Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 30-й де́нь.
Слу́жба преподо́бному и богоно́сному отцу́ на́шему Ге́рману, Солове́цкому чудотво́рцу.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 4:

Твоя́ всечестна́я па́мять по́стниковъ ра́дуетъ и ликовствова́ти устроя́етъ всѣ́хъ вѣ́рныхъ собра́ніе, о́тче Ге́рмане. Ты́ бо я́ко безпло́тенъ пожи́лъ еси́ на земли́ и ны́нѣ со а́нгелы лику́еши на небеси́, съ ни́миже моли́ Христа́ Бо́га спасти́ся душа́мъ на́шимъ.

Воздержа́ніемъ плотскíя стра́сти умертви́въ, пло́ть твою́ ду́хови покори́лъ еси́ и де́моновъ полки́ погуби́лъ еси́, о́тче богому́дре Ге́рмане, тѣ́мже благода́ть нетлѣ́нія и да́ръ чуде́съ прія́лъ еси́ отъ Христа́ Бо́га, Его́же моли́ поми́ловатися душа́мъ на́шимъ.

Сле́зъ твои́хъ струя́ми ни́ву душе́вную напои́лъ еси́ и, бла́гу ю́ ко плодоноше́нію духо́вному содѣ́лавъ, пло́дъ стори́ченъ добродѣ́телей въ жи́тницу небе́сную прине́слъ еси́, Ге́рмане блаже́нне, тѣ́мже воздая́ніе бога́тно воспрія́лъ еси́ отъ Христа́ Бо́га, Ему́же моли́ся непреста́нно о душа́хъ на́шихъ.

Сла́ва, гла́съ 6:

Яко звѣзда́ многосвѣ́тлая, возсія́ на́мъ свяще́нная и всепра́зднственная па́мять твоя́, о́тче преподо́бне Ге́рмане, сія́ніемъ чуде́съ твои́хъ озаря́ющая сердца́ вѣ́рныхъ и отгоня́ющая о́блаки у́мнаго помраче́нія отъ вопію́щихъ вѣ́рно: о всеблаже́нне, преподо́бныхъ сожи́телю, Ца́рствія наслѣ́дниче, моли́ся о на́съ ко Го́споду дарова́ти душа́мъ на́шимъ ми́ръ и ве́лію ми́лость.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

На стихо́внѣ стихи́ры, гла́съ 2:

Сосу́дъ избра́нный Бо́гу бы́въ, благода́ти Ду́ха Свята́го испо́лненъ яви́лся еси́, о́тче преподо́бне, моли́твенниче о душа́хъ на́шихъ.

Сти́хъ: Честна́ предъ Го́сподемъ сме́рть преподо́бныхъ Его́.

Кре́стъ Госпо́день на ра́мо взе́мъ, усе́рдно послѣ́довалъ еси́ Христу́, о́тче преблаже́нне, пусты́нный жи́телю и мона́ховъ наста́вниче.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

О тебѣ́ ра́дости исполня́ется и́ноковъ сосло́віе, и вся́ Це́рковь вѣ́рныхъ торжеству́етъ, Ге́рмане приснопа́мятне, Святы́я Тро́ицы уго́дниче.

Сла́ва, гла́съ то́йже:

Пріиди́те дне́сь, ли́цы мона́шестіи, припаде́мъ ко гро́бу преподо́бнаго отца́ на́шего Ге́рмана, по́стническія по́двиги того́ въ пѣ́снехъ воспѣва́юще и добродѣ́телемъ его́ ревну́юще, я́ко да моли́твами его́ ми́лость пріи́мемъ и благода́ть обря́щемъ во благовре́менную по́мощь.

И ны́нѣ, богоро́диченъ:

Все́ упова́ніе мое́ [на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ].

Тропа́рь, гла́съ 8:

Жела́ніемъ духо́внымъ отъ ю́ности распаля́емь, преподо́бне Ге́рмане, Христу́ тѣ́снымъ житія́ путе́мъ послѣ́довалъ еси́ и, въ морскíй пусты́нный о́стровъ, а́ки въ ти́хое приста́нище, всели́вся, въ не́мъ мно́га лѣ́та по́стнически пожи́лъ еси́, идѣ́же блаже́ннымъ отце́мъ Зоси́мѣ и Савва́тію сожи́тель бы́лъ еси́, съ ни́миже моли́ Христа́ Бо́га о на́съ, любо́вію чту́щихъ святу́ю па́мять твою́.

Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, [и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].

Та́же ектенія́ и отпу́стъ.



