Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 22-й де́нь.
Святы́я мѵроно́сицы и равноапо́стольныя Марíи Магдали́ны и возвраще́ніе моще́й свята́го священному́ченика Фо́ки.

[ВЕЧЕРЪ,
На Го́споди воззва́хъ:] стихи́ры святы́я, гла́съ 8. Подо́бенъ: О, пресла́внаго чудесе́!

Служа́щи, прехва́льная,* на́съ ра́ди по на́мъ бы́вшему Христу́ Бо́гу* и непреста́нными сія́ніи* ду́шу и мы́сль разже́гши,* свѣ́тъ была́ еси́.* Его́же ви́дѣвши, на Крестѣ́ ви́сяща, —* стра́нное видѣ́ніе, — глаго́лала еси́, слезя́щи, —* ка́ко Жи́знь сме́рть во́льную* ны́нѣ пріе́млетъ?

Па́мять твою́ свяще́нную соверша́емъ,* учи́вшаяся у Христа́* и Того́ повелѣ́нія* проповѣ́давшая, всесла́вная,* душа́мъ на избавле́ніе,* и моще́й твои́хъ ра́ку, Марíе,* вѣ́рою облобыза́емъ,* источа́ющую благода́ть неоску́дную и просвѣще́ніе* любо́вію притека́ющимъ, богоблаже́нная.

Ины стихи́ры свята́го, гла́съ 4. Подо́бенъ: Да́лъ еси́ зна́меніе.

Ве́сь возложи́лся еси́* тебе́ ра́ди Претерпѣ́вшему* спаси́тельную стра́сть,* са́мъ себе́, прехва́льне,* муче́нія кро́вію усе́рдно благоугоди́ти* и Тому́ прилѣпи́тися, о́тче, потща́лся еси́,* отсю́ду и просла́вился еси́,* и чуде́съ обогати́лся еси́ дѣ́йствомъ, прему́дре,* отъ Него́ вѣнча́емь.

Беззако́нныхъ шата́нія* и де́монская служе́нія* страда́ній тве́рдостію,* Фо́ко, низложи́лъ еси́,* Спа́са всѣ́хъ я́сно возвѣща́я,* и вѣ́рныхъ просвѣща́я мы́сли, богоблаже́нне,* и мра́къ отгоня́ и́дольскаго су́етства* просвѣще́ніемъ чуде́съ твои́хъ* и подвиго́въ свѣ́тлостію.

Приста́нище спаси́тельное,* бѣ́дствующіи, иму́ще тя́,* Фо́ко пресла́вне,* житія́ волна́ми, и глубино́ю прегрѣше́ній,* и печа́лей бу́рею одержи́ми,* мо́лимся вѣ́рно:* твои́ми моли́твами на́съ спаса́й* отъ вся́ческихъ обстоя́ній,* твою́ па́мять чту́щихъ,* моля́ Человѣколю́бца, и Влады́ку, и Го́спода.

Сла́ва, гла́съ 6. Анато́ліево:

Пе́рвѣе ви́дѣвши Боже́ственное Воскресе́ніе, Марíе Магдали́ни, Пе́рваго благи́хъ Вино́вника, на́ше благосе́рдно естество́ обожи́вшаго, пе́рвая и благовѣ́стница яви́лася еси́, вопію́щи апо́столомъ: печа́ль отложи́вше, благоду́шіе воспріими́те и пріиди́те, узри́те Христа́ воскре́сшаго и мíру подаю́щаго ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Все́ отло́жше.

Агнца своего́* Агница нескве́рная дре́вле* и непоро́чная Влады́чица* на дре́вѣ кре́стнѣмъ я́ко узрѣ́,* ма́терски восклица́ше* и, дивя́щися, вопія́ше:* Ча́до сладча́йшее,* что́ зрѣ́ніе сіе́* но́вое и пресла́вное?* Ка́ко со́нмъ безблагода́тный* суди́щу Пила́тову предаде́ Тя* и осужда́етъ на сме́рть Живота́ вся́ческихъ?* Но воспѣва́ю Твое́ неизрече́нное, Сло́ве, снизхожде́ніе.

