Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 23-й де́нь.
Слу́жба Пресвятѣ́й Богоро́дицѣ, пре́дъ чудотво́рною Ея́ ико́ною Поча́евскою пѣва́емая.

НА МАЛѢЙ ВЕЧЕРНИ,
На Го́споди, воззва́хъ: стихи́ры на 4, гла́съ 4:

Наста́ де́нь пра́здника Твоего́, Пречи́стая, наста́ на́шея ра́дости пресвѣ́тлый де́нь. Пріиди́те, мона́шествующихъ ли́цы, пріиди́те, вси́ вѣ́рніи лю́діе, воспои́мъ отъ чи́стаго се́рдца Ма́терь Бо́жію и чудеса́ Ея́, на горѣ́ Поча́евстѣй явле́нная, просла́вимъ. [Два́жды.]

Ве́лія чуде́съ Твои́хъ си́ла, Богоро́дице, я́ко мно́ги, то́кмо воззва́вшія къ Тебѣ́, отъ неду́говъ тя́жкихъ спасла́ еси́, вѣ́рныя видѣ́ньми утверди́ла еси́ и невѣ́рныя къ вѣ́рѣ обрати́ла еси́.

Аки Сина́й и Ѳаво́ръ, ублажа́емъ го́ру Поча́евскую, а́ки Влахе́рнскую це́рковь, чти́мъ здѣ́ стоя́щій хра́мъ Влады́чицы, зане́ подо́бная тѣ́мъ мѣ́стомъ въ Поча́евстѣй оби́тели содѣ́яшася, я́ко пребыва́ніе сла́вы Приснодѣ́вы здѣ́ яви́ся.

Сла́ва, и ны́нѣ, гла́съ 2:

Небе́сная врата́, и Спору́чница спасе́нія на́шего, и вѣ́ры Правосла́вныя утвержде́ніе Ты́ еси́, Богоро́дице Пречи́стая, Твоего́ у́бо предста́тельства ча́юще, во еди́нъ моли́твенный ли́къ снидо́хомся, раби́ Твои́, и подно́жію но́гъ Твои́хъ покланя́емся, и про́симъ просвѣще́нія и спасе́нія душа́мъ на́шимъ.

На стихо́внѣ сти́хиры, гла́съ 1:

Умиле́ніе серде́цъ и о грѣсѣ́хъ покая́ніе дне́сь возно́сится отъ христіа́нъ ко престо́лу Пречи́стыя Дѣ́вы: Та́ бо о на́съ мо́литъ Христа́ Бо́га.

Сти́хъ: Слы́ши, Дщи́, и ви́ждь, и приклони́ у́хо Твое́.

Прорече́ніе Твое́ сбы́вшееся здѣ́ зри́мъ, Влады́чице: вси́ бо ро́ди Тебе́ ра́достно ублажа́ютъ. Тѣ́мже воззове́мъ Ти́ съ пра́ведною Елисаве́тою: благослове́на Ты́ въ жена́хъ, и благослове́нъ Пло́дъ чре́ва Твоего́.

Сти́хъ: Лицу́ Твоему́ помо́лятся бога́тіи лю́дстіи.

Вои́стинну блаже́но чре́во, носи́вшее Тя́, Го́споди, и сосца́, я́же еси́ сса́лъ; на́мъ же, соверша́ющимъ пра́зднество Твоея́ Пречи́стыя Ма́тере, носи́ти Тя́ въ сердца́хъ на́шихъ помози́, да и мы́ блаже́нства сего́, по сло́ву Твоему́, причасти́мся.

Сла́ва, и ны́нѣ, гла́съ 5:

Ра́дуйся, Преблагослове́нная Богоро́дице Дѣ́во; ра́дуйся, бы́строе моля́щихся услы́шаніе; ра́дуйся, бѣсо́мъ устраше́ніе и ка́ющимся прибѣ́жище; ра́дуйся, исто́чникъ благода́ти въ чудотво́рнѣмъ Твое́мъ о́бразѣ ла́врѣ Поча́евстѣй дарова́вшая.

Тропа́рь, гла́съ 5:

Предъ свято́ю Твое́ю ико́ною, Влады́чице, моля́щіися исцѣле́ній сподобля́ются, вѣ́ры и́стинныя позна́ніе пріе́млютъ и ага́рянская наше́ствія отража́ютъ. Тѣ́мже и на́мъ, къ Тебѣ́ припа́дающимъ, грѣхо́въ оставле́ніе испроси́, по́мыслы благоче́стія сердца́ на́ша просвѣти́ и къ Сы́ну Твоему́ моли́тву вознеси́ о спасе́ніи ду́шъ на́шихъ.


НА ВЕЛИЦѢЙ ВЕЧЕРНИ,
На Го́споди, воззва́хъ: ста́вимъ стихо́въ 8 и пое́мъ стихи́ры, гла́съ 5:

Пріиди́те, россíйстіи собо́ри, и отъ всѣ́хъ язы́къ, вѣ́рніи, собери́теся, на го́ру Поча́евскую взы́демъ и въ до́мъ Ма́тере Бо́жія, и у́зримъ мѣ́сто стопы́ Ея́, идѣ́же во о́гненнѣмъ столпѣ́ дре́вле яви́ся, и отъ исто́чника, отту́ду исте́кшаго, вѣ́рою окропле́ніе пріи́мемъ, и чудотво́рнѣй ико́нѣ Ея́ поклони́мся, проще́нія прегрѣше́ній на́шихъ прося́ще, и душа́мъ на́шимъ ве́лія ми́лости. [Два́жды.]

