Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 29-й де́нь.
Свята́го му́ченика Каллини́ка.

[ВЕЧЕРЪ,
На Го́споди воззва́хъ:] стихи́ры, гла́съ 8. Подо́бенъ: О, пресла́внаго чудесе́!

Цвѣ́тъ, исцѣле́нія испуща́яй,* и рѣка́, нело́жныхъ дарова́ній испо́лнена,* врачева́ніе безме́здно,* ковче́гъ свяще́нія* твои́хъ моще́й ра́ка яви́ся,* изъ нея́же почерпа́емъ здра́віе присноживо́тно,* приходя́щіи вѣ́рно, му́чениче сла́вне,* Тебѣ́ ра́ди вои́стинну,* чу́днаго Бо́га сла́вимъ.

Му́чениче преблаже́нне Каллини́че,* на неви́димыхъ враго́въ* неви́димаго Бо́га* по́мощь непобѣди́му имѣ́я,* возста́вилъ еси́ безсме́ртія побѣ́ды:* на и́же погуби́ти зе́млю и мо́ре хва́лящагося,* боре́ніемъ страда́ній твои́хъ низло́жь,* крове́й твои́хъ* потопи́лъ еси́ тече́ніемъ.

Сла́ва, гла́съ то́йже:

Благоче́стія побо́рника, и губи́теля вра́жія, и му́чениковъ собесѣ́дника, и хра́мъ Ду́ха Свята́го бы́вшаго, во́ина Царя́ Христа́, исцѣле́ній неиждава́емое вои́стинну сокро́вище, вѣ́рныхъ утвержде́ніе, чу́днаго дне́сь Каллини́ка пѣ́сньми почти́мъ.

И ны́нѣ, богоро́диченъ, гла́съ и подо́бенъ то́йже:

Пло́ть отъ крове́й Твои́хъ пріе́мъ,* Первовѣ́чный Бо́гъ* Тя́ Предста́тельницу показа́* человѣ́комъ, Чи́стая.* Тѣ́мже изба́ви рабы́ Твоя́* отъ вся́кія бѣды́ и обстоя́нія* и сѣ́тей лука́ваго врага́* и сія́нія причасти́тися сподо́би избра́нныхъ,* вся́ сла́вящія и покланя́ющіяся Тебѣ́.

Крестобогоро́диченъ, гла́съ и подо́бенъ то́йже:

Что́ зри́мое видѣ́ніе,* е́же Мои́ма очи́ма ви́дится, о Влады́ко?* Содержа́й всю́ тва́рь, на дре́во воздви́женъ бы́въ,* и умира́еши, всѣ́мъ дая́й жи́знь, —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.

Тропа́рь, гла́съ 4:

Му́ченикъ Тво́й, Го́споди, Каллини́къ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.


[НА УТРЕНИ,] Кано́нъ, гла́съ 4.

Пѣ́снь 1.

Ирмо́съ: Колесни́цы фарао́новы и си́лу его́ вве́рже въ мо́ре Крѣ́пкій во бра́нехъ; воспое́мъ пѣ́снь но́вую, я́ко просла́вися.

На колесни́цу мы́сленную всѣ́дъ, я́ко вои́стинну триста́ты потопи́лъ еси́ мы́сленнаго Еги́пта во струя́хъ кро́ви твоея́, му́чениковъ похвало́ Каллини́че.

Боже́ственною оде́ждею одѣ́явся, му́дре, оде́жды земны́я совле́клся еси́, преблаже́нне, и къ по́двигу поте́клъ еси́, и врага́ посрами́лъ еси́.

Разори́въ вра́жія многоплете́нныя ко́зни у́зами страда́ній твои́хъ, недѣ́йственна сего́ пове́рглъ еси́ на зе́млю, Каллини́че, и нога́ми твои́ми попра́лъ еси́.

