Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 30-й де́нь.
Слу́жба на па́мять свята́го Іоа́нна, во́ина и чудотво́рца.

ВЕЧЕРЪ,
Глаго́лемъ, Блаже́нъ му́жъ, [1-й антифо́нъ]. На Го́споди, воззва́хъ: стихи́ры на 8, гла́съ 2. Подо́бенъ: Егда́ отъ Дре́ва.

Егда́ тлѣ́нному царю́ во́инствуя на земли́,* вѣ́ренъ Бо́гу, Іоа́нне, во́инъ бы́лъ еси́,* тогда́ небе́снаго Царя́ Христа́ по́мощь пріи́мъ,* му́ченикомъ Христо́вымъ помога́я,* побѣжда́лъ еси́ враги́ ви́димыя и неви́димыя,* и ны́нѣ со а́нгельскими си́лами и во́инствы въ вы́шнихъ лику́еши.* Тѣ́мже, блаже́нне страстоно́сче,* Спаси́телю всѣ́хъ за ны́ моли́ся,* спасти́ ду́ши на́ша. [Два́жды.]

Земно́е во́инство оста́вити восхотѣ́въ,* небе́сному Царю́ Христу́ потща́лся еси́ угоди́ти,* вѣ́рою бо въ Него́ вооружи́вся,* си́лою честна́го Креста́ Его́* во́инъ крѣ́покъ, Іоа́нне, обрѣ́лся еси́,* отъ мучи́телей злочести́выхъ му́ченики Христо́вы сохраня́я* моли́твами твои́ми къ Бо́гу, блаже́нне.

Егда́ вѣ́рою во Христа́ Бо́га и моли́твою* преподо́бныхъ жре́бій получи́ти возжела́лъ еси́,* тогда́ вѣ́ры ра́ди Христо́вы му́чащимся спосо́бствовалъ еси́.* Сего́ ра́ди дарова́ньми чуде́съ обогати́ тя Христо́съ Госпо́дь,* въ разли́чныхъ бо ско́рбехъ призыва́ющимъ тя́* помо́щникъ ско́ръ обрѣта́ешися.* Тѣ́мже моли́ся Бо́гу о на́съ,* творя́щихъ всечестну́ю па́мять твою́.

Ины стихи́ры, гла́съ то́йже. Подо́бенъ: Кíими похва́льными.

Пріиди́те, святолю́бцы,* вси́ духо́вно возвесели́мся и торжеству́имъ,* сла́вяще Христа́ и Бо́га на́шего,* я́ко пребога́тую трапе́зу дне́сь на́мъ предложи́,* па́мять сла́внаго му́ченика и до́бляго во́ина Іоа́нна,* помо́щника всѣ́мъ въ ско́рбехъ,* и злы́хъ дѣ́лъ обличи́теля,* и погубле́ній та́йныхъ яви́теля,* прося́щимъ его́ по́мощи.

Богодарова́нную благода́ть, Іоа́нна,* восхва́лимъ пѣснопѣ́ньми,* благоче́стія побо́рника,* хра́браго во́ина, изя́щнаго чудотво́рца,* помо́щника оби́димымъ,* благовѣ́рнымъ предста́теля, и врача́ безме́зднаго,* въ во́инствѣ ратобо́рца,* и отъ напра́сныхъ сме́ртей храни́теля,* и путе́й благи́хъ извѣ́стника,* мо́лится бо Бо́гу вся́ лю́ди благодѣ́йствовати.

Преблаже́нне добропобѣ́дный Іоа́нне,* во́ине крѣ́пкій Всетворца́ на́шего Бо́га,* ты́ душе́вное твое́ благоро́діе богоизбра́ннѣ соблю́лъ еси́,* презрѣ́въ суету́ и пре́лести мíра,* человѣколю́бнѣ су́щимъ въ муче́ніихъ спострада́лъ еси́.* И ны́нѣ въ небесѣ́хъ со Христо́мъ сла́дцѣ водворя́ешися,* отню́дуже назира́й и сохраня́й въ ратобо́рствѣ и во вся́кихъ злоключе́ніихъ* вся́, призыва́ющія тя́.

Что́ тебѣ́ принесе́мъ, Тво́рче Бо́же?* Ко́е воздади́мъ благодаре́ніе?* Яко дарова́лъ еси́ лю́демъ твои́мъ* и́стинную благода́ть, свята́го Іоа́нна,* во́ина благочести́ва, ми́лости твори́теля,* на бра́нехъ во́иномъ спосо́бника,* вся́кихъ печа́лей утѣ́шителя,* и моли́твенника Тебѣ́ во спасе́ніе на́ше те́плаго.* Тѣ́мже ра́ди ми́лости Твоея́* спаси́ ны, Влады́ко Человѣколю́бче.

Сла́ва, гла́съ 6:

За Христа́ усе́рдно, Іоа́нне, подвиза́вся съ му́ченики Христо́выми, въ вѣ́рѣ благочести́вѣй христіа́номъ помоществу́я, я́ко во́инъ изря́денъ твоему́ Влады́цѣ бы́лъ еси́. Тре́бующимъ подава́я пита́ніе и ми́лостыню изоби́льно ни́щимъ уготовля́я, небре́глъ еси́ повелѣ́нія Іуліа́на, законопресту́пнаго царя́, разруша́я же мучи́тельныя его́ сосу́ды, изя́щенъ добропобѣ́дникъ въ Правосла́віи яви́лся еси́. Тѣ́мже преше́лъ еси́ въ небе́сныя кро́вы и та́мо Христа́ Іису́са всера́достно зри́ши, Иже нетлѣ́ннымъ увязе́ тя вѣнце́мъ. Его́же, всеблаже́нне, непреста́нно моли́, вѣ́чнаго блаже́нства сподо́битися досто́йно честву́ющимъ тя́.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́, и чте́нія три́.

Проро́чества Иса́іина чте́ніе. [Глава́ 43]:

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3]:

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4]:

Пра́ведникъ а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть и живы́й посредѣ́ грѣ́шникъ преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая, и паре́ніе по́хоти премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше, и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 8:

Му́чениче Христо́въ, прехва́льне Іоа́нне, гони́теля, беззако́ннаго царя́, стремле́нія и ну́ждную сме́рть ни во что́же вмѣни́лъ еси́, благоде́рзостно и мужему́дренно ополчи́вся къ боре́ніемъ. Тѣ́мже побѣдоно́сною сла́вою вѣнча́вся, приче́лся еси́ всѣ́мъ пра́веднымъ, съ ни́миже тя́, хва́ляще, ублажа́емъ.

