Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 27-й де́нь.
Слу́жба свято́му великому́ченику и цѣли́телю Пантелеи́мону.

НА МАЛѢЙ ВЕЧЕРНИ,
На Го́споди воззва́хъ, стихи́ры на 4, гла́съ 1:

Страстоте́рпче Пантелеи́моне прехва́льне, отъ Христо́вы любве́, ни о́гнь, ни ра́ны, ни ме́чь, ни и́ны му́ки разлучи́ти тя́ возмого́ша, но, му́жески ста́въ въ Христо́вомъ исповѣ́даніи посредѣ́ мучи́телей, пострада́лъ еси́, богому́дре до конца́, и ны́нѣ, вѣнцено́сецъ, лику́я на небесѣ́хъ, прилѣ́жно моли́ся о душа́хъ на́шихъ.

Да ра́дуются собо́ры вѣ́рныхъ по все́й земли́ въ пра́зднственный де́нь па́мяти страстоте́рпца Христо́ва Пантелеи́мона, стра́сть пріе́мшаго за Иже стра́сть кре́стную претерпѣ́вшаго, Царя́ Христа́, и горды́ню безбо́жныхъ низложи́вшего де́рзостно, его́же мо́лимъ прилѣ́жно, во дворы́ ра́йскія дости́гнути вѣ́рою творя́щимъ па́мять его́.

Сла́ва:

До́бляго страда́льца Пантелеи́мона, по благоче́стіи до́брѣ подвиза́вшася, пріиди́те, лю́діе, воспои́мъ, глаго́люще: ра́дуйся, тве́рдый вѣ́ры побо́рниче; ра́дуйся, Христа́ имѣ́вый въ себѣ́, я́коже Па́велъ; ра́дуйся, пла́вающихъ небу́рное приста́нище; ра́дуйся, на́ша похвало́ и Це́ркви вѣ́рныхъ ра́дованіе.

И ны́нѣ, богоро́диченъ дне́.

На стихо́внѣ стихи́ры, гла́съ 2.

Возсія́ дне́сь сла́вная па́мять твоя́, Пантелеи́моне многострада́льне, созыва́ющи на́съ, празднолю́бцевъ, на хвалу́ и сла́ву Христу́ Бо́гу на́шему, въ тебѣ́ исто́чникъ чуде́съ на́мъ я́вльшему. Тѣ́мже, притека́юще къ честны́мъ моще́мъ твои́мъ, исцѣле́ній дарова́нія пріе́млемъ, вѣнча́вшаго тебе́ Спа́са Христа́ непреста́нно сла́вяще.

[или́ се́й:]

Благоче́стіе возлюби́въ, му́чениче, ма́терне, избѣжа́въ же му́жески оте́ческаго преще́нія, Христу́ Бо́гу послѣ́довалъ еси́.

Сти́хъ: Пра́ведникъ, я́ко фи́никсъ, процвѣте́тъ,* [я́ко ке́дръ, и́же въ Лива́нѣ, умно́жится].

Возсія́лъ еси́ на́мъ отъ Никомидíи, я́ко со́лнце, преблаже́нне, прогоня́я тму́ мíра заря́ми чуде́съ твои́хъ.

Сти́хъ: Насажде́ни въ дому́ Госпо́дни* [во дво́рѣхъ Бо́га на́шего процвѣту́тъ].

Просла́ви твою́, Богому́дре, въ концѣ́ мíра па́мять Христо́съ, Того́ бо жела́я, кро́вь свою́ излія́лъ еси́.

Сла́ва:

Добро́то страда́льцевъ, благолѣ́піе му́чениковъ, царе́мъ храни́телю, пріими́ ны́нѣ хвалу́ вѣ́рою сла́вящихъ тя́.

И ны́нѣ:

Горѣ́ святы́хъ ли́цы, Богоро́дице Дѣ́во, пою́тъ Тя́ съ до́льными, сла́вяще непреста́нно рождество́ Твое́, Пречи́стая.


НА ВЕЛИЦѢЙ ВЕЧЕРНИ,
На Го́споди воззва́хъ, стихи́ры, гла́съ 4. Подо́бенъ: Зва́нный свы́ше.

Иже по достоя́нію* зва́нъ бы́въ Пантелеи́монъ,* егда́ человѣколю́бное* всѣ́мъ просте́рлъ еси́ ду́шъ попече́ніе,* и тѣле́съ исцѣле́ніе показу́я,* тогда́ тезоиме́ннымъ* зва́ніемъ обогати́лся еси́,* добродѣ́тели воздая́ніе* и благоче́стія возме́здіе, му́чениче, обрѣ́тъ,* вѣнцено́сецъ и непобѣди́мъ во́инъ я́влься* Христа́ Бо́га на́шего.* Его́же моли́,* спасти́ и просвѣти́ти ду́ши на́ша.

