Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 25-й де́нь.
Успе́ніе святы́я Анны, ма́тере Пресвяты́я Богоро́дицы.

Аще настоя́тель изво́литъ, твори́мъ бдѣ́ніе.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Небе́сныхъ чиновъ.

Па́мять соверша́юще пра́ведныхъ* и пра́отецъ Христо́выхъ* Іоаки́ма и Анны,* свѣ́тлыхъ святы́хъ,* просла́вимъ непреста́нно пѣ́сньми та́йными* Ще́драго Го́спода,* показа́вшаго си́хъ въ на́ше спасе́ніе,* неукло́нныхъ моли́твенниковъ. [Два́жды.]

Яже пре́жде не ражда́ющая непло́ды,* прозя́бшая Нача́токъ спасе́нія ро́да на́шего,* дне́сь преста́вися ко о́ной жи́зни,* прося́щи Христа́,* дарова́ти согрѣше́ніемъ оставле́ніе,* и́же вѣ́рою Того́ воспѣва́ющимъ.

Па́мять пра́ведныхъ соверша́юще,* воспѣва́емъ Тя́, Христе́,* пресла́вно Анну отъ жи́зни привре́менныя,* къ безпреста́ннѣй и боже́ственнѣй преста́вльшаго ны́нѣ,* я́ко ма́терь су́щую,* Тебе́ ро́ждшія безъ сѣ́мене па́че естества́,* Богоро́дицы и Ма́тере Дѣ́вы.

Сла́ва, и ны́нѣ, гла́съ 4:

Пріиди́те, вси́ вѣ́рніи, па́мять пра́ведныхъ [свѣ́тло пра́зднуемъ, Іоаки́ма и Анны пра́отецъ дне́сь: я́ко роди́ста на́мъ Ма́терь Спа́сову, Марíю Пренепоро́чную. Тѣ́мже къ ни́мъ возопіе́мъ: супру́же святоизбра́нный, сожи́тельство свя́то и богопочте́нное, и́же отъ чре́слъ ва́шихъ возсія́вшіи Христа́ Бо́га, Того́ моли́те, спасти́ся душа́мъ на́шимъ].

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Пріиди́те, земноро́дніи,* дне́сь со а́нгелы,* соста́вимъ ли́къ свѣ́телъ,* во успе́ніи* Христо́вы прама́тере.

Сти́хъ: Ра́дуйтеся, пра́ведніи, о Го́сподѣ,* [пра́вымъ подоба́етъ похвала́].

Две́ри небе́сныя* отве́рзитеся,* се́ бо прама́ти Вы́шняго,* Анна пра́ведная* умира́ющи,* ны́нѣ прихо́дитъ.

Сти́хъ: Блаже́ни вси́, боя́щіися Го́спода,* ходя́щіи въ путе́хъ Его́.

Сла́ва на небеси́,* на земли́ весе́ліе,* се́ бо прама́терь Зижди́телева,* въ ру́цѣ Влады́чнѣ,* ду́шу предае́тъ.

Сла́ва, и ны́нѣ, гла́съ то́йже:

Что́ собо́ръ соше́дшихся пріи́де [во всечестнѣ́мъ хра́мѣ пра́отецъ благоговѣ́йно? Сра́дуйтеся, — вопію́ще, — человѣ́честіи ро́ди дне́сь, я́ко Анна отъ земли́ преставля́ется ко Го́споду, Тому́ предстоя́щи, и на́мъ прося́щи пода́ти очище́ніе, и́же вѣ́рою соверша́ющимъ тоя́ успе́ніе].

Тропа́рь, гла́съ 4:

Жи́знь ро́ждшую во чре́вѣ носи́ла еси́, чи́стую Богома́терь, богому́драя Анно. Тѣ́мже къ прія́тію небе́сному, идѣ́же веселя́щихся жили́ще, въ сла́вѣ ра́дующися, ны́нѣ преста́вилася еси́, чту́щимъ тя́ любо́вію прегрѣше́ній прося́щи очище́нія, присноблаже́нная.


НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 4. Подо́бенъ: Да́лъ еси́ зна́меніе.

