Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 24-й де́нь.
Слу́жба святы́хъ му́ченикъ Бори́са и Глѣ́ба, нарече́нныхъ во свято́мъ креще́ніи Рома́на и Дави́да.

Аще хра́мъ или́ настоя́тель изво́литъ, твори́мъ бдѣ́ніе.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 4. Подо́бенъ: Яко до́бля.

Пріиди́те вси́,* о новоизбра́нное ста́до Христо́во,* духо́вно соше́дшеся, восхва́лимъ* благочести́ваго вку́пѣ и ца́рскаго ко́рене святу́ю о́трасль,* Рома́на съ до́блимъ Дави́домъ дне́сь,* Христа́ возлюби́вшія,* и Сего́ ра́ди бра́тнее непра́ведное заколе́ніе претерпѣ́вшія,* и Христу́ моля́щіяся всегда́* спасти́ся душа́мъ на́шимъ.

Да ра́дуется ра́достію* все́ человѣ́чество дне́сь,* и да пое́тъ, лику́ющи,* боже́ственными пѣ́сньми Христо́ва Це́рковь,* хва́лящи новопросвѣще́нныя* кня́зи же и му́ченики:* Христа́ бо ра́ди преходя́щее ца́рство земно́е оста́вльше,* Го́спода отъ всея́ души́ возлюби́ша* и мо́лятъ спасти́ся душа́мъ на́шимъ.

Сла́ва, гла́съ 6, самогла́сенъ:

Побѣжда́еми жела́ніемъ бу́дущихъ, па́че же любо́вію Христо́вою, ца́рство земно́е и сла́ву возненави́дѣша, чистоту́ же возлюби́ша и непра́ведное убíйство претерпѣ́ша, ника́коже проти́вящеся закала́ющему вы́ бра́ту, тѣ́мъ и Христо́съ да́ры чуде́съ ва́съ обогати́. О, дво́ице свяще́нная! О, свѣтоза́рный по́лче! О, боже́ственный супру́же! Моли́те спасти́ся душа́мъ на́шимъ.

И ны́нѣ, богоро́диченъ, [гла́съ то́йже:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ себе́* Ду́ху Свято́му очи́стивше,* Тому́ и на́съ жили́ще* содѣ́лайте, святíи,* моли́твами ва́шими.

Сти́хъ: Воззва́ша пра́ведніи,* и Госпо́дь услы́ша и́хъ.

Боже́ственная* и чу́дная дво́ице,* потреби́тели пре́лести* и сѣ́ятели благоче́стія,* моли́те спасти́ся душа́мъ на́шимъ.

Сти́хъ: Мно́ги ско́рби пра́веднымъ,* и отъ всѣ́хъ и́хъ изба́витъ я́ Госпо́дь.

Пресвѣ́тлыя звѣ́зды я́вльшеся,* непобѣди́міи страда́льцы,* озари́те на́съ,* почита́ющихъ вѣ́рою* свяще́нная ва́ша страда́нія.

Сла́ва, гла́съ 8:

Ра́ка, идѣ́же лежа́тъ честны́я и свяще́нныя мо́щи ва́ша, версто́ прехва́льная, Боже́ственная исцѣле́нія приступа́ющимъ оби́льно источа́етъ, дре́внюю тму́ идолобѣ́сія отгоня́щи и свѣ́тъ благоче́стія осія́ющи. Но мо́лимъ вы́: моли́теся, святíи, безъ вре́да сохрани́ти оте́чество ва́ше и спасти́ся душа́мъ на́шимъ.

И ны́нѣ, богоро́диченъ, [гла́съ то́йже:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

Тропа́рь, гла́съ 2:

Правди́вая страстоте́рпца и и́стинная Ева́нгелія Христо́ва послу́шателя, цѣлому́дренный Рома́не съ незло́бивымъ Дави́домъ, не сопроти́въ ста́ста врагу́ су́щу бра́ту, убива́ющему тѣлеса́ ва́ша, душа́мъ же косну́тися не могу́щу. Да пла́чется у́бо злы́й властолю́бецъ, вы́ же, ра́дующеся съ ли́ки а́нгельскими, предстоя́ще Святѣ́й Тро́ицѣ, моли́теся о держа́вѣ сро́дниковъ ва́шихъ богоуго́днѣй бы́ти и сыново́мъ Россíйскимъ спасти́ся.

[Сла́ва, и ны́нѣ, богоро́диченъ, гла́съ то́йже:

Вся́, па́че смы́сла, вся́ пресла́вная Твоя́, Богоро́дице, та́инства, чистотѣ́ запеча́танной и дѣ́вству храни́му, Ма́ти позна́лася еси́ нело́жна, Бо́га ро́ждши Истиннаго. Того́ моли́ спасти́ся душа́мъ на́шимъ.] И отпу́стъ.


НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 8, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Верста́ боже́ственная же и честна́я* прехва́льныхъ самобра́тій на́мъ облиста́ дне́сь,* созыва́ющи но́выя лю́ди* похвали́ти предо́блія му́ченики:* Рома́на у́бо, я́ко усе́рдно пострада́вша,* Дави́да же, я́ко созаколе́на* Нескве́рному Агнцу, пожре́ному на́съ ра́ди,* Спа́су ду́шъ на́шихъ. [Два́жды.]

Пе́рвѣе у́бо, прехва́льніи,* повину́вше багряни́цу ца́рствія Христу́* и Того́ позна́вше,* и́стиннаго Бо́га и Царя́ всѣ́хъ,* пра́отеческихъ же су́етныхъ бого́въ уклони́шася.* Тѣ́мъ и Христо́съ да́ры чуде́съ ва́съ обогати́* и вмѣ́сто тлѣ́нныхъ вѣ́чная ва́мъ дарова́,* прославля́емый во святы́хъ* Спа́съ ду́шъ на́шихъ.

Блаже́нно оте́чество и гра́дъ,* въ не́мже воспита́стеся,* честны́й же хра́мъ, тѣлеса́ ва́ша воспріе́мый,* я́ко вѣнце́мъ ца́рствія украси́ся,* храни́теліе благопрія́тніи,* враги́ устраша́ющіи* и дале́че нѣ́гдѣ отъ оте́чествія ва́шего отгоня́щіи,* Рома́не сла́вне и Дави́де пречу́дне,* моли́те спасти́ся душа́мъ на́шимъ.

