Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 26-й де́нь.
Слу́жба свято́й му́ченицѣ Параске́вѣ, пострада́вшей при Антони́нѣ.

[ВЕЧЕРЪ,]
На Го́споди воззва́хъ: стихи́ры подо́бны, гла́съ 8. О, пресла́внаго чудесе́!

Подо́бенъ: Му́ченице Христо́ва всехва́льная,* Го́спода Христа́ вседу́шно вожделѣ́вши,* лютѣ́йшія муче́ній ра́ны прія́ла еси́,* и, бича́ми по ре́брамъ терза́ема,* біе́нія вся́ за Люби́маго тобо́ю претерпѣ́вши,* вѣнцы́ улучи́ла еси́ отъ Него́,* тѣ́мже благохва́лимъ тя́, богоблаже́нная. [Два́жды.]

Подо́бенъ: Преподобному́ченице всесла́вная,* кто́ возмо́жетъ изрещи́ трудо́въ твои́хъ мзду́* и му́ченичества твоего́ до́блестныя чудеса́,* терпѣ́ніе же и кро́тость,* я́же показа́ла еси́, честна́я,* а́ки безпло́тна?* Тѣ́мже собесѣ́дница яви́лася еси́ а́нгеловъ,* Параске́ва, невѣ́ста Всецаря́, сосу́дъ духо́венъ. [Два́жды.]

Сла́ва, гла́съ 6:

Дѣ́во му́ченица побѣдоно́сная, Параске́ва всесла́вная, досто́йно пра́зднующимъ стра́сть твою́, моли́ изба́витися искуше́ній и скорбе́й и бу́дущаго Суда́, хода́тайствы твои́ми къ Бо́гу, му́ченице всепѣ́тая.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

На стихо́внѣ стихи́ры подо́бны, гла́съ 4. Яко до́бляя въ му́ченицѣхъ.

Многоско́рбному муче́нію* преда́вши себе́, всесла́вная,* му́жескою мы́слію претерпѣ́ла еси́ то́е* и е́ллинская чти́лища, я́ко пра́хъ, истни́ла еси́,* си́лою же Креста́ врага́ попра́ла еси́,* хва́лящася на высотѣ́ звѣ́здъ поста́вити престо́лъ,* то́й бо предъ нога́ми твои́ми пове́ржеся,* а́ки вра́бій игра́емь.

Сти́хъ: Терпя́, потерпѣ́хъ Го́спода, [и вня́тъ ми́,* и услы́ша моли́тву мою́].

Боже́ственнымъ про́мысломъ* а́нгелъ дски́ ве́ліей тяготу́* а́біе я́ко ли́стъ показа́* и огня́ жже́ніе вѣ́тръ ро́сный содѣ́ла,* и я́ко дре́вле отроко́мъ бя́ше видѣ́ніе четве́ртаго,* съ ни́миже вопія́ше:* Твоя́ ми́лость ве́лія, Всеще́дре,* тѣ́мже почита́ю, ра́дуяся, Твое́ всепѣ́тое и́мя.

Сти́хъ: Утверди́ на ка́мени [но́зѣ мои́* и испра́ви стопы́ моя́].

Чистоту́ тѣле́сную* и душе́вную свѣ́тлость стяжа́вши* вся́ вы́ну яви́лася еси́ нескве́рна:* тѣ́мже, вожделѣ́вши Жениха́ Христа́,* вслѣ́дъ вони́ разу́мныя потекла́ еси́,* честна́я Параске́во сла́вная,* и ны́нѣ моли́ Спа́са всѣ́хъ* да́ти оставле́ніе долго́въ* вѣ́рою соверша́ющимъ па́мять твою́.

Сла́ва, гла́съ 6:

Пріиди́те, вси́ концы́ земли́, духо́вное торжество́ соста́вимъ и Христо́ву дѣ́ву му́ченицу восхва́лимъ, глаго́люще: ра́дуйся, Параске́во преподо́бная и богоче́стная; ра́дуйся, до́брѣ подъя́вшая му́ченичество; ра́дуйся, му́чениковъ равностоя́тельная и преподо́бныхъ сожи́тельнице, съ ни́миже моли́ спасти́ся душа́мъ на́шимъ.

