Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 16 декабря 2017 г. Сейчасъ на порталѣ посѣтителей - 2.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 26-й де́нь.
Слу́жба преподо́бному отцу́ на́шему Моисе́ю Угрину.

ВЕЧЕРЪ,
Блаже́нъ му́жъ, 1-й антифо́нъ. На Го́споди, воззва́хъ: стихи́ры на 6, гла́съ 1. Подо́бенъ: Небе́сныхъ чино́въ.

Моисе́ю богови́дцу уподо́бился еси́, свя́те,* у́мнѣ бо, я́коже въ купинѣ́, въ души́ свое́й Бо́га зря́,* къ стра́ху Его́ у́мъ сво́й пригвозди́лъ еси́* и, то́й при́сно предъ очи́ма имѣ́я,* жела́ніемъ, а́ки пла́менемъ, въ любо́вь Бо́жію распали́лся еси́,* отъ нея́же никогда́же не отступи́лъ еси́.* И ны́нѣ престо́лу Вели́чествія на высо́кихъ предстоя́,* моли́ о на́съ, да жи́знь на́шу безстра́стнѣ пре́йдемъ* и яви́мся лицу́ Бо́жію. [Два́жды.]

Ду́ха Пресвята́го благода́ть,* все́льшися въ чи́стую ду́шу твою́,* непреодолѣ́нна тя́ сотвори́* всѣ́ми прило́ги человѣкоубíйцы,* на него́же и побѣ́ду пріе́мь,* по́мощію Христо́вою кова́рства того́ посѣ́клъ еси́* и непреобори́мь во́инъ показа́лся еси́,* и ны́нѣ престо́лу Влады́чню предстоя́,* моли́ дарова́ти на́мъ ми́ръ и ве́лію ми́лость. [Два́жды.]

Сла́ва, гла́съ 6:

Пріиди́те, празднолю́бныхъ собо́ри, духо́вный ли́къ соста́вльше, па́мять богоно́снаго отца́ на́шего Моисе́я, крѣ́пкаго страда́льца, въ лѣ́тнѣмъ торжествѣ́ восхва́лимъ; то́й бо на неви́димаго врага́, нечи́стыми страстьми́ запя́ти чистотѣ́ его́ хотя́щаго, крѣ́пко подвиза́ся и чистоты́ ра́ди мно́го пострада́, упова́ніе же имы́й къ Бо́гу, вѣнцено́сецъ показа́ся, и ны́нѣ предстоя́ Святѣ́й Тро́ицѣ, мо́лится о душа́хъ на́шихъ.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры, гла́съ 1. Подо́бенъ: Прехва́льніи му́ченицы.

Прехва́льному страстоте́рпцу* Россíйскому кня́зю Бори́су вѣ́рнѣ рабо́тая,* о́тче на́шъ Моисе́е,* научи́лся еси́ служи́ти и Царю́ Небе́сному* въ преподо́біи и пра́вдѣ.* Ему́же ны́нѣ предстоя́,* не забу́ди и о на́съ моли́ти,* да порабо́тимъ ду́хови у́ды на́ша* и пріи́мемъ вѣнцы́ по́чести небе́сныя.

Сти́хъ: Блаже́нъ му́жъ, боя́йся Го́спода,* въ за́повѣдехъ [Его́ восхо́щетъ зѣло́].

Ты́, преблаже́нне о́тче на́шъ Моисе́е,* боя́щемуся Бо́га влады́цѣ послѣ́дуя,* и за того́ любо́вь гото́въ бы́лъ еси́* ду́шу свою́ положи́ти,* ничто́же проти́вящися враго́мъ ви́димымъ,* то́чію бо ста́лъ еси́ проти́ву неви́димымъ,* и́хже до конца́ побѣди́въ,* моли́ся и о на́съ вы́шнему Влады́цѣ,* е́же побѣди́ти ду́хи зло́бы поднебе́сныя.

Сти́хъ: Восхва́лятся преподо́бніи во сла́вѣ* и возра́дуются на ло́жахъ свои́хъ.

Вы́шняго благода́ть соблюде́ тя, преподо́бне:* убива́ему су́щу господи́ну твоему́,* тебе́ покры́ всеще́драя десни́ца Христа́ Бо́га* и сохрани́ тя, я́ко зѣ́ницу о́ка,* до́ндеже сотвори́ тя вѣ́рнаго Себѣ́ раба́,* Ему́же въ жи́зни се́й вѣ́рнѣ порабо́тавъ,* прія́лъ еси́ дина́рій жи́зни вѣ́чныя.* Моли́ не лиши́тися сего́ и на́мъ,* чту́щимъ па́мять твою́.

Сла́ва, гла́съ 8:

Мона́ховъ Россíйскихъ собо́ри и чистоты́ рачи́теліе, пріиди́те къ святѣ́й пеще́рѣ и ви́дите ра́ку многоцѣле́бныхъ моще́й преблаже́ннаго отца́ на́шего Моисе́я, и научи́теся отъ того́ смире́нію и чистотѣ́, терпѣ́нію же и великоду́шію, и просла́вите Отца́ Небе́снаго, да́рующаго рабо́мъ Свои́мъ ве́лію ми́лость.

