Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 24-й де́нь.
Святы́я му́ченицы Христи́ны.

[ВЕЧЕРЪ,
На Го́споди воззва́хъ:] стихи́ры му́ченицы на 6, гла́съ 4. Подо́бенъ: Яко до́бля.

Отца́ возжела́вши* Небе́снаго, сла́вная,* нечести́ва роди́теля преоби́дѣла еси́,* ма́терь же возлюби́вши —* вы́шній Іерусали́мъ,* пристра́стія ма́терни любве́ отри́нула еси́* и, обогати́вшися Христо́мъ вмѣ́сто всѣ́хъ,* посе́мъ ду́шу положи́ла еси́, му́ченице.* не убоя́вшися му́къ.

Ни роди́телей пристра́стіе,* ни пи́щи наслажде́ніе,* ни бога́тства имѣ́ніе, сла́вная,* ни преще́нія, ни му́ки,* ни о́гнь, ни ме́чь, ни глубина́, ни ко́ло,* ни звѣре́й стремле́нія* возмого́ша тя отъ любве́ Зижди́теля разлучи́ти,* дѣ́во му́ченице Христи́но,* сла́ва му́чениковъ и похвала́.

Сла́ва, гла́съ 2:

Якоже многоцѣ́нное мѵ́ро, кро́вь твою́ принесла́ еси́ Жениху́ твоему́ Христу́, Христи́но му́ченице, страстоно́сице непобѣди́мая, возме́здіе же прія́ла еси́ вѣне́цъ нетлѣ́ненъ отъ Него́, досточу́дная, тѣ́мъ уме́ршаго угрызе́ніи ядови́тыхъ змíевъ глаго́ломъ твои́мъ жи́ва воздви́гла еси́, призва́ніемъ Пресвята́го Ду́ха. Сего́ ра́ди и небе́сныхъ тя́ черто́говъ сподо́би Іису́съ Человѣколю́бецъ и Спа́съ ду́шъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Болѣ́зни претерпѣ́вши мно́гія въ распя́тіи Сы́на и Бо́га Твоего́, Пречи́стая, стеня́ше, слезя́щи и восклица́ющи: Увы́ Мнѣ́, Ча́до сла́дкое! Безъ пра́вды ка́ко стра́ждеши, хотя́ изба́вити я́же отъ Ада́ма земноро́дныя? Тѣ́мже, Пречи́стая Дѣ́во, Тебе́ мо́лимъ вѣ́рою: ми́лостива на́мъ Того́ содѣ́лай.

На стихо́внѣ окто́иха. Сла́ва, гла́съ 2. Анато́ліево:

Христоимени́тому зва́нію дѣ́ло сугу́бо показа́ла еси́, я́ко вои́стинну, дѣ́вства твоего́ чистото́ю уневѣ́стившися Христу́, благоволе́ніемъ Отца́ и дѣ́йствомъ Ду́ха, муче́нія же боре́ньми тве́рдыми облиста́ла еси́ свѣтлѣ́е со́лнечныхъ лу́чь. Тѣ́мже, я́ко же́ртва чи́стая и непоро́чная, на небе́сную принесла́ся еси́ трапе́зу, съ дѣви́ческими и му́ченическими ли́ки во вѣ́ки веселя́щися, съ ни́миже проси́, Христи́но тезоимени́тая, дарова́тися чту́щимъ тя́ ми́ру и ве́ліей ми́лости.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Егда́ Тя́ беззако́нніи лю́діе, Спа́се, Жи́знь всѣ́хъ, на дре́во вознесо́ша, тогда́ Чи́стая и Пренепоро́чная Ма́ти Твоя́, предстоя́щи и рыда́ющи, взыва́ше: Ча́до Мое́ сла́дкое, Свѣ́те Мои́ма очи́ма, увы́ Мнѣ́, ка́ко посредѣ́ злодѣ́ю на Крестѣ́ пригвозди́тися претерпѣ́лъ еси́, Иже зе́млю повѣ́шей на вода́хъ?

Тропа́рь, гла́съ 4:

Агница Твоя́, Іису́се, Христи́на, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.


