Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ въ 21-й де́нь.
Обрѣ́теніе честны́хъ моще́й святы́я преподо́бныя благовѣ́рныя вели́кія княги́ни и́нокини Анны, Ка́шинскія чудотво́рицы.
[Слу́жбу ея́ зри́ мѣ́сяца Іу́нія въ 12-й де́нь, на пренесе́ніе честны́хъ моще́й ея́.]

Тропа́рь, гла́съ 4:

Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Кано́нъ преподо́бной благовѣ́рной вели́кой княги́нѣ Аннѣ Ка́шинской на обрѣ́теніе честны́хъ моще́й ея́. Гла́съ 5.
Пѣ́снь 1.

Ирмо́съ: Спаси́телю Бо́гу, въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися.

Припѣ́въ: Преподо́бная ма́ти, благовѣ́рная княги́не Анно, моли́ Бо́га о на́съ.

Агнче Бо́жій, Сло́ве, да́ждь ми́ сло́во, недосто́йному рабу́ Твоему́, да возмогу́ воспѣ́ти торжество́ въ па́мять обрѣ́тенія моще́й преподо́бныя благовѣ́рныя княги́ни Анны, взыва́я: Тому́ Еди́ному пои́мъ, я́ко просла́вися.

Безвѣ́стная и та́йная, послѣ́днему ро́ду, явле́ны бы́ша честны́я мо́щи твоя́, блаже́нная Анно, къ ни́мже прикаса́ющеся, освяще́ніе пріе́млемъ, Го́сподеви пою́ще: Тому́ Еди́ному пои́мъ, я́ко просла́вися.

Всесвята́я твоя́ па́мять возсія́ мíрови, я́ко со́лнце, просвѣща́етъ ду́ши благоче́стно пою́щихъ тя́, въ не́йже моли́ся, преподо́бная Анно, пода́ти очище́ніе грѣхо́въ Го́сподеви зову́щимъ: Тому́ Еди́ному пои́мъ, я́ко просла́вися.

Богоро́диченъ: Господороди́тельнице Чи́стая, небе́сный вхо́де, горо́ несѣко́мая, две́рь непроходи́мая, апо́столомъ сла́во, му́ченикомъ весе́ліе, преподо́бнымъ красото́, пріими́ моле́ніе на́ше, е́же Ти́ прино́симъ въ па́мять богому́дрыя Анны, Го́сподеви пою́ще: Тому́ Еди́ному пои́мъ, я́ко просла́вися.

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, еди́не Бла́же и Человѣколю́бче.

Дне́сь пра́зднственный де́нь пра́зднуютъ наро́ди гра́да Ка́шина, обрѣто́ша бо мо́щи преподо́бныя вели́кія княги́ни Анны цѣ́лы и нетлѣ́нны, я́ко нѣ́кое сокро́вище бога́тно, непреста́нно Христу́ зову́ще: Це́рковь Твою́ утверди́, еди́не Бла́же и Человѣколю́бче.

Еди́ну добро́ту Христо́ву Боже́ственну возлюби́вши и Того́ распа́льшися невеще́ственными красота́ми, добро́ты тѣле́сныя не щади́ла еси́, сла́вная, видѣ́ніи Боже́ственными пребыва́ющи и непреста́нно Христу́ зову́щи: Це́рковь Твою́ утверди́, еди́не Бла́же и Человѣколю́бче.

Житіе́ твое́, я́ко со́лнце, въ сердца́ вѣ́рныхъ возсія́, зари́ чуде́съ испуща́юще. Тѣ́мже и на́съ невече́рнимъ свѣ́томъ озари́, всечестно́е твое́ обрѣ́теніе почита́ющихъ, да непреста́нно Христу́ зове́мъ: Це́рковь Твою́ утверди́, еди́не Бла́же и Человѣколю́бче.

Богоро́диченъ: Зѣло́ лю́тѣ погружа́емую ду́шу мою́ въ пучи́нѣ жите́йскихъ страсте́й и бу́рею одержи́мую безмѣ́рныхъ согрѣше́ній изведи́ изъ глубины́ зо́лъ мои́хъ, спасе́нія ми́ простри́ ру́ку, Пречи́стая.