Богоро́диченъ: Еже проро́ческій прови́дѣ ли́къ, я́ко две́рь небе́сную и неопали́мую купину́, Тя́, Дѣ́во Ма́ти Чи́стая, Бо́га ро́ждшую, позна́хомъ.

Пѣ́снь 3.

Ирмо́съ: Утвержда́яй гро́мъ и созида́яй ду́хъ, утверди́ мене́, Го́споди, да Тя́ пою́ и́стинно и творю́ во́лю Твою́: я́ко нѣ́сть свя́тъ, я́ко Ты́, Бо́же на́шъ.

Христо́вою любо́вію уязвля́емь, му́ченикъ взыва́ше, въ по́двизѣхъ претерпѣва́я: во благово́ніе теку́ мѵ́ра, послѣ́дуя стра́сти Твое́й страда́ніемъ кро́ве.

Безъ навѣ́та соблю́лся еси́ отъ стрѣ́лъ зміи́ныхъ: твою́ бо пя́ту мудре́цъ въ ра́нахъ прете́ръ, главу́ свою́ сокруши́, Каллини́че, во страда́ніихъ твои́хъ.

Посѣ́къ пре́лести те́рніе мече́мъ духо́внымъ, Христо́вы вѣ́ры неле́стно пло́дъ прине́слъ еси́, всеблаже́нне, стори́чный болѣ́зней твои́хъ Влады́цѣ твоему́.

Богоро́диченъ: Несказа́нна Рождества́ рожде́нія Ты́ еди́на Ма́ти была́ еси́, во утро́бѣ Твое́й заче́нши Иже пре́жде Тебе́ Бо́га Сло́ва, и млеко́мъ пита́ла еси́, Пречи́стая, я́ко Младе́нца, Безнача́льнаго.

Сѣда́ленъ, гла́съ 3. Подо́бенъ: Боже́ственныя вѣ́ры.

Ре́вность боже́ственную въ души́ твое́й имѣ́я, сла́вне, беззако́ннующія всу́е терпѣли́вно обличи́лъ еси́ и, прибли́жився му́камъ, проше́лъ еси́ тво́й по́двигъ до́блимъ умо́мъ, му́чениче Каллини́че. Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственнаго естества́ не отлу́чся, пло́ть бы́въ во чре́вѣ Твое́мъ, но Бо́гъ вочеловѣ́чся и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чну, еди́нъ Госпо́дь, Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, Нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Услы́шахъ, Бо́же, слу́хъ Тво́й и убоя́хся, разумѣ́хъ дѣла́ Твоя́ и ужасо́хся, Го́споди, я́ко Твоего́ хвале́нія испо́лнь земля́.

Омыва́яся въ струя́хъ твои́хъ крове́й, преблаже́нне, яви́лся еси́ чистѣ́йшій ду́хомъ и въ наслажде́ніе дости́глъ еси́ безпло́тныхъ, му́чениче Каллини́че.

Ка́мень че́стенъ вои́стинну назда́лся еси́ Це́ркви, и хра́мы и́дольскія стря́слъ еси́, и на зе́млю низложи́лъ еси́ неукло́ннымъ сопротивле́ніемъ страда́ній твои́хъ.

Смертоно́сная враго́въ ласка́нія вои́стинну отри́нулъ еси́, му́чениче, словесы́ духо́вными и, душе́ю укрѣпля́емь, на пре́лесть поста́вилъ еси́ побѣ́ду.

Богоро́диченъ: Ны́нѣ Тя́ купину́, ю́же въ Сина́и, пропису́я, Моисе́й вели́кій неопа́льну ви́дяше, Огнь во утро́бѣ нося́щу, Чи́стая.

Пѣ́снь 5.

Ирмо́съ: Возсія́й ми́, Го́споди, свѣ́тъ повелѣ́ній Твои́хъ, я́ко къ Тебѣ́ ду́хъ мо́й у́тренюетъ и пое́тъ Тя́: Ты́ бо еси́ Бо́гъ на́шъ, и къ Тебѣ́ прибѣга́ю, Царю́ ми́ра.