Ко Твоему́ заступле́нію притека́емъ, Пречи́стая, и чудеса́, во оби́тели Поча́евстѣй отъ Тебе́ бы́вшая, воспѣва́емъ: исцѣле́нія бо здѣ́ слѣпíи и хро́міи ра́достно пріима́ху, бѣснíи свобожда́хуся, и ме́ртвіи воскресо́ша, и нѣ́сть такова́го жесто́каго се́рдца, е́же зрѣ́ніемъ святы́ни Твоея́ не умили́тся. Но утверди́, Всепѣ́тая, благо́е изволе́ніе моля́щихся Тебѣ́ и пода́ждь душа́мъ на́шимъ ве́лію ми́лость.

Ра́дуйся, Благода́тная Богоро́дице, Твое́ ста́до отъ небе́съ назира́ющи, отъ а́нгелъ у́бо пѣ́ніе пріе́млющи, отъ на́съ же излива́емыя умиле́нныя сле́зы ви́дящи и моли́твенная воздыха́нія ду́шъ на́шихъ слы́шащи: сія́ бо па́че витíйства слове́снаго на милосе́рдіе Тебе́ преклоня́ютъ, во е́же пода́ти душа́мъ на́шимъ ве́лію ми́лость.

Ины стихи́ры, гла́съ 2:

Твою́ ико́ну цѣлу́юще, Влады́чице, и слѣ́ду стопы́ Твоея́ покланя́ющеся, и заступле́нія Твоя́ мно́гая помина́юще, досто́йныхъ слове́съ о прославле́ніи Тебе́ не обрѣта́емъ, но, благоговѣ́йныя сле́зы Тебѣ́ въ молча́ніи принося́ще, а́ки на небеси́, себе́ мни́мъ, Твое́й сла́вѣ предстоя́щія; спаси́ Тебе́ велича́ющія. [Два́жды.]

На горѣ́ Ѳаво́рстѣй Пе́тръ со дру́ги Госпо́дне Преображе́ніе ви́дѣвъ и лѣ́потою сла́вы Его́ услажда́яся, та́ко вопія́ше Ему́: Го́споди, добро́ е́сть на́мъ здѣ́ бы́ти. Сицевы́й же глаго́лъ рце́мъ, бра́тіе, на го́ру явле́нія Ма́тере Бо́жія собра́вшеся, и преображе́ніе сла́вы Ея́, здѣ́ бы́вшее, помышля́юще, и во умиле́ніи вопію́ще къ Не́й: спаси́ Тебе́ велича́ющія.

На скалѣ́ пусты́ннѣй пе́рвѣе яви́лася еси́, Влады́чице, свѣ́томъ огня́ просвѣще́ніе вѣ́рныхъ здѣ́ прообразу́ющи и купину́ неопали́мую на па́мять лю́демъ приводя́щи; пото́мже съ небе́съ видѣ́ніе Твоего́ заступле́нія и́нокомъ поча́евскимъ яви́ла еси́, я́ко покро́въ Тво́й, Андре́емъ дре́вле ви́дѣнный. На́съ же, моля́щихся, свѣ́томъ озари́ духо́внымъ и спаси́ Тебе́ велича́ющія.

Сла́ва, и ны́нѣ, гла́съ то́йже:

Непроходи́мая врата́, та́йно запеча́тствованная, благослове́нная Богоро́дице Дѣ́во, пріими́ моле́нія на́ша и принеси́ Твоему́ Сы́ну и Бо́гу, да спасе́тъ Тобо́ю ду́ши на́ша.

Вхо́дъ съ кади́ломъ. Проки́менъ дне́. Та́же чте́нія пра́здника три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Исхо́да чте́ніе. [Глава́ 3.]

Вни́де Моисе́й въ го́ру Бо́жію Хори́въ. Яви́ же ся ему́ Ангелъ Госпо́день въ пла́мени о́гненнѣ изъ купины́. И ви́дѣ, я́ко купина́ горя́ше огне́мъ, и купина́ не сгара́ше. Рече́ же Моисе́й: преше́дъ, узрю́ видѣ́ніе вели́кое сіе́, что́ я́ко не сгара́етъ купина́? Якоже ви́дѣ Госпо́дь, я́ко приступа́етъ ви́дѣти, призва́ его́ Госпо́дь изъ купины́, глаго́ля: Моисе́е, Моисе́е. Онъ же рече́: что́ е́сть? И рече́: не прибли́жися сѣ́мо; изу́й сапо́гъ отъ ногу́ твое́ю: мѣ́сто бо, на не́мже ты́ стои́ши, земля́ свята́ е́сть. И рече́ ему́: Азъ е́смь Бо́гъ отца́ твоего́, Бо́гъ Авраа́мовъ, и Бо́гъ Исаа́ковъ, и Бо́гъ Іа́ковль. Отврати́ же Моисе́й лице́ свое́: стыдя́ше бо ся зрѣ́ти предъ Бо́гомъ. Рече́ же Госпо́дь къ Моисе́ю: ви́дя, ви́дѣхъ озлобле́ніе люде́й Мои́хъ, и́же во Еги́птѣ, и во́пль и́хъ услы́шахъ отъ наси́льствующихъ въ дѣ́лѣхъ, вѣ́мъ бо болѣ́знь и́хъ, и снидо́хъ, е́же изъя́ты и́хъ отъ руки́ еги́птянъ, и извести́ и́хъ отъ земли́ о́ныя, и ввести́ и́хъ въ зе́млю бла́гу и мно́гу, въ зе́млю, точа́щу ме́дъ и млеко́.

Прoро́чества Іезекíилева чте́ніе. [Главы 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

На литíи стихи́ры, гла́съ 6:

Струи́ исцѣле́ній всегда́ источа́еши, Дѣ́во, вѣ́рнымъ, притека́ющимъ къ цѣльбоно́снѣй стопѣ́ Твое́й, Богоневѣ́сто! Ту́не бо излива́еши отъ нея́ оби́льно и бога́тно неду́гующимъ исцѣле́нія: слѣпы́я явля́еши ви́дяща я́сно, притека́ющія къ Тебѣ́ хромы́я мно́гія испра́вила еси́ и разсла́бленныя стягну́ла еси́, подаю́щи всѣ́мъ, я́же ко спасе́нію, проше́нія и душа́мъ на́шимъ ве́лію ми́лость.

