Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 26-й де́нь.
Свята́го священному́ченика Ермола́я и и́же съ ни́мъ.

[ВЕЧЕРЪ,
На Го́споди, воззва́хъ:] стихи́ры, гла́съ 8. Подо́бенъ: О, пресла́внаго чудесе́!

Му́чениче страда́льче Ермола́е,* свяще́нную жи́знь* свяще́нно возжелѣ́лъ еси́,* святи́тель бы́въ Іису́са Вседержи́теля,* и нечи́стыя тмы́ спа́слъ еси́* честны́ми словесы́ твои́ми лю́ди благода́тію.* И преше́лъ еси́ къ премíрнымъ,* страда́льческою кро́вію омы́вся,* богоблаже́нне.

Ерми́ппа же, и Ермола́я,* и Ермокра́та вѣ́рно,* Госпо́дни му́ченики,* чу́дно страда́вшія,* и лука́ваго уби́вшія,* и омы́вшеся ба́нею,* никогда́же вторы́ми скве́рнами оскверня́емыя,* восхва́лимъ, священносла́вяще,* и тѣ́хъ па́мять пра́зднуимъ,* торжеству́юще.

Сла́ва, и ны́нѣ, богоро́диченъ:

Спаси́ мя́, Влады́чице Пречи́стая,* я́же Спа́са Христа́ неизрече́нно ро́ждшая,* Тя́ бо еди́ну стяжа́хъ предста́тельницу,* и необори́мую стѣ́ну,* и покро́въ, и ра́дованіе,* и души́ моея́ Боже́ственное утѣше́ніе.* Ты́ у́бо мя́ изба́ви неусыпа́ющаго че́рвія* и огня́ вѣ́чнующаго,* Ма́ти Христа́ Бо́га.

Крестобогоро́диченъ:

Тя ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, —* Ча́до сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ вся́ изба́вивый* милосе́рдіемъ Твои́мъ?

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.


[НА УТРЕНИ,]
Кано́нъ, его́же краегране́сіе: Пѣ́сньми почита́ю Ермола́я труды́. Іо́сифъ. Гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Пѣ́сньми свѣтоно́сную, и прехва́льную, и всесла́вную восхва́лимъ па́мять Ермола́я, Христа́ велича́юще.

Вели́ка твоя́ сла́ва бы́сть, Ермола́е всехва́льне, и́бо вели́каго Бо́га яви́лся еси́ уго́дникъ превели́къ.

Зако́нно проше́дъ, сла́вне, по́двигъ, попра́лъ еси́ беззако́ннующихъ на́глость, всесла́вный му́чениче Ермола́е.

Богоро́диченъ: Ми́лостива ми́, Дѣ́во, Христа́ сотвори́, Всенепоро́чная, въ де́нь Суда́ стра́шнаго осужде́нія изыма́ющи.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Си́лою укрѣпля́емь Вседѣ́теля, му́дре, духо́вною, си́льнаго, му́чениче, въ зло́бѣ крѣ́пость низложи́лъ еси́.

Зна́емь бы́лъ еси́ Вседержи́телю, свя́те, всезна́емы сло́вомъ твои́мъ боже́ственнымъ въ Не́мъ содѣ́лавъ.

Позна́, поуча́емь отъ твоего́, му́дре, ду́ха, Творца́ Пантелеи́монъ и зако́нно пострада́.

Богоро́диченъ: Изба́ви мя́, Всенепоро́чная, грѣхо́въ лю́тыя бу́ри и по́мысловъ, находя́щихъ неща́дно се́рдцу моему́.

Сѣда́ленъ, гла́съ 8. Подо́бенъ: Прему́дрости.

Свяще́нно житіе́ твое́ соверши́въ, свяще́нникъ показа́лся еси́ Изба́вителя, просвѣща́я вѣ́рою къ тебѣ́ приступа́ющія всегда́, и при кончи́нѣ, блаже́нне, боже́ственнѣй облиста́лъ еси́ муче́нія сія́ніемъ, и мíръ озари́лъ еси́. Тѣ́мже, свѣтоно́сную и святу́ю твою́ па́мять соверша́юще, пое́мъ тя́ и вѣ́рно ублажа́емъ, страстоте́рпче Ермола́е. Моли́ Христа́ Бо́га, грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца и Па́стыря и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Ше́ствія твоя́, Ду́хомъ Боже́ственнымъ иду́ще, запя́ша ше́ствія лука́ваго и пу́ть пра́въ мно́гимъ яви́шася.