И ны́нѣ, богоро́диченъ:

Влады́чице, Ма́ти всѣ́хъ Творца́, дне́сь въ пречестно́мъ Твое́мъ хра́мѣ, его́же въ жили́ще Себѣ́ создала́ еси́ и мно́гими чудесы́ обогати́ла еси́, на́съ, пою́щихъ, изба́ви отъ вся́кія ну́жды и печа́ли.

Тропа́рь, гла́съ 3:

Друга́го тя́ Іо́сифа, вели́кій чистоты́ и цѣлому́дрія рачи́телю, всече́стне и равноа́нгельне Моисе́е, свяще́нными пѣ́сньми восхваля́юще, грѣ́шніи, мо́лимтися прилѣ́жно: моли́ Христа́ Бо́га, я́ко да исцѣли́тъ вся́ на́ша стра́сти и пода́стъ ве́лію ми́лость.

Инъ тропа́рь, гла́съ то́йже:

Труды́ и по́двиги со страстьми́ по чистотѣ́ твое́й ви́дя, свя́те, кто́ не удиви́тся? Гла́дъ бо, темни́цу и ра́ны пріе́мля, не порабо́тился еси́ сласте́мъ ля́ховицы, но, я́ко ца́рь, страстьми́ облада́яй, ны́нѣ и тогда́ возпросла́вился еси́ отъ Всеви́дящаго человѣ́ческая сердца́, отъ Него́же во искуше́ніихъ всѣ́мъ посо́бствовати благода́ть пріе́мь, посо́бствуй и на́мъ, твою́ па́мять чту́щимъ, Моисе́е преподо́бне.

Сла́ва, и ны́нѣ, богоро́диченъ, [гла́съ то́йже:

Тя́, хода́тайствовавшую спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ стра́сть, изба́ви на́съ отъ тли́, я́ко Человѣколю́бецъ].


НА УТРЕНИ,
На Бо́гъ Госпо́дь: Тропа́рь преподо́бнаго, [два́жды]. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Красотѣ́ лица́ твоего́ вра́гъ всезло́бный зави́дя, да благолѣ́піе душе́вное льсти́вно окра́детъ, обложи́ страстьми́ у́мъ женѣ́ беззако́ннѣй, я́же вся́кими ле́стьми тща́шеся поколеба́ти тя́, преподо́бне, но ты́, разумѣ́въ того́ ко́зни, я́ко другíй Іо́сифъ, извину́лся еси́ отъ ру́къ любодѣ́ицы и обою́ соблю́лъ еси́ красоту́ неврежде́нну. Сего́ у́бо ра́ди наслажда́ешися ны́нѣ на небеси́ красоты́ Тро́ицы Единосу́щныя. [Два́жды.]

Сла́ва, и ны́нѣ, богоро́диченъ:

Ско́рый Тво́й покро́въ и предста́тельство, неисче́тную же бла́гость и милосе́рдіе, Чи́стая, вси́ грѣ́шніи ви́дѣвше, притека́ютъ и покая́нія цѣльбу́ пріе́млютъ, а́зъ же, вся́ сія́ презрѣ́въ, окая́нный, еди́нъ отщети́хся Твоея́ по́мощи, у́бо про́чее призови́ мя къ Твое́й бла́гости, и лови́тву мя́ губи́телю не покажи́, но припа́дающа мя́, Влады́чице, пріими́ и на пу́ть покая́нія наста́ви.

По 2-мъ стихосло́віи сѣда́ленъ, гла́съ то́йже. Подо́бенъ: Яви́лся еси́.

Терпѣ́нію и му́жеству твоему́, преподо́бне, почуди́шася вся́ а́нгельская ликостоя́нія, ка́ко, огне́мъ стра́сти любодѣя́нія обложе́нъ сы́й, отъ жены́ скве́рныя неопали́лся, ни хотѣ́нію тоя́ повину́лся еси́, огне́мъ бо любве́ Бо́жія разжже́но се́рдце имѣ́я, пла́мень стра́сти погаси́лъ еси́. [Два́жды.]

Сла́ва, и ны́нѣ, богоро́диченъ:

Ско́ро предста́ни въ по́мощь на́мъ, Пречи́стая Влады́чице, врази́ бо воста́ша на ны́, борю́щіися съ на́ми де́нь и но́щь, и се́, побѣжда́емы, покро́ва не и́мамы, идѣ́же убѣ́гнути ру́къ губи́телей; Тебѣ́ мо́лимся, я́ко Бо́жіей Ма́тери, простри́ крѣ́пкую Свою́ десни́цу и порази́ и́хъ си́лою Твое́ю, на́съ же неврежде́ны сохрани́, да прино́симъ Тебѣ́ а́нгельское воспѣва́ніе: ра́дуйся, Обра́дованная, Госпо́дь съ Тобо́ю.

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

До́бляго страда́льца и непреобори́маго во́ина, и́ночествующихъ похвалу́ и чистоты́ рачи́теля, богоно́снаго отца́ на́шего Моисе́я, пріиди́те, лю́діе, пѣ́сньми воспое́мъ, похваля́юще Бо́га, укрѣпля́ющаго рабы́ Своя́ и даю́щаго побѣ́ду на ви́димыя и неви́димыя враги́; Того́ бо по́мощію се́й препоя́сався, побѣди́ вся́ полки́ міроде́ржца, и ны́нѣ, въ небе́сныхъ селе́ніихъ престо́лу Влады́чню предстоя́, мо́литъ и на́мъ отъ всѣ́хъ прило́говъ вра́жіихъ и того́ искуше́ній свободи́тися. [Два́жды.]