Въ ти́ну попо́лзся непостоя́нную, Го́споди, и во глубину́ грѣхо́въ мои́хъ, и въ бу́рю лю́тыхъ мои́хъ дѣя́ній впа́дъ, зову́ Ти: Ты́ бу́ди ми́ Помо́щникъ.

Стопа́ми пригвожде́нъ но́гъ, му́чениче, пѣ́лъ еси́: въ пути́ свидѣ́ній Твои́хъ бога́тно наслади́хся, Влады́ко, терпя́ ра́ны, Страстополо́жниче, наде́ждею воздая́ній.

Ми́лостію ты́ еле́я, до́брѣ ку́плю содѣ́лавъ муче́нія, свѣщу́ твою́ уясни́лъ еси́, преблаже́нне, тѣ́мже ве́сь бы́лъ еси́ же́ртва непоро́чная, всесожже́ніе прія́тно.

Богоро́диченъ: Проро́ковъ проповѣ́даніе, и апо́столовъ похвало́, и му́чениковъ удобре́ніе, Ты́ еси́, Богоро́дице, Боже́ственное Сло́во нося́щи па́че сло́ва, Пречи́стая, е́же пре́жде вѣ́къ изъ Отца́.

Пѣ́снь 6.

Ирмо́съ: Бу́рею грѣхо́вною погружа́емь, я́ко во чре́вѣ ки́товѣ содержи́мь, съ проро́комъ зову́ Ти: возведи́ отъ тли́ живо́тъ мо́й, Го́споди, и спаси́ мя.

Ста́да твоего́ огра́да невре́дна отъ звѣре́й соблюде́ся ересе́й: твои́хъ бо страда́ній держа́щи, сла́вне, тве́рду па́лицу, волко́въ яви́ся отгони́тельница.

Но́щь отбѣже́ пре́лести страда́ніемъ твои́мъ, и вѣ́ры добро́та возсія́, во исповѣ́даніи твое́мъ, пресла́вне, Тро́ицы побо́рниче, я́ко со́лнце, въ концѣ́хъ.

Яко вѣ́ры проповѣ́дникъ извѣ́стенъ, беззако́ннующему вопія́ше гото́во: что́ прети́ши иму́щему не умягче́ну душе́вную тве́рдость? стрѣ́лы бо безбо́жныхъ легки́.

Богоро́диченъ: Пребыва́еши по рождествѣ́, Неискусобра́чная, я́ко пре́жде рождества́, Дѣ́ва и Нетлѣ́нная, и́бо е́же въ Тебѣ́ та́инство, Богоневѣ́сто, па́че ума́ вся́каго и всего́ сло́ва познава́ется.

Конда́къ, гла́съ 2. Подо́бенъ: Вы́шнихъ ища́.

Го́рняя кра́сная досто́йно ны́нѣ наслѣ́довалъ еси́: Христо́вою бо зѣло́ любо́вію разже́гся, на о́гнь, Каллини́че, тѣ́мъ му́жественно дерзну́лъ еси́, Ему́же и ны́нѣ предстоя́, не преста́й моля́ о всѣ́хъ на́съ.

Пѣ́снь 7.

Ирмо́съ: Огнь, паля́ въ пещи́, истряса́шеся, о́троцы ороша́хуся и, пою́ще, глаго́лаху: благослове́нъ еси́, еди́нъ сы́й Бо́же оте́цъ на́шихъ.

Сла́сти мнѣ́ хода́тайственна му́камъ, су́ть страши́лища: ни бо о́гнь, ни ра́ны и́стиннаго Рачи́теля моего́, — му́ченикъ вопія́ше, — разлуча́тъ мя́.

Вжиля́емь, сла́вне, посо́біемъ Христо́вымъ, на зе́млю сопротивоборца́, побори́въ, низве́рглъ еси́ и тезоимени́тъ яви́лся еси́ на мучи́теля добропобѣ́дникъ.

