Честна́го и Животворя́щаго Креста́ Госпо́дня и свята́го пра́веднаго Евдоки́ма.

[ВЕЧЕРЪ,
На Го́споди воззва́хъ:] стихи́ры Креста́, гла́съ 1. Подо́бенъ: Небе́сныхъ чино́въ:

Пріиди́те, ви́димъ, вѣ́рніи, стра́нное чу́до,* ка́ко кре́стное дре́во* уставля́етъ опале́ніе вся́каго неду́га* и страсте́й зно́й угаша́етъ* предпра́зднующихъ вѣ́рою* и того́ почита́ющихъ торжество́.

Живу́щіи вку́пѣ* и уме́ршіи, предпра́зднуйте:* жи́зни бо дре́во, е́же а́да умори́вшее,* храни́тель человѣ́ковъ,* ме́ртвыхъ воскресе́ніе гряде́тъ,* всѣ́мъ незави́стную благода́ть ны́нѣ пода́ти,* человѣ́комъ исцѣле́нія.

Ины стихи́ры свята́го, гла́съ 8. Подо́бенъ: О, пресла́внаго чудесе́!

Блаже́нне богому́дре Евдоки́ме,* чи́стая твоя́ душа́,* правовѣ́рнымъ смы́сломъ сія́ющи,* облиста́я добродѣ́телей свѣ́тлостію* и озаря́етъ вѣ́рныхъ исполне́ніе,* бѣсо́въ тму́ отгоня́ющи.* Тѣ́мже я́ко прича́стника невече́рнія благода́ти* тя́ благоче́стно вси́* почита́емъ, досточу́дне.

Имѣ́я ду́шу ми́лостиву,* и чи́стъ по́мыслъ, и се́рдце бо́дрое,* вѣ́ру небла́зненную* и любо́вь вои́стинну нелицемѣ́рную,* отъ земли́ преста́вился еси́ къ небе́снымъ* и съ ли́ки пра́ведныхъ водворя́ешися.* Тѣ́мже чти́мъ тя́ свяще́нными пѣ́сньми* и благочести́вно вси́ ублажа́емъ,* блаже́нне Евдоки́ме.

Боже́ственными уче́ніи укрѣпля́яся,* стра́сти плотскíя отъ души́ отгна́лъ еси́* и Святы́я Тро́ицы селе́ніе чи́сто бы́лъ еси́.* Тѣ́мже къ Боже́ственному наслажде́нію отше́лъ еси́,* Бо́гу, соблюда́ющу ны́нѣ неруши́мо* твое́, блаже́нне, тѣ́ло,* Боже́ственными судьба́ми,* и́миже Са́мъ вѣ́сть,* прославля́яй тя́ я́вѣ, Евдоки́ме.

Сла́ва, гла́съ 1:

Ка́ко не диви́мся благоу́мію твоему́ или́ не похва́лимъ, преподо́бне Евдоки́ме, житіе́ твое́ равноа́нгельное, по́мысла цѣлому́дрію, кро́тости твое́й, и смире́нію, и безмо́лвію, и ми́лостыни непреста́ннѣй? Всѣ́ми бо добродѣ́тельми украси́лся еси́, блаже́нне, тѣ́мже жде́тъ тебе́ неизглаго́ланная ра́дость и небе́сное Ца́рствіе.

И ны́нѣ, гла́съ то́йже:

Дне́сь я́ко вои́стинну святовѣща́нный глаго́лъ Дави́довъ коне́цъ прія́тъ, се́ бо я́вѣ пречи́стыхъ но́гъ Твои́хъ покланя́емся подно́жію и, на сѣ́нь крилу́ Твое́ю надѣ́ющеся, Всеще́дрый, вопіе́мъ Ти́: да зна́менается на на́съ свѣ́тъ лица́ Твоего́, правосла́вныхъ люде́й Твои́хъ ро́гъ вознеси́ Честна́го Креста́ Твоего́ воздви́женіемъ, Христе́ Многоми́лостиве.

