Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 28-й де́нь.
Святы́хъ апо́столъ и діа́коновъ Про́хора, Никано́ра, Ти́мона и Парме́на.

[ВЕЧЕРЪ,
На Го́споди воззва́хъ:] стихи́ры апо́столовъ, гла́съ 1. Подо́бенъ: Небе́сныхъ чино́въ.

Свѣ́тлы, я́ко свѣщи́, Ду́ха благода́тію,* показа́вшеся мíру,* ра́зума сія́ніе облиста́сте бога́тно,* и мглу́ зло́бы уста́висте,* и, преста́вьшеся, апо́столи,* къ Свѣ́ту всели́стеся незаходи́мому.

Да восхва́лится Никано́ръ свяще́ннѣйшій,* и Парме́на, и Ти́монъ,* и съ ни́ми да почти́тся Про́хоръ боже́ственный,* испо́лнителіе Сло́ва повелѣ́ній,* и богати́теліе неиму́щихъ,* и моли́твенницы къ Бо́гу на́шему теплѣ́йшіи.

Сла́ва, и ны́нѣ, богоро́диченъ:

Нра́вомъ гнилы́мъ попо́лзся, ни́цъ лежу́* и къ Твое́й, Дѣ́во, притека́ю тишинѣ́:* отъ бу́ри сопроти́вныя* и искуше́ній многообра́зныхъ мя́ изба́ви,* да пою́ Твою́ благода́ть непреста́нно,* Богоро́дице, Ма́ти Приснодѣ́во.

Крестобогоро́диченъ:

Воздви́жена я́ко ви́дѣ на Крестѣ́ Агнца* Непоро́чная Дѣ́ва, пла́чущи, вопія́ше:* сла́дкое Мое́ Ча́до,* что́ но́вое и пресла́вное видѣ́ніе?* Ка́ко, содержа́й вся́ческая го́рстію,* на дре́вѣ пригвожда́ешися пло́тію?

Тропа́рь, гла́съ 3:

Апо́столи святíи, моли́те Ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.


[НА УТРЕНИ,]
Кано́нъ, его́же краегране́сіе: Пою́ зари́ мы́сленнаго Со́лнца. Іо́сифово, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Прича́стіемъ къ Боже́ственному, прему́дріи, свѣ́ту бы́вше, ва́шъ свѣтоно́сный и свѣ́тлый пра́здникъ пра́зднующія страсте́й мглы́ изба́вите и просвѣще́нія сподо́бите.

Привлеко́стеся сла́дкимъ жела́ніемъ Христо́вымъ, блаже́нніи, и, кра́сная житія́ тлѣ́ннаго благоче́стно презрѣ́вше, Тому́ послѣ́довасте, научи́вшеся и́стиннымъ.

Свѣти́льницы восто́ка я́вльшеся свѣтода́тельнаго, свѣтонаста́вницы бы́ша ду́шъ, Парме́на же, и Про́хоръ, и Ти́монъ чу́дный, и Никано́ръ превели́кій.

Богоро́диченъ: Ше́ствія Бо́жія, Всенепоро́чная, въ Тебѣ́ позна́шася, бы́вша стра́ннымъ рождество́мъ, несказа́ннымъ соедине́ніемъ. Тѣ́мже я́ко всѣ́хъ Влады́чицу тва́рей Тя́ прославля́емъ.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Яко су́ще духо́вніи о́блацы, во́ду и́стиннаго ра́зума су́щимъ на земли́, сла́вніи, во освяще́ніе иска́пасте.

Ду́ха избра́ніемъ, я́ко испо́лнени Того́ благода́ти, служи́ти прему́дріи, потре́бамъ святы́хъ учине́ни бы́сте.

Восхва́лимъ Парме́на сла́внаго, и му́драго Ти́мона, и честна́го Про́хора, и высо́кого умо́мъ Никано́ра.