[НА УТРЕНИ,]
Кано́нъ святы́я на 6, его́же краегране́сіе: Христо́ву тя́ пою́ тезоиме́нную отрокови́цу. Творе́ніе Іо́сифово, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Благи́ми наде́ждами утверди́вся, у́мъ тво́й, Христи́но, впери́ся и къ Бо́гу, му́ченице, вознесе́ся отъ теку́щихъ, измѣни́вся во оби́тели пребыва́ющія.

Разсѣ́дшася и лежа́ща предъ нога́ми отрокови́цы страстоно́сицы зря́ще злочести́ваго, хвалу́ Спаси́телю дади́мъ вси́, побѣдоно́сицу сію́ показа́вшему.

Ви́дѣти Жениха́ Царя́ добро́ту кра́сную вожделѣ́ла еси́ чи́сто, тѣ́мже боже́ственными, страстоте́рпице, страда́ньми свѣ́тло себе́ украси́ла еси́.

Богоро́диченъ: Зачала́ еси́ Сло́во Отчее, пло́ти соедини́вшееся по Ѵпоста́си изъ Тебе́, па́че сло́ва, Ма́ти Чи́стая, Его́же возжела́вши, Христи́на муче́нія сла́ву стяжа́ла е́сть.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Просте́рши о́чи и мы́сль, сла́вная, на не́бо, тва́рьми твоего́ Зижди́теля позна́ла еси́.

Бога́тство неотъе́млемо — е́же къ Бо́гу имѣ́ла еси́ вѣ́ру, честна́я, тѣ́мже нищету́ и́дольскую оста́вила еси́.

Пѣ́ніе благода́рственно Творцу́ Христу́ пѣ́ла еси́, къ дре́ву лю́тѣ, му́ченице, привя́зана и строга́нія претерпѣва́ющи.

Богоро́диченъ: Уста́ви мое́ смуще́ніе помышле́ній, Чи́стая Влады́чице, и ути́ши души́ вся́ку печа́ль, Христа́ ро́ждшая.

Сѣда́ленъ, гла́съ 1. Подо́бенъ: Гро́бъ Тво́й.

Кро́вь твою́, честна́я, я́коже алава́стръ мѵ́ра, принесла́ еси́ Христу́, Жениху́ твоему́, любо́вію, возме́здіе же прія́ла еси́ отъ Него́, досточу́дная, вѣне́цъ боже́ственный и нетлѣ́ненъ, му́ченице. Тѣ́мже прія́ла еси́ исцѣле́ній благода́ть си́лою духо́вною. [Два́жды.]

Сла́ва, и ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній всѣ́хъ изба́ви, на Тя́ упова́ніе, Отрокови́це, иму́щихъ, и ду́ши на́ша спаси́ боже́ственными моли́твами Твои́ми.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Пита́лася еси́, ра́нами Боже́ственными наслажда́ема, му́ченице христоимени́та, видѣ́ніи Жениха́ твоего́, и на Того́ добро́ту взира́ющи.

Велича́ю Тя́, Го́споди, — му́ченице, привя́зана бы́вши къ колесе́мъ, возопи́ла еси́, — и сла́влю и́мя Твое́, укрѣпля́ющаго лю́бящія Тя́.

Прилѣпи́хся къ Тебѣ́, жела́ніемъ уязвля́ема Твоея́ любве́, побѣдоно́сицу мя́ покажи́ въ страда́ніи, — му́ченица взыва́ше.

Богоро́диченъ: Во проро́цѣхъ Тя́ сла́вный дре́вле Иса́ія же́злъ именова́, цвѣ́тъ нося́щу, Го́спода, Богоро́дице Ма́ти Приснодѣ́во.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Яко а́нгелъ во пло́ти, му́ченице, бы́вши, небе́сніи а́нгели пи́щею а́нгельскою тя́ пита́ху.

Ка́меня жи́зни не отве́рглася еси́, Христи́но, тѣ́мже къ ка́меню тя́ привяза́вше, врази́ въ во́ду вверго́ша.

Восхи́тилася еси́ къ высотѣ́, возлетѣ́вши, я́коже го́рлица, крилы́ Боже́ственного Ду́ха, и у Зижди́теля почи́ла еси́.