Иже отъ невеще́ственныхъ исто́чникъ Спаси́теля,* Боже́ственныхъ исцѣле́ній* при́сно благода́ть почерпа́я, и бога́тно излива́я,* и подава́я приступа́ющимъ къ тебѣ́, всеблаже́нне,* всѣ́хъ сла́вное твое́ и всесвяще́нное,* и свѣтоно́сное торжество́* вѣ́рно соверша́ющихъ,* благода́тію Боже́ственною си́хъ озари́.* Богоподо́бнымъ пома́занъ именова́ніемъ,* я́вѣ и бла́гостію,* е́йже моли́* всѣ́мъ дарова́тися, пою́щимъ тя́.

Му́ками мно́гими искуси́ся* твоя́ ны́нѣ огнепа́льная любо́вь,* ко е́же су́щему жела́нію,* мо́ремъ и огне́мъ* зави́стно бори́мь.* Тѣ́мже, злонача́льнаго испрове́ргъ,* живоно́сное дѣ́йство Утѣ́шителя* я́вѣ прія́тъ богатода́тельное.* Еюже и жи́ва пресла́вно уме́ршаго,* богому́дре, показа́лъ еси́,* и разли́чная исцѣле́нія* содѣ́лалъ еси́, преблаже́нне.

Ины стихи́ры, гла́съ 2. Самогла́сны, Анато́ліево:

Безме́здно благода́ть дае́ши человѣ́комъ, Пантелеи́моне му́чениче сла́вне, и ду́хи отго́ниши призыва́ніемъ Христо́вымъ, и слѣпы́мъ ви́дѣти да́руеши, я́ко Того́ уго́дникъ и́скренній; но моли́, врачу́ всеблаже́нне, дарова́ти мíру ми́ръ тве́рдъ, и тя́ лю́бящимъ ве́лію ми́лость.

Ма́тере благочести́выя возжела́лъ еси́ вѣ́ру, о́тчее испра́вилъ еси́ нече́стіе, Ермола́я бо утве́рждся уче́ніи, си́мъ и креще́ніе соверши́лъ еси́, Пантелеи́моне му́чениче сла́вне. Ми́лостиваго Бо́га, неду́гующихъ врачу́ и страсте́й отгони́телю, моли́ изба́витися отъ напа́стей, вѣ́рою творя́щимъ пречестну́ю па́мять твою́.

Отри́нулъ еси́ пре́лесть отца́, всесла́вне, и словеса́ ма́терня смы́сленно пріе́мь, па́че зла́та пло́дъ прине́слъ еси́, по Госпо́дню гла́су, и вра́чь изря́денъ яви́лся еси́, Пантелеи́моне, му́чениче сла́вне, ше́ствуя же благода́ти путе́мъ, обрѣ́лъ еси́ лежа́ща ни́зу младе́нца, ехи́дною угрызе́на, и къ Бо́гу моли́тву сотвори́въ, и прилѣ́жно помоли́вся, а́біе о́трока воскреси́лъ еси́ и звѣ́ря растерза́лъ еси́. Тѣ́мже помина́й на́съ, вѣ́рою творя́щихъ твою́ па́мять, я́ко да обря́щемъ ми́лость въ де́нь су́дный.

Сла́ва, гла́съ 6. Византíево:

Возсія́ дне́сь честна́я па́мять безсре́бреника, вѣ́рныя созыва́ющи на трапе́зу та́йную, и къ торжеству́ пра́зднственному водя́щи празднолю́бныхъ составле́нія, наста́ бо ны́нѣ на́мъ чудодѣ́йственный вра́чь, неду́ги всѣ́мъ исцѣля́яй, Пантелеи́монъ, тве́рдый страда́лецъ, и мо́лится прилѣ́жно Го́сподеви, спасти́ся душа́мъ на́шимъ.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́ и чте́нія три́.

Проро́чества Иса́іина чте́ніе.

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры, гла́съ 1. Византíево:

По́двигомъ до́брымъ подвиза́лся еси́ и тече́ніе сконча́лъ еси́ муче́нія твоего́, му́чениче Пантелеи́моне, тѣ́мже въ вы́шнихъ со а́нгелы лику́еши, досто́йно болѣ́зней твои́хъ пріе́мъ вы́шнее Ца́рство, моли́ у́бо, врачу́ всеблаже́нне, дарова́ти на́мъ ве́лію ми́лость.

Гла́съ 2:

Кíими пѣ́сненными добро́тами тебе́, Пантелеи́моне, почти́мъ? Тѣле́сною красото́ю и душе́вною добро́тою свѣ́тло просіява́юща, у́мнымъ раче́ніемъ просвѣще́нна и ра́зума хи́тростію укра́шенна, ю́на во́зрастомъ, вѣ́дца же смы́сломъ, возра́стшаго Боже́ственными уче́ніи и стяжа́вшаго Христа́ усе́рдною любо́вію.