На стихо́внѣ окто́иха. Сла́ва, гла́съ 8. Византíево:

Во́лею обнища́вшему нището́ю мое́ю, премно́гимъ благоутро́біемъ Христу́ Бо́гу, Магдали́ни Марíя, я́ко учени́ца вѣ́рно послужи́вши, на дре́вѣ просте́рта и во гро́бѣ затворе́на ви́дѣвши, вопія́ше, сле́зы точа́щи: что́ стра́нное видѣ́ніе? Иже ме́ртвыя Животворя́й, ка́ко ме́ртвъ вмѣня́ется? Кíя мѵ́ры принесу́ Измѣни́вшему мя́ смра́да де́монскаго? Кíя сле́зы пролію́ отъ сле́зъ Измѣни́вшему мою́ прама́терь? Но, о вся́ческихъ Царю́! Якоже вертогра́да храни́тель яви́лся еси́, росо́ю Твои́хъ глаго́лъ ва́ръ отъе́мъ, ре́къ къ не́й: къ Мои́мъ бра́тіямъ ше́дши, благовѣ́щенія ра́дость возопíй, восхожду́ бо ко Отцу́ и Бо́гу Моему́ и Бо́гу ва́шему, я́ко да пода́мъ мíру ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Тя ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, —* Ча́до сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ вся́ изба́вивый* милосе́рдіемъ Твои́мъ?

Тропа́рь святы́я, гла́съ 1:

Христу́, на́съ ра́ди отъ Дѣ́вы ро́ждшемуся, честна́я Магдали́на Марíя, послѣ́довала еси́, Того́ оправда́нія и зако́ны храня́щи. Тѣ́мже дне́сь всесвяту́ю твою́ па́мять пра́зднующе, грѣхо́въ разрѣше́ніе моли́твами твои́ми пріе́млемъ.

И свята́го, гла́съ 4:

И нра́вомъ прича́стникъ, и престо́ломъ намѣ́стникъ, апо́столомъ бы́въ, дѣя́ніе обрѣ́лъ еси́, богодохнове́нне, въ видѣ́нія восхо́дъ, сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Фо́ко, моли́ Христа́ Бо́га спасти́ся душа́мъ на́шимъ.


НА УТРЕНИ,
Кано́нъ окто́иха еди́нъ и святы́хъ два́.

Кано́нъ святы́я, творе́ніе Ѳеофа́ново, его́же краегране́сіе: Магдали́ну Марíю пою́ любо́вію. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Боже́ственными укра́шена добро́тами и свѣтоли́тіи сія́ющи Боже́ственными, очернѣ́вшее мое́ се́рдце твои́ми моли́твами, Марíе, озари́.

Освяти́ тя Сло́во Отчее, отъ духо́въ зло́бы изба́вивъ я́вѣ, Ему́же учени́ца бы́вши, дарова́ній Свята́го Ду́ха испо́лнилася еси́.

Во́дъ испо́лншися животво́рныхъ отъ исто́чника незави́стнаго, за милосе́рдіе на земли́ я́вльшагося Влады́ки, грѣха́ му́тныя изсуши́ла еси́ то́ки.

Богоро́диченъ: Ма́терь естество́мъ Содѣ́теля, пое́мъ Тя́, Отрокови́це, примири́вшую Бо́гу отпа́дшее естество́ человѣ́ческое, Богороди́тельнице Всенепоро́чная Влады́чице.

Инъ кано́нъ свята́го, гла́съ то́йже.
Пѣ́снь 1.

Ирмо́съ: Сокруши́вшему бра́ни мы́шцею Свое́ю и прове́дшему Изра́иля сквозѣ́ Чермно́е мо́ре, пои́мъ Ему́, я́ко Изба́вителю на́шему Бо́гу, я́ко просла́вися.

Свѣ́ту непристу́пному предстоя́, Фо́ко, просвѣти́ мо́й по́мыслъ, молю́ся, му́дре, и се́рдце, восхвали́ти дне́сь свято́е твое́ страда́ніе.

