Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 28-й де́нь.
Слу́жба Богома́тери въ че́сть ико́ны Ея́ Зогра́фскія-Предвозвѣсти́тельницы, въ па́мять избавле́нія монастыря́ Зогра́фъ отъ пожа́ра.

НА МАЛѢЙ ВЕЧЕРНИ,
[На Го́споди воззва́хъ:] стихи́ры [на 4], гла́съ 8. Подо́бенъ: Что́ ва́съ нарече́мъ.

Ка́ко Тя́, Влады́чице, рабы́ Твои́ по достоя́нію восхва́лимъ? Яко о́бразомъ Твои́мъ честны́мъ оби́тель сію́ отъ всепояда́ющаго пла́мене иногда́ спасла́ еси́ и на благодаре́ніе насе́льники тоя́ подви́гла еси́.

Ко́е Ти́ хвале́бное пѣ́ніе на́ше принесе́тъ неможе́ніе, о Влады́чице? Яко не по грѣхо́мъ на́шимъ воздае́ши на́мъ, но по вели́цѣй ми́лости Твое́й спаса́еши ны́ во вре́мя безпомо́щія на́шего и отъ внеза́пныхъ бѣ́дъ моли́твами Твои́ми избавля́еши.

Восхва́лимъ, бра́тіе, Засту́пницу на́шу, и къ чудотво́рному Ея́ о́бразу припаде́мъ уми́льно зову́ще: Влады́чице мíра, въ ми́рѣ и единомы́сліи соблюди́ на́съ, и отъ всѣ́хъ бѣ́дъ предста́тельствомъ Твои́мъ изба́ви, да зове́мъ Ти́: ра́дуйся, Дѣ́во, христіа́нъ похвало́ и и́ночествующихъ при́сное весе́ліе и ра́дованіе.

Сла́ва, и ны́нѣ, гла́съ 8:

Мно́гими содержи́ми напа́стьми, къ Тебѣ́ прибѣга́емъ, о Влады́чице! Ми́лостива на́мъ бу́ди, и не попусти́ на́съ впа́сти во искуше́нія тя́жкая и лю́тая, да не паде́мъ подъ бре́менемъ и́хъ, но держа́вною Твое́ю руко́ю изба́ви на́съ отъ всѣ́хъ зо́лъ, па́че же отъ огня́ вре́меннаго и вѣ́чнаго, да Тя́ непреста́нно велича́емъ и ублажа́емъ.

На стихо́внѣ стихи́ры, гла́съ 6. Подо́бенъ: Тридне́венъ.

Досто́йную похвалу́ Влады́чицѣ на́шей принося́ще, возопіе́мъ Ей ра́достно: ра́дуйся, Пречи́стая Дѣ́во, ра́дости вѣ́чныя на́мъ хода́таице.

Сти́хъ: Воскресни́, Го́споди, въ поко́й Тво́й, Ты́ и киво́тъ святы́ни Твоея́.

Ми́рну жи́знь на́шу, Влады́чице, соблюди́, и отъ бѣ́дъ ны́ изба́ви, да Тя́ вси́ по до́лгу велича́емъ и ублажа́емъ.

Сти́хъ: Кля́тся Госпо́дь Дави́ду и́стиною, и не отве́ржется ея́.

Ми́лости превели́кія сокро́вище — Ты́ еси́, Влады́чице Богоро́дице. Тѣ́мже оби́тель на́шу отъ о́гненнаго сожже́нія ми́лостивно спаса́еши, и въ бѣды́ и напа́сти впа́сти на́мъ не попуща́еши.

Сла́ва, и ны́нѣ, гла́съ то́йже:

Грѣси́ на́ши пра́ведный гнѣ́въ Бо́жій на ны́ подвиза́ютъ, но Ты́, Пречи́стая, предста́вши, ми́лостива Того́ сотвори́ на́мъ, да Тя́ непреста́нно велича́емъ и ублажа́емъ.

Тропа́рь, гла́съ 2:

Яко до́ждь на руно́, Сло́во Бо́жіе въ пречи́стую утро́бу Твою́ сни́де, и Ма́терь Тя́ Своего́ неизрече́ннаго воплоще́нія показа́, тѣ́мже и о́бразу Твоему́ свято́му подаде́ благода́ть чудодѣ́йствій. Сего́ ра́ди вопіе́мъ Ти́: избавля́й на́съ, Влады́чице, отъ всѣ́хъ бѣ́дъ, и спаси́ ду́ши на́ша, я́ко Милосе́рда.


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 2. Подо́бенъ: Егда́ отъ дре́ва.

Дне́сь де́нь ра́достенъ возсія́ на́мъ, пресвѣ́тлый пра́здникъ ико́ны Влады́чицы на́шея Богоро́дицы, въ па́мять избавле́нія Ею оби́тели сея́ отъ внеза́пнаго сожже́нія о́гненнаго, я́же воспомина́юще, благода́рно Ей вопіе́мъ: ра́дуйся, Влады́чице, Помо́щнице на́ша и Изба́вительнице, отъ бѣ́дъ и напа́стей на́съ спаса́ющая. [Два́жды.]

Дне́сь Влады́чица чудотво́рнымъ Свои́мъ о́бразомъ на́съ благода́тно утѣша́етъ, о́блакъ печа́лей на́шихъ разгоня́етъ, и вся́ блага́я и поле́зная на́мъ да́руетъ, я́ко Ма́ти су́щи блага́го Влады́ки, сего́ ра́ди благода́рно Ей возопіе́мъ: ра́дуйся, Влады́чице, мíра засту́пнице и на́мъ, грѣ́шнымъ, спасе́ніе и отъ всѣ́хъ зо́лъ избавле́ніе.