И ны́нѣ, богоро́диченъ:

[Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

Тропа́рь, гла́съ 1:

Тща́ніе сообра́зно твоему́ и́мени содѣ́лавши [1], тезоимени́тая, равноимя́нную тебѣ́ вѣ́ру въ сожи́тельство избра́ла еси́, Параске́во побѣдоно́сная, тѣ́мже излива́еши исцѣле́нія и мо́лишися о душа́хъ на́шихъ.

[Сла́ва, и ны́нѣ, богоро́диченъ:

Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.]


НА УТРЕНИ,
[На Бо́гъ Госпо́дь: Тропа́рь святы́я два́жды. Сла́ва, и ны́нѣ, богоро́диченъ.]

По 1-мъ стихологиса́ніи сѣда́ленъ святѣ́й, гла́съ 4. [Подо́бенъ:] Вознесы́йся на Кре́стъ.

Краснѣ́йшаго Христа́ возлюби́вши и чистото́ю ду́шу украси́вши, вся́кими труды́ и скорбьми́ Тому́ прибли́зилася еси́, я́ко нескве́рная му́ченица, и небе́снаго черто́га сподо́билася еси́, Его́же моли́ за ны́, тя́ почита́ющія, Параске́во всехва́льная. [Два́жды.]

Сла́ва, и ны́нѣ, богоро́диченъ:

Не умолчи́мъ никогда́, Богоро́дице, [си́лы Твоя́ глаго́лати, недосто́йніи. Аще бо Ты́ не бы́ предстоя́ла, моля́щи, кто́ бы на́съ изба́вилъ отъ толи́кихъ бѣ́дъ? Кто́ же бы сохрани́лъ до ны́нѣ свобо́дны? Не отсту́пимъ, Влады́чице, отъ Тебе́, Твоя́ бо рабы́ спаса́еши при́сно отъ вся́кихъ лю́тыхъ].

По 2-мъ стихологиса́ніи сѣда́ленъ, гла́съ 1. [Подо́бенъ:] Гро́бъ Тво́й, Спа́се.

Яко нескве́рная и чи́стая а́гница, Го́сподеви та́инственно сопрягла́ся еси́, украси́вши себе́ чистото́ю жи́зни и добро́тою страда́нія, тѣ́мже прія́ла еси́ благода́ть исцѣле́ній, врачу́ющи не́мощи на́ша си́лою Ду́ха. [Два́жды.]

Сла́ва, и ны́нѣ, богоро́диченъ:

Ма́терь Тя́ Бо́жію свѣ́мы вси́, Дѣ́ву вои́стинну и по рождествѣ́ я́вльшуюся, любо́вію прибѣга́юще къ Твое́й бла́гости, Тебе́ бо и́мамы, грѣ́шніи, предста́тельницу и Тебе́ стяжа́хомъ въ напа́стехъ спасе́ніе, еди́ну Всенепоро́чную.

Кано́нъ святѣ́й, творе́ніе Ѳеофа́на. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Пою́щимъ свѣтоно́сную па́мять твою́, му́ченице всехва́льная, моли́ благода́ть дарова́ти на́мъ и грѣхо́въ оставле́ніе, Параске́во сла́вная, (твои́ми) ко Го́споду проше́ніи.

Мня́щи разруши́ти си́лу терпѣ́нія твоего́, му́ченице, власти́тель гро́зно повелѣва́ше кла́нятися истука́ннымъ, но му́дрыми твои́ми глаго́лы вся́ де́рзость его́ разруши́ся.

Му́чениковъ ты́ красота́ яви́лася еси́, врага́ ухищре́нія низве́ргши ору́жіемъ креста́, и, власти́телей лю́тость му́ченически одолѣ́вши, богочести́вую вѣ́ру проповѣ́дала еси́.

Богоро́диченъ: Сло́во отъ Твои́хъ пречи́стыхъ крове́й, Влады́чице, ражда́ется, одушевле́нную пло́ть пріе́мъ, и на́съ, па́дшихъ угрызе́ніемъ обольсти́теля, Боже́ственною си́лою возстанови́ло е́сть.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Утверди́лъ е́сть немощно́е Боже́ственный Ду́хъ и свѣ́тлое показа́, вельми́ богоподо́бное, чи́стыя твоея́ души́ сія́ніе.