На стихо́внѣ окто́иха.
Сла́ва, и ны́нѣ, гла́съ 2, самогла́сенъ:

Ты́ ми покро́въ держа́венъ еси́, трича́стный Кре́сте Христо́въ, освяти́ мя си́лою твое́ю, я́ко да вѣ́рою и любо́вію покланя́юся и сла́влю тя́.

Тропа́рь свята́го, гла́съ 4:

Отъ земли́ воззва́вый тя́ къ небе́снымъ селе́ніемъ соблюда́етъ и по сме́рти невреди́мо тѣ́ло твое́, свя́те Евдоки́ме: ты́ бо въ цѣлому́дріи и чи́стомъ жи́тельствѣ, блаже́нне, жи́тельствовалъ еси́, не оскверни́въ пло́ти. Тѣ́мже со дерзнове́ніемъ моли́ Христа́ Бо́га спасти́ся на́мъ.

Сла́ва, и ны́нѣ, тропа́рь Креста́, гла́съ 1:

Спаси́, Го́споди, лю́ди Твоя́ и благослови́ достоя́ніе Твое́, побѣ́ды Благовѣ́рному Импера́тору на́шему [и́мярекъ], на сопроти́вныя да́руя и Твое́ сохраня́я Кресто́мъ Твои́мъ жи́тельство.


НА УТРЕНИ,
На Бо́гъ Госпо́дь: Тропа́рь Креста́, два́жды. Сла́ва, свя́таго. И ны́нѣ, Креста́.

Кано́нъ окто́иха еди́нъ, и Креста́ на 4, и свята́го на 4.

Кано́нъ Креста́, гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Кре́стъ предгряды́й боже́ственный испуща́етъ зарю́ благода́ти и просвѣща́етъ вся́, покланя́ющіяся ему́ и воспѣва́ющія благоче́стно распе́ншагося Христа́.

Креста́ покланя́ніе возвыша́етъ любо́вію и вѣ́рою сла́вящія я́ко Бо́га и Го́спода, пострада́вшаго пло́тію и назда́вшаго на́съ Боже́ственными страда́ніи.

Креста́ покланя́ніе источа́етъ благово́ніе дарова́ній, и вся́, я́же Христа́ сла́вящія, объюха́етъ при́сно, и смра́дъ ду́шъ отъе́млетъ ве́сь.

Богоро́диченъ: Позна́вше Го́спода, вопло́щшагося изъ Тебе́, Богоневѣ́сто, и Кре́стъ и сме́рть пріе́мша, пое́мъ Его́, Изба́вителя, Тя́ ублажа́юще.

Кано́нъ свята́го, гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Высоко́ житіе́ имѣ́я и восхожде́ніи боже́ственными ве́сь свѣ́телъ бы́въ, просвѣще́ніе ми́ испроси́, восхваля́ющему честны́я твоя́ по́двиги, и́миже до́брѣ пожи́въ, получи́лъ еси́, Евдоки́ме, и́хже надѣ́ялся еси́.

Мѵрово́нная любя́ уче́нія и во чте́ніи Свяще́нныхъ Писа́ній упражня́яся, сласте́й уклони́лся еси́, всеблаже́нне, смра́дныхъ и безче́стныхъ и облагово́нился еси́, боже́ственными дарова́ніи украша́емь.

Дрема́ніе о́чію отъ души́, блаже́нне, отгна́лъ еси́, бдя́ и Бо́гу пріединя́яся, всено́щными стоя́ніи, непрекло́ненъ ну́ждами естества́, тѣ́мже ко дню́ невече́рнему дости́глъ еси́.

Богоро́диченъ: Яко черто́гъ одушевле́нъ Бо́жій и кади́льницу мы́сленнаго и свѣтоно́снаго у́гля, при́сно благода́тную ублажа́емъ Богоро́дицу, зову́ще: ра́дуйся, Хода́таице спаси́тельнаго воскресе́нія.