Те́рнія грѣхо́въ на́шихъ пла́мень мще́нія Бо́жія возжига́ютъ, и ка́ру Его́ на главы́ на́ша призыва́ютъ, но росо́ю моли́твъ Твои́хъ, Влады́чице, се́й угаса́еши, и гнѣ́въ Бо́жій на ми́лость къ на́мъ прелага́еши, дая́ на́мъ вре́мя покая́нія, сего́ ра́ди хвале́бно Ти́ вопіе́мъ: ра́дуйся, Наде́ждо на́ша и Засту́пнице.

Ины стихи́ры, гла́съ 8. Подо́бенъ: О, пресла́внаго чудесе́!

О, пресла́вное чу́до яви́ла еси́, Влады́чице! Егда́ ико́ну Твою́ Предвозвѣсти́тельницу въ пла́мени невреди́му соблюла́ еси́, и преподобностра́дальцы на́ша на по́двигъ благоче́стія укрѣпи́ла еси́. И ны́нѣ, Госпоже́, не преста́й моли́ти Сы́на Твоего́ о на́съ, недосто́йныхъ рабѣ́хъ Твои́хъ, да проба́витъ на́мъ ми́лость Свою́ и спасе́тъ ду́ши на́ша, я́ко Милосе́рдъ. [Два́жды.]

О, пресла́внаго чудесе́! Якоже бо Моисе́ю въ Сина́и купина́ яви́ся иногда́ огне́мъ, си́це и Всенепоро́чныя Богороди́тельницы о́бразъ огне́мъ одѣва́ется, но неопали́мъ пребыва́етъ, просвѣща́я и на́съ, су́щихъ во мра́цѣ, и невреди́мы сохраня́я въ пещи́ искуше́ній и бѣ́дъ.

Извѣ́стная вѣ́рныхъ Помо́щнице и всѣ́хъ благи́хъ оби́тели на́шей Пода́тельнице, пріими́ на́съ, вѣ́рно припа́дающихъ честно́му о́бразу Твоему́, и любо́вію вопію́щихъ Ти́: поми́луй на́съ, Госпоже́ Пресвята́я, поми́луй на́мъ, я́коже дне́сь, та́ко и во о́ный вѣ́къ, бу́ди на́мъ Помо́щница и Засту́пница, да Тя́ непреста́нно въ пѣ́снѣхъ велича́емъ.

Сла́ва, и ны́нѣ, гла́съ 8:

Ино́го прибѣ́жища и по́мощи не и́мамы, ра́звѣ Тебе́, Влады́чице, Ты́ бо ико́ною Твое́ю свято́ю оби́тель сію́, въ не́йже жи́тельствуемъ, отъ внеза́пнаго возгорѣ́нія невреди́му спасла́ еси́, и росо́ю моли́твъ Твои́хъ умно́женный уже́ пла́мень угаси́ла еси́, тѣ́мже мы́, раби́ Твои́, благода́рно вопіе́мъ Ти́: сла́ва Тебѣ́, Госпоже́ Пречи́стая, за вся́ вели́кая и неизрече́нная на́мъ и всему́ ро́ду христіа́нскому благодѣя́нія.

Вхо́дъ. Проки́менъ дне́ и чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 8:

Якоже дре́вле преобразова́вшая Тя́ купина́, огне́мъ объя́та бы́вши, не сгара́ше, си́це и свята́я ико́на Твоя́ Предвозвѣсти́тельница, со святы́ми страстоте́рпцы Зогра́фскими, въ пла́мени бы́вше, не сгорѣ́, но цѣла́ обрѣ́теся, и до ны́нѣ неврежде́нна пребыва́етъ, и благода́тію Твое́ю, Пречи́стая, си́лу о́гненную угаша́етъ и неоску́дныя благодѣя́нія источа́етъ, съ вѣ́рою предъ не́ю Тебѣ́, Богома́ти, покланя́ющимся и усе́рдно моля́щимся.

Гла́съ [7]:

Гора́ еси́ вели́кая и пресла́вная, па́че горы́ Сина́йскія, Богоро́дице: она́ бо не терпя́щи сни́тія сла́вы Бо́жія во о́бразѣхъ и сѣ́нехъ, огне́мъ возгара́шеся, и гро́ми и мо́лніи та́мо бы́ша. Ты́ же, ве́сь Боже́ственный Огнь су́щь, Бо́жіе Сло́во во чре́вѣ Твое́мъ неопа́льно носи́ла еси́, и отъ сосе́цъ Твои́хъ млеко́мъ пита́ла еси́, ма́ніемъ Нося́щаго вся́. И [ны́нѣ], ма́тернее дерзнове́ніе къ Нему́ иму́щи, помози́, Влады́чице, вѣ́рно почита́ющимъ Тво́й честны́й о́бразъ, и не забу́ди, ми́лостивно посѣща́ющи: прія́ла бо еси́ отъ Бо́га да́ръ стро́ити и покрыва́ти христоимени́тое ста́до, рабы́ Твоя́.

[Гла́съ 4:]

Яко порфи́рою ца́рскою и ви́ссомъ, ико́ною Твое́ю и Твоего́ Сы́на, Богоро́дице, Це́рковь Бо́жія просвѣти́вшися, красу́ется чудесы́. Дне́сь явле́ніемъ вся́ созыва́етъ пра́здновати, па́че сія́нія со́лнечнаго благода́тію Свята́го Ду́ха блиста́ющися, на боля́щихъ и неду́жныхъ исцѣле́нія исто́чники источа́ющи и всѣ́мъ да́рующи бога́тую ми́лость.