Зако́на оправда́нія* соблюда́ющи невреди́ма* и Бо́гу Вседержи́телю непоро́чно рабо́тающи,* сподо́билася еси́, Анно, ма́ти бы́ти* по пло́ти Христа́ ро́ждшей* Чи́стѣй Богоотрокови́цѣ,* съ Не́юже тя́ ублажа́емъ* и свято́е твое́ успе́ніе* ра́достною мы́слію пра́зднуемъ дне́сь. [Два́жды.]

Жи́зни пала́ту,* Анно богому́драя, ро́ждши,* къ жи́зни преста́вилася еси́ вои́стинну нетлѣ́ннѣй* и совокупля́ешися съ ли́ки пра́ведныхъ,* пита́ющихъ тя́ бога́тно Влады́чнею ра́достію;* тѣ́мже твое́ преставле́ніе* соверша́емъ, приснопомина́емая,* и вѣ́рно почита́емъ,* богому́драя, дне́сь.

Две́рь небе́сную,* Анно богому́драя, ро́ждши,* къ небе́сному селе́нію востекла́ еси́, сла́вная,* и сла́вы боже́ственныя ны́нѣ наслажда́ешися.* Еяже и на́съ, честно́е твое́ успе́ніе пра́зднующихъ,* моли́твами твои́ми сподо́би,* страсте́й мра́къ разоря́ющи* и лю́тыхъ обстоя́ній* мглу́ отгоня́щи.

Ины стихи́ры, гла́съ 1. Подо́бенъ: О, ди́внаго чудесе́!

Се́ свѣтоза́рное торжество́* и свѣ́тлый де́нь и мíру, ра́достный,* успе́ніе честно́е и достохва́льное Анны благосла́вныя,* изъ нея́же роди́ся Жи́знь ро́ждшая,* одушевле́нный киво́тъ, невмѣсти́мое Сло́во вмѣсти́вшая,* печа́ли разрѣше́ніе и ра́дости Хода́таица,* подаю́щая всѣ́мъ вѣ́рнымъ ве́лію ми́лость. [Два́жды.]

О, пресла́внаго чудесе́!* Исто́чникъ жи́зни пресла́вно ро́ждшая,* еди́ну въ жена́хъ благослове́нную Чи́стую,* проставля́ется отъ вре́менныя жи́зни ко безконе́чнѣй* Анна благосла́вная,* отъ земли́ взе́мшися къ небе́снымъ,* дне́сь сра́доватися а́нгельскимъ собо́ромъ,* ея́же ны́нѣ свято́е пра́зднуемъ торжество́.

Дне́сь свѣ́тлое торжество́, вѣ́рныхъ ли́цы,* успе́ніе твое́ честно́е почита́емъ всеблагоговѣ́йно* Боже́ственнымъ Ду́хомъ:* наста́ бо на́мъ исцѣле́ній блиста́ющая благода́ть,* и попаля́ющая возду́шныхъ духо́въ лука́выхъ совокупле́нія,* и свѣ́томъ наставля́ющая мы́сли* вѣ́рою воспѣва́ющихъ твое́, досточу́дная Анно* честно́е преставле́ніе.

Сла́ва, и ны́нѣ, гла́съ 8. Анато́ліево:

Иже отъ непло́дныхъ чре́слъ же́злъ святы́й, Богоро́дицу, прозя́бшій, изъ Нея́же спасе́ніе мíру возсія́ — Христо́съ Бо́гъ, супру́гъ непоро́чный и дво́ице свята́я, Іоаки́мъ и Анна; сíи бо, преста́вльшеся къ небе́снымъ селе́ніемъ, со дще́рію свое́ю Пречи́стою Дѣ́вою и со а́нгелы лику́ютъ, о мíрѣ моли́тву творя́ще. Ихже пою́ще и мы́, соше́дшеся, благоче́стно глаго́лемъ: и́же Богоотрокови́цы ра́ди и Пречи́стыя Марíи, пра́отцы Христо́вы бы́вше, моли́теся о душа́хъ на́шихъ.

