Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 20-й де́нь.
Свята́го сла́внаго проро́ка Иліи́.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Небе́сныхъ чино́въ.

Боже́ственнымъ боговидѣ́ніемъ досто́йно проро́ческимъ са́номъ* и ра́зумомъ почте́нъ бы́въ, боже́ственный проро́че,* прорица́еши да́льняя, я́ко бли́зъ су́щая,* царя́ я́ко непра́ведна обличи́лъ еси́* и сту́дныя свяще́нники ноже́мъ закла́лъ еси́.* Моли́ Христа́ Бо́га спасти́ся душа́мъ на́шимъ.

Нечести́вый ца́рь, не терпя́ твоего́ обличе́нія,* тебѣ́, боже́ственный проро́че, глаго́летъ:* ты́ ли еси́, томя́ и развраща́я Изра́иля?* Ты́ же ре́клъ еси́:* не а́зъ, о царю́,* но ты́ и до́мъ отца́ твоего́,* поне́же Бо́га твоего́, сотво́ршаго тя́, оста́вилъ еси́* и чужды́я вве́лъ еси́.* Но моли́твами, Христе́, Твоего́ проро́ка* отъ таковы́я пре́лести изба́ви на́съ* и спаси́ ду́ши на́ша.

Сла́ва, гла́съ 6:

Боже́ственный проро́че Иліе́, ты́, непра́вдовавша царя́ о Навуѳе́евѣ убíйствѣ и о восхище́ніи виногра́да обличи́въ, дерзнове́нно ре́клъ еси́: поне́же безъ пра́вды уби́лъ еси́ му́жа изра́ильтянина, си́це и са́мъ убіе́нъ бу́деши, и пси́ кро́вь твою́ поли́жутъ, и блудни́цы въ кро́ви твое́й измы́ются. Но моли́твами, Христе́, Твоего́ проро́ка, ку́пно и уго́дника, такова́го преще́нія изба́ви на́съ и ду́ши на́ша спаси́, я́ко Человѣколю́бецъ.

И ны́нѣ, богоро́диченъ:

[Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Боже́ственный проро́че,* ты́, ревну́я по Го́сподѣ Вседержи́тели,* моли́твою небеса́ заключи́лъ еси́, ре́къ:* до́ждь и роса́ да не сни́детъ на зе́млю,* то́кмо глаго́ломъ у́стъ мои́хъ.

Сти́хъ: Моисе́й и Ааро́нъ во іере́ехъ Его́* и Саму́илъ въ призыва́ющихъ и́мя Его́.

Боже́ственный проро́че,* ты́ моли́твою и ми́лованіемъ* па́ки небеса́ отверза́еши* и до́ждь жа́ждущимъ лю́демъ* бога́тно да́руеши.

Сти́хъ: Ты́ еси́ іере́й во вѣ́къ,* по чи́ну Мелхиседе́кову.

Боже́ственный проро́че,* ты́ вдови́цу съ сы́номъ препита́лъ еси́* и моли́твою го́рсть муки́ и чва́нецъ ма́сла умно́живъ.* По глаго́лу Госпо́дню,* го́рсть муки́ и чва́нецъ ма́сла не ума́лися.

Сла́ва, гла́съ и подо́бенъ то́йже:

Боже́ственный проро́че,* ты́ моли́твою твое́ю о́гнь съ небесе́ све́лъ еси́* и царя́ увѣ́рилъ еси́ глаго́лати:* вои́стинну еди́нъ Бо́гъ,* Иже Иліе́ю проповѣ́даемый.

И ны́нѣ, богоро́диченъ:

Влады́чице Блага́я,* святíи Твои́ ру́цѣ* къ Сы́ну Твоему́ воздѣжи́,* душелюби́вому Содѣ́телю,* уще́дрити рабы́ Твоя́.

[Тропа́рь пи́санъ на вели́цѣй вече́рни.]



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 8, гла́съ 1. Подо́бенъ: Небе́сныхъ чино́въ.

Иже Ѳесви́тянина Илію́* колесни́цею о́гненною* отъ земли́, Ще́дре, преложи́вый, Сло́ве,* сего́ моли́твами спаси́ на́съ, вѣ́рно Тя́ сла́вящихъ* и того́ творя́щихъ ра́достно* боже́ственную па́мять и спасе́ную. [Два́жды.]