Украси́лся еси́ отъ дѣ́тска, боже́ственъ ра́зумъ, Фо́ко, имѣ́я, и благода́ти сподо́бився твори́ти зна́менія и отгоня́ти лука́выя ду́хи, прему́дре.

Испо́лненъ сы́й благода́ти, испо́лненъ ра́зума Бо́жія, имѣ́лъ еси́ живу́щую въ тебѣ́ Ду́ха Боже́ственнаго си́лу, богому́дре, Ея́же ра́ди, я́ко со́лнце, просія́лъ еси́, просвѣща́я вѣ́рныя.

Богоро́диченъ: Неискусому́жно во утро́бѣ Твое́й Невмѣсти́маго Бо́га имѣ́ла еси́ вмѣ́стна, Богороди́тельнице, нетѣ́сно, Его́же о на́съ, Богора́дованная, при́сно моли́.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Возлюби́вши пе́рвѣе благи́хъ Вино́вника, на́ше благосе́рдно естество́ обожи́вшаго, послѣ́довала еси́ Ему́ усе́рдно, Марíе, Того́ повину́вшися Боже́ственнымъ велѣ́ніемъ. [Два́жды.]

Рыда́ющи, гро́ба Изба́вителева дости́гла еси́, пе́рвѣе ви́дѣвши Боже́ственное, отрокови́це, Воскресе́ніе. Тѣ́мже благовѣ́стница яви́лася еси́, вопію́щи: Христо́съ воста́, рука́ми восплещи́те.

Богоро́диченъ: Спаса́етъ мя́ Сло́во вопло́щшееся, Пречи́стая, отъ Твои́хъ пречи́стыхъ крове́й, бога́тствомъ бла́гости разрѣша́я осужде́ніе пе́рваго паде́нія, Его́же непреста́нно моли́ спасти́ ста́до Твое́.

Инъ.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Свяще́нъ изъ мла́да ра́зумъ имѣ́лъ еси́ и да́же до ста́рости же и престарѣ́нія, богоно́се, Бо́гу угоди́лъ еси́, отту́ду сла́ву получи́лъ еси́.

Твоего́ вели́каго преще́нія, богоно́се, не терпѣ́, де́монъ, и́же въ корабли́, отбѣга́етъ, и Христо́съ велича́ется дѣ́лы твои́ми, чу́дне.

Иже во градѣ́хъ до́блести твоя́, по́двиги же, и тече́нія, и благодѣя́нія, кто́ досто́йно восхва́литъ, чу́дне, му́чениковъ украше́ніе и похвало́?

Богоро́диченъ: Яко вы́шши а́нгелъ, прія́ла еси́ въ ложесна́, Пречи́стая, Влады́ку а́нгеловъ и всея́ тва́ри, тѣ́мже Тя́ вѣ́рно почита́емъ.

Конда́къ свята́го, гла́съ 6. Подо́бенъ: Еже о на́съ.

Яко святи́тель принося́, о́тче, же́ртвы, на коне́цъ себе́ прине́слъ еси́ же́ртву жи́ву, свидѣ́тельствовавъ зако́нно о Христѣ́ Бо́зѣ, отъ а́нгелъ укрѣпля́емый, и сме́рть изволя́я, сы́й съ вопію́щими тебѣ́: пріиди́, Фо́ко, съ на́ми, и никто́же на ны́.

Икосъ:

Жи́зни небе́сныя жела́юще, пи́щу же на земли́ попира́юще, устнѣ́ очи́стимъ и язы́ки та́кожде, пѣ́нія и пѣ́сни я́ко плету́ще досто́йно Фо́кѣ свяще́ннику, и́бо, въ небе́сную две́рь вше́дъ, невозбра́нно обрѣ́те е́же вну́трь ше́ствіе и взира́етъ на Жела́емаго, отъ а́нгелъ сла́вима. Отту́ду бо и мо́жетъ о на́съ моли́ти еди́наго Ми́лостиваго, душе́вныхъ неду́говъ Цѣли́теля, я́ко му́ки прія́тъ за Него́. Воспое́мъ у́бо Того́, и возопіе́мъ Ему́: призира́я на ны́, пріиди́, Фо́ко, съ на́ми, и никто́же на ны́.