Сла́ва, и ны́нѣ, гла́съ 5:

Воспое́мъ, лю́діе, свѣ́тло Дави́дскую пѣ́снь Отрокови́цѣ, Невѣ́стѣ Бо́жіи и Ма́тери Царя́ Христа́: предста́ Цари́ца одесну́ю Тебе́, Влады́ко, ря́сны златы́ми одѣ́яна и преукра́шена Боже́ственными благолѣ́потами. Сію́ у́бо я́ко избра́нную и до́брую въ жена́хъ, па́че всего́ мíра удобри́въ, благоволи́лъ еси́ роди́тися изъ Нея́ вели́кія ра́ди ми́лости, и Сію́ Помо́щницу лю́демъ Твои́мъ дарова́лъ еси́ спаса́ти и покрыва́ти отъ бѣ́дъ всемогу́щею Твое́ю и Боже́ственною си́лою, Ея́же моли́твами, Христе́ Бо́же, поми́луй на́съ.

На стихо́внѣ стихи́ры самогла́сны, гла́съ 4:

О, пресла́вныхъ чуде́съ Твои́хъ, Пречи́стая! Яко моле́ніемъ оте́цъ на́шихъ, предъ свято́ю ико́ною Твое́ю, внеза́пное возжже́ніе оби́тели сея́ угаси́ла еси́ и ско́рбныя сердца́ и́хъ возвесели́ла еси́, сего́ ра́ди и мы́, пра́зднующе па́мять сего́ чудесе́, благода́рно вопіе́мъ Ти́: ра́дуйся, Дѣ́во препросла́вленная и Богоро́дице су́щая, я́ко спаса́еши ны́ отъ вся́кія ну́жды и ско́рби, и Сы́на Твоего́ мо́лиши о спасе́ніи ду́шъ на́шихъ.

Сти́хъ: Помяну́ и́мя Твое́ во вся́комъ ро́дѣ и ро́дѣ.

О, Всеми́лостивая христіа́номъ Помо́щнице! Не мо́жетъ Тя́ воспѣ́ти досто́йно у́мъ человѣ́ческій и а́нгельскій, я́ко всея́ тва́ри честнѣ́йшую, и небе́сныхъ и земны́хъ сла́внѣйшую: Творца́ бо всѣ́хъ и Бо́га родила́ еси́. Но, о Влады́чице! пріими́ ми́лостивно ю́же Тебѣ́ отъ се́рдца возложи́хомъ пѣ́снь, о вели́кихъ Твои́хъ къ на́мъ благодѣя́ніихъ, спаса́й же на́съ и всегда́, на Тя́ бо надѣ́емся.

Сти́хъ: Слы́ши, Дщи́, и ви́ждь, и приклони́ у́хо Твое́.

Па́че ски́ніи Моисе́евы, по о́бразу небе́сному сотворе́нныя, всю́ Тя Бо́гъ освяти́, и па́че Ааро́ня киво́та, благода́ти Своея́ испо́лни, ея́же и ико́на Твоего́ подо́бія прича́стна показа́ся: источа́етъ бо освяще́ніе и цѣльбу́ душа́мъ и тѣлесе́мъ и уставля́етъ си́лу о́гненную прису́тствіемъ Свои́мъ. Ейже съ любо́вію покланя́ющеся, про́симъ, Всеблага́я, и вопіе́мъ: огня́ вре́меннаго и вѣ́чнаго изба́ви на́съ, благослове́нная Помо́щнице.

Сла́ва, и ны́нѣ, гла́съ 2:

Пода́ждь Твою́ держа́вную по́мощь на́мъ, Богоро́дице, егда́ грѣ́хъ ра́ди на́шихъ, о́гненнаго запале́нія наказа́ніе на на́съ пріи́детъ внеза́пу, или́ гро́мы и мо́лніи съ небесе́ на́съ устраша́ютъ. Тогда́ ико́ною Твое́ю свято́ю на́съ защити́ и изба́ви, и яви́ся утоли́тельница гнѣ́ва Бо́жія, на на́съ пра́ведно подви́женнаго, мно́го бо мо́жетъ Ма́терняя моли́тва ко Творцу́, и всеси́льно хода́тайство Твое́ предъ лице́мъ Всевы́шняго. Его́же умоля́ти не преста́й за ро́дъ христіа́нскій, и́же въ пѣ́снехъ немо́лчныхъ ублажа́етъ Тя́, Ро́ждшую Спа́са и Изба́вителя ду́шъ на́шихъ.

На благослове́ніи хлѣ́бовъ: тропа́рь, три́жды [пи́санъ на ма́лѣй вече́рни], та́же поуче́ніе на Одиги́тріи.



НА УТРЕНИ,
На Бо́гъ Госпо́дь: тропа́рь три́жды, гла́съ 2: Яко до́ждь...

По 1-й каѳи́смѣ сѣда́ленъ, гла́съ 4. Подо́бенъ: Удиви́ся Іо́сифъ.

Глубины́ та́йны Рождества́ Твоего́, о Пречи́стая Дѣ́во, у́мъ а́нгельскій ужаса́етъ, и пречи́стая ико́на Твоя́ де́моны прогоня́етъ, и ли́ца нечести́выхъ омрача́етъ, и въ сту́дъ порѣва́етъ: не терпя́тъ бо взира́ти на си́лу ея́, бѣ́гаютъ же и исчеза́ютъ. Мы́ же любе́зно покланя́емся и лобыза́емъ, и Тя́, Богоро́дицу, велича́емъ.

