Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 25-й де́нь.
Па́мять святы́хъ же́нъ Олимпіа́ды и Евпраксíи.

НА ПОВЕЧЕРІИ,
Кано́нъ святы́хъ же́нъ, его́же краегране́сіе: Честны́мъ жена́мъ честно́е пою́ пѣ́ніе. Іо́сифъ. Гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Плотско́ю не́мощію си́льнаго врага́ низложи́сте, и присво́истеся къ Бо́гу, преподо́бныя жены́, моля́щеся си́лу всѣ́мъ на́мъ пода́ти спаси́тельную.

Уязви́стеся добро́тою Женихо́вою и во слѣ́дъ Его́ прилѣпи́стеся псало́мски, послѣ́дующе живоно́снымъ стопа́мъ Его́, и сего́ ра́ди низложи́сте врага́ змíя.

Увяди́вше труды́ по́стническими тѣле́сныя добро́ты, украси́сте ва́ша ду́ши и со Христо́мъ Женихо́мъ въ черто́ги свѣ́тлыя внидо́сте, преподо́бныя.

Богоро́диченъ: Невѣ́стникъ показа́ся свѣтови́дѣнъ утро́ба Твоя́, Дѣ́во, ми́лости ра́ди тѣле́сно изъ Тебе́ воплоти́вшагося Го́спода и вся́ческая богоразу́мія луча́ми просвѣ́щшаго.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Презрѣ́ла еси́ добро́ту тѣле́сную, пречестна́я, и мимогряду́щую сла́ву, я́ко со́нъ, вмѣни́ла еси́, во смире́ніи же, Олимпіа́до, и поще́ніи Бо́га взыска́ла еси́, богоблаже́нная.

Младе́нствующи лѣ́ты, на́съ ра́ди Младе́нца Сло́ва, на зе́млю, Евпраксíе, прише́дшаго, вѣ́рою возлюби́ла еси́ и Того́ о́бразу ду́шу связа́ла еси́, непрело́жна пребы́вши.

Отверго́стеся мíра и пло́ти мудрова́нія, воздержа́ніемъ же и труды́ стяжа́вше Христа́, Жениха́ Пречи́стаго, черто́гъ небе́сный, подаю́щаго ва́мъ боже́ственное наслажде́ніе.

Богоро́диченъ: Свяще́нныхъ проро́къ свяще́нныя трубы́ дре́вле Тя́ провозвѣсти́ша, две́рь Свѣ́та ро́ждшую и сви́токъ одушевле́нный, на не́мже не рука́ми Сло́во написа́ся па́че сло́ва, Пречи́стая Дѣ́во.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Страннопріе́мница усе́рднѣйша была́ еси́, собо́ръ свяще́нныхъ упокоева́ющи и Христа́ о се́мъ веселя́щи, за милосе́рдіе стра́нна бы́вшаго.

Добро́ту пречи́стую люби́маго ви́девши Жениха́ твоего́, Евпраксíе, увяди́ла еси́ пло́ти добро́ту воздержа́ніемъ.

Дрема́ніе отри́нувше отъ душе́вныхъ вѣ́ждей свяще́нныя жены́, успи́сте двиза́нія тѣле́сная воздержа́ніемъ.

Богоро́диченъ: Воплоти́вшагося Тебе́, Го́споди, отъ Пречи́стыя Дѣ́вы преподо́бныя возлюби́вше, въ воню́ мѵ́ра Твоего́ потеко́ша, Твое́ю уязви́вшеся Боже́ственною любо́вію.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Отъ исто́чника напая́ема, вселе́нную всезлаты́ми уче́ніи свяще́ннаго па́стыря напои́вшаго, кла́сы прозябла́ еси́ до́брыя дѣ́тели, Олимпіа́до, пита́еши сердца́ на́съ, чту́щихъ тя́.

Блаже́нными наде́ждами твою́ сла́вную ду́шу укрѣ́пльши и пи́щею невеще́ственною пита́ема, ума́ чистото́ю де́ньми мно́гими терпѣли́вно а́лчбу, Евпраксíе, претерпѣ́ла еси́, ра́дующися.

Умертви́вшеся мíрови, наслѣ́довасте жи́знь безсме́ртную и черто́га Боже́ственнаго сподо́бистеся, богоблаже́нныя, свѣщи́ ва́ша по́стническимъ еле́емъ неугаси́мы соблю́дше, всечестны́я.

Богоро́диченъ: Бо́жіе Бо́гъ Сло́во во утро́бу Неискусобра́чную во́лею всели́ся и Человѣ́къ узрѣ́нъ бы́сть, Иже Дѣ́вою соблюды́й Тя́, Пречи́стая, Его́же жела́юще, отрокови́цы по́стнически Сему́ послѣ́доваша житіе́мъ свѣ́тлымъ.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Юна су́щи, Евпраксíя болѣ́зней усе́рдіемъ, благочести́вымъ по́мысломъ ве́тхаго запина́теля попира́ше въ не́мощи же́нстѣй тѣлесе́: утвержда́ше бо сію́ Христо́съ, Иже въ на́шу обо́лкся не́мощь.

Воздержа́ніе и смире́нное се́рдце, бдѣ́ніе съ ми́лостынею, ра́зумъ, и вѣ́ру пра́ву, и соверше́нну любо́вь, Олимпіа́до, стяжа́вши, сла́вная, была́ еси́ хра́мъ Бо́жій и чуде́съ исто́чникъ неоску́дный.

Устрани́вше себе́ жите́йскихъ сласте́й терпѣ́ніемъ болѣ́зней по́стническихъ, на зе́млю Соше́дшаго на́съ ра́ди и во́лею Стра́нствовавша, вы́, честны́я, сего́ ра́ди стяжа́сте на небесѣ́хъ, страннопріи́мствовавша ва́съ, досточу́дныя.