Сла́ва, и ны́нѣ, богоро́диченъ:

Пречи́стая Влады́чице, всея́ тва́ри Честнѣ́йшая, не отврати́ лица́ Твоего́, но пріими́ моли́твы ра́бъ Твои́хъ, притека́ющихъ дне́сь въ пречестны́й хра́мъ Тво́й и покланя́ющихся пречи́стому о́бразу Твоему́: простри́ пресвяты́я ру́цѣ, и́миже Творца́ всѣ́хъ носи́ла еси́, умоли́ Того́, я́ко Человѣколюби́ваго Влады́ку, да препоя́шетъ на́съ си́лою Свое́ю свы́ше, о не́йже побѣди́вше вся́ востаю́щія на ны́, возвели́чимъ, Блага́я, Твое́ ско́рое предста́тельство и заступле́ніе.

Степе́нна, 1-й антифо́нъ 4-го гла́са. Проки́менъ, [гла́съ 4:] Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе да хва́литъ Го́спода. Ева́нгеліе отъ Матѳе́я, зача́ло 43. По 50-мъ псалмѣ́ стихи́ра, гла́съ 6: Пріиди́те, празднолю́бныхъ собо́ри... [Зри́ въ се́йже слу́жбѣ на Го́споди, воззва́хъ.]

Кано́нъ [Богоро́дицѣ со ирмосо́мъ на 6 и] преподо́бному [на 8], гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Гряди́те, лю́діе, принесе́мъ хвале́ніе Бо́гу, прославля́ющему уго́дника Своего́ и показа́вшему того́ во всѣ́хъ искуше́ніихъ непреодолѣ́нна, и воспои́мъ Ему́ пѣ́снь: сла́вно просла́вися.

Наве́дъ вра́гъ всезло́бный на господи́на твоего́, блаже́ннаго кня́зя Бори́са сме́рть, окая́ннымъ братоубíйцею, и тебе́ съ ни́мъ восхотѣ́ погуби́ти, но ты́, спасе́нъ отъ злы́хъ, воспѣ́лъ еси́: сла́ва Бо́гу о все́мъ, бу́ди и́мя Госпо́дне благослове́нно!

Руко́ю Бо́жіею спасе́нъ бы́въ отъ сме́рти, прише́лъ еси́ въ Кíевъ къ Предисла́вѣ, сестрѣ́ Яросла́вли, идѣ́же жа́лостію по господи́нѣ свое́мъ одержи́мь, сказа́лъ еси́ о не́мъ вся́, ели́ко пострада́, а́ки а́гнецъ безгла́сенъ, не проти́вяся предаде́ себе́ въ ру́цѣ и́щущихъ его́ кро́ве, и пѣ́лъ еси́: Бо́гъ на́шъ сла́вно просла́вися.

Вре́мя нѣ́кое стра́ха ра́ди сокры́лся еси́, преподо́бне, человѣ́ческое по себѣ́ показу́я, до́ндеже откры́ тя Госпо́дь, а́ки свѣти́ло, всѣ́мъ тѣ́сный пу́ть теку́щимъ во о́бразъ, его́же мно́гими искуше́ніи чи́стъ соблю́лъ еси́, поя́: Бо́же мо́й, въ немощнѣ́й пло́ти мое́й сла́вно просла́вися.

Богоро́диченъ: Вся́ могу́щая о Бо́зѣ, Цари́це, предста́ни ско́ро мольбу́ Тебѣ́ принося́щимъ и ви́ждь, коли́ко воста́ша на ны́ душеубíйцы, и́хже стрѣла́ми си́лы Твоея́ до конца́ погуби́, да непреста́нно Тебѣ́ вопіе́мъ: я́ко вели́ко и стра́шно враго́мъ на́шимъ и́мя Твое́, сла́вно просла́вися.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

На тве́рдомъ ка́мени вѣ́ры душе́вная чу́вства своя́ утверди́въ, ше́лъ еси́ въ плѣ́нъ, упова́ніе имѣ́я на Еди́наго, тяжча́йшія ра́ны и кре́стъ претерпѣ́вшего Іису́са, я́ко То́й изба́витъ тя́ отъ сѣ́ти ловца́; тѣ́мже на вся́комъ мѣ́стѣ пѣ́лъ еси́: нѣ́сть пра́веденъ, па́че Тебе́, Го́споди.

Тя́жкими по ру́ку и по но́гу обложе́нъ желѣ́зы и пятолѣ́тнюю пре́жде подъе́мь тѣсноту́, не разби́лся еси́ умо́мъ, но, несвя́занъ имѣ́яй язы́къ, о всѣ́хъ приклю́чшихся на мѣ́стѣхъ благодари́лъ еси́ Бо́га, поя́: пра́ведно вся́ сія́ наве́лъ еси́ на мя́, нѣ́сть бо пра́ведника, па́че Тебе́, Го́споди.

Кра́сна тя́ лице́мъ, свѣтлѣ́йша же душе́ю ви́дя во у́захъ, нѣ́кая ю́на отъ благоро́дныхъ же́нъ вдови́ца стрѣло́ю любве́ твоея́ уязви́ся и прельша́ше тя́ мно́го, свя́те; ты́ же е́й отвѣща́лъ еси́: ника́коже во́ли твое́й повину́ся, я́ко Бо́гъ изво́ли та́ко, Ему́же пою́: нѣ́сть пра́веденъ, па́че Тебе́, Го́споди.