Сла́ва, и ны́нѣ, гла́съ то́йже:

Идѣ́же осѣни́тъ благода́ть Твоя́, Богоро́дице, стра́хомъ исчеза́ютъ де́мони и разруша́ется злоко́зненное тѣ́хъ мечта́ніе, бѣ́гаютъ ду́си те́мніи, ра́дуется же вѣ́рныхъ мно́жество, Тебѣ́ пѣ́снь хва́льну отъ се́рдца вопію́ще: ра́дуйся, боже́ственный Покро́ве ду́шъ на́шихъ.

По 2-й каѳи́смѣ сѣда́ленъ, гла́съ 4. Подо́бенъ: Ско́ро предвари́.

Крѣ́пки сотвори́ ны, Влады́чице, во искуше́ніихъ, да не паде́мъ подъ бре́менемъ и́хъ, и да не пора́дуется вра́гъ, ища́й погуби́ти на́съ, но да возврати́тся посра́мленъ, я́коже иногда́ злому́дренныя лати́ны, на жре́бій Тво́й та́тски наше́дшіи и жезло́мъ предста́тельства Твоего́ со студо́мъ изгна́нніи.

Сла́ва, и ны́нѣ, гла́съ то́йже:

Ра́дуйся, Влады́чице, небе́сная Цари́це, Бо́га пло́тію на́мъ ро́ждшая, еди́наго Агнца, за на́съ во́лею поже́ршагося. Того́ моли́, Всенепоро́чная, да Твои́ми моли́твами отъ всѣ́хъ бѣ́дъ на́съ изба́витъ, и спасе́тъ ду́ши на́ша.

[Поліеле́й.]

Велича́ніе: Велича́емъ Тя́, Пресвята́я Дѣ́во, и чте́мъ всесла́вное Твое́ заступле́ніе, аллилу́ія.

Псало́мъ [избра́нный]: Помяни́, Го́споди, Дави́да...

По поліеле́и сѣда́ленъ, гла́съ 6. Подо́бенъ:

Мно́гая Твоя́ на́мъ благодѣя́нія кто́ исповѣ́сть, Богоро́дице? Или́ кíй язы́къ просла́витъ неисчерпа́емое мо́ре милосе́рдія Твоего́? Яко не то́кмо всегда́ мо́лиши о на́съ Сы́на Твоего́ и Бо́га на́шего, и всѣ́мъ на́мъ твори́ши спасти́ся, но и вре́менныхъ бѣ́дъ наи́тія воспреща́еши, и ико́ною Твое́ю святу́ю оби́тель на́шу отъ огня́ спаса́еши, сего́ ра́ди Тя́, Всепѣ́тая, прославля́емъ и ублажа́емъ.

Сла́ва, и ны́нѣ, гла́съ 2:

Моли́твы Твои́хъ ра́бъ пріими́, Богоро́дице, Засту́пнице на́ша и Прибѣ́жище, къ кому́ бо прибѣ́гнемъ, ра́звѣ Тебѣ́, Влады́чице. Ты́ бо еси́ Покро́въ на́мъ и Заступле́ніе, и ны́нѣ не оста́ви на́съ безпомо́щныхъ, я́ко на Тя́ по Бо́зѣ упова́ніе возложи́хомъ, Приснодѣ́во.

Та́же степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждъ, и приклони́ у́хо Твое́. Вся́кое дыха́ніе... Ева́нгеліе отъ Луки́, зача́ло 4: Воста́вши Маріа́мь... Та́же, псало́мъ 50-й. Сла́ва: Моли́твами Засту́пницы на́шей Богоро́дицы, Ми́лостиве, очи́сти мно́жества... И ны́нѣ: Моли́твами Богоро́дицы, Ми́лостиве... и про́ч.

Стихи́ра по Ева́нгеліи, гла́съ 6. Самогла́сенъ:

Весели́ся дне́сь, оби́тель Зогра́фская, и ра́достно пра́зднуй пречестны́я ико́ны Богома́тере свѣ́тлое торжество́, въ па́мять чуде́снаго избавле́нія своего́ отъ внеза́пнаго о́гненнаго возгорѣ́нія, я́ко да и впре́дь, моли́твами Приснодѣ́вы, сохрани́шися отъ огня́ и гро́ма, и всѣ́хъ бѣ́дъ внеза́пу находя́щихъ.

Та́же кано́нъ Пресвятѣ́й Богоро́дицѣ, гла́съ 8. Ирмосы́ по два́жды, тропари́ же на 12. Творе́ніе іеромона́ха Пахо́мія Вознесе́нскаго. Его́же краегране́сіе, имѣ́яй сицево́: Пахо́мія іеромона́ха, пѣ́ніе Богома́тере. [Краегране́сіе то́лько въ тропаре́хъ, а ирмосы́ всѣ́ заи́мствованы изъ Ирмоло́гія.]

Пѣ́снь 1.

Ирмо́съ: Проро́чески Богови́децъ Богоро́дицы о́бразъ зря́й, немо́кренными нога́ми Чермну́ю про́йде пучи́ну и, игра́я, вопія́ше: пои́мъ побѣ́дную пѣ́снь Го́сподеви, я́ко просла́вися.