Сѣда́ленъ, гла́съ 5:

Пресвѣ́тлая и свѣтоно́сная приспѣ́ твоя́ па́мять, преподо́бная ма́ти, богому́драя Анно, созыва́ющи вѣ́рныхъ мно́жество просла́вити и пѣ́ти твое́ честно́е обрѣ́теніе. Проси́ на́мъ отъ Христа́ прія́ти ве́лію ми́лость. [Два́жды.]

Сла́ва, и ны́нѣ, богоро́диченъ:

Яви́лася еси́ вы́шши небе́сныхъ си́лъ, Влады́ку и Христа́ ро́ждши, Богоро́дице, земны́хъ естество́ возвела́ еси́, Богоневѣ́стная. Тѣ́мже Тя́ вои́стинну, Богороди́тельнице, се́рдцемъ и душе́ю вѣ́рно сла́вимъ.

Пѣ́снь 4.

Ирмо́съ: Дѣла́ смотре́нія Твоего́, Го́споди, ужаси́ша проро́ка Авваку́ма, изше́лъ бо еси́ на спасе́ніе люде́й Твои́хъ, спасти́ пома́занныя Твоя́ прише́лъ еси́.

Земленíи бо есмы́ и пе́рстніи человѣ́цы, вѣ́рно припа́даемъ къ пречестны́мъ моще́мъ твои́мъ, преподо́бная ма́ти Анно, прося́ще отпуще́нія грѣхо́въ. Моли́ся о вѣ́рно пра́зднующихъ твое́ честно́е обрѣ́теніе.

Иже кре́стъ взе́мши, блаже́нная, жела́емаго оте́чества, го́рняго Іерусали́ма, дости́же и въ не́мъ со а́нгелы лику́еши, богому́драя Анно. Моли́ о чту́щихъ честны́хъ моще́й твои́хъ обрѣ́теніе.

Ны́нѣ на небесѣ́хъ съ пра́ведными весели́шися, преподо́бная ма́ти Анно. Съ ни́ми же моли́ся, Христо́ви предстоя́щи, ми́ръ мíрови дарова́ти, и Благочести́вому Импера́тору на́шему [и́мярекъ] здра́віе и на враги́ побѣ́ду и всѣ́мъ скорбя́щимъ утѣше́ніе.

Богоро́диченъ: Кто́ не удиви́тся, или́ кто́ не почуди́тся человѣколю́бію Бо́жію? Сше́дъ бо съ небесе́ и воплоти́ся на́съ ра́ди изъ Тебе́ безъ отца́, еди́на Всепѣ́тая, Его́же моли́ изба́витися рабо́мъ Твои́мъ отъ вся́кія ско́рби.

Пѣ́снь 5.

Ирмо́съ: Окая́нную ду́шу мою́, нощеборю́щуюся со тмо́ю страсте́й, предвари́въ, уще́дри и возсія́й мы́сленное со́лнце днесвѣ́тлыя звѣзды́ во мнѣ́, во е́же раздѣли́ти но́щь отъ свѣ́та.

О любо́вію чту́щихъ твои́хъ честны́хъ моще́й обрѣ́теніе, богому́драя Анно, не преста́й моля́щися Христу́ Бо́гу, да пріи́мемъ грѣхо́въ просты́ню и да озари́тъ на́съ въ нощи́ свѣ́тъ.

Мно́жество наро́да христоимени́тыхъ люде́й, соше́дшеся дне́сь въ твое́ обрѣ́теніе, преподо́бная Анно, прикаса́ющеся ра́цѣ моще́й твои́хъ, отъ ни́хъ исцѣле́ніе почерпа́емъ, непреста́нно Христу́ зову́ще: да озари́тъ на́съ въ нощи́ свѣ́тъ.

Не то́кмо въ житіи́ твое́мъ, но и по сме́рти мно́гая чудеса́ отъ честны́я твоея́ ра́ки содѣва́ются приходя́щимъ съ вѣ́рою, всеблаже́нная Анно, неду́ги бо прогоня́еши и отъ бѣ́дъ избавля́еши си́лою Христо́вою, къ Нему́ же непреста́нно зове́мъ: да озари́тъ на́съ въ нощи́ свѣ́тъ.