Сѣда́ленъ святы́я, гла́съ 8. Подо́бенъ: Прему́дрости.

Обнища́вшему Сло́ву премно́гимъ милосе́рдіемъ, Марíе Магдали́ни, я́вѣ я́ко учени́ца и́стинно послужи́ла еси́, зря́щи же Сего́, на Крестѣ́ вознесе́на и во гро́бѣ положе́на, рыда́ла еси́, слезя́щи. Тѣ́мже тя́ почита́емъ и твое́ соверша́емъ вѣ́рою торжество́, мѵроно́сице сла́вная, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, свята́го, гла́съ 4. Подо́бенъ: Ско́ро предвари́.

Наста́, празднолю́бцы, свѣ́тло торжество́, па́мять богому́драго и святи́теля Фо́ки, веселя́щи концы́, сія́ющи заря́ми чуде́съ въ мíрѣ, нося́щи человѣ́комъ неску́дную благода́ть: мо́лится бо Го́сподеви спасти́ ро́дъ на́шъ.

И ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее въ страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́, Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Безъ смуще́нія иму́щи мірска́го су́етства мы́сль, Прише́дшему мíръ ве́сь спасти́ отъ ле́сти послужи́ла еси́.

Мы́ющися слеза́ми, гро́ба живоно́снаго дости́гши, а́нгела узрѣ́ла еси́, возвѣща́юща Христо́во, Марíе, воскресе́ніе.

Се́рдце твое́ непоро́чное во оправда́ніихъ Христо́выхъ бы́сть, и Того́ еди́наго вожделѣ́ла еси́, Кра́снаго добро́тою, достосла́вная.

Богоро́диченъ: Дрема́ніемъ лѣ́ности мя́ со́нъ грѣхо́вный, Отрокови́це, пости́же, бо́дренною моли́твою Твое́ю возста́ви мя́ къ покая́нію.

Инъ.

Ирмо́съ: Услы́шахъ, Го́споди, слу́хъ Тво́й и убоя́хся, я́ко неизрече́ннымъ совѣ́томъ, Бо́гъ сы́й Присносу́щный, отъ Дѣ́вы прише́лъ еси́, вопло́щся. Сла́ва снизхожде́нію Твоему́, Христе́, сла́ва си́лѣ Твое́й.

Свѣти́льника тя́ сія́юща пра́вды зна́емъ, дѣ́лы и муче́ніемъ, при́сно свѣтолу́чными сія́ніи просвѣща́юща сердца́ вѣ́рныхъ и неду́говъ мглу́, сла́вне, отгоня́ща.

Красе́нъ въ добро́тахъ муче́нія, Фо́ко, яви́лся еси́: го́лубь бо Бо́жій на версѣ́ твое́мъ честнѣ́мъ сѣ́де, сказа́, му́дре, страсте́мъ прича́стнику бы́ти Ду́хомъ.

Окормле́ніе иму́щіи, и́же въ мо́ри, богоно́се, твою́ моли́тву при́сно тя́жкія бу́ри избавля́ются, пою́ще тебе́ ра́ди Подаю́щаго и́мъ избавле́ніе спаси́тельное.

Богоро́диченъ: Нескве́рная, Небла́зная, оскверне́нное мое́ се́рдце вре́дными помышле́ньми и преступле́ньми окаля́ное очи́сти Твои́ми къ Преблага́го Бо́га Боже́ственными утѣше́ніи.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Пра́баба, сію́ словесы́ прельсти́вшаго и изгна́вшаго отъ рая́ дре́вле, зря́щи нога́ми попира́ема чи́стыхъ же́нъ, нра́въ му́жескій стяжа́вшихъ, съ ни́ми вѣ́чно ра́дуется.

Уме́ршаго и во гро́бѣ Затворе́ннаго, всѣ́мъ жи́знь Вдыха́ющаго, уязвля́ема любо́вію, сла́дцѣй Его́ любви́ приноша́еши мѵ́ро, Магдали́на, честна́я Марíе, и сле́зныя пролива́еши арома́ты.