Пріиди́те, празднолю́бцы, чу́дное явле́ніе ико́ны Бо́жія Ма́тере, е́же на горѣ́ Поча́евстѣй, просла́вимъ: пресла́вно бо и боголѣ́пно во оби́тели Поча́евстѣй возсія́, неистощи́мую чуде́съ благода́ть всѣ́мъ излива́ющи. Тѣ́мъ усты́ и се́рдцы, и пѣ́сньми, и пѣ́ніи духо́вными се́й святы́й де́нь со всѣ́ми, на го́ру Поча́евскую притека́ющими, пра́зднуемъ свѣ́тло.

Сла́ва, и ны́нѣ, гла́съ то́йже:

Воспо́йте, россíйстіи наро́ди, Цари́цѣ Бо́жіей Ма́тери пѣ́снь но́ву, содѣ́явшей чу́до, новѣ́йшее всѣ́хъ дре́внихъ чуде́съ, на горѣ́ Поча́евстѣй: си́льныя бо сокруши́, стрѣ́лы ага́рянскія, на ню́ отъ тата́ръ направля́емыя, на главу́ и́хъ вспя́ть обраща́ющи, немощны́я же препоя́са си́лою свы́ше, и вознесе́ смире́нныя. То́й побѣди́тельная возсыла́емъ и, припа́дающе, вопіе́мъ: Засту́пнице на́ша усе́рдная, Ма́ти Го́спода Вы́шняго, сла́ва Тебѣ́!

На стихо́внѣ стихи́ры, гла́съ 3:

Кто́ возглаго́летъ си́лы Твоя́, Богоро́дице, цѣльбоно́сный Поча́евскій исто́чниче? Неистощи́мыми бо дарова́ніи изоби́лующи, мно́гая и па́че естества́ содѣва́еши исцѣле́нія, не то́кмо тѣле́сныя болѣ́зни врачу́юши, но и душе́вныя стра́сти на́ша измыва́ющи, и всѣ́мъ подае́ши ве́лію ми́лость.

Сти́хъ: Слы́ши, Дщи́, и ви́ждь, и приклони́ у́хо Твое́.

Твои́ми чудесы́, Богоро́дице, невѣ́рніи умили́вшеся, Правосла́вную вѣ́ру исповѣ́даху, и еретицы́ отъ е́реси отреко́шася и ко ста́ду церко́вному сопричто́шася, бѣснíи отъ мучи́тельства де́моновъ свобожда́хуся, и жесто́кая сердца́ смири́шася. Убо и ду́ши на́ша покая́ніемъ просвѣти́, подаю́щи на́мъ ве́лію ми́лость.

Сти́хъ: Лицу́ Твоему́ помо́лятся бога́тіи лю́дстіи.

По избавле́ніи отъ невѣ́рныхъ Твоея́ ла́вры, Влады́чице, ико́ну Твою́ правосла́вніи лю́діе ра́достно прія́ша, я́коже дре́вле Животворя́щій Кре́стъ Сы́на Твоего́ отъ плѣне́нія пе́рсскаго; тѣ́мже исцѣле́нія, отъ нея́ быва́емая, та́кожде умно́жишася, и́хже не лиши́ и на́съ, моля́щихъ Ти ся, подаю́щи душа́мъ на́шимъ ми́ръ и ве́лію ми́лость.

Сла́ва, и ны́нѣ, гла́съ 8:

Сѣдя́й на херуви́мѣхъ и Пѣва́емый отъ серафи́мъ изъ утро́бы Дѣ́вы благоволи́ роди́тися, и Сію́, я́ко Ма́терь Бо́жію, въ моли́тву призыва́ти на́съ научи́, пе́рвѣе въ Ка́нѣ Галиле́йстѣй Тоя́ моле́нія о лю́дехъ пріе́мый и доны́нѣ моли́твъ Ея́ ра́ди проше́нія на́ша исполня́яй. Пріиди́те у́бо, христоимени́тіи лю́діе, на мѣ́сто чуде́съ Пресвяты́я Богоро́дицы и, моле́нія ва́ша предъ ико́ною Ея́ излива́юще, несомнѣ́нною вѣ́рою утверди́теся, е́же прія́ти на́мъ отъ Нея́ ве́лію ми́лость.

На благослове́ніи хлѣ́бовъ тропа́рь, гла́съ 5: Предъ свято́ю Твое́ю ико́ною, Влады́чице..., три́жды. Пи́санъ на ма́лѣй вече́рни.



НА УТРЕНИ,
На Бо́гъ Госпо́дь: тропа́рь пра́здника, три́жды.

По 1-мъ стихосло́віи сѣда́ленъ, гла́съ 4:

Богоро́дица христіа́номъ всегда́ бы́сть ми́лостивая Услы́шательница, отъ коне́цъ земли́ къ Не́й вознося́щимъ моли́твенныя гла́сы, Поча́евскую же го́ру я́ко мѣ́сто явле́ній Свои́хъ избра́, и сего́ ра́ди здѣ́ бы́ти поспѣша́ютъ христіа́не, и́хже моле́нія не отврати́, Влады́чице, но и пра́веднымъ, и грѣ́шнымъ бу́ди Хода́таица.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 7:

Отве́рзи врата́ твоя́, свята́я ла́вро Поча́евская, и пріими́ приходя́щія безчи́сленныя наро́ды, святу́ю ико́ну Влады́чицы облобыза́ти умиле́нно тща́щіяся и вку́пѣ со бра́тіею мона́шествующихъ усе́рдная моле́нія вознося́щія ко Христу́ Бо́гу, да моли́твами Приснодѣ́вы, Ма́тере Своея́, ми́лостивъ бу́детъ рабо́мъ Свои́мъ.

Сла́ва, и ны́нѣ, то́йже.

