Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 14 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 27-й де́нь.
Кано́нъ свято́му великому́ченику Пантелеи́мону, пѣва́емый за неду́жныя.

Пѣ́снь 1.

Запѣ́въ: Святы́й великому́чениче и цѣле́бниче Пантелеи́моне, моли́ Бо́га о на́съ.

По́двигомъ, му́чениче, до́брымъ подвиза́вся, и вра́чь изря́денъ бы́въ, исцѣли́ болѣ́зни моя́, и обдержа́щій о́гнь ороше́ніемъ твои́мъ отжени́, здра́віе ми́ соверше́нное подава́я.

Болѣ́зней изба́ви мя́ лю́тыхъ, о Пантелеи́моне, и надлежа́щую ми́ не́мощь вско́рѣ отъ мене́ отжени́, и коне́чное исцѣле́ніе ми́ да́руй, я́ко да засту́пника вели́каго вѣ́рою ублажа́ю тя́.

Цѣли́телю душа́мъ и тѣлесе́мъ, исцѣли́ стра́сти моя́ лю́тыя, тѣле́сныя же и душе́вныя, прите́кшаго, о Пантелеи́моне, подъ кро́въ тво́й спаси́тельный, му́чениче Спа́совъ, я́ко да хвала́ми ублажа́ю тя́.

Богоро́диченъ: Милосе́рда су́щи, Чи́стая, я́ко благоутро́бное Сло́во Бо́жіе роди́вшая, исцѣли́ неду́гъ раба́ своего́, и ско́рую да́руй цѣльбу́ и здра́віе, вѣ́рою прося́щему твоея́ ми́лости.

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Разруши́въ многоко́зненное мучи́тельство, страстоте́рпче, живо́тъ даю́щими о Христѣ́ по́двигами, умерщвля́ющія стра́сти отжени́ отъ неду́гующаго зѣло́, моли́твою твое́ю.

Согни́вшей злы́ми по́мыслами и дѣ́лъ я́звами душѣ́ мое́й, сла́вне, посѣще́ніемъ твои́мъ да́ждь исцѣле́ніе, и не оста́ви мене́ поги́бнути окая́ннаго, молю́ тя.

Безбо́жія пе́шь угаси́лъ еси́ тече́ніемъ крове́й твои́хъ, страстоте́рпче, тѣ́мже ти́ молю́ся, огня́ болѣ́зни мя́ свободи́.

Богоро́диченъ: Низри́ну мя́ мно́жество прегрѣше́ній, Чи́стая, въ пучи́ну неду́говъ, но Сама́, Чи́стая, окорми́ мя къ тишинѣ́ здра́вія, Богоро́дице.

[Сѣда́ленъ, гла́съ 4. Подо́бенъ: Удиви́ся Іо́сифъ.

До́бляго страда́льца благоче́стія Христо́ва восхва́лимъ свѣ́тло Пантелеи́мона, вѣ́рніи, псалмы́ и пѣ́ньми и пѣ́сньми духо́вными, и́мже мучи́тельство неви́димаго врага́ си́лою Боже́ственною попра́ся, и неду́говъ исцѣле́ніе бога́тно отъ Го́спода дарова́ся, творя́щимъ вѣ́рно Боже́ственный и честны́й пра́здникъ его́.

Сла́ва, другíй, гла́съ и подо́бенъ то́йже:

Ермола́я му́драго, му́чениче, слове́съ послу́шалъ еси́ и оста́вилъ еси́ а́біе худо́жество земно́е, я́ко ме́рзко, я́ко не крѣ́пко, я́ко губи́тельно, имѣ́я Христо́вы стра́сти, уче́нія жи́зни въ се́рдцы твое́мъ, неисцѣ́льно стра́ждущимъ здра́віе, Пантелеи́моне, да́руя. Тѣ́мже моли́ся о творя́щихъ любо́вію па́мять твою́.

И ны́нѣ, богоро́диченъ:

Треволне́ніи страстны́ми, безсо́вѣстный а́зъ обурева́емь, Чи́стая, призва́ю Тя́ те́плѣ: да не пре́зриши мене́, окая́ннаго, поги́бнути, бе́здну милосе́рдія ро́ждши, ра́звѣ бо Тебе́ наде́жды не и́мамъ, да не враго́мъ у́бо обра́дованіе и смѣ́хъ, надѣ́явся на Тя́, явлю́ся, и́бо мо́жеши, ели́ко хо́щеши, я́ко Ма́ти су́щи всѣ́хъ Бо́га.]