Богоро́диченъ: Вра́гъ вселука́вый по вся́ дни́ къ го́ршимъ влече́тъ мя́, и въ ро́въ поги́бели влага́етъ, и во отча́яніе мя́ влече́тъ. Но того́ мя́ ловле́нія, Чи́стая, исхити́, и твори́ти во́лю Боже́ственную Сы́на Твоего́ и Бо́га на́шего наста́ви, и въ ча́съ стра́шнаго прише́ствія Его́ изба́ви мя́ вся́каго осужде́нія.

Пѣ́снь 6.

Ирмо́съ: Обы́де мя́ бе́здна, гро́бъ мнѣ́ ки́тъ бы́сть, а́зъ же возопи́хъ къ Тебѣ́, Человѣколю́бцу, и спасе́ мя десни́ца Твоя́, Го́споди.

Пріиди́те, собери́теся, христоимени́тіи наро́ди, свѣ́тло пра́зднуимъ обрѣ́теніе честны́хъ моще́й богому́дрыя Анны. Мо́литъ бо ся ко Влады́цѣ и Бо́гу на́шему, да изба́витъ на́съ отъ вся́каго озлобле́нія. Къ Нему́ же, воспѣва́юще, глаго́лемъ: спасе́ на́съ десни́ца Твоя́, Го́споди.

Ра́ка моще́й твои́хъ, преподо́бная ма́ти Анно, дража́йши сапфи́ра показа́ся, чудотвори́ва бо бѣ́, исцѣле́нія источа́ющи, ю́же облобыза́юще, вѣ́рніи, ра́достно отъ души́ Христу́ зове́мъ: спасе́ на́съ десни́ца Твоя́, Го́споди.

Свѣ́тлыми сія́ніи обрѣто́шася честны́я твоя́ мо́щи на версѣ́ земнѣ́мъ, въ ра́цѣ ка́меннѣ, преподо́бная ма́ти, княги́не Анно. Отъ мно́гъ бо лѣ́тъ сокрове́ны бы́ша, ны́нѣ же на́мъ яви́шася я́ко заря́ пресвѣ́тлая, просвѣща́ютъ и освяща́ютъ чту́щихъ тя́ вѣ́рно и ра́достно отъ души́ Христу́ зову́щихъ: спасе́ на́съ десни́ца Твоя́, Го́споди.

Богоро́диченъ: Тебе́, Чи́стую Дѣ́ву, Нескве́рную, еди́ну и́мамъ стѣ́ну непреобори́му, и прибѣ́жище, и покро́въ крѣ́покъ, и ору́жіе спасе́нія, да мя́ не пре́зриши, окая́ннаго, наде́ждо ненаде́жнымъ, скорбя́щимъ ра́досте и заступле́ніе.

Конда́къ, гла́съ 8. Подо́бенъ: Взбра́нной.

Скоропослу́шную помо́щницу вси́, су́щіи въ бѣда́хъ, благоче́стно воспое́мъ, Анну святу́ю, дне́сь любо́вію соше́дшеся во обрѣ́теніе честны́хъ моще́й ея́. Воспое́мъ пѣ́снь Еди́ному въ Тро́ицѣ Бо́гу, ра́дующеся, сподо́бльшему на́съ ви́дѣти пречестно́е сокро́вище честны́хъ моще́й ея́: отъ мно́гъ бо лѣ́тъ сокрове́нны бы́ша, напослѣ́докъ же на́мъ явле́нны и источа́ютъ мно́га и разли́чна исцѣле́нія. Яко да моли́твами ея́ къ Бо́гу отъ вся́кихъ находя́щихъ зо́лъ изба́вимся, ра́достною душе́ю и весе́ліемъ се́рдца благода́рная воспое́мъ, глаго́люще: ра́дуйся, утвержде́ніе гра́ду на́шему.