Ины стихи́ры, гла́съ 2. Подо́бенъ: Кíими похва́льными.

Кíими похва́льными вѣнцы́* вѣнча́емъ пѣва́емыя?* Раздѣле́ныя тѣлесы́ и совоку́пленыя ду́хомъ,* вѣ́рныхъ люде́й те́плыя засту́пники,* земли́ Россíйскія удобре́ніе* и всея́ вселе́нныя наслажде́ніе,* мужеу́мнымъ смы́сломъ бѣсо́вскую держа́ву разруши́вшія,* Христа́ посо́біемъ,* подаю́щаго мíру ве́лію ми́лость. [Два́жды.]

Кíими похва́льными добро́тами* украси́мъ пѣва́емыя?* Рома́на, си́лу иму́щаго* надъ страстьми́ до́блественнѣ,* и Дави́да ку́пно ревни́теля,* о́ба свѣти́ла вку́пѣ сія́ющая,* озаря́ющая свѣ́томъ добродѣ́тели благочести́выя вся́:* Христо́вымъ бо научи́вшеся за́повѣдемъ,* просла́вишася сла́вно,* моля́ще Подаю́щаго всѣ́мъ ве́лію ми́лость.

Кíими духо́вными словесы́* соста́вимъ пра́здникъ че́стенъ пресла́вныхъ му́ченикъ,* и́же Христа́ ра́ди оста́виша тлѣ́нную сла́ву земну́ю?* Овъ бо прободе́ніе въ ре́бра прія́тъ,* о́въ же, я́ко а́гнецъ, закла́нъ бы́сть;* и́же отъ Христа́ досто́йно просла́вишася,* и прія́ша исцѣле́ній да́ръ,* всѣ́мъ прося́ще досто́йно ве́лію ми́лость.

Сла́ва, гла́съ 6:

Пріиди́те, восхва́лимъ чудотво́рцевъ и му́чениковъ: сíи бо, зако́нно пострада́вше, побѣди́ша сопроти́внаго врага́ и ны́нѣ, свѣ́тло укра́шени, предстоя́тъ Христу́, ра́дующеся. Тѣ́мъ и мы́ пѣ́сньми па́мять и́хъ ве́село любо́вію похва́лимъ, вопію́ще: ра́дуйтеся, вселе́нныя засту́пницы и побо́рники на враги́; ра́дуйтеся, вра́чеве боля́щихъ и бѣсо́въ прогони́теліе; ра́дуйтеся, о любе́зная версто́, бра́тія прекра́сніи, Рома́не сла́вный и Дави́де чу́дный, люби́міи Христу́, за ны́ моля́ще Святу́ю Тро́ицу, умири́ти мíръ и спасти́ ду́ши на́ша.

И ны́нѣ, богоро́диченъ, [гла́съ то́йже:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.]

Та́же вхо́дъ. Проки́менъ дне́. Чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 4. Самогла́сны:

Аще и земна́го ца́рствія но́вый Ка́инъ богоненави́стникъ и братоненави́стный убíйственнѣ лиши́ ва́съ, Христо́съ же непреходя́щее и безконе́чное Ца́рство ва́мъ дарова́, Ему́же со а́нгельскими во́инствы предстоя́ще, моли́теся спасти́ любо́вію пою́щія всечестну́ю и многопра́зднственную па́мять ва́шу.

Земля́ освяти́ся кро́вію всечестно́ю ва́шею, и человѣ́цы обогати́шася ва́ми, исцѣле́ніе незави́стно пріе́млютъ, богому́дріи уго́дницы Христо́вы, сла́вне Рома́не съ незло́бивымъ Дави́домъ, моли́теся Го́сподеви, Ему́же отъ ю́ности прилѣпи́стеся, спасти́ вѣ́рою пою́щія ва́съ.

Сла́ва, гла́съ 5:

Ра́достію вси́ пра́зднуемъ дне́сь па́мять великому́чениковъ, пѣ́сньми и пѣ́ньми прославля́юще Спа́са Христа́, на земли́ удиви́вшаго святы́я Своя́ чудесы́ и благода́ти разли́чными исцѣле́ніи, къ ни́мже взыва́юще, ра́достно рце́мъ: ра́дуйтеся, я́ко благода́ть пріе́мшіи на стра́сти разли́чныя; ра́дуйтеся, я́ко кро́вію ва́шею всели́стеся въ вѣ́чную жи́знь; ра́дуйтеся, ско́ріи послу́шатели су́щихъ въ ско́рбехъ и отъ напа́стей избавля́ющіи оте́чество ва́ше, богопрія́тне Бори́се съ Глѣ́бомъ, моли́теся Го́сподеви поми́ловатися душа́мъ на́шимъ.

И ны́нѣ, богоро́диченъ, [гла́съ то́йже:

Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.]

На стихо́внѣ стихи́ры святы́мъ, гла́съ 4. Подо́бенъ: Да́лъ еси́ зна́меніе.

Пріиди́те, цѣлому́дрія люби́тели,* честну́ю дво́ицу почти́мъ, Христа́ возлюби́вшую,* всѣ́ми владу́щаго,* чи́стымъ се́рдцемъ и душе́ю сокруше́нною,* страстоно́сца Рома́на сла́внаго* и кро́ткаго Дави́да досточу́днаго,* и́же душа́ми и тѣлесы́ чи́стіи* и сокруши́вшіи де́монскія полки́.

Сти́хъ: Воззва́ша пра́ведніи,* и Госпо́дь услы́ша и́хъ.

Отъ ко́рене израсто́сте че́стна* бра́тія сла́вная и благоро́дная,* и благоро́дство вои́стинну возлю́бльшая,* нетлѣ́нныя вожделѣ́сте сла́вы,* изво́ливше живо́тъ и Ца́рство неразруши́мое* и по пра́вдѣ пострада́вше* вѣнцы́ побѣ́ды воспрія́сте,* страстоте́рпцы блаже́нніи* и моли́твенницы о душа́хъ на́шихъ.