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Уврачу́й неисцѣ́льно боля́щаго мя́, безме́здный врачу́, отъ Бо́га дарова́ніе исцѣле́ній пріе́мый, и не посрами́ мене́, отъ моего́ упова́нія съ вѣ́рою моля́щагося ти́.

Умерщвля́ющія мя́ болѣ́зни, Пантелеи́моне, лѣчба́ми твои́ми исцѣли́, и ко здра́вію привлецы́, я́ко да съ ра́достію и весе́ліемъ сла́влю тя́, достоблаже́нне.

Глаго́лы моя́ болѣ́зненныя услы́ши, свя́те, вопію́ ти́ ра́бъ тво́й, я́коже дре́вле слѣпа́го, исцѣли́, молю́ся, отча́яннаго и ко а́ду прибли́жшагося.

Богоро́диченъ: Я́ко всѣ́хъ Влады́цѣ съ вѣ́рою ти́ мо́лимся, принеси́ моле́ніе Сы́ну Твоему́ и Бо́гу на́шему, да отъ обдержа́щей бѣды́ изба́витъ раба́ Твоего́, Чи́стая.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Ты́ ме́ртва дре́вле воскреси́лъ еси́, Пантелеи́моне, та́кожде помози́ и сему́ рабу́ твоему́, мо́лимся ти́, и соверше́нное исцѣле́ніе тому́ вско́рѣ да́руй.

Цѣли́ти мно́гихъ неду́ги, съ вѣ́рою къ тебѣ́ притека́ющихъ, та́кожде и мене́ исцѣли́, и не посрами́ моего́ упова́нія, не постыди́ мя́, му́чениче Пантелеи́моне.

Исто́чникъ сы́й мно́гихъ даро́въ Ду́ха, Пантелеи́моне, утоли́ го́ресть болѣ́зни моея́, и исцѣли́, блаже́нне, лю́тѣ разсла́бленнаго.

Богоро́диченъ: Я́ко о́гнь снѣда́етъ мя́, Пречи́стая Влады́чице, неду́гъ, отъ него́же изба́ви мя́, и спаси́ мольба́ми Твои́ми, я́ко Жи́знь всѣ́хъ неизрече́нно ро́ждшая.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Блаже́нныхъ наде́ждъ получи́въ дарова́ніе, и мою́ наде́жду испо́лни, внеза́пу спаси́ мя отъ обдержа́щія мя́ сме́ртныя болѣ́зни, Пантелеи́моне.

Мо́ре обурева́етъ мя́ неду́говъ, приста́нище тя́ ти́хое яви́ ми, свя́те, твою́ спаси́тельную по́мощь низпосла́въ, вопіе́тъ ти́ ра́бъ тво́й.

Уны́нія, блаже́нне, ражже́нія и пренемога́нія тяготу́ облегчи́ къ твоему́ заступле́нію притека́ющаго, Пантелеи́моне.

Богоро́диченъ: Те́плую Твою́, Пречи́стая, по́мощь одожди́ рабу́ Твоему́, лю́тѣ горя́щему грѣхи́, и тѣле́сными неду́ги одержи́мому, Препѣ́тая.

[Конда́къ, гла́съ 5-й:

Подража́тель сы́й Ми́лостиваго, и исцѣле́ній благода́ть отъ Него́ пріе́мъ, страстоте́рпче и му́чениче Христа́ Бо́га, моли́твами Твои́ми душе́вныя на́ша неду́ги исцѣли́, отгоня́ при́сно борца́ собла́зны отъ вопію́щихъ вѣ́рно: спаси́ ны, Го́споди.

Икосъ:

Безсре́бренника па́мять, до́бляго страда́льца, вѣ́рнаго цѣле́бника, благоче́стно воспое́мъ, христолю́бцы, да пріи́мемъ ми́лость, па́че же оскве́рнши, я́коже и а́зъ, своя́ хра́мы: душа́мъ бо и тѣ́ломъ, возлю́бленніи, исцѣле́нія подава́етъ. Потщи́мся у́бо, вѣ́рная бра́тія, въ сердца́хъ на́шихъ имѣ́ти его́ крѣ́пость, избавля́юща отъ ле́сти вопію́щія: спаси́ ны, Го́споди.]