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Иже во о́бразѣхъ проначерта́емый, соверша́я пресла́вная чудеса́, ны́нѣ покланя́емый Кре́стъ дѣ́йствуетъ чу́днѣйшая, освяща́я и просвѣща́я Зижди́теля сла́вящія.

Иже во бране́хъ боже́ственная побѣ́да, Кре́стъ Христо́въ покланя́емь, ополче́нія враго́въ побѣжда́яй, подава́етъ царе́мъ правосла́внымъ крѣ́пкія побѣ́ды.

Же́злъ Госпо́день предположе́нный, Кре́стъ во хра́мѣхъ и жили́щахъ основа́нія незы́блема си́хъ соблюда́етъ и вся́къ прило́гъ и кова́рство сопроти́вныхъ побѣжда́етъ.

Иже Госпо́день покланя́емый Кре́стъ благоче́стно Боже́ственныя благода́ти и каже́нія мы́сленна исполня́етъ покланя́ющіяся ему́ и о́блаки напа́стей отъе́млетъ и скорбе́й.

Богоро́диченъ: Отъ глубины́ ле́стныя извлече́ человѣ́чество изъ Тебе́ Рожде́йся дре́вомъ кре́стнымъ, Богоро́дице, и возвы́си къ разумѣ́нію Своему́ благоче́стно Тя́ сла́вящія.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Глаго́ломъ живото́чнымъ внима́я, испи́лъ еси́ во́ду спасе́нія, возгнуша́вся го́рькаго грѣха́, и, поя́, глаго́лалъ еси́ Бо́гу, Евдоки́ме: я́ко нѣ́сть свя́тъ, па́че Тебе́, Го́споди.

Ми́лованіе стяжа́лъ еси́ христоподража́тельное, разда́лъ еси́ бога́тство тре́бующимъ, небе́сное же бога́тство, хода́тайствующее тебѣ́, получи́лъ еси́, вопія́, Евдоки́ме: я́ко нѣ́сть свя́тъ, па́че Тебе́, Го́споди.

Присво́ився Зижди́телю любо́вію боже́ственною, прія́лъ еси́ небе́сное наслѣ́діе, и дре́ва живо́тнаго прича́стникъ еси́, обще́ніемъ обожа́емь, и, поя́, сла́вне, глаго́лалъ еси́: я́ко нѣ́сть свя́тъ, па́че Тебе́, Го́споди.

Богоро́диченъ: Су́щи а́нгелъ честнѣ́йши, Зижди́теля а́нгеловъ во утро́бѣ носи́ла еси́ и родила́ еси́ неизрече́нно. Ему́же вси́ пое́мъ: Ты́ еси́ Бо́гъ на́шъ, и нѣ́сть свя́тъ, па́че Тебе́, Го́споди.

Сѣда́ленъ свята́го, гла́съ 4:

Благоволи́въ благи́ми дѣя́ніи, искуси́лся еси́, я́ко зла́то въ пещи́, напа́стьми, Евдоки́ме сла́вне, тѣ́мже и по сме́рти источа́еши бога́тно чудеса́, я́ко во́ды, и неду́ги уставля́еши, о на́съ при́сно моля́ся, я́ко да согрѣше́ній проще́ніе пріи́мемъ.

Сла́ва, и ны́нѣ, Креста́, гла́съ 4. Подо́бенъ: Вознесы́йся.

Свѣ́тло не́бо показу́ется па́че со́лнца свѣ́томъ кре́стнымъ, просвѣща́етъ вся́ческая заре́ю свое́ю. Тѣ́мже Ты́, Человѣколю́бче, Спа́се вся́ческихъ, просвѣти́ у́мъ на́шъ его́ ра́ди и чу́вства: мы́ бо и́мамы того́ ору́жіе мíру, непобѣди́мую побѣ́ду.

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ, позна́ешися, внегда́ пріити́ вре́мени, пока́жешися. Сла́ва си́лѣ Твое́й, Го́споди.