Богоро́диченъ: Иска́пающаго сла́дость, избавле́ніе злы́хъ, родила́ еси́ Блага́го Го́спода, Чи́стая Дѣ́во Всенепоро́чная.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственныя трубы́ и́стины, сосу́ди честнíи благоче́стія, наста́вницы блудя́щихъ спасе́нніи я́вльшеся, Госпо́дни апо́столи, ра́дуйтеся и моли́те Христа́ Бо́га, прося́ще дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственнаго естества́ не отлу́чься, пло́ть бы́въ во чре́вѣ Твое́мъ, но Бо́гъ вочеловѣ́чься и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чну, еди́нъ Госпо́дь: Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́! Ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Возсія́вше на высотѣ́ церко́внѣй, я́коже звѣ́зды незаходи́мы, злоче́стія омраче́ніе разори́ша и мíръ просвѣти́ша Благодѣ́теля апо́столи.

Служа́й по благода́ти Ева́нгелію, Никомидíи бы́лъ еси́, Про́хоре преблаже́нне, изря́денъ учи́тель и боже́ственный первопресто́льникъ, ста́ду Христо́ву предста́тельствуя.

Че́сть боже́ственну наслѣ́довалъ еси́, Никано́ре блаже́нне, заколе́нъ бы́въ, я́ко овча́, со двѣма́ ты́сящами, на Христа́ упова́ющими, въ о́ньже сконча́ся де́нь Стефа́нъ первострада́лецъ.

Богоро́диченъ: Неискусобра́чно родила́ еси́ Бо́га Сло́ва, вопло́щшася, Пречи́стая, па́че ума́ и сло́ва, тѣ́мже по до́лгу Тя́, Дѣ́во, сла́вимъ и досто́йно ублажа́емъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ты́, Го́споди, Твоя́ ученики́, я́коже тру́бы, посла́лъ еси́, возставля́ющія отъ гробо́въ пре́лести ду́ши пѣсносло́вящія Тя́.

Ти́монъ свяще́нный, па́стырь во́стряномъ бы́въ, прія́тъ муче́нія блаже́нную кончи́ну, огне́мъ сожига́емь.

Вели́кій Парме́на предъ очи́ма апо́столовъ у́спе, соверши́въ со тща́ніемъ те́плымъ боже́ственное служе́ніе.

Богоро́диченъ: Пое́мъ Тя́, Еюже тли́ изба́вихомся, Всенепоро́чная, и а́да, и пе́рвыя муча́щія зло́бы льсти́ваго.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Никано́ръ, жи́знь возвѣща́я бу́дущую, и кре́стъ, и стра́сти за милосе́рдіе пло́тію Пострада́вшаго, умерщвля́ется, іуде́йскими рука́ми убива́емь.

Вели́кій вжига́емь Ти́монъ жела́ніемъ Госпо́дни любве́, повелѣ́ньми беззако́нникъ посредѣ́ огня́ скончава́ется, всесожже́ніе боже́ственно бы́въ.

Боже́ственная, и свѣтоно́сная, и благода́ти испо́лнена ва́ша, апо́столи, па́мять освяща́етъ всѣ́хъ мы́сли, вѣ́рою творя́щихъ сію́, блаже́нніи.

Богоро́диченъ: Чи́ни Тя́ безпло́тныхъ а́нгелъ почита́ютъ, и апо́стольстіи ли́цы, и му́ченикъ собо́ри, Богороди́тельнице, и́бо всѣ́хъ Царя́ несказа́нно родила́ еси́.

Конда́къ, гла́съ 1. Подо́бенъ: Утро́бу Дѣви́чу.

Діа́кони честнíи, и самови́дцы Сло́ва, и сосу́ди избра́нніи яви́стеся вѣ́ры, Никано́ръ, Про́хоръ, Парме́на и Ти́монъ, сла́вніи, тѣ́мже дне́сь свяще́нную па́мять ва́шу пра́зднуемъ, въ весе́ліи се́рдца ва́съ ублажа́юще.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Все́ю мы́слію Христа́ возлюби́вше, еди́наго въ добро́тѣ су́щаго, я́ко вои́стинну, пресла́вніи, лу́чшій жре́бій прія́сте — Ца́рствіе небе́сное.