Сти́хъ: Мно́ги ско́рби пра́веднымъ,* и отъ всѣ́хъ и́хъ изба́витъ я́ Госпо́дь.

Дѣ́лы и уче́ніи* Христо́вы исполня́юще за́повѣди* и Того́ повелѣ́нія,* враго́мъ не враждова́сте,* на убіе́ніе прише́дшимъ ва́ше непра́ведно,* но, я́ко Стефа́ну подо́бницы первому́ченику,* моля́щеся, глаго́ласте:* не поста́ви и́мъ грѣха́, Человѣколю́бче,* Іису́се Бо́же на́шъ* и Спа́се ду́шъ на́шихъ.

Сла́ва, гла́съ 8:

Пріиди́те, новокреще́нніи Россíйстіи собо́ри, и ви́дите, ка́ко безъ вины́ су́дъ пріе́млетъ му́ченикъ Бори́съ: копіе́мъ ре́бра его́ прободо́ша и кровопроли́тіе сотвори́ша отъ наважде́нія діа́воля; Глѣ́бъ же отъ того́жде бра́та Святопо́лка, я́ко а́гнецъ, закла́нъ бы́сть. Но сíи вѣнча́шася, а о́нъ безъ па́мяти поги́бе. И сíи сла́вими су́ть, а о́нъ въ гее́ннѣ му́чится. Сíи же Христа́ Бо́га мо́лятъ о душа́хъ на́шихъ.

И ны́нѣ, богоро́диченъ, [гла́съ то́йже:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

[На благослове́ніи хлѣ́бовъ: тропа́рь святы́мъ, два́жды [пи́санъ на ма́лѣй вече́рни], и Богоро́дице Дѣ́во.., еди́ножды.]



НА УТРЕНИ,
[На Бо́гъ Госпо́дь: Тропа́рь святы́хъ, два́жды. Сла́ва, и ны́нѣ, богоро́диченъ.]

По 1-й стихоло́гіи сѣда́ленъ, гла́съ 1. Подо́бенъ: Ли́къ а́нгельскій.

Терпѣ́ніемъ и му́жествомъ твои́мъ твою́ стра́сть подъе́мля, Бори́се кня́же, любо́вію Христо́вою взира́я на Ми́лостиваго и Человѣколю́бца Бо́га, подаю́щаго мíрови ве́лію ми́лость. [Два́жды.]

Сла́ва, и ны́нѣ, богоро́диченъ:

Безма́терняго на небеси́ па́че мы́сли и слу́ха на земли́ безъ отца́ родила́ еси́, Того́, Богоро́дице, моли́ о душа́хъ на́шихъ.

По 2-й стихоло́гіи сѣда́ленъ, гла́съ 1. Подо́бенъ: Ли́къ а́нгельскій.

Измла́да Христа́ возлюби́вше ку́пно, бра́тіе честнíи, жи́знь безстра́стную стяжа́вше, сла́вніи, цѣлому́дріе изво́листе и поще́ніе отъ страсте́й душе́вныхъ и тѣле́сныхъ; поспѣше́ніе же Бо́жіею благода́тію пріе́мше, исцѣля́ете ва́съ пою́щія. [Два́жды.]

Сла́ва, и ны́нѣ, богоро́диченъ:

Еди́на крѣ́пкая и те́плая Предста́тельнице ро́ду человѣ́ческому, Богоро́дице Дѣ́во, непреста́нно моли́ со проро́ки и му́ченики, со святи́тели же, и по́стники, и преподо́бными, Его́же родила́ еси́ па́че естества́ Бо́га Сло́ва, спасти́ вся́ческая.

По поліеле́и сѣда́ленъ, гла́съ 8. Подо́бенъ: Прему́дрости.

Христо́вы увѣ́дѣвше за́повѣди благíя, Того́ возлю́бльше, страстоно́сцы сла́вніи, о убіе́ніи тѣле́съ неради́сте, ду́ши же прекра́сныя въ ру́цѣ Христа́ преда́сте. Овъ, копіе́мъ пробода́емь, веселя́шеся, другíй же, я́ко а́гня незло́биво, безъ ми́лости закала́емь, моля́шеся. Сего́ ра́ди пріе́мше да́ръ исцѣле́ній, му́ченицы самобра́тніи, моли́те Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять ва́шу. [Два́жды.]

Сла́ва, и ны́нѣ, богоро́диченъ:

Со́лнца о́блаче разу́мнаго, Боже́ственнаго Свѣ́та свѣти́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослѣпле́ніемъ страсте́й безстра́стія заре́ю просвѣти́, молю́ся, и оскверне́нное мое́ се́рдце омы́й пото́ки умиле́нія, покая́нія же слеза́ми и отъ тимѣ́нія мя́ очи́сти дѣ́лъ мои́хъ, да любо́вію зову́ Ти: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́, Тебе́ бо имѣ́ю наде́жду, ра́бъ Тво́й.

Степе́нна, 1-й антифо́нъ 4-го гла́са. Проки́менъ, [гла́съ 4]: Воззва́ша пра́ведніи,* и Госпо́дь услы́ша и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Вся́кое дыха́ніе... Ева́нгеліе Луки́, зача́ло 106.

По 50-мъ псалмѣ́ стихи́ра, гла́съ 8. Самогла́сенъ:

Бра́тія прекра́сная, Бори́се и Глѣ́бе, ва́ша стра́сти на́ша болѣ́зни и неду́ги исцѣля́ютъ, притека́ющихъ вѣ́рно, ту́не прія́сте, ту́не же и дади́те боля́щимъ исцѣле́ніе. Но, я́ко иму́щіи дерзнове́ніе, Христа́ Бо́га моли́те о душа́хъ на́шихъ.

Кано́нъ Богоро́дицы на 6, его́же краегране́сіе сицево́: Пою́ хвалу́ живоно́сныя Отрокови́цы. Гла́съ 2.
Пѣ́снь 1.

Ирмо́съ: Нетре́ну, необы́чну, немо́кренно морску́ю ше́ствовавъ стезю́, избра́нный вопія́ше Изра́иль: Го́сподеви пои́мъ, я́ко просла́вися.

