Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 21-й де́нь.
Преподо́бныхъ оте́цъ на́шихъ Симео́на, Христа́ ра́ди юро́диваго, и Іоа́нна, спо́стника его́, и свята́го проро́ка Іезекíиля.

[ВЕЧЕРЪ,
На Го́споди, воззва́хъ:] стихи́ры преподо́бныхъ, гла́съ 4. Подо́бенъ: Да́лъ еси́ зна́меніе.

Бу́ими притворе́ніи* мудреца́ зло́бы обезу́милъ еси́, блаже́нне,* соверша́я пресла́вная,* дѣ́йствуя зна́менія,* де́моны отгоня́,* просвѣща́я су́щія въ нощи́ грѣхо́внѣй, о́тче.* И у́мъ несмуще́нъ* посредѣ́ пли́щей соблю́лъ еси́, Симео́не,* безстра́стіе отъ Бо́га пріе́мь.

Смире́нъ мудрова́ніемъ, и ми́лостивъ,* и боголюби́въ, и любве́ испо́лненъ* яви́лся еси́, богодохнове́нне,* умиле́нъ и кро́токъ,* я́коже а́нгелъ, по земли́ обходя́* и житіе́ имѣ́я небе́сное,* тѣ́мже почи́ на тебѣ́,* я́коже на чистотѣ́, блаже́нне Симео́не,* Оте́цъ, и Сы́нъ, и Ду́хъ Святы́й.

Ины стихи́ры проро́ка, гла́съ 8. Подо́бенъ: О, пресла́внаго чудесе́!

Іезекíиле чу́дне,* ю́же па́че ума́ мо́лнію* и сла́ву неизрече́нную Госпо́дню, прему́дре,* херуви́мы боже́ственными* носи́му и восходя́щу* и пѣва́ему тма́ми у́стъ,* ума́ чистото́ю* у́мно ви́дѣлъ еси́,* предочи́стивъ ду́шу и тѣ́ло, богоблаже́нне.

Іезекíиле богопрія́тне,* я́ко Христо́въ подо́бникъ,* чужда́го до́лга томи́тельство претерпѣ́лъ еси́,* лю́тѣ истяза́емь,* преднапису́я хотя́щее* честна́го ра́ди Креста́* бы́ти мíру спасе́ніе, богоявле́нне, и избавле́ніе.* Его́же причасти́тися всѣ́мъ ны́нѣ умоли́,* воспѣва́ющимъ тя́.

Іезекíиле богодохнове́нне,* сви́токъ пріе́мь* изъ руки́ Вседержи́теля,* я́вѣ ме́да сладча́йши усто́мъ,* священноявле́ненъ, богови́дѣнъ* и богосло́въ богозри́теленъ ты́ бы́лъ еси́,* прогнѣ́вающему собо́ру* отъ Бо́га, сла́вне,* ра́зумъ пода́въ.

Сла́ва, и ны́нѣ, богоро́диченъ:

Ра́дуйся, душа́мъ просвѣще́ніе,* согрѣша́ющимъ проще́ніе,* неради́вымъ исправле́ніе;* ра́дуйся, утѣше́ніе и ра́дость,* скорбя́щихъ помо́щнице;* ра́дуйся, Блага́я,* немощны́хъ ду́шъ исцѣле́ніе;* ра́дуйся, примире́ніе къ Бо́гу и хода́таице,* серафи́мъ всѣ́хъ я́ко су́щи святѣ́йши, Чи́стая.

Крестобогоро́диченъ:

Что́ зри́мое видѣ́ніе,* е́же Мои́ма очи́ма ви́дится, о Влады́ко?* Содержа́й всю́ тва́рь* на дре́во воздви́женъ бы́въ,* и умира́еши, всѣ́мъ дая́й жи́знь, —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.

Тропа́рь проро́ка, гла́съ 2:

Проро́ка Твоего́ Іезекíиля па́мять, Го́споди, пра́зднующе, тѣ́мъ Тя́ мо́лимъ: спаси́ ду́ши на́ша.


[НА УТРЕНИ,]
Кано́нъ преподо́бныхъ, гла́съ 4. Творе́ніе Ѳеофа́ново.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Прича́стіемъ, е́же къ Бо́гу, преподо́бне, свѣ́тъ бы́лъ еси́, и къ Нему́ отлучи́лся еси́, Симео́не, жела́ніемъ кра́йнимъ, благи́мъ наде́ждамъ твои́мъ, о́тче, исполне́ніе прія́лъ еси́.

