Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 28-й де́нь.
Слу́жба явле́нію чудотво́рныя ико́ны Смоле́нскія Пресвяты́я Влады́чицы на́шея Богоро́дицы и Приснодѣ́вы Марíи, честна́го и сла́внаго Ея́ Одиги́трія.

[НА ВЕЛИЦѢЙ ВЕЧЕРНИ.]
Стихи́ры, гла́съ 2. Самогла́сны:

Да́руй на́мъ по́мощь, Богоро́дице, на Тя́ надѣ́ющимся, вѣ́рныхъ прибѣ́жище. Изба́ви отъ бѣ́дъ рабы́ Твоя́, Дѣ́во, на Тя́ бо по Бо́зѣ упова́ніе возлага́емъ.

Влады́чице, Ма́ти Изба́вителя, пріими́ моле́ніе рабо́въ Твои́хъ, а́ще и недосто́йнѣ моля́щихся Тебѣ́, да мо́лишися за ны́ къ Ро́ждшемуся изъ Тебе́, Влады́чице мíра, бу́ди на́мъ Изба́вительница.

Сла́ва, гла́съ 6:

Еже ра́дость а́нгеломъ пріи́мшая и ро́ждшая Зижди́теля Твоего́, Дѣ́во, спаса́й Тя́ велича́ющія.

И ны́нѣ, гла́съ 8:

Влады́чице, пріими́ моли́тву ра́бъ Твои́хъ и изба́ви на́съ отъ вся́кія ну́жды и печа́ли, Тебе́ велича́ющія.

Вхо́дъ. Проки́менъ дне́. Чте́нія три́.

Бытія́ чте́ніе.

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе.

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе.

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 8:

Иже на херуви́мѣхъ Ѣздяй и Пѣваемый отъ серафи́мъ, сше́лъ еси́ съ небесе́ проро́чески, Бла́же, и всели́лся еси́ во утро́бу чи́стыя Богоотрокови́цы, Юже а́нгели воспѣ́ша та́йно: ра́дуйся, ра́достная Дѣ́во, необъя́тнаго я́ко Бо́га во чре́вѣ Свое́мъ пріе́мши па́че сло́ва, отъ невѣ́рія въ вѣ́ру мíра преводя́ща. Сла́ва Тебѣ́, Христе́, еди́не Ми́лостиве и Человѣколю́бче.

Гла́съ 7:

Украси́ Тво́й черто́гъ, Чи́стая, и воспріими́ Царя́ Твоего́. Слы́ши цѣлова́ніе, е́же отъ а́нгела, Дѣ́во. Се́ бо престо́лъ херуви́мскій еси́. Се́ Царя́ всѣ́хъ Ты́ прія́ла еси́. Облакъ свѣ́та еси́, Богоро́дице, Ду́хомъ въ души́ лучи́ пріе́мши, ю́же возвѣща́етъ велегла́сно боже́ственный Гавріи́лъ, зовы́й ра́достно: Сы́на Вы́шняго роди́ши, Ду́ха Бо́жія ди́внымъ наше́ствіемъ.

Украси́ся, черто́же святы́й, Гавріи́ле, благовѣству́й Царя́ Христа́, цѣлу́й Маріа́мъ, небе́сную две́рь. Та́ бо престо́лъ херуви́мскій новотвори́тся, То́й бо, ра́дуйся, зва́ти досто́итъ. Облакъ свѣ́та зри́тся Дѣ́вая, нося́щи Христа́, Со́лнца сла́вы. Его́же Ду́хъ Бо́жій во утро́бѣ Ея́ глаго́ломъ твои́мъ, пресла́вне, вселя́етъ, живота́ и сме́рти и всѣ́хъ Влады́ку.

Возсія́вшаго пре́жде вѣ́къ отъ Отца́, напослѣ́докъ же воплоща́ема отъ Ма́тере неизрече́нно, съ небесе́ Гавріи́лъ къ Де́вѣй, — ра́дуйся, Чи́стая, — зовы́й; О, ра́дуйся, свяще́нная ра́достная Дѣ́во, Христа́ Бо́га во утро́бѣ Свое́й заче́нши. Его́же прови́дя, Моисе́й Богови́децъ, на Сина́йстѣй горѣ́ возра́довася, Ему́же Симео́нъ зовы́й: се́ бо Свѣ́тъ язы́ковъ, Се́й Изра́иля Сла́ва и Спа́съ ду́шъ на́шихъ.