Вхо́дъ. Проки́менъ дне́. Чте́нія три́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Нача́токъ спасе́нія на́шего свѣ́тло ро́ждшая, дне́сь отъ земли́ преставля́ется Анна всечестна́я. Пріиди́те у́бо, празднолю́бцы и христолю́бцы, цвѣты́ пѣ́сней воспріе́мше, къ не́й возопіе́мъ: цѣлому́дренная Анно, блаже́нно чре́во твое́, е́же Ма́терь Бо́жія Сло́ва носи́вшее, и сосца́ твоя́ красны́, и́миже Сію́ пита́ла еси́. Ибо Та́ безсѣ́менно ро́ждши Живода́вца, сподо́бися съ Ни́мъ ца́рствовати, и тя́ ны́нѣ Преста́вивый къ непреста́ннѣй и боже́ственнѣй жи́зни, Ма́тери Свое́й соводворя́тися и сра́доватися сподо́билъ е́сть. Тѣ́мже мо́лимъ тя́, соверша́юще па́мять твою́ вѣ́рно, съ Не́ю моли́тися спасти́ся душа́мъ на́шимъ.

Гла́съ 2:

Пріиди́те, любодѣ́вственніи вси́ и чистоты́ рачи́теліе, пріиди́те, пра́зднуемъ Аннино честно́е успе́ніе: и́бо та́ породи́ па́че естества́ исто́чника жи́зни, Марíю Богоотрокови́цу, изъ Нея́же роди́ся Изба́витель, просвѣща́яй и освяща́яй ду́ши на́ша.

Что́ собо́ръ соше́дшихся пріи́де во всечестнѣ́мъ хра́мѣ пра́отецъ благоговѣ́йно? Сра́дуйтеся, — вопію́ще, — человѣ́честіи ро́ди дне́сь, я́ко Анна отъ земли́ преставля́ется ко Го́споду, Тому́ предстоя́щи, и на́мъ прося́щи пода́ти очище́ніе, и́же вѣ́рою соверша́ющимъ тоя́ успе́ніе.

Гла́съ 4:

Пріиди́те, вси́ вѣ́рніи, па́мять пра́ведныхъ свѣ́тло пра́зднуемъ, Іоаки́ма и Анны пра́отецъ дне́сь: я́ко роди́ста на́мъ Ма́терь Спа́сову, Марíю Пренепоро́чную. Тѣ́мже къ ни́мъ возопіе́мъ: супру́же святоизбра́нный, сожи́тельство свя́то и богопочте́нное, и́же отъ чре́слъ ва́шихъ возсія́вшіи Христа́ Бо́га, Того́ моли́те, спасти́ся душа́мъ на́шимъ.

Сла́ва, и ны́нѣ, гла́съ 5:

О, блаже́нная дво́ице! Вы́ всѣ́хъ роди́телей превзыдо́сте, я́ко тва́ри всея́ Преиму́щую прозябли́ есте́. Истинно блаже́нъ еси́, Іоаки́ме, таковы́ Отрокови́цы бы́въ роди́тель. Блаже́нна ложесна́ твоя́, Анно, я́ко Ма́терь Жи́зни на́шея прозябла́ еси́; блаже́нни сосцы́, и́миже воздои́ла еси́, млеко́мъ Пита́вшую Пита́ющаго вся́кое дыха́ніе. Его́же моли́те, ва́мъ, всеблаже́нніи, мо́лимся, поми́ловатися душа́мъ на́шимъ.

На стихо́внѣ стихи́ры, гла́съ 5. Подо́бенъ: Ра́дуйся по́стниковъ.

Ра́дуйся, мы́сленная ла́стовице,* ве́сну благода́ти на́мъ возвѣсти́вшая,* непоро́чно въ цѣлому́дріи жи́тельствовавши до́брѣ,* и дѣ́вства сокро́вище,* че́стно болѣ́зновавшая,* непоро́чную Богоро́дицу,* а́гнице честна́я, я́же ро́ждшая Юницу,* взе́млющаго Агнца мíра прегрѣше́нія,* сло́вомъ Сло́во ро́ждшую, еди́ну Неискусому́жную,* Анно, прама́ти Госпо́дня, тя́ отъ земли́ пресе́льшаго.* Его́же ны́нѣ моли́* душа́мъ на́шимъ дарова́ти ве́лію ми́лость.

Сти́хъ: Ра́дуйтеся, пра́ведніи, о Го́сподѣ,* [пра́вымъ подоба́етъ похвала́].