Богоро́диченъ: Ме́ртва грѣхо́мъ бы́вша, оживи́ мя, Жи́знь безсме́ртную, Дѣ́во Ма́ти, ро́ждшая.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Услади́ся твое́ добро́тами се́рдце пресла́дкаго Рачи́теля, страстоте́рпице, и въ воню́ Того́ страсте́й спѣ́шно текла́ еси́, зову́щи: Женише́ мо́й, Твоея́ ра́ди закала́юся ны́нѣ любве́.

Отца́ небе́снаго тя́, му́ченице, роди́тель ви́дѣвъ лю́бящу, ва́рварскій показа́ нра́въ и многообра́зными обложи́ му́ками: предѣ́ла бо злочести́вый своего́ не разумѣ́ естества́.

Яко кри́нъ, въ му́ченическихъ удо́ліяхъ, я́ко сладково́нный процвѣла́ еси́ шипо́къ, мѵ́рну иска́пающи благода́ть, и вѣ́рныхъ сердца́ пома́зала еси́, христоимени́тая му́ченице честна́я, святы́хъ а́нгелъ соприча́стнице.

Богоро́диченъ: Разумѣ́вше богогла́сніи проро́цы та́инства Твоего́, Дѣ́во, глубину́, проро́чески провозвѣсти́ша, Боже́ственнымъ просвѣща́еми издале́ча Ду́хомъ, Ма́терь Тя́ всеи́стинну всѣ́хъ Влады́ки бы́ти.

Конда́къ, гла́съ 4. Подо́бенъ: Вознесы́йся.

Свѣтови́дная голуби́ца позна́лася еси́, крилѣ́ иму́щи зла́тѣ, и къ высотѣ́ небе́снѣй возлетѣ́ла еси́, Христи́но честна́я. Тѣ́мже тво́й сла́вный пра́здникъ соверша́емъ, вѣ́рою покланя́ющеся твои́хъ моще́й ра́цѣ, изъ нея́же истека́етъ всѣ́мъ оби́льно исцѣле́ніе боже́ственное, душа́мъ же и тѣ́ломъ.

Икосъ:

Пѣсносло́вящи благоче́стно Тро́ицу Святу́ю, честна́я дѣ́во му́ченице, показа́ла еси́ су́щимъ тогда́ омраче́ннымъ мгло́ю лю́таго гнѣ́ва, ка́ко сія́ніе Тоя́ просвѣща́етъ вѣ́рныя. Мучи́теля же отъ руки́ избѣ́гла еси́, я́коже друга́я Ѳе́кла, избѣ́гши отъ беззако́нныхъ, произшла́ же еси́ посредѣ́ сѣте́й. Тѣ́мже вои́стинну, пою́ще, почита́емъ преставле́ніе твое́, благодаря́ще еди́наго Бо́га, тебе́ ра́ди дарова́вшаго исцѣле́ніе Боже́ственное душа́мъ же и тѣ́ломъ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Пѣ́ніе всѣ́хъ Благодѣ́телю, клоко́щущему огню́ прибли́жившися, взыва́ла еси́, твое́ ороша́ющему се́рдце: благослове́нъ еси́, Го́споди Бо́же, во вѣ́ки.

Еди́наго Бо́га получи́ти возжела́вши, неради́ла еси́ удо́мъ опаля́емымъ, не отве́рглася еси́ Христа́, дѣви́це, пою́ши: благослове́нъ еси́, Го́споди Бо́же, во вѣ́ки.

Ту́чами крове́й твои́хъ струи́ изсуши́ла еси́ идолонеи́стовства, одождя́еши же ны́нѣ исцѣле́ній пучи́ну, дѣ́во му́ченице, уста́вила еси́ пла́мень страсте́й.

Богоро́диченъ: Зако́ны, Дѣ́во, превозше́дши естества́ Боже́ственнымъ Твои́мъ зача́тіемъ, па́че естества́ Бо́га родила́ еси́, вопію́щи: благослове́нъ еси́, Го́споди Бо́же, во вѣ́ки.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Волну́ющееся мо́ре напа́стей му́къ Боже́ственнымъ окормле́ніемъ невре́дно преплы́ла еси́, змíя погрузи́вши твои́хъ по́двигъ, му́ченице, глубино́ю, тѣ́мже ра́йская небу́рно приста́нища дости́гла еси́, вопію́щи: свяще́нницы, воспо́йте, лю́діе, превозноси́те во вся́ вѣ́ки.