Вообража́емь, боже́ственный и честны́й Кре́стъ тмы́ нача́льника отгоня́етъ тве́рдо отъ возду́ха, и благода́ти лучи́ вообража́ющимъ простира́етъ, и озаря́етъ си́хъ, пою́щія Христа́ Бо́га.

Вообража́емь, боже́ственный и пречестны́й Кре́стъ въ сердца́хъ мо́ре утиша́етъ страсте́й, и уставля́етъ бѣ́дъ треволне́нія, и въ тишину́ прево́дитъ пра́вости вся́, любо́вію вообража́ющія того́.

Якоже у́гліе, испуща́я, честны́й Кре́стъ дѣ́йствія вся́ попаля́етъ вра́жія, и отго́нитъ си́лу, и облегча́етъ мно́гія въ вѣ́рѣ, хва́лящія и пою́щія любо́вію на не́мъ пригво́ждшагося Христа́.

Всечестны́й и боже́ственный Кре́стъ, вѣ́рою покланя́емь, источа́етъ струи́ мы́сленныя дарова́ній и во́ды исцѣле́ній и напая́етъ непреста́нно сему́ покланя́ющіяся и чту́щія.

Богоро́диченъ: Яко всѣ́хъ Цари́цу и Влады́чицу на́шу Тя́ любо́вію сла́вимъ, Пресвята́я Чи́стая, просвѣ́щшіися страстьми́ Сы́на Твоего́ и позна́вшіи Сего́ всѣ́мъ Благодѣ́теля: сла́ва благода́ти Его́.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Уче́нія оте́ческая храня́ невреди́мо, правосла́внымъ мудрова́ніемъ, ты́ отъ младе́нства имѣ́лъ еси́ житіе́ нескве́рное и ми́лостивенъ нра́въ, досточу́дне.

Ни молва́ мірска́я, ни вла́сти держа́ніе, ни сла́ва вре́менная твоего́ къ Бо́гу жела́нія преврати́, Евдоки́ме, но благоволи́лъ еси́ вои́стинну боже́ственнымъ дѣя́ніемъ.

Возвыша́емь боже́ственными поуче́ніи всегда́, врага́ смири́лъ еси́, исцѣле́ній дѣ́йство прія́лъ еси́, Евдоки́ме, судо́мъ пра́веднымъ вся́ Управля́ющаго.

Иска́пающи сла́дость ра́ка моще́й твои́хъ бога́тыхъ исцѣле́ній, стра́сти отгоня́етъ, Евдоки́ме, вѣ́рою чту́щихъ тя́ и попаля́етъ бѣсо́въ вся́ полки́.

Богоро́диченъ: Всепѣ́тая, во́инствы го́рними пѣва́емаго Бо́га родила́ еси́, Человѣ́ка вои́стинну бы́вша, Его́же о рабѣ́хъ Твои́хъ моля́щи не преста́й, Приснодѣ́во.

Пѣ́снь 5.

Ирмо́съ: Свѣ́тлый на́мъ возсія́й Свѣ́тъ Присносу́щный, у́тренюющимъ о судьба́хъ за́повѣдей Твои́хъ, Влады́ко Человѣколю́бче, Христе́, Бо́же на́шъ.

Держа́вному на́шему и недви́жимому ору́жію предлежа́щу, ны́нѣ покланя́ющеся пресвято́му Кресту́ вѣ́рою, си́лу непобѣди́му на враги́ пріе́млемъ.

Вообража́емаго и несѣко́маго ка́мене сотво́рша во́ду источи́ти ны́нѣ держа́ще и покланя́ющеся честно́му Кресту́, исто́чникъ дарова́ній пріе́млемъ.

Златосія́ненъ на́мъ Кре́стъ Христо́въ явля́яся, дарова́нія душа́мъ подава́етъ благода́тію, покланя́ющимся ему́ и Го́спода и Бо́га пою́щимъ при́сно.