Кíими пѣ́сньми тебе́, Пантелеи́моне, возвели́чимъ? Его́же па́че естества́ словесы́ и дѣ́лы просла́ви Госпо́дь и мно́жествомъ возвы́си чуде́съ, его́же заре́ю мно́гихъ даро́въ просвѣти́ и сла́вою вѣнце́въ Боже́ственныхъ украси́, его́же въ бѣда́хъ предста́теля тре́бующимъ дарова́ Христо́съ Бо́гъ на́шъ, имѣ́яй ве́лію ми́лость.

Кíими похва́льными пѣ́сньми тебе́, Пантелеи́моне, возвели́чимъ? Христоподо́бною благосты́нею озаре́нна и подаю́ща всѣ́мъ прося́щимъ ве́лію ми́лость, Боже́ственнымъ тезоимени́тствомъ укра́шенна и дѣ́лы Всеми́лостиваго показа́нна, я́ко приснотеку́щая рѣка́ воды́ живы́я, исцѣле́нія пролива́юща притека́ющимъ къ тебѣ́ съ вѣ́рою.

Гла́съ 5, самогла́сенъ:

Всесвѣ́тлая му́ченика па́мять сія́етъ, я́ко со́лнце конце́мъ, и непреста́нно подава́етъ вѣ́рнымъ исцѣле́нія, неду́ги отгоня́ющи и стра́сти исцѣля́ющи, мо́лится бо при́сно Пантелеи́монъ Христу́ Бо́гу, дарова́ти душа́мъ на́шимъ ве́лію ми́лость.

Сла́ва, гла́съ то́йже. Византíево:

Пріиди́те, мучениколю́бцы, единому́дренно вси́ восхва́лимъ страстоте́рпца Христо́ва, по благоче́стіи до́брѣ подви́гшася и по́честію побѣ́дною одѣ́явшася, свѣти́льника вселе́нныя и присносія́ющую звѣзду́ Це́ркве. Тѣ́мже и къ нему́, вопію́ще, рце́мъ: Пантелеи́моне, му́чениче сла́вне, бу́ди на́мъ душа́мъ же и тѣ́ломъ спасе́ніе и покро́въ недви́жимь, моля́ся ко Го́споду о на́съ непреста́нно, во е́же спасти́ на́съ.

И ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую Предста́тельницу и прибѣ́жище ду́шъ на́шихъ.

На стихо́внѣ стихи́ры, гла́съ 1-й:

До́бляго страда́льца Пантелеи́мона, по благоче́стіи подвиза́вшася, пріиди́те, лю́діе, воспои́мъ, глаго́люще: ра́дуйся, тве́рдый вѣ́ры побо́рниче по проро́цѣхъ и апо́столѣхъ; ра́дуйся, Христа́ въ себѣ́ имѣ́вый, подо́бяся дѣ́лы Па́влу; ра́дуйся, пла́вающимъ небу́рное приста́нище; ра́дуйся, на́ша похвало́ и Це́ркве вѣ́рныхъ ра́дованіе.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Отъ младе́нчества до́брую стезю́ обрѣ́тъ, ми́лостію Христо́вою пома́завъ се́рдце, болѣ́зни цѣли́ши прося́щимъ усе́рдно, отню́дуже и уме́ршего воздви́глъ еси́ моли́твами твои́ми, и воспрія́лъ еси́ небе́сное Ца́рствіе, Пантелеи́моне всеблаже́нне.

Сти́хъ: Насажде́ни въ дому́ Госпо́дни* во дво́рѣхъ Бо́га на́шего процвѣту́тъ.

Страстоте́рпца Христо́ва похва́лимъ, му́дрого Пантелеи́мона, и́же змíя уби́ си́лою кре́стною, и моли́твами Ермола́евыми о́трока воскреси́, и несвяще́нной посрами́ му́дрости словеса́, и́же и мо́лится непреста́нно, всѣ́мъ пода́ти согрѣше́ній проще́ніе.

Сла́ва, гла́съ 8. Византíево:

Ма́тернее возлюби́въ благоче́стіе, о́тчимъ же безбо́жіемъ возгнуша́вся, Врачу́ ду́шъ во́инъ бы́въ, враче́бнѣ себе́ наказа́лъ еси́ и, Боже́ственною благода́тію во обои́хъ благоиску́сенъ, страсте́й всегуби́тель и ду́шъ вра́чь показа́лся еси́, но, я́коже въ страда́ніихъ тве́рдое, и въ моли́твахъ приснопребыва́тельное стяжа́въ, Пантелеи́моне, му́чениче Христо́въ, прилѣ́жно моли́, спасти́ся душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

Тропа́рь, гла́съ 3:

Страстоте́рпче святы́й и цѣле́бниче Пантелеи́моне, моли́ ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.


