Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 30-й де́нь.
Святы́хъ апо́столъ Си́лы и Силуа́на и и́же съ ни́ми.

[ВЕЧЕРЪ,
На Го́споди воззва́хъ:] стихи́ры, гла́съ 4. Подо́бенъ: Да́лъ еси́ зна́меніе.

Си́лу и Андрони́ка,* Силуа́на же и Криске́нта* свяще́нно ублажа́емъ* и хвала́ми почти́мъ,* ра́достнымъ дне́сь се́рдцемъ Епене́та чу́днаго,* Госпо́дни ученики́ и проповѣ́дники,* и́миже изба́вихомся и́дольскаго су́етства* и Тро́ическому сія́нію* благоче́стно научи́хомся.

Ва́съ въ ве́сь мíръ Христо́съ посла́,* гное́нія очища́ющихъ зло́бы, апо́столи,* и уя́звленныя я́домъ душетлѣ́ннымъ* обновля́ющихъ ду́ши* и къ соверше́нному здра́вію веду́щихъ.* Тѣ́мже ва́съ почита́емъ,* я́ко благодѣ́тели прехва́льныя,* и прему́дрыя врачи́,* и духо́вныя орга́ны.

Сла́ва, и ны́нѣ, богоро́диченъ:

Ра́дуйся, солнцезра́чная луче́,* Со́лнца незаходи́маго престо́ле,* я́же Со́лнце возсія́вши недоумѣ́нное.* Ра́дуйся, у́ме, облиста́яй Боже́ственными сія́ньми,* заре́ мо́лнійная, освѣти́вшая земли́ концы́,* и́стинное зла́та блиста́ніе,* Вседо́брая и Всенепоро́чная,* Свѣ́тъ Невече́рній вѣ́рнымъ облиста́вши.

Крестобогоро́диченъ:

Умерщвля́ема ви́дящи Христа́,* Пречи́стая Влады́чица,* умерщвля́юща льсти́ваго,* восклица́ше, го́рцѣ взыва́ющи,* изъ утро́бы Тоя́ произше́дшу,* и, долготерпѣ́нію Его́ чудя́щися, взыва́ше:* Ча́до Мое́ Любе́знѣйшее,* не забу́ди рабу́ Твою́,* не закосни́, Человѣколю́бче, Мое́ утѣше́ніе.

Тропа́рь, гла́съ 3:

Апо́столи святíи, моли́те ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.


НА УТРЕНИ,
Кано́нъ, гла́съ 2.

Пѣ́снь 1.

Ирмо́съ: Непроходи́мое волня́щееся мо́ре Бо́жіимъ Свои́мъ велѣ́ніемъ изсуши́вшему и пѣшеше́ствовати сквозе́ е́ изра́ильтескія лю́ди наста́вльшему, Го́сподеви пои́мъ, сла́вно бо просла́вися.

Предстоя́ще престо́лу Боже́ственному всегда́, сія́ніемъ же просвѣща́еми незаходи́мымъ, святíи, просвѣще́ніе духо́вно всѣ́мъ испроси́те отъ Отца́ свѣ́товъ низпосла́ти на́мъ, вѣ́рно ва́съ почита́ющимъ.

Возсія́вшаго пра́вды Со́лнца, сла́вніи, узрѣ́вше отъ Дѣ́вы Богоотрокови́цы, прилѣпи́стеся Ему́, Боже́ственнымъ прича́стіемъ свѣ́тъ бы́вше, и отгна́сте пре́лести мра́къ ве́сь.

Зако́нъ Боже́ственный на язы́цѣ нося́ще, всю́ зе́млю проидо́сте, беззако́ніе ея́ отъе́млюще, му́дріи Криске́нте и Андрони́че, Си́ло и Силуа́не, и всѣва́юще сло́во спаси́тельное.

Похва́лимъ Епене́та сла́внаго, карѳаге́новъ похвалу́ боже́ственну бы́вшу, и Сло́ва ученика́, и исцѣле́ній исто́чника, и вели́ка проповѣ́дника су́щимъ па́че ума́, и вѣ́ры утвержде́ніе.

Богоро́диченъ: Препѣ́таго Бо́га неизрече́нно породила́ еси́, въ пло́ть отъ Тебе́ обле́кшася за бла́гость, Препѣ́тая Чи́стая. Тѣ́мже благода́рными гла́сы пѣсносло́вимъ Тя́ и ублажа́емъ, я́коже дре́вле прорекла́ еси́.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Проповѣ́давше воплоще́ніе Влады́чне и разруши́вше соу́зъ зло́бы, и́же дре́вле свя́занныя невѣ́ріемъ, му́дріи, разрѣши́сте, великопроповѣ́дницы, и къ Бо́гу приведо́сте вѣ́рою.

Свѣти́льницы незаходи́маго свѣтоли́тія бы́вше, тму́ безбо́жія отгна́сте, показу́юще человѣ́комъ позна́нія свѣ́тъ, прехва́льніи, сего́ ра́ди всегда́ блажи́ми есте́.