Укрѣплена́ си́лою Христа́, воло́віихъ жи́лъ неща́дная бичева́нія, му́ченице Христо́ва, претерпѣ́ла еси́, я́ко нѣ́кій адама́нтъ твердѣ́йшій.

Любо́вію, я́же къ Бо́гу, на три́знищи тве́рдо претерпѣ́ла еси́ біе́нія тѣ́ла скорпіо́нами и неисче́тныя ины́я бичева́нія.

Богоро́диченъ: Ты́ еди́на су́щимъ на земли́ премíрныхъ бла́гъ Пода́тельница была́ еси́, Ма́ти Бо́жія, тѣ́мже Ти́, ра́дуйся, зове́мъ.

Ирмо́съ: Весели́тся о Тебѣ́ Це́рковь Твоя́...

Сѣда́ленъ, гла́съ 5:

Отъ пеле́нъ ма́тернихъ ты́ Христу́ посвяти́вшися, я́ко му́ченица, вы́ну Тому́ благоугожда́ла еси́, Спаси́телю всѣ́хъ, и, де́рзость мучи́телей тве́рдо попра́вши, страда́нія вои́стинну му́жески претерпѣ́ла еси́. Тѣ́мже Христо́съ, вѣнча́въ тя́, въ небе́сный черто́гъ сла́вы введе́. Параске́во досточу́дная, проси́ на́мъ у Христа́ Бо́га оставле́ніе грѣхо́въ. [Два́жды.]

[Сла́ва, и ны́нѣ,] богоро́диченъ:

Яко дѣ́ву и еди́ну въ жена́хъ, Тебе́, безсѣ́менно ро́ждшую Бо́га пло́тію, ублажа́емъ вси́, ро́ди человѣ́ковъ: зане́ о́гнь Божества́ всели́ся въ Тебѣ́, и я́ко Младе́нца млеко́мъ пита́ла еси́ Творца́ и Го́спода. Тѣ́мже, а́нгельскій и человѣ́ческій ро́дъ, досто́йно сла́вимъ всесвято́е Рождество́ Твое́ и согла́сно вопіе́мъ Ти́: моли́ Сы́на Твоего́ и Бо́га дарова́ти оставле́ніе грѣхо́въ покланя́ющимся вѣ́рою безсѣ́менному Рождеству́ Твоему́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Исцѣле́нія получи́вши, и дарова́нія, и видѣ́нія, сла́вная, Боже́ственныя источа́еши то́ки благода́ти всегда́ вѣ́рою тя́ почита́ющимъ и ко хра́му твоему́ прибѣга́ющимъ.

Поро́ка вои́стинну и скве́рны ника́коже иму́щи, освяще́ніе же тѣлесе́ стяжа́вши, а́нгеловъ узрѣ́ла еси́, съ ни́миже возопи́ла еси́: сла́ва си́лѣ Твое́й, Го́споди.

Ко́ль ужа́сно зна́меніе стра́шнаго дне́, внегда́ спаси́тельная стра́сть вообрази́ся въ же́нстѣмъ тѣлеси́ твое́мъ, кре́стъ, и тро́стіе, и вѣне́цъ, и гу́бу узрѣ́ла еси́.

Богоро́диченъ: Неискусобра́чно зачала́ еси́, о Дѣ́во, и по рождествѣ́ еси́ дѣ́вствующая па́ки. Тѣ́мже немо́лчными гла́сы, ра́дуйся, вѣ́рою несумнѣ́нною вопіе́мъ Ти́, Влады́чице.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Подвиза́лася еси́, честна́я, и мучи́теля витíйствами прему́дрыми смы́сленно попра́ла еси́ предъ суди́щемъ, Христа́ проповѣ́дающи.

Умъ иму́щи тве́рдый, безтре́петною мы́слію постыди́ла еси́ вся́ и́дольская че́ствованія, ра́зумомъ Писа́ній.

Ло́жа у́мнаго и черто́га сподо́билася еси́, ликовству́ющи съ дѣ́вами богому́дрыми, Параске́во сла́вная.

Богоро́диченъ: Тя́, ору́жіе несокруши́мое, на враги́ обраща́емъ, Тя́ я́корь и наде́жду спасе́нія на́шего, Богоневѣ́сто, стяжа́хомъ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Ангела прише́ствіемъ, на пе́рсехъ твои́хъ положе́нную преве́лію дску́, всечестна́я, и гво́зди на рука́хъ, сла́вная му́ченице, Госпо́дь ма́ніемъ Боже́ственнымъ ско́ро отъя́лъ е́сть.