Велича́ніе:

Велича́емъ Тя́, Пресвята́я Дѣ́во, и почита́емъ честну́ю ико́ну Твою́, ю́же отъ лѣ́тъ дре́внихъ на горѣ́ Поча́евстѣй просла́вила еси́.

Псало́мъ избра́нный: Помяни́, Го́споди, Дави́да и всю́ кро́тость его́...

По поліеле́и сѣда́ленъ, гла́съ 6:

Дне́сь о всѣ́хъ чудесѣ́хъ Твои́хъ, Влады́чице, на горѣ́ Поча́евстѣй бы́вшихъ, благодаре́нія Ти́ Це́рковь прино́ситъ. Тѣ́мже соше́дшіяся лю́ди Твоя́ отъ небе́съ благослови́, ра́зумъ на́шъ уцѣлому́дри, и житіе́ на́ше испра́вити помози́, и о спасе́ніи ду́шъ на́шихъ моле́ніе къ Бо́гу вознеси́, мо́лимъ Ти ся.

Сла́ва, и ны́нѣ, то́йже.


Та́же степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́ во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе да хва́литъ Го́спода. Ева́нгеліе отъ Луки́, зача́ло 4.

По 50-мъ псалмѣ́ стихи́ра, гла́съ 5:

Пріиди́те, россíйстіи собо́ри, и отъ всѣ́хъ язы́къ, вѣ́рніи, собери́теся, на го́ру Поча́евскую взы́демъ и въ до́мъ Ма́тере Бо́жія, и у́зримъ мѣ́сто стопы́ Ея́, идѣ́же во о́гненнѣмъ столпѣ́ дре́вле яви́ся, и отъ исто́чника, отту́ду исте́кшего, вѣ́рою окропле́ніе пріи́мемъ, и чудотво́рнѣй ико́нѣ Ея́ поклони́мся, проще́нія прегрѣше́ній на́шихъ прося́ще и душа́мъ на́шимъ ве́лія ми́лости.

Кано́нъ, [его́же краегране́сіе: Богоро́дице Поча́евская, спаси́ и сохрани́ правосла́вную Ру́сь,] гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Бо́жію Ма́терь воспои́мъ, вѣ́рніи, моле́нія къ Не́й принося́ще и чудотво́рному Ея́ о́бразу покланя́ющеся вѣ́рою и любо́вію.

О, Влады́чице, убо́гія хвалы́ на́шея не отве́ржи и грѣхо́вныя нищеты́ не возгнуша́йся, но припа́дающія лю́ди пріими́, я́ко Блага́я, Блага́го же Роди́тельница.

Гора́ Поча́евская, пре́жде те́мная и безвѣ́стная, явле́ніемъ Твои́мъ, Влады́чице, Сина́ю уподо́бися: та́мо бо о́гнь, купину́ не паля́й, Тебе́ прообразова́ше, здѣ́ же Сама́, во огни́ зри́мая, христіа́номъ яви́лася еси́.

Очи ва́ши блаже́ни, о па́стыріе о́вчіи, Влады́чицу на горѣ́ Поча́евстѣй узрѣ́вшіи и тѣ́мъ ча́сти виѳлее́мскихъ па́стырей сподо́бльшіися. Тѣ́мже у́бо блаже́ни су́ть христіа́не, сего́ не ви́дѣвшіи, но вѣ́рою мѣ́сту тому́ покланя́ющіися.

Ро́ди россíйстіи и отъ вся́каго язы́ка вѣ́рніи, соше́дшеся къ мѣ́сту явле́нія Влады́чицы, чудотво́рному Ея́ о́бразу поклони́мся и о свои́хъ согрѣше́ніихъ воспла́чемъ, о милосе́рдіи же Госпо́дни возра́дуемся.

Огненный сто́лпъ, Влады́чице, Тебе́ и́нокомъ и па́стыремъ явля́ше, на́мъ же о́гнь ре́вности вложи́ въ ду́шу, е́же вѣ́ру и́стинную храни́ти, отъ вся́каго же глаго́ла ерети́ческаго отвраща́тися и грѣхо́вную отрѣва́ти пре́лесть отъ серде́цъ на́шихъ.

Катава́сія: Отве́рзу уста́ моя́...

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Да́ръ свяще́нный, страннопріи́мства мзду́, прія́тъ христолюби́вая Анна ико́ну Твою́, Влады́чице, руко́ю святи́теля, отъ нея́же исцѣле́ніе бра́ту своему́ слѣ́пу рожде́ну ви́дѣвши, сію́ во оби́тель Поча́евскую на о́бщую по́льзу да́рствуетъ.

Ико́ну Поча́евскую Пречи́стыя Богоро́дицы лобыза́имъ, вѣ́рніи, и, покая́ніе о грѣсѣ́хъ на́шихъ прине́сше, здра́вія, и отъ ну́ждъ избавле́нія, и во всѣ́хъ благи́хъ начина́ніихъ по́мощи отъ Влады́чицы воспро́симъ.

Цвѣ́тъ прекра́сный на дре́вѣ благосѣнноли́ственнѣмъ яви́ся чудотво́рная ико́на Богоро́дицы на святѣ́й горѣ́ Поча́евстѣй: проси́те, вѣ́рніи, и да́стся ва́мъ, по глаго́лу Христо́ву, милосе́рдія да́ръ, житію́ ва́шему потре́бный.

Еже вре́менному житію́ потре́бно быва́етъ, о бра́тіе, вма́лѣ поле́зно е́сть, и сія́ да́рствуетъ на́мъ Госпо́дь, по моли́твѣ Ма́тере Своея́. Оба́че терпя́щія па́че си́хъ блажи́тъ и вѣ́чною ра́достію на небеси́ награжда́етъ, ю́же на́мъ дарова́ти, Влады́чице, помоли́ся.