Пѣ́снь сію́ принося́щу Ти́, Влады́чице, отве́рзи ми́ уста́ и умудри́ у́мъ, я́ко да воспою́ Тебѣ́ разу́мно, по достоя́нію Твои́хъ вели́кихъ благодѣя́ній.

Аще бы словеса́ на́ша умно́жилися па́че песка́ морска́го и мно́жества звѣ́зднаго, оба́че не довлѣ́ютъ восхвали́ти Тя́, Влады́чице, ра́вно дарова́нію чу́дныхъ Твои́хъ на́мъ благодѣя́ній.

Хо́лми взыгра́йте и удо́лія сликовству́йте на́мъ въ прославле́ніи чу́дныя ико́ны Богома́тере, я́ко Тоя́ ра́ди вся́ блага́я на на́съ излива́ются и печа́ли на́ша утоля́ются.

Окри́нъ, по́лнъ Боже́ственныхъ дарова́ній, ико́на Твоя́, Влады́чице, яви́ся, я́ко отъ ороше́нія руно́внаго изли́вающь на́мъ вся́ благопотре́бная жи́зни вре́меннѣй, па́че же и вѣ́чнѣй.

Катава́сія: Отве́рзу уста́...

Пѣ́снь 3.

Ирмо́съ: Утвержде́ніе мое́, Спа́се, еси́, прибѣ́жище мое́ и си́ла, поколеба́вшееся се́рдце мое́ утверди́ въ стра́сѣ Твое́мъ, я́ко нѣ́сть свя́тъ, я́коже Ты́, Бо́гъ на́шъ.

Мно́гая Твоя́ на́мъ благодѣя́нія воспѣ́ти отъ любве́ усе́рдствующе, не возмога́емъ, оба́че Ты́, Влады́чице, я́коже Сы́нъ Тво́й двѣ́ ле́пты вдови́цы, убо́гое сіе́ пріими́ пѣ́ніе, и возда́ждь на́мъ ми́лости Твоя́.

Ико́на Твоя́, Богома́ти, исто́чникъ благодѣя́ній на́мъ показа́ся, тоя́ бо ра́ди оби́тель сія́ отъ о́гненнаго сожже́нія спасе́ся. Сего́ ра́ди благода́рно вопіе́мъ: нѣ́сть на́мъ ина́го въ бѣда́хъ избавле́нія, па́че Тебе́, Влады́чице.

Язы́къ человѣ́чь не мо́жетъ изрещи́ та́йну приснодѣ́вства Твоего́, Пречи́стая: я́коже бо я́блоко отъ дре́ва, та́ко Христо́съ отъ ложе́снъ Твои́хъ произы́де, и дѣ́вство Твое́ рожде́ніемъ Свои́мъ запечатлѣ́. Тѣ́мже у́бо и ико́ну Твою́ прича́стну благода́ти сотвори́, то́ю на́мъ по́мощь Свою́ явля́я.

Іоа́ннъ Предте́ча взыгра́ся во чре́вѣ ма́тернѣ прише́ствію Твоему́, Влады́чице, ра́дуяся. Мы́ же, грѣ́шніи, ико́ну Твою́ и держи́маго Тобо́ю Богомладе́нца Іису́са зря́ще, ликовству́емъ. Его́же не преста́й моли́ти е́же спасти́ся на́мъ.

Сѣда́ленъ, гла́съ 4. Подо́бенъ: Удиви́ся Іо́сифъ.

Боже́ственными заря́ми просвѣти́ пою́щія Тя́, и умы́ утверди́, Дѣ́во Всенепоро́чная, крѣ́пкая, всего́мíра, Засту́пнице, да благодѣя́нія Твоя́ прославля́юще, вопіе́мъ Ти́, Препѣ́тая: не преста́й, моли́твами Твои́ми спаса́ти рабы́ Твоя́ отъ вся́кихъ бѣдъ́, еди́на Благослове́нная.

Сла́ва, и ны́нѣ, гла́съ 6. Подо́бенъ:

Влады́чице Пречи́стая, ви́ждь на́шихъ я́звъ болѣ́зни, и исцѣли́ ны́, неду́гующія душа́ми и тѣлесы́, да покланя́ющеся свято́му о́бразу Твоему́, прославля́емъ Тя́, Усе́рдную Засту́пницу ро́да христіа́нскаго.

Пѣ́снь 4.

Ирмо́съ: Услы́шахъ, Го́споди, слу́хъ Тво́й и убоя́хся, я́ко неизрече́ннымъ Совѣ́томъ, Бо́гъ сы́й Присносу́щный, отъ Дѣ́вы проше́лъ еси́, вопло́щся. Сла́ва снизхожде́нію Твоему́, Христе́, сла́ва си́лѣ Твое́й.

Егда́ отцы́ на́ши моле́бная пѣ́нія предъ честно́ю ико́ною Твое́ю, Богома́ти, те́плѣ вознесо́ша, тогда́ возже́гшійся пла́мень а́біе угасе́, и оби́тель сія́ отъ ги́бели изба́вися, прославля́ющи Тя́, Влады́чице.

Ра́дость ве́лія бы́сть тогда́ всѣ́мъ и́нокомъ оби́тели сея́, я́ко кро́въ, жили́ще и́хъ оби́тель, невреди́мъ отъ пла́мени сохрани́ся. Сего́ ра́ди единогла́сно уста́виша сіе́ пра́зднество въ че́сть чу́дныя ико́ны Твоея́, Влады́чице, да не забве́нна бу́дутъ благодѣя́нія Твоя́.

