Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 25-й де́нь.
Слу́жба преподо́бнаго отца́ на́шего Мака́рія Желтово́дскаго, Унженскаго чудотво́рца.

ВЕЧЕРЪ,
Блаже́нъ му́жъ.., [1-й антифо́нъ]. На Го́споди воззва́хъ: стихи́ры [на 8], гла́съ 2. Подо́бенъ: Кíими похва́льными.

Гла́съ проро́ка Твоего́, Го́споди, испо́лнити хотя́,* рече́ бо богооте́цъ Дави́дъ,* поя́ и моля́ся не престая́ де́нь и но́щь:* удали́хся, бѣ́гая, и водвори́хся въ пусты́ню,* ча́яхъ Бо́га, спаса́ющаго мя́.* Аще бы пусты́ня уха́ла струя́ми сле́зъ твои́хъ,* се́ бы, я́ко громогла́сная труба́,* не бы́ почи́ла вопи́ти трудополо́жныхъ по́двигъ твои́хъ:* а́нгелы возвесели́лъ еси́* и человѣ́ки удиви́лъ еси́, о́тче Мака́ріе.* Преподо́бне и приснопа́мятне,* моли́ Христа́ Бо́га* спасти́ся душа́мъ на́шимъ. [Три́жды.]

Богоно́се о́тче Мака́ріе,* ты́ отъ младе́нства жесто́кимъ и приско́рбнымъ путе́мъ ше́ствовалъ еси́,* добродѣ́тельми же твои́ми,* я́ко плодови́тъ виногра́дъ, на высоту́ возше́лъ еси́,* любо́вію Влады́цѣ твоему́ неле́стно послѣ́довавъ.* Сего́ ра́ди небе́сный граждани́нъ бы́лъ еси́* и та́мо на́мъ у Христа́ Бо́га* покро́въ испроси́ отъ бѣсо́вскихъ искуше́ній,* Его́же моли́ дарова́ти душа́мъ на́шимъ* ми́ръ и ве́лію ми́лость. [Два́жды.]

Сла́ва, гла́съ 4:

Ра́дуйся, всеблаже́нная главо́, и́же отъ млады́хъ ногте́й крѣ́постію ума́ Бо́га Вседержи́теля утвержда́емь, духо́вную пи́щу Христа́ па́че всѣ́хъ возлюби́лъ еси́, земны́я красоты́, и пи́щи, и поко́й отню́дъ возненави́дѣлъ еси́, того́ ра́ди небе́снымъ си́ламъ собесѣ́дникъ яви́лся еси́, преподо́бне. Съ ни́миже Христа́ Бо́га моли́ непреста́нно о всѣ́хъ на́съ, вѣ́рно чту́щихъ па́мять твою́.

И ны́нѣ, богоро́диченъ:

Иже Тебе́ ра́ди [богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость].

Вхо́дъ. Проки́менъ дне́. Чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 5:

Егда́ въ честно́е успе́ніе твое́* гра́дъ и су́щія ве́си вся́,* я́ко отъ ѳиміа́ма церко́внаго, напо́лнишася благово́нія,* тогда́ позна́ша лю́діе твое́ преподо́бное преставле́ніе* и стеко́шася вси́:* луча́ми бо чуде́съ всѣ́хъ озари́лъ еси́.* Тѣ́мъ и ны́нѣ Христа́ Бо́га моли́* спасти́ся душа́мъ на́шимъ.

Сти́хъ: Честна́ предъ Го́сподемъ* сме́рть преподо́бныхъ Его́.

Дне́сь правовѣ́рніи лю́діе стеко́шася* въ честно́е успе́ніе твое́,* тогда́ обрѣ́тше, я́ко безцѣ́нное сокро́вище некра́домое,* лице́ же твое́, па́че со́лнечного свѣ́та сія́юще,* всю́ду благово́нія испо́лни.* Су́щимъ же хромы́мъ хожде́ніе* и слѣпы́мъ зрѣ́ніе дарова́лъ еси́.* Моли́ Христа́ Бо́га* пода́ти отпуще́ніе согрѣше́ніемъ на́шимъ* пресла́вно соверша́ющимъ па́мять твою́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Тѣ́ло и у́мъ очи́стивъ,* себе́ при́сно Свята́го Ду́ха жили́ще содѣ́лалъ еси́,* и ны́нѣ, я́ко свѣти́ло, сія́еши,* и отъ многоцѣле́бнаго гро́ба твоего́* непреста́нно чудеса́ излива́еши,* правовѣ́рныхъ же люде́й неизглаго́ланною ра́достію возвесели́лъ еси́.* Моли́ Христа́ Бо́га спасти́ся душа́мъ на́шимъ.