Невеще́ственная дре́вле лѣ́ствица и стра́нно оляденѣ́вшій пу́ть мо́ря Твое́ явля́ше Рождество́, Чи́стая, Юже пое́мъ вси́, я́ко просла́вися.

Си́ла Вы́шняго Ѵпоста́сь соверше́нная, Бо́жія Му́дрость, вопло́щшаяся, Пречи́стая, изъ Тебе́, къ человѣ́комъ бесѣ́дова, я́ко просла́вися.

Про́йде сквозѣ́ две́рь непрохо́дную заключе́нныя утро́бы Твоея́ пра́вды Со́лнце, Чи́стая, и мíрови возсія́, я́ко просла́вися.

И святы́хъ два́ кано́на, на 8, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Богому́драя дво́ице, вели́цыи страда́льцы, со святы́ми Тро́ицѣ предстоя́ще, моли́теся очище́ніе мнѣ́ дарова́ти, ва́съ похваля́ющему.

Боже́ственное бога́тство исцѣле́ній и мѵ́ро благово́нное хра́мъ ва́шъ, святíи, въ не́мже пое́мъ Христа́ Бо́га, ва́съ просла́вльшаго.

Незаходи́маго Со́лнца въ себѣ́ стяжа́вше, Христа́ Бо́га на́шего, пресла́вне Рома́не съ Дави́домъ, освяти́те на́съ, честну́ю па́мять ва́шу почита́ющихъ.

Богоро́диченъ: Кра́сную, и избра́нную, и всечестну́ю разумѣ́въ Тебе́, Бо́жій, Пренепоро́чная, Сы́нъ Тво́й Сы́нъ бы́сть: сы́ны сотвори́ благода́тію, Богоро́дицу Тя́ чту́щія.

Инъ кано́нъ святы́мъ, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Да́ждь ми́ отпу́стъ мно́гихъ прегрѣше́ній мои́хъ, Спа́се, прему́дрость мнѣ́ подая́, я́ко да пѣ́сньми похвалю́ Тя, просла́вльшаго святы́я Твоя́.

Воспое́мъ пѣ́снь, благочести́віи, просла́вленныхъ цѣлому́дреннымъ смы́сломъ, Рома́на сла́внаго и Дави́да благочести́ваго ку́пно сла́вяще.

Да́ръ благода́рства отъ Бо́га прія́ша о́ба, благоро́дство душе́вное возлюби́вше па́че, цѣлому́дріемъ и добродѣ́телію удобря́ющеся.

Богоро́диченъ: Избра́нную отъ родо́въ всѣ́хъ досто́йно похва́лимъ, вѣ́рніи, Дѣ́ву, вои́стинну па́че сло́ва Бо́га Сло́ва пло́тію ро́ждшую.

Катава́сія: Отве́рзу уста́ моя́...

Пѣ́снь 3.

Ирмо́съ: Лу́къ сокруши́ся си́льныхъ держа́вою Твое́ю, Христе́, и си́лою немощству́ющіи препоя́сашася.

Иже вре́мене превы́шшій вся́каго, я́ко времене́мъ Творе́цъ, изъ Тебе́, Дѣ́во, во́лею Младе́нецъ созда́ся.

Чре́во, простра́ннѣйшее небе́съ, воспои́мъ, и́мже Ада́мъ на небесѣ́хъ, ра́дуяся, живе́тъ.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Весе́ліемъ весели́тся Христо́ва Це́рковь въ па́мяти ва́шей, святíи, и Творцу́ вопіе́тъ: Ты́ моя́, Го́споди, крѣ́пость, и прибѣ́жище, и утвержде́ніе.

До́блія вѣне́чники и страда́льцы Христо́вы вси́ восхва́лимъ свѣ́тло, научи́вшія на́съ Христу́ вопи́ти: Свя́тъ еси́, Го́споди.

Ни ца́рства жела́нія, ни пи́щи наслажде́нія, ни сребра́ и зла́та возжелѣ́ша, но Христу́ еди́ному вопія́ху: Свя́тъ еси́, Го́споди.

Богоро́диченъ: Избавля́ющаго человѣ́ки преслуша́нія и лю́таго паде́нія, всему́ Вино́внаго, Чи́стая и Всенепоро́чная, родила́ еси́.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Все́ помышле́ніе къ Бо́гу, му́дріи, иму́ще, бра́тнею любо́вію совоку́пльшеся, благоче́стно пожи́сте.

Ве́щи возненави́дѣсте тлѣ́нныя и мимотеку́щія и добродѣ́тели яви́стеся сосу́ди, сла́вніи, отъ ю́ности.

Мла́ди у́бо тѣ́ломъ, душа́ми же ку́пно свя́ти, я́ко благочести́ви, тѣ́мъ и и́скренно Бо́га возлюби́сте.

Богоро́диченъ: Еди́на Ты́ породила́ еси́ несказа́нно нетлѣ́нная, тлѣ́нія вои́стинну Потреби́теля и мíръ спасла́ еси́.

Сѣда́ленъ, гла́съ 1. Подо́бенъ: Ли́къ а́нгельскій.

Измла́да Христа́ возлюби́вше ку́пно, бра́тія честна́я, жи́знь безстра́стную стяжа́вше, сла́вніи, цѣлому́дріе изво́листе и поще́ніе отъ страсте́й душе́вныхъ и тѣле́сныхъ, поспѣше́ніе Бо́жіею благода́тію пріе́мше, исцѣля́ете ва́съ пою́щія. [Два́жды.]

Сла́ва, и ны́нѣ, богоро́диченъ:

Безневѣ́стная, Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній всѣ́хъ изба́ви, на Тя́ упова́ніе, Отрокови́це, иму́щихъ, и ду́ши на́ша спаси́ боже́ственными моли́твами Твои́ми.

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Се́ превознесе́ся Боже́ственная гора́ до́му Госпо́дня превы́шше си́лъ, Богома́терь я́вственнѣйши.

Зако́новъ есте́ственныхъ кромѣ́, еди́на, Дѣ́во, ро́ждши Влады́чествующаго тва́рію, сподо́билася еси́ боже́ственнаго зва́нія.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Яко два́ свѣти́ла возсія́вшая, просвѣща́ете лю́ди ва́ша, богоно́сцы, но и ны́нѣ изба́вите на́съ враго́въ обстоя́нія, да почита́емъ ва́съ, съ Бо́гомъ заступле́ніе на́ше.