Свяще́нникъ свяще́ненъ, му́ченикъ и́стиненъ бы́лъ еси́, достосла́вне Ермола́е, сего́ ра́ди тя́ вси́ восхваля́емъ.

Тве́рдымъ умо́мъ беззако́ннующему сопроти́влься, муче́нія вѣне́цъ прія́лъ еси́, му́жески пострада́въ, свяще́нне.

Богоро́диченъ: Якоже престо́лъ огнеобра́зенъ но́сиши Влады́ку, Богоблагода́тная, Его́же моли́ спасти́ мя, грѣхо́вною волно́ю обурева́ема.

Пѣ́снь 5.

Ирмо́съ: Отъ но́щи невѣ́дѣнія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Иже въ нощи́ ле́стнѣй одержи́мыя къ свѣ́ту наста́вилъ еси́ и мзду́ прія́лъ еси́, е́же сконча́тися кро́вію.

Христо́вы ору́жницы, Ерми́ппъ же и боже́ственный Ермола́й вку́пѣ съ Ермокра́томъ, священносло́віи да просла́вятся.

За честну́ю Тро́ицу тріе́ вку́пѣ пострада́вше, му́ченицы со тма́ми а́нгелъ ны́нѣ на небесѣ́хъ веселя́тся.

Богоро́диченъ: Тя́ предста́тельницу вси́, прибѣ́жище и тве́рдое заступле́ніе иму́ще, Дѣ́во, избавля́емся Тобо́ю вся́кія печа́ли.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Ермола́й, до́блій ору́жникъ, Ермокра́тъ и Ерми́ппъ вку́пѣ еди́нъ тве́рдъ пока́заша нра́въ, Еди́наго Бо́га надъ всѣ́ми проповѣ́давше, и, уме́рше за Христа́, небе́сныя вѣнцы́ прія́ша.

Кропле́ніи излія́нныхъ крове́й себѣ́ очервлени́вше багряни́цу страда́льцы и свѣ́тло одѣ́явшеся, Царю́ вѣко́въ предстоя́тъ, моля́щеся о на́съ со всѣ́ми вы́шними си́лами.

Науча́ется и́же въ Ду́сѣ Боже́ственнѣмъ тобо́ю Пантелеи́монъ вели́кій вѣ́рѣ пра́вѣй и, пострада́въ зако́нно, муче́нія тебѣ́ хода́тай бы́сть, Ермола́е, съ ни́мже Христа́ Бо́га о всѣ́хъ умоли́.

Богоро́диченъ: Бу́ря мя́ безмѣ́рныхъ согрѣше́ній смуща́етъ и во глубину́ отсыла́етъ вы́ну отча́янія, Дѣ́во, но, предвари́вши, ру́ку ми́ простри́ и да́ждь ми́ къ ти́химъ покая́нія приста́нищемъ дости́гнути.

Конда́къ, гла́съ 4. Подо́бенъ: Вознесы́йся.

Яко святи́тель благоче́стно пожи́въ и священномуче́нія вѣне́цъ прія́лъ еси́. Идольскія же́ртвы погаси́въ, до́брый па́стырь Христо́ва ста́да бы́лъ еси́, прему́дре, и Пантелеи́мону и́стинный учи́тель. Сего́ ра́ди почита́емъ тя́ пѣ́сньми, вопію́ще: отъ бѣ́дъ изба́ви на́съ при́сно моли́твами твои́ми, Ермола́е, о́тче на́шъ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Просвѣти́вся незаходи́мымъ просвѣще́ніемъ боже́ственнаго ра́зума, преподо́бне, къ свѣ́ту богоразу́мія мно́жество спаса́емыхъ наста́вилъ еси́, вопи́ти: оте́цъ на́шихъ Бо́же, благослове́нъ еси́.

Бра́тски сму́дрствующе, Ермокра́тъ вели́кій и боже́ственный Ерми́ппъ, Ермола́е всеблаже́нне, съ тобо́ю муче́нія ча́шу пію́тъ, пою́ще: оте́цъ на́шихъ Бо́же, благослове́нъ еси́.