Во всю́ зе́млю изы́де, я́коже пое́тъ Дави́дъ, апо́стольское боже́ственное вѣща́ніе, уча́щее страсте́мъ Спа́совымъ и воскресе́нію, и́мже воста́хомъ отъ гробо́въ вси́ су́етства.

Богоро́диченъ: Обрѣ́тъ Тя́, а́нгеловъ чистѣ́йшую, вни́де во утро́бу Твою́ святу́ю Свѣ́тъ сы́й непристу́пенъ, Богоро́дице, и яви́ся Человѣ́къ, изъ Тебе́ воплоща́емь, во двою́ естеству́ познава́емь.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственное у́гліе, Утѣ́шителя теплото́ю разжже́ни, прехва́льніи бы́вше апо́столи, безбо́жія мра́къ разори́сте и вѣ́рныя свяще́нно согрѣ́ясте. Тѣ́мже дне́сь па́мять ва́шу чту́ще, про́симъ прія́ти ве́лію ми́лость.

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́во Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́! Ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Крѣ́постію вся́ Сотво́ршаго проше́дше вселе́нную, я́коже крила́тіи, спасо́сте су́щія, въ пучи́нѣ лю́тыхъ, богоно́сніи, бѣ́дствующія, и къ ти́хому приста́нищу наста́висте.

Утвержда́я разсла́бленныя, сла́вне, мы́сли сло́вомъ, Си́ло, съ Па́вломъ проповѣ́дникомъ проше́дъ ты́ ве́сь мíръ, мно́гими напа́стьми облива́емь и вѣ́рнымъ спа́съ явля́яся.

Ве́ліими благода́тьми украша́емь, ше́ствовалъ еси́ отъ восто́ка до за́пада, я́коже заря́, съ Па́вломъ, Си́ло прему́дре, свѣтоза́рная со́лнцу су́щи, язы́ковъ сердца́ просвѣти́сте.

Да восхва́лится Криске́нтъ и Андрони́къ, и съ Си́лою да возвели́чится Силуа́нъ дне́сь, Епене́тъ же да похва́лится, Христо́ва виногра́да су́ще гро́здіе, сла́дость иска́пающе спаси́тельную.

Богоро́диченъ: Чуде́съ преиму́щее бы́сть е́же въ Тебѣ́ бы́вшее чу́до: зако́новъ бо кромѣ́ есте́ственныхъ Законода́вца Христа́ ражда́еши, преступле́ніе первозда́нныхъ рѣша́ща, Всенепоро́чная.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Взя́тся Твои́хъ учени́къ превы́ше небе́съ великолѣ́піе, проповѣ́дающихъ на земли́ Твое́ сла́вное прише́ствіе, и стра́сти, и воскресе́ніе, Сло́ве Бо́жій, Іису́се Преблагíй.

Проза́рнаго и пресвѣ́тлаго сосу́да Утѣ́шителева, заблу́ждшихъ наставле́ніе, Селу́ня пресла́вную похвалу́, апо́столовъ удобре́ніе, ны́нѣ Силуа́на му́драго восхва́лимъ.

Укрѣ́плься тезоимени́тно Сло́ва посо́біемъ, прему́дре Андрони́че, прохо́диши, утвержда́я осла́бленая сердца́ искуше́ньми бори́теля и наставля́я въ Бо́жіе позна́ніе.

Богоро́диченъ: Тя́ Дави́дъ преднаписа́ го́ру усыре́нну, го́ру Бо́га на́шего, го́ру ту́чну: въ Тебѣ́ бо, Отрокови́це, позна́шася Сего́ ше́ствія, пло́тію обнища́вшаго и къ пе́рвому на́съ блаже́нству возве́дшаго.

Пѣ́снь 6.

Ирмо́съ: Ко Го́споду отъ ки́та Іо́на возопи́: Ты́ мя возведи́ изъ глубины́ а́да, молю́ся, да я́ко Изба́вителю, во гла́сѣ хвале́нія, и́стины же ду́хомъ пожру́ Тебѣ́.

Возводи́ми ко Го́споду чи́стыми манове́ніи, прекло́ньшіяся до́лу въ поги́бельныя я́мы, привлеко́сте, му́дріи, къ высотѣ́ небе́снѣй высо́каго видѣ́нія и дѣя́нія.

Еди́ницу у́бо Существо́мъ, Ли́цы же Тро́ицу, богоблаже́нніи, въ концѣ́хъ проповѣ́давше, многобо́жную мглу́ до конца́ разори́сте и свѣти́льницы душа́мъ яви́стеся.

Вжили́въ тво́й Христо́съ по́мыслъ, Криске́нте прему́дре, пома́заніемъ ра́дованія, Халкидо́на первопа́стыря, я́ко сего́ ученика́ благоче́стно показа́, заблужде́ннымъ стезю́ показу́ющаго.