Врачевство́ неистощи́мое ра́ка ва́ша показа́ся, блаже́нніи, и приста́нище небу́рное: вси́ бо, вѣ́рою притека́ющіи, обрѣта́емъ отъ злы́хъ напа́стей избавле́ніе.

Любо́вію ко Христу́ привяза́еми, тѣ́мъ и даро́въ сподо́бльшеся стра́сти разли́чныя исцѣля́ти, сего́ ра́ди ва́ше соверша́емъ пра́зднество, богому́дріи.

Богоро́диченъ: Сѣдя́й на престо́лѣ херуви́мстѣ и превознесе́нѣ, я́ко престо́лъ имы́й, на руку́ Твое́ю почи́въ, Марíе Богоневѣ́сто, препросла́вленный Бо́гъ.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Юношески подви́гшеся, богоблаже́нніи, во́зрастомъ цвѣ́та и ю́ностію, о сласте́хъ любве́ плотскíя попече́нія не имѣ́сте отню́дъ, Боже́ственныя кни́ги почита́юще, тѣ́мъ и просвѣ́щшеся за́повѣдьми Боже́ственными, те́мнаго погуби́сте кня́зя.

Всемы́сленно оте́ческимъ послѣ́дуя, я́ко му́дръ, стопа́мъ, блаже́нне, сревни́теля имѣ́лъ еси́ до́брымъ, Рома́не богому́дре, Дави́да, вои́стинну присноп́амятнаго: бра́тія у́бо вку́пѣ, благоче́стно совоку́плени душа́ми и тѣ́ломъ, яви́стеся.

Зако́ны Бо́жія отъ души́ возлюби́вше, прозря́ще жи́знь гряду́щую, смы́слъ простира́юще, святíи, че́сть земну́ю и вла́сть возненави́дѣсте и нетлѣ́нное ца́рство и сла́ву умному́дріи измѣни́сте.

Богоро́диченъ: Глаго́ломъ Твои́мъ послѣ́дующе, Непоро́чная, блаже́нну Тебе́ имену́емъ, христіа́нстіи вси́ ро́ди, я́ко Бо́га ро́ждшую вои́стинну, а не мечта́ніемъ, соверше́нна обои́мъ, Божества́ естество́мъ и зако́номъ человѣ́чества.

Пѣ́снь 5.

Ирмо́съ: Угль Иса́іи проявле́йся, Со́лнце изъ дѣ́вственныя утро́бы возсія́, во тмѣ́ заблу́ждшимъ, богоразу́мія просвѣще́ніе да́руя.

Облацы, весе́лія сла́дость кропи́те су́щимъ на земли́, я́ко Отроча́ даде́ся, Сы́й пре́жде вѣ́къ, отъ Дѣ́вы вопло́щся, Бо́гъ на́шъ.

Житію́ и пло́ти мое́й свѣ́тъ возсія́, и дря́хлость грѣха́ разруши́, напослѣ́докъ отъ Дѣ́вы безъ сѣ́мене вопло́щся, Вы́шній.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Наста́ всечестны́й пра́здникъ и свяще́нное торжество́ сла́внаго Рома́на съ Дави́домъ, нося́ на́мъ ра́дость вѣ́чную, въ не́йже сла́вимъ Го́спода, просла́вльшаго и́хъ.

Добродѣ́тели укра́шени благолѣ́піемъ, свѣ́тлый Рома́не съ Глѣ́бомъ, страда́ніемъ вѣнча́вшеся, врага́ же и бра́та посра́мльше, за Христа́ прія́сте заколе́ніе.

Слы́шано бы́сть во все́мъ мíрѣ честно́е и свяще́нное страда́ніе ва́ше, и вся́къ язы́къ возставля́етъ сла́вити Христа́, ва́съ просла́вльшаго.

Богоро́диченъ: Преста́ у́бо тлѣ́ніе человѣ́ка: Дѣ́ва бо роди́ нетлѣ́нно Бо́га Сло́ва, па́че естества́ и сло́ва, и Дѣ́ва па́ки пребы́сть.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Яко отца́ благочести́ва ча́да, любо́вію свя́зана и того́ лю́бяще, благоче́стія свѣ́тлостію въ Россíи возсія́вше, бра́тія же па́че возлю́бленніи. Сего́ ра́ди зави́стными стрѣла́ми искуше́ни бы́сте.

Разгнѣ́вася братоубíйца, я́ко Ка́инъ пре́жде, Святопо́лкъ окая́нный, яви́ся же законопресту́пникъ и къ за́висти убíйство приплете́, сла́стію прельсти́вся властолю́бія. Тѣ́мже отмще́нія пра́веднаго не убѣже́.

Отъ кро́ве своея́ препру́ду нося́ще, пресла́вніи, и Кре́стъ за ски́петръ въ десну́ю ру́ку ны́нѣ иму́ще, сца́рствовати Христу́ сподо́бишася Рома́нъ и Дави́дъ, во́ини Христо́вы непобѣди́міи.

Богоро́диченъ: Вы́шшу Тя́ всѣ́хъ и святѣ́йшу чино́въ прославля́емъ небе́сныхъ, я́ко до́льная съ го́рними совокупи́вшу, но, о Ма́ти Бо́жія, пѣвцы́ Твоя́ посѣща́ющи, пога́ныхъ уставля́й шата́нія.

Пѣ́снь 6.

Ирмо́съ: Гла́съ глаго́лъ моле́бныхъ отъ болѣ́зненныя, Влады́ко, души́ услы́шавъ, отъ лю́тыхъ мя́ изба́ви: еди́нъ бо еси́ на́шего спасе́нія вино́венъ.

Естество́ человѣ́ческое, рабо́тающее грѣху́, Влады́чице Чи́стая, Тобо́ю свобо́ду улучи́: Тво́й бо Сы́нъ, я́ко Агнецъ, за всѣ́хъ закала́ется.