НА ВЕЛИЦѢЙ ВЕЧЕРНИ,
По предначина́тельнѣмъ псалмѣ́, пое́мъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 6:

Все́ отри́нувъ мірско́е пристра́стіе и пло́ти уго́дія возненави́дѣвъ, Христа́ еди́наго возлюби́лъ еси́, Его́же ра́ди во о́стровѣ пу́стѣ всели́лся еси́, идѣ́же пустынножи́тія раче́ніемъ и́стинный подража́тель дре́внимъ святы́мъ отце́мъ яви́лся еси́, съ ни́миже по преставле́ніи твое́мъ и а́нгельскимъ лико́мъ прича́стникъ показа́лся еси́, о́тче преподо́бне Ге́рмане, моли́ся о чту́щихъ честну́ю па́мять твою́. [Три́жды.]

Егда Божественное раченіе найде на тя, преподобне, тогда житейскія молвы отлучаяся и вся́ до́лу влеку́щая презира́я, въ помо́ріе пусты́нное отше́лъ еси́, та́же, въ морскíй о́стровъ удали́вся, въ не́мъ мно́га лѣ́та терпѣли́внѣ пребыва́лъ еси́, му́жественно со враги́ неви́димыми боря́ся, и́хже и побѣди́лъ еси́ си́лою Христо́вою, тѣ́мже вѣне́цъ прія́лъ еси́ отъ Христа́ Бо́га, Ему́же моли́ся о чту́щихъ честну́ю па́мять твою́. [Три́жды.]

Пусты́нное озлобле́ніе до́блественнѣ претерпѣва́я и безпло́тныхъ жи́тельству уподобля́яся, тѣ́ло твое́ посто́мъ и бдѣ́ніемъ удручи́лъ еси́ и моли́твою непреста́нною да́ры духо́вныя стяжа́лъ еси́, о́тче преподо́бне Ге́рмане, тѣ́мже на мѣ́стѣ вселе́нія твоего́ вку́пѣ со преподо́бными отцы́ Зоси́мою и Савва́тіемъ основа́тель и́ноческаго житія́ яви́лся еси́, съ ни́миже тя́ почита́емъ, соверша́ющіи любо́вію святу́ю па́мять твою́. [Два́жды.]

Сла́ва, гла́съ то́йже:

Оте́ческую добро́ту, по́стниковъ украше́ніе, ско́раго въ бѣда́хъ помо́щника, неду́говъ чудодѣ́йственнаго цѣли́теля и моли́твенника къ Бо́гу непосты́днаго, пѣ́сненными похвала́ми воспои́мъ, глаго́люще: ра́дуйся, и́ноческаго житія́ до́брый наста́вниче; ра́дуйся, свѣти́льниче пресвѣ́тлый, озаря́яй ду́ши вѣ́рныхъ свѣ́тлостію чуде́съ твои́хъ; ра́дуйся, со преподо́бными отцы́ Зоси́мою и Савва́тіемъ люботру́днѣ подвиза́выйся въ житіи́ и по успе́ніи неразлу́чно съ ни́ми Святѣ́й Тро́ицѣ предстоя́й, Ейже моли́ся, Ге́рмане преподо́бне, о на́съ, ча́дѣхъ твои́хъ, благоче́стно пра́зднующихъ па́мять твою́.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Наста́, богоно́се Ге́рмане, свѣтоно́сный тво́й пра́здникъ, и озаря́етъ мона́шествующихъ ли́ки, и безсме́ртіемъ облагоуха́етъ, и исполня́етъ весе́лія духо́внаго всѣ́хъ вѣ́рою притека́ющихъ къ тебѣ́ и любо́вію тя́ ублажа́ющихъ.

Пріиди́те дне́сь, ли́цы мона́шестіи, припаде́мъ ко гро́бу преподо́бнаго отца́ на́шего, я́ко къ неоскудѣва́емому благода́ти исто́чнику, да врачевство́ духо́вное душа́мъ пріи́мемъ и неду́гомъ тѣле́снымъ ослабле́ніе, источа́етъ бо исцѣле́нія всѣ́мъ съ вѣ́рою къ нему́ прибѣга́ющимъ.

Вси́ вѣ́рніи, совокупи́теся здѣ́, въ мѣ́стѣ блаже́ннаго упокое́нія сего́ до́бляго благоче́стія ревни́теля, пусты́нное житіе́ того́ похваля́юще и честны́я и многоцѣле́бныя мо́щи облобыза́юще, се́й бо хода́тай къ Бо́гу быва́етъ во спасе́ніе всѣ́мъ любо́вію его́ прославля́ющимъ.