Богоро́диченъ: Красну́ Тя́ добро́тою Творе́цъ обрѣ́тъ, въ Тя́ всели́ся и красе́нъ па́че всѣ́хъ сыно́въ земноро́дныхъ яви́ся, воплоща́емь, Пресвята́я Дѣ́во Всепѣ́тая.

Конда́къ, гла́съ 4. Подо́бенъ: Вознесы́йся.

Ло́зіе яви́стеся Христо́ва виногра́да, гро́здіе принося́ще, му́дріи, въ добродѣ́телехъ, вино́ на́мъ спасе́нія источа́юще, е́же пріе́млюще, весе́лія исполня́емся, пра́зднующе всечестну́ю ва́шу па́мять, въ ню́же моли́теся о оставле́ніи грѣхо́въ на́шихъ, Госпо́дни апо́столи.

Пѣ́снь 7.

Ирмо́съ: Вѣтíи яви́шася о́троцы любомудрѣ́йшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Сосу́ды, вмѣсти́вшія всю́ Утѣ́шителеву благода́ть, и прія́телища пре́лестей бы́вшихъ погуби́вшія, и прія́тны Бо́гу сотвори́вшія, Си́лу и Силуа́на воспое́мъ согла́сно.

Нѣ́сть дово́ленъ кто́ похвали́ти Епене́та чу́днаго, сообрази́ бо ся Христу́, Его́ ра́ди подъе́мь стра́сти, Ца́рствія же причасти́ся Его́, до́брѣ подвиза́вся.

Пѣ́тъ бу́ди, Кри́скъ, пѣ́сньми боже́ственными, сокрове́нныя пути́ Христо́вы показа́вый, и осуди́вый пло́тію свое́ю осужде́нный грѣ́хъ, и мно́ги неосужде́нны показа́вый.

Богоро́диченъ: Разрѣши́ плени́цы прегрѣше́ній мои́хъ хода́тайствомъ Твои́мъ, Чи́стая, и любви́ соверше́ннѣй Блага́го Сы́на Твоего́ привяжи́ удаля́ющася всегда́ отъ Него́ сластьми́ безмѣ́стными.

Пѣ́снь 8.

Ирмо́съ: Велѣ́нію мучи́телеву преподо́бніи тріе́ о́троцы не повину́вшеся, въ пе́щь вве́ржени, Бо́га исповѣ́даху, пою́ще: благослови́те, дѣла́ Госпо́дня, Го́спода.

Не да́ша сна́ очи́ма бо́дріи Сло́ва служи́тели, до́ндеже сна́ тя́жкаго вѣ́рныя ле́сти изба́виша и свѣ́та и дне́ сы́ны показа́ша.

Бы́вше колесни́ца Бо́жія, стяжа́сте Того́, веду́ща къ небе́сному ше́ствію ва́съ, апо́столи сла́вніи, и ору́жія вся́ пре́лести сокруша́юща.

Прему́дрый Си́ла, я́ко Христо́въ служи́тель, досто́йно да похва́лится, и съ ни́мъ да просла́вится вѣ́рно Кри́скъ и Андрони́къ, свѣти́льницы, вся́ язы́ки просвѣти́вшія.

Тро́иченъ: Воспои́мъ Живонача́льную Тро́ицу, Ѵпоста́сьми устро́енную, разумѣва́емую же Естество́мъ Еди́нымъ, и, пою́ще, рце́мъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Яже пре́жде со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.

Вра́чеве ду́шъ же и тѣле́съ бы́сте спаси́тельніи, духо́вными лѣчба́ми очища́ете неду́жныя и здра́віе показу́ете сугу́бо, богосія́нніи апо́столи, тѣ́мже досто́йно блажи́ми есте́.

Яви́стеся, теплото́ю Ду́ха вже́гшеся, я́ко у́гліе, и ле́дъ пре́лести растопи́сте, и сердца́ поме́рзшая вѣ́рою согрѣ́ясте, и къ веснѣ́, прему́дріи, спаси́тельнѣй наста́висте.

Соста́вимъ ли́къ въ дому́ Бо́га на́шего, сла́вяще Силуа́на и Си́лу, и Андрони́ка, и вели́каго Епене́та, и Криске́нта всему́драго, я́ко и́стины проповѣ́дники и моли́твенники на́ша су́щія.

Свя́та и полна́ дарова́ній Боже́ственнаго Ду́ха свяще́нная вои́стинну и достохва́льная ва́ша па́мять, богодѣ́тельными заря́ми осія́ющи благочести́выхъ исполне́ніе, пѣ́ти ва́съ, му́дріи, повелѣва́етъ.

Богоро́диченъ: Пощади́ мя́, хотя́й во сла́вѣ па́ки пріити́ Божества́ суди́ти вселе́ннѣй, Всеси́льне, мольба́ми Неискусобра́чныя, Влады́ко, ро́ждшія Тя́, и да не во о́гнь по́слеши мя́, осужде́на прегрѣше́ньми.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 258 – 261 об.

/ Къ оглавленію раздѣла /


Наверхъ / Къ титульной страницѣ

0