Сла́ва, гла́съ 5:

Востру́бимъ духо́вными пѣ́сньми во псалмѣ́хъ и пѣ́ніихъ, стеце́мся въ це́рковь Бо́жію и услы́шимъ засту́пника гра́ду на́шему Га́личу, его́же моли́твами свои́ми соблюда́етъ всегда́ отъ наше́ствія сопроти́вныхъ. Тѣ́мже ему́ вси́ та́ко рце́мъ: о́тче Мака́ріе приснопа́мятне, предвари́ и изба́ви на́съ отъ искуше́ній вся́ческихъ, любо́вію моля́щихъ тя́, я́ко те́пла предста́теля ко Спа́су всѣ́хъ Бо́гу за лю́ди твоя́, да спасе́тъ ду́ши на́ша.

И ны́нѣ, богоро́диченъ:

Хра́мъ и Две́рь еси́, [Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ].

Та́же: Ны́нѣ отпуща́еши... Тропа́рь, гла́съ 5:

Дне́сь гра́дъ тво́й Га́личь тобо́ю хва́лится, въ концѣ́хъ бо его́ пресвѣ́тло, я́ко ве́ліе со́лнце, возсія́лъ еси́ и чудесы́ твои́ми, преподо́бне Мака́ріе, вся́ озари́лъ еси́. И ны́нѣ моли́ся Го́сподеви изба́витися душа́мъ на́шимъ отъ пре́лести вра́жія и спасти́ся гра́ду твоему́ отъ пога́нскаго наи́тія.

Сла́ва, и ны́нѣ, богоро́диченъ по гла́су:

[Ра́дуйся, две́ре Госпо́дня непроходи́мая; ра́дуйся, стѣно́ и покро́ве притека́ющихъ къ Тебѣ́; ра́дуйся, необурева́емое приста́нище и неискусобра́чная, ро́ждшая пло́тію Творца́ Твоего́ и Бо́га, моля́щи не оскудѣва́й о воспѣва́ющихъ и кла́няющихся Рождеству́ Твоему́.]


НА УТРЕНИ,
На Бо́гъ Госпо́дь: Тропа́рь [преподо́бнаго два́жды, Сла́ва, и ны́нѣ, богоро́диченъ.]

По 1-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Зва́нію Го́спода твоего́ послѣ́довалъ еси́, мíръ оста́вивъ и вся́, я́же въ мíрѣ, красова́нія, преблаже́нне Мака́ріе: претерпѣ́лъ еси́ усе́рдно пусты́нное озлобле́ніе, полки́ же бѣсо́вскія отри́нулъ еси́ му́жески. Тѣ́мже па́мять твою́ при́сно восхваля́емъ пѣ́сньми вѣ́рно. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

По́стника Госпо́дня пѣ́сньми почти́мъ, я́ко умертви́вша вся́ прило́ги страсте́й воздержа́ніемъ тве́рдымъ и крѣ́пкимъ терпѣ́ніемъ вои́стинну, и посрами́вша зѣло́ сопроти́внаго всю́ горды́ню, и ны́нѣ моля́щася Го́сподеви поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія и несказа́ненъ о́бразъ Рождества́ въ Тебѣ́ позна́ся, Приснодѣ́во Чи́стая, ужаса́етъ мо́й у́мъ и удивля́етъ помышле́ніе: сла́ва Твоя́, Богоро́дице, во всѣ́хъ простре́ся, ко спасе́нію ду́шамъ на́шимъ.

По поліеле́и сѣда́ленъ, гла́съ 1. Подо́бенъ: Гро́бъ Тво́й, Спа́се.

Погре́блъ еси́ страсте́й все́ воста́ніе умерщвле́ніемъ пло́ти, свяще́нный о́тче, жи́знь безконе́чную по сме́рти прія́лъ еси́. Тѣ́мже дне́сь Христо́ва Це́рковь пра́зднуетъ твою́ досточу́дную па́мять, преподо́бныхъ украше́ніе. [Два́жды.]