Жела́ніемъ, е́же къ Бо́гу, распала́емь, мíръ оста́вилъ еси́, спу́тника, о́тче, обрѣ́тъ, Іоа́нна сла́внаго, съ ни́мже стезю́ проше́лъ еси́ спаси́тельную, ра́дуяся.

Обогати́тися ника́коже истоща́емыми вожделѣ́вше, бога́тство и сла́ву вре́менную, му́дріи, и пи́щу мимотеку́щую, и мірско́е достоя́ніе доблему́дреннѣ отри́нусте.

Богоро́диченъ: Красну́, и избра́нну, и всече́стну разумѣ́въ Тя́, Бо́жій, Пренепоро́чная, Сы́нъ, Тво́й Сы́нъ бы́сть, сы́ны сотвори́ благода́тію, Богоро́дицу Тя́ чту́щія.

Инъ кано́нъ проро́ка, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Хотя́щу восхвали́ти Іезекíиля, проро́ка Твоего́, дарова́ніе ми́ пода́ждь, Благодѣ́телю, и благода́ть духо́вную.

Имѣ́я восхожде́нія, Іезекíиль свяще́нный, неизглаго́ланныхъ самови́децъ, Госпо́днею сла́вою озаря́ется.

Упра́вивъ твое́ житіе́ и по́мыслу взыгра́нія плотска́я повину́въ, проро́къ яви́лся еси́ богопрія́тный.

Богоро́диченъ: Ве́сь просвѣще́нъ, къ восто́комъ многопѣ́тую обраще́нную две́рь, проро́чествуеши Дѣ́ву, богодохнове́нне.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Усе́рдно къ мы́сленнымъ совле́клся еси́ дѣ́ланіемъ, Симео́не, побѣжда́я вра́жія полки́ боже́ственнымъ посо́біемъ Ду́ха.

Ра́нами моли́твенными и воздержа́нія біе́ніи, преподо́бне, страсте́й Еги́петъ, о́тче Іоа́нне, уязви́лъ еси́.

Умори́ша врага́ по́стницы Твои́, Іису́се, умерщвле́ніе ра́достно, Влады́ко, Твое́ живоно́сное возжела́вше.

Богоро́диченъ: Избавля́ющаго человѣ́ки преслуша́нія лю́таго паде́нія, всему́ Вино́внаго, Чи́стая Всенепоро́чная, родила́ еси́.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Умерщвле́ніе стяжа́въ страстно́е, зри́ши, сла́вне, ме́ртвыхъ пронапи́санное, я́ко проро́къ, воста́ніе.

Ми́лостивъ быва́я Своему́ Бо́гъ созда́нію, боже́ственъ ра́зумъ тя́ заблужде́ннымъ, богоявле́нне, показа́.

Уясни́ тя́, сла́вне, Божества́ сія́ніе, Иже на херуви́мѣхъ сѣдя́щее, богоглаго́ливе, тебѣ́ я́вльшееся.

Богоро́диченъ: Ни́ву проро́къ Тво́й прозорли́выма чи́стую зри́тъ очи́ма, дѣ́вства соблюде́нный, Благодѣ́телю, Тебѣ́ вхо́дъ.

Конда́къ проро́ка, гла́съ 4. Подо́бенъ: Яви́лся еси́ дне́сь.

Бо́жій яви́лся еси́ проро́къ, Іезекíиле чу́дне, воплоще́ніе Госпо́дне всѣ́мъ провозвести́лъ еси́, Сего́ Агнца и Зижди́теля, Сы́на Бо́жія, я́вльшася во вѣ́ки.

Сѣда́ленъ преподо́бныхъ, гла́съ 5. Подо́бенъ: Собезнача́льное Сло́во.

Согла́сіемъ боже́ственнымъ озаря́еми, въ пути́, веду́щія къ Боже́ственнымъ сія́ніемъ, ходи́сте вѣ́рно, отцы́ преподо́бніи, и, враго́въ отбѣ́гше прило́говъ, сы́нове свѣ́та и дне́ яви́стеся, Іоа́нне и Симео́не богоблаже́нніи.

Сла́ва, проро́ка, гла́съ 3. Подо́бенъ: Красотѣ́ дѣ́вства.

Сло́ва воплоще́ніе предуясни́лъ еси́, Боже́ственнымъ Ду́хомъ озаря́емь, вели́кій въ боже́ственныхъ проро́цѣхъ, Іезекíиле богодохнове́нне. Тѣ́мже я́ко проро́ка тя́ свяще́нно ублажа́емъ и торжеству́емъ па́мять твою́ дне́сь, согла́сно вопію́ще ти́, му́дре: моли́ся Христу́ спасти́ ду́ши на́ша.