Змíя лю́таго умертви́ла еси́ животво́рными по́двиги, и моли́твъ твои́хъ стоя́ніи неукроти́мыя звѣ́ри успи́ла еси́, и отъ си́хъ вре́да кромѣ́ пребыла́ еси́, Зижди́телю пою́щи, Христи́но: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Глаго́ломъ живы́мъ воздви́гла еси́ уме́ршаго угрызе́ніемъ, му́ченице страстоно́сице, я́да зміи́на: Бо́гъ бо, сме́рть попра́вый Боже́ственнымъ погребе́ніемъ, твои́хъ моли́твъ послу́ша, Христи́но. Къ Нему́же вопіе́ши непреста́нно: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Тве́рдая помо́щнице вѣ́рнымъ, Приснодѣ́во, изба́ви мя́ ле́сти лука́ваго змíя, лю́тѣ борю́щаго и смири́ти тща́щагося. Ты́ бо неле́стна на Тя́ надѣ́ющимся еси́ наста́вница, вопію́щимъ непреста́нно: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Ви́дѣти сподо́билася еси́, укра́шена и муче́нія оде́ждами блиста́ющи, твоего́ Жениха́, Христи́но, му́ченице многострада́льная.

Кра́сная твоя́ добро́та, я́коже возлюби́ла еси́, Иже па́че всѣ́хъ добро́тъ краснѣ́йши Христо́съ, небе́сныхъ черто́говъ тя́ сподо́би.

Совокупи́лася еси́ со безпло́тными, сла́вная, ли́ки и со страда́льческими собо́ры причла́ся еси́, о на́съ моля́щи Всеще́драго.

Со́лнца свѣтлѣ́йши яви́ся твоя́ па́мять, блиста́ніи благода́тными Ду́ха тя́ чту́щія, Христи́но, просвѣща́ющи.

Богоро́диченъ: Благолюби́вая Дѣ́во, озло́бленную грѣхми́ ду́шу мою́ ублажи́ и вѣ́чнаго пла́мене мя́ изба́ви моли́твами Твои́ми.

Свѣти́ленъ. Подо́бенъ: Жены́, услы́шите.

Яко шипо́къ краснѣ́йшій, отъ терно́внаго прозябла́ еси́ ко́рене, дѣ́во Христи́но, оброще́ніемъ, му́ченице, свяще́ннаго страда́нія обагри́вшися кро́вію, и ны́нѣ, боже́ственную твою́ па́мять творя́щія любо́вію спаса́й отъ бѣ́дъ.

Богоро́диченъ:

Стоя́ще о́крестъ Тебе́ дѣ́вы богому́дрыя, Богороди́тельнице Марíе, я́коже цари́цы ро́домъ, Твоему́ Сы́ну приведо́шася невѣстолѣ́пно, Пречи́стая, я́ко Царю́ вся́ческихъ, Его́же, Ма́ти Дѣ́во Отрокови́це, о на́съ моли́.

На хвали́техъ стихи́ры на 4, гла́съ 4. Самогла́сны:

Кре́стъ, я́ко ору́жіе держа́вно, Христи́но му́ченице, держа́щи рука́ми, вѣ́ру, я́ко ши́тъ, наде́жду, я́ко броня́, любо́вь, я́ко лу́къ, мучи́телей томле́нія побѣди́ла еси́ му́жески, де́моновъ кова́рствія упраздни́ла еси́ боже́ственнѣ; во главу́ же усѣкнове́на бы́вши, лику́еши со Христо́мъ, непреста́нно моля́ши о душа́хъ на́шихъ.

Бога́тство оста́вльши оте́ческое, Христа́ же жела́ющи и́стинно, сла́ву обрѣ́те му́ченица и бога́тство небе́сное и, при́сною моли́твою огражде́на благода́тною, ору́жіемъ Креста́ попра́ мучи́теля. Тѣ́мже а́нгели, подвиго́мъ чудя́щеся, глаго́лаху: паде́ся вра́гъ, жено́ю побѣжде́нъ бы́въ, вѣнцено́сица яви́ся му́ченица. И Христо́съ во вѣ́ки ца́рствуетъ, я́ко Бо́гъ, подая́й мíрови ве́лію ми́лость.