Красотѣ́ твое́й тѣле́сной, наипа́че же цѣлому́дреннымъ словесе́мъ любодѣ́ица чудя́ся, мно́жицею покуша́шеся ласка́тельными свои́ми словесы́ улови́ти тя́, но ты́, блаже́нне, твердѣ́йшій имѣ́яй ра́зумъ, му́дрѣ глаго́лалъ еси́: кто́, когда́, послу́шавъ жены́, спасе́ся? И взыва́лъ еси́ къ Бо́гу: спаси́ мя, Бо́же, отъ напа́сти сея́, нѣ́сть бо пра́веденъ, па́че Тебе́, Го́споди.

Мно́жицею прельще́ніями належа́щей женѣ́ скве́рной, мно́жицею отвѣщава́лъ еси́: иску́пленъ сы́й Кро́вію Христа́ моего́, ника́коже ра́бъ женѣ́ безсту́днѣй сотворю́ся, ея́же не позна́хъ отъ рожде́нія моего́, и не бу́ди ми́ погуби́ти труда́ во у́захъ си́хъ, и́хже ра́ди упова́ю изы́ти вѣ́чныхъ у́зъ, а́ще пребу́ду та́ко, терпя́ и благода́рнѣ поя́: нѣ́сть пра́веденъ, па́че Тебе́, Го́споди.

Богоро́диченъ: Плени́цами лю́тыхъ грѣхопаде́ній отъ врага́ мя уловле́нна и въ темни́цѣ омраче́нія у́мнаго затворе́нна ви́дящи, Влады́чице, разрѣши́ вско́рѣ Твои́мъ предста́тельствомъ, луча́ми же благосе́рдія Твоего́ просвѣти́ у́мъ мо́й и обрати́ пѣ́ти: нѣ́сть ины́я скорѣ́йшія въ по́мощь, ра́звѣ Тебе́, святѣ́йшая Марíе Дѣ́во.

Сѣда́ленъ, гла́съ 5:

Огне́мъ красоты́ твоея́ любодѣ́ица вы́ну опаля́ющися, на лука́вый совѣ́тъ устреми́ся, помы́сли бо, а́ще тя́ цѣно́ю у плѣни́вшаго иску́питъ, удо́бь во́ли свое́й преклони́ти возмо́жетъ; ты́ же, преподо́бне, имы́й стра́хъ Бо́жій въ се́рдцѣ, непреста́нно взыва́лъ еси́: спаси́ мя, Бо́же, отъ такова́го неи́стовства, къ Тебѣ́ бо, Влады́цѣ моему́, прибѣга́ю. [Два́жды.]

Сла́ва, и ны́нѣ, богоро́диченъ:

Огнь Боже́ственный неопа́льно въ пречи́стое чре́во пріе́мшая, огне́мъ мя́ страсте́й вы́ну пали́ма, ороси́ поне́ ка́плею благода́ти Твоея́, Госпоже́, да непреста́нно пою́: спаси́ мя, я́ко къ Тебѣ́, Влады́чицѣ моя́, прибѣга́ю.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя, человѣ́ка. Тѣ́мъ зову́ Ти: сла́ва си́лѣ Твое́й, Го́споди.

Прише́дши жена́, стра́стію плѣне́на, къ плѣни́вшему тя́, блаже́нне, даде́ цѣ́ну за тя́ и, пое́мши, разрѣши́, хотя́щи грѣхо́вными у́зы связа́ти ду́шу твою́, но ты́, кресто́мъ себе́ огради́въ, ше́лъ еси́ въ до́мъ тоя́, псало́мски пою́щи: а́ще пойду́ посредѣ́ сѣ́ни сме́ртныя, не убою́ся зла́, я́ко со мно́ю Бо́гъ, Его́же си́лѣ сла́ва бу́ди.

Влады́цѣ своему́ уподо́бился еси́, я́коже бо Того́, купи́вше, іуде́е на стра́сть гото́вяху, та́ко и тебе́ скве́рная любодѣ́ица гото́вяше, а́ще души́ твоея́ не урани́тъ страстьми́, то́ тѣ́ло страда́ніемъ обложи́тъ. Ты́ же лу́чше тѣ́ломъ изво́лилъ еси́ страда́ти, не́жели душе́ю, пою́щи: сла́ва си́лѣ Твое́й, Го́споди.

Разжже́нія стра́стнаго въ тѣ́лѣ свое́мъ да не ощути́ши, вся́кую сла́стную пи́щу и мя́гкія ри́зы отри́нулъ еси́ отъ тебе́, вмѣ́сто же о́нѣхъ, въ по́стъ и моли́тву обле́клъ еси́ себе́, изволя́я хлѣ́бъ су́хъ и во́ду съ чистото́ю, не́жели разли́чная бра́шна и вино́ со скве́рною я́сти, и, не побѣжде́нъ бы́въ отъ врага́, пѣ́лъ еси́: сла́ва си́лѣ Твое́й, Го́споди.