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Пребы́лъ еси́ неподви́жимъ во вре́мя муче́нія, Пантелеи́моне, тѣ́мже лю́тѣ одержи́маго лю́тыми болѣ́зньми, и бѣ́дствующа исцѣли́ раба́ твоего́, да вѣ́рою сла́витъ заступле́ніе твое́.

Ми́лостію ви́дѣвъ тя́ богатя́щася Бо́гъ многоми́лостивый, му́дре Пантелеи́моне, благода́ть ти́ дарова́ подава́ти исцѣле́нія; тѣ́мже ти́ молю́ся прилѣ́жно, ума́ моего́ неду́ги исцѣли́.

Узы врага́ злодѣ́я духо́внымъ ору́жіемъ, му́дре, расто́рглъ еси́, тѣ́мже мо́лимся ти́: неду́гомъ свя́зана и бѣ́дствующа исцѣли́ боля́щаго, да при́сно почита́емъ заступле́ніе твое́.

Богоро́диченъ: Исцѣли́ сокруше́ніе человѣ́ческое, Пречи́стая, ро́ждшая Бо́га неизрече́нно, Того́ у́бо моли́, я́ко Преблага́го, исцѣле́ніе ми́ пода́ти, Дѣ́во, рабу́ Твоему́, лю́тѣ стра́ждущему.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Да́нъ бы́лъ еси́ вѣ́рнымъ огражде́ніе, стѣна́ и врачевство́, свя́те, изря́дное, тѣ́мже, моя́ я́звы душе́вныя, му́дре, исцѣли́, и облегчи́ болѣ́зни тѣле́сныя, Пантелеи́моне, лю́тѣ обдержа́щія мя́.

Къ твоему́ ми́лостивому покро́ву притека́ющимъ отъе́млеши вся́ку болѣ́знь, и ны́нѣ посѣти́ прибѣга́юща съ вѣ́рою къ тебѣ́, свя́те, раба́ твоего́, и изба́ви многообра́зныхъ неду́гъ.

Богоро́диченъ: Напра́ви, Чи́стая, къ приста́нищу здра́вія неду́гомъ бѣ́дствующа, и во глубину́ погружа́ема, и не да́ждь поги́бнути ми́, Боже́ственной по́мощи твое́й любо́вію и́щуща, е́ю же вѣ́рные спаса́ются.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Яко свѣ́тъ, я́ко со́лнце возсія́лъ еси́, блаже́нне, луча́ми исцѣле́ній всѣ́хъ просвѣща́я, тѣ́мже съ вѣ́рою мо́лимся ти: отъ неду́гъ и тя́жкія тмы́ вско́рѣ изба́ви лю́тѣ обурева́емаго.

Тебе́ ны́нѣ мо́лимъ, святы́й Пантелеи́моне, тебѣ́ припа́даемъ и те́плѣ мо́лимся, сме́ртною болѣ́знію одержи́маго отъ навѣ́та лю́тыхъ неду́гъ посѣти́въ исцѣли́, да любо́вію ублажа́етъ тя́.

Де́нь возсія́й здра́вія рабу́ твоему́, лежа́щему въ нощи́ лю́таго неду́га, да благода́рственнымъ се́рдцемъ пріи́детъ въ честны́й ти́ хра́мъ, твою́ исповѣ́дуя благода́ть, Пантелеи́моне.

Богоро́диченъ: Блага́я Влады́чице! Ма́ніемъ Твои́мъ милосе́рдымъ приосѣни́ огорче́ннаго мя́ грѣхи́ мно́гими, и обдержа́щей мя́ болѣ́зни и не́мощей изба́ви, да благода́рственно ублажа́ю Тя́, Влады́чице, ю́же по достоя́нію блажа́тъ вси́ ро́ди.

Источникъ: Слу́жба и Ака́ѳістъ свято́му великому́ченику и цѣли́телю Пантелеи́мону. — Иждиве́ніемъ Ру́сскаго Пантелеи́монова монастыря́, что́ на Аѳо́нѣ. — М.: Въ Сѵнода́льной Тѵпогра́фіи, 1883. — C. 96-106.

/ Къ оглавленію раздѣла /


Наверхъ / Къ титульной страницѣ

0