По стра́сти Боже́ственнѣй, по стра́шнѣмъ Спа́совѣ Вознесе́ніи, прехо́диши, сло́во всю́ду честно́е возвѣща́ющи и мно́ги уловля́ющи прельща́ющіяся невѣ́дѣніемъ, я́ко Сло́ва учени́ца сла́вная.

Богоро́диченъ: Избавля́етъ мя́, па́дшаго къ грѣхо́внымъ многоплете́ннымъ паде́жемъ, Иже изъ Тебе́ роди́тися благоизво́ливый за безмѣ́рную ми́лость, Пресвята́я Отрокови́це, Его́же умоли́ вся́каго вре́да изба́витися вѣ́рою пою́щимъ Тя́.

Инъ.

Ирмо́съ: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди ра́звѣ Тебе́ ино́го не вѣ́мы, и́мя Твое́ имену́емъ.

Якоже че́стенъ ка́мень, проходя́, преподо́бне, служа́щія ка́менію лю́ди къ Бо́жіей вѣ́рѣ приве́лъ еси́ словесы́ твои́ми и чуде́сными явле́ньми.

Преподо́бенъ въ преподо́бныхъ показа́лся еси́, сла́вне, и въ му́ченицѣхъ свѣ́телъ, чу́дно пострада́въ и борца́ побѣди́въ, Фо́ко чу́дне.

Воспѣ́ша а́нгельская во́инства, ви́дяще пострада́вша тя́, му́чениче, тве́рдо и безпло́тныя побѣжда́юща де́моны въ тлѣ́ннемъ твое́мъ, блаже́нне, тѣлеси́.

Богоро́диченъ: Спаси́ мя, волну́ющася житія́ страстьми́, Пречи́стая, и окорми́ къ ти́химъ безстра́стія приста́нищемъ, всѣ́хъ По́моще христіа́нъ, Богоблагода́тная.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Глаго́лъ твои́хъ ороше́ніе и печа́ли ва́ръ отъя́тъ ученико́въ, честна́я, я́коже возопи́ла еси́: Христо́съ воста́, Живо́тъ яви́ся, я́сное облиста́ Со́лнце. [Два́жды.]

Се́ твоя́ свѣтоза́рная па́мять возсія́, просвѣща́ющи вѣ́рныя, въ не́й пою́щія тя́, и тму́ отгоня́щи лука́выхъ бѣсо́въ искуше́нія, досточу́дная.

Богоро́диченъ: Свяще́нства мы́сленное и неприкоснове́нное очисти́лище, свѣ́щникъ свѣтови́дѣнъ яви́лася еси́, и мо́стъ къ Бо́гу преводя́й, исповѣ́дающимъ Тя́, Богоро́дицу, Пренепоро́чная.

Инъ.

Ирмо́съ: Якоже проро́ка изба́вилъ еси́ изъ глубины́ преиспо́днія, Христе́ Бо́же, и мене́ отъ грѣхо́въ мои́хъ изба́ви, я́ко Человѣколю́бецъ, и упра́ви живо́тъ мо́й, молю́ся.

Возвѣща́етъ ти́ хотя́щая бы́ти человѣ́ческимъ гла́сомъ, пресла́вне, ча́шу глаго́ля пи́ти тебѣ́ спаси́тельную, по́сланный ти́ го́лубь свы́ше.

По премно́гихъ по́тѣхъ, по болѣ́знехъ неизмѣ́рныхъ тѣ́ла, мечу́ святу́ю твою́ главу́ преклони́лъ еси́ и кровьми́ зе́млю освяти́лъ еси́.

Ме́ртвымъ ка́пищемъ не послужи́въ, пребога́те, сме́рть претерпѣ́лъ еси́ и живе́ши по сме́рти, сего́ ра́ди тя́, Фо́ко, ублажа́емъ.

Богоро́диченъ: Живы́й въ вы́шнихъ во святу́ю Твою́ утро́бу всели́ся, пло́ти подо́біемъ мíрови явля́яся, сего́ ра́ди Тя́, Чи́стая, сла́вимъ.

Конда́къ святы́я, гла́съ 3. Подо́бенъ: Дѣ́ва дне́сь.