Сла́ва, и ны́нѣ, богоро́диченъ:

Наста́ви на́съ на пу́ть покая́нія, укло́ньшіяся при́сно къ безпу́тіемъ зо́лъ и Преблага́го прогнѣ́вавшія Го́спода, Неискусобра́чная благослове́нная Марíе, прибѣ́жище отча́янныхъ человѣ́ковъ, Бо́жіе жили́ще.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ стихира, гласъ 6:

Преподо́бне о́тче, во всю́ зе́млю изы́де веща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ [Богоро́дицы со ирмосо́мъ на 6 и свята́го на 8,] гла́съ 4.

Пѣ́снь 1.

Ирмо́съ: Колесни́цы фарао́новы и си́лу его́ вве́рже въ мо́ре Крѣ́пкій во бра́нехъ, воспое́мъ пѣ́снь но́вую, я́ко просла́вися.

Ве́сь освяще́нъ бы́въ благода́тію Христо́вою, Мака́ріе преподо́бне, вои́стинну, я́ко избра́нъ сосу́дъ, Бо́гови показа́лся еси́ и жили́ще че́стно Свята́го Ду́ха.

Отъ ю́ности Бо́га возлюби́лъ еси́, преподо́бне Мака́ріе, и Тому́ отъ всея́ души́ порабо́талъ еси́, преблаже́нне. И ны́нѣ помина́й на́съ, пресвѣ́тло соверша́ющихъ па́мять твою́.

Отъ страсте́й душетлѣ́нныхъ мíра сего́ избѣ́глъ еси́, преподо́бне, и въ пусты́ню всели́лся еси́ глубо́кую. Ны́нѣ же у́бо ра́дуется ду́хъ тво́й въ небе́сныхъ оби́телехъ.

Богоро́диченъ: О Тебѣ́ ра́дуется вся́кое созда́ніе Бо́жіе, Ма́ти Бо́га Вы́шняго, Его́же понесла́ еси́, нося́щаго вся́ческая. И мы́, чту́ще Тя́ вои́стинну, я́ко Богоро́дицу въ пѣ́снехъ велича́емъ.

Пѣ́снь 3.

Ирмо́съ: Утвержда́яй гро́мъ и созида́яй ду́хъ, утверди́ мене́, Го́споди, да Тя́ пою́ и́стинно и творю́ во́лю Твою́, я́ко нѣ́сть свя́тъ, я́ко Ты́, Бо́же на́шъ.

Уха́етъ твоя́ ра́ка бога́тно и дае́тъ незави́стно всѣ́мъ исцѣле́ніе, ду́ши же отъ бѣсо́вскихъ навѣ́тъ избавля́еши моли́твами твои́ми, преподо́бне.

Отгна́лъ еси́, преподо́бне, отъ люде́й твои́хъ бѣсо́вская озлобле́нія, и гряду́щая и́хъ ополче́нія, я́же на на́съ, мо́лимъ тя́ укроти́ти, я́ко да при́сно соверша́емъ па́мять твою́.

Утверди́ се́рдце мое́ свѣ́тло воспѣва́ти па́мять твою́, о́тче всеблаже́нне Мака́ріе: поще́ніемъ бо и бдѣ́ніемъ, я́ко а́нгелъ, показа́лся еси́, въ моли́твахъ воспѣва́я Бо́га, подаю́щаго на́мъ тобо́ю всѣ́мъ исцѣле́ніе.

Богоро́диченъ: Всепѣ́тая Ма́ти Бо́жія, ро́ждшая на́мъ Жизнода́вца и Спа́са всѣ́хъ Бо́га, Того́ у́бо, Госпоже́, моли́ бо́дренною Твое́ю моли́твою, да спасе́тъ ду́ши на́ша.

Сѣда́ленъ, гла́съ 3:

Моля́ прилѣ́жно Го́спода и Того́ ра́ди свы́ше ве́ліе дерзнове́ніе прія́лъ еси́, я́коже и иновѣ́рніи чудесе́мъ твои́мъ дивля́хуся вои́стинну, прехва́льне Мака́ріе: и́хъ бо ага́рянское безбо́жное шата́ніе посрами́лъ еси́ и моли́твами твои́ми до конца́ и́хъ ослѣпи́лъ еси́, гра́дъ же и вся́ су́щія лю́ди въ не́мъ неврежде́нны соблю́лъ еси́. И ны́нѣ, преподо́бне, Христа́ Бо́га моли́ ми́лостива бы́ти на́мъ дне́сь и во вѣ́ки. [Два́жды.]