НА УТРЕНИ,
По 1-й стихоло́гіи сѣда́ленъ, гла́съ 1:

Ма́тернее благоче́стіе соблю́лъ еси́, блаже́нне, о́тчее же нече́стіе благоче́стно испра́вилъ еси́, сего́ ра́ди и благода́ть прія́лъ еси́ отъ Бо́га Вседержи́теля, врачева́ти немощству́ющихъ болѣ́зни, му́чениче сла́вне Пантелеи́моне, всѣ́хъ съ вѣ́рою и любо́вію къ тебѣ́ прибѣга́ющихъ.

Сла́ва, и ны́нѣ, богоро́диченъ:

Наде́ждо христіа́нъ, Всесвята́я Дѣ́во, Его́же родила́ еси́, Бо́га, па́че ума́ и сло́ва, непреста́но моли́ съ небе́сными си́лами дарова́ти отпуще́ніе согрѣше́ній всѣ́мъ на́мъ и исправле́ніе житія́, вѣ́рою и любо́вію Тя́ сла́вящимъ.

По 2-й стихоло́гіи сѣда́ленъ, гла́съ 4:

Яко во́ина Христо́ва непобѣди́маго и борца́ му́жественнѣйшаго, тя́ вси́, вѣ́рніи, восхваля́емъ, му́чениковъ добро́то, вѣ́рою пра́зднующе святу́ю па́мять твою́, му́чениче всехва́льне. Честны́я же по́двиги согла́сно славосло́вимъ, му́дре, и Спаси́теля Христа́ велича́емъ.

Сла́ва, и ны́нѣ, богоро́диченъ:

Родила́ еси́ неизрече́нно Бо́га, пре́жде вѣ́къ отъ Отца́ возсія́вшаго, и въ послѣ́дняя времена́ отъ чре́ва Твоего́, Богоро́дице, я́вльшагося. Свѣ́тъ во открове́ніе язы́ковъ и спасе́ніе всего́ мíра, въ просвѣще́ніе во тмѣ́ сѣдя́щимъ и утѣше́ніе вѣ́рою пою́щимъ Тя́. Сего́ у́бо моли́ просвѣти́ти мя́, Влады́чице, свѣ́томъ ра́зума, и пода́ти се́рдцу моему́ умиле́ніе, да омы́ю слеза́ми грѣхи́ моя́.

Велича́ніе:

Велича́емъ тя́, страстоте́рпче святы́й, великому́чениче и цѣле́бниче Пантелеи́моне, и чте́мъ честна́я страда́нія твоя́, я́же за Христа́ претепѣ́лъ еси́.

По поліеле́и сѣда́ленъ, гла́съ 4:

Торжеству́ютъ дне́сь собо́ри вѣ́рныхъ, честны́я по́двиги твоя́, Пантелеи́моне страстоте́рпче, прославля́я Животода́вца, яви́вшаго тебе́ крѣ́пкаго на́мъ предста́теля.

Сла́ва, и ны́нѣ, богоро́диченъ:

Ма́терь Бо́жію Тя́ свѣ́мы вси́, Дѣ́ву вои́стинну и по Рождествѣ́ я́вльшуся, любо́вію притека́ющіи къ Твое́й бла́гости: Тебе́ бо и́мамы, грѣ́шніи, Предста́тельницу, Тебе́ стяжа́хомъ въ напа́стехъ спасе́ніе, еди́ну Всенепоро́чную.

Степе́нна, 1-й антифо́нъ 4-го гла́са. Проки́менъ, гла́съ 4: Пра́ведникъ, я́ко фи́никсъ, процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ Бо́га на́шего процвѣту́тъ. Вся́кое дыха́ніе... Ева́нгеліе отъ Луки́, зача́ло 106.

По 50-мъ псалмѣ́ стихи́ра, гла́съ 2:

Ми́лостиваго Христа́, Пантелеи́моне, моли́ ны́нѣ, врачу́ Бо́жій, изба́вити мя́ страсте́й и поми́ловати мя́.

Гла́съ 3:

Возсія́ дне́сь сла́вная па́мять твоя́, Пантелеи́моне многострада́льне, созыва́ющи на́съ, празднолю́бцевъ, на хвалу́ и сла́ву Христу́ Бо́гу на́шему, въ тебѣ́ исто́чникъ чуде́съ на́мъ я́вльшему, тѣ́мъ, притека́юще къ ра́цѣ моще́й твои́хъ, исцѣле́ній дарова́нія пріе́млемъ, вѣнча́вшаго тебе́ Спа́са Христа́ воспѣва́юще во вѣ́ки, непреста́нно сла́вяще.

Кано́нъ Богоро́дицы со ирмосо́мъ на 6 и свята́го на 8. Творе́ніе Ѳеофа́ново, его́же краегране́сіе: Пантелеи́мона, изря́днаго му́ченика, пою́.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Присту́пль усе́рдно ко Христу́, пре́жде сконча́нія е́же о Христѣ́, мертвеца́ пе́рвѣе воздви́глъ еси́. Ны́нѣ же мя́, пребога́те, умерщвле́на грѣхо́внымъ угрызе́ніемъ, твои́ми моли́твами, о Пантелеи́моне, оживотвори́.