Предстоя́щи, пресла́вная, у Креста́ Спа́сова со ины́ми мно́гими, и Ма́тери Госпо́дни состра́ждущи, и сле́зы точа́щи, сіе́ въ похвалу́ приноша́ше, глаго́лющи: что́ сіе́ е́сть стра́нное чу́до? Содержа́й всю́ тва́рь, пострада́ти изво́ли. Сла́ва держа́вѣ Твое́й.

Икосъ:

Влады́ка Христо́съ и Ца́рь созда́нія, не оста́вль небеса́, сни́де, я́коже изво́ли, и пло́ть тлѣ́нную воспрія́тъ во́лею. Его́же ви́дѣвши Ма́ти Непоро́чная, на Крестѣ́ пригвожда́ема, съ дѣ́вами честны́ми предстоя́щи и Магдали́на Марíя, пла́чущи. То́й бо, та́мо су́щей и теплѣ́йшую вѣ́ру показу́ющей при́сно, послѣ́доваше Христу́ и гро́бъ зря́ше, ожида́ющи и вопію́щи: пострада́ти изво́лилъ еси́, сла́ва держа́вѣ Твое́й.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Неду́ги отгна́ла еси́ разли́чныя, споспѣшеству́ющаго тебѣ́ Сло́ва иму́щи, Ему́же предстои́ши ны́нѣ, вопію́щи, мѵроно́сице: благослове́нъ еси́, Го́споди Бо́же, во вѣ́ки. [Два́жды.]

Еди́на ви́дѣла еси́ пре́жде инѣ́хъ, живота́ на́шего Христа воста́вша, вертогра́даря же Того́ непщева́ла еси́, вопію́щи: благослове́нъ еси́, Го́споди Бо́же, во вѣ́ки.

Богоро́диченъ: Уста́вила еси́ тече́ніе сме́ртное, Безсме́ртнаго Бо́га я́ко заче́нши и ро́ждши, Чи́стая, Ему́же вси́ пои́мъ: благослове́нъ еси́, Го́споди Бо́же, во вѣ́ки.

Инъ.

Ирмо́съ: Ангеломъ о́троки изъ огня́ спасы́й и гремя́щую пе́щь преложи́вый на ро́су, благослове́нъ еси́, Бо́же оте́цъ на́шихъ.

Проше́дъ сквозѣ́ пла́мень, я́коже три́ ю́ноши, неопале́нъ, му́чениче, пребы́лъ еси́ Христо́вою си́лою пожи́вшаго въ тебѣ́ па́че ума́.

Ты́, огне́мъ Боже́ственныя любве́, му́чениче, вну́трь распаля́емь, Фо́ко, огню́ ве́щному примѣша́яся, пребыва́еши, му́дре, неопали́мь.

Испещре́нъ Боже́ственными добро́тами я́звенными, къ Бо́гу восте́клъ еси́, твоему́ Подвигополо́жнику, побѣ́ды вѣне́цъ отъ Него́ пріе́мь.

Богоро́диченъ: Избавля́емы вся́каго осужде́нія, Дѣ́во, чу́днымъ Рождество́мъ Твои́мъ, гла́сы ра́достными пѣсносло́вимъ Тя́, Присноблаже́нная.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Свѣ́тло яви́ся житіе́ твое́, заря́ми облиста́, о Магдали́но! Добродѣ́тельныхъ дѣя́ній, боже́ственнаго проповѣ́данія, е́же къ Бо́жію манове́нію, и луча́ми я́же къ Зижди́телю любве́, Ему́же пое́ши со а́нгелы: свяще́нницы, по́йте, лю́діе, превозноси́те Его́ во вѣ́ки. [Два́жды.]

У Креста́ предстоя́ла еси́, зря́щи непра́ведное, сла́вная, заколе́ніе Себе́ излія́вшаго за неизрече́нную ми́лость, и, стена́ніи и слеза́ми облива́ема, — что́ стра́нное, — вопія́ла еси́, Марíе, — чу́до? Ка́ко умерщвля́ется и умира́етъ сме́рть умертви́вый, Живо́тъ сы́й естество́мъ?