Му́чениче Христо́въ, преблаже́нне Іоа́нне, ви́дя Христо́вы му́ченики, на закла́ніе ведо́мы, друголю́бно о́нѣмъ помога́лъ еси́. Страда́ти бо до кро́ве и сме́рти ты́я поуча́я, глаго́лалъ еси́: ничто́же е́сть здѣ́ на́ше страда́ніе проти́ву бу́дущаго въ небесѣ́хъ воздая́нія. Та́же и са́мъ спострада́ти тѣ́мъ любве́ ра́ди Творца́ твоего́ подви́глся еси́, сего́ ра́ди, отъ Христа́ Бо́га чуде́съ дарова́ніе пріе́мъ, въ разли́чныхъ напа́стехъ стра́ждущимъ помога́еши, и изъима́еши отъ лю́тыхъ бѣ́дъ сла́вящія Го́спода и честву́ющія любо́вію свяще́нная твоя́ страда́нія.

Му́чениче Госпо́день, непобѣди́мый Іоа́нне, благода́ти нося́ и́мя, благода́ть и ми́лость подава́еши вѣ́рно моли́твами тя́ призыва́ющимъ и приво́диши въ ра́дость лю́ди богому́дрыя, вѣ́рно въ по́мощь на́пастей свои́хъ зову́щія тя́ и честву́ющія священнора́достную па́мять твою́, тѣ́мже моли́ся Христу́ Іису́су, да спасе́тъ ны́ отъ всѣ́хъ бѣ́дъ, я́ко Всеси́ленъ.

Сла́ва, гла́съ 4:

Кто́ не удиви́тся, или́ кто́ не просла́витъ, или́ не воспое́тъ вѣрному́драго и сла́внаго Христо́ва во́ина Іоа́нна чудеса́? Яко и по честнѣ́мъ свое́мъ преставле́ніи, всѣ́мъ подае́тъ, притека́ющимъ усе́рдно къ нему́, премно́гая врачевства́: и́бо честны́я и святы́я его́ мо́щи источа́ютъ благода́ть изоби́льну въ поле́зная проше́нія. Тѣ́мже благоче́стно вопіе́мъ ему́: моли́ непреста́нно Го́спода, да спасе́тъ правосла́внаго на́шего Импера́тора и вся́ лю́ди, вѣ́рою во святы́й тво́й хра́мъ притека́ющія и прося́щія те́плаго къ Бо́гу заступле́нія, тебе́ бо усе́рдна хода́тая къ Нему́ и́мамы, и моли́твенника о душа́хъ на́шихъ.

И ны́нѣ, богоро́диченъ: При́зри на моле́нія...

На стихо́внѣ стихи́ры, гла́съ 4. Подо́бенъ: Яко до́бля.

Многообра́зными муче́ніи* лю́тый мучи́тель* казни́ти предаде́ свято́е тѣ́ло твое́.* Ты́ же, богомы́сленне Іоа́нне,* не отве́рглся еси́ Христа́,* ни куми́ромъ поже́рлъ еси́,* но претерпѣ́лъ еси́ до́блественнѣ,* ожида́я бу́дущаго воздая́нія,* неконча́емаго въ Бо́зѣ наслажде́нія.

Сти́хъ: Пра́ведникъ, я́ко фи́никсъ процвѣте́тъ,* я́ко ке́дръ, и́же въ Лива́нѣ, умно́жится.

Добродѣ́тельнымъ твои́мъ житіе́мъ* мíръ презрѣ́лъ еси́, Іоа́нне чудотво́рче,* и, ве́ліе милосе́рдіе христіа́номъ* въ чинонача́льствѣ твоего́ во́инства сотворя́я,* въ свобо́ду о́нѣхъ пуща́лъ еси́.* Отню́дуже и са́мъ за Христа́ Бо́га* въ вѣ́рѣ правосла́внѣй пострада́въ,* прія́лъ еси́ наслѣ́діе вѣ́чнаго блаже́нства.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Исцѣле́ній дарова́ніе источа́ютъ* твоя́, сла́вне, мо́щи* честву́ющимъ тя́ усе́рдно,* потопля́юща стра́сти* и врачу́юща неду́ги, Іоа́нне,* и разоря́ютъ лука́выхъ де́моновъ толпы́,* напоя́ютъ же вѣ́рныхъ сердца́,* и́же прозяба́ютъ добродѣ́телей плоды́ боже́ственныя* и благоче́стія разумѣ́ніе.

Сла́ва, гла́съ 8:

Пріиди́те, христолюби́віи лю́діе, до́брый по́двигъ и благоду́шное му́жество во благовѣ́ріи сотворе́нное разу́мнѣ созерца́имъ. Но́вый бо вѣне́чникъ Іоа́ннъ, вели́кій моли́твенникъ и му́ченикъ, си́це вопіе́тъ царю́ богоме́рзкому, законопресту́пному Іуліа́ну: злоко́зненными твои́ми словесы́ въ сладостра́стіе су́етнаго сего́ мíра не мо́жеши мя́ прельсти́ти, ниже́ отлучи́ши любве́ Всетворца́ моего́ Бо́га, а́зъ бо на Него́ упова́ю, и къ Нему́ все́ мое́ жела́ніе простира́ю, да Его́ небе́снаго Ца́рствія бу́ду наслѣ́дникъ. Тѣ́мже, сла́вяще Христа́ Царя́, му́ченика хва́лимъ и усе́рдно дне́сь въ па́мяти его́ про́симъ: свя́те Іоа́нне, моли́ся вы́ну ми́ръ мíру дарова́ти и душа́мъ на́шимъ ве́лію ми́лость.

И ны́нѣ, богоро́диченъ: Влады́чице, пріими́...

Тропа́рь, гла́съ 4:

Всеблага́го Бо́га и Царя́ благовѣ́рный ра́бъ и во́инъ яви́лся еси́, Іоа́нне чудодѣ́телю, пострада́въ бо ра́ди вѣ́ры му́жески, блаже́нно же сконча́въ тече́ніе, зри́ши Всетворца́ Го́спода въ небесѣ́хъ свѣтлѣ́йше. Отъ Него́же пріе́мъ дарова́ніе чуде́съ, стра́ждущимъ человѣ́комъ во вся́кихъ напа́стехъ помога́еши, укрѣпля́еши во́ины въ ра́техъ, отъ враго́въ плѣне́нія, ра́нъ же и внеза́пныхъ смерте́й и отъ бѣ́дъ лю́тыхъ изъима́еши. Тѣ́мже моли́ Влады́ку Христа́, приснопа́мятне, да во вся́комъ обстоя́ніи сотвори́тъ на́мъ ми́лость и не введе́тъ на́съ во искуше́нія, но спасе́тъ ду́ши на́ша, я́ко Человѣколю́бецъ.