Втора́го Іо́сифа ви́дите, бра́тіе, я́коже бо то́й, оста́вль ри́зу въ ру́ку любодѣ́ицы, бѣжа́ грѣха́, та́ко и се́й, красоты́ ри́зъ себе́ обнажи́въ, избѣжа́ отъ руки́, влеку́щія его́ къ скве́рному смѣше́нію, и си́мъ посрами́ неви́димаго врага́, хотя́щаго ду́шу и тѣ́ло страда́льца оскверни́ти, но ничто́же успѣ́, поя́ше бо: сла́ва си́лѣ Твое́й, Го́споди.

Втору́ю еги́птяныню обрѣ́тъ, вра́гъ покуша́шеся блаже́ннаго улови́ти, не терпя́ше бо серде́чныя чистоты́, ни добро́ты лица́ зрѣ́ти, е́йже и а́нгели дивля́хуся, зову́ще: сла́ва си́лѣ Твое́й, Го́споди.

Богоро́диченъ: Добро́ты Твоея́ вожделѣ́въ, Ца́рь Вы́шній, совѣ́томъ Отчимъ и осѣне́ніемъ Пресвята́го Ду́ха, я́ко до́ждь на руно́, сни́де въ пречи́стое чре́во Твое́, Дѣ́во. Па́дшую добро́ту ума́ моего́ возста́ви па́ки, Влады́чице, да пою́ Ти непреста́нно: сла́ва си́лѣ Твое́й, Госпоже́ Богоро́дице.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Свѣ́та мы́сленнаго лиши́ти тя́ безу́мная не возмо́гши, чу́вственный покуси́ся отъя́ти, преподо́бне, тѣ́мже вве́рже тя́ въ мра́чную темни́цу, идѣ́же гла́домъ и жа́ждею моря́ше тя́, ты́ же взыва́лъ еси́: Бо́же мо́й, не оста́ви мене́, ра́звѣ бо Тебе́ ино́го не зна́ю.

Иже Илію́ и Па́вла Ѳиве́йскаго препита́вый иногда́ въ пусты́ни, То́й и на тебѣ́ удиви́ Свою́ ми́лость, преклони́ бо Онъ еди́наго раба́ жены́ тоя́ на милосе́рдіе и повелѣ́ пита́ти тя́ та́йно, ты́ же, а́ки посѣще́ніе Бо́жіе бы́ти вмѣня́я, взыва́лъ еси́: кромѣ́ Тебе́, ино́го Бо́га не зна́ю.

Мно́зи, невѣ́дуще въ тебѣ́, свя́те, дѣ́йствуемыя Бо́жія благода́ти, увѣщава́ху тя́, да повине́шися во́ли госпожи́ своея́ и бу́деши господи́нъ то́й и всему́ имѣ́нію ея́. Ты́ же вся́ сія́ презрѣ́лъ еси́, любве́ ра́ди Бо́жія, глаго́лющи: кромѣ́ тоя́, не хощу́ ины́я позна́ти.

Не влады́чества тлѣ́ннаго, но е́же надъ страстьми́ плотски́ми госпо́дствовати взыска́лъ еси́, преблаже́нне о́тче на́шъ Моисе́е, тѣ́мже дарова́ тебѣ́ Бо́гъ, я́ко не то́кмо своя́ стра́сти порабо́тилъ еси́ ду́ху, но и про́чимъ во искуше́ніихъ посо́бствовати прія́лъ еси́ вла́сть, сего́ ра́ди взыва́лъ еси́: ничесо́же ина́го, кро́мѣ любве́ Бо́жія, не хощу́ позна́ти.

Посмѣя́лся еси́ безу́мію любодѣ́ицы, я́ко повелѣ́ тя рабо́мъ со сла́вою гра́ды своя́ и ве́си обводи́ти и покланя́тися тебѣ́, а́ки своему́ господи́ну, но ты́ велегла́сно цѣлому́дрія глаго́лы изре́клъ еси́: всу́е тружда́етеся съ повелѣ́вшею ва́мъ сіе́ твори́ти, а́зъ бо, ра́звѣ Бо́га, ничто́же хощу́ зна́ти.

Богоро́диченъ: Ра́дующагося врага́, я́ко улови́ ны грѣхолю́бія сластьми́, посрами́, Госпоже́, на́съ же, въ бу́ри жите́йскія молвы́ бѣ́дствующихъ обвесели́, и къ ти́хому приста́нищу покро́ва Твоего́ дости́гнути по́мощь да́руй: ра́звѣ бо Тебе́ ины́я въ печа́ли Помо́щницы не зна́емъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Въ бе́зднѣ страстѣ́й не погрузи́лся еси́, ни ри́зы своея́ въ скве́рны омочи́лъ еси́, преподо́бне, тѣ́мже, жела́юща тя́, Бо́гомъ наставля́емый чернори́зецъ та́йно облече́ во а́нгельскую оде́жду и научи́, ка́ко соблюсти́ ту непоро́чну, ниже́ убоя́тися стра́ха, ни врагу́ плещи́ да́ти: я́ко Бо́гъ е́сть, Иже рабы́ Своя́ отъ тли́ избавля́етъ.

Въ бе́зднѣ грѣхо́внаго разжже́нія погружа́ема любодѣ́ица, отча́явшися о тебѣ́ наде́жды своея́, ра́ны тя́жкія возложи́ на тя́, преподо́бне, повелѣ́ бо, растя́гши тя́, же́зліемъ крѣ́пко би́ти, я́ко и земли́ напо́лнитися кро́ве твоея́, ты́ же, благода́рственно сія́ терпя́, взыва́лъ еси́: отъ тли́, Бо́же мо́й, возведи́ мя.