Богоро́диченъ: Же́злъ си́лы, Богоневѣ́сто, вѣ́рою держа́ще, Сы́на Твоего́ и Бо́га на́шего Кре́стъ, пое́мъ Тя́, Цари́цу всѣ́хъ, ублажа́юще.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Заре́ю чи́сто Святы́я Тро́ицы просвѣще́нъ, зако́номъ же Сея́ огражде́нъ, но́щь житія́ непреткнове́нно премину́лъ еси́, видѣ́ніи боже́ственными окриля́емь, блаже́нне, и въ боже́ственную жи́знь всели́лся еси́.

Ны́нѣ на тебѣ́ чу́до ве́ліе зри́тся и у́жаса испо́лнено: ка́ко по погребе́ніи вои́стинну мно́го лѣ́тъ соблюде́ся неруши́мо, блаже́нне, твое́ тѣ́ло, во гро́бѣ лежа́щее, судьба́ми, и́миже вѣ́сть Са́мъ, прославля́яй тя́.

Бла́гоже твоему́ къ Бо́гу дерзнове́нію, бла́гоже жела́нію, е́же въ се́рдцы къ Нему́ имѣ́лъ еси́: бла́го пожи́въ тезоиме́нно, просія́лъ еси́ пресла́вно боже́ственными свѣтлостьми́ и уясни́лъ еси́ вѣ́рныхъ совокупле́нія.

Богоро́диченъ: О на́съ изъ Тебе́ Воплоще́ннаго, Дѣ́во Ма́ти, всегда́ моли́, благоче́стно Тя́ блажа́щихъ, изба́витися бѣ́дъ, и душетлѣ́нныхъ страсте́й и печа́лей, и вѣ́чнующаго пла́мене муче́нія.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́, и спаси́ мя, Спа́се мíра, зову́ща: сла́ва Тебѣ́.

Пречестны́й Кре́стъ, покланя́емый ны́нѣ, воскресе́нія ра́дость провозвѣща́етъ Христо́ва, и сме́рть злонача́льника благовѣству́ется.

Водрузи́лъ еси́ на земли́ честны́й Кре́стъ, лѣ́ствица быва́етъ вѣ́рнымъ мы́сленна къ небеси́ и возше́ствіе покланя́ющимся ему́ и чту́щимъ.

Иже посредѣ́ земли́ насади́выйся, честны́й Кре́стъ и ны́нѣ вѣ́тви простира́етъ дарова́ній въ себѣ́ и вся́ осѣня́етъ, покланя́ющіяся ему́.

Пресѣкíй Чермно́е, пропису́емь, Кре́стъ, покланя́емь ны́нѣ, бѣ́дъ и страсте́й мо́ре пресѣка́етъ, и спаса́етъ покланя́ющіяся ему́.

Богоро́диченъ: Отъ земли́ привлече́ на́съ Сы́нъ Тво́й и Бо́гъ къ небе́снѣй жи́зни, возше́дъ на Кре́стъ, любо́вію Тя́, Ма́терь Сего́, вои́стинну чту́щихъ.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Тече́нія сла́дкая иска́паху, блаже́нне, по́тове твои́ и ра́дованія, исцѣле́ній сія́ніе во хвалу́ Христа́ Бо́га на́шего.

Во дво́рѣхъ Бо́жіихъ процвѣ́лъ еси́, виногра́дъ многопло́денъ прозябы́й, и добродѣ́телей гро́здіе дѣ́лателю душа́мъ оби́льно пода́въ.

Ца́рства Бо́жія возжелѣ́лъ еси́ и, надъ страстьми́ ца́рствовавъ, Евдоки́ме, по благоволе́нію лу́чшему ра́дость пра́ведныхъ получи́лъ еси́.

Богоро́диченъ: Избра́нна Бо́гу бы́вши, я́ко кра́сное село́ и простра́нное, Сему́, Дѣ́во, была́ еси́ и черто́гъ, и свѣ́щникъ, и трапе́за.

Конда́къ, гла́съ 2:

Вы́шнихъ жела́я, съ вы́шними совокупля́яся, и колесни́цу о́гненную, боже́ственными восхожде́ньми добродѣ́телей, соверши́лъ еси́ ду́шу, преблаже́нне Евдоки́ме, на земли́ пожи́въ, я́ко безпло́тенъ, Зижди́телю всѣ́хъ благоугоди́лъ еси́.