Діа́вола посрами́лъ еси́, и а́нгелы возвесели́лъ еси́ страда́ніи твои́ми, сла́вне, и Христу́ взыва́лъ еси́: благослове́нъ еси́, еди́нъ сы́й Бо́же оте́цъ на́шихъ.

Богоро́диченъ: Разрѣши́ла еси́ рождество́мъ Твои́мъ, Дѣ́во Пречи́стая, Евы прама́тере кля́тву: Ма́ти бо еси́ всѣ́хъ Влады́ки, Яже всѣ́мъ ра́дость исхода́таивши.

Пѣ́снь 8.

Ирмо́съ: Вся́ческая, Влады́ко, прему́дростію Твое́ю соста́вилъ еси́, земли́ же па́ки утверди́лъ еси́, я́коже вѣ́си, дно́, основа́ніемъ водрузи́вый на вода́хъ безмѣ́рныхъ. Тѣ́мъ вси́ вопіе́мъ, воспѣва́юще: благослови́те, дѣла́ Госпо́дня, непреста́нно Го́спода.

Ра́дуйся, наслажде́ніе страда́льцевъ и́стинныхъ; ра́дуйся, удобре́ніе вѣ́ры и украше́ніе; ра́дуйся, пресвѣ́тлый му́чениковъ свѣтоно́сецъ, и́же ле́сть разори́въ страда́ніемъ твои́мъ и свѣ́тъ просія́вый мíрови, Каллини́че прему́дре.

Мучи́тель посрами́ся по́двиги твоего́ противле́нія, побѣжде́ни бы́ша злодѣ́и ра́нами твои́ми, блаже́нне. Гвоздьми́ пя́ты твоя́ уязви́шася, пре́лесть же попали́ся вся́, и потреби́шася и́дольстіи хра́ми, богому́дре, огне́мъ страда́нія твоего́.

О чту́щихъ тя́ къ Бо́гу твои́мъ дерзнове́ніемъ, Каллини́че, прекло́нься, моли́ непреста́нно, ста́ду твоему́ предста́ни, изыма́я сіе́ отъ разли́чныхъ сѣ́тей льсти́ваго, и утверди́ вѣ́рою: тобо́ю бо расте́тъ и крѣпи́тся.

Богоро́диченъ: Ду́хомъ проро́цы Тя́, Дѣ́ву, прообрази́ша: сѣ́нь же, и трапе́зу, и ру́чку, и свѣ́щникъ, и го́ру пресвяту́ю, и о́блакъ, и скрижа́ли, ковче́гъ же, и же́злъ, и две́рь Боже́ственну, е́юже всѣ́мъ человѣ́комъ отве́рзеся дре́вній ра́й.

Пѣ́снь 9.

Ирмо́съ: Безсѣ́менное Рождество́ Твое́, Богоро́дице Чи́стая, Христа́ Бо́га на́шего, пѣ́сньми немо́лчными велича́емъ.

Истка́ся тебѣ́ свы́ше ри́за вѣ́ры, е́юже обнажи́лъ еси́ врага́ на суди́щи, му́чениче сла́вне.

Непщева́ше мучи́тель прельсти́ти ласка́ньми му́ченика, но то́й въ вѣ́рѣ утвержда́шеся.

Чи́сто всесожже́ніе и прія́тна же́ртва, Каллини́че сла́вне, огне́мъ по́двиговъ прине́слся еси́ Бо́гу.

Красны́ но́ги твои́, страда́льче Каллини́че, гвоздьми́ пригвожде́ны и къ проповѣ́данію боже́ственному иду́щи.

Богоро́диченъ: Покро́въ Тя́ стяжа́хомъ, и приста́нище, Чи́стая, и ору́жіе, и забра́ло, и тве́рду наде́жду въ бѣда́хъ при́сно.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 255 – 258.

/ Къ оглавленію раздѣла /


Наверхъ / Къ титульной страницѣ

0