Сла́ва, и ны́нѣ, богоро́диченъ:

Устраши́ся вся́кое земноро́дное слы́шаніе, отъ нѣ́дръ Оте́ческихъ въ дѣви́чу утро́бу всели́вшася слы́шаще, Его́же у́бо проро́цы провозвѣсти́ша, изъ Тебе́ воплоще́нна бы́ти Сы́на Бо́жія, Ма́ти Дѣ́во Всепѣ́тая, Его́же моли́ спасти́ ста́до Твое́, Богоро́дице.

Пѣ́снь 4.

Ирмо́съ: Услы́шахъ, Бо́же, слу́хъ Тво́й и убоя́хся, разумѣ́хъ дѣла́ Твоя́ и ужасо́хся, Го́споди, я́ко Твоего́ хвале́нія испо́лнь земля́.

Се́ удали́лся еси́, бѣ́гая мíра и су́щихъ въ не́мъ и прилѣпи́лся еси́ Го́сподеви твоему́, Влады́цѣ и Бо́гу всѣ́хъ, Ему́же, при́сно поя́, благоугоди́лъ еси́, му́дре Мака́ріе.

Удиви́шася а́нгельстіи ли́цы твоему́ трудолю́бію, блаже́нне, и мы́, вѣ́рніи, при́сно тя́ сла́вимъ, я́ко да моли́твами твои́ми изба́вимся бу́дущаго осужде́нія.

Украша́ется дне́сь вѣ́рныхъ собо́ръ, торжеству́я, преподо́бне, въ па́мять твою́, пога́ныхъ же со́нмища ужаса́ются, ви́дяще тя́ крѣ́пка засту́пника гра́ду твоему́ и живу́щимъ въ не́мъ.

Богоро́диченъ: Исцѣли́, Дѣ́во, болѣ́зни серде́цъ на́шихъ, Тебе́ бо и́мамы Помо́щницу и Хода́таицу къ Сы́ну Твоему́ и Бо́гу на́шему, Его́же родила́ еси́, Спа́са и Врача́ всѣ́хъ, источи́вшаго спасе́ніе душа́мъ на́шимъ.

Пѣ́снь 5.

Ирмо́съ: Возсія́й ми́, Го́споди, свѣ́тъ повелѣ́ній Твои́хъ, я́ко къ Тебѣ́ ду́хъ мо́й у́тренюетъ и пое́тъ Тя́: Ты́ бо еси́ Бо́гъ на́шъ, и къ Тебѣ́ прибѣга́ю, Царю́ ми́ра.

Въ пусты́ни я́сно возсія́лъ еси́, богодохнове́нне Мака́ріе, нося́ во устѣ́хъ твои́хъ непреста́нныя моли́твы. Тѣ́мъ мра́чныя собла́зны и бѣсо́вскія полки́ до конца́ потреби́лъ еси́.

Возгремѣ́ Илія́ на колесни́цѣ, ты́ же, свя́те, воспѣва́лъ еси́ богодохнове́нную пѣ́снь въ пусты́ни, со а́нгелы вся́ческихъ Влады́ку умоля́я, е́же улучи́ти го́рнее пребыва́ніе.

Водвори́лся еси́, блаже́нне, въ небе́сныя оби́тели, и со а́нгелы, преподо́бне, лику́еши въ го́рнихъ селе́ніихъ, и та́мо Вседержи́теля вы́ну зри́ши Бо́га, Его́же непреста́нно моли́ о всѣ́хъ на́съ.

Богоро́диченъ: Вы́шша естества́ Бо́га пло́тію породила́ еси́, Дѣ́во, я́коже Са́мъ восхотѣ́. Тѣ́мъ, вѣ́рніи, мо́лимъ Тя́, изба́витися на́мъ Рождество́мъ Твои́мъ вѣ́чнаго муче́нія.

Пѣ́снь 6.

Ирмо́съ: Бу́ря мя́ помышле́ній пости́гши, во глубину́ низвлачи́тъ мя́ безмѣ́рныхъ грѣхо́въ, но Ты́, Упра́вителю Благíй, предвари́въ, упра́ви, я́ко проро́ка, и спаси́ мя.

Беспло́тныхъ житіе́ подража́лъ еси́, преподо́бне, я́ко а́нгелъ непоро́чно на земли́ пожи́въ, воздержа́ніемъ плотскíя стра́сти умертви́лъ еси́, о́тче Мака́ріе, сла́ву же мíра сего́ возненави́дѣлъ еси́, богому́дре.