Сла́ва, и́нъ тропа́рь, гла́съ 8:

Блаже́нство ева́нгельское возлюби́въ, богому́дре Іоа́нне, чистоту́ се́рдца дѣ́вствомъ почти́лъ еси́. Тѣ́мже суету́ мíра сего́ пренебре́гъ, устреми́лся еси́ зрѣ́ти Бо́га, Иже тя́ просла́ви чудесы́ во врачева́ніи разли́чнѣ стра́ждущихъ. Сего́ ра́ди мо́лимъ тя́: проси́ на́мъ у Христа́ Го́спода вся́кихъ скорбе́й избавле́нія и получе́нія Ца́рства небе́снаго.

И ны́нѣ, богоро́диченъ: Иже на́съ ра́ди рожде́йся отъ Дѣ́вы...
Аще же твори́тся бдѣ́ніе, глаго́ли пе́рвый тропа́рь, два́жды, и Богоро́дице Дѣ́во, еди́ножды.



НА УТРЕНИ,
На Бо́гъ Госпо́дь: тропа́рь свята́го, два́жды. Сла́ва, и ны́нѣ, богоро́диченъ во гла́съ тропаря́.

По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й, Спа́се.

Стра́сти честны́хъ ви́дѣвъ му́чениковъ, и тѣ́хъ цѣлова́въ у́зы, на высоту́ восте́клъ еси́ свидѣ́тельства, пречу́дне, и жела́ніе все́ ко Христу́ возложи́въ, стра́ждущимъ помога́я и а́лчущія пита́я, всѣ́мъ ми́лостивый засту́пникъ бы́лъ еси́, до́ндеже въ ру́цѣ Госпо́дни ду́шу твою́ пре́далъ еси́, Іоа́нне многострада́льне. [Два́жды.]

Сла́ва, и ны́нѣ, богоро́диченъ:

Наде́ждо христіа́нъ, Пресвята́я Дѣ́во, Его́же родила́ еси́, Бо́га, па́че ума́ и сло́ва, непреста́нно моли́ съ вы́шними си́лами и со страстоте́рпцемъ Іоа́нномъ, да́ти оставле́ніе грѣхо́въ на́мъ всѣ́мъ, и исправле́ніе житія́, вѣ́рою и любо́вію при́сно Тя́ прославля́ющимъ.

По 2-й стихоло́гіи сѣда́ленъ, гла́съ 8. Подо́бенъ: Прему́дрости.

Царю́ вѣко́въ Безсме́ртному угожда́я, истука́ннымъ не поже́рлъ еси́, царя́ же беззако́ннаго вся́кія совѣ́ты злоко́зненныя отрази́лъ еси́, сла́вне, Того́ ра́ди же́ртву тебе́ сама́го прине́слъ еси́ Поже́ршемуся Сло́ву. Тѣ́мъ и чуде́съ источа́еши струи́, въ напа́стехъ стра́ждущимъ ми́лостивый предста́телю и моли́твенниче ко Христу́ Бо́гу, Іоа́нне вели́кій, во́ине Царя́ Христа́ Бо́га на́шего, Его́же моли́, грѣхо́въ оставле́ніе дарова́ти честву́ющимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Со́лнца о́блаче разу́мнаго, Боже́ственнаго свѣ́та свѣти́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослѣпле́ніемъ страсте́й, безстра́стія заре́ю просвѣти́, молю́ся, и оскверне́нное мое́ се́рдце очи́сти пото́ки умиле́нія, покая́нія же слеза́ми омы́й нечистоту́ дѣ́лъ мои́хъ, да любо́вію зову́ Ти́: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́, Тебе́ бо и́мамъ наде́жду, ра́бъ Тво́й.

Велича́ніе:

Велича́емъ тя́, страстоте́рпче святы́й Іоа́нне, и чти́мъ честна́я страда́нія твоя́, я́же за Христа́ претерпѣ́лъ еси́.

Псало́мъ избра́нный: Бо́гъ на́мъ прибѣ́жище и си́ла...

По поліеле́и сѣда́ленъ, гла́съ 4. Подо́бенъ: Удиви́ся Іо́сифъ.

Яко до́блему страда́льцу и во́ину крѣ́пкому Всецарю́ющаго Христа́, взыва́емъ ти́, Іоа́нне: ра́дуйся, му́ченикомъ украше́ніе и лѣ́пото; ра́дуйся, свѣ́тлая Це́ркве звѣздо́, и стѣно́ и приста́нище притека́ющимъ къ тебѣ́, великому́чениче сла́вне, Іоа́нне во́ине. Тя́ пою́щія спаса́й твои́ми моли́твами отъ вся́каго вре́да чужда́го и отъ лю́тыхъ озлобле́ній изба́ви. [Два́жды.]

Сла́ва, и ны́нѣ, богоро́диченъ:

Яко къ Цари́цѣ, небе́сныя си́лы превосходя́щей, су́щей Ма́тери Христа́ Бо́га на́шего, Держа́внѣй Помо́щницѣ ро́да на́шего, припа́дающе, мы́, грѣ́шніи раби́ Твои́, умиле́нно вопіе́мъ Тебѣ́: Влады́чице Дѣ́во Марíе Богоро́дице, во все́ вре́мя жи́зни на́шея при́сно управля́й ны́ въ во́лю Го́спода Царя́ Небе́снаго и сохраня́й отъ вся́кихъ напа́стей и неду́говъ душе́вныхъ и тѣле́сныхъ, не ввѣря́ющи человѣ́ковъ по́мощи, и поми́луй ны́, Всепѣ́тая.

Степе́нна, 1-й антифо́нъ 4-го гла́са. Проки́менъ, гла́съ 4: Пра́ведникъ, я́ко фи́никсъ, процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Вся́кое дыха́ніе... Ева́нгеліе отъ Іоа́нна, зача́ло 51.