Богоро́диченъ: Яко Бо́жію Ма́терь Тя́ единому́дренно сла́вимъ и тва́ри вы́шшую, Чи́стая, о Тебѣ́ бо осужде́ніе, е́же отъ Ада́ма, потреби́ся и отсту́пльшее присво́ися человѣ́ковъ существо́, пою́щее: свяще́нницы, благослови́те, лю́діе, превозноси́те Его́ во вѣ́ки.

Инъ.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Отъ пеле́нъ освяти́ тя всѣ́хъ Содѣ́тель Бо́гъ, и, въ мѣ́ру дости́гъ во́зраста страда́ній Христо́выхъ, пострада́лъ еси́, и побѣди́лъ еси́ нача́ла си́лы вра́жія, и вѣнцено́сецъ дости́глъ еси́ вы́шнихъ оби́телей жили́ще.

Ко́рмчія тя́ изря́дна призыва́ютъ при́сно пла́вающіи, му́чениче, и морски́хъ избавля́ются, му́дре, бѣ́дъ благопрія́тными твои́ми, сла́вне, моли́твами, воспѣва́юще всѣ́хъ Царя́, и Содѣ́теля, и Бо́га во вѣ́ки.

Яко а́гнца тя́ незло́бива, Госпо́дни врази́ умерщвля́ютъ, Фо́ко, во глубо́цѣй и честнѣ́й ста́рости, врага́, сла́вне, злу́ нача́льника, мече́мъ уморя́ющаго исповѣ́данія и дерзнове́нія твоего́ во вѣ́ки.

Богоро́диченъ: Очище́ніе была́ еси́ па́дшему на́шему тлѣ́нному естеству́, поро́ждши Агнца Бо́жія, взе́млющаго согрѣше́нія человѣ́ковъ коне́чнымъ милосе́рдіемъ, тѣ́мже Тя́ пое́мъ ра́достно, Дѣ́во Богоро́дице.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Къ Боже́ственнѣй преложи́лася еси́ ны́нѣ ра́дости, къ ра́йстѣй широтѣ́ простра́ннѣй, къ мы́сленнымъ и премíрнымъ оби́телемъ, идѣ́же преподо́бныхъ чи́нове, идѣ́же е́сть гла́съ чи́стъ свѣ́тло пра́зднующихъ, Марíе богоно́сная. Тѣ́мже тя́ вси́ ублажа́емъ.

Ничто́же предпочла́ еси́ су́щихъ на земли́ па́че любве́ Христа́ Бо́га, но Того́ еди́наго снѣда́ема добро́тами и непосре́дственно, всечестна́я, посыла́емыми луча́ми, стопа́мъ Сего́, вопія́ла еси́, послѣ́дующи: Тя́ велича́ю, Многоми́лостиве.

Обоже́ніе получи́вши боготво́рное, и пото́ка напи́вшися благода́ти, и мзды́ болѣ́зней пріе́мши богонача́льно, и апо́стольскимъ чино́мъ счета́ема, Магдали́но, учени́ца Сло́ва, любо́вію чту́щія тя́ твои́ми моли́твами сохрани́.

Богоро́диченъ: Яко Ма́ти пострада́вшаго за ны́, душетлѣ́нныхъ страсте́й мя́ изба́ви; я́ко Ми́лостива, разрѣши́ согрѣше́ній мои́хъ плени́цы; я́ко Блага́, ублажи́ ны́нѣ озло́бленную мою́ ду́шу бѣсо́вскими искуше́ніи, Дѣ́во Богоро́дице, да пою́ Тя, Всепѣ́тую.

Инъ.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Яко не́бо звѣ́здно, біе́ній добро́тами чуде́съ, му́чениче, позна́лся еси́, Фо́ко, просвѣща́я при́сно подсо́лнечную и рѣша́ тму́ страсте́й и вся́каго злоче́стія, сего́ ра́ди вѣ́рою тя́ воспѣва́емъ.

Ты́ тѣ́сный ше́ствовалъ еси́ на земли́, му́чениче, пу́ть, наде́ждами вѣ́чнующихъ красо́тъ, Фо́ко, благоче́стно разширя́яся, и вся́ утѣсни́лъ еси́ вра́жія лю́тая кова́рства.