Икосъ:

Ангельскимъ на земли́ житіе́мъ показа́ся, а́нгелы удиви́ла еси́, бѣ́сы же устраши́ла еси́ и человѣ́ки просвѣти́ла еси́ заря́ми чуде́съ твои́хъ, преподо́бная ма́ти, благовѣ́рная вели́кая княги́не Анно. И ны́нѣ на́съ вразуми́ воспѣва́ти ти́ пѣ́снь къ твоему́ хвале́нію ра́достнымъ гла́сомъ, си́це глаго́лющихъ: ра́дуйся, я́ко оста́вила еси́ тлѣ́нное мудрова́ніе и воспрія́ла еси́ нетлѣ́нный вѣне́цъ; ра́дуйся, терпѣли́вая душе́ю, я́же злоко́зненнаго врага́ подъ нога́ма сте́рла еси́; ра́дуйся, я́ко ни́жнее мудрова́ніе оста́вила еси́ и вы́шняго Ца́рствія дости́гла еси́; ра́дуйся, я́ко па́че естества́ человѣ́ча честна́я ра́ка моще́й твои́хъ изъ землены́хъ нѣ́дръ изда́вшися и ста́ на версѣ́ земне́мъ; ра́дуйся, цѣли́тельнице болѣ́знемъ и отгони́тельнице страсте́мъ; ра́дуйся, богому́драя Анно, утвержде́ніе гра́ду на́шему.

Пѣ́снь 7.

Ирмо́съ: Огня́ гаси́лище — отроко́въ моли́тва, ороша́ющая пе́щь, проповѣ́дница чудесе́, не опаля́ющи, ниже́ сожига́ющи пѣсносло́вцы Бо́га оте́цъ на́шихъ.

Уста́ви ны́нѣшнюю бу́рю, обдержа́щую на́съ, преподо́бная, и укроти́ моли́твами твои́ми, и ва́рварское нахожде́ніе низложи́, и на́съ, ра́бъ твои́хъ, на супоста́ты укрѣпи́, Благовѣ́рному же Импера́тору на́шему побѣ́ды да́руй, да, ра́дующеся, пои́мъ Бо́га оте́цъ на́шихъ.

Фарисе́йски не лицемѣ́руемъ, но, со смире́ніемъ и ра́достію прикаса́ющеся честнѣ́й ра́цѣ твое́й, богому́драя Анно, про́симъ проще́нія грѣхо́въ, пѣсносло́вяще Бо́га оте́цъ на́шихъ.

Храни́тельница бу́ди гра́ду твоему́ и всѣ́мъ христоимени́тымъ лю́демъ, преподо́бная ма́ти Анно. Сохраня́й отъ пога́ныхъ наше́ствія и междоусо́бныя бра́ни, гла́да же и па́губы, да моли́твами твои́ми изба́вльшеся, Христу́ зове́мъ, пѣсносло́вяще Бо́га оте́цъ на́шихъ.

Богоро́диченъ: Отча́явшимся ве́ліе прибѣ́жище, обурева́емымъ ти́хое приста́нище еси́, Богоро́дице. Тѣ́мже и мы́, припа́дающіи, да не постыди́мся, Ма́ти Истиннаго Живота́, Тебе́ благодаря́ще и пою́ще: благослове́нна Ты́ въ жена́хъ еси́, Пренепоро́чная Влады́чице.

Пѣ́снь 8.

Ирмо́съ: Ороси́вшаго пе́щь и о́троки Сохра́ншаго посредѣ́ горя́щаго пла́мене, о́троцы, славосло́вите, свяще́нницы, благослови́те, лю́діе, превозноси́те во вся́ вѣ́ки.

Царю́ Христу́ въ небе́снѣмъ черто́зѣ предстои́ши съ му́дрыми дѣ́вами, помина́й на́съ, чту́щихъ честны́хъ моще́й твои́хъ обрѣ́теніе, и избавля́й на́съ отъ вся́кія ну́жды и печа́ли, да, ра́дующеся, Христу́ зове́мъ: лю́діе, превозноси́те Его́ во вся́ вѣ́ки.

Чудесе́мъ исто́чникъ ра́ка твоя́ яви́ся, преподо́бная ма́ти Анно, отъ нея́же оби́льно вси́ притека́ющіи пріе́млютъ тѣлесе́мъ здра́віе и душа́мъ спасе́ніе твои́ми моли́твами, тѣ́мже, ра́дующеся, Христу́ зове́мъ: лю́діе, превозноси́те Его́ во вся́ вѣ́ки.