Поча́евская це́рковь, чудотво́рный слѣ́дъ стопы́ Твоея́, Богоро́дице, покрыва́ющая и ико́ну Твою́ храня́щая, а́ки небе́сный вхо́дъ вѣ́рнымъ явля́ется, въ не́йже моля́щимся помози́, о Влады́чице, земна́я попече́нія отложи́ти, и еди́наго, е́же на потре́бу, жела́ти, и въ моли́твѣ те́плѣ проси́ти.

Оле безу́мія иконобо́рцевъ, и́же ико́ну Твою́, Влады́чице, отъ Поча́евскія оби́тели плѣни́ша и, поруга́нію предаю́ще, ка́ру Бо́жію а́біе на ся́ наведо́ша, бѣснова́ніемъ же обличе́нѣ бы́вшей женѣ́, у́жасомъ мно́гимъ содержа́хуся.

Сѣда́ленъ, гла́съ 6:

Рѣка́, оби́льно теку́щая, поко́ю не навы́че, ниже́ преста́ти отъ тече́нія водна́го возмо́жетъ, та́ко и моле́нія Твоя́, Влады́чице, о лю́дехъ при́сно возноси́мая, не преста́ютъ, но пра́ведныя отъ паде́ній храня́тъ, па́дшія же на покая́ніе возставля́ютъ. На́мъ же, Твоему́ о́бразу покланя́ющимся, сугу́бую умиле́нія благода́ть да́руютъ и вопи́ти Тебѣ́ со арха́нгеломъ и Елисаве́тою воздвиза́ютъ: благослове́на Ты́ еси́ въ жена́хъ, и Твоего́ чре́ва Пло́дъ благослове́нъ е́сть.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Часу́ и дни́ прише́дшу возвраще́нія ико́ны Твоея́ во оби́тель Поча́евскую отъ иконобо́рцевъ, сію́ плѣни́вшихъ, возра́довася преподо́бный Іовъ со бра́тіею, ту́ю лобыза́юще; ны́нѣ же на вся́къ де́нь и ча́съ приходя́щіи во оби́тель Твою́ христіа́не ту́юже ра́дость и вѣ́ру предъ не́ю свидѣ́тельствуютъ.

Азъ, грѣ́шный, лѣ́ностію порабоще́нъ, о Влады́чице, блага́го Бо́га при́сно грѣхи́ свои́ми прогнѣвля́ю, ниже́ о́чи свои́ возвести́ къ Нему́ дерза́ю, но ко Твоему́ припа́даю чудотво́рному о́бразу, предъ ни́мже ка́ющіися проще́ніе отъ Тебе́ прія́ша, и вопію́: Го́спода, Сы́на Твоего́, уми́лостиви и мнѣ́ предста́тельствомъ Твои́мъ.

Еда́ обря́щется толи́ко окамене́нный се́рдцемъ и безу́менъ му́жъ, и́же не умили́тся, въ це́ркви Поча́евстѣй предстоя́й и святы́нямъ Твои́мъ, Влады́чице, покланя́яйся, чудеса́ же, отъ ни́хъ бы́вшая, помышля́яй и вѣ́рою моля́щіяся ви́дяй наро́ды?

Ви́дѣни бы́ша мно́зи, исцѣле́нніи предъ ико́ною Твое́ю, Влады́чице, слѣпíи и хро́міи, слы́шани бы́ша глусíи и нѣмíи, возглаго́лавшіи: та́мо бѣснíи, воды́ отъ стопы́ Твоея́ пію́ще, отъ бѣсо́въ свобожда́хуся. Тѣ́мже и мою́ пріими́ моли́тву, е́же отъ бѣсо́вскихъ страсте́й свободи́тися и свѣ́тъ спасе́нія Христо́ва вы́ну созерца́ти.

Сы́й во узи́лищи земли́ ту́рскія плѣне́нъ, и́нокъ Твое́ю си́лою, Влады́чице, на возду́сѣ въ го́ру Поча́евскую принесе́ся, у́бо и мене́, во у́захъ страсте́й су́ща, ны́нѣ, въ де́нь сла́вы Твоея́, отъ тѣ́хъ свободи́ и ли́ку вѣ́рою и любо́вію пою́щихъ Тя́ сопричти́.

Ко Твоему́ чудотво́рному о́бразу прите́къ, Влады́чице, и водо́ю отъ слѣ́да стопы́ Твоея́ омы́вся, сляче́нный неду́гомъ ю́ноша а́біе исцѣлѣ́, слѣпа́я же отрокови́ца, здѣ́ принесе́нная, прозрѣ́, и предъуме́рый младе́нецъ воскре́се, у́бо и мене́, припа́дающа, отъ смертоно́снаго уны́нія воздви́гни и душе́вныя мои́ отве́рзи о́чи.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Аще́ и всѣ́хъ грѣ́шнѣйшій е́смь отъ те́мъ люде́й, ко Твое́й, Влады́чице, ико́нѣ припа́дающихъ, а́ще и вси́ вѣ́рою свое́ю мя́ превзыдо́ша, оба́че и мене́, окая́ннаго, не отри́ни отъ Твоего́ заступле́нія, ми́лостей бе́здну лю́демъ во оби́тели Твое́й яви́вшая.

Якоже ко всѣ́мъ призыва́ющимъ Тя́ ми́лостива явля́ешися, издале́ча ико́нѣ Твое́й мы́сленно покланя́ющіяся слы́шиши, и та́ко о́трочища нѣ́коего, по моли́твѣ праба́бы его́, воскреси́ла еси́, и ны́нѣ, о Влады́чице, ко всѣ́мъ, отъ коне́цъ земли́ Тебѣ́ моля́щимся, благоувѣ́тлива бу́ди.

Се́, Влады́чице, люде́й мно́гая мно́жества, на святу́ю го́ру Твою́ притека́юще, ми́лости Твоея́ получи́ти и́щутъ, вѣ́рніи вку́пѣ съ маловѣ́рными, пра́ведніи и грѣ́шніи, съ ни́миже и Це́ркви святѣ́й чуждíи примета́ются, всѣ́хъ у́бо поми́луй, всѣ́мъ свѣ́тъ и́стинныя вѣ́ры яви́ во спасе́ніе.