Сла́ва, гла́съ 5:

Ра́дуйся и лику́й ны́нѣ, мона́шествующихъ мно́жество, де́нь преставле́нія отца́ на́шего свѣ́тло торжеству́я, въ о́ньже то́й, я́ко ра́бъ вѣ́рный, вни́де въ ра́дость Го́спода своего́ и, я́ко строи́тель до́му му́дрый, мзду́ пра́ведную прія́тъ отъ до́му Влады́ки Христа́. Тѣ́мже, дне́сь честну́ю ра́ку моще́й его́ обстоя́ще и любе́зно ты́я облобыза́юще, усе́рдно ему́ возопіи́мъ: бу́ди предста́тель на́шъ, Ге́рмане пребога́те, я́ко да вси́ твои́ми моли́твами ми́лость пріи́мемъ и благода́ть обря́щемъ во благовре́менную по́мощь.

И ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую предста́тельницу и прибѣ́жище ду́шъ на́шихъ.

На стихо́внѣ стихи́ры, гла́съ 4:

Ангельски пожи́лъ еси́ на земли́, о́тче преподо́бне, поще́ніемъ и бдѣ́ніемъ пло́ть свою́ умерщвля́я, и, въ па́мяти сме́ртнѣй вы́ну поуча́яся, въ мѣ́ру соверше́нну безстра́стія дости́глъ еси́, и дарова́ніи духо́вными обогати́лся еси́, тѣ́мже и благода́ть прія́лъ еси́ отъ Бо́га моли́тися о душа́хъ на́шихъ.

Сти́хъ: Честна́ предъ Го́сподемъ [сме́рть преподо́бныхъ Его́].

Внима́ніемъ и моли́твою и безмо́лвіемъ пусты́ннымъ побѣ́ду на стра́сти воспрія́лъ еси́ и бѣсо́вскія полки́ посрами́лъ еси́, а́нгеловъ же возвесели́лъ еси́, о́тче преблаже́нне, съ ни́миже дерзнове́ніе и́маши ко Го́споду моли́тися о душа́хъ на́шихъ.

Сти́хъ: Блаже́нъ му́жъ, [боя́йся Го́спода, въ за́повѣдехъ Его́ восхо́щетъ зѣло́].

Ча́яніемъ бу́дущихъ благи́хъ веселя́ся, тѣ́сный и приско́рбный ра́достно ше́лъ еси́ пу́ть, въ де́брехъ пусты́нныхъ скита́яся и въ гора́хъ превита́я. Тѣ́мже ны́нѣ ра́йскія добро́ты наслажда́ешися, о́тче преподо́бне, ея́же не лиши́тися и на́мъ хода́тайствуй, Христу́ моля́ся о душа́хъ на́шихъ.

Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Ге́рмане, тобо́ю бо пу́ть пра́вый ходи́ти позна́хомъ: блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ Зоси́мы и Савва́тія соприча́стниче, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

На благослове́ніи хлѣ́бовъ: Тропа́рь свята́го, два́жды. [Пи́санъ на ма́лѣй вече́рни.] И Богоро́дице, Дѣ́во.., еди́ножды. И про́чее по обы́чаю.



НА УТРЕНИ,
На Бо́гъ Госпо́дь и яви́ся на́мъ: Тропа́рь, гла́съ 8: Жела́ніемъ духо́внымъ отъ ю́ности распаля́емь.., два́жды. Сла́ва, и ны́нѣ, богоро́диченъ: Иже на́съ ра́ди рожде́йся отъ Дѣ́вы...

По 1-мъ стихосло́віи сѣда́ленъ, гла́съ 1:

Зва́нію Го́спода твоего́ послѣ́дуя, вся́, я́же въ мíрѣ кра́сная, презрѣ́лъ еси́, о́тче на́шъ Ге́рмане, и, во о́стровъ пусты́нный со блаже́ннымъ Савва́тіемъ всели́вся, сподви́жникъ и собесѣ́дникъ тому́ бы́лъ еси́, съ ни́мже ку́пно прославля́емь, моли́ся о чту́щихъ честну́ю па́мять твою́. [Два́жды.]

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ го́рними си́лами да́ти оставле́ніе грѣхо́въ всѣ́мъ на́мъ и исправле́ніе житія́, вѣ́рою и любо́вію при́сно Тя́ чту́щимъ.