Ше́ствіе твое́ до́бре сконча́ла еси́ и мірскíй мяте́жъ, а́ки безбу́рное приста́нище, преплы́ла еси́, пло́ть твою́ ду́хови повину́ла еси́. И ны́нѣ на небесѣ́хъ предстои́ши всѣ́хъ Царю́ Христу́, Ему́же зове́мъ: лю́діе, превозноси́те Его́ во вся́ вѣ́ки.

Богоро́диченъ: Ще́драго и Человѣколюби́ваго Спа́са поро́ждши, Чи́стая, Того́ моли́ уще́дрити раба́ Твоего́ и къ покая́нія пути́ наста́вити, лука́ваго собла́зны отъ се́рдца моего́ отжени́ и того́ ловле́нія, я́ко да непреста́нно пою́ Тя́, Чи́стую, во вся́ вѣ́ки.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Исто́чникъ, исцѣле́нія испуща́я, врачева́ніе же безме́здно и ковче́гъ свяще́нія твои́хъ моще́й ра́ка яви́ся, изъ нея́же почерпа́емъ здра́віе присноживо́тное, притека́ющіи вѣ́рно, преподо́бная Анно, и Иже тебе́ Дарова́вшаго въ пѣ́снехъ велича́емъ.

Возвели́чила еси́ на земли́ твоего́ Влады́ку, тѣ́мъ и во обрѣ́теніи честны́хъ моще́й твои́хъ глубину́ чуде́съ показа́ла еси́ и струю́ неоскудѣва́емую ра́ку моще́й твои́хъ, преподо́бная Анно. Слѣпы́мъ е́же ви́дѣти дарова́ся, прокаже́ннымъ очище́ніе, и одержи́мыя нечи́стыми ду́хи цѣлому́дрены твори́ши. Тѣ́мже тя́ велича́емъ.

Недосто́йною мое́ю руко́ю принесо́хъ ти́ таково́е сло́во изви́тія, богому́драя Анно, не пре́зри, но пріими́ сіе́ съ любо́вію и моли́ за мя́ Творца́ твоего́, Влады́ку и Го́спода, та́мошняго мя́ изба́вити муче́нія и ми́лость обрѣсти́ ми въ де́нь стра́шнаго испыта́нія.

Богоро́диченъ: Влады́чице мíра, Богоро́дице, и́же во глубинѣ́ зо́лъ поги́бели мене́ погруже́ннаго злоу́мными сластьми́ плотски́ми и пристра́стіемъ веще́мъ житія́, изведи́, Пречи́стая Дѣ́во, Свои́мъ милосе́рдіемъ, и́бо не и́мамъ наде́жды, ве́сь бо е́смь, Чи́стая, во отча́яніи, да Тя́ непреста́нно велича́ю.

Свѣти́ленъ. Подо́бенъ: Жены́, услы́шите.

Якоже со́лнце облиста́ющи, чудеса́ испуща́еши, просвѣща́ющи вѣ́рныхъ сердца́, и́же твое́ сла́вное обрѣ́теніе вѣ́рно творя́щія спаса́й, преподо́бная ма́ти Анно. [Два́жды.]

Сла́ва, и ны́нѣ, богоро́диченъ:

Тя́ Предста́тельницу и́мамы, грѣ́шніи, о Пресвята́я Дѣ́во. Ты́ благопремѣ́нна сотвори́ Сы́на Твоего́ и Бо́га на́шего Ма́терними Твои́ми моли́твами.

Источникъ: Мине́я Ию́ль. Ча́сть втора́я. — М.: Издательскій совѣтъ Русской Православной Церкви, 2002. — С. 475-482.

Свѣрено съ изданіемъ: Слу́жба, житіе́ и чюдеса́ преподо́бныя благовѣ́рныя вели́кія княги́ни и́нокини Анны Ка́шинскія. — М.: Въ Тѵпогра́фіи единовѣ́рцевъ, при Свя́то-Тро́ицко-Введе́нской це́ркви, 1909. — Л. 20 об. – 28 об.

/ Къ оглавленію раздѣла /


Наверхъ / Къ титульной страницѣ

0