Икосъ:

Житіе́ сугу́бо показа́лъ еси́ пра́вою, блаже́нне, вѣ́рою, во обое́мъ Бо́гу благоугоди́въ, Евдоки́ме. Тѣ́мже обрѣ́лъ еси́ небе́снаго Ца́рствія наслѣ́діе и, со святы́ми ны́нѣ живы́й, Влады́цѣ всѣ́хъ предстои́ши; твое́ же тѣ́ло скве́рны соблю́лъ еси́ кромѣ́ и неруши́мое любо́вію чту́щимъ тя́ оста́вилъ еси́: чи́сто бо пожи́въ, сла́вне, Зижди́телю всѣ́хъ благоугоди́лъ еси́.

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́, я́ко еди́нѣми усты́, поя́ху и благословля́ху, глаго́люще: благослове́нъ Бо́гъ оте́цъ на́шихъ.

Иже честно́ю кро́вію Христо́вою Кре́стъ Его́ напои́вся, источа́етъ рѣ́ки сія́ніи мы́сленныхъ дарова́ній и напая́етъ вся́, покланя́ющіяся и воспѣва́ющія его́ вѣ́рно.

Иже сме́рть и врага́ низло́жь Кре́стъ Христо́въ и вереи́ сокруши́ мы́сленныя, и ны́нѣ тому́ чи́стою вѣ́рою и любо́вію покланя́ющимся всѣ́мъ две́ри отверза́етъ жи́зни и нетлѣ́нныя пи́щи.

Иже покланя́ющеся любо́вію Кресту́, огражда́ются си́лою сего́, и враги́ мы́сленныя и ви́димыя отго́нятъ, и невреди́мы соблюда́ются пѣсносло́вящіи Христа́.

Богоро́диченъ: Крѣ́пость на́мъ и держа́ва на враги́ дарова́ся — Кре́стъ Христа́, Сы́на Твоего́, прія́тнымъ и ма́тернимъ Твои́мъ дерзнове́ніемъ, и́мже, Богоневѣ́сто, прило́ги вра́жія побѣжда́емъ.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Крѣ́постію вжили́вся Живода́вца, пло́ти удержа́лъ еси́ жела́нія, пребога́те, и у́мъ впери́лъ еси́ къ небе́снымъ, поя́ крѣ́пко: сы́й благослове́нъ Бо́гъ и препросла́вленъ.

Са́мъ ся́ неблагоро́денъ сотво́рь, благоро́дны нра́вы стяжа́въ ума́ цѣ́лостію, поуче́ніемъ же упражня́яся богодохнове́нныхъ писа́ній, все́ твое́ жела́ніе на Бо́га Всеви́дца, блаже́нне, возложи́лъ еси́.

Вы́шняго Ца́рства, вы́шняго же гра́да, Бо́жія рая́, пра́ведныхъ наслажде́нія пи́щи нетлѣ́нныя и бога́тства некра́домаго, Свѣ́та невече́рняго сподо́бился еси́, блаже́нне Евдоки́ме.

Богоро́диченъ: Его́же родила́ еси́, Влады́чице, при́сно моли́ отъ рабо́ты изба́вити мя́ страсте́й и осужде́нія, и стужа́ющаго ми́ лю́таго отча́янія, и отъ оскорбля́ющихъ мя́, Чи́стая, одержа́нія, Богора́доранная.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Его́же водрузи́ сме́рть, поста́вленный Кре́стъ, ны́нѣ покланя́ема зря́ще, мы́сленная вра́жія ополче́нія скрыва́ются подъ земле́ю, и поклоня́ющіися ему́ обновля́ются.

Его́же, дре́вле прообразу́ема, на высотѣ́ небе́снѣй Христо́съ показа́, пресвѣ́тлаго Креста́. Ны́нѣ покланя́ющеся, благоче́стно вѣ́рніи возвыша́ются и сего́ уясня́ются заре́ю.