Почто́ а́зъ, грѣ́шный, Пречи́стѣй Богома́тери покланя́яся и испра́вити житіе́ свое́ обѣщава́я, па́ки на пре́жняя прегрѣше́нія обраща́юся? Увы́ мнѣ́! еда́ злѣ́йшій е́смь невѣ́рныхъ ага́рянъ, и́же на горѣ́ Поча́евстѣй покая́ніе прине́сше, до́бріи христіа́не содѣ́яшася?

Аще и лю́ти бы́ша ага́ряне ту́рстіи, святу́ю оби́тель Твою́, Влады́чице, осажда́юще, а́ще и стрѣ́лы въ Тя́, на небеси́ я́вльшуюся, пуща́ти дерзну́ша, но си́мъ на главы́ и́хъ возвраща́ющимся, се́рдцемъ сокруше́ннымъ пока́яшася и си́лу Твою́ исповѣ́даша.

Со Іовомъ преподо́бнымъ на небесѣ́хъ Тебе́ зря́ще, Влады́чице, ага́ряномъ смяте́ннымъ и бѣжа́щимъ, и́ноцы Поча́евстіи пѣ́снь воспѣ́ша Ти́ досто́йную, со уго́дникомъ Тебе́ благодаря́ще те́плѣ.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Иже отъ ага́рянъ Тя́, Влады́чице, на небесѣ́хъ узрѣ́ша, дру́гъ дру́га вопроша́ху: что́ е́сть видѣ́ніе сіе́ ужа́сное? И о́ви, смяте́ни бы́вше, дру́гъ дру́га убива́ху, о́ви же, вѣ́ру въ се́рдце свое́ пріе́мше, креще́нія тре́боваху, по си́хъ же и́ноцы бы́ша чрезъ все́ житіе́, си́лу Твою́ воспѣва́юще.

Иноки и мірскíя лю́ди, Твоему́ заступле́нію вѣ́рующія, Влады́чице, обогати́ духо́вными дарова́ньми, маловѣ́рныя же просвѣти́ и озари́, я́коже тогда́ невѣ́дѣвшія Христа́ ага́ряны въ позна́ніе Его́ привела́ еси́.

Сохрани́ша па́мять Твоего́ заступле́нія, Влады́чице, ага́ряне, въ зе́млю ту́рскую возвра́щшеся, и ча́домъ свои́мъ о явле́ніи Твое́мъ па́мять преда́ша. Кольми́ па́че на́мъ, христіа́номъ, чудеса́ Твоя́, на горѣ́ Поча́евстѣй бы́вшая, па́мятовати подоба́етъ?

Образу Твоему́ мы́сленно припа́дая, во глубо́кій кла́дязь впады́й му́жъ отъ несумнѣ́нныя сме́рти спасе́ся и, невреди́мь изъ глубины́ подъя́тъ бы́въ, Твое́ проповѣ́даше милосе́рдіе.

Xотѣ́лъ бы́хъ и а́зъ, Влады́чице, вѣ́рѣ спасе́нныхъ Тобо́ю люде́й подража́ти, хотѣ́лъ бы́хъ и а́зъ Твое́ заступле́ніе въ житіи́ мое́мъ улучи́ти, но за мно́жество прегрѣше́ній мои́хъ оскудѣва́етъ моя́ вѣ́ра. Сію́ у́бо укрѣпи́ во мнѣ́, Влады́чице, вопію́щемъ: вѣ́рую, помози́ моему́ невѣ́рію.

Ро́въ прельще́ній лати́нскихъ чрезъ сто́ и де́сять лѣ́тъ поглоти́ оби́тель Поча́евскую, но Твои́мъ, Богоро́дице, заступле́ніемъ па́ки та́я къ высотѣ́ Правосла́вія изъе́млется и ла́вра имену́ется. Сію́ у́бо въ Правосла́внѣй вѣ́рѣ непоколеби́му соблюди́ да́же до часа́ втора́го прише́ствія Сы́на Твоего́ и Бо́га.

Конда́къ, гла́съ 1:

Исто́чникъ исцѣле́ній и вѣ́ры Правосла́вныя утвержде́ніе Поча́евская Твоя́ ико́на, Богоро́дице, яви́ся, тѣ́мже и на́съ, къ не́й притека́ющихъ, отъ бѣ́дъ и искуше́ній свободи́, ла́вру Твою́ невреди́му сохрани́, Правосла́віе во о́крестъ стоя́щихъ страна́хъ утверди́ и грѣхи́ разрѣши́ моли́твенникъ Твои́хъ: ели́ка бо хо́щеши, мо́жеши.

Икосъ:

Воста́ните отъ гро́бъ ва́шихъ, и́ноцы Поча́евстіи, и рцы́те на́мъ: коли́кихъ чуде́съ Пресвяты́я Богоро́дицы бы́сте зри́тели и свидѣ́тели, ка́ко ме́ртвіи предъ Тоя́ ико́ною воскреса́ху, ка́ко де́мони отъ му́чимыхъ люде́й отбѣга́ху, ка́ко неду́жніи та́мо исцѣля́хуся, ка́ко невѣ́рніи вѣ́роваху, ка́ко хули́тели та́мо ка́яхуся? Сія́ бо ди́вна быва́ху человѣ́комъ и а́нгеломъ. Мы́ же, вся́ сія́ бы́вшая и додне́сь быва́емая воспомина́юще, со стра́хомъ и умиле́ніемъ ко святѣ́й ико́нѣ Пречи́стыя Богома́тере моли́твенно припа́даемъ и глаго́лемъ си́це: О, ми́лостей бе́здно и благодѣя́ній сокро́вище, грѣхи́ разрѣши́ моли́твенникъ Твои́хъ: ели́ка бо хо́щеши, мо́жеши.