Обы́чно Тебѣ́, Дѣ́во, пра́зднество сіе́ сотворя́емъ, почита́юще ико́ну Твою́ святу́ю, е́юже оби́тель страстоте́рпца Гео́ргія украси́ла еси́. Съ ни́мъ же моли́ся о на́съ къ Сы́ну Твоему́ и Бо́гу на́шему.

Мно́жествомъ Твои́хъ на́мъ благодѣя́ній понужда́еми, благода́рно Тебѣ́ вопіе́мъ: ра́дуйся, Пречи́стая Ма́ти Бо́жія, прибѣ́жище на́ше, покро́въ и весе́ліе.

Пѣ́снь 5.

Ирмо́съ: Утренюетъ ду́хъ мо́й къ Тебѣ́, Бо́же, зане́ свѣ́тъ повелѣ́нія прише́ствія Твоего́, и́миже у́бо озари́ у́мъ на́шъ, Влады́ко, и наста́ви на стезю́ жи́зни.

Одержи́міи мра́комъ страсте́й, къ Твое́й пресвѣ́тлаго зра́ка ико́нѣ припа́даемъ, грѣ́шніи: Ты́, Пречи́стая, луча́ми благода́ти у́мъ на́шъ озари́, да во свѣ́тѣ за́повѣдей Сы́на Твоего́ всегда́ ше́ствуемъ, прославля́юще Тя́, Богома́терь.

Ны́нѣ свяще́нная оби́тель Зогра́фская свѣ́тло торжеству́етъ, пра́зднующи па́мять бы́вшаго чудесе́ избавле́нія своего́ отъ губи́тельства пожа́рищнаго, и Тебѣ́, Влады́чице, я́ко Засту́пницѣ свое́й пѣ́сни хвале́бныя воспѣва́ютъ, ра́дующеся.

Ангеловъ Цари́це и всея́ тва́ри Влады́чице, пріими́ сія́ на́ша ма́лыя хвалы́, и не лиши́ на́съ ми́лости Твоея́ въ жи́зни се́й и въ гряду́щемъ животѣ́, да Тя́ непреста́нно велича́емъ и ублажа́емъ.

Хотя́щимъ иногда́ зловѣ́рнымъ лати́номъ е́ресь свою́ на Аѳо́нѣ утверди́ти, Ты́, Богома́ти, чрезъ чу́дную Твою́ ико́ну наше́ствіе тѣ́хъ предвозвѣсти́ла еси́, я́ко Засту́пница на́ша при́сная.

Пѣ́снь 6.

Ирмо́съ: Превзыдо́ша главу́ мою́ беззако́нія моя́, я́ко тя́жкое бре́мя на мя́ обремени́вшаяся, во отча́янія глубины́ низвлача́тъ мя́, но пре́жде да́же погрязну́ти ми́, Го́споди, спаси́ мя́.

Ангелы чти́ма и по возду́ху и́ми носи́ма бы́сть ико́на Твоя́, Влады́чице, сего́ ра́ди и мы́ благоговѣ́йно то́й покланя́емся, и предъ не́ю ве́село Ти́ взыва́емъ: ра́дуйся, Пречи́стая Дѣ́во, Невѣ́сто неневѣ́стная.

Пѣ́снь хвалы́ воспѣ́ Тебѣ́ чу́дный о́ный ста́рецъ, и́же узрѣ́ ико́ну Твою́, Влады́чице, изъ ке́лліи его́ на врата́ монасты́рская а́нгелы принесе́нную. Тѣ́мже и мы́ съ ни́мъ вопіе́мъ Ти́: ра́дуйся, Невѣ́сто неневѣ́стная.

Ѣздяй на херуви́мѣхъ и пѣва́емый отъ серафи́мъ Госпо́дь, повелѣ́ а́нгеломъ Свои́мъ ико́ну Твою́, Богома́ти, незри́мо носи́ти, да вѣ́дяще сіе́, вси́ вопію́тъ Ти́: ра́дуйся, а́нгелы чти́мая и серафи́мы воспѣва́емая Цари́це.

Ны́нѣшнее пра́зднество въ че́сть ико́ны Твоея́ соверша́юще, вопіе́мъ Ти́, Влады́чице: я́коже доны́нѣ оби́тель сію́ и всѣ́хъ на́съ, здѣ́ живу́щихъ, спаса́ла еси́ отъ всѣ́хъ бѣ́дъ, та́ко и въ бу́дущая времена́ сохраня́й отъ всѣ́хъ зо́лъ, да въ ми́рѣ и благоче́стіи житіе́ на́ше сконча́емъ.

Конда́къ, гла́съ 8. Подо́бенъ: Взбра́нной Воево́дѣ.

Аще и огню́ подлежа́ше по естеству́, ико́на Твоя́, Влады́чице, но си́ла Твоя́ благода́тная съ то́ю су́щи, си́лу о́гненную препобѣди́. Тѣ́мже и ны́нѣ си́лу о́гненную е́ю угаса́еши, и жили́ща на́ша отъ вся́каго вре́да сохраня́еши, сего́ ра́ди хвале́бно Ти́ взыва́емъ: ра́дуйся, Дѣ́во, христіа́нъ похвало́, и и́ноковъ преди́вное заступле́ніе.