По 2-мъ стихосло́віи сѣда́ленъ, гла́съ 4:

Трудолю́бное по Бо́зѣ житіе́ возлюби́лъ еси́, о́тче на́шъ Ге́рмане, и, преподо́бному отцу́ Зоси́мѣ въ пусты́ни се́й сожи́тельствовавъ, сотру́дникъ и сотаи́нникъ тому́ бы́лъ еси́, съ ни́мже ку́пно, я́ко нача́льникъ мона́ховъ, прославля́ешися; моли́ся о на́съ, ча́дѣхъ твои́хъ, соверша́ющихъ сла́вно па́мять твою́. [Два́жды.]

Сла́ва, и ны́нѣ, богоро́диченъ:

Подъ кро́въ Тво́й прибѣга́емъ, Влады́чице, не пре́зри на́съ, тре́бующихъ Твоея́ по́мощи и заступле́нія, но, я́ко ми́лостиваго Бо́га Ма́ти, отъ бѣ́дъ изба́ви рабы́ Твоя́, при́сно на Тя́ упова́ющія.

[Велича́ніе:

Ублажа́емъ тя́, преподо́бне о́тче Ге́рмане, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 3:

Ка́ко тя́ ублажи́мъ, преподо́бне Ге́рмане? Ты́ бо измла́да и́ноческое житіе́ избра́лъ еси́ и, оте́чество свое́ оста́вль, въ предѣ́лы студе́наго мо́ря удали́лся еси́, идѣ́же, пустыннолюби́ваго Савва́тія обрѣ́тъ, нача́ло отше́льническому житію́ во о́стровѣ се́мъ уедине́ннѣмъ съ ни́мъ ку́пно положи́лъ еси́, та́же со избра́нникомъ Бо́жіимъ Зоси́мою оби́тель и́ноческую во о́нѣмъ согради́лъ еси́, тѣ́мже па́мять твою́ при́сно велича́емъ. [Два́жды.]

Сла́ва, и ны́нѣ, богоро́диченъ:

Яко невоздѣ́ланная лоза́, Дѣ́во, краснѣ́йшій Гро́здъ израсти́ла еси́, источа́ющь на́мъ вино́ спасе́нія, веселя́щее ду́ши на́ша, тѣ́мже, я́ко вино́вну Тя́ до́брыхъ ублажа́юще, при́сно со а́нгеломъ вопіе́мъ Ти́: ра́дуйся, Благода́тная.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви [о всѣ́хъ, я́же воздаде́ ми?] Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 7:

Ева́нгельскаго гла́са, въ Ца́рство небе́сное зову́щаго, послу́шавъ, усе́рдно послѣ́довалъ еси́ тому́ и, вся́ кра́сная мíра сего́ во уме́ты вмѣни́въ, еди́ныя добро́ты возжелѣ́лъ еси́ Христа́, Ему́же о́бразомъ добродѣ́тельнаго житія́ твоего́ мно́жество мона́ховъ рабо́тати приве́лъ еси́ и тѣ́мъ наста́вникъ и путеводи́тель ко спасе́нію бы́лъ еси́. Тѣ́мже, по́двиги и труды́ твоя́ въ пѣ́снехъ восхваля́юще, мо́лимъ тя́, о́тче на́шъ Ге́рмане: лю́тѣ одержи́мыхъ на́съ грѣхи́ мно́гими ко приста́нищу ти́хому спасе́нія напра́ви, прося́ на́мъ ми́ра и ве́лія ми́лости.

Кано́нъ Богоро́дицѣ со ирмосо́мъ на 6 и свята́го на 8, гла́съ 8.

Пѣ́снь 1.

Ирмо́съ: Пои́мъ Бо́гу, отъ го́рькія рабо́ты фарао́новы изба́вльшему Изра́иля и о́гненнымъ столпо́мъ и свѣ́тлымъ о́блакомъ наста́вльшему, я́ко просла́вися.

Сло́во ми́ пода́ждь, Сло́ве Бо́жій, во отверзе́ніе у́стъ мои́хъ на похвалу́ уго́дника Твоего́, преподо́бнаго Ге́рмана, пусты́ннаго жи́теля и мона́ховъ наста́вника и оби́тели Солове́цкія утвержде́нія.

Отъ ю́ности безмо́лвное житіе́ возлюби́въ, пусты́ннаго пребыва́нія взыска́тель бы́лъ еси́, преподо́бне, тѣ́мже, улучи́въ жела́емое со блаже́ннымъ Савва́тіемъ, равноа́нгельное жи́тельство показа́лъ еси́.

Богоизбра́ннаго во и́ноческое селе́ніе пусты́ннаго мѣ́ста сего́ пе́рвый насе́льникъ яви́лся еси́, блаже́нне Ге́рмане, и купножи́тель и сподви́жникъ преподо́бному Зоси́мѣ, съ ни́мже оби́тель сію́ возгради́лъ еси́.