Ра́дуйся, вожделѣ́нная Бо́гу,* избра́нная свя́тости сія́ніи зако́на,* дво́ице честна́я,* я́же изъявле́нія до́брѣ Боже́ственною благода́тію предлага́ющая,* Христа́ ро́ждшую, Нача́льника жи́зни на́шея, Та́ роди́вши,* Іоаки́мъ богопрія́тный и боже́ственная Анна всечестна́я,* свѣти́льницы, возсія́вшіи свѣщу́ безсѣ́нную,* благопра́вящіи благода́ть, Пречи́стую Богоро́дицу.* Съ Не́юже моли́теся* душа́мъ на́шимъ дарова́ти ве́лію ми́лость.

Сти́хъ: Блаже́ни вси́, боя́щіися Го́спода,* ходя́щіи въ путе́хъ Его́.

Ра́дуйся, благослове́нная земле́,* я́же богопрозя́бшую мíрови зе́млю процвѣ́тшая,* я́же въ зако́нѣ Боже́ственнѣмъ безпреста́ни поуча́ющаяся* и благода́ть всѣ́мъ подписа́вшая,* сою́зъ непло́дствія рождество́мъ свои́мъ избѣ́гшая,* и сме́ртію нетлѣ́ніе воздава́ющая,* и къ Боже́ственнѣй преста́вльшаяся свѣ́тлости Анна богоблаже́нная,* прама́ти Христа́ Бо́га,* я́же свѣтоно́сный свѣти́льникъ — Богоро́дицу ро́ждшая.* Съ Не́юже испроси́* душа́мъ на́шимъ дарова́ти ве́лію ми́лость.

Сла́ва, и ны́нѣ, гла́съ 8:

Пріиди́те, вся́ тва́рь, въ кимва́лѣхъ псало́мски, соше́дшеся, восхва́лимъ Анну богому́друю, боже́ственную го́ру ро́ждшую отъ ложе́снъ свои́хъ и къ горѣ́ мы́сленнѣй и ра́йскимъ селе́ніемъ дне́сь премину́вшую, и къ не́й возопіе́мъ: блаже́нное чре́во твое́, носи́вшее вои́стинну Свѣ́тъ мíрови вну́трь во чре́вѣ носи́вшую, и сосца́ твоя́ кра́сная, я́же сса́ше дои́вшая Христа́, пи́щу жи́зни на́шея. Его́же моли́ изба́вити на́съ отъ вся́кія ско́рби и прило́га вра́жія и спасти́ ду́ши на́ша.

[На благослове́ніи хлѣ́бовъ:] тропа́рь, гла́съ 4: Жи́знь ро́ждшую во чре́вѣ.., три́жды [пи́санъ на ма́лѣй вече́рни].

Зри́: Святы́хъ же́нъ отпѣва́емъ кано́нъ на повече́ріи о́бщій, когда́ настоя́тель изво́литъ.



НА УТРЕНИ,
На Бо́гъ Госпо́дь: тропа́рь Анны святы́я, три́жды. [Богоро́дична не глаго́лемъ.]

По 1-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Твое́ пра́зднуемъ, пра́ведная Анно, успе́ніе, сла́вою бо неизрече́нною просла́ви тя́ Христо́съ Бо́гъ, я́ко прама́терь Свою́. Тѣ́мже, преста́вльшися, Того́ моли́ ми́ръ моли́твами твои́ми пода́ти на́мъ, покрыва́ющи отъ сопроти́вныхъ ду́ши на́ша. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія, тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

По 2-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Въ ру́цѣ на́съ ра́ди отъ Дѣ́вы вочеловѣ́чшагося преда́вши ду́шу, и́бо Зижди́тель тво́й и Бо́гъ къ нетлѣ́ннѣй жи́зни преста́ви тя́. Тѣ́мже ны́нѣ че́стно ублажа́емъ тя́, я́ко еди́ной честнѣ́й и непоро́чнѣй вои́стинну Богоро́дицѣ су́щую ма́терь, и согла́сно взыва́емъ: Зижди́теля Твоего́ и Бо́га, Христа́ Спа́са на́шего, моли́ спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по рождествѣ́ па́ки Дѣ́вою пребыва́етъ.

На поліеле́и припѣ́въ:

Велича́емъ тя́, свята́я пра́ведная Анно, прама́ти Христа́ Бо́га на́шего, и всечестно́е сла́вимъ успе́ніе твое́.

Псало́мъ избра́нный: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́...