Богоро́диченъ: Чистоты́ Тя́ и че́стна дѣ́вства чи́стый сосу́дъ, Отрокови́це, Содѣ́тель обрѣ́тъ, сло́вомъ въ пречи́стое Твое́ чре́во всели́ся и всю́ вра́жію отъ человѣ́къ зло́бу изгна́.

Сѣда́ленъ, гла́съ 8. Подо́бенъ: Повелѣ́нное.

Въ моли́твахъ та́йныхъ бдя́ще и насла́ждшеся писа́ньми богодохнове́нными, Олимпіа́да и Евпраксíя сла́вная на ра́му Госпо́день взя́ша Кре́стъ и, Сему́ послѣ́дующе воздержа́тельно, всю́ ле́сть змíя низложи́ша, зову́ще Христу́: Женише́ небе́сный, Ты́ бу́ди на́мъ утвержде́ніе.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Сла́ву тлѣ́ющую на нетлѣ́нную премѣни́ша любо́вію, преподо́бныя, ея́же наслажда́ющеся при́сно, ра́дующеся и веселя́щеся, пою́тъ: благослове́нъ Бо́гъ оте́цъ на́шихъ.

О, ка́ко претерпѣ́ стоя́ніе, а́лчбу же на дни́ мно́ги, Евпраксíя, Христу́ вопію́щи, Жениху́: благослове́нъ Бо́гъ оте́цъ на́шихъ.

Вели́къ тя́ сосу́дъ узрѣ́въ Боже́ственнаго Ду́ха, Олимпіа́до, бога́тно вели́кими свои́ми исполня́етъ тя́ уче́ніи въ патріа́рсѣхъ вели́кій Златосло́въ, блаже́нная.

Богоро́диченъ: Разрѣши́ла еси́ еди́на кля́тву прама́тернюю всѣ́хъ благослове́ньми вѣнча́ющаго Христа́ ро́ждши, Дѣ́во, Ему́же пое́мъ: Го́споди Бо́же, благослове́нъ еси́ во вѣ́ки.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

По́мыслу, дѣ́во, стра́сти безслове́сныя повину́ла еси́, и Жениху́ Сло́ву уневѣ́стившися, непоро́чная чи́стая, вопію́щи: благослови́те, вся́ дѣла́, Го́спода, по́йте и превозноси́те Его́ во вѣ́ки.

Ва́шими по́двиги те́мнаго кня́зя низло́жше, вѣне́цъ нетлѣ́нія на́мъ исхода́таиша, и ра́йскія вхо́ды, отрокови́це, и боже́ственное наслажде́ніе въ ра́дости души́ во вѣ́ки.

Распе́ншеся мíру и Бо́жіею любо́вію уязви́вшеся, свяще́нныя дѣ́вы, вкуше́ніемъ сла́дкимъ Еву уязви́вшаго, воздержа́нія стрѣла́ми уязви́сте, воспѣва́юще Христа́ во вѣ́ки.

Богоро́диченъ: Іису́са ро́ждшая, отъ чи́стыхъ крове́й Твои́хъ воплоще́нна, дѣ́вы вся́ собрала́ еси́, Пречи́стая Дѣ́во Ма́ти, и съ ни́ми вопію́щи: благослови́те, вся́ дѣла́, Го́спода и превозноси́те Его́ во вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Кра́сныя Влады́цѣ, и богоглаго́ливыя го́рлицы, и ла́стовицы свѣ́тлыя и чистолюби́выя, въ добро́ты небе́сныя приведе́ни бы́сте.

Сочта́стеся съ вы́шними ликостоя́ніи и во избра́нныхъ собо́рѣхъ всели́стеся, о на́съ моля́щеся любо́вію ще́дрому Бо́гу.

Па́мять Евпраксíи и Олимпіа́ды, я́ко со́лнце, мíрови возсія́, вѣ́рныхъ мы́сли просвѣща́ющи, Христа́ велича́ющихъ при́сно.

Богоро́диченъ: Свѣ́та су́щи прія́телище, просвѣти́, Дѣ́во, омраче́нную страстьми́ ду́шу мою́ и кромѣ́шнія тмы́ изба́ви мя́ мольба́ми Твои́ми.

Стихи́ры святы́хъ же́нъ, гла́съ 1. Подо́бенъ: Небе́сныхъ чино́въ.

Тайносло́вца проро́ка* и учи́теля на́шего* учени́цу въ пѣ́снехъ* Олимпіа́ду согла́сно почти́мъ досто́йно* и съ не́ю восхваля́юще цѣлому́дренную и чи́стую Евпраксíю,* я́ко Христу́ моля́щуюся спасти́ся на́мъ.

Благоче́стія исча́діе* и удобре́ніе мона́шествующихъ су́щу,* пѣ́сньми досто́йно почти́мъ согла́сно, вси́ вѣ́рніи,* Евпраксíю цѣлому́дренную,* я́ко моля́щую Зижди́теля о на́съ,* спасти́ся душа́мъ на́шимъ.

Сла́ва:

Ты́, земну́ю красоту́ совле́кши,* до́брѣ благу́ю ча́сть избра́ла еси́, богому́драя,* ю́же обрѣ́те Марíя,* и, вся́ а́біе оста́вльши вре́менная,* добродѣ́телію прія́ла еси́* мы́сленный би́серъ многоцѣ́нный.

И ны́нѣ: Досто́йно е́сть...

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 223 об. – 226 об.

/ Къ оглавленію раздѣла /


Наверхъ / Къ титульной страницѣ

0