Богоро́диченъ: Его́же родила́ еси́ во спасе́ніе всѣ́мъ вѣ́рнымъ, Пречи́стая Дѣ́во, моли́ прилѣ́жно, я́ко Зижди́теля всѣ́хъ и Бо́га, поми́ловатися на́мъ, рабо́мъ Твои́мъ, Богоро́дицу вои́стинну Тя́ исповѣ́дающимъ.

Катава́сія: Отве́рзу уста́ моя́...

Пѣ́снь 3.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Кто́ изрече́тъ по́двиги и труды́ твоя́, о́тче Ге́рмане? Ты́ бо, въ де́бри пусты́нныя вше́дъ, де́нь и но́щь тружда́лся еси́, посто́мъ и бдѣ́ніемъ тѣ́ло свое́ удруча́я.

Злострада́ніемъ и моли́твою стра́сти душе́вныя отъ ко́рене исто́рглъ еси́, воздержа́ніемъ же и злы́хъ удале́ніемъ вся́ плотска́я вожделѣ́нія потреби́лъ еси́, блаже́нне.

Бѣсо́въ боре́нія не возмого́ша одолѣ́ти тя́ въ до́брѣмъ произволе́ніи, но благо́ю наде́ждею и крѣ́пкимъ терпѣ́ніемъ вся́ ко́зни и́хъ ничто́жны сотвори́лъ еси́.

Богоро́диченъ: Влады́чице мíра, Блага́я Помо́щнице, Твои́мъ всеси́льнымъ предста́тельствомъ сокруши́ вся́ востаю́щія на ны́ си́лы вра́жія и вознеси́ ро́гъ людíй Твои́хъ.

Сѣда́ленъ, гла́съ 8:

Возше́дъ на высоту́ добродѣ́телей, о́бразъ бы́лъ еси́ ученико́мъ твои́мъ, воздержа́нію и кро́тости, смире́нію же и послуша́нію тѣ́хъ наставля́я, и, я́ко па́стырь, ста́ду своему́ предходя́, до́брѣ ше́ствовати путе́мъ же́стокимъ пусты́ннаго житія́ научи́лъ еси́. Тѣ́мже ублажа́емъ твое́ успе́ніе, Ге́рмане преподо́бне, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи, Богоро́дице Дѣ́во; моли́ Сы́на Твоего́ согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Напои́въ ду́шу твою́ сле́зными пото́ки, содѣ́лалъ еси́ ю́ плодоно́сну и добродѣ́тели вся́кія износя́щу, тѣ́мже путеводи́тель ко спасе́нію мно́гимъ бы́лъ еси́.

Аще и ку́пно со блаже́ннымъ Савва́тіемъ въ безмо́лвіе пусты́нное всели́лся еси́, оба́че я́ко еди́нъ Еди́ному Бо́гу моли́твою непреста́нною та́мо бесѣ́довалъ еси́, преподо́бне.

Умъ просвѣтле́нъ житія́ чистото́ю имы́й, мы́сленныя прило́ги лука́выхъ де́моновъ удо́бно низлага́лъ еси́, вся́ тѣ́хъ ухищре́нія и кова́рства облича́я.

Богоро́диченъ: Блажи́тъ Тя́, Пречи́стая, преподо́бныхъ ли́къ и вся́кое вѣ́рныхъ совокупле́ніе, Бо́жіе бо Сло́во па́че ума́ и сло́ва родила́ еси́.

Пѣ́снь 5.

Ирмо́съ: Утренюетъ ду́хъ мо́й къ Тебѣ́, Бо́же, отъ Отца́ рожде́нному неизрече́нно и воздви́гнувшему ро́гъ спасе́нія на́мъ.

Во пло́ти сы́й, безпло́тныхъ жи́тельству поревнова́лъ еси́, блаже́нне Ге́рмане, тѣ́мже побѣ́ду на враги́ безпло́тныя прія́лъ еси́ отъ Бо́га и вѣне́цъ сла́вы.

Во́льную нищету́ возлюби́въ, въ нестяжа́ніи безпеча́льное житіе́ препроводи́лъ еси́, сокро́вище некра́домое скрыва́я себѣ́ на небеси́, по словеси́ ева́нгельскому.

Очи́стивъ себе́ отъ вся́кія скве́рны плотскíя и душе́вныя, прія́телище Ду́ху Пресвято́му бы́лъ еси́, преподо́бне, отъ Него́же дарова́ніи духо́вными обогати́лся еси́.