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

Ангелъ мно́жества славосло́вятъ тя́, и человѣ́ческій ро́дъ вѣ́рно пое́тъ тя́, я́ко преста́вилася еси́ къ Созда́вшему и Спа́сшему тя́, Анно пра́ведная; и ны́нѣ мо́лишися прилѣ́жно изба́витися отъ бѣ́дъ, и́же вѣ́рою пра́зднующихъ твое́ успе́ніе.

Сла́ва, то́йже. И ны́нѣ, богоро́диченъ:

Иже на Тя́ упова́ніе, Пречи́стая, непреткнове́нное иму́щимъ, покро́въ су́щи, отъ разли́чныхъ обстоя́ній и бѣ́дъ лю́тыхъ свободи́ на́съ, моля́щи Сы́на Твоего́ съ ма́терію Твое́ю, спасти́ всѣ́хъ, воспѣва́ющихъ Тя́.

Степе́нна, 1-й антифо́нъ 4-го гла́са. Проки́менъ, гла́съ 4: Воззва́ша пра́ведніи, и Госпо́дь услы́ша и́хъ,* [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Вся́кое дыха́ніе... Ева́нгеліе отъ Матѳе́я, зача́ло 56.

По 50-мъ псалмѣ́ стихи́ра, гла́съ 6:

Пріиди́те, вси́ концы́ земнíи, духо́вный ли́къ соста́вимъ, и Христо́ву прама́терь восхва́лимъ, глаго́люще: ра́дуйся, пра́ведная Анно и Бо́гомъ почте́нная; ра́дуйся, я́же пра́вду до́брѣ подъе́мшая; ра́дуйся, пра́веднымъ равностоя́тельная и святы́мъ единокро́вная. Съ ни́миже моли́ся, спасти́ся душа́мъ на́шимъ.

Кано́нъ Пресвяты́я Богоро́дицы со ирмосо́мъ на 6, и святы́я Анны на 8, гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Согрѣше́ній проще́ніе, и злы́хъ избавле́ніе, и житія́ исправле́ніе ны́нѣ ми́ испроси́, твою́ свѣтоно́сную па́мять почита́ющему дне́сь, Анно всехва́льная.

Живо́тъ ро́ждшую боголѣ́пно родила́ еси́, тѣ́мже къ присножи́зненнѣй жи́зни преста́вилася еси́, наслажда́ющися ра́дости неизглаго́ланныя и Свѣ́та невече́рняго, Анно богозва́нная.

Благода́ть Боже́ственная къ ра́дости преста́ви, безъ сѣ́мене ю́же роди́ Дщи́ сея́ Чи́стая, и предстои́тъ со мно́гимъ дерзнове́ніемъ, Го́сподеви моля́щися спасти́ся всѣ́мъ.

Пра́ведно и преподо́бно пожи́вши, всехва́льная, къ Пра́ведному Го́споду ны́нѣ преста́вилася еси́ ра́доватися съ пра́ведными, и́же отъ вѣ́ка, тѣ́мже, соше́дшеся, тя́ вѣ́рою почита́емъ.

Богоро́диченъ: Изъ Тебе́ на́мъ возсія́ Со́лнце пра́ведное, и всю́ озари́ богоразу́міемъ зе́млю, и разори́ мглу́ неразу́мія, Чи́стая, Всенепоро́чная, и Всеблаже́нная.

Катава́сія: Отве́рзу уста́ моя́ и напо́лнятся Ду́ха...

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Заче́ншую Содержа́щаго вся́ зачала́ еси́ и родила́ еси́ па́че сло́ва Христа́ ро́ждшую, тѣ́мже твое́ успе́ніе, Анно, почита́емъ.

Съ похвала́ми соверша́ется сла́вная па́мять твоя́, я́ко родила́ еси́ на́мъ хвале́ній превы́шшую, чи́стую Богома́терь, Анно богопрія́тная.

Якоже со́лнце съ луно́ю, Аннѣ совокупля́яся, сла́вный Іоаки́мъ, дѣ́вства зарю́ ражда́етъ, Ея́же ра́ди Божества́ луча́ просія́.

Го́ру Боже́ственную изъ чре́слъ твои́хъ родила́ еси́ и къ гора́мъ мы́сленнымъ и рая́ селе́ніемъ, Анно, премину́ла еси́, богоблаже́нная.