Его́же дре́вле проповѣ́даша проро́цы нело́жно, е́же Христо́ву подно́жію яви́тися Креста́, ему́же ны́нѣ мы́ и́стинно покланя́ющеся вѣ́рно, того́ бога́тыхъ даро́въ наслажда́емся.

Богоро́диченъ: Иже стра́стію безстра́стіе источи́въ земны́мъ, Сы́нъ Тво́й и Госпо́дь, Дѣ́во, Тобо́ю на́съ, Тя́ любо́вію пою́щія, при́сно обновля́етъ, я́ко Благодѣ́тель.

Инъ.

Ирмо́съ: Въ пещи́ о́трочестѣй прообрази́лъ еси́ иногда́ Твою́ Ма́терь, Го́споди, о́бразъ же Сія́ изъ огня́ изыма́ше, неопа́льно входя́щія. Юже пое́мъ, я́вльшуюся Тобо́ю конце́мъ дне́сь, и превозно́симъ во вся́ вѣ́ки.

Огнь помышля́я стра́шный, предъ престо́ломъ Христо́вымъ хотя́щъ изы́ти, умиле́ніемъ се́рдца те́плы излива́еши ка́пли сле́зъ, погаша́ющія тебѣ́ страсте́й пе́щь, Евдоки́ме богому́дре.

Все́ приложи́лъ еси́ къ Бо́гу, му́дре, душе́вное о́ко и Тому́ прилѣпи́лся еси́, вопія́ псало́мски: Христе́ мо́й, ка́ла мя́ изба́ви и смертоно́сныхъ страсте́й во вѣ́ки.

Терпѣ́ніемъ пожда́тель и се́рдцемъ смире́нъ ты́ бы́лъ еси́, ми́лостивъ тре́бующимъ и, обы́чай принося́ бла́гъ и нра́вы добродѣ́тельны, всече́стне, въ ни́хже до́брѣ пожи́въ, чуде́съ то́чиши благода́ть.

Ра́зумъ имѣ́я боже́ственъ, испо́лнитель Влады́чнихъ яви́лся еси́ слове́съ, десны́я любя́ стези́, лѣ́выхъ я́вѣ уклоня́яся, я́ко благоу́менъ и му́дръ. Тѣ́мже тя́ почита́емъ, богому́дре, во вѣ́ки.

Богоро́диченъ: Ада́мовъ Содѣ́тель отъ крове́й Твои́хъ чи́стыхъ зи́ждется и млеко́мъ пита́ется, Пита́яй вся́кое дыха́ніе, Дѣ́во Богоро́дице, тѣ́мже я́ко Бо́жію Тя́ сла́вимъ Ма́терь.

Пѣ́снь 9.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.

Безсме́ртія то́читъ и нетлѣ́нія незави́стны ка́пли честны́й Кре́стъ кланя́ющимся ему́, оживля́етъ, очища́етъ, и обновля́етъ, и сла́вы лу́чшія и благода́ти сподобля́етъ воспѣва́ющія на то́мъ пригво́ждшагося Іису́са.

Дѣ́йства испуща́я, я́коже пресвѣ́тлы зари́, всечестны́й Кре́стъ тому́ покланя́ющіяся любо́вію и вѣ́рою чи́стою къ свѣ́ту непристу́пному и невеще́ственному, озаря́я, направля́етъ, воспѣва́ющія всѣ́хъ Творца́.

Освяти́вый дре́во пресвята́го Креста́ Твоего́ честно́ю кро́вію Твое́ю, Преблагíй Сло́ве, дѣ́йствомъ его́ на́съ просвѣти́ и освяти́, тому́ кла́няющіяся и воспѣва́ющія Влады́ку вся́ческихъ.