Богоро́диченъ: Тя́ наде́жду на́шему спасе́нію стяжа́хомъ, Богома́ти, и ору́жіе непобѣди́мое на враги́ ви́димыя же и неви́димыя.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Пла́калъ и сѣ́товалъ еси́ о разлуче́ніи съ сожи́телемъ твои́мъ, блаже́ннымъ отце́мъ Савва́тіемъ, не обрѣ́тъ того́ въ живы́хъ, егда́ возврати́лся еси́ во о́стровъ отъ путеше́ствія твоего́.

Ра́дости и весе́лія испо́лнился еси́, егда́ по разлуче́ніи Савва́тіевѣ обрѣ́лъ еси́ Зоси́му преподо́бнаго, съ ни́мже па́ки во о́стровъ вше́лъ еси́, Бо́жіимъ смотре́ніемъ направля́емь.

Ангельскія глаго́лы, къ женѣ́ ры́баревѣ бы́вшія, я́ко недосто́итъ жена́мъ сели́тися во о́стровѣ се́мъ, возвѣсти́лъ еси́ Зоси́мѣ, це́рковь чу́дну на возду́сѣ узрѣ́вшему.

Богоро́диченъ: Бо́га, Его́же родила́ еси́ пло́тію, моли́, Пречи́стая, я́ко Человѣколю́бца, уще́дрити лю́ди согрѣ́шшія.

Конда́къ, гла́съ 4:

Вы́шнихъ жела́я, вся́ до́лу влеку́щая возненави́дѣлъ еси́ и, оте́чество свое́ оста́вль, въ помо́ріе пусты́нное отше́лъ еси́, та́же въ морскíй о́стровъ удали́вся, въ не́мъ мно́га лѣ́та Го́сподеви порабо́талъ еси́. Тѣ́мже, па́мять твою́ пра́зднующе, любо́вію вопіе́мъ ти́: ра́дуйся, Ге́рмане богому́дре, о́тче на́шъ.

Икосъ:

Ду́ху Свято́му въ жили́ще себе́ угото́вавъ, отъ Него́ всѣ́ми Боже́ственными добро́тами укра́шенъ бы́лъ еси́ и наста́вникъ мона́хомъ яви́лся еси́, о́тче, дѣ́лы благи́ми поуча́я ча́да твоя́. Тѣ́мже, па́мять твою́ пра́зднующе, взыва́емъ тебѣ́ такова́я: ра́дуйся, богоизбра́ннаго мѣ́ста сего́ небе́сное насажде́ніе; ра́дуйся, селе́ній и́ноческихъ Боже́ственное удобре́ніе; ра́дуйся, пусты́ннаго житія́ люби́телю; ра́дуйся, безмо́лвія до́брый рачи́телю; ра́дуйся, преподо́бнаго Савва́тія во о́стровъ се́й приведы́й и сожи́тель ему́ бы́вый; ра́дуйся, преподо́бному Зоси́мѣ въ созда́ніи оби́тели и́ноческія послужи́вый; ра́дуйся, отъ на́съ ку́пно съ си́ми преподо́бными отцы́ ублажа́емый; ра́дуйся, на небесѣ́хъ со всѣ́ми святы́ми отъ Христа́ Бо́га прославля́емый; ра́дуйся, Ге́рмане богому́дре, о́тче на́шъ.

Пѣ́снь 7.

Ирмо́съ: Бо́жія снизхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Ничто́же земно́е предпоче́лъ еси́ па́че небе́сныхъ и, я́ко зла́то въ горни́лѣ, искуси́лся еси́, въ послуша́ніихъ и́ноческихъ тружда́яся и при́сно взыва́я: благослове́нъ еси́, Бо́же оте́цъ на́шихъ.

Моли́твою непреста́нною Го́сподеви прилѣпля́яся, Тому́ Еди́ному послужи́лъ еси́ и кончи́ною блаже́нною отъ земны́хъ удо́лій къ небе́снымъ оби́телемъ преше́лъ еси́, ра́достно поя́: благослове́нъ еси́, Бо́же оте́цъ на́шихъ.

Гро́бъ тво́й, преподо́бне, благода́тію Христо́вою цѣльбопода́теленъ явля́ется, къ нему́же съ вѣ́рою притека́юще и исцѣле́нія пріе́млюще, вопіе́мъ Прославля́ющему уго́дники Своя́: благослове́нъ еси́, Бо́же оте́цъ на́шихъ.