И ны́нѣ, богоро́диченъ:

Недомы́сленно и непостижи́мо е́сть, Влады́чице Богора́дованная, е́же содѣ́ланное о Тебѣ́ стра́шное Бо́жіе та́инство, и́бо Необыме́ннаго, заче́нши, родила́ еси́, пло́тію обложе́на от пречи́стыхъ крове́й Твои́хъ; Его́же всегда́, Чи́стая, я́ко Сы́на Твоего́, моли́ спасти́ся душа́мъ на́шимъ.

Крестобогоро́диченъ:

Неискусобра́чная Чи́стая и Ма́ти Твоя́, Христе́, ви́дящи Тя́, ме́ртва ви́сяща на Крестѣ́, ма́терски пла́чущи, глаго́лаше: что́ Тебѣ́ воздаде́ евре́йскій беззако́нный собо́ръ и неблагода́рный, и́же мно́гихъ и вели́кихъ Твои́хъ, Сы́не Мо́й, даро́въ наслади́выйся? Пою́ Твое́ Боже́ственное снизхожде́ніе.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Соедини́вшеся къ стезѣ́ пра́вды, богоно́снаго Ни́кона въ боже́ственныя огра́ды внидо́сте, преподо́бніи, спаси́тельнымъ сія́ніемъ сего́ наказа́ніи обогати́стеся.

Единообра́зныхъ и преподо́бно смы́слящихъ богоно́сный и преподо́бный ви́дѣвъ ва́ю, боже́ственными повѣстьми́ и боже́ственною оде́ждою мона́шескою украси́.

Се́рдце твое́ скрижа́ль очище́нну Свята́го Ду́ха благода́ть обрѣ́тши, о́тче, написа́ соверше́нно безстра́стіе, вѣ́ру и любо́вь нелицемѣ́рну.

Богоро́диченъ: Сѣдя́й на престо́лѣ превознесе́ннѣ херуви́мстѣмъ, я́ко престо́лъ Тя́ имѣ́, на объя́тіяхъ Твои́хъ почи́въ, Марíе Богоневѣ́сто, Препросла́вленный Бо́гъ на́шъ.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

На тебѣ́ рука́ бы́сть твоего́ Влады́ки и Вседержи́теля, неизглаго́ланная уча́щи и просвѣща́ющи Тя́ Боже́ственными велѣ́ньми.

Ви́дѣти я́ко сподо́бился еси́ ужа́сно Боже́ственная видѣ́нія, на лицы́ па́лъ еси́ и гла́съ услы́шалъ еси́ Боже́ственнаго Ду́ха.

Да́нный твои́мъ усто́мъ изъ руки́ Госпо́дни сви́токъ, изря́дне, се́рдце твое́ услади́ и проро́ка боже́ственна соверши́.

Богоро́диченъ: Сія́ющу ви́дѣ Іезекíиль две́рь Боже́ственну, е́юже про́йде Госпо́дь, затворе́ну Сію́ сохрани́.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Пресвѣ́тлу зарю́, Іоа́нне, пріи́мъ, я́ко со́лнце, яви́лся еси́, де́монскую тму́ отгна́въ, достосла́вне.

Твои́мъ жела́ніемъ, Христе́, окрили́вшеся, преподо́бніи жела́нія тѣле́сная, я́коже пѣ́ну морску́ю, му́дренно оттрясо́ша.

Си́лою Боже́ственною ду́ши укрѣпи́вше, въ пусты́ню всели́стеся, опустѣва́юще стра́сти, отцы́ богому́дріи.

Богоро́диченъ: Тече́ніе преста́ тлѣ́нное, Дѣ́ва бо нетлѣ́нно породи́ Бо́га Сло́ва, вы́ше естества́ и сло́ва, дѣ́вою пребы́вши.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Іезекíиле блаже́нне богопрія́тне, обраща́тися всѣ́хъ согрѣша́ющихъ наста́вилъ еси́ словесы́ твои́ми.

Во все́мъ подо́бящеся Го́сподеви проро́къ: о чужди́хъ бо согрѣше́ніихъ моля́шеся.

Витíйстіи тя́ язы́цы не мо́гутъ восхвали́ти: пренебе́сною бо украси́лся еси́ свѣ́тлостію.

Богоро́диченъ: Боже́ственный зря́ше Тя́ две́рь Іезекíиль, е́юже на́мъ возсія́ Свѣтода́вецъ и Госпо́дь.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Умъ тво́й ве́сь къ Бо́гу простира́я, непреста́нными поуче́ніи плотскíя любве́ не пощадѣ́лъ еси́, благи́хъ тебѣ́ хода́тайствуя, Симео́не, присвое́ніе.