Икосъ:

По́стниковъ Зогра́фскихъ сосло́віе, въ бѣдѣ́ су́ще отъ внеза́пнаго оби́тели и́хъ возжже́нія, предъ свято́ю Твое́ю ико́ною те́плѣ возопи́ша. О, Влады́чице, я́же иногда́ наше́ствіе лати́нское предвозвѣсти́ла еси́, и а́біе моле́ніе и́ноковъ услы́шала еси́, лю́тость о́гненную незри́мо угаси́ла еси́. Ты́ и дне́сь и въ гряду́щія времена́, предста́тельствомъ Твои́мъ къ ро́ждшемуся изъ Тебе́ Христу́, Бо́гу на́шему, отъ всѣ́хъ зо́лъ на́съ сохраня́й, и о́гнь страсте́й грѣхо́вныхъ отъ на́съ отгоня́й, я́ко христіа́нъ похвала́, и и́ноковъ преди́вное заступле́ніе.

Пѣ́снь 7.

Ирмо́съ: Подража́тели тріе́хъ Твои́хъ, Го́споди, отроко́въ сотвори́ ны́, сопротивля́ющіяся грѣху́, и о́гнь страсте́й, благода́тію Твое́ю, попира́ющія, и пою́щія: благослове́нъ еси́, Бо́же оте́цъ на́шихъ.

Исра́ильскія иногда́ о́троки, въ пещи́ пла́мене о́гненнаго, спасо́шася Богоче́стія ра́ди, и́же и прообрази́ша собо́ю та́йну Бо́жія къ на́мъ Тобо́ю, Богома́ти, снизхожде́нія. Юже воспѣва́юще, и Твоя́ на́мъ благодѣя́нія прославля́юще, зове́мъ: благослове́нъ Бо́гъ оте́цъ на́шихъ.

Еди́на еси́ Ты́ по Бо́зѣ вели́чіе на́ше и похвала́, Дѣ́во Богоневѣ́стная; Тобо́ю бо отъ бѣ́дъ спаса́емся, и къ Тебѣ́ прибѣга́емъ, и прилѣ́жно мо́лимся: изба́ви, Влады́чице, рабы́ Твоя́ вѣ́чнаго муче́нія, воспѣва́ющія Твоя́ чудеса́.

Богоро́дице Приснодѣ́во, ка́ко Тя́, раби́ Твои́, по достоя́нію восхва́лимъ? Яко о́бразомъ Твои́мъ честны́мъ оби́тель сію́ прославля́еши, и вся́ блага́я и поле́зная къ житію́ на́шему промысли́тельнѣ нетру́дно подае́ши.

Очи́ма на́шима зря́ще ико́ну Твою́, Богома́ти, умы́ свои́ми къ Тебѣ́, Госпоже́ на́шей, на небеси́ Сы́ну Твоему́ и Бо́гу на́шему предстоя́щей, возно́симся и моля́щуюся Ему́ о на́съ благоговѣ́йно созерца́емъ.

Пѣ́снь 8.

Ирмо́съ: Отъ Отца́ пре́жде вѣ́къ Рожде́ннаго и отъ Ма́тере въ послѣ́дняя Воплоще́ннаго, свяще́нницы, благослови́те, лю́діе, превозноси́те во вся́ вѣ́ки.

Горѣ́ пою́тъ Тя́ а́нгельскія си́лы, до́лѣ же превозно́ситъ человѣ́ческій ро́дъ, и вся́ тва́рь благосло́витъ Тя́, Пречи́стая Богоро́дице Дѣ́во. Пріими́ у́бо и отъ на́съ, недосто́йныхъ, приноси́мое Тебѣ́ сіе́ моле́ніе.

Облаче дождя́ мы́сленнаго, Пречи́стая Дѣ́во, ороси́ ны, пали́мыя зно́емъ безмѣ́рныхъ искуше́ній, да не сожже́мся, я́ко хвра́стіе удобосожига́емое, но да яви́мся, я́коже зла́то очище́но, досто́йны черто́гомъ небе́снымъ.

Ми́лости пучи́на, Ма́ти Бо́жія, къ Тебѣ́ притека́ющія и о́бразу Твоему́ чудотво́рному покланя́ющіяся, изба́ви отъ бѣ́дъ и скорбе́й, да досто́йно хва́лимъ и́мя Твое́, препѣ́тое и превозноси́мое во вѣ́ки.

Аще и многогрѣ́шни и бездерзнове́нни есмы́ недосто́йніи, за не иску́сно за́повѣди Сы́на Твоего́ храни́мъ, и мно́гажды бла́гость Его́, творя́ще неподо́бная, преогорчева́емъ. Но Ты́, Пречи́стая, бу́ди о на́съ къ Нему́ хода́таица и моле́бница, да Тебе́ ра́ди поми́луетъ на́съ, превознося́щихъ Его́ во вѣ́ки.

Пѣ́снь 9.

Ирмо́съ: Воплоще́нія Бо́жія орга́нъ, Дѣ́во, была́ еси́, пло́ти Сло́ва Бо́жія черто́гъ, соедине́ному бо существо́ма, сугу́бома же дѣ́йствома и хотѣ́ньма показу́ема, Его́же пою́ще, Тя́, Богоро́дице, велича́емъ.

Ту́чная гора́ и усыре́нная Ду́хомъ Святы́мъ, Пречи́стая Дѣ́во, го́ру Аѳо́нскую и оби́тель сію́, я́ко наслѣ́діе Твое́, спаса́й отъ всѣ́хъ зо́лъ и сопроти́вныхъ обстоя́ній, да вси́ подвиза́ющіися, я́ко Госпожу́ свою́, непреста́нно Тя́ ублажа́ютъ.