Сла́ва, и ны́нѣ, гла́съ 8:

Богоро́дицу Марíю вси́ воспое́мъ: ра́дуйся, Ма́ти Бо́жія; ра́дуйся, лѣ́ствице одушевле́нная; ра́дуйся, купино́ неопали́мая; ра́дуйся, ста́мно всезлата́я; ра́дуйся, цвѣ́те вѣ́ры; ра́дуйся, же́зле прозябы́й; ра́дуйся, злата́я кади́льнице; ра́дуйся, горо́ Бо́жія, присѣ́нная Дѣ́во; ра́дуйся, разрѣше́ніе кля́твы пе́рвыя Евы; ра́дуйся, престо́ле Госпо́день; ра́дуйся, многомоли́твенная красото́; ра́дуйся, Влады́чице.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Всѣ́мъ предста́тельствуеши, Блага́я, прибѣга́ющимъ съ вѣ́рою въ держа́вный Тво́й покро́въ: ино́го бо не и́мамы, грѣ́шніи, къ Бо́гу въ бѣда́хъ и ско́рбехъ при́сно избавле́нія, обремене́ни грѣхи́ мно́гими, Ма́ти Бо́га Вы́шняго. Тѣ́мже Ти́ припа́даемъ: изба́ви отъ вся́каго обстоя́нія рабы́ Твоя́.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Всѣ́хъ скорбя́щихъ ра́досте, и оби́димыхъ Засту́пнице, и а́лчущихъ пита́тельнице, стра́нныхъ утѣше́ніе, обурева́емыхъ приста́нище, больны́хъ посѣще́ніе, немощны́хъ покро́въ и засту́пнице, же́злъ ста́рости, Ма́ти Бо́га Вы́шняго Ты́ еси́, Пречи́стая, потщи́ся, мо́лимся, спасти́ся рабо́мъ Твои́мъ.

Сти́хъ: Слы́ши, Дщи́, и ви́ждь, и приклони́ у́хо Твое́.

Ра́дуйся, Пречи́стая Дѣ́во; ра́дуйся, честны́й ски́птре Царя́ Христа́; ра́дуйся, прозя́бшая гро́здъ та́йный; ра́дуйся, две́ре небе́сная и неопали́мая купино́; ра́дуйся, всемíрный свѣ́те; ра́дуйся, всѣ́хъ ра́досте; ра́дуйся, вѣ́рныхъ спасе́ніе; ра́дуйся, засту́пнице всѣ́хъ христіа́нъ и прибѣ́жище, Влады́чице.

Сла́ва, и ны́нѣ, гла́съ 8:

Ра́дуйся, вселе́нныя похвало́; ра́дуйся, хра́ме Госпо́день; ра́дуйся, горо́ приосѣне́нная; ра́дуйся, всѣ́хъ прибѣ́жище, ра́дуйся, свѣ́щниче златы́й; ра́дуйся, сла́во правосла́вныхъ честна́я; ра́дуйся, Марíе, Ма́ти Христа́ Бо́га; ра́дуйся, раю́; ра́дуйся, Боже́ственная трапе́зо; ра́дуйся, сѣ́не; ра́дуйся, ру́чко всезлата́я; ра́дуйся, всѣ́хъ упова́ніе.


НА УТРЕНИ,
На Бо́гъ Госпо́дь: тропа́рь, гла́съ 4:

Къ Богоро́дицѣ прилѣ́жно ны́нѣ притеце́мъ, грѣ́шніи и смире́нніи, и припаде́мъ, въ покая́ніи зову́ще изъ глубины́ души́: Влады́чице, помози́, на ны́ милосе́рдовавши, потщи́ся, погиба́емъ отъ мно́жества прегрѣше́ній, не отврати́ Твоя́ рабы́ тщи́, Тя́ бо и еди́ну наде́жду и́мамы. [Два́жды.]

Сла́ва, и ны́нѣ, богоро́диченъ:

Не умолчи́мъ никогда́, Богоро́дице, си́лы Твоя́ глаго́лати, недосто́йніи. Аще бо Ты́ не бы́ предстоя́ла, моля́щи, кто́ бы на́съ изба́вилъ отъ толи́кихъ бѣ́дъ? Кто́ же бы сохрани́лъ до ны́нѣ свобо́дны? Не отсту́пимъ, Влады́чице, отъ Тебе́, Твоя́ бо рабы́ спаса́еши при́сно отъ вся́кихъ лю́тыхъ.