Возсія́, я́коже звѣзда́, нося́ во ю́ности ста́ростный и богому́дрый ра́зумъ, добро́тою же тѣ́ла благолѣ́піе души́ стяжа́въ, Препросла́вленному Сло́ву яви́лся еси́ прекра́сенъ.

Умертви́вся мíру, и во Христа́, блаже́нне, одѣ́явся ба́нею креще́нія, бы́лъ еси́ богоно́сенъ орга́нъ, и прія́телище дѣ́йства Ду́ху, всѣ́мъ угожда́я, всѣ́хъ уврачу́я неду́ги.

Прему́дрость сестру́ себѣ́ притвори́въ, и прича́стникъ жи́зни ведо́мь, отъ нея́ почти́лся еси́ и вѣнце́мъ дарова́ній украси́лся еси́, Боже́ственныя зари́, блаже́нне, облиста́я свѣ́тлостію.

Богоро́диченъ: Благослове́нми, Пресвята́я Чи́стая, естество́, уда́лено преслуша́ніемъ бы́вшее отъ Зижди́теля, Христа́ ро́ждши, вѣнча́ла еси́, и тлѣ́нія свободи́ла еси́. Тѣ́мже, ра́дующеся, вси́ вѣ́рніи Тя́ ублажа́емъ.

Пѣ́снь 3.

Ирмо́съ: Процвѣла́ е́сть пусты́ня, я́ко кри́нъ, Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Словеса́ Ду́ха услы́шавъ, бы́лъ еси́ я́ко земля́ до́брая и благопло́дная, пріе́мый сѣ́мя многоцѣ́нно, и роди́вый, треблаже́нне, спасе́ніе душа́мъ.

Умертви́лъ еси́ мудрова́ніе зміи́на угрызе́нія, и ду́шу оживи́лъ еси́, богодухнове́нно возроди́вся и Царю́ всѣ́хъ предстоя́.

Посрами́лъ еси́ безбо́жное мучи́телей повелѣ́ніе, и ко Христу́ прите́клъ еси́, вмѣ́сто всѣ́хъ Сего́ стяжа́въ, и бы́лъ еси́, богому́дре, вели́кій купе́цъ.

Ма́тере твоея́ благоче́стіе возлю́бль, сла́вне, о́тчее же возненави́дѣлъ еси́ безбо́жіе многомяте́жное, я́ко имѣ́я ра́зумъ, лу́чшее избра́лъ еси́.

Богоро́диченъ: Нося́й Боже́ственнымъ манове́ніемъ всю́ тва́рь Госпо́дь, на руку́ но́сится Твое́ю, Дѣ́во. Его́же ны́нѣ моли́, изба́вити отъ бѣ́дъ пою́щія Тя́.

Сѣда́ленъ, гла́съ 4. Подо́бенъ: Удиви́ся Іо́сифъ.

До́бляго страда́льца благоче́стія Христо́ва восхва́лимъ свѣ́тло Пантелеи́мона, вѣ́рніи, псалмы́ и пѣ́нми и пѣ́сньми духо́вными, и́мже мучи́тельство неви́димаго врага́ си́лою Боже́ственною попра́ся, и неду́говъ исцѣле́ніе бога́тно отъ Го́спода дарова́ся, творя́щимъ вѣ́рно Боже́ственный и честны́й пра́здникъ его́.

Пострада́лъ еси́ му́жественне за Христа́, и, вѣ́ру проповѣ́давъ отцу́ твоему́, извле́клъ еси́ того́, всехва́льне, изъ ро́ва нече́стія, и, мучи́телей не убоя́вся безбо́жнаго умышле́нія, де́моновъ посрами́лъ еси́ безси́льную де́рзость. Сего́ ра́ди благода́ть отъ Христа́ стяжа́лъ еси́, врачева́ти болѣ́зни и изгони́ти ду́хи вра́жія. Пантелеи́моне всехва́льне, моли́ся Христу́ Бо́гу прегрѣше́ній оставле́ніе дарова́ти пра́зднующимъ любо́вію святу́ю па́мять твою́.

Сла́ва: Ермола́я му́драго, му́чениче, слове́съ послу́шалъ еси́ и оста́вилъ еси́ а́біе худо́жество земно́е, я́ко ме́рзко, я́ко не крѣ́пко, я́ко губи́телно, имѣ́я Христо́вы стра́сти, уче́нія жи́зни въ се́рдцѣ твое́мъ, неисцѣ́льно стра́ждущимъ здра́віе, Пантелеи́моне, да́руя. Тѣ́мже моли́ся о творя́щихъ любо́вію па́мять твою́.