Вопіе́мъ Ти́ вси́, и́стиннѣй Богома́тери Бо́жіи: прогнѣ́вавшія рабы́ изба́ви, Еди́на бо дерзнове́ніе къ Сы́ну и́маши.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

О и́же свѣ́тлый ва́шъ пра́здникъ соверша́ющихъ, блаже́нніи, моли́теся, и оте́чество ва́ше храни́ти отъ вра́гъ ненавѣ́тно, и ми́рно строе́ніе дарова́ти Импера́тору на́шему моли́твами ва́шими.

Небе́снаго Ца́рствія рачи́теліе бы́вше, блаже́нніи, Влады́цѣ Христу́ чи́стою со́вѣстію послужи́вше, и Тому́ предстоя́ще, моли́теся, спасти́ ва́съ восхваля́ющихъ.

Прилѣпи́вшеся Христу́ и на Него́ все́ упова́ніе возложи́вше, блаже́нніи, сего́ ра́ди убіе́ни бы́вше, вѣ́чно съ Ни́мъ ца́рствуете.

Богоро́диченъ: Усты́, по́мысломъ и се́рдцемъ, Пречи́стая, Тя́, Богоро́дицу, проповѣ́даемъ: Тобо́ю бо Бо́гу примири́хомся, отринове́ніи преступле́ніемъ пе́рвѣе пра́отца.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Но́щи и тмы́ сы́нове нареко́шася проти́вніи, въ нощи́ тя, къ Бо́гу пѣ́ніе принося́ща, ко́піи сбодо́ша, хода́таи твоему́ вѣнцу́, Рома́не, боже́ственному бы́вше.

Яко вои́стинну сы́й подо́бникъ Бо́га вопло́щшагося, за убива́ющія тя́ те́плѣ моли́лся еси́, свя́те, я́ко вторы́й му́ченикъ Христо́въ вели́кій Стефа́нъ, сего́ ра́ди и съ ни́мъ просла́вился еси́.

Юношески хра́брствовавше, му́жески побѣди́ша лю́таго ратобо́рца свяще́нный Рома́нъ ку́пно съ Дави́домъ, дѣ́ломъ и сло́вомъ побѣди́тели показа́шася и побѣ́дный вѣне́цъ отъ Бо́га прія́ша сла́вніи.

Богоро́диченъ: Уясня́ютъ проро́честіи гла́си Бо́жію Роди́тельницу, пое́мъ же Тя́ и мы́, ви́дяще сбытіе́ честны́хъ прорица́ній, дѣ́вства вои́стинну и чистоты́ вмѣсти́лище.

Конда́къ, гла́съ 3. Подо́бенъ: Дѣ́ва дне́сь.

Возсія́ дне́сь пресла́вная па́мять ва́ша, благоро́дніи страстоте́рпцы Христо́вы, Рома́не и Дави́де, созыва́ющи на́съ къ похвале́нію Христа́ Бо́га на́шего. Тѣ́мъ, притека́юще къ ра́цѣ моще́й ва́шихъ, исцѣле́ній да́ръ пріе́млемъ моли́твами ва́шими, святíи: вы́ бо боже́ственніи вра́чеве есте́.

Икосъ:

Разу́мное житіе́ соверша́я, преблаже́нне, ца́рскимъ вѣнце́мъ отъ ю́ности укра́шенъ, всебога́тый Рома́не, вла́сть ве́лія бы́лъ еси́ твоему́ оте́честву, во все́й земли́ Россíйстѣй. Тѣ́мъ, ви́дя тво́й успѣ́хъ, Христо́съ Бо́гъ судо́мъ Свои́мъ на муче́ніе тя́ призва́, крѣ́пость тебѣ́ пода́въ съ небесе́, да побѣди́ши врага́ му́жески съ Дави́домъ, бра́томъ твои́мъ, пострада́вшимъ съ тобо́ю: вы́ бо боже́ственніи вра́чеве есте́.

Пѣ́снь 7.

Ирмо́съ: Вѣтíи яви́шася о́троцы любому́дрѣйшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Зря́ще въ нощи́, у́бо Іа́ковъ я́ко въ гада́ніи Бо́га, воплоще́нъ же изъ Тебе́, свѣ́тлостію яви́ся пою́щимъ: Пребоже́ственный отце́въ Бо́гъ и препросла́вленъ.

Зна́менія е́же въ Тебѣ́ неизрече́ннаго проявля́я сплете́нія, со Іа́ковомъ бо́рется: и́мже во́лею соедини́ся человѣ́комъ, Чи́стая, Пребоже́ственный отце́въ Бо́гъ и препросла́вленъ.

Ме́рзокъ, и́же не проповѣ́дуетъ еди́наго Дѣ́вы Тя́ Сы́на отъ Препѣ́тыя Тро́ицы, и несумнѣ́нною мы́слію, и язы́комъ вопія́: Пребоже́ственный отце́въ Бо́гъ и препросла́вленъ.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Боже́ственная и пресвѣ́тлая па́мять ва́ша, я́ко не́бо свѣтоза́рное, показа́ся, и я́ко со́лнце свѣтоно́сно, просвѣща́я безъ сумнѣ́нія Христу́ вопію́щія: благослове́нъ еси́ въ хра́мѣ сла́вы Твоея́, Го́споди.

Кто́ не удиви́тся и кто́ не воспое́тъ и просла́витъ вѣ́рно пресла́вныхъ му́ченикъ Христо́выхъ, Бори́са съ Глѣ́бомъ, Христо́ва ра́ди смире́нія возненави́дѣвшихъ діади́му и ца́рство?

Мглу́ безбо́жія отгна́вше, свѣ́тло научи́ша лю́ди своя́ чести́ въ Тро́ицѣ Еди́наго Бо́га и усе́рдно пѣ́ти: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Вы́шняго освяще́нное Боже́ственное селе́ніе, ра́дуйся, Тобо́ю бо даде́ся ра́дость, Богоро́дице, вопію́щимъ: благослове́на Ты́ въ жена́хъ еси́, Всенепоро́чная Влады́чице.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Пресла́вно просла́ви Боже́ственная благода́ть ва́съ, прехва́льніи, я́ко сою́зъ вои́стинну братолю́бія и благоче́стія, и свѣ́тло научи́ вопи́ти: благослове́нъ Бо́гъ оте́цъ на́шихъ.