Но́вую тя́ первому́ченицу Ѳе́клу сла́вимъ, я́ко проповѣ́давшую всѣ́мъ, и мно́гихъ просвѣти́вшую Боже́ственнымъ сло́вомъ, и невѣ́рныхъ къ Боже́ственной вѣ́рѣ приве́дшую.

Отверзо́шася твоя́, Боже́ственныхъ догма́тъ ковче́же, медото́чная уста́, вѣ́дѣнію всѣ́хъ поуча́ющая съ дерзнове́ніемъ, Параске́во, му́чениковъ украше́ніе.

Богоро́диченъ: О чу́до, всѣ́хъ чуде́съ стра́ннѣйшее! Яко Дѣ́ва во утро́бѣ, Всеобъе́млющаго неискусому́жно заче́нши, не утесни́ся.

Ирмо́съ: Пожру́ Ти со гла́сомъ...

Конда́къ, гла́съ 4. [Подо́бенъ:] Яви́лся еси́ дне́сь.

Хра́мъ тво́й, всечестна́я, я́ко враче́бницу душе́вную обрѣ́тше, въ не́мъ вси́ вѣ́рніи велегла́сно почита́емъ тя́, преподобному́ченице Параске́во сла́вная.

Икосъ:

Гла́съ Жениха́, призыва́яй тя́, я́ко невѣ́сту, украси́ тя вѣнце́мъ безсме́ртія, богому́драя Параске́ва всехва́льная, и къ вѣнцено́сцемъ и му́ченикомъ честны́мъ досто́йно сопричте́. Съ ни́ми же веселя́щися, помина́й соверша́ющихъ святы́й пра́здникъ тво́й и соше́дшихся въ хра́мъ тво́й, въ не́мъ бо ны́нѣ предстоя́ще, отъ души́ прино́симъ ти́ пѣ́сни, преподобному́ченица Параске́ва сла́вная.

Чте́тся изъ синакса́рія: Страда́ніе святы́я му́ченицы Параске́вы.

               Стихи́: Бо́гу угото́вала еси́ себе́, я́ко до́мъ,
                              Чи́стый хра́мъ, честна́я, во вселе́ніе.
                              Параске́ву уби́ ме́чь въ 26-й де́нь Іу́лія.