И ны́нѣ, богоро́диченъ: Треволне́ніи страстны́ми, безсо́вѣстный а́зъ обурева́емь, Чи́стая, призва́ю Тя́ те́плѣ: да не пре́зриши мене́, окая́ннаго, поги́бнути, бе́здну милосе́рдія ро́ждши, ра́звѣ бо Тебе́ наде́жды не и́мамъ, да не враго́мъ у́бо обра́дованіе и смѣ́хъ, надѣ́явся на Тя́, явлю́ся, и́бо мо́жеши, ели́ко хо́щеши, я́ко Ма́ти су́щи всѣ́хъ Бо́га.

Пѣ́снь 4.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Послѣ́дуя Влады́цѣ любо́вію, расточи́лъ еси́ бога́тство ни́щимъ, себе́ обнажа́я къ страда́нію, е́же и проше́лъ еси́, вѣ́чныя наде́жды прови́дѣвъ.

Хвале́нія Бо́гу же́ртву прине́слъ еси́, я́вѣ возгнуша́вся и́дольскихъ тре́бъ, все́ же шата́ніе нечести́выхъ, страстоте́рпче, попра́лъ еси́.

Снѣда́емымъ за́вистію, и гнѣ́вомъ борю́щимъ, непобори́мую си́лу си́мъ предста́вилъ еси́, му́чениче, и побѣди́лъ еси́ злочести́вое томле́ніе вооружи́вся.

Иже ста́рца Симео́на рука́ми Держи́мый, ста́рца тя́ глаго́лы, Пантелеи́моне, улови́ къ Боже́ственному разумѣ́нію, и ко мно́гихъ спасе́нію и избавле́нію.

Богоро́диченъ: Юныя и дѣ́вы во слѣ́дъ Тебе́ потеко́ша, Дѣ́ву и Отрокови́цу Тя́ и Ма́терь зря́ще. Еди́на бо обоя́ во еди́но собрала́ еси́, несказа́нно Богоневѣ́сто.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Ра́достно по́двиги подъя́лъ еси́ муче́нія, огражде́нъ си́лою Боже́ственною и терпѣ́ніемъ, тве́рдо муче́нія подъе́мля, ра́дуяся вопія́лъ еси́: ино́го бо ра́звѣ Тебе́ Бо́га не зна́емъ.

На по́двигъ борьбы́ вступи́въ, блаже́нне, Боже́ственною си́лою превозмо́глъ еси́ безбо́жныхъ нечести́вое тира́нство и неи́стовство идолослуже́нія, обле́кшись во Христа́, Судію́ и Вѣнча́теля по́двиговъ.

Юношеско ты́ противле́ніе имѣ́я, и тве́рдостію души́ возставле́ніе стяжа́въ, вся́ку я́зву до́блественнѣ претерпѣ́лъ еси́, и му́жескимъ, блаже́нне, умо́мъ, благода́тію Боже́ственнаго Креста́ укрѣпля́емь.

Несогла́сное отри́ну вѣща́ніе заблу́ждшихъ, небе́снымъ уче́ніемъ, страда́лецъ и мно́гимъ спасе́нію пресла́вну бы́сть вино́вникъ, Твои́мъ дѣ́йствомъ, Христе́ укрѣпля́емь.

Богоро́диченъ: Рече́нія прему́дрыхъ и гада́нія вся́, Препросла́вленая, и проро́къ прорече́нія, Тя́ прообража́ху, проявле́нно напослѣ́докъ бы́ти Бо́жію Роди́телницу, ины́я бо ра́звѣ Тебе́ чи́стыя не зна́емъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Идолы ле́стныя оплева́лъ еси́, и возноси́мую пре́лесть упраздни́лъ еси́, чудодѣ́йствуя ди́вная, и творя́ исцѣле́нія, богому́дре.

Вѣне́чникъ показа́лся еси́, всеизря́дне, сквозѣ́ бо о́гнь ты́ проше́лъ еси́ и во́ду, и на колеси́ протяза́емь, пресла́вно погуби́лъ еси́ безу́мныя.

Мучи́телей суровство́ низложи́въ, неудо́бь носи́мая біе́нія тѣле́сная душе́вною крѣ́постію, пострада́лъ еси́, богому́дре, благода́тію.

Богоро́диченъ: Содержа́й концы́ земли́ я́ко Бо́гъ, Твои́ми рука́ми, Чи́стая, держи́тся, описа́ніемъ тѣ́ла, Иже Боже́ственнымъ зра́комъ неопи́санный.

Конда́къ, гла́съ 5:

Подража́тель сы́й Ми́лостиваго, и исцѣле́ній благода́ть отъ Него́ пріе́мъ, страстоте́рпче и му́чениче Христа́ Бо́га, моли́твами Твои́ми душе́вныя на́ша неду́ги исцѣли́, отгоня́ при́сно борца́ собла́зны отъ вопію́щихъ вѣ́рно: спаси́ ны, Го́споди.