По 1-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Лю́діе благочести́віи, правовѣ́рніи собо́ри христоимени́тіи, приступи́те вѣ́рно вси́, боже́ственному припа́дающе Бо́жія Ма́тере о́бразу, и́мже исцѣле́ніе боля́щимъ ра́достно подава́етъ, уязвля́етъ же злосла́вныя я́ко стрѣла́ отъ лу́ка, на́съ всѣ́хъ веселя́щи свѣтови́дно и благода́тію озаря́ющи моли́твами Свои́ми.

Сла́ва, и ны́нѣ, богоро́диченъ:

Всю́ Тя́ Бо́гъ освяти́, Дѣ́ву до́брую и непоро́чную въ жена́хъ, проро́ки прообрази́въ че́стно, іере́и благослови́въ, во Свята́я святы́хъ всели́, а́нгеломъ воспита́въ, съ небесе́ пи́щу хлѣ́бъ пода́въ, Са́мъ же Преблагíй, Единоро́дное Бо́гъ Сло́во, всели́ся въ Тя́ и пло́тію про́йде изъ Тебе́. Тѣ́мже Ти́ покланя́емся и чти́мъ я́ко вои́стинну и́стинную су́щую Богоро́дицу.

По 2-й стихоло́гіи сѣда́ленъ, гла́съ 4. Подо́бенъ: Удиви́ся.

Да ликовству́етъ свѣ́тло вѣ́рныхъ все́ мно́жество, рыда́етъ же де́монское во́инство, ви́дяще многоиме́нно сія́ющія пра́здники Бо́жія Ма́тере, Юже ублажа́емъ я́ко Богома́терь боже́ственными пѣ́сньми. Идѣ́же бо богопрія́тно сла́вится Преблагослове́нная Богоро́дица Влады́чица, Богоизбра́нная Отрокови́ца, непрія́зни паде́ніе, христіа́нъ же крѣ́пкое утвержде́ніе.

Сла́ва, и ны́нѣ:

О, Всеблагослове́нная Богоро́дице Влады́чице, Богоизбра́нная Отрокови́це, свѣ́тлое проро́ческое сбытіе́, апо́стольская похвало́ и му́ченическое исповѣ́даніе и вѣ́нче, а́нгелы что́мая и человѣ́ческими ро́ды многопѣ́тая, и всего́ мíра вожделѣ́нная Помо́щнице! Изба́ви рабы́ Твоя́ осужде́нія бу́дущего и е́зера о́гненнаго, еди́на Благослове́нная.

По поліеле́и сѣда́ленъ, гла́съ 1. Подо́бенъ: Гро́бъ Тво́й.

Правовѣ́рно чту́щія Тя́, и Импера́тора, къ Тебѣ́ прибѣга́ющаго, ико́нѣ Твое́й святѣ́й любе́зно покланя́ющагося, о Бо́жія Ма́ти, спаси́ и не да́ждь на́съ въ расхище́ніе сопоста́томъ, ниже́ на́йдутъ на ны́ вся́ зла́я, я́же грѣхи́ на́ша угото́ваша на́мъ, ни беззако́нія на́ша превзы́дутъ главы́ на́ша, но да Твоя́ ма́терняя къ Бо́гу преодолѣ́етъ за ны́ богопрія́тная моли́тва.

Сла́ва, и ны́нѣ:

Пречи́стая Твоя́ ико́на, Богоро́дице Дѣ́во, врачевство́ всего́ мíра духо́вное, къ не́йже прибѣга́емъ, Тебѣ́ покланя́ющеся, почита́емъ и лобыза́емъ ю́, исцѣле́ній благода́ть почерпа́юще отъ нея́, и неду́говъ тѣле́сныхъ и душе́вныхъ страсте́й Твои́ми моли́твами свобожда́емся.