Сія́ бя́ше въ ца́рство Антони́на, отъ ве́си нѣ́кія, на предѣ́лѣхъ старѣ́йшаго Ри́ма, рожде́нна отъ христіа́нскихъ роди́телей Агаѳо́на и Политíи имену́емыхъ, и́же за́повѣди Госпо́дни нелѣ́ностно храня́ще, бы́ша бездѣ́тны. Проси́ша же Бо́га непреста́нно, дарова́ти и́мъ ча́до. Творе́цъ же Бо́гъ, исполня́яй во́лю боя́щихся Его́, дарова́ и́мъ ча́до. И роди́ся и́мъ дще́рь въ шесты́й де́нь седми́цы, ю́же во свято́мъ креще́ніи нареко́ша Параске́ву. Она́ же отъ пеле́нъ ма́тернихъ Бо́гу себе́ посвяти́вши, и отъ ма́тере своея́ науча́ема и вразумля́ема, бя́ше вы́ну въ це́ркви и въ моли́твѣ, свяще́нныя пи́смена познава́ющи и непреста́нно свяще́нныя кни́ги прочита́ющи. Сконча́вшимся же роди́телемъ ея́, вся́ име́нія своя́ разда́вши ни́щимъ, сама́ же постри́гшися и воспріе́мши и́ноческій о́бразъ, изы́де проповѣ́дающи и́мя и́стиннаго Бо́га и Го́спода на́шего Іису́са Христа́, и мно́гія отъ е́ллины приведе́ къ Боговѣ́дѣнію. Нѣ́цыи же отъ іуде́й клевета́ша ю́ предъ царе́мъ Антони́номъ, глаго́люще: я́ко жена́ нѣ́кая, и́менемъ Параске́ва, проповѣ́дуетъ Іису́са, Сы́на Марíи, Его́же отцы́ на́ши ко Кресту́ пригвозди́ша. Слы́шавъ сія́ ца́рь, повелѣ́ ю́ привести́ предъ себе́. Ви́дѣвъ же ю́, удиви́ся ра́зуму и красотѣ́ ея́, и глаго́лаше къ не́й: а́ще послу́шаеши мя́ и пожре́ши бого́мъ, мно́гихъ даро́въ наслѣ́дница бу́деши; а́ще ли же не послу́шаеши, преда́мъ тя́ на мно́гая муче́нія. Свята́я же съ твердѣ́йшимъ разсужде́ніемъ отвѣща́ къ нему́: да не бу́детъ ми́ отрещи́ся и́мени Христа́ и Бо́га моего́! бо́зи же, и́же не сотвори́ша небесе́ и земли́, да поги́бнутъ! Ца́рь же, я́ростію воспыла́въ, повелѣ́ желѣ́зо разжже́но возложи́ти на главу́ му́ченицы. Сему́ же бы́вшу, Боже́ственнѣ ороша́емая пребы́сть неврежде́нна. Сего́ у́бо ра́ди чудесе́ въ то́й же ча́съ увѣ́роваша мно́зи въ Го́спода. Та́же повелѣ́ (ца́рь) принести́ коте́лъ мѣ́дянъ, испо́лнь ма́сла и смолы́, вельми́ разжже́нный, и вве́ргнути ю́. И сему́ бы́вшу, свята́я ста́ посредѣ́ котла́, и явля́шеся ороше́нна. Ви́дѣвъ же ю́ ца́рь, рече́: окропи́ мя́ отъ котла́ сего́, о Параске́во, да увѣ́мъ, а́ще разжже́на су́ть смола́ и ма́сло. Свята́я же испо́лньши ру́цѣ свои́ отъ котла́, пове́рже на лице́ царе́во, и а́біе возгорѣ́стася зѣ́ницы о́чію его́. И возопи́ гла́сомъ ве́ліимъ ца́рь, глаго́ля: поми́луй мя́, раба́ и́стиннаго Бо́га, Его́же ты́ проповѣ́дуеши. И а́біе прозрѣ́. Свята́я же отъ коно́ба изше́дши, царя́ Антони́на и су́щихъ подъ ни́мъ, къ Христо́вой призыва́ше вѣ́рѣ и оглаша́ше то́ю. Отпуще́на жу бы́вши, оты́де въ ины́я гра́ды и ве́си, проповѣ́дающи и́мя Го́спода Іису́са. Ше́дши же въ еди́нъ гра́дъ, въ не́мже ца́рствова нѣ́кій Аскли́пій, приведе́на бя́ше свята́я предъ лице́ его́, и призва́вши и́мя Спа́са Христа́, и зна́меніемъ честна́го креста́ запечатлѣ́вши себе́, христіа́ныню бы́ти исповѣ́да, и возвѣсти́ Христа́ Бо́га, Творца́ небесе́ и земли́. О се́мъ смути́вся ца́рь, посла́ ю́ та́й кры́ющемуся страшнѣ́йшему драко́ну внѣ́ гра́да, ему́же по обы́чаю на сме́рть осужде́нныхъ дая́ху въ пи́щу. Егда́ же свята́я пріи́де на мѣ́сто, идѣ́же живя́ше драко́нъ, ви́дѣвъ ю́ драко́нъ вельми́ возшумѣ́ и, егда́ отве́рзъ уста́ своя́, ды́мъ мно́гій внѣ́ изы́де. Яко у́бо свята́я предста́ бли́же къ звѣ́рю, рече́: звѣ́ре, пости́же тя́ гнѣ́въ Бо́жій и па́губа. И вду́нувши на́нь, сотвори́ проти́ву него́ зна́меніе честна́го креста́. Онъ же вельми́ возшипѣ́въ, разсѣ́деся на дво́е и неви́димъ бы́сть. Ви́дѣвъ же ца́рь, и су́щіи съ ни́мъ, вси́ увѣ́роваша. Свята́я же изше́дши проповѣ́даше всю́ду. Отше́дши же въ другíй гра́дъ, въ не́мже ца́рствова и́ный ца́рь, и́менемъ Тара́сій, и увѣ́дѣвъ о не́й ца́рь, поста́ви ю́ предъ суди́ще свое́. Вопроше́на же бы́вши отъ него́, христіа́ныню бы́ти себе́ исповѣ́да, и Бо́га и́стиннаго Христа́ проповѣ́да. По си́хъ принесо́ша коте́лъ мѣ́дянъ, испо́лнь ма́сла и смолы́ и о́лова, и возгнѣто́ша о́гнь подъ ни́мъ, и вни́де въ о́нь свята́я. Прису́тствіемъ же Бо́жія а́нгела огражде́на, егда́ разгорѣ́ся коте́лъ, свята́я пребы́сть неврежде́нна. Мно́га же и́на муче́нія приложи́въ е́й (ца́рь), тве́рдости ея́ не поколеба́. Послѣди́ мече́мъ отсѣче́ главу́ ея́, и а́біе ду́хъ ея́ возлетѣ́ въ вѣ́чныя оби́тели.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Го́сподемъ сохраня́ема, предъ суди́щемъ нечести́выхъ, му́ченица, мы́шцы укрѣпи́ла еси́ тве́рдо, пла́менемъ опаля́ема, внегда́ воспѣва́ти тебѣ́, зову́щей: благослове́нъ еси́, Бо́же мо́й и Го́споди.