Въ тру́сѣ и ви́хрѣ то́нцѣ* ви́дѣлъ еси́ Бо́жіе прише́ствіе, Иліе́ богоблаже́нне,* просвѣща́ющее тя́ дре́вле:* на колесни́цѣ же сѣдя́ четвероко́ннѣй,* не́бо преѣжда́лъ еси́ страннолѣ́пно,* удивля́емь, богодухнове́нне.

Іере́и сту́дныя ноже́мъ закла́лъ еси́,* не́бо язы́комъ на зе́млю не дожди́ти удержа́лъ еси́,* ре́вностію Боже́ственною разже́гся,* Елиссе́я же испо́лнилъ еси́,* ми́лоти пода́ніемъ сугу́бымъ, му́дре Иліе́,* Боже́ственныя благода́ти.

Ины стихи́ры, гла́съ 2, самогла́сны.

[Іоа́нна архіепи́скопа:] Свѣти́льники возсія́ша вселе́ннѣй два́,* всесвѣ́тлый Илія́ и Елиссе́й:* о́въ у́бо Боже́ственнымъ сло́вомъ* небе́сныя ка́пли затвори́ и царя́ обличи́,* на колесни́цѣ же о́гненнѣй на небеса́ вознесе́ся;* о́въ же безча́дныя во́ды исцѣли́* и сугу́бу благода́ть прія́тъ,* Іорда́нскія струи́ раздѣли́.* И ны́нѣ со а́нгелы лику́юще,* о на́съ мо́лятъ, спасти́ся душа́мъ на́шимъ. [Два́жды.]

Иже на возду́сѣ колесни́ца тя́ подъе́мши огнено́сна,* я́ко въ тру́сѣ, на небеса́,* огнедохнове́нную благода́ть тебѣ́ чуде́съ подаде́,* Иліе́ Ѳесви́тянине,* нетлѣ́нна тя́ сотво́рши,* е́же не ви́дѣти сме́рти,* до́ндеже у́бо проповѣ́си вся́ческимъ кончи́ну.* Тѣ́мже пріиди́, подая́ на́мъ* твои́хъ исправле́ній наказа́ніе.

Свѣти́льниче невече́рній Це́рквей,* Боже́ственною ре́вностію разжига́емь, Иліе́ проро́че,* небе́сныя ка́пли затвори́лъ еси́,* и, вра́номъ пита́нъ бы́въ,* царя́ обличи́лъ еси́,* и свяще́нники умори́лъ еси́;* о́гнь съ небесе́ све́лъ еси́,* и, пятьдеся́тника два́ умори́въ,* напита́лъ еси́ вдови́цу еле́емъ* и муки́ ма́лою го́рстію,* и сы́на ея́ моли́твою воскреси́лъ еси́.* Огнь разже́глъ еси́ въ водѣ́,* Іорда́нскія струи́ пѣ́шъ преше́лъ еси́,* колесни́цею же о́гненною на небеса́ возне́слся еси́,* Елиссе́ю благода́ть сугу́бую по́далъ еси́.* Моли́ся непреста́нно Бо́гу* спасти́ся душа́мъ на́шимъ.

Сла́ва, гла́съ 6:

[Византíево:] Пріиди́те, правосла́вныхъ совокупле́ніе, соше́дшеся дне́сь въ пречестнѣ́мъ хра́мѣ богоглаго́ливыхъ проро́къ, псало́мски воспое́мъ сли́чную пѣ́снь си́хъ просла́вльшему Христу́ Бо́гу на́шему и весе́ліемъ и ра́достію возопіе́мъ: ра́дуйся, земны́й а́нгеле и небе́сный человѣ́че, Иліе́ великоимени́те; ра́дуйся, и́же сугу́бую благода́ть отъ Бо́га пріе́мый, Елиссе́е всече́стне; ра́дуйтеся, засту́пницы те́пліи, и предста́тели, и вра́чеве ду́шъ и тѣле́съ христолюби́выхъ люде́й, отъ вся́каго прило́га сопроти́вна, и обстоя́нія, и вся́кихъ бѣ́дъ изба́вите вѣ́рно соверша́ющія всепра́зднственную па́мять ва́шу.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

[Вхо́дъ. Проки́менъ дне́ и чте́нія три́.]

Ца́рствъ тре́тіихъ чте́ніе. [Глава́ 17.]