О му́жества страстоте́рпецъ! О, чистоты́ крѣ́пости! О, ра́зума непрекло́нна! я́ко уязвля́еми вельми́ и закала́еми неми́лостивно яви́стеся страстоно́сцы вели́цыи, Рома́не и Дави́де. Ихже восхва́лимъ, вѣ́рніи, вопію́ще: благослове́нъ Бо́гъ оте́цъ на́шихъ.

Пострада́ти Христа́ ра́ди изво́листе и сего́ ра́ди возме́здіе отъ Бо́га обрѣто́сте, стра́сти и неду́ги отъ земны́хъ отгоня́ти, хва́лящихъ и вопію́щихъ: благослове́нъ Бо́гъ оте́цъ на́шихъ.

Богоро́диченъ: Ка́пля богото́чная, я́же отъ Тебе́ ро́ждшися, мíръ освяти́вша, Богоро́дице Дѣ́во, ка́плю ми́лости ми́ источи́, освяща́ющу ду́ши и помышле́нія земны́хъ.

Пѣ́снь 8.

Ирмо́съ: О подо́біи зла́тѣ небре́гше, треблаже́нніи ю́ноши, неизмѣ́нный и живы́й Бо́жій о́бразъ ви́дѣвше, среди́ огня́ воспѣва́ху: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Ви́дѣнъ бы́сть на земли́ Тобо́ю и съ человѣ́ки поживе́, Иже бла́гостію несравне́нный и си́лою. Ему́же пою́ще, вси́ вѣ́рніи, зове́мъ: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Вои́стинну Тя́, Чи́стую, проповѣ́дающе, сла́вимъ, Богоро́дице: Ты́ бо Еди́наго родила́ еси́ отъ Тро́ицы воплоще́нна. Ему́же со Отце́мъ и Ду́хомъ вси́ пое́мъ: да пое́тъ Го́спода вся́ тва́рь и превозно́ситъ во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Просія́вши дне́сь пресвѣ́тлая па́мять ва́ша, блаже́нніи, вѣ́рныя созыва́етъ на торжество́, просла́вити терпѣ́нія ва́ша, Христу́ же вопи́ти: благослови́те, вся́ дѣла́ Госпо́дня, Го́спода.

Богоявле́нніи и но́віи страда́льцы Тебе́, Христе́, еди́наго возлюби́ша и лю́ди наста́виша пѣ́ти Тя́, Творца́ всѣ́хъ: благослови́те, вся́ дѣла́ Госпо́дня, Го́спода.

Пра́вды свѣти́льницы возсія́вшіи, укра́шени добро́тою муче́нія, просвѣща́юще сердца́ вѣ́рныхъ, неду́ги отго́нятъ отъ вопію́щихъ вѣ́рно: благослови́те, вся́ дѣла́ Госпо́дня, Го́спода.

Богоро́диченъ: Избавля́я на́съ, возсія́ изъ Тебе́ Госпо́дь, Дѣ́во Чи́стая, Его́же моли́, Влады́чице, просвѣти́ти пою́щія Тя́ и обстоя́нія изба́вите вопію́щія: благослови́те, вся́ дѣла́ Госпо́дня, Го́спода.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Не дово́льни бы́вше о убíйствѣ окая́нніи, но и тѣлеса́ ва́ша небрего́ма пове́ргше, не устыдѣ́шася благоро́дія, но благода́ть Бо́жія храня́ше я́ хране́ніемъ а́нгеловъ, съ ни́миже лику́ете во вѣ́ки.

Человѣ́цы, и́же тогда́ въ гора́хъ ло́ва и́щуще, ви́дѣша свѣ́тъ, отъ твоего́ тѣлесе́ сія́ющь, богодохнове́нне Дави́де, — что́ видѣ́ніе? — дру́гъ дру́гу глаго́лаху. Ви́дѣвше же чу́до, проповѣ́даша всѣ́мъ, Христа́ хва́ляще, тебе́ сохра́ньшаго.

Пресвята́я ва́ша па́мять, освяща́ющая мíръ, наста́ ны́нѣ, прехва́льніи страстоно́сцы, въ ню́же мо́лимъ получи́ти ва́ше заступле́ніе, Рома́не и Дави́де, Христа́ пою́щимъ во вѣ́ки.

Богоро́диченъ: Свѣ́та сосу́дъ, Чи́стая, бы́вши, просвѣти́ мя, въ повелѣ́ніихъ Свѣ́та ходи́ти ми́ поспѣши́, Всечи́стая, отъ чре́ва Твоего́ возсія́вшаго и просвѣти́вша вѣ́рныхъ сердца́, Его́же превозно́симъ во вѣ́ки.

Пѣ́снь 9.

Ирмо́съ: Ве́сь еси́ жела́ніе, ве́сь сла́дость, Сло́ве Бо́жій, Дѣ́вы Сы́не, Бо́же бого́въ, Го́споди святы́хъ Пресвяты́й, тѣ́мъ Тя́ вси́ съ Ро́ждшею велича́емъ.

Же́злъ крѣ́пости даде́ся естеству́ тлѣ́нному, Сло́во Бо́жіе во утро́бѣ Твое́й, Чи́стая, и сіе́ возста́ви, до а́да попо́лзшееся. Тѣ́мже Тя́, Всечи́стая, я́ко Богоро́дицу, велича́емъ.

Юже изво́лилъ еси́, Влады́ко, пріими́ ми́лостивно Моли́твенницу, Ма́терь Твою́, о на́съ, и Твоея́ бла́гости вся́ческая испо́лнятся, да Тя́ вси́, я́ко Благодѣ́теля, велича́емъ.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Испещре́ни бы́вши Боже́ственными добро́тами, страда́ніи ва́шими къ Бо́гу востеко́сте, вѣнцы́ побѣ́ды отъ Него́ пріе́млюще, тѣ́мъ ва́ша пѣвцы́ помина́йте, да ва́съ непреста́нно велича́емъ.

О, боже́ственная дво́ице, самобра́тная и свѣтоза́рная! Моли́теся дарова́ти очище́ніе согрѣше́ній и пре́жде конца́ житія́ исправле́ніе, да ва́съ непреста́нно велича́емъ.