Икосъ:

Безсре́бренника па́мять, до́бляго страда́льца, вѣ́рнаго цѣле́бника, благоче́стно воспое́мъ, христолю́бцы, да пріи́мемъ ми́лость, па́че же оскве́рншіи, я́коже и а́зъ, своя́ хра́мы: душа́мъ бо и тѣ́ломъ, возлю́бленніи, исцѣле́нія подава́етъ. Потщи́мся у́бо, вѣ́рная бра́тія, въ сердца́хъ на́шихъ имѣ́ти его́ крѣ́пость, избавля́юща отъ ле́сти вопію́щія: спаси́ ны, Го́споди.

Пѣ́снь 7.

Ирмо́съ: Тѣ́лу злато́му прему́дрыя дѣ́ти не послужи́ша, и въ пла́мень са́ми поидо́ша, и бо́ги и́хъ обруга́ша, среди́ пла́мене возопи́ша и ороси́ я́ а́нгелъ: услы́шася уже́ у́стъ ва́шихъ моли́тва.

Зако́нно стражда́, и побѣди́въ врага́, приста́нище благоути́шно су́щимъ въ мо́ри, сла́вне, обурева́емымъ бы́лъ еси́, свѣ́тъ же су́щимъ во тмѣ́ житія́, и пѣ́ти научи́лъ еси́: благослове́нъ Бо́гъ оте́цъ на́шихъ.

Блаже́нъ еси́ и добро́ тебѣ́ е́сть ны́нѣ, преблаже́нне, воспріи́мшему пребога́тную и блаже́нную наде́жду твою́, угото́ванную вѣ́рою Го́сподеви зову́щимъ: благослове́нъ Бо́гъ оте́цъ на́шихъ.

Святы́хъ ду́шы, и пра́ведныхъ ли́цы, и безпло́тныхъ чи́ни а́нгельстіи прія́ша, слико́вника тя́, блаже́нне, мече́мъ бо усѣ́ченъ бы́въ во главу́, пое́ши ра́дуяся: благослове́нъ Бо́гъ оте́цъ на́шихъ.

Богоро́диченъ: Ору́жіе е́же пре́жде дре́ва живо́тнаго, на́съ отлучи́вшее, ны́нѣ обраща́емо пріе́млетъ, зна́менавшіяся Кро́вію, изъ ре́бръ Сы́на Твоего́ изше́дшею, Пренепоро́чная. Благослове́на еси́, Бо́га пло́тію ро́ждшая.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Благопрія́тное твоея́ хи́трости, душе́вное ослѣпле́ніе о́тчее исцѣля́етъ, подаю́щее свѣ́тъ вѣ́рою, преблаже́нне, притека́ющимъ, и ко Спа́су Христу́ наставля́ющи.

За Христа́ закла́нъ бы́въ, къ вѣ́чнѣй жи́зни премину́лъ еси́, и богозва́ненъ яви́лся еси́, именова́ніемъ Бо́жіимъ, богому́дре. Тѣ́мъ почита́емъ тя́, и превозно́симъ Христа́ во вѣ́ки.

Витíйское отложи́въ лю́тое му́дрыхъ глумле́ніе, Христо́вымъ призыва́ніемъ, болѣ́зненыхъ страсте́й коре́нія посѣка́еши, исцѣля́я превознося́щія Христа́ во вѣ́ки.

Богоро́диченъ: Безсме́ртія зарю́ вѣ́мы исто́чника Тя́, Богоро́дице, я́ко ро́ждшую Сло́ва безсме́ртнаго Отца́, всѣ́хъ сме́рти избавля́ющаго, превознося́щихъ Его́ во вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Преста́вился еси́, ра́дуяся, къ жела́нію коне́чному, идѣ́же всели́вся, преблаже́нне, блаже́нный коне́цъ прія́ти вои́стинну сподо́бился еси́, сы́й со Влады́кою твои́мъ во вѣ́ки безконе́чныя.

Жела́ніе получи́лъ еси́, и любве́ твоея́ исполне́ніе, ка́плющей еще́ те́плѣй кро́ви, за Христа́ излія́вшейся, отъ Него́же, ра́дуяся, прія́лъ еси́ вѣнцы́ по́двиговъ твои́хъ.

Льво́въ уста́, и звѣре́й зія́нія, я́коже Даніи́лъ дре́вле, ты́ обузда́лъ еси́, вѣ́сть бо стыдѣ́тися, му́чениче, добродѣ́тели и безслове́сное естество́. Тѣ́мже тя́, пресла́вне, соше́дшеся ублажа́емъ.

Бога́тную бла́гость тебѣ́ Христо́съ да́руетъ, сокро́вище исцѣле́ній на́мъ да́руя, и всеми́лостива изволе́ніемъ тя́ пода́въ вся́кому скорбя́щему, и приста́нище ти́хое, и предста́теля, и защи́тителя.