Та́же степе́нна, 1-й антифо́нъ 4-го гла́са. Проки́менъ [гла́съ 4]: Помяну́ и́мя Твое́ во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́ стихи́ра, гла́съ 6:

Не ввѣ́ри мя́ человѣ́ческому предста́тельству, Пресвята́я Влады́чице, но пріими́ моле́ніе раба́ Твоего́: ско́рбь бо обдержи́тъ мя́, терпѣ́ти не могу́ де́монскаго стрѣля́нія, покро́ва не и́мамъ, ниже́ гдѣ́ прибѣ́гну, окая́нный, всегда́ побѣжда́емь, и утѣше́нія не и́мамъ, ра́звѣ Тебе́, Влады́чице мíра, упова́ніе и предста́тельство вѣ́рныхъ, не пре́зри моле́ніе мое́, поле́зно сотвори́.

Кано́нъ Пресвяты́я Богоро́дицы. Творе́ніе мона́ха Игна́тія, гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Ра́достно, Чи́стая, ны́нѣ наста́вшее хвале́ніе приноша́ю, ра́дуяся, и ти́химъ гла́сомъ, Одиги́тріе, вопію́ Ти: ра́дуйся и испо́лни мя́ ра́зума, пѣ́ти начина́юща.

Христа́ роди́вшая, ра́дость на́мъ вѣ́чную, о, ра́дуйся, Всепѣ́тая, правосла́внымъ наде́жда, Одиги́тріе, всепѣ́тая Дѣви́це! Ра́дости испо́лни мя́ мíрови жела́нныя.

Лику́ютъ вси́ человѣ́цы и а́нгели, всегда́ согла́сно вопію́ще на небеси́ и на земли́, Одиги́тріе: ра́дуйся, Дѣви́це, ра́дости бо Рождество́мъ Твои́мъ вся́ческая испо́лнила еси́.

Ра́дуйся, Одиги́тріе, со стра́хомъ Ти́ вопію́щихъ ра́дости сподо́би, Ма́ти су́щія ра́дости, избавля́ющи скорбе́й вся́ческихъ, и всѣ́хъ поми́луй, къ Тебѣ́ прибѣга́ющихъ.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Христа́, Вы́шняго Царя́, о, ра́дуйся, непоколеби́мая чи́стая и одушевле́нная пала́то! Ра́дуйся, Одиги́тріе: ра́дуйся, Тобо́ю неруши́мь на́шъ гра́дъ сохраня́ется.

Вмѣсти́ти Его́же не возмо́же тва́рь, во утро́бу неискусобра́чную, Одиги́тріе Дѣви́це, тѣле́сно вмѣсти́ла еси́, тѣ́мже Ти́, ра́дуйся, пое́мъ, по до́лгу велича́юще.

Ра́дость многопѣ́тая мíрови, ра́достно Ти́ пою́ще при́сно, вѣ́чнующія, Чи́стая, ра́дости сподобля́емся Твои́ми ма́терними моли́твами къ Ро́ждшемуся изъ Тебе́, Одиги́тріе.

Злату́ю Тя́ ста́мну, и свѣ́щникъ, и же́злъ, и трапе́зу, Чи́стая, призыва́емъ, Одиги́тріе, и гла́съ е́же, ра́дуйся, Тебѣ́ при́сно привноша́емъ съ си́ми же имены́.

Конда́къ, гла́съ 6:

Не и́мамы ины́я по́мощи, не и́мамы ины́я наде́жды, ра́звѣ Тебе́, Влады́чице, Ты́ на́мъ помози́, на Тебе́ надѣ́емся и Тобо́ю хва́лимся, Твои́ бо есмы́ раби́, да не постыди́мся.

Сѣда́ленъ, гла́съ 2:

Моле́ніе те́плое и стѣна́ необори́мая, ми́лости исто́чниче, мíрови прибѣ́жище, прилѣ́жно вопіе́мъ Ти́: Богоро́дице Влады́чице, предвари́, и отъ бѣ́дъ изба́ви на́съ, Еди́на вско́рѣ предста́тельствующая.

Сла́ва, и ны́нѣ, то́йже.


Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Ра́дуйся, чу́до чудесе́мъ, Одиги́тріе Влады́чице; ра́дуйся, всѣ́мъ ра́досте градово́мъ, и ве́семъ непобѣди́мое христіа́нское въ бѣда́хъ храни́лище, и предгра́діе, и на враги́ побѣжде́ніе.

Ра́дуйся, ра́дуйся, царе́мъ правосла́внымъ похвало́, и христолюби́вымъ во́инствомъ покро́въ пребыва́еши всѣ́мъ, Цари́це; ра́дуйся, Одиги́тріе, прибѣ́жище всѣ́мъ на́мъ и утвержде́ніе.