Отъ мла́да во́зраста освяти́ ва́съ Вседѣ́тель Бо́гъ и окорми́тели изря́дны пла́вающимъ въ мо́ри житія́ показа́, тѣ́мъ согла́сно почита́емъ па́мять ва́шу.

Богоро́диченъ: Спаси́ мя, всѣ́хъ ро́ждшая Изба́вителя, разори́ души́ моея́ о́блаки, Свѣ́та о́блаче, Всесвята́я Влады́чице, и си́льна содѣ́лай на стра́сти, борю́щія мя́.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Аще и на земли́ положе́ни бы́сте я́ко ме́ртви, но на небесѣ́хъ прославля́етеся съ рабы́ Бо́жіими. Тѣ́мъ дерзнове́нія отъ Него́ сподо́бльшеся, сла́вніи, нечи́стаго, верху́ стоя́ща надъ гро́бомъ ва́шимъ, стра́хомъ о́гненнымъ отгна́сте, блаже́нніи.

Здра́вы творите́ боля́щія благочести́выя и хромы́мъ тече́ніе подае́те, и послушеству́етъ здра́въ бы́вый у ва́шея ра́ки, о дво́ице преди́вная! Тѣ́мъ и на́мъ всѣ́мъ помо́щницы поспѣ́шни быва́ете свы́ше, уставля́юще болѣ́зни и пога́ныхъ шата́нія.

Боже́ственная и свѣтоза́рная вои́стинну верста́ Рома́не и Дави́де, добропобѣ́дніи страстоно́сцы, на небеси́ ны́нѣ Тро́ицѣ Вседержа́внѣй предстоите́, избавле́нія прося́ще прегрѣше́ній лю́тыхъ вѣ́рно на земли́ па́мять ва́шу торжеству́ющимъ.

Богоро́диченъ: О, чудесе́, пребо́льша ума́, чу́до ве́ліе вои́стинну и пресла́вно! Ка́ко вмѣсти́ся во утро́бу Твою́ Бо́гъ, ника́коже вмѣсти́мый? Его́же за хва́лящія Тя́ благочести́вно моли́, Дѣ́во, отъ бѣ́дъ избавля́ти и отъ беззако́нныхъ язы́къ всегда́.

Свѣти́ленъ. Подо́бенъ: Посѣти́лъ ны́.

Яко вои́стинну пресвѣ́тліи свѣти́льницы, всю́ вселе́нную просвѣти́сте вѣ́рою, богопрія́тне Рома́не съ Дави́домъ. Тѣ́мъ пѣ́сньми воспое́мъ возвели́чившаго ва́съ Христа́ Бо́га на́шего. [Два́жды.]

Сла́ва, и ны́нѣ, богоро́диченъ:

Богоро́дицу пѣ́сньми немо́лчными благоче́стно пое́мъ, вопію́ще: ра́дуйся, горо́ свята́я, ра́дуйся, престо́ле огнено́сный всѣ́хъ Царя́, ра́дуйся, а́нгеловъ ра́досте и му́чениковъ сла́во.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Свѣтоза́рная, и свята́я, и благообра́зная* му́чениковъ Бори́са и Глѣ́ба* всепра́зднественная возсія́ па́мять,* и́же, всю́ зе́млю просвѣща́юще* и и́дольскій мра́къ отгоня́юще,* цѣле́бъ благода́ть источа́ютъ. [Два́жды.]

Честны́ми ка́плями крове́й ва́шихъ* обагри́сте ри́зы ва́ша,* блаже́нніи Рома́не и Дави́де,* тѣ́мъ вѣ́рою па́мять ва́шу пра́зднующе,* моли́теся, мо́лимъ ва́съ,* умири́ти ми́ръ и спасти́ ду́ши на́ша.

Яко еди́нъ свѣ́тъ во двою́ тѣлеси́,* мíръ просвѣща́ете чуде́сными блиста́ніи,* страстоте́рпцы Госпо́дни,* мра́къ невѣ́дѣнія отгоня́юще,* тѣ́мъ воспѣва́емъ ра́достно,* похваля́юще ва́шу па́мять.

Сла́ва, гла́съ 4:

Дне́сь, празднолю́бныхъ собо́ри, соше́дшеся, ра́достнымъ лице́мъ и чи́стымъ се́рдцемъ, духо́внѣ соста́вимъ ли́къ: не въ кимва́лѣхъ іуде́йски, но въ сокруше́нныхъ сердца́хъ похваля́юще Христа́, и́стиннаго Бо́га на́шего, прославля́ющаго святы́я Своя́, до́бляго Рома́на съ Дави́домъ. Ихже ны́нѣ многоцѣле́бную и чудотво́рную ра́ку обстоя́ще, любе́зно облобыза́емъ, глаго́люще: ра́дуйтеся, я́ко Христо́вы за́повѣди по о́бразу соблю́дшіи; ра́дуйтеся, я́ко смире́ніе Христо́во воспріи́мшіи, и ника́коже сопроти́вистеся бра́ту и врагу́, неми́лостивно убива́ющему тѣлеса́ ва́ша; ра́дуйтеся, я́ко лю́ди ва́ша ко и́стиннѣй вѣ́рѣ наставля́ющіи, Рома́не пречу́дне и незло́биве Дави́де, оте́честву ва́шему пресвѣ́тліи свѣти́льницы и моли́твенницы дерзнове́нніи о душа́хъ на́шихъ.

И ны́нѣ, богоро́диченъ, [гла́съ то́йже:

Изба́ви на́съ отъ ну́ждъ на́шихъ, Ма́ти Христа́ Бо́га, ро́ждшая всѣ́хъ Творца́, да вси́ вопіе́мъ Ти́: ра́дуйся, еди́но предста́тельство ду́шъ на́шихъ.]

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна обою́ кано́новъ, пѣ́снь 3-я и 6-я. Проки́менъ, гла́съ 4: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ къ Ри́мляномъ, зача́ло 99. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Ева́нгеліе Іоа́нна, зача́ло 52. Прича́стенъ: Ра́дуйтеся, [пра́ведніи, о Го́сподѣ, пра́вымъ подоба́етъ похвала́].

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 211 – 222.

/ Къ оглавленію раздѣла /


Наверхъ / Къ титульной страницѣ

0