По 50-мъ псалмѣ́:

Сла́ва: Моли́твами страстоте́рпца, Ми́лостиве, очи́сти мно́жества согрѣше́ній на́шихъ. И ны́нѣ: Моли́твами Богоро́дицы... Поми́луй мя́, Бо́же...

Та́же стихи́ра, гла́съ 6:

Дне́сь созыва́етъ на́съ страстоте́рпца всемíрное торжество́: пріиди́те, боголю́бцы, свѣ́тло пра́зднуимъ па́мять его́, глаго́люще: ра́дуйся, великому́чениче Іоа́нне, Царя́ Небе́снаго во́ине непребори́мый, и́бо ты́ повелѣ́ніе безу́мное законопресту́пнаго царя́ Іуліа́на, идолочти́теля, преоби́дѣлъ еси́ му́жески; ра́дуйся, блаже́нне, страстоте́рпцемъ Христо́вымъ помо́щниче, я́ко ты́я въ гоне́ніи отъ злочести́выхъ въ вѣ́рѣ Правосла́внѣй утвержда́лъ еси́ и и́мъ любе́зно сострада́лъ еси́. Сего́ ра́ди Христо́съ дарова́ньми чуде́съ обогати́лъ тя́ е́сть, моли́ у́бо Всеблага́го Бо́га спасти́ ду́ши на́ша.

Кано́нъ Богоро́дицы на 6 и свята́го на 8 два́ кано́на.
Пе́рвый кано́нъ свята́го, во гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Свѣ́тлое пра́зднество твое́, свя́те Іоа́нне, ра́достно на духо́вную трапе́зу на́съ созыва́етъ, въ не́йже учрежда́еши ны́ вся́, къ тебѣ́ притека́ющія, дарова́ньми, въ по́льзу проше́нія на́мъ исполня́я.

По́двигомъ до́брымъ подвиза́вся на земли́, преблаже́нне Іоа́нне, и отъ зла́го мучи́теля му́ченики Христо́вы сохраня́я, прія́лъ еси́ отъ Христа́ Бо́га небе́сную жи́знь, отню́дуже въ ско́рбехъ на́мъ пода́ждь по́мощь.

Во́инствомъ и́стиннымъ, богому́дре, злочести́ваго царя́ небре́гъ мучи́тельства и бога́тство ни́щимъ Христа́ ра́ди расточи́въ, прія́лъ еси́ да́ръ чуде́съ отъ Бо́га, лука́выя человѣ́ки облича́я, благочести́вымъ спосо́бствуеши.

Богоро́диченъ: Воплоти́ся изъ Тебе́ боголѣ́пно Сло́во безпло́тное премно́жествомъ человѣколю́бія, Пречи́стая Дѣ́во; Его́же, Влады́чице, моли́ вѣ́чное блаже́нство дарова́ти на́мъ.

Другíй кано́нъ, гла́съ 1.
Пѣ́снь 1.

Ирмо́съ: Вознесу́ Тя́, Бо́же, Спа́се мо́й, я́ко воскре́слъ еси́ отъ ме́ртвыхъ, попра́въ сме́рть.

Іису́се, Спа́се на́шъ, пода́ждь на́мъ усе́рдіе благодари́ти Тя́ о все́мъ и восхвали́ти уго́дника Твоего́, Іоа́нна.

Страстоте́рпче сла́вне Іоа́нне, богому́дрымъ смы́сломъ вво́инился еси́ Всетворцу́ Бо́гу, побѣди́ у́бо вся́ враги́ на́ша.

Зрѣ́ти удосто́ивыйся Бо́га воплоще́на, всехва́льне во́ине, мо́лимъ тя́: твои́ми мольба́ми изба́ви ны́ отъ всѣ́хъ бѣ́дъ.

Богоро́диченъ: Богора́дованная, Сло́ва Предвѣ́чнаго Пала́то, Марíе Дѣ́во, милосе́рдіемъ Твои́мъ сердца́ на́ша въ ско́рбехъ увеселя́й о Бо́зѣ при́сно.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Съ му́ченики несумнѣ́нну вѣ́ру стяжа́въ, благоду́шне, и Христу́ Іису́су бы́въ во́инъ, добродѣ́тельми обогати́лся еси́; тѣ́мже соверша́ющимъ па́мять твою́ честну́ю благо́е просвѣще́ніе всегда́ да́руй.

Лука́внующимъ злѣ́ неви́димый гони́тель, му́чениче Христо́въ, явля́ешися и крадьбы́, въ та́йнѣ су́щія, открыва́еши, прія́лъ бо еси́ вла́сть отъ Бо́га поле́зная ко спасе́нію всѣ́мъ содѣва́ти.

Якоже сто́лпъ непоколе́блемь, се́рдце твое́, всече́стне Іоа́нне, имѣ́я, любо́вь му́ченикомъ Христо́вымъ сотвори́лъ еси́, не боя́ся царе́ва суровства́, тѣ́мже въ любви́ Госпо́дни утвержда́тися на́мъ помози́.

Богоро́диченъ: Богоро́дице, Ма́ти Го́спода Іису́са, со всѣ́ми святы́ми Того́ моли́, изба́вити ны́ отъ всѣ́хъ бѣ́дъ и скорбе́й, я́ко да посра́мятся вси́, явля́ющіи рабо́мъ Твои́мъ зла́я, хвали́ти же съ Сы́номъ Тя́ при́сно на́съ сподо́би.

Инъ.

Ирмо́съ: Утвержде́й сло́вомъ Твои́мъ вселе́нную, я́же не подви́жится, утверди́ и на́шу мы́сль въ стра́хъ Тво́й, Влады́ко Го́споди.

Тебѣ́, Творцу́ на́шему Бо́гу, во вся́комъ обстоя́ніи, припа́дающе, мо́лимся: му́ченика Твоего́ мольба́ми въ во́ли и любви́ Твое́й утверди́ на́съ.

Тве́рдымъ умо́мъ ста́лъ еси́ на правотѣ́ богозна́нія, богоблаже́нне Іоа́нне, тѣ́мже утвержда́й ду́ши на́ша, во Го́сподѣ наде́жду во все́мъ полага́ти. По́хоть пло́ти, по́хоть оче́съ и го́рдость житія́ презрѣ́въ, утверди́лся еси́ въ любви́ Іису́совѣ, му́чениче, на́мъ въ то́ежде помо́щникъ бу́ди.

Богоро́диченъ: Всеблаже́нная Влады́чице, утвержда́ющаго вся́ Христа́ Го́спода поро́ждши, въ про́мыслѣ Его́ пребыва́ти укрѣпи́ ны всегда́.