Боже́ственный гла́съ вня́лъ еси́ себѣ́, прему́дре, тѣ́мъ и въ пусты́ню водвори́лся еси́, послуша́ніемъ любе́зно нося́ Кре́стъ Его́. И сего́ ра́ди потща́лся еси́ чи́ста себе́ сохрани́ти до конца́, преподо́бне.

Боже́ственнымъ манове́ніемъ тебѣ́ звѣ́ріе ди́віи въ пусты́ни покори́шася: стра́сти бо тебѣ́ плотскíя вся́ умири́шася. Сего́ ра́ди и бѣсо́вская льще́нія посрами́лъ еси́.

Богоро́диченъ: Боже́ственное селе́ніе Ты́ еси́, Пречи́стая Богоро́дице: отъ Твоея́ бо утро́бы произы́де Сло́во Отчее и бы́сть Бо́гъ и Человѣ́къ, я́ко да за неизрече́нное милосе́рдіе спасе́тъ человѣ́ческій ро́дъ.

Конда́къ, гла́съ 2:

Вторы́й Моисе́й яви́лся еси́, преподо́бне: о́нъ бо жезло́мъ мо́ре раздѣли́, ты́ же стра́сти, я́ко Амали́ка, побѣди́лъ еси́ и непрохо́дную пусты́ню немяте́жнымъ умо́мъ проше́лъ еси, въ не́йже моли́твами твои́ми ве́ліе чу́до сотвори́лъ еси́: гла́дныя лю́ди до изоби́лія прекорми́лъ еси́. И ны́нѣ моли́ся Го́сподеви пода́ти всѣ́мъ печа́льнымъ утѣше́ніе, Мака́ріе, о́тче приснопа́мятне, и́же Га́личестѣй странѣ́ и все́й Россíйстѣй земли́ похвала́ и утвержде́ніе.

Икосъ:

Яко свѣтоза́рная луча́, вселе́ннѣй свѣ́тъ возвеща́я, дне́сь ты́, всему́дре о́тче Мака́ріе, озари́лъ еси́ Га́лическую страну́ и всю́ зе́млю Россíйскую чудесы́ твои́ми, и́миже тя́ Христо́съ Бо́гъ обогати́. Тѣ́мъ и вопіе́мъ ти́: ра́дуйся, пребога́те о́тче Мака́ріе; ра́дуйся, е́же всѣ́хъ по́стничествующихъ всечестно́е сосло́віе; ра́дуйся, я́ко ли́ку святы́хъ всему́дрое сочета́ніе показа́лся еси́; ра́дуйся, преподо́бныхъ всѣ́хъ удобре́ніе и отце́въ похвало́; ра́дуйся, крестоно́сное послѣ́дованіе по гла́су Го́спода твоего́; ра́дуйся, и́же у Христа́ вѣ́рному Импера́тору на́шему на сопроти́вныя побѣ́ды испроша́еши; ра́дуйся, я́ко гра́дъ на́шъ отъ ва́рварскаго наи́тія невреди́мь сохраня́еши; ра́дуйся, я́ко пусты́ннымъ селе́ніемъ свѣтоли́ченъ вѣне́цъ себѣ́ спле́лъ еси́; ра́дуйся, я́ко небе́снаго жи́тельства смиренному́дрія ра́ди твоего́ дости́гнути сподо́бился еси́, ра́дуйся, я́ко у престо́ла Вседержи́теля Бо́га со а́нгелы лику́еши; ра́дуйся, я́ко усе́рдно Того́ за вѣ́рныя рабы́ мо́лиши; ра́дуйся, Мака́ріе приснопа́мятне, и́же Га́личестѣй странѣ́ и все́й Россíйской земли́ вели́кая похвала́ и утвержде́ніе.

Пѣ́снь 7.

Ирмо́съ: Глаго́лавый на горѣ́ съ Моисе́омъ и о́бразъ дѣ́вства явле́й въ купинѣ́, благослове́нъ еси́, Бо́же оте́цъ на́шихъ.

Гла́сомъ любе́знымъ Тро́ицу воспѣва́я, и я́ко богодохнове́ненъ орга́нъ яви́лся еси́, Мака́ріе преподо́бне, и́же велегла́сно всѣ́мъ зовы́й: благослове́нъ Бо́гъ оте́цъ на́шихъ.