Отъ Сло́ва, изъ Дѣ́вы возсія́вшаго на́мъ, сло́вомъ почте́ни бы́вше, дѣ́лы же свяще́нными вѣ́рныхъ спаси́тели яви́стеся, си́хъ претворя́юще безслове́сіе, богоблаже́нніи.

Пострада́лъ еси́ стра́нно, блаже́нне Никано́ре, посѣка́емь нра́вомъ злочести́выхъ евре́евъ и Христу́ я́ко а́гня, приводи́мь, — благослове́нъ еси́ въ хра́мѣ, — вопія́, — сла́вы Твоея́, Го́споди.

Богоро́диченъ: Сло́вомъ Сло́во Отчее, Отрокови́це, родила́ еси́, сло́вомъ не́бо сотво́ршаго и зе́млю, и сла́виши Сего́, Пречи́стая, сло́во подаю́щаго, чи́сто въ Него́ ны́нѣ вѣ́рующимъ.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Отъ ка́ла страсте́й изба́висте и су́етства повину́ющіяся ва́шимъ уче́ніемъ, прему́дріи, и къ высотѣ́ си́хъ ра́зума возведо́сте, Бо́гу угоди́вшія до́брѣ и вопію́щія: благослови́те, вся́ дѣла́ Госпо́дня, Го́спода.

Боже́ственный да почти́тся Парме́нъ боже́ственными пѣ́сньми вку́пѣ съ Ти́мономъ, и всехва́льный Про́хоръ, и Никано́ръ чу́дный, я́ко ученицы́ Іису́совы и богати́теліе язы́ковъ, вопію́щихъ: благослови́те, вся́ дѣла́ Госпо́дня, Го́спода.

Ва́съ съ Петро́мъ и про́чихъ лу́чшихъ Госпо́дь ученики́ прія́тъ: причте́ни у́бо, сла́вніи, къ нарече́ннымъ седми́десятимъ, избра́нныхъ же до́брѣ, я́ко испо́лнени су́ще вѣ́ры, святы́мъ служи́ти потре́бамъ, прехва́льніи.

Богоро́диченъ: Се́ богоглаго́ливыхъ гла́сы коне́цъ прія́ша, поро́ждши Тебе́, Пресу́щнаго Го́спода, отъ о́ныхъ явля́емаго, во спасе́ніе вѣ́рнымъ, Богора́дованная, вопію́щимъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Яви́стеся сосу́ди Сло́ва, всю́ вмѣсти́вше зарю́, лу́чшіи честны́хъ служи́телей, святы́хъ потре́бамъ послужи́вше и со Сло́вомъ, прему́дріи, сла́вы неизрече́нныя наслажда́ющеся.

Дне́сь вся́ тва́рь ва́шу па́мять пра́зднуетъ, Ти́моне, Парме́не и Никано́ре съ Про́хоромъ богопроповѣ́дникомъ, досто́йно ублажа́юще ва́съ, богови́дцы и преблаже́нніи.

Взя́стеся къ вели́цѣй сла́вѣ, я́ко ученицы́ Бо́жія Сло́ва, и со апо́стольскими ли́ки и безпло́тныхъ ны́нѣ ра́дуетеся. Съ ни́ми при́сно моли́те поми́ловатися на́мъ, сла́вніи.

Богоро́диченъ: Гла́съ Тебѣ́ вопіе́мъ, Дѣ́во, ра́достно арха́нгеловъ: ра́дуйся, ра́досте а́нгеловъ, апо́столовъ честносло́віе, и проро́ковъ проповѣ́даніе, и му́чениковъ вѣнча́ніе.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 246 – 249.

/ Къ оглавленію раздѣла /


Наверхъ / Къ титульной страницѣ

0