Богоро́диченъ: Тя́ Предста́тельницу тве́рдую, Богороди́тельнице, стяжа́хомъ, упова́ніе на Тя́ возложи́вше, спаса́емся и, къ Тебѣ́ бо прибѣга́юще, огражда́емся.

Сѣда́ленъ, гла́съ 8. Подо́бенъ: Прему́дрости.

Ма́тере Влады́ки и Творца́ ма́ти была́ еси́, Анно всехва́льная, Того́ повелѣ́нія при́сно храня́щи, сего́ ра́ди, уме́рши, къ жи́зни безсме́ртнѣй преста́вилася еси́ вои́стинну и къ Свѣ́ту невече́рнему. Тѣ́мже свѣтоно́сную и святу́ю твою́ па́мять соверша́емъ, ду́хомъ просвѣща́еми всегда́, и согла́сно вопіе́мъ ти́: моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

Сла́ва, и ны́нѣ, то́йже.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Яже въ зако́нѣ пи́саная, поуча́ющися, соверши́ла еси́ и Законода́вца Ма́тере ма́ти была́ еси́, тѣ́мже тебѣ́ вся́ тва́рь по до́лгу ны́нѣ сотворя́етъ твою́ ра́достно па́мять.

Блаже́нное чре́во твое́ вои́стинну, носи́вшее Свѣ́тъ мíра вну́трь во чре́вѣ носи́вшую, и сосца́ твоя́ кра́сная, я́ко дои́вшая дои́вшую, Анно, Христа́, Пита́теля на́шего.

Яко пожи́вши непоро́чно, непоро́чно родила́ еси́, Богоро́дицу Отрокови́цу, Сло́во Отчее породи́вшую, и къ Нему́ со сла́вою всели́лася еси́, обожена́ честны́ми вои́стинну прича́стіи.

Богоро́диченъ: Дѣ́вы чре́во — сто́гъ, я́коже на гумнѣ́, вои́стинну яви́ся, кла́съ недѣ́ланенъ иму́щи, и́мже пита́ется вся́кое естество́, зову́щее: Всеси́льне, сла́ва, Христе́, си́лѣ Твое́й.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Не́бо родила́ еси́ на земли́ вои́стинну, ро́ждшую небесе́ Творца́, дне́сь тя́ преставля́юща къ небе́снымъ со сла́вою, Анно пресла́вная.

Съ невеще́ственными чи́нми невеще́ственнымъ умо́мъ лику́еши ра́достно, исполня́ема сія́нія Богатода́вца, но на́съ помина́й, вѣ́рою хва́лящихъ тя́.

Отъ ко́рене Іессе́ева прозя́бшая я́вѣ, благоцвѣту́щій же́злъ, Чи́стую, израсти́ла еси́, сла́вная, израсти́вшую цвѣ́тъ неувяда́ющій, Іису́са, Изба́вителя на́шего.

Богоро́диченъ: Къ Тебѣ́ прибѣга́ю еди́нѣй держа́внѣй, вѣ́рныхъ покро́ву, на Тя́ наде́жду возлага́ю спасе́нія моего́, Пресвята́я Влады́чице Богоро́дице, не пре́зри мене́.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Го́спода Іису́са Бо́га пра́отцы, Іоаки́мъ же и Анна, пра́вдою укра́шени, по достоя́нію въ пѣ́снехъ да восхва́лятся дне́сь.

Вся́ческія похва́лы Анна превзы́де, я́ко вся́кія похвалы́ Превозше́дшую родила́ е́сть, сего́ ра́ди въ ли́цѣ пра́ведныхъ водворя́ется.

Свѣтоно́сія и свѣ́тлости испо́лнена па́мять твоя́, сія́нія же въ мíрѣ спаси́тельная испуща́ющи, цѣлому́дренная Анно, дарова́ній вся́ческихъ испо́лни.

Ру́чку, ма́нну боже́ственную вмѣсти́вшую, во чре́вѣ носи́ла еси́, Анно, и, съ Не́ю ны́нѣ на небесѣ́хъ живу́щи, о всѣ́хъ мо́лишися, прехва́льная.

Богоро́диченъ: Отъ Анны мíрови родила́ся еси́, Цари́це, всѣ́хъ Царя́ ро́ждшая, и, дѣ́вствующи по рождествѣ́, херуви́мъ превы́шши, Пренепоро́чная.