Сла́вимъ Твое́, Христе́, мно́гое милосе́рдіе, и бла́гость, е́же на на́съ бы́вшую, я́ко и жены́ упраздни́ша пре́лесть идолонеи́стовства си́лою Креста́ Твоего́, Человѣколю́бче, мучи́теля не убоя́шася, льсти́ваго попра́ша, возмого́ша же во слѣ́дъ Тебе́ пріити́, въ воню́ мѵ́ра Твоего́ теча́ху, моля́щеся о душа́хъ на́шихъ.

Чудодѣ́йствова, Христе́, Креста́ Твоего́ си́ла, я́ко и Христи́на му́ченица страда́льческимъ по́двигомъ подвиза́ся, отону́дуже немощно́е естества́ отве́ргши, до́блественнѣ сопроти́вися мучи́телемъ, тѣ́мже и вѣне́цъ побѣ́ды пріе́мши, мо́лится о душа́хъ на́шихъ.

Сла́ва, гла́съ 5:

Дѣ́вства твоего́ красоты́ восхотѣ́ Ца́рь сла́вы Христо́съ, я́ко непоро́чну тя́ невѣ́сту Себѣ́ обручи́ совокупле́ніемъ нетлѣ́ннымъ, и́бо во́лею Свое́ю пода́въ добро́тѣ твое́й си́лу, на враги́ же и стра́сти непобѣди́му показа́, претерпѣ́вшую ра́ны го́рькія и му́ки свирѣ́пыя, сугу́бымъ вѣнце́мъ увязе́ тя и поста́ви одесну́ю Себе́, я́ко цари́цу испещре́ну. Того́ моли́, му́ченице честна́я и многострада́льная Христи́но, пѣвце́мъ твои́мъ спасе́ніе и жи́знь пода́ти и ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Ра́дуйся.

Избавле́ніе на́съ ра́ди и цѣ́ну вели́кую, пречи́стую кро́вь Твою́ изво́лилъ еси́ да́ти, безгрѣ́шне Христе́ мо́й, всѣ́мъ хотя́ спасе́ніе получи́ти. Тѣ́мже Тя́ зря́щи пригвожде́на Ма́ти Твоя́, рыда́ющи, власы́ терза́ше Си́, глаго́лющи: Ча́до, Агнче Всенепоро́чный, мíръ хотя́ изба́вити честно́ю Твое́ю кро́вію, отъ о́чію Мое́ю ка́ко заше́лъ еси́, Спа́се, незаходи́мое Со́лнце, Иже всѣ́мъ подая́й просвѣще́ніе, и ми́ръ, и ве́лію ми́лость.

На стихо́внѣ окто́иха. Сла́ва, гла́съ 1:

Съ вы́шними си́лами причла́ся еси́, сла́вная, мíръ оста́вльши и Христа́ возжела́вши, Христи́но о всечестна́я! Проси́ на́мъ ве́лія ми́лости.

И ны́нѣ, богоро́диченъ или́ крестобогоро́диченъ. Подо́бенъ: Небе́сныхъ чино́въ.

У Креста́ предстоя́щи Сы́на и Бо́га Твоего́* и долготерпѣ́ніе Того́ смотря́ющи,* глаго́лаше, пла́чущи, Ма́ти Чи́стая:* увы́ Мнѣ́, Ча́до сладча́йшее,* что́ сія́ стра́ждеши непра́ведно, Сло́ве Бо́жій,* да спасе́ши человѣ́чество?


НА ЛИТУРГІИ,

Блаже́нна окто́иха, и святы́я пѣ́снь 3-я, на 4. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. Аллилу́ія, гла́съ 1: Терпя́ потерпѣ́хъ Го́спода, и вня́тъ ми́ [и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Луки́, зача́ло 33. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 206 – 210 об.

/ Къ оглавленію раздѣла /


Наверхъ / Къ титульной страницѣ

0