Ни скве́рны, ни вра́ски прія́лъ еси́, блаже́нне, посредѣ́ мíра живы́й, чи́стыми же па́че моли́твами очища́еши душе́вныя скве́рны притека́ющимъ ти́.

Сы́й плотски́хъ мудрова́ній вы́шши, по́мысломъ не уязви́лся еси́, посредѣ́ же́нъ обнажа́яся: безстра́стія бо оде́ждею, Симео́не, обле́клся еси́.

Богоро́диченъ: Усты́, и по́мысломъ, и се́рдцемъ, Пречи́стая, Тя́, Богоро́дицу, проповѣ́дуемъ: Тобо́ю бо Бо́гу примири́хомся, отринове́нніи преступле́ніемъ пе́рвѣе пра́отца.

Инъ.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Ви́дѣти сподо́бился еси́ Бо́га, проро́че чу́дный, вся́каго явле́нія веще́ственна очи́щся, преблаже́нне.

Пло́ти превы́ше бы́въ, взя́тся превысо́кою си́лою Ду́ха и свѣ́та чи́стаго яви́лся еси́ испо́лненъ.

Прече́стно житіе́ имы́й, ликова́ніе небе́сное, пѣ́нія испуща́ющее, зри́ши херуви́мскаго Вседержи́теля.

Богоро́диченъ: Ма́терь и Дѣ́ву вои́стинну во о́бразѣ ви́дѣлъ еси́, две́рь многосвѣ́тлую, Бо́гу и человѣ́комъ Хода́таицу.

Конда́къ преподо́бныхъ, гла́съ 2. Подо́бенъ: Тве́рдыя.

Во пло́ти я́вльшася безпло́тнаго и добродѣ́тельми премíрно просія́вшаго, Симео́на равноа́нгельнаго и богоно́снаго восхва́лимъ, съ ни́мже Іоа́нна приснопа́мятнаго, вѣ́рою и любо́вію, я́ко моля́щіяся Го́споду непреста́нно о всѣ́хъ на́съ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Одержи́мь христоподо́бною, о́тче, Боже́ственною любо́вію други́хъ спасти́, ра́достно ве́сь са́мъ, вопія́, изда́лся еси́: благослове́нъ еси́ въ хра́мѣ сла́вы Твоея́, Го́споди.

Отъ небесе́ тебѣ́ по́данную, о́тче, пріе́млеши пи́щу, се́ю препитава́еши вся́, благопоко́рно пріе́млющія твоя́ повелѣ́нія и до́лу влеку́щій грѣ́хъ оставля́ющія, блаже́нне.

Послѣ́довавъ оте́ческимъ преда́ніемъ, о́тче му́дре, па́губы Ориге́новы бѣ́гати злочести́выя заповѣ́далъ еси́ зову́щимъ: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Вы́шняго освяще́нное Боже́ственное селе́ніе, ра́дуйся, Тобо́ю бо даде́ся ра́дость, Богоро́дице, зову́щимъ: благослове́нна Ты́ въ жена́хъ еси́, Всенепоро́чная Влады́чице.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Хра́мъ одушевле́нъ яви́лся еси́ Бо́жій, богоно́се, о всеблаже́нне, и церко́внымъ мѣ́риломъ мы́сленно научи́лся еси́, воспѣва́я ду́хомъ: оте́цъ на́шихъ Бо́же, благослове́нъ еси́.

Ве́сь сы́й во у́жасѣ, преложе́нъ во гра́дъ святы́й иногда́, и Боже́ственныхъ та́инъ научи́ся явле́ніемъ, пѣ́ти поуча́яся: оте́цъ на́шихъ Бо́же, благослове́нъ еси́.

Свяще́нникъ я́влься Бо́га Вы́шняго, досточу́дне, же́ртвы и мольбы́ прино́сиши Влады́цѣ лю́демъ предстоя́щимъ и пою́щимъ: оте́цъ на́шихъ Бо́же, благослове́нъ еси́.

Богоро́диченъ: Спасти́ восхотѣ́ человѣ́ческое существо́ Сло́во Пребоже́ственное, дѣ́вственную две́рь проше́дъ, пло́тію изъ Нея́ одѣ́явыйся: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Всесвѣ́тлая ты́ бы́лъ еси́ звѣзда́, су́щія въ ти́нѣ страсте́й приводя́ къ животу́, твори́ши бо жены́ нечи́стыя цѣлому́дренно жи́ти и отго́ниши лю́тыя неду́ги, вопія́: благослови́те, вся́ дѣла́ Госпо́дня, Го́спода.