Пусты́нная вита́нія бога́тно получи́въ, свя́те Мака́ріе, ю́же прехожда́лъ еси́ непреста́нною моли́твою, и та́мо получи́въ духо́вную пи́щу, зовы́й: благослове́нъ Бо́гъ оте́цъ на́шихъ.

Глаго́лъ Госпо́день исполня́я, за́повѣди Бо́га твоего́ отъ ю́ности сохрани́лъ еси́, о́тче Мака́ріе, и Того́ благода́тію возмо́глъ еси́ пога́ныхъ собо́рища твои́ми чудесы́ удиви́ти. Сего́ ра́ди зове́мъ: благослове́нъ Бо́гъ оте́цъ на́шихъ.

Богоро́диченъ: Глаго́лъ Деви́чь Іо́сифъ Тя́ нарече́, я́ко пра́во е́сть: утро́бу же не дѣви́чу, но небе́сный кру́гъ и земну́ю широту́. Во Твое́й бо утро́бѣ Отчее Сло́во бы́сть, благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Земля́ и вся́, я́же на не́й, мо́ре и вси́ исто́чницы, небеса́ небе́съ, свѣ́тъ и тма́, мра́зъ и зно́й, сы́нове человѣ́честіи, свяще́нницы, благослови́те Го́спода и превозноси́те Его́ во вѣ́ки.

Земна́я вся́ оста́вивъ, пи́щу же и сла́ву мíра сего́, я́ко пра́хъ, вмѣни́лъ еси́ и еди́наго Бо́га возжелѣ́лъ еси́, о́тче, Его́же моли́ пла́мень страсте́й угаси́ти въ на́съ, пою́щихъ и превознося́щихъ Его́ во вѣ́ки.

Зе́млю отъ младе́нства слеза́ми твои́ми, я́ко ту́чами, напои́лъ еси́, блаже́нне, по́ты же и по́двиги трудо́въ твои́хъ кто́ исповѣ́сть? Ихже ра́ди вѣнча́ тя́ Христо́съ въ Ца́рствіи Свое́мъ, Его́же пое́мъ и превозно́симъ во вѣ́ки.

Земля́ я́ко плодови́та, яви́лся еси́, о́тче Мака́ріе: изне́слъ бо еси́ богосажде́нный пло́дъ, вѣ́рныхъ напитава́ющъ сердца́ бра́шномъ живоно́снымъ ева́нгельскаго уче́нія Христо́выхъ усте́нъ, Его́же пое́мъ и превозно́симъ во вѣ́ки.

Богоро́диченъ: Земле́ свята́я и Непоро́чная Дѣ́во, изъ Тебе́ бо напослѣ́докъ прозябе́ Христо́съ Бо́гъ, я́коже кля́лся е́сть Авраа́му, рабу́ Своему́, е́же умно́жити сѣ́мя его́ и Тобо́ю спасти́ сѣдя́щія во тмѣ́. Спаси́, Влады́чице, всѣ́хъ, пою́щихъ Тя́ и превознося́щихъ Го́спода во вѣ́ки.

Пѣ́снь 9.

Ирмо́съ: Яко сотвори́ Мнѣ́ вели́чія Си́льный и свя́то и́мя Его́, и ми́лость Его́ въ ро́дъ и ро́дъ боя́щимся Его́.

Яко те́пла засту́пника стяжа́хомъ тя́ въ бране́хъ, о́тче Мака́ріе: плѣне́нныя бо моли́твами твои́ми свобожда́еши и невѣ́рныя со́нмища посрамля́еши.

Яко со́лнце свѣтоно́сное, чудесы́ сія́еши, Мака́ріе, и равноа́нгельно на земли́ пожи́лъ еси́, богому́дре, Боже́ственнѣй же сла́вѣ со а́нгелы предстоя́ти сподо́бился еси́.

Прекра́сенъ до́мъ Свята́го Ду́ха яви́лся еси́ и Царя́ всѣ́хъ Христа́ Бо́га отъ всея́ души́ возлюби́лъ еси́, Его́же ра́ди въ чудесѣ́хъ прославля́ешися, досточу́дне о́тче Мака́ріе преподо́бне.

Богоро́диченъ: Вся́ тва́рь воспѣва́етъ Тя́, Богоро́дице, и небе́сніи чи́нове Тебе́ велича́ютъ непреста́нно: Бо́га бо и Царя́ всѣ́хъ родила́ еси́, Дѣ́во Чи́стая. Его́же моли́ вся́ гра́ды и страны́ вѣ́рныя соблюсти́ отъ навѣ́та вра́жія.