Конда́къ, гла́съ 2. Подо́бенъ: Вы́шнихъ ища́.

Прароди́телей Христо́выхъ па́мять пра́зднуемъ, тѣ́хъ вѣ́рно прося́ще по́мощи изба́витися всѣ́мъ отъ вся́кія ско́рби, зову́щимъ: Бо́гъ на́шъ съ на́ми, си́хъ прославле́й, я́коже благоволи́.

Икосъ:

Проро́чески сни́демся вси́ досто́йно пѣ́ти прама́тере Христо́вы блаже́нное преставле́ніе: дне́сь бо отъ вре́менныя преста́вися жи́зни, на небесѣ́хъ съ ра́достію ше́ствіе творя́щи, ра́дуется, я́ко су́щи ма́ти вои́стинну су́щія Богоро́дицы, и взыва́етъ вѣ́рно: вели́читъ душа́ моя́ Го́спода, я́ко роди́хъ Сего́ Ма́терь на земли́, и́же Сію́ прославле́й, я́коже благоволи́.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Яко жи́зни и́стинныя, Анно, Ма́терь ро́ждши, къ жи́зни и́стиннѣй преста́вилася еси́ ко свѣ́ту, взыва́ющи: препѣ́тый Го́споди, Бо́же оте́цъ на́шихъ, благослове́нъ еси́.

Яже Ма́тери Изба́вителя ма́ти су́щи, Анно, отъ земли́ къ небеси́, добродѣ́тельми укра́шена, востече́, во хвале́ніи зову́щи: Бо́же оте́цъ на́шихъ, благослове́нъ еси́.

Къ несконча́емѣй жи́зни, къ простра́ннѣй широтѣ́ ра́йскія пи́щи, къ невече́рнему свѣ́ту отшла́ еси́, богоно́сице, зову́щи: Бо́же оте́цъ на́шихъ, благослове́нъ еси́.

Испещре́на добродѣ́тельми, добро́тою Боже́ственныхъ дарова́ній укра́шена, къ Бо́гу преложи́ся, непреста́нно зову́щи: препѣ́тый Го́споди, Бо́же оте́цъ на́шихъ, благослове́нъ еси́.

Богоро́диченъ: Укра́шена добро́тами добродѣ́телей, кра́снаго па́че сыно́въ человѣ́ческихъ родила́ еси́ Сло́во, Пренепоро́чная, кра́сными лѣ́потами украша́ющаго Тебе́ пѣсносло́вящихъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Ма́ти еди́ныя Богоро́дицы, я́же непло́ды пре́жде, ны́нѣ же прама́ти Христо́ва, я́коже непло́дства, си́це и ме́ртвости, совле́кши оде́жду, во странѣ́ живу́щихъ вопіе́тъ: Го́спода по́йте, дѣла́, и превозноси́те Его́ во вся́ вѣ́ки.

Христо́съ тебѣ́ две́ри вы́шнія отве́рзе, ра́достно тя́ прія́тъ, я́ко две́рь родила́ еси́, е́юже Са́мъ про́йде и затворе́ну яви́ по исхожде́ніи, богому́драя достойнопѣ́тая Анно, тѣ́мже тя́ почита́емъ, вѣ́рніи, во вѣ́ки.

Свя́то житіе́ сконча́вши, Святы́я Приснодѣ́вы ма́ти была́ еси́, Яже Пресвято́е Сло́во породи́, освяще́ніе и избавле́ніе на́мъ подаю́ща, богому́драя и досточу́дная Анно, тѣ́мже тя́ пое́мъ при́сно, вѣ́рніи, во вѣ́ки.

Богоро́диченъ: Мно́гими мя́ содержи́ма бѣда́ми и бу́рею грѣхо́вною бѣ́дствующаго, ко приста́нищу невла́емому дыха́ніи Ду́ха, Богороди́тельнице Влады́чице, ны́нѣ наста́ви: приста́нище бо еси́ христіа́нъ. Тѣ́мже Тя́ пое́мъ во вся́ вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Отъ земли́ чре́ва твоего́ вои́стинну роди́ся земля́ свята́я, недѣ́ланенъ кла́съ прозя́бши безсѣ́менно, мíрови Пита́теля и Го́спода, тебе́ къ неиждива́емой пи́щи, Анно, прему́дро преста́вльшаго.