Сѣда́ленъ, гла́съ 8. Подо́бенъ: Прему́дрости.

Царю́ Небе́сному и Творцу́ вѣко́въ угожда́я при́сно, законопресту́пнаго Іуліа́на мучи́теля вся́ злокова́рныя и богоме́рзкія совѣ́ты отрази́лъ еси́, сла́вне, и́доломъ безду́шнымъ же́ртвы возбрани́въ твори́ти, и та́ко въ по́двизѣ ду́шу твою́ въ ру́цѣ Го́споду Бо́гу пре́далъ еси́. Его́же моли́, свя́те Іоа́нне, прегрѣше́ній оставле́ніе на́мъ дарова́ти, честву́ющимъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

О Тебѣ́ ра́дуется, Благода́тная, вся́кая тва́рь, а́нгельскій собо́ръ и человѣ́ческій ро́дъ, освяще́нный хра́ме и раю́ слове́сный, дѣ́вственная похвало́, изъ Нея́же Бо́гъ воплоти́ся, и Младе́нецъ бы́сть, пре́жде вѣ́къ Сы́й Бо́гъ на́шъ: ложесна́ бо Твоя́ престо́лъ сотвори́ и чре́во Твое́ простра́ннѣе небе́съ содѣ́ла. О Тебѣ́ ра́дуется, Благода́тная, вся́кая тва́рь, сла́ва Тебѣ́.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя, человѣ́ка. Тѣ́мъ зову́ Ти: сла́ва си́лѣ Твое́й, Го́споди.

Уподо́бился еси́ распе́ншемуся во́лею на Дре́вѣ Христу́ Бо́гу на́шему, всече́стне, сраспе́нся Ему́ вся́кимъ воздержа́ніемъ, моли́твою же, и ми́лостынею, и мно́гими добродѣя́ньми.

Се́ да́же до сме́рти, Іоа́нне му́чениче, смири́лся еси́: святы́я бо твоя́ мо́щи на мѣ́стѣ въ погребе́ніи стра́нныхъ бы́ша сокрове́ны, сего́ ра́ди Госпо́дь по все́й вселе́ннѣй тебе́ просла́ви.

Царя́ престу́пника Іуліа́на во́инство тлѣ́нное во вла́сти содержа́въ, отъ того́ по́сланъ бы́лъ еси́ убива́ти Христо́вы му́ченики. Но ты́, блаже́нне, ты́я храня́, въ вѣ́рѣ утвержда́лъ еси́, во е́же пѣ́ти: сла́ва си́лѣ Твое́й, Го́споди.

Богоро́диченъ: Недоумѣ́ніе во спасе́ніе предлежи́тъ ми́, отъ обыше́дшихъ мя́ зо́лъ, Пречи́стая. Тѣ́мже изба́ви мя́ отъ ни́хъ ско́ро, благоразу́міе подаю́щи, къ Тебѣ́ бо еди́нѣй прибѣго́хъ, Богома́ти.

Инъ.

Ирмо́съ: Разумѣ́хъ, Всеси́льне, Твое́ смотре́ніе и со стра́хомъ просла́вихъ Тя́, Спа́се.

Ве́ліе Твое́, Го́споди, смотре́ніе во все́мъ мíрѣ, ему́же усе́рдно предае́мся, Тебѣ́ со святы́ми моля́щеся.

По́двигъ до́бръ, му́чениче, во страда́ніи соверши́въ, благоразу́міемъ во стра́сѣ Го́спода прославля́ти помози́ на́мъ.

Братолю́бнѣ въ гоне́ніи лю́демъ Бо́жіимъ помога́лъ еси́, стра́хъ отве́ргій мучи́телей, Іоа́нне: стра́хъ напа́стей отве́ржи отъ на́съ.

Богоро́диченъ: Всеси́льнаго Царя́ Цари́ца и Ма́ти сподо́билася еси́ бы́ти; сподо́би ны́ сла́вити Его́ къ на́мъ въ ми́лости смотре́ніе.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Та́инъ Боже́ственныхъ вкуси́въ въ ра́зумѣ, Іоа́нне, про́повѣдь Бо́жія рожде́нія исповѣ́далъ еси́, глаго́ля предъ всѣ́ми: ино́го Бо́га, ра́звѣ Всетворца́, не зна́ю.

Возлюби́вшаго Го́спода люби́те, — возглаго́лалъ еси́, страстоте́рпче, стра́ждущимъ му́ченикомъ, въ Его́же любви́ утверди́вся, обогати́лся еси́ чудесы́, врачу́я болѣ́зни мно́гія.

Сла́ву мíра сего́ ни во что́же, богому́дре во́ине, вмѣни́лъ еси́, сла́вы ра́ди Христо́вы, тѣ́мже, страда́льчество соверши́въ и сла́вы Боже́ственныя сподо́бився, на́мъ получи́ти о́ную моли́ся.

Богоро́диченъ: Тя́, Влады́чице, мо́лимъ, сла́вяще Твое́ о на́съ милосе́рдіе: вся́кихъ ны́ скорбе́й, Марíе, свободи́ и помози́ у́треневати на́мъ къ Бо́гу и вѣ́чнаго блаже́нства сподо́битися.

Инъ.

Ирмо́съ: Отъ но́щи невѣ́дѣнія просвѣще́й концы́, просвѣти́ мя у́тромъ человѣколю́бія Твоего́, Го́споди.

Человѣколю́бче Влады́ко, просвѣща́й ны́ въ па́мяти моле́бнѣй страда́льца Твоего́, у́треневати къ Тебѣ́ благоговѣ́инствомъ.

Просвѣти́лся еси́, му́чениче Іоа́нне, богодарова́нными чудесы́, тѣ́мъ отъ злы́хъ человѣ́къ, тщеты́ и болѣ́зни сла́вящія тя́ премѣни́.

Свѣтоно́снымъ у́тромъ, побѣжда́я вся́ душетли́тельныя враги́ до́блественнѣ, отъ ско́рбныхъ тьмы́ страсте́й во свѣ́тъ ра́дости привлецы́ ны.

Богоро́диченъ: Яже Бо́га во пло́ти на́шей родила́ еси́, Дѣ́во Пречи́стая, свѣ́томъ небе́снымъ осія́тися на́мъ Ему́ моли́ся, ми́лость ко всѣ́мъ простира́ющи.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Си́лою Бо́жіею укрѣпи́вся, му́чениковъ сла́во, Іоа́нне, преще́ній нечести́выхъ небре́глъ еси́; ны́нѣ же зря́ ра́достнѣ Бо́га, отъ злы́хъ на́съ изба́ви.