Ра́дуйся, всѣ́мъ ско́рое въ бѣда́хъ избавле́ніе; ра́дуйся, гото́вое всѣ́мъ скорбя́щимъ утѣше́ніе; ра́дуйся, Всепѣ́тая; ра́дуйся, Одиги́тріе Всеблагослове́нная, всѣ́мъ немощны́мъ Цѣли́тельнице.

Ра́дуйся, Ея́же вели́чія вся́ тва́рь сла́вити у́бо спѣши́тъ по достоя́нію, но не возмога́етъ, Одиги́тріе, и сего́ ра́ди зове́тъ Ти́: ра́дуйся, Влады́чице, Боговмѣсти́мое жили́ще.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Благосты́ни бе́здно и щедро́тамъ еси́, ра́дуйся, Одиги́тріе Дѣви́це; ра́дуйся, всѣ́мъ ра́дость творя́щи вѣ́рнымъ; о, ра́дуйся, су́щимъ въ бѣда́хъ и скорбя́щимъ пребы́страя засту́пнице!

Ра́дости, отъ исполне́нія вели́чія чуде́съ Твои́хъ зря́ще, исполня́емся, вси́ незря́щіи, слы́шаще же, вѣ́рніи. Тѣ́мже, ра́дуйся, Тебѣ́ при́сно всю́ду и вси́, Одиги́тріе, пое́мъ.

Христа́ Бо́га на́шего, о, ра́дуйся, Одиги́тріе, жили́ще и до́мъ неизрече́нныя и Пребоже́ственныя, Дѣ́во, сла́вы Его́! О, ра́дуйся, пала́то преукраше́нная! Ра́дуйся, гра́де одушевле́нный, при́сно ца́рствующій!

Ра́дость неоску́дную Тя́ разсмотря́юще, я́ко мо́ре, Отрокови́це, Одиги́тріе Дѣви́це, ра́дующеся вси́, ра́дуйся, вопіе́мъ Ти́, и пою́ще, Боже́ственныхъ даро́въ неви́димо при́сно отъ Тебе́ ожида́юще.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Христа́, Чи́стая, пріе́млющи, гла́съ, е́же ра́дуйся, Одиги́тріе Дѣви́це, слы́шаше, Его́же неизрече́нно ро́ждши, ра́дуйся, отъ всѣ́хъ слы́шиши всегда́.

Ра́дости вся́ испо́лнила еси́, вы́шнія и ни́жнія Ты́ совокупи́ла еси́, Одиги́тріе, тѣ́мже ра́достно и согла́сно ны́нѣ не́бо и вся́ земля́ зове́тъ Ти́.

Вдова́мъ, о, ра́дуйся, Всепѣ́тая, и всѣ́мъ си́рымъ, Одиги́тріе, утѣше́ніе; ра́дуйся, всѣ́мъ источа́ющи ни́щимъ бога́тство неистощи́мое.

Зла́та вся́каго блиста́ема и у́тра со́лнечнаго свѣтлѣ́йши, жили́ще Христо́во; ра́дуйся, Одиги́тріе, ра́дуйся, Дѣви́це, ра́дуйся, Невѣ́сто неневѣ́стная.

Конда́къ, гла́съ 6:

Предста́тельство христіа́нъ непосты́дное, хода́тайство ко Творцу́ непрело́жное, не пре́зри грѣ́шныхъ моле́ній гла́сы, но предвари́, я́ко Блага́я, на по́мощь на́съ, вѣ́рно зову́щихъ Ти́: ускори́ на моли́тву и потщи́ся на умоле́ніе, предста́тельствующи при́сно, Богоро́дице, чту́щихъ Тя́.