Его́же родила́ еси́, Христа́, на ико́нѣ съ Тобо́ю изображе́на я́ко Младе́нца, Того́, Пречи́стая, умоля́ти не преста́й о всѣ́хъ, съ любо́вію покланя́ющихся Твоему́ зра́ку, да и́миже вѣ́сть судьба́ми, спасе́тъ ду́ши на́ша.

Рѣку́ тя́ сла́дкую и пото́къ насыще́нія, ма́нну небе́сную, изоби́ліе и ми́лость приснотеку́щую стяжа́вше, Отрокови́це, пое́мъ Рождество́ Твое́ и чудеса́, ико́ною Твое́ю на́мъ явле́нныя.

Иже го́рними и до́льними облада́яй, То́й Сы́нъ Тво́й бы́сть послу́шный, тѣ́мже моли́ся Ему́, Богома́ти, да и на́мъ, пѣвце́мъ Твои́мъ, благода́ть послуша́нія пода́стъ, я́ко кромѣ́ сего́ никто́же вни́детъ въ черто́гъ Боже́ственныя Его́ сла́вы и блаже́нства.

Свѣти́ленъ. Подо́бенъ: Жены́ услы́шите.

Ико́ну Твою́ всечестну́ю, въ зало́гъ благоволе́нія Твоего́, вѣ́рнымъ дарова́ла еси́, Влады́чице, отъ о́гненнаго запале́нія сего́ покрыва́ющи всѣ́хъ, на Тя́ упова́ющихъ, о Ма́ти Царя́ Христа́ Бо́га, и на́мъ, грѣ́шнымъ, Прибѣ́жище спасе́нія въ неча́янныхъ бѣда́хъ, и вѣ́чныя жи́зни Хода́таица.

Сла́ва, и ны́нѣ, то́йже.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

О, вели́кія бла́гости и несказа́ннаго милосе́рдія Твоего́, Влады́чице! Яко ико́ну Твою́ святу́ю въ зало́гъ благоволе́нія Своего́ оби́тели на́шей дарова́ла еси́, и е́ю си́лу естества́ о́гненнаго мно́гажды укроти́ла еси́. Тѣ́мже, благода́рственная Тебѣ́ принося́ще, вопіе́мъ: о, Пречи́стая, не лиши́ и на́съ Твоего́ Ма́терняго попече́нія, да Тя́ достодо́лжно пѣ́сньми почита́емъ и ублажа́емъ.

О, ко́ль вели́кая и неисче́тная благодѣя́нія Твоя́ ро́ду человѣ́ческому, Влады́чице! Ты́ бо, а́ки лѣ́ствица Іа́ковля, добродѣ́тельми небесе́ дося́жуща, Бо́га воплоще́нна во утро́бѣ Твое́й прія́ла еси́ и соесте́ственна на́мъ Того́ по человѣ́честву показа́ла еси́. Тобо́ю па́дшее естество́ на́ше на пе́рвое досто́инство взы́де; Тебе́ ра́ди мы́, ча́да гнѣ́ва бы́вше, ча́да Бо́жія сотвори́хомся. То́юже насыща́еми, къ жи́зни вѣ́чнѣй и нетлѣ́ннѣй уготовля́емся. Сего́ ра́ди достодо́лжно почита́емъ о́бразъ Тво́й святы́й, отъ него́ благовре́менну по́мощь пріе́млюще.

О, благосе́рднаго о на́съ промышле́нія, Влады́чице! Въ годи́ну бо бѣ́дъ и обстоя́ній, егда́ свирѣ́пство огня́ укроща́еши, я́ко Ма́ти стихíями облада́ющаго Влады́ки Христа́. Тѣ́мже велегла́сно проповѣ́дуемъ Твоя́ чудеса́ и ми́лость мно́гую къ ро́ду христіа́нскому, и пѣ́сньми хвале́бными Тя́ велича́емъ и ублажа́емъ.

Благодари́мъ Тя́ при́сно, Богоро́дице Дѣ́во, о вели́кихъ Твои́хъ на́мъ благодѣя́ніихъ, и́хже вѣ́мы и и́хже не вѣ́мы. Ты́ бо моли́твами Твои́ми умилостивля́еши на́мъ Влады́ку Христа́ и наше́дшія попуще́ніемъ Его́ бѣды́ отвраща́еши и, я́ко ма́лыя ча́да, на́съ при́сно назира́еши, и отъ всѣ́хъ зо́лъ спаса́еши.

Сла́ва, и ны́нѣ, гла́съ 8:

Пріиди́те, возра́дуемся держа́внѣй Засту́пницѣ на́шей Богоро́дицѣ, пріиди́те къ Ея́ чудотво́рному о́бразу поклони́мся, отъ него́ бо неоску́дную благода́ть источа́ющи, и тмы́ избавля́ющи на́съ отъ искуше́ній и бѣ́дъ, и вся́каго грѣха́, благоче́стно прославля́ющихъ, и чту́щихъ чу́дную Богома́тере святу́ю ико́ну. Тѣ́мъ, воспѣва́юще, воззове́мъ: ра́дуйся, любе́зная мíру по́моще, во спасе́ніе ду́шъ на́шихъ.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна [отъ кано́на] пѣ́снь 3-я и 6-я. Апо́столъ, Ева́нгеліе и прича́стенъ Богоро́диченъ: [Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Пи́сана отъ мона́ха Панаре́та Зогра́фскаго.       

Коне́цъ и Бо́гу сла́ва.

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 336-351.

/ Къ оглавленію раздѣла /


Наверхъ / Къ титульной страницѣ

0