Богоро́диченъ: Яко руно́, Всенепоро́чная, до́ждь небе́сный во утро́бѣ заче́нши, на́мъ родила́ еси́, тишину́ даю́щаго, я́ко Бо́га Того́ пою́щимъ и Тя́, Всепѣ́тую Богоро́дицу проповѣ́дающимъ.

Свѣти́ленъ. Подо́бенъ: Ученико́мъ.

Ми́лостивую твою́ ду́шу прови́дѣ Бо́гъ, Пантелеи́мона тя́ проповѣ́да, безсре́брено бо тре́бующимъ исцѣле́ніе источа́еши, свя́те, мучи́телей свирѣ́пство терпѣ́ніемъ твои́мъ побѣди́вый.

[Сла́ва, и ны́нѣ:]

Пантелеи́моне всему́дре, честны́хъ безсре́бренниковъ свяще́нная красото́, и боже́ственныхъ му́чениковъ великопобѣ́дная сла́во, свы́ше побѣ́ды испроси́ Импера́тору и мíру ми́ръ, и вѣ́рно сла́вящимъ тя́, свя́те, спасе́ніе, съ Богоро́дицею о всѣ́хъ моля́ся.

На хвали́техъ, стихи́ры на 4, гла́съ 8. Подо́бенъ: О, пресла́вного чудесе́!

Дѣ́ло помышле́нія Вы́шняго,* е́же на тебѣ́ бы́вшее,* свѣ́тло показа́ся,* тѣле́сныя бо стра́сти цѣли́ти я́вственно,* Пантелеи́моне, науча́емь,* ду́шъ обрѣ́лся еси́ вра́чь изря́денъ,* сло́вомъ благода́ти уврачу́я вся́* и мра́чныя ле́сти избавля́я,* къ тебѣ́ притека́ющія.

Ми́лости Бо́жіи подо́бяся,* Пантелеи́монъ я́вѣ именова́ся,* сугу́бо пріе́мъ и́мя* и подо́бное ве́щи.* Яко сострада́теленъ бо, ми́луеши всѣ́хъ,* сугу́бо подая́ си́мъ исцѣле́ніе,* пита́я и цѣля́,* и къ ра́зуму, сла́вне, наставля́я Боже́ственному* и пресвѣ́тлому Христо́ву, пребога́те.

Добро́тою, богому́дре, тѣле́сною* душе́вную добро́ту благоду́шно премѣни́лъ еси́,* и у́мное благолѣ́піе* плотско́ю красото́ю,* и зря́щія, му́чениче, удиви́лъ еси́,* зна́менми сія́я и чудесы́,* цвѣ́томъ ю́ности,* состарѣ́вшихся ра́зумъ пріе́мъ,* вѣ́рою же и благода́тію просвѣща́емь.

Гла́съ 5. Самогла́сенъ, Ге́рманово:

Всесвѣ́тлая му́ченика па́мять сія́етъ, я́ко со́лнце, конце́мъ, и непреста́нно подава́етъ вѣ́рнымъ исцѣле́нія, неду́ги отгоня́ющи и стра́сти исцѣля́ющи, мо́лится бо при́сно Пантелеи́монъ Христу́, дарова́ти душа́мъ на́шимъ ве́лію ми́лость.

Сла́ва, гла́съ 4. Византíево:

Дне́сь просія́ страстоно́сца па́мять, пріиди́те, вѣ́рніи, духо́вно возвесели́мся, и пѣ́снми сего́ вѣнча́емъ, и́бо неви́димаго врага́ си́лою кре́стною му́жески побѣди́лъ е́сть, и, мучи́телей безмѣ́рныхъ му́къ не убоя́вся, зако́нно по́честь прія́тъ Вы́шняго зва́нія, и ны́нѣ со а́нгелы вѣ́чно почива́етъ. Но, о му́чениче Христо́въ Пантелеи́моне, врачу́ неду́гующихъ и приста́нище обурева́емыхъ, не преста́й моля́ся ми́лостивому Бо́гу спасти́ся душа́мъ на́шимъ.

И ны́нѣ:

Богоро́дицу пѣ́сньми немо́лчными благоче́стно пое́мъ, вопію́ще: ра́дуйся, Горо́ свята́я, ра́дуйся, Престо́ле огнено́сный всѣ́хъ Царя́, ра́дуйся, Похвало́ а́нгеловъ и святы́хъ Сла́во.


НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Тимоѳе́ю, зача́ло 292. Аллилу́ія, гла́съ 2: Пра́ведникъ, я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. [Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ]. Ева́нгеліе отъ Іоа́нна, зача́ло 52. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Слу́жба и Ака́ѳістъ свято́му великому́ченику и цѣли́телю Пантелеи́мону. — Иждиве́ніемъ Ру́сскаго Пантелеи́монова монастыря́, что́ на Аѳо́нѣ. — М.: Въ Сѵнода́льной Тѵпогра́фіи, 1883. — C. 3-40, 73-81, 92-95.

/ Къ оглавленію раздѣла /


Наверхъ / Къ титульной страницѣ

0