Свяще́нное торжество́ и честны́й тво́й пра́здникъ ны́нѣ наста́, нося́щь на́мъ ра́дость соверше́ну. Въ се́й сла́вятся твоя́ до́блести вои́стинну, и боре́нія, въ не́йже помина́й на́съ, страстоно́сче и му́чениче.

Богоро́диченъ: Но́сиши Мое́ подо́біе, Оте́ческій имѣ́я зра́къ, о Сы́не Мо́й! Хо́щеши бо земны́хъ лю́тое я́вѣ безобра́зіе исцѣли́ти, — вопія́ше Пречи́стая, рука́ми Христа́ нося́щи, Юже пѣсносло́вимъ гла́сы немо́лчными.

Свѣти́ленъ. Подо́бенъ: Свѣ́те неизмѣ́нный.

Со́лнце незаходи́мое, отрокови́це, е́же отъ Отца́ пре́жде вѣ́къ возсія́вшее, во гро́бѣ евре́йскій со́нмъ запеча́та, но воскре́сшаго ви́дѣла еси́ пе́рвѣе, Марíе, и ученико́мъ возвѣсти́ла еси́.

Сла́ва, свята́го:

Святи́телей украше́ніе, и ни́щихъ засту́пникъ ты́ яви́лся еси́, богому́дре о́тче, и сто́лпъ добродѣ́телей, тѣ́мже помина́й вся́, пою́щія тя́, Фо́ко.

Богоро́диченъ:

Даніи́лъ преднапису́етъ Тя́ несѣко́мую го́ру, изъ нея́же честны́й Ка́мень отсѣче́ся и истни́ и́дольскія хра́мы, Богороди́тельнице Марíе.

На стихо́внѣ окто́иха. Сла́ва, гла́съ 4:

Отъ младе́нства бы́лъ еси́ Го́сподеви рачи́тель, Фо́ко всеблаже́нне му́дре, и́бо ору́жіе Креста́ на ра́мо взе́мъ, неукло́нно ше́ствовалъ еси́ путе́мъ и́стины, и́мже а́нгеломъ люби́мь бы́лъ еси́, бѣсо́мъ сопроти́вникъ, и мíрови моли́твенникъ я́влься изря́денъ.

И ны́нѣ, гла́съ 8:

Во́лею обнища́вшему нището́ю мое́ю, премно́гимъ благоутро́біемъ Христу́ Бо́гу, Магдали́на Марíя, я́ко учени́ца вѣ́рно послужи́вши, на дре́вѣ просте́рта и во гро́бѣ затворе́на ви́дѣвши, вопія́ше, сле́зы точа́щи: что́ стра́нное видѣ́ніе? Иже ме́ртвыя Животворя́й, ка́ко ме́ртвъ вмѣня́ется? Кíя мѵ́ры принесу́ Измѣни́вшему мя́ смра́да де́монскаго? Кíя сле́зы пролію́ отъ сле́зъ Измѣни́вшему мою́ прама́терь? Но, о вся́ческихъ Царю́! Якоже вертогра́да храни́тель яви́лся еси́, росо́ю Твои́хъ глаго́лъ ва́ръ отъе́млеши, ре́къ къ не́й: къ Мои́мъ бра́тіямъ ше́дши, благовѣ́щенія ра́дость возопíй, восхожду́ бо ко Отцу́ и Бо́гу Моему́ и Бо́гу ва́шему, я́ко да пода́мъ мíрови ве́лію ми́лость.


НА ЛИТУРГІИ,

Блаже́нна окто́иха, и святы́я пѣ́снь 3-я, на 4. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 141. Аллилу́ія, гла́съ 1: Терпя́ потерпѣ́хъ Го́спода, и вня́тъ ми́ [и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Луки́, зача́ло 34. Прича́стенъ: Ра́дуйтеся пра́ведніи [о Го́сподѣ, пра́вымъ подоба́етъ похвала́.]

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 195 – 202 об.

/ Къ оглавленію раздѣла /


Наверхъ / Къ титульной страницѣ

0