Устраши́ти тя́ неустраши́маго хотя́ще, извѣ́ствоваху, коли́ка муче́нія имѣ́лъ еси́, блаже́нне, претерпѣ́ти, а́ще не сотвори́ши во́ли госпожи́ своея́, ты́ же, на вся́ гото́въ су́щи, отвѣща́лъ еси́ дерзнове́нно: ни о́гнь, ни ра́ны возмо́гутъ мя́ разлучи́ти отъ любве́ Бо́жія, На́ньже упова́ю, я́ко отъ тли́ мя́ изба́витъ.

Не покори́лся еси́ женѣ́, безсту́дствомъ омраче́ннѣй, но па́че обличи́лъ еси́ ту́, преподо́бне, я́ко преоби́дѣвшую стра́хъ Бо́жій, и безсту́днѣ къ скве́рному смѣше́нію ну́дившую поплева́лъ еси́, не боя́щися я́рости тоя́, ни гнѣ́ва, имѣ́лъ бо еси́, о́тче, наде́жду на Бо́га, я́ко То́й тя́ отъ ру́къ ея́ изба́витъ.

Ви́дящи жена́ себе́ тобо́ю, о́тче, посра́млену, предста́ви тя́ кня́зю, отъ него́же су́дъ прія́ коне́чный, да, е́же хо́щетъ, на тебѣ́ твори́тъ, иму́щая вла́сть по мно́гихъ му́кахъ и сме́рти преда́ти тя́. Но ты́, проро́чески предви́дя о́ныхъ поги́бель, отвѣща́лъ еси́: са́ми ско́ро отъи́дете въ вѣ́чную поги́бель, мене́ же Христо́съ, Бо́гъ мо́й, отъ тоя́ изба́витъ.

Богоро́диченъ: Предстою́ міролю́бному кня́зю вы́ну и, а́ки плѣ́нникъ, слы́шу су́дъ на ся́, да е́же хо́щутъ любодѣ́йныя стра́сти, творя́тъ на мнѣ́, я́же, пріе́мше о́бласть на мя́, обнажа́ются въ чу́вствѣхъ мои́хъ и ну́ждею влеку́тъ мя́ при́сно любодѣ́йствовати мы́слію съ ни́ми. Но до́ндеже въ се́мъ мíрѣ сме́ртная сѣки́ра не посѣче́ мя, Ты́, ми́рнаго Царя́ Небе́снаго су́щи Ма́ти, прожени́ ты́я и отъ тли́, Богоро́дице, мя́ изба́ви.

Конда́къ, гла́съ 3:

Въ вы́шнихъ еди́наго Бо́га ища́, земна́я вся́ презрѣ́лъ еси́, о тѣлеси́ свое́мъ неради́въ, на му́ки му́жески себе́ вда́лъ еси́, гла́дъ, жа́жду, у́зы, въ темни́цѣ затворя́емь, до́блественно претерпѣ́лъ еси́, біе́нія, кро́ве излія́ніе и удо́въ отрѣ́заніе, чи́стаго ра́ди дѣ́вства твоего́, му́жески поне́слъ еси́. И ны́нѣ съ дѣ́вственными ли́ки предстоя́ Пресвятѣ́й Тро́ицѣ, отъ всѣ́хъ искуше́ній моли́ изба́витися вопію́щимъ ти́: ра́дуйся, Моисе́е, о́тче блаже́ннѣйшій.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть. Христо́съ же простре́ Богочести́вымъ отроко́мъ ро́су духо́вную, Сы́й благослове́нъ и препросла́вленъ.

Богопроти́вное велѣ́ніе отъ кня́зя любодѣ́ица пріе́мши, безъ студа́ влеча́ше тя́ къ скве́рному смѣше́нію, жела́ше бо насы́титися твоея́ красоты́, преиспещре́нныя чистото́ю, е́йже и а́нгели удивля́хуся, зову́ще ко Устро́ившему въ тебѣ́ сію́: Созда́телю Бо́же, благослове́нъ еси́.

Вся́ стрѣ́лы стра́стныя вра́гъ пусти́ на тя́, свя́те, хотя́ уязви́ти тя́, но, са́мъ уя́звенъ, стеня́ше, я́ко ви́дѣ неодолѣ́нна тебе́ су́ща, но па́че зову́ща: Бо́же, благослове́нъ еси́.

Всу́е труди́шися, о же́но! — ре́клъ еси́, преблаже́нне, — ника́коже нечистотѣ́ твое́й косну́ся, предзря́ одесну́ю мене́ вы́ну Бо́га, ниже́ взыгра́ется пло́ть моя́, я́ко стра́хъ Госпо́день ко́сти ми́ пояда́етъ, тѣ́мъ зову́: Бо́же, благослове́нъ еси́.

Тве́рдость ума́ твоего́ любодѣ́ица хотя́ умягчи́ти, повелѣ́ па́лицами би́ти тя́ и на вся́къ де́нь по сто́ ра́нъ налага́ти, но ни та́ко поколеба́ся, я́ко одебелѣ́ пло́ть твоя́ въ любо́вь Бо́жію, Ему́же стори́чествующій пло́дъ прине́слъ еси́, зовы́й: Бо́же, благослове́нъ еси́.