Богоро́диченъ: Благослове́нъ Пло́дъ благослове́ннаго чре́ва Твоего́, Его́же благословя́тъ небе́сныя си́лы и преподо́бныхъ собо́ри, на́съ изба́вльшаго кля́твы дре́внія, Благослове́нная.

Пѣ́снь 8.

Ирмо́съ: Ангели и небеса́, на престо́лѣ сла́вы сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

Подвиза́вся до́брѣ на земли́ и побѣди́въ вся́ вра́жія дѣ́йства, вѣнча́лся еси́ сла́вою на небеси́ и ли́ку преподо́бныхъ сочета́лся еси́.

Нетлѣ́ніе моще́й твои́хъ явля́етъ, преподо́бне, я́ко обрѣ́лъ еси́ благода́ть у Бо́га и и́маши наслѣ́діе со святы́ми и со а́нгелы ликостоя́ніе.

Яко обогати́вшуся всѣ́ми добродѣ́тельми въ житіи́, благода́ть чуде́съ дарова́ся тебѣ́ по сме́рти, и то́чиши исцѣле́нія вѣ́рно тя́ блажа́щимъ.

Богоро́диченъ: Спаси́ мя, Ма́ти Бо́жія, спасе́нію нача́ло мíрови я́вльшая, избавля́ющи мя́ треволне́нія страсте́й и вся́кія ско́рби, да Тя́ сла́влю во вѣ́ки.

Пѣ́снь 9.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Іере́ю благоговѣ́йну во оте́чествіи твое́мъ я́влься, повелѣ́лъ еси́ списа́ти о́бразъ тво́й и пѣ́снь тебѣ́ сложи́ти, то́й же со тща́ніемъ сіе́ сотвори́, въ похвалу́ твою́ и во сла́ву Христа́ Бо́га, прославля́ющаго уго́дники Своя́.

Ико́на твоя́, на не́йже вку́пѣ со преподо́бными отцы́ Зоси́мою и Савва́тіемъ изображе́нъ бы́лъ еси́, чудотво́рна яви́ся, е́же бы́сть во изъявле́ніе святы́ни твоея́, я́ко да па́мять твоя́ со святы́ми почита́ется.

Аще и не на мѣ́стѣ подвиго́въ твои́хъ преста́вился еси́, о́тче преподо́бне, оба́че честны́я мо́щи твоя́ пренесены́ бы́ша во оби́тель твою́, идѣ́же во хра́мѣ, и́мени твоему́ созда́ннѣмъ, святолѣ́пно почива́ютъ.

Богоро́диченъ: О, чудесе́, всѣ́хъ чуде́съ превы́сшаго! Яко Дѣ́ва, во чре́вѣ вся́ческая Содержа́щаго сло́вомъ неискусому́жно пріи́мши, безъ истлѣ́нія родила́ еси́.

Свѣти́ленъ:

Яко вои́стинну звѣзда́ путево́дная яви́лся еси́, Ге́рмане преподо́бне, блаже́ннымъ отце́мъ на́шимъ Зоси́мѣ и Савва́тію и съ ни́ми мно́жеству мона́ховъ, приве́дшая и́хъ въ немяте́жное приста́нище и свѣ́тлостію житія́ твоего́ озаря́ющая стези́ пусты́ннаго жи́тельства на́мъ, почита́ющимъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Ра́дуйся, Тебѣ́ зове́мъ, Благослове́нная Богоро́дице Дѣ́во, я́ко Тобо́ю присносу́щныя ра́дости прича́стницы бы́хомъ, Жи́знь бо Ѵпоста́сную родила́ еси́ во спасе́ніе всѣ́мъ пою́щимъ Тя́.

На хвали́техъ стихи́ры на 4, гла́съ 8:

Отче преподо́бне Ге́рмане, ты́ измла́да Бо́гови прилѣпля́тися возжелѣ́лъ еси́ и, вся́ кра́сная мíра сего́ во уме́ты вмѣни́въ, въ пусты́ню всели́лся еси́, идѣ́же въ терпѣ́ніи мно́зѣ привре́менно потруди́вся, въ поко́ище жи́зни вѣ́чныя дости́глъ еси́. Тѣ́мже мо́лимъ тя́: моли́ Христа́ Бо́га, да спасе́тъ ду́ши на́ша, я́ко Милосе́рдъ. [Дважды.]