Сы́й цѣ́лъ умо́мъ, въ скро́вѣ му́дрыхъ чуде́съ, преподо́бне, мно́гія улови́лъ еси́ юро́дствовати Го́спода ра́ди, вѣ́дый наруга́ннымъ бы́ти, вопія́ чистѣ́йшею душе́ю: благослови́те, вся́ дѣла́ Госпо́дня, Го́спода.

Соверше́нно еди́ный, и́же Свои́хъ Си́ по достоя́нію сла́вя Госпо́дь, износи́ма, преподо́бне, и гро́бу посыла́ема, а́нгельскими свѣтлословле́ніи почита́етъ, вопію́ща: благослови́те, вся́ дѣла́ Госпо́дня, Го́спода.

Богоро́диченъ: Избавля́яй на́съ, возсія́ изъ Тебе́ Госпо́дь, Дѣ́во Чи́стая, Его́же моли́, Влады́чице, просвѣти́ти пою́щія Тя́ и обстоя́нія на́съ изба́вити, вопію́щихъ: благослови́те, вся́ дѣла́ Госпо́дня, Го́спода.

Инъ.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Свяще́нствомъ проро́ческимъ проро́чествія свяще́нно украша́емь, сія́еши, проро́че, Христа́ Жизнода́вца поя́ во вся́ вѣ́ки.

На колѣ́ну преклоня́ющася, я́ко Бла́гъ, о мíрѣ, зри́теля пріими́ Твоея́ сла́вы, Іезекíиля, я́ко да Тя́ пое́мъ во вся́ вѣ́ки.

Жела́ніемъ боже́ственнымъ разже́гся, научи́лся еси́ па́че ума́ та́йнамъ, Іезекíиле, вопія́: Тя́, Христе́, превозно́симъ во вѣ́ки.

Богоро́диченъ: Струю́ оставле́нія, изъ но́щи у́тренюя, дѣ́вства зря́, Іезекíиль Го́сподеви вопія́ше: Тя́ превозно́симъ во вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Всѣ́мъ се́рдцемъ Тро́ицѣ усе́рдно возложи́вшеся и и́же отъ Нея́ лучи́ благодѣ́тельно пріе́мше, свѣтови́дни бы́сте и со а́нгелы лику́ете.

Жела́ніемъ боже́ственнымъ пріедини́вшеся и воздержа́ніемъ просвѣ́щшеся, ча́емыхъ бла́гъ въ прича́стіи уже́ бы́сте и блаже́нное обрѣто́сте, богоблаже́нніи, наслажде́ніе.

Ва́ша прія́тъ болѣ́зни и по́ты весе́ліе, конца́ ника́коже иму́щее, въ не́мже пита́ющеся, Симео́не преподо́бне и Іоа́нне сла́вне, на́съ непреста́нно помина́йте.

Богоро́диченъ: Спаси́ мя, всѣ́хъ ро́ждшая Изба́вителя и Благодѣ́теля, разори́ души́ моея́ о́блаки, Свѣ́та о́блаче, Свята́я Влады́чице, и си́льна содѣ́лай на стра́сти, борю́щія мя́.

Инъ.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Заре́ю сія́я, проро́че, благоче́стія, во огни́ и купинѣ́ дре́вле Моисе́ю Явльшася, и са́мъ ви́дѣти сподо́бился еси́ Тя́, та́йно науча́юща неизглаго́ланнымъ.

Свяще́нникъ показа́лся еси́, и таи́нникъ, и законоположи́тель, и проро́къ прему́дръ, и подо́бникъ Влады́цѣ и, страсте́й Его́ прича́стникъ бы́въ, ны́нѣ снаслѣ́дникъ яви́лся еси́.

О, неизглаго́ланнаго и боже́ственнаго свѣтоявле́нія! Его́же ны́нѣ наслажда́ешися, блаже́нне, издале́ча зря́ во Отцѣ́ Сы́на и Ду́ха, три́ ѵпоста́си Божества́.

Богоро́диченъ: Ты́ еси́, Богоро́дице, ору́жіе на́ше и стѣна́, Ты́ еси́ заступле́ніе на Тя́ надѣ́ющимся, Тебе́ и ны́нѣ на моли́тву подвиза́емъ, да изба́вимся отъ вра́гъ на́шихъ.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 190 – 195.

/ Къ оглавленію раздѣла /


Наверхъ / Къ титульной страницѣ

0