Огнь горя́щій ника́коже тя́, нечести́выхъ же па́че опаля́ше, отрокови́це, Христо́съ же сохраня́ше тя́ неврежде́нну, я́коже дре́вле сохрани́, посредѣ́ огня́ шумя́ща, руко́ю крѣ́пкою небоя́зненныя о́троки.

Земли́ всея́ му́дро и небесе́ не сотво́ршіи, де́монскіе и́долы и бо́зи да поги́бнутъ, — вопія́ла еси́. — Христо́съ же Госпо́дь, — проповѣ́дала еси́, — Творе́цъ е́сть вся́ческихъ.

Богоро́диченъ: Вы́шняго освяще́нное Боже́ственное селе́ніе, ра́дуйся, Тобо́ю бо даде́ся ра́дость, Богоро́дице, зову́щимъ: благослове́нна Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Не су́щія бо́ги, но лжи́выя де́моновъ привидѣ́нія показа́ла еси́, му́ченице, и попра́ла еси́ я́ соверше́ннѣ, и вконе́цъ сокруши́ла еси́, въ весе́ліи Христу́ непреста́нно пою́щи: благослови́те, вся́ дѣла́ Госпо́дня, Го́спода.

Ка́пищу поколеба́вшуся на земли́ прише́ствіемъ твои́мъ, честна́я, паде́ Аполло́нъ и устрѣ́лены бы́ша и́доли си́лою честна́го Креста́, и́мже огражде́нна та́инственно, съ дерзнове́ніемъ мно́гимъ вопія́ла еси́: вся́ дѣла́, благослови́те Го́спода.

Красото́ю и любо́вію Твое́ю, Христе́, уя́звлена, Параске́ва чи́стая огня́ жже́ніе претерпѣ́, вопію́щи: въ воню́ боже́ственнаго мѵ́ра Твоего́, ны́нѣ страда́льчествующи тве́рдо, теку́ непреста́нно вслѣ́дъ Тебе́, славосло́вящи Боже́ственное Твое́ и́мя.

Богоро́диченъ: Ты́ еди́на во всѣ́хъ ро́дѣхъ, Дѣ́во Пренепоро́чная, Ма́ти яви́лася еси́ Бо́жія, Ты́ Божества́ бя́ше вселе́ніе, Пречи́стая, не опале́на огне́мъ непристу́пнаго Свѣ́та. Тѣ́мже вси́ Тя́ славосло́вимъ, Марíе Богоневѣ́сто.

Ирмо́съ: Ру́цѣ распросте́ръ, Даніи́лъ...

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Мимотеку́щее житіе́ и привре́менное, му́ченица богому́драя, пренебрегла́ еси́, красоту́ ви́дѣвши недомы́слимую Жениха́ твоего́, гна́вши по Не́мъ я́вѣ. Тѣ́мже вѣне́цъ улучи́ла еси́ нетлѣ́нный, до́брая дѣ́во.

Услы́шавши гла́съ Боже́ственный, съ небесе́ отвѣща́ющь, Параске́во, на проше́нія се́рдца твоего́, тече́ніе бо́дро сконча́ла еси́, му́ченица честна́я, и къ Нему́ востекла́ еси́, во главу́ усѣче́на честну́ю.