По Боже́ственнѣй Тро́ицѣ разжига́еми любо́вію, му́ченицы сла́вніи, о́гнь безбо́жія кро́вными кропле́ньми угаси́сте, пою́ще: оте́цъ на́шихъ Бо́же, благослове́нъ еси́.

Богоро́диченъ: Пресвята́я Дѣ́во, Бо́га плотоно́сна поро́ждшая, отъ вся́каго грѣха́ и ско́рби вопію́щія лю́ди Твоя́ спаса́й: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Свяще́нный Ермола́й, свяще́нно просвѣща́емь, за милосе́рдіе на́съ ра́ди, я́ко овча́ти, Закла́вшемуся безкро́вну же́ртву принесе́, и, закла́ся Его́ ра́ди во́лею, благопрія́тна же́ртва принесе́ся, зовы́й: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Свяще́нный Ермола́й, превели́кій Ерми́ппъ и Ермокра́тъ, тве́рдіи адама́нти, пло́ти не пощадѣ́ша, ни истука́ннымъ пожро́ша, же́ртвы же прія́тны себѣ́ Влады́цѣ принесо́ша, вопію́ще: свяще́нницы, воспо́йте, лю́діе, превозноси́те во вся́ вѣ́ки.

Отъ Христа́ укрѣпля́емь, богому́дрый Ермола́й сокрове́нное та́инство отъ родо́въ вѣ́рнымъ откры́, сокрове́ннымъ отъ стра́ха враго́въ, и, явле́нна себе́ сотво́рь, я́вѣ за всѣ́хъ закла́вшагося Бо́га Сло́ва возвѣща́етъ, и умира́етъ, и живе́тъ съ му́ченики во вся́ вѣ́ки.

Богоро́диченъ: Тя́, кра́сную пала́ту и свѣ́тлый сосу́дъ всѣ́хъ Царя́, Пресвята́я Влады́чице, пое́мъ, моля́щеся, хра́мы ны́ покажи́ изъ Тебе́ рожде́нному и очи́стившему вся́кую зло́бу сопроти́вную, вопію́щія непреста́нно: лю́діе, превозноси́те Христа́ во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Ста́лъ еси́ проти́ву враго́мъ, Христа́ исповѣ́дуя, пресла́вне, исповѣ́давшаго до́брое исповѣ́даніе предъ Пила́томъ, и, веде́нъ бы́въ на заколе́ніе, зе́млю у́бо освяти́лъ еси́ боже́ственною кро́вію, небеса́ же душе́ю уясни́лъ еси́.

Яви́шася трисвѣ́тлыя свѣщи́, Боже́ственнаго Ду́ха огне́мъ вжига́еми, Ерми́ппъ сла́вный съ Ермокра́томъ и Ермола́й, уясни́вше вѣ́рныхъ ду́ши Боже́ственною благода́тію и отгоня́ще злоче́стія мглу́ многобо́жную.

Усты́ вси́ свѣ́тло и ра́достною мы́слію воспое́мъ страстоте́рпцы Христо́вы, Боже́ственною сла́вою, я́коже ри́зою, одѣ́яны боголѣ́пно, и ны́нѣ на небесѣ́хъ живу́щія, и чуде́съ рѣ́ки источа́ющія.

Со́лнце незаходи́мое, Христе́, Ермола́я свяще́нными мольба́ми, Пантелеи́мона и Ермокра́та и страда́вшихъ съ ни́ми не отри́ни отъ на́съ, Сло́ве, ми́лости Твоея́, но, обы́чно на́съ уще́дривъ, отъ злы́хъ изба́ви.

Богоро́диченъ: Пощади́ мя, Спа́се, рожде́йся и сохрани́въ ро́ждшую Тя́ нетлѣ́нну по рождествѣ́, егда́ ся́деши суди́ти вся́ческимъ, грѣхи́ презира́я и беззако́нія моя́, я́ко Безгрѣ́шенъ, я́ко Ми́лостивъ Бо́гъ и Человѣколю́бецъ.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 236 об. – 239 об.

/ Къ оглавленію раздѣла /


Наверхъ / Къ титульной страницѣ

0