Икосъ:

Простри́ дла́ни Твоя́, и́миже всѣ́хъ Влады́ку я́ко младе́нца прія́ла еси́, за мно́жество бла́гости; не оста́ви на́съ, всегда́ надѣ́ющихся на Тя́, бо́дренною Твое́ю моли́твою и неисче́тною просты́нею уще́дри на́съ, и пода́ждь душа́мъ на́шимъ милосе́рдіе Твое́, во вѣ́ки источа́ющи: Тебе́ бо и́мамы, грѣ́шніи, Засту́пницу отъ находя́щихъ на ны́ бѣ́дъ и зо́лъ. Но, я́ко иму́щи милосе́рдія щедро́ты, ускори́ на моли́тву, и потщи́ся на умоле́ніе, предста́тельствующи при́сно, Богоро́дице, чту́щихъ Тя́.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Ра́дуйся, ра́дуйся, Богоро́дице Одиги́тріе, всѣ́хъ и всегда́ наставля́ющи вѣ́рныхъ ше́ствовати ко вся́кому пути́ спаси́тельному; ра́дуйся, Влады́чице, Тобо́ю бо при́сно избавля́емся настоя́щія ва́рварскія бѣды́.

Ра́дуйся, ра́дуйся, Одиги́тріе, бдя́щи и моля́щися о на́съ къ Бо́гу, и вся́кія зло́бы хода́тайствомъ Твои́мъ, вся́ческихъ скорбе́й, Богороди́тельнице, всѣ́хъ люде́й избавля́ющи.

Ра́дуйся, ра́дуйся, Пресвята́я Одиги́тріе, Яже проше́нія на́ша къ по́льзѣ на́мъ исполня́ющи, и хотя́щи всѣ́мъ при́сно всегда любодру́жное благо́е еди́нство, спѣ́шное же во изя́щныхъ.

Ра́дуйся, ра́дуйся, корабле́мъ, Одиги́тріе, ну́ждно пла́вающимъ, избавля́ющи вѣ́рныхъ и всѣ́мъ избавле́ніе отъ вся́кія ско́рби и неду́ги пестро́тныя и ме́дленныя разрѣша́ющи вско́рѣ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Ра́дуйся, Всеблагослове́нная Марíе, изъ Тебе́ бо Всеблагослове́нный Бо́гъ одѣ́яся во всего́ мя, человѣ́ка, и, одѣ́явся, соедини́ Своему́ Божеству́ неизрече́ннымъ соедине́ніемъ, Дѣ́во Одиги́тріе; ра́дуйся, Обра́дованная, ра́досте всего́ мíра.

Ра́дуйся, лука́выхъ духо́въ Прогони́тельнице; ра́дуйся, Богоро́дице Одиги́тріе; ра́дуйся, я́ко Тебе́ небе́сная неви́димая во́инства славосло́вятъ всегда́ и велича́ютъ я́ко Ма́терь Бо́жію бы́вшую; ра́дуйся, Яже ни́жняя сочта́вши съ вы́шними.

Ра́дуйся, всѣ́хъ небе́сныхъ си́лъ безъ разсужде́нія превосходя́щая; ра́дуйся, Одиги́тріе; ра́дуйся, вся́кія тва́ри Бо́га ро́ждшая, госпо́дствующи, е́й, Влады́чице Всепѣ́тая; ра́дуйся, я́ко пребыва́еши Дѣ́вою, Чи́стая, и по рождествѣ́.

Ра́дуйся, жена́мъ всѣ́мъ сла́во, хра́ме преосвяще́нный Бо́га на́шего; ра́дуйся, Одиги́тріе; ра́дуйся, душеспаси́тельная все́й вселе́ннѣй; ра́дуйся, покрыва́ющій о́блаче, небе́съ ши́ршая; ра́дуйся, мѵрополо́жнице, Боже́ственнаго мѵ́ра полна́.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Ра́дуйся, свѣще́, Свѣ́тъ невече́рній поне́сшая, и въ рождествѣ́ Твое́мъ многобо́жія тму́ разруши́вшая, и а́довы про́пасти изба́вльшая лю́ди; ра́дуйся, Одиги́тріе Богоро́дице, добро́тъ всѣ́хъ Предхода́таице.

Ра́дуйся, земле́, изъ нея́же кла́съ прозя́бшій небе́сный вѣ́рнымъ, и мíра всего́ душегу́бнаго гла́да изба́ви, разу́мная и одушевле́нная; о, ра́дуйся, виногра́де, и́же гро́здъ живо́тный ро́ждшая, Богоро́дице Чи́стая Одиги́тріе!

Ра́дуйся, та́йныхъ цвѣто́въ прекра́сный су́щій раю́; ра́дуйся, Ма́ти Дѣ́во, неви́димыхъ ра́зумъ чистото́ю страннолѣ́пно побѣ́ждши, Богороди́тельнице; ра́дуйся, Отрокови́це; ра́дуйся, Одиги́тріе, всемíрное чу́до и слы́шаніе.