Отче богому́дре Ге́рмане, ты́, отъ ю́ности кре́стъ сво́й на ра́мо взе́мъ, Христу́ невозвра́тнымъ по́мысломъ послѣ́довалъ еси́ и, вся́къ ви́дъ добродѣ́телей испо́лнивъ, о́бразъ вои́стинну бы́лъ еси́ мона́хомъ, тѣ́мже по сме́рти сія́еши чудесы́, Бо́гу прославля́ющу тя́, Его́же моли́, мо́лимъ ти ся, да спасе́тъ ду́ши на́ша, я́ко Милосе́рдъ.

Отче богоно́сне Ге́рмане, ты́, отъ пеле́нъ сосу́дъ избра́нный Бо́гу бы́въ, благода́ти Свята́го Ду́ха испо́лненъ яви́лся еси́ и по сме́рти источа́еши исцѣле́нія, вла́сть пріе́мь на ду́хи нечи́стыя, е́же прогони́ти ты́я отъ человѣ́къ, и́хже наси́лія и на́съ свободи́, моля́ся прилѣ́жно Го́сподеви, да спасе́тъ ду́ши на́ша, я́ко Милосе́рдъ.

Сла́ва, гла́съ 2:

Пріиди́те, и́ночестіи собо́ри, пѣ́сньми увѣнча́имъ приснопа́мятнаго отца́ на́шего: се́й бо яви́ся я́ко ма́слина плодови́та, въ дому́ Бо́жіи, еле́й цѣльбы́ иска́пающая на одержи́мыя неду́ги разли́чными, и, я́ко фи́никсъ, процвѣте́ нетлѣ́ніемъ моще́й свои́хъ, и, я́ко ке́дръ, и́же въ Лива́нѣ, умно́жися ча́ды въ пусты́ни, сле́зъ его́ тече́ніи напое́ннѣй, и я́ко кри́нъ, процвѣты́й благода́тію Христа́ Бо́га на́шего.

И ны́нѣ, богоро́диченъ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

Славосло́віе вели́кое. Ектеніи́, и отпу́стъ.



НА ЛИТУРГІИ,

Блаже́нна на 8, отъ кано́на свята́го, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. [Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].


Моли́тва преподо́бному отцу́ на́шему Ге́рману, Солове́цкому чудотво́рцу.

О, преподо́бне и богоно́сне о́тче на́шъ Ге́рмане, безмо́лвнаго и́ноческаго житія́ во о́стровѣ Солове́цтѣмъ первонача́льниче! Мо́лимъ тя́ мы́, недосто́йніи, обстоя́ще честны́й гро́бъ тво́й, и́мже ку́пно съ чудотво́рными ра́ками преподо́бныхъ оте́цъ на́шихъ Зоси́мы и Савва́тія освяща́ется и прославля́ется богоизбра́нное мѣ́сто сіе́. Бу́ди, съ си́ми уго́дники Бо́жіими и всея́ Россíйскія земли́ небе́сными предста́тельми, моли́твенникъ и хода́тай о на́съ, грѣ́шныхъ, предъ престо́ломъ Вседержи́теля Бо́га, Ему́же въ дерзнове́ніи предстои́ши со а́нгелы и всѣ́ми святы́ми, да да́руетъ на́мъ, я́ко Благíй и Человѣколюби́вый, вся́ потре́бная къ животу́ и благоче́стію, душа́мъ и тѣлесе́мъ на́шимъ здра́віе, во всѣ́хъ благи́хъ преспѣ́яніе и Свою́ всеси́льную по́мощь во вся́кихъ искуше́ніихъ, бѣда́хъ же и напа́стехъ, воздвиза́емыхъ на ны́ отъ вра́гъ спасе́нія на́шего. Оби́тели твое́й моли́ изба́витися отъ вся́каго зла́го обстоя́нія и приходя́щимъ въ ню́ бли́жнимъ и да́льнимъ получи́ти вся́ проси́мая ко душе́внѣй и тѣле́снѣй по́льзѣ. Наипа́че же испроси́, уго́дниче Христо́въ, всѣ́мъ на́мъ грѣхо́въ отпуще́ніе, христіа́нскую кончи́ну житія́ и наслѣ́діе Ца́рства небе́снаго у Христа́ Бо́га на́шего, Ему́же че́сть и сла́ва, со Отце́мъ и Святы́мъ Ду́хомъ, ны́нѣ, и при́сно, и во вѣ́ки вѣко́въ. Ами́нь.

Источникъ: Слу́жба преподо́бному и богоно́сному отцу́ на́шему Ге́рману, Солове́цкому чудотво́рцу. — Пе́рвымъ тисне́ніемъ. — СПб.: Сѵнода́льная Тѵпогра́фія, 1898. — 36 с.

/ Къ оглавленію раздѣла /


Наверхъ / Къ титульной страницѣ

0