Богоро́диченъ: Па́че со́лнца всѣ́мъ просія́вшая благода́ть о́блаки бѣ́дъ и страсте́й отго́нитъ, Дѣ́во, и богоразу́мія свѣ́томъ просвѣща́етъ любо́вію Тя́ сла́вящія и пою́щія непреста́нно Сы́на Твоего́, я́ко Влады́ку всѣ́хъ.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Ви́дѣти жела́я сла́ву Бо́га на́шего, добродѣ́тельми богоразу́мія тебе́ удобри́лъ еси́ и свѣщено́сецъ во свѣ́тлый черто́гъ вше́лъ еси́, со а́нгелы живы́й, и яснѣ́е наслажда́ешися боговидѣ́нія.

Яко у́тро, я́ко со́лнце, возсія́ па́мять твоя́, су́щая во мра́цѣ сердца́ просвѣща́ющи: ты́ бо и свѣ́та и дне́ вои́стинну сы́нъ яви́лся еси́, богому́дре Евдоки́ме. Сего́ ра́ди тя́ почита́емъ.

Му́дростію украша́емь и ра́зумомъ просвѣще́нъ, смире́ніемъ се́рдца удобре́нъ, высото́ю житія́ сія́я, къ мы́сленнымъ преше́лъ еси́ дворо́мъ, идѣ́же на́съ помяни́, почита́ющихъ тя́, Евдоки́ме.

Де́нь пра́зднственный и по́льзы хода́тайственный честны́й тво́й соверша́емъ, отъ земли́ преставле́нія: ты́ бо Госпо́день уго́дникъ и Того́ за́повѣдей дѣ́латель яви́лся еси́ непосты́денъ, досточу́дне Евдоки́ме.

Богоро́диченъ: Свѣ́та прія́телище утро́ба Твоя́ бы́сть, просвѣ́щшаго мíръ, Богора́дованная, тѣ́мже молю́ тя, окая́нный: свѣ́тлы зари́ ми́ пода́ждь мольба́ми, Богоневѣ́сто, Евдоки́ма богому́драго.

Свѣти́ленъ окто́иха. Сла́ва, свята́го:

Якоже со́лнце, блиста́я, зари́ испуща́еши чуде́съ, просвѣща́я всѣ́хъ сердца́, твою́ сла́вную па́мять творя́щихъ вѣ́рно, треблаже́нне, и спаса́еши, Евдоки́ме.

И ны́нѣ, Креста́. Подо́бенъ: Жены́, услы́шите.

Кре́стъ предпра́зднуется, и мíръ освяща́ется, чи́ни а́нгельстіи пою́тъ на́съ ра́ди Распе́ншагося, и торжеству́ютъ съ на́ми, и сра́дуются, Дави́дски зову́ще: содѣ́ла спасе́ніе посредѣ́ земли́, Влады́ко.

На стихо́внѣ окто́иха. Сла́ва, гла́съ 1:

Ка́ко не диви́мся благоу́мію твоему́ или́ не похва́лимъ, преподо́бне Евдоки́ме, житіе́ твое́ равноа́нгельное, по́мысла цѣлому́дрію, кро́тости твое́й, и смире́нію, и безмо́лвію, и ми́лостыни непреста́ннѣй? Всѣ́ми бо добродѣ́тельми украси́лся еси́, блаже́нне, тѣ́мже жде́тъ тебе́ неизглаго́ланная ра́дость и небе́сное Ца́рствіе.

И ны́нѣ, Креста́, гла́съ 6:

Проро́честіи гла́си дре́во свято́е провозвѣсти́ша, и́мже дре́внія кля́твы сме́ртныя свободи́ся Ада́мъ, тва́рь же, дне́сь возноси́му, тому́ совозвыша́етъ гла́съ, я́же отъ Бо́га прося́щи бога́тыя ми́лости. Но, еди́ный во благоутро́біи безмѣ́рный Влады́ко, очище́ніе бу́ди на́мъ и спаси́ ду́ши на́ша.


НА ЛИТУРГІИ,

Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви [о всѣ́хъ, я́же воздаде́ ми?] Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 43. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 261 об. – 268 об.

/ Къ оглавленію раздѣла /


Наверхъ / Къ титульной страницѣ

0