Лю́тая біе́нія и удо́въ отрѣ́заніе пріе́мь, свя́те, бы́лъ еси́ а́ки ме́ртвъ и ели́ жи́въ лежа́, но стоя́щему врагу́ отрѣ́залъ еси́ главу́, ме́ртва же и недѣ́йственна того́ показа́въ, взыва́лъ еси́: Бо́же мо́й, крѣ́пость моя́, благослове́нъ еси́.

Богоро́диченъ: Въ лю́тыя напа́сти впа́дъ, ника́коже восклони́тися могу́, Ты́, Влады́чице моя́, пода́ждь ми́ крѣ́пкую Свою́ ру́ку и возста́ви мя́ па́ки на но́зѣ, да хожду́ въ пути́ Госпо́дни пра́вы, зовы́й къ Тебѣ́: отъ ро́да въ ро́дъ благослове́нно и́мя Твое́ бу́ди.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Въ пе́щь о́гненную любостра́стнаго грѣха́ влеко́мь, Бо́га еди́наго призва́лъ еси́, блаже́нне, Дави́дски глаго́ля: Бо́же, въ по́мощь мою́ вонми́; и, вше́дъ на пла́мень, неопали́мь пребы́лъ еси́, врага́ па́че опали́въ многоко́зненную главу́, не хотя́щаго пѣ́ти Го́спода во вѣ́ки.

Огне́мъ любодѣя́нія не могíй вра́гъ опали́ти чистоты́ твоея́, воздви́же лю́тое гоне́ніе на и́ночествующихъ полки́, и изгна́ни бы́ша отъ о́бласти неми́лостиваго кня́зя вси́, его́же постиже́ ско́ро гнѣ́въ Бо́жій, по проро́честву твоему́, свя́те, я́ко не хотя́ше во все́й держа́вѣ свое́й имѣ́ти пою́щихъ Го́спода во вѣ́ки.

Кня́зю внеза́пу злѣ́ ду́шу изве́ргшу, бы́сть мяте́жъ и молва́ въ лю́дехъ, воста́ша бо раби́ и изби́ша господе́й свои́хъ, съ ни́миже и му́чившая тя́ любодѣ́ица поги́бе, и взы́де кро́вь на главу́ ея́. Ты́ же, преподо́бне, воспѣ́лъ еси́: о всѣ́хъ дѣ́лѣхъ благословлю́ Го́спода во вѣ́ки.

Возда́въ хвалу́ свободи́вшему тя́ Бо́гу, прише́лъ еси́ въ пеще́ру къ преподо́бному Анто́нію, нося́ му́ченическія на тѣ́лѣ свое́мъ я́звы, и́хже вси́ ви́дѣвшіи зва́ху: по́йте, вся́ дѣла́, Го́спода и превозноси́те Его́ во вѣ́ки.

Скры́ти хотя́ свѣтлѣ́йшую па́че со́лнца чистоту́ твою́, о́тче, въ те́мную всели́лся еси́ пеще́ру, въ не́йже украси́лъ еси́ сію́ поще́ніемъ и всено́щными стоя́ніи, тѣ́мже яви́ о тебѣ́ Бо́гъ, коли́ку и́маши благода́ть всѣ́мъ въ искуше́ніихъ посо́бствовати, да сла́вится и́мя Его́ во вѣ́ки.

Богоро́диченъ: Скры́ти мня́йся предъ Окомъ Всеви́дящимъ сту́дъ грѣха́ моего́, на вся́къ де́нь разжже́ніемъ плотски́мъ пали́мь, беззако́ніе къ беззако́нію прилага́ю. Но пре́жде да́же не откры́ются предъ а́нгельскимъ и человѣ́ческимъ позо́ромъ дѣла́ моя́, помози́ ми, Чи́стая, избы́ти сицева́го неи́стовства, да сла́влю и́мя Твое́ во вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Отъ Бо́га Бо́гъ, соше́дшее Сло́во, просла́ви тя́ еще́ въ жи́зни се́й, свя́те, чудотво́рными да́ры: нѣ́коему бо любодѣя́ніемъ бори́му прикоснове́ніемъ жезла́ твоего́ омертвѣ́ша стра́сти, и, пріе́мь отъ тебе́ за́повѣдь никогда́же бесѣ́довати съ жено́ю, е́же сотвори́въ, про́чая лѣ́та поживе́ ми́рно, тебе́ велича́юще.

Отъ ро́да въ ро́дъ чистота́ твоя́ сла́вится, ея́же ра́ди мно́го пострада́въ, прія́лъ еси́ блаже́нство чи́стыхъ се́рдцемъ, преста́вився же отъ вре́менныя жи́зни сея́, чи́стѣ зри́ши Пресвяту́ю Тро́ицу. Помина́й и на́съ, преподо́бне, па́мять твою́ почита́ющихъ.

Мертвеца́ тя́ нарече́ Госпо́дь, я́ко умертви́лъ еси́ по́хоти плотскíя терпѣ́ніемъ чу́днымъ, и и́маши си́лу прикаса́ющимся моще́мъ твои́мъ стра́сти умерщвля́ти, я́ко сотвори́лъ еси́ многотерпѣли́вому Іоа́нну, и́же, пріе́мь ми́ръ въ косте́хъ свои́хъ, возвели́чи Бо́га, прославля́ющаго святы́хъ Свои́хъ.