Пѣ́снь 7.

Ирмо́съ: Отъ Іуде́и доше́дше о́троцы, въ Вавило́нѣ иногда́ вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Ака́ѳистово пѣ́ніе возноша́ху предъ ико́ною Твое́ю, Пречи́стая, правосла́вніи лю́діе, егда́ оби́тель Поча́евская повелѣ́ніемъ царе́вымъ Це́ркви возвращена́ бы́сть, тѣ́мъ у́бо оставле́ніе грѣхо́въ испроси́, на́мъ же, моля́щимъ Ти ся, на враги́ посо́бствуй.

Никола́я Пе́рваго, Самоде́ржца, ду́шу упоко́ити моли́ся, Влады́чице, вку́пѣ же и всѣ́хъ, о возвраще́ніи ла́вры Твоея́ изъ ерети́ческаго плѣ́на потруди́вшихся, на́мъ же, къ Тебѣ́ прибѣга́ющимъ, пода́ждь единомы́сліе и ми́ръ.

И ны́нѣ держа́вствующему царю́ на́шему ми́лостива бу́ди, Влады́чице, и о Це́ркви ми́рная глаго́ли се́рдцу его́, покаря́ющи подъ но́зѣ его́ противобо́рствующыя враги́ и супоста́ты.

Предъ Твое́ю ико́ною, Богоро́дице, правосла́внымъ христіа́номъ возвраще́нною, па́ки исцѣле́нія пріима́ти вѣ́рніи навыко́ша: не у́ исте́кшу бо еди́ному лѣ́ту отъ того́ дне́, уже́ четы́рми чудесы́ Це́рковь Христо́ву просла́вила еси́ во утѣше́ніе лю́демъ.

Рая́ небе́снаго сподо́би ны́, Влады́чице, святу́ю ла́вру Твою́ а́ки земны́й ра́й почита́ющія и Твоя́ ми́лости те́плою вѣ́рою воспѣва́ющія.

Авраа́мъ Госпо́день де́нь издале́ча ви́дѣ, и ра́довася, и ча́яніемъ того́ дне́ живя́ше; узрѣ́вши же издале́ча Твою́ Поча́евскую це́рковь нѣ́кая хрома́я жена́ и упова́ніемъ Твоея́ по́мощи испо́лнившися, а́біе исцѣлѣ́ и, а́ки еле́нь, воспряну́вши, ко оби́тели Твое́й поспѣша́ше.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Во гра́дъ Кíевъ отъ предѣ́лъ Ура́льскихъ прише́дшей женѣ́ бѣ́снѣй яви́ся Богоро́дица со преподо́бнымъ Іовомъ, и на го́ру Поча́евскую ту́ю призыва́ше, идѣ́же здра́віе е́й пода́вши, сла́вити научи́ Свое́ заступле́ніе.

Омы́въ очеса́ своя́ въ купе́ли Силоа́мстѣй, пріе́млетъ слѣпорожде́нный зрѣ́ніе Христо́вымъ велѣ́ніемъ; омы́вшися же отъ воды́ стопны́я въ це́ркви Поча́евстѣй, исцѣлѣ́ слѣпа́я отрокови́ца. Убо и на́ше стра́стное ослѣпле́ніе исцѣли́, Влады́чице, водо́ю отъ слѣ́да стопы́ Твоея́ съ вѣ́рою кропя́щихся.

Сію́ отрокови́цу исцѣле́ну узрѣ́вши, праба́ба ея́ а́біе прельще́нія уни́тскаго отрица́ется и Правосла́вную исповѣ́дуетъ вѣ́ру, въ не́йже утверди́ и ны́, рабы́ Твоя́, о Влады́чице.

Лю́діе Бо́жіи, на го́ру Твою́, Влады́чице, притека́ющіи, обѣ́ты по́двигъ благочести́выхъ та́мо прино́сятъ, я́же дѣ́лы испо́лнити помози́ и́мъ, Богоро́дице.

Ангели на небеси́ Твою́ сла́ву непреста́нно воспѣва́ютъ, Богоро́дице, на земли́ же человѣ́цы ко Твоему́ заступле́нію притека́ти не престаю́тъ, и́хже воздыха́нія не отри́ни, я́ко Блага́я, па́че же на мѣ́стѣ явле́нія Твоего́ тѣ́хъ моле́нія услы́ши.

Ве́лія Твоего́ заступле́нія си́ла, о Влады́чице, его́же ра́ди Сы́нъ Тво́й и Бо́гъ на́шъ грѣ́шнымъ проще́ніе да́руетъ, подвиза́ющимся же крѣ́пость и уныва́ющимъ утѣше́ніе.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Не то́чію еди́нъ по еди́ному подвиза́ются христіа́не на го́ру Поча́евскую, но и отъ сугу́бо свяще́ннаго гра́да Кíева совоку́пльшеся вѣ́рніи, по́мощь отъ сея́ чудотво́рныя ико́ны въ годи́ну бы́вшего губи́тельства исповѣ́даша и, подо́біе ея́ написа́вше, во святу́ю ла́вру сіе́ принесо́ша.

Убо и во гряду́щая лѣ́та спаса́й на́съ, Влады́чице, отъ губи́тельства и междоусо́бныя бра́ни, отъ гла́да же и о́гненнаго запале́нія, зане́ оскудѣ́вшей крѣ́пости ду́шъ на́шихъ, уны́нія исполня́емся въ бѣда́хъ, неразу́мливи су́ще.

Южскій предѣ́лъ земли́ россíйскія Поча́евскую ико́ну Влады́чицы и святу́ю ла́вру Ея́, я́ко діади́му ца́рствія храни́тъ, и си́ми хва́лится; оба́че же и сѣ́верскій, во гра́дѣ Тобо́льстѣмъ, чудотво́рное подо́біе тоя́жде Поча́евскія ико́ны моли́твою и́ноковъ себѣ́ испроси́.