Побѣ́ду на враги́ дарова́ти моли́ Христа́, Параске́во, всѣ́мъ къ Боже́ственному хра́му твоему́ приходя́щимъ съ теплѣ́йшею вѣ́рою, и грѣхо́въ оставле́ніе, и отъ бѣ́дъ избавле́ніе.

Богоро́диченъ: Яви́лася еси́ херуви́мы превосходя́щая и небе́съ вы́сшая, Чи́стая Дѣ́во Марíя, Вели́каго Совѣ́та Ангела ро́ждши, собезнача́льнаго Отцу́, Судію́ всѣ́хъ гряду́щаго.

Ирмо́съ: Ка́мень нерукосѣ́чный...

Ексапостила́рій. [Подо́бенъ:] Жены́, услы́шите.

Укрѣпле́нна, до́брая дѣ́во, Кресто́мъ Го́спода твоего́, мучи́телей де́рзость побѣди́ла еси́, страда́ющи до́блественнѣ, му́ченица, и къ вѣнце́мъ побѣ́днымъ Христа́ отшла́ еси́, Параске́во всечу́дная, о на́съ моля́щися, почита́ющихъ тя́ любо́вію. [Два́жды.]

[Сла́ва, и ны́нѣ,] богоро́диченъ. Подо́бенъ:

Марíя, чистѣ́йшая злата́я кади́льница, Нераздѣ́льныя Тро́ицы прія́телище была́ еси́, о не́мже Оте́цъ благоволи́, и Сы́нъ всели́ся, и Ду́хъ Всесвяты́й, осѣни́вый Тя́, Отрокови́це, показа́ Богоро́дицу.

На хвали́техъ стихи́ры подо́бны, гла́съ 1. Небе́сныхъ чино́въ.

Во дво́рѣхъ Го́спода лику́ющи, честна́я,* съ о́ными му́дрыми дѣ́вами, му́ченица,* отто́лѣ прія́ла еси́, му́драя,* благода́ть цѣли́ти болѣ́зни* и изгоня́ти нечи́стыя ду́хи* изъ приходя́щихъ къ тебѣ́ вѣ́рою. [Два́жды.]

Сокруши́вшая крѣ́пость мучи́телей идоложе́ртвенныхъ, честна́я,* и къ Бо́гу напра́вивши стопы́, дѣ́во,* ника́коже устраши́лася еси́* ни біе́нія оловя́нныхъ мла́товъ,* ни огня́, ни терза́нія пло́ти твое́й,* ни разваре́нія котло́въ, ни ме́чнаго усѣче́нія.

По́двигомъ пе́рвѣе изсуши́вшая тѣ́ло твое́, сла́вная,* второ́е же пострада́вшая, укрѣпи́вшися въ умѣ́,* всѣ́мъ яви́лася еси́, му́ченице Христо́ва,* небесномѣ́дный мече́цъ,* я́ко зла́то, въ пещи́ искуше́нна му́ками,* до́брая дѣ́во.

Сла́ва, гла́съ 2:

Во гра́дѣ Бо́га на́шего, въ горѣ́ святѣ́й Его́, та́мо всели́ся свята́я, свѣти́льникъ неуга́сшій сохра́нши. Услы́шимъ дѣ́вы похвалу́: О дѣ́вство, хра́мъ Бо́жій! О дѣ́вство, му́чениковъ сла́ва! О дѣ́вство, а́нгеловъ содру́жество!

И ны́нѣ, богоро́диченъ:

Все́ упова́ніе мое́ на Тя́ возлага́ю, [Ма́ти Бо́жія, сохрани́ мя подъ кро́вомъ Твои́мъ].

И про́чее послѣ́дованіе, я́коже обы́чно, и отпу́стъ.



[НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. Аллилу́ія, гла́съ 1: Терпя́ потерпѣ́хъ Го́спода, и вня́тъ ми́ и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́. Ева́нгеліе Ма́рка, зача́ло 21. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Примѣчаніе:
[1] Имя «Параскеви́» зна́менуетъ приготовле́ніе, намѣ́реніе, тща́тельность. (Прим. издателя.)

Коне́цъ и Бо́гу сла́ва.

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 646-657.

/ Къ оглавленію раздѣла /


Наверхъ / Къ титульной страницѣ

0