Моли́твами и посто́мъ и въ цѣлому́дріи вся́кимъ воздержа́ніемъ Бо́гу угоди́лъ еси́, всече́стне; свы́ше назира́я, свобожда́й ны́ отъ ско́рби.

Проси́мая честву́ющимъ тя́ вѣ́рно, блаже́нне, подае́ши, злы́я человѣ́ки облича́я, о ка́ющихся же Бо́гу моля́ся.

Богоро́диченъ: Уврачу́й, Богоро́дице, стра́сти ду́шъ и тѣле́съ на́шихъ, Врача́ Христа́ на́мъ поро́ждши, и вра́жіе злокова́рство посрами́ милосе́рдіемъ Твои́мъ.

Инъ.

Ирмо́съ: Со Іо́ною вопіе́мъ Ти́, Го́споди, со гла́сомъ хвале́нія моля́щеся: возведи́ отъ тли́ живо́тъ на́шъ.

Не преста́немъ моли́ти Тя́, Всеще́драго Го́спода, подви́жуще съ на́ми вѣ́рнаго во́ина, изъима́я отъ грѣ́хъ, всели́ ны въ небе́сную жи́знь.

Хва́лиши, свя́те Іоа́нне, въ вы́шнихъ Бо́га, вѣ́рно здѣ́ служи́въ Ему́, отню́дуже прибли́жися и на́мъ, тя́ хва́лящимъ, во спасе́ніе.

Стра́сти Христа́ ра́ди терпѣ́въ, всехва́льне, всера́достное блаже́нство получи́лъ еси́, тѣ́мже и на́ша мольбы́ пріими́ и введи́ ны́ въ ра́дость.

Богоро́диченъ: Пречи́стая Дѣ́во, отъ тлѣ́нія пагубоно́снаго мíръ спа́сшая, отъ вся́каго зла́го обстоя́нія на́съ изба́ви.

Конда́къ, гла́съ 6:

Благочести́ваго во́ина Христо́ва, побѣди́вшего враги́ душе́вныя и тѣле́сныя богому́дренно, Іоа́нна му́ченика достодо́лжно пѣ́сньми восхва́лимъ, чудодѣ́йствуя бо, подае́тъ оби́льная исцѣле́нія стра́ждущимъ лю́демъ и мо́лится Го́споду Бо́гу отъ вся́кихъ бѣ́дъ спасти́ правовѣ́рныя.

Икосъ:

Кто́ по́двиги твоя́ и страда́нія ра́ди вѣ́ры въ Го́спода Іису́са изрещи́ возмо́жетъ, прехва́льне Іоа́нне? Или́ кíими тя́ увѣнча́емъ похвала́ми, ра́ди му́жественнаго твоего́ въ зако́нѣ Госпо́дни и во и́стиннѣмъ благоче́стіи стоя́нія? Попра́лъ бо еси́ вся́ ко́зни душетли́теля врага́, цѣлому́дріемъ и вся́кими добротворе́ніи вооружи́вся; бога́тство и сла́ву и по́хоть вре́дную возненави́дѣвъ, нищету́ и поноше́ніе Христо́во возлюби́лъ еси́, стра́ждущимъ въ ско́рбехъ помога́я. Тѣ́мже, всели́вся въ небе́сныя кро́вы, дарова́ньми пресла́вныхъ чуде́съ обогати́лся еси́. Отту́ду у́бо, блаже́нне, вся́, притека́ющія къ тебѣ́, назира́й, по́мощи творя́, во е́же отъ вся́кихъ бѣ́дъ спасти́ правовѣ́рныя.

Пѣ́снь 7.

Ирмо́съ: Образу злато́му, на по́ли Деи́рѣ служи́му, тріе́ Твои́ о́троцы небрего́ша безбо́жнaго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси́, Бо́же оте́цъ на́шихъ.

Безбо́жное мучи́теля законопресту́пнаго велѣ́ніе, страстоте́рпче Іоа́нне, преоби́дѣвъ, богочести́въ Всемогу́щаго Царя́ во́инъ показа́лся еси́, благода́тнѣ же ороша́емь, съ людьми́ Бо́жіими пѣ́лъ еси́: благослове́нъ еси́, Бо́же оте́цъ на́шихъ.

Сла́дкое и вели́кое и ра́достное торжество́ ны́нѣ лю́ди Госпо́дни облиста́, е́же му́чениковъ до́блѣйшій цѣлому́дрый Іоа́ннъ вообрази́. То́читъ бо цѣльбы́ моля́щимся вѣ́рно Го́споду, и́же взыва́ютъ: благослове́нъ еси́, Бо́же оте́цъ на́шихъ.

Дерзнове́ніе имѣ́я ко Влады́цѣ всѣ́хъ, свя́те Іоа́нне, я́ко бли́жній уго́дникъ Его́, во обстоя́ніи напа́стей на́шихъ предста́тельствуй Ему́ о на́съ и помога́й изба́витися на́мъ отъ грѣхо́въ, да богому́дренно пое́мъ: благослове́нъ еси́, Бо́же оте́цъ на́шихъ.

Богоро́диченъ: Пресла́вное соверши́ся та́инство въ Тебѣ́, Богома́ти, безсѣ́менно бо зачала́ еси́ Сы́на, бре́мя грѣ́хъ на́шихъ упраздни́вшего. Тѣ́мже, упова́ніе на Тя́ иму́ще и Твою́ по́мощь зря́ще, усе́рдно вопіе́мъ: благослове́на еси́, Дѣ́во Влады́чице.

Инъ.

Ирмо́съ: Вся́ дѣла́ Твоя́ и́стинна и пра́ви путіе́ Твои́, Бо́же оте́цъ на́шихъ.

Безме́здный врачу́ Іоа́нне, исцѣли́ моли́твами твои́ми неду́ги и стра́сти ду́шъ и тѣле́съ Го́сподеви вопію́щихъ: благослове́нъ еси́, Бо́же оте́цъ на́шихъ.

Дѣ́ло вся́кія добродѣ́тели испра́вилъ еси́, и же́ртву тя́ Всетворцу́ возложи́лъ еси́, вопія́: благослове́нъ еси́, Бо́же оте́цъ на́шихъ.