Па́мять твоя́ дне́сь на́мъ возсія́, со́лнца свѣтлѣ́йши, сія́ніемъ бога́тыхъ даро́въ на́съ просвѣща́ющи, всечестна́я, и мра́къ страсте́й изыма́ющи, ю́же соверша́ющихъ сохрани́.

Боже́ственный на́съ Іоаки́мъ и Анна богому́драя и всесла́вная, супру́гъ честны́й и свѣтоно́сный, созыва́ютъ боже́ственнѣ весели́тися си́хъ пра́здникомъ, его́же уясни́ Свѣтода́вецъ всѣ́хъ Госпо́дь.

Богоро́диченъ: Марíе Госпоже́ всѣ́хъ, вся́кими мя́ порабоще́на согрѣше́ніи ны́нѣ свободи́: Сама́ бо Свободи́теля родила́ еси́ всѣ́хъ, рабо́ты на́съ изба́вльшаго грѣхо́вныя, Боже́ственнымъ манове́ніемъ.

Свѣти́ленъ. Подо́бенъ: Со ученики́.

Достодо́лжно воспое́мъ богозва́нную Анну: Богоро́дицу бо та́ Дѣ́ву Марíю ро́ждши па́че наде́жды, сро́дница по пло́ти Христа́, Изба́вителя на́шего, яви́ся, сію́ боголѣ́пно пріе́мшаго дне́сь въ вы́шнихъ, о на́съ моля́щуюся и о умире́ніи мíра. [Два́жды.]

Сла́ва, и ны́нѣ. Подо́бенъ: Не́бо звѣзда́ми.

Не́бо ро́ждши, Анно, но́вое, Марíю, Еюже возсія́ сла́вы Со́лнце, дне́сь отъ земли́ къ небе́снымъ прехо́диши, Христу́ сра́дующися, пресла́вная.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Па́мять соверша́юще Анны честну́ю,* Тебе́ воспѣва́емъ, Христе́,* пресла́вно сію́ отъ жи́зни привре́менныя* къ непрестаю́щей сла́вѣ преста́вльшаго ны́нѣ,* я́ко ма́терь су́щую безъ сѣ́мене ро́ждшія Тя́ па́че естества́* Богоро́дицы и Приснодѣ́вы Ма́тере. [Два́жды.]

Па́мять святу́ю соверша́юще пра́отецъ Христо́выхъ* Іоаки́ма и Анны,* честны́хъ и непоро́чныхъ,* прославля́емъ непреста́нно Изба́вителя* и Ще́драго Го́спода,* си́хъ преста́вльшаго къ жи́зни* нестарѣ́емѣй и нетлѣ́ннѣй.

Къ невеще́ственнымъ лико́мъ и пра́ведныхъ селе́ніемъ,* идѣ́же а́нгельстіи чи́ни,* идѣ́же святы́хъ собо́ръ,* ра́дость пра́зднующихъ соверша́ется,* ны́нѣ ду́хи пра́ведныхъ Іоаки́ма и Анны всели́,* и́хже благоче́стно восхваля́юще, ублажи́мъ.

Сла́ва, и ны́нѣ, гла́съ 2:

Пріиди́те, любодѣ́вственніи вси́ и чистоты́ рачи́теліе, пріиди́те, пра́зднуемъ Аннино честно́е успе́ніе: и́бо та́ породи́ па́че естества́ исто́чника жи́зни, Марíю Богоотрокови́цу, изъ Нея́же роди́ся Изба́витель, просвѣща́яй и освяща́яй ду́ши на́ша.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна [отъ кано́на], пѣ́снь 3-я и 6-я. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Гала́томъ, зача́ло 210 [отъ полу́]. Аллилу́ія, гласъ 1: Спасе́ніе пра́веднымъ отъ Го́спода, и защи́титель и́мъ е́сть во вре́мя ско́рби. Ева́нгеліе Луки́, зача́ло 36. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́.]

Источникъ: Анѳоло́гіонъ, сíесть Цвѣтосло́віе, или́ Трефоло́гіонъ, сíесть Словопита́ніе. — Кíевъ: Въ Тѵпогра́фіи Кіевопече́рской Ла́ѵры, 1745. — Л. 626 – 630 об.

/ Къ оглавленію раздѣла /


Наверхъ / Къ титульной страницѣ

0