Возвесели́ся, горо́, иму́щая въ пеще́рѣ нетлѣ́нныя мо́щи чу́днаго Моисе́я, воспо́йте хвала́ми, и́ночествующихъ собо́ри, се́ бо и́мате посо́бника и предста́теля въ ско́рбехъ, кла́няйтеся ра́цѣ его́, прикаса́ющеся устна́ми, и обря́щете поко́й во удесѣ́хъ ва́шихъ.

Тро́иченъ: Сла́вимъ Тро́ицу Пресвяту́ю, я́ко даде́ на́мъ свѣти́льника мíра, отца́ на́шего Моисе́я, его́же пра́зднующе лѣ́тнюю па́мять, Отца́, и Сы́на, и Свята́го Ду́ха въ еди́номъ Божествѣ́, вѣ́рніи, единому́дренно велича́емъ.

Богоро́диченъ: Всегда́ сла́вимъ Тя́, Чи́стая Дѣ́во, я́ко собрала́ еси́ вѣ́рныя рабы́ Своя́ на мѣ́сто сіе́, идѣ́же мно́зи пріе́млютъ исцѣле́ніе, покланя́ющіися о́бразу Твоему́ несумнѣ́нно и призыва́ющіи въ моли́тву оте́цъ на́шихъ Пече́рскихъ.

Свѣти́ленъ:

Свѣ́те Трисоста́вный, Содѣ́телю, Истинный Бо́же, просвѣти́ мра́къ ду́шъ на́шихъ, се́ бо приво́димъ Тебѣ́ въ моли́тву уго́дника Твоего́ и съ ни́мъ мо́лимся: ути́ши бу́рю грѣхо́въ на́шихъ и отъ печа́ли всѣ́хъ на́съ изба́ви. [Два́жды.]

Сла́ва, и ны́нѣ, богоро́диченъ:

Свѣтлѣ́йшая па́че со́лнца Марíе Богоро́дице, просвѣти́ благода́тію всѣ́хъ, кла́няющихся предъ Тобо́ю и призыва́ющихъ и́мя Твое́, и соблюди́ оби́тель сію́ отъ вся́каго зла́, живу́щихъ же въ не́й присносу́щнаго весе́лія и ра́дости духо́вныя испо́лни, Ты́ бо еси́ Хода́таица ра́дости на́шея.

На хвали́техъ стихи́ры, гла́съ 4. Подо́бенъ: Яко до́бля.

Въ гла́сѣ ра́дованія* соше́дшеся дне́сь, празднолю́бцы,* похва́льныя пѣ́сни принесе́мъ Бо́гу,* прославля́юще преблаже́ннаго отца́,* и къ ра́цѣ моще́й его́ припаде́мъ, зову́ще:* не забу́ди на́съ, предстоя́ Влады́цѣ,* но моли́ изба́витися отъ всѣ́хъ искуше́ній* и лю́тыхъ обстоя́ній,* па́мять твою́ любо́вію почита́ющимъ.

Кто́ тя́ по достоя́нію воспое́тъ, преподо́бне?* Ты́ бо во вре́меннѣй се́й жи́зни,* а́ще и въ ме́ртвеннѣмъ тѣлеси́,* но духо́внѣ пожи́лъ еси́,* внѣ́ мíра и пло́ти бы́въ,* жела́ніе непреста́нно имѣ́я,* е́же отъ пло́ти разрѣши́тся и со Христо́мъ бы́ти,* съ Ни́мже ны́нѣ ца́рствуя,* помяни́ и на́съ, тебе́ прославля́ющихъ.

Ра́дуйся, оте́цъ Пече́рскихъ пречестны́й ли́че,* я́ко стяжа́лъ еси́ до́брое свѣти́ло,* дѣ́вственныхъ ве́рхъ и му́чениковъ красоту́,* Ду́ха Свята́го чи́стое пребыва́ніе,* Моисе́я, у́мнаго богови́дца,* его́же па́мять хвала́ми вѣнча́юще,* мо́лимъ ва́съ: моли́те Христа́ Бо́га и Влады́ку,* на́мъ, ча́домъ ва́шимъ, отъ бѣ́дъ изба́витися* и не лиши́тися вы́шняго Ца́рствія.

Сла́ва, гла́съ 6:

Истиннаго послѣ́дователя Христо́ва и вѣ́рнаго Ева́нгелія Его́ послу́шателя, тя́, преподо́бне о́тче, дне́сь восхваля́емъ: ты́ бо, на вѣ́чное воздая́ніе взира́я, вся́ кра́сная мíра сего́ въ уме́ты вмѣни́лъ еси́, плѣ́нникъ изволя́я бы́ти, да свобо́денъ у́мъ отъ грѣха́ имѣ́еши, о тѣлеси́ неради́въ, на му́ки е́ преда́лъ еси́, да му́чащаго мы́сленнаго врага́ кро́вными струя́ми потопи́ши; са́мъ ны́нѣ въ мѣ́стѣе поко́йнѣ сы́й и ра́дости святы́хъ наслажда́яся, дарова́ніями твои́ми свы́ше и на́съ уще́дри, любе́зно соверша́ющихъ па́мять твою́.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Славосло́віе вели́кое, [ектеніи́] и отпу́стъ.



НА ЛИТУРГІИ,

[Блаже́нна отъ кано́на свята́го, пѣ́снь 3 и 6. Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 106 об. – 113.

/ Къ оглавленію раздѣла /


Наверхъ / Къ титульной страницѣ

0