Всеблаго́му Бо́гу въ чистотѣ́ моли́твою и посто́мъ угожда́я, му́чениче, да́ждь на́мъ богоуго́днѣ зва́ти: благослове́нъ еси́, Бо́же оте́цъ на́шихъ.

Богоро́диченъ: Всенепоро́чная Дѣ́во, Пу́ть и Истину, Христа́, ро́ждши, руководи́ на́съ въ го́рнюю жи́знь, къ Бо́гу оте́цъ на́шихъ.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те, вся́ дѣла́ Госпо́дня, Го́спода.

Вы́шнихъ ища́й, на земли́ пре́лести возненави́дѣлъ еси́, богоблаже́нне. Тѣ́мже, съ му́ченики Христо́выми въ любви́ духо́внѣй соедини́вся, дерзнове́нно Богочеловѣ́ка Іису́са проповѣ́далъ еси́, о Не́мже зове́ши: благослови́те, вся́ дѣла́ Госпо́дня, Го́спода.

Неоску́дно тре́бованія подава́я, ни́щимъ бы́лъ еси́ гото́вый пита́тель, во́ине благочестивому́дренне Іоа́нне. И ны́нѣ, притека́ющія къ тебѣ́ назира́я, испо́лни тѣ́хъ проше́нія, да ра́достно зове́мъ: благослови́те, вся́ дѣла́ Госпо́дня, Го́спода.

Всезри́тель Бо́гъ, усе́рдіе твое́, Іоа́нне, и соверше́нную вѣ́ру ви́дѣвъ, просла́ви тя́ сла́вою вѣ́чною. Его́же моли́ въ по́льзѣ уще́дрити ны́, богому́дренно пою́щія: благослови́те, вся́ дѣла́ Госпо́дня, Го́спода.

Богоро́диченъ: Марíе Богоневѣ́сто, къ Тебѣ́ прибѣга́емъ и Тебѣ́, припа́дающе, мо́лимся: ви́ждь, Влады́чице, ско́рбь на́шу и озлобле́ніе отъ вра́гъ на́шихъ и умири́ жи́знь всѣ́хъ на́съ, Миротво́рца поро́ждши Го́спода, Его́же благослови́мъ во вѣ́ки.

Инъ.

Ирмо́съ: Царя́ сла́вы и Побѣди́теля сме́рти, Іису́са Назоре́я, Того́ превозноси́те во вся́ вѣ́ки.

Царю́ Небе́сный, побѣ́ду на си́лу вра́жію свято́му Твоему́ му́ченику дарова́вый, да́руй и на́мъ во избавле́ніи отъ ну́ждъ сла́вити Тя́ во вся́ вѣ́ки.

Царя́ Го́спода ра́достно, блаже́нне, въ вы́шнихъ узрѣ́лъ еси́, моли́ся, да мы́ чи́стымъ се́рдцемъ Его́ превозно́симъ во вся́ вѣ́ки.

Царю́яй во Христѣ́ во́ине, вся́ ва́рвары побѣди́ и злоко́зненныя разори́ на на́съ совѣ́ты, да превозно́симъ Го́спода во вся́ вѣ́ки.

Богоро́диченъ: Цари́це Всемо́щная, Царя́ и Бо́га ма́терски моли́, да вездѣ́ Его́ превозно́симъ и Тя́, Госпожу́, пое́мъ во вся́ вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

До́бръ яви́лся еси́ посо́бникъ, пресла́вне, лю́демъ Бо́жіимъ, гони́мыя сокрыва́я, и ны́нѣ чуде́снѣ помоществу́еши вѣ́рнымъ, сего́ ра́ди въ па́мяти благодѣя́ній твои́хъ, Христа́ Бо́га велича́емъ.

Твоя́ чудеса́, преблаже́нне Іоа́нне, во все́мъ мíрѣ проповѣ́даются; тѣ́мже и дне́сь, собра́вшеся, сла́ву возсыла́емъ Христу́, тебе́ просла́вльшему.

На́съ, восхваля́ющихъ тя́, му́чениче Христо́въ, и твоея́ по́мощи прося́щихъ, дне́сь услы́ши, и къ поле́знымъ управля́ти не преста́й, моли́твенникъ теплѣ́йшій и хода́тай къ Бо́гу на́шему явля́яся.

Изря́денъ вра́чь серде́цъ человѣ́ческихъ чудодѣя́ньми яви́лся еси́, Іоа́нне, помоществу́я всѣ́мъ богочести́вымъ; тѣ́мъ, воспѣва́юще тя́, Христа́ велича́емъ.

Богоро́диченъ: Пѣ́ти, Дѣ́во, Тя́ не престае́мъ, помо́щницу, покро́въ, ско́рое заступле́ніе и предста́тельницу на́шу непосты́дную; соблюди́ Твоя́ рабы́ отъ вся́каго озлобле́нія и отъ ко́зней лука́ваго свобожда́й при́сно.

Инъ.

Ирмо́съ: Служи́тель безпло́тный предста́, глаго́ля Благода́тнѣй: Госпо́дь съ Тобо́ю! Юже велича́емъ.

Го́споди си́лъ, бу́ди съ на́ми, укрѣпля́я цари́, іера́рхи же и вся́ лю́ди Твоя́, моли́твами свята́го спаса́я, да благоче́стно Тя́ и Богоро́дицу непреста́нно вси́ велича́емъ.

Моли́ся, свя́те Іоа́нне, Бо́гу въ Тро́ицѣ, да удосто́итъ вѣ́рующія во и́мя Его́ богому́дренно, я́ко Всетворца́, при́сно велича́ти.

Твою́ па́мять соверша́ющія, Госпо́день уго́дниче, предста́въ, отъ печа́лей свободи́ и напо́й ра́дости, во е́же съ Богома́терію Го́спода велича́ти.

Богоро́диченъ: Облагода́тствованная Марíе, при́зри на вся́ лю́ди Твоя́ ми́лостію, да Тя́ безконе́чно въ ра́дости велича́емъ.

Свѣти́ленъ. Подо́бенъ: Со ученики́.

Вѣнцено́сче свя́те, предстоя́й со а́нгелы Христо́ву престо́лу и свѣ́та отту́ду исполня́яйся, страстоте́рпче, ми́ръ мíру моли́твами твои́ми исхода́тайствуй и на́мъ спасе́ніе, благоче́стно па́мять твою́ соверша́ющимъ и въ ско́рбехъ притека́ющимъ къ тебѣ́, Іоа́нне всебога́те.