Лѣ́то живота́ на́шего про́чее сохрани́ неврежде́но, поможе́ніемъ Твои́мъ, Дѣ́во Отрокови́це, и сподо́би коне́цъ благíй получи́ти на́мъ, воспѣва́ющимъ Тя́ и взыва́ющимъ: ра́дуйся, Всеблаже́нная Богоро́дице, Чи́стая Одиги́тріе.

Свѣти́ленъ:

Да почти́тся Всепѣ́тая Ма́ти Бо́жія, жи́знь су́щую ро́ждшая — Христа́ Бо́га на́шего, ра́йскихъ двере́й отверзе́ніе, всего́ мíра очище́ніе, къ животу́ возведе́ніе. Се́й е́сть проро́ки глаго́ланный, Тому́ поклони́мся, Бо́гу и Спа́су ду́шъ на́шихъ.

Сла́ва, и ны́нѣ:

Пріиди́те, вѣ́рніи, съ чи́стою со́вѣстію, возвели́чимъ Ма́терь Бо́га на́шего, носи́вшую во чре́вѣ Боже́ственнаго Младе́нца Спа́са Христа́, къ Нему́же ма́тернее дерзнове́ніе иму́щи, непреста́нно мо́литъ за ны́ и подае́тъ рабо́мъ Свои́мъ бога́тыя ми́лости.

На хвали́техъ стихи́ры на 4, гла́съ 4. Подо́бенъ: Яко до́бля.

Наста́вницу Тя́ заблу́ждшихъ* и приста́нище спаси́тельно* въ пучи́нѣ, Влады́чице, и въ бу́ри,* во искуше́ніи же и печа́лехъ,* Христо́съ Тя́ всѣ́мъ показа́,* Сы́нъ Тво́й и Бо́гъ,* вѣ́рно приходя́щимъ къ Тебѣ́.* Его́же моли́, отъ злы́хъ бѣ́дъ изба́витися,* вѣ́дящимъ Тя́, Богоро́дицу, вои́стинну Наста́вницу. [Два́жды.]

Тлѣ́ніе и болѣ́знь* потреби́ла еси́, Всепѣ́тая,* дре́внюю всю́ рождество́мъ Твои́мъ,* Живо́тъ мíру ро́ждши,* сме́рть разруши́вшій,* болѣ́зни, Блага́я, исцѣля́еши,* вѣ́рно Тво́й чуде́сный о́бразъ воспѣва́ющихъ,* и любо́вію кла́няющихся,* и чту́щихъ Тя́, Чи́стую, Наста́вницу.

Яко исто́чника Тя́,* Всепѣ́тая, живота́ вѣ́мы,* и я́ко чуде́съ Тя́ пода́теля и цѣле́бъ,* страсте́й душе́вныхъ же и тѣле́сныхъ,* я́ко ско́рое оставле́ніе,* ми́лости и щедро́тъ неисчерпа́емое мо́ре вѣ́дяще,* Тебѣ́ припа́даемъ вси́,* прося́ще отъ ско́рби разрѣше́нія* и бу́дущего муче́нія.

Сла́ва, и ны́нѣ, гла́съ 8:

Иже на херуви́мѣхъ Ѣздяй и Пѣва́емый отъ серафи́мъ, сше́лъ еси́ съ небесе́ проро́чески, Бла́же, и всели́лся еси́ во утро́бу Чи́стыя Богоотрокови́цы, Юже а́нгели воспѣ́ша та́йно: ра́дуйся, ра́достная Дѣ́во, Необъя́тнаго я́ко Бо́га во чре́вѣ Свое́мъ пріе́мши па́че сло́ва, отъ невѣ́рія въ вѣ́ру мíръ преводя́ща. Сла́ва Тебѣ́, Христе́, еди́не Ми́лостиве и Человѣколю́бче.

Славосло́віе вели́кое. И отпу́стъ.



НА ЛИТУРГІИ
Блаже́нна отъ кано́на, пѣ́снь 3-я и 6-я. И про́чая слу́жба Пресвяты́я Богоро́дицы:

[Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 249-254 об.

/ Къ оглавленію раздѣла /


Наверхъ / Къ титульной страницѣ

0