Ру́сскую зе́млю, о Влады́чице, я́ко безпредѣ́льное горы́ Твоея́ подно́жіе, отъ бѣ́дъ и искуше́ній свободи́ и во благоче́стіи ту́ю сохрани́ до сконча́нія вѣ́ка.

Уже́ несты́дно подня́вшимся ху́льнымъ гласо́мъ посредѣ́ христіа́нскаго жи́тельства, не оста́ви, Богоро́дице, ра́бъ Твои́хъ въ тѣ́хъ прельще́нія впа́сти, но вѣ́ру несумнѣ́нну возгрѣва́й въ сердца́хъ на́шихъ вы́ну.

Се́ вре́мя заступле́нія Пресвяты́я Богоро́дицы пріи́де, умно́жившимся собла́зномъ, се́ вре́мя на́шихъ къ Не́й воздыха́ній. О, бра́тіе! Рце́мъ у́бо отъ всего́ се́рдца на́шего: Влады́чице, Влады́чице! помози́ лю́демъ Твои́мъ.

Ексапостила́рій. Подо́бенъ: Черто́гъ Тво́й ви́жду.

Видѣ́ніе ди́вное: во огни́ Пресвята́я Дѣ́ва, чудеса́ же неисчи́слимая отъ ико́ны Поча́евскія на́мъ извѣсти́шася. Воспря́немъ у́бо, о лю́діе, отъ грѣхо́внаго сна́, исправле́нія житію́ на́шему со слеза́ми да про́симъ, и Ма́тери Бо́жіей съ вѣ́рою дне́сь поклони́мся.

На хвали́техъ стихи́ры на 4, гла́съ 4:

Воспои́мъ, лю́діе, Пресвяту́ю Дѣ́ву Чи́стую, на горѣ́ Поча́евстѣй дре́вле па́стыремъ я́вльшуюся, ны́нѣ же всю́ страну́ на́шу отту́ду благодѣ́ющую: вѣ́сть бо Влады́чица проше́нія на́ша во благо́е исполня́ти, и сердца́ на́ша умиле́ніемъ растворя́ти, и рабы́ Своя́ отъ бѣ́дъ и зо́лъ сохраня́ти. [Два́жды.]

Не возгнуша́йся на́съ, грѣ́шныхъ, Милосе́рдая Ма́ти, маловѣ́рія ра́ди на́шего отъ на́съ не отврати́ся, но па́че вѣ́ру на́шу благода́тною по́мощію Твое́ю умно́жи и же́ртву хвалы́ приноси́ти Тебѣ́ рабы́ Твоя́ научи́.

Слѣпы́я, и хромы́я, и сличе́нныя, ко Твое́й святѣ́й ико́нѣ припа́дающія, всемо́щнымъ дѣ́йствомъ Твоего́ предста́тельства исцѣли́ла еси́, Богоро́дице: бѣ́сы, люде́й му́чащія, отгна́ла еси́, Правосла́вную вѣ́ру ага́ряномъ и еретико́мъ откры́ла еси́. Убо и на́шихъ моле́ній не отри́ни, Пренепоро́чная, но я́же ко спасе́нію проше́нія на́ша испо́лни.

Сла́ва, и ны́нѣ, гла́съ 8:

О Твои́хъ зна́меніихъ, Богоро́дице Влады́чице, сла́вится гора́ Поча́евская, и вся́къ язы́къ христіа́нскій си́лу Твою́ исповѣ́дуетъ, и́хже ра́ди невѣ́рніи правовѣ́рни содѣ́яшася, грѣ́шніи въ покая́ніе пріидо́ша, лѣни́віи къ духо́вному дѣ́ланію устреми́шася. Имже и на́съ подража́ти, Блага́я, научи́, Тебе́ те́плѣ благодари́ти устро́й на́съ и воздви́гни вы́ну воспѣва́ти сла́ву Сы́на Твоего́, Еди́наго отъ Святы́я Тро́ицы сла́вимаго Бо́га на́шего.

Славосло́віе вели́кое, ектеніи́ и отпу́стъ.



НА ЛИТУРГИИ,

Блаже́нна, пѣ́снь 3-я и 6-я, на 8. По вхо́дѣ тропа́рь пра́здника. Сла́ва, и ны́нѣ, конда́къ. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, [се́ бо отны́нѣ ублажа́тъ Мя́ вси́ ро́ди]. Апо́столъ ко Евре́емъ, зача́ло 320. Аллилу́ія, гла́съ 2: Воскресни́, Го́споди, въ поко́й Тво́й, Ты́ и киво́тъ святы́ни Твоея́. Сти́хъ: Кля́тся Госпо́дь Дави́ду и́стиною и не отве́ржется ея́. Ева́нгеліе отъ Луки́, зача́ло 54. Прича́стенъ: Ча́шу спасе́нія пріиму́ и и́мя Госпо́дне призову́.


З р и́:   Слу́жбу сію́ пое́мъ Іу́лія въ 23-й де́нь, егда́ бы́сть видѣ́ніе Ма́тере Бо́жія надъ це́рковію Поча́евскою и ага́ряномъ пораже́ніе въ лѣ́то 1675. Быва́етъ же поклоне́ніе чудотво́рному о́бразу Поча́евскому въ пра́здникъ Рождества́ Пресвяты́я Богоро́дицы и поклоне́ніе слѣ́ду стопы́ Ея́ въ пято́къ Свѣ́тлыя седми́цы. Оба́че въ сія́ дни́ твори́мъ слу́жбу по мине́и пра́здничнѣй и по тріо́ди.

Источникъ: Минíя дополни́тельная. — СПб.: С.-Петербургская Сѵнодальная Типографія, 1909. — Л. 115-123 об.

/ Къ оглавленію раздѣла /


Наверхъ / Къ титульной страницѣ

0