Сла́ва, подо́бенъ: Не́бо звѣзда́ми.

Позна́ніемъ себе́ сама́го, позна́лъ еси́ Всетворя́щую Вину́, Бо́га, въ Него́же и увѣ́ровалъ еси́, и Того́ исповѣ́давъ, просвѣща́еши мíръ чудесы́, Іоа́нне богоблаже́нне.

И ны́нѣ, богоро́диченъ:

Во чре́вѣ Твое́мъ Госпо́дь, погиба́ющій мíръ отъ тлѣ́нія призва́ти восхотѣ́въ, я́коже вѣ́дяше, всели́ся, Богоро́дице. Спасе́ніе у́бо вси́ обрѣ́тше, вопіе́мъ Тебѣ́: ра́дуйся, Всепѣ́тая Дѣ́во, поро́ждши ра́дость все́й вселе́ннѣй, обра́дуй и на́съ, отъ враго́въ злодѣ́йства храня́щи всегда́.

На хвали́техъ стихи́ры на 4, гла́съ 6. Подо́бенъ: Всю́ отложи́вше.

Страда́нія ви́дѣвъ* добропобѣ́дныхъ му́чениковъ,* дерзнове́нія боже́ственнаго испо́лнився,* не убоя́лся еси́ мучи́теля, злочести́ваго царя́,* но, со усе́рдіемъ къ ни́мъ прише́дъ,* на по́двигъ укрѣпля́лъ еси́ и́хъ.* Съ ни́миже моли́ся Го́споду,* страда́льче Іоа́нне,* спасти́ся душа́мъ на́шимъ.

Пло́ть съ кро́вію па́дающу* ви́дя мно́гихъ святы́хъ,* отъ беззако́ннаго царя́ Іуліа́на стра́ждущихъ* за Христа́, Бо́га на́шего,* си́мъ, блаже́нне, во у́захъ и злострада́ніихъ помога́лъ еси́,* благо́ю бесѣ́дою утѣша́я,* да наде́жды благíя не отпа́даютъ,* но да ожида́ютъ бу́дущаго воздая́нія* и вѣнце́въ небе́сныхъ ра́дованія.

Терпѣ́ніемъ твои́мъ, Іоа́нне всехва́льне,* мзду́ стяжа́лъ еси́,* ду́шу твою́ всѣ́хъ Влады́цѣ въ ру́цѣ преда́въ,* и отъ Него́ дарова́ніи чуде́съ обогати́лся еси́.* Моли́ у́бо Христа́ Бо́га* о чту́щихъ любо́вію святу́ю па́мять твою́.

Зрѣ́ти тя́ сподо́бися* жена́ благочести́вая,* е́йже ты́, страда́льче, яви́вся,* повелѣ́лъ еси́ честны́я твоя́ мо́щи просла́вити,* та́я же съ ра́достію сія́ пріе́мши,* съ мѵ́рными благоуха́ніи це́ркви предложи́.* Моли́ся, страда́льче, Христу́ Бо́гу,* и пѣвце́мъ твои́мъ пода́ти ве́лію ми́лость.

Сла́ва, гла́съ 5. Подо́бенъ: Воструби́мъ.

Стеце́мся вѣ́рою,* и любо́вію возопіи́мъ пра́зднственная,* и лику́имъ, ра́дующеся,* въ настоя́щее торжество́ Христо́ва во́ина,* Іоа́нна прехва́льнаго;* ца́ріе и кня́зи да стеку́тся* и ли́цы архіере́йстіи да воспою́тъ пѣ́сньми* страда́льческое пра́зднество,* во́инства а́нгельская да веселя́тся зря́ще.* Того́ бо вѣ́мы въ бѣда́хъ предста́теля* и уныва́ющимъ и́стинное ра́дованіе,* ни́щихъ обогати́теля,* и во всѣ́хъ находя́щихъ лю́тыхъ утѣ́шителя,* и вся́ вездѣ́ те́плѣ предваря́юща.* Ему́же ны́нѣ си́це рце́мъ:* во́ине Христо́въ Іоа́нне,* спаси́ вѣ́рою притека́ющія ко свяще́нному хра́му твоему́* моли́твами твои́ми.

И ны́нѣ, богоро́диченъ, гла́съ то́йже:

Воструби́мъ трубо́ю пѣ́сней: прекло́нши бо ся свы́ше, Всецари́ца Ма́ти Дѣ́ва благослове́ньми вѣнча́етъ воспѣва́ющія Ю. Ца́ріе и кня́зи да стеку́тся и Цари́цѣ да воспле́щутъ въ пѣ́снехъ, Царя́ ро́ждшей, Иже сме́ртію пе́рвѣе держи́мыя разрѣши́ти человѣколю́бно благоволи́. Па́стыріе и учи́теліе, До́браго Па́стыря Пречи́стую Ма́терь, соше́дшеся, восхва́лимъ: свѣ́щникъ златоза́рный, свѣтоно́сный о́блакъ, небе́съ простра́ннѣйшую, одушевле́нный киво́тъ, огнезра́чный Влады́чень престо́лъ, маннопріе́мную злату́ю ста́мну, затворе́нную Сло́ва две́рь, всѣ́хъ христіа́нъ прибѣ́жище, пѣ́сньми благоглаго́ливыми похваля́юще, си́це рце́мъ: Пала́то Сло́ва, сподо́би смире́нныя ны́ небе́снаго Ца́рствія, ничто́же бо невозмо́жно хода́тайству Твоему́.

Славосло́віе вели́кое, и отпу́стъ.



НА ЛИТУРГІИ,

Блаже́нна отъ кано́на 1-го пѣ́снь 3-я, на 4 и 2-го кано́на пѣ́снь 6-я, на 4. Проки́менъ, гла́съ 7: Возвесели́тся пра́ведникъ о Го́сподѣ и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Ри́мляномъ, зача́ло 116. Аллилу́ія, гла́съ 4: [Воззва́ша пра́ведніи, и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ. Сти́хъ:] Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Ева́нгеліе отъ Матѳе́я, зача́ло 69. Прича́стенъ: Въ па́мять вѣ́чную бу́детъ пра́ведникъ [отъ слу́ха зла́ не убои́тся].

Источникъ: Минíя дополни́тельная. — СПб.: С.-Петербургская Сѵнодальная Типографія, 1909. — Л. 124-133 об.

/ Къ оглавленію раздѣла /


Наверхъ / Къ титульной страницѣ

0