Свѣти́ленъ:

Влады́чню престо́лу ны́нѣ съ преподо́бными ли́ки предстоя́, богому́дре, моли́тися не преста́й дарова́ти побѣ́ды правовѣ́рному Импера́тору на́шему на сопроти́вныя вся́, и междоусо́бныя бра́ни укроти́ти, и ми́ръ мíрови устро́ити, о́тче Мака́ріе, и спасти́ ду́ши на́ша. [Два́жды.]

Сла́ва, и ны́нѣ, богоро́диченъ:

Отъ нерукотворе́нныхъ пеле́нъ небе́сныхъ о́блакъ въ смире́нныя пелены́ тлѣ́нныя облече́ся Сло́во Отчее, изъ Дѣ́вы неизрече́нно безъ сѣ́мене роди́вся, Юже, Чи́стую Ма́терь, Пресла́вную Богоро́дицу, непреста́нно пое́мъ и славосло́вимъ во вѣ́ки.

На хвали́техъ поста́вимъ стихо́въ 4, гла́съ 8.

Отче богому́дре Мака́ріе,* въ мѣ́ру похвалы́ преподо́бныхъ дости́глъ еси́:* смиренному́дрія же ра́ди де́моновъ вы́и сокруши́лъ еси́,* сле́зными же пото́ки и по́стными труды́* ва́рваровъ ро́ги сломи́лъ еси́.* Христу́ прилѣ́жно моли́ся, преподо́бне,* соверше́ннѣ испроси́ти благочести́вому Импера́тору побѣ́ды на сопроти́вныя. [Два́жды.]

Преподо́бне о́тче Мака́ріе,* нача́льниче мона́шествующихъ,* егда́ у́бо бы́вшу гнѣ́ву Бо́жію на лю́ди,* тогда́ ва́рвары оби́тель твоея́ па́ствы плѣни́ша,* и ча́да твоя́ мечи́, я́ко кла́сы пожа́ша;* моли́твами же и моле́ніемъ твои́мъ* къ невече́рнему Свѣ́ту и́хъ посла́лъ еси́,* идѣ́же отъ Влады́ки всѣ́хъ Бо́га* досто́йныя вѣнцы́ прія́ша;* Его́же прилѣ́жно моли́* дарова́ти на́мъ ве́лію ми́лость.

Въ вы́шнихъ вѣ́чная взыска́лъ еси́,* до́льняя же вся́, я́ко мимоше́дшая, вмѣни́лъ еси́* и та́ко изя́щенъ моли́твенникъ показа́лся еси́.* Егда́ же у́бо отъ шата́нія безбо́жныхъ ва́рваръ* непрохо́дными пусты́нями ше́ствовалъ еси́,* тогда́ моли́твами твои́ми* до изоби́лія бра́шно лю́демъ твои́мъ испроси́лъ еси́.* И ны́нѣ на́мъ па́че духо́вную пи́щу отъ Христа́ испроси́,* о́тче Мака́ріе, преподо́бне,* я́ко да, любо́вію въ па́мять твою́ соше́дшеся,* тебе́ почита́емъ.

Сла́ва, гла́съ 6:

Псало́мски пѣ́сньми дне́сь почти́мъ преподо́бнаго съ весе́ліемъ о Го́сподѣ и па́ки рце́мъ: ра́дуйся, блаже́нства тезоимени́те Мака́ріе, ра́йскаго ра́дованія напо́лнивыйся, и отъ Христа́ Бо́га нетлѣ́нный вѣне́цъ прія́лъ еси́, и, я́ко свѣти́льникъ пресвѣ́тлый, ду́шу твою́ просвѣти́лъ еси́. И ны́нѣ та́ко пѣ́сньми вси́ возопіе́мъ: ра́дуйся, преподо́бне о́тче на́шъ.

И ны́нѣ, богоро́диченъ, [гла́съ то́йже:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

Славосло́віе вели́кое. [Ектеніи́] и отпу́стъ.



НА ЛИТУРГІИ,

Слу́жба преподо́бническая: [Блаже́нна отъ кано́на преподо́бнаго, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 230 об. – 236.

/ Къ оглавленію раздѣла /


Наверхъ / Къ титульной страницѣ

0