Бы́сть сло́во Госпо́дне ко Иліи́ проро́ку, и рече́ ко Аха́ву: жи́въ Госпо́дь Бо́гъ си́лъ, Бо́гъ Изра́илевъ, Ему́же предстою́ дне́сь предъ Ни́мъ, а́ще бу́детъ въ лѣ́та сія́ роса́ или́ до́ждь, а́ще не словесы́ у́стъ мои́хъ. И бы́сть глаго́лъ Госпо́день ко Иліи́, глаго́ля: иди́ отсю́ду на восто́къ и скры́йся въ пото́цѣ Хора́ѳовѣ, при рѣцѣ́ Іорда́новѣ, и бу́детъ вода́ отъ пото́ка, и піе́ши ю́, и вра́номъ повелю́ пита́ти тя́ та́мо. И и́де Илія́, и сотвори́ по глаго́лу Госпо́дню, и сѣ́де при пото́цѣ Хора́ѳовѣ, предъ лице́мъ Іорда́новымъ, и вра́нове приноша́ху ему́ хлѣ́бы зау́тра и мяса́ къ ве́черу, и отъ пото́ка пія́ше во́ду. И бы́сть по дне́хъ и́зсше пото́къ, я́ко не бѣ́ дождя́ на зе́млю. И бы́сть глаго́лъ Госпо́день ко Иліи́, глаго́ля: воста́ни, и иди́ въ Саре́фѳу Сидо́нскую, и пребу́ди та́мо; се́ бо заповѣ́дахъ женѣ́ вдови́цѣ препита́ти тя́. И, воста́въ, и́де въ Саре́фѳу Сидо́нскую, и пріи́де во врата́ гра́да, и се́ та́мо жена́ вдова́ собира́ше дрова́, и возопи́ Илія́ въ слѣ́дъ ея́, и рече́ е́й: принеси́ ми у́бо ма́ло воды́ въ сосу́дѣ, да пію́. И и́де взя́ти воды́, и возопи́ Илія́ во слѣ́дъ ея́, и рече́ е́й: пріими́ у́бо мнѣ́ и укру́хъ хлѣ́ба въ руцѣ́ твое́й, и да я́мъ. И рече́ жена́: жи́въ Госпо́дь Бо́гъ мо́й, а́ще е́сть у мене́ опрѣсно́къ, но ра́звѣ ели́ко го́рсть муки́ въ водоно́сѣ и ма́ло еле́я во чва́нцѣ. И се́ а́зъ собира́ю два́ полѣ́нца, и вни́ду, и сотворю́ себѣ́ и ча́домъ мои́мъ, и снѣ́мы, и у́мремъ. И рече́ къ не́й Илія́: дерза́й, и вни́ди, и не сотвори́ по глаго́лу твоему́, но сотвори́ мнѣ́ отту́ду опрѣсно́къ ма́лъ пре́жде, и изнесе́ши ми́, себѣ́ же и ча́домъ твои́мъ сотвори́ши послѣди́. Яко та́ко глаго́летъ Госпо́дь, Бо́гъ Изра́илевъ: водоно́съ муки́ не оскудѣ́етъ, и чва́нецъ еле́я не ума́лится до дне́, до́ндеже да́стъ Госпо́дь до́ждь на зе́млю. И и́де жена́, и сотвори́ по глаго́лу Иліину́, и даде́ ему́, и ядя́ше то́й, и та́, и ча́да ея́. И отъ того́ дне́ водоно́съ муки́ не оскудѣ́, и чва́нецъ еле́я не ума́лися, по глаго́лу Госпо́дню, Иже глаго́ла руко́ю Илино́ю. И бы́сть по глаго́лѣхъ си́хъ, и разболѣ́ся сы́нъ жены́ госпожи́ до́му, и бѣ́ болѣ́знь его́ крѣпка́ зѣло́, до́ндеже не оста́ въ не́мъ ду́хъ. И рече́ жена́ ко Иліи́: что́ мнѣ́ и тебѣ́, человѣ́че Бо́жій, вше́лъ еси́ ко мнѣ́ воспомяну́ти грѣхи́ моя́ и умори́ти сы́на моего́? И рече́ Илія́ къ женѣ́: да́ждь ми́ сы́на твоего́. И взя́тъ его́ отъ ло́на ея́, и вознесе́ его́ въ го́рницу, въ не́йже са́мъ почива́ше, и положи́ его́ на одрѣ́ свое́мъ. И возопи́ Илія́ ко Го́споду, и рече́: увы́ мнѣ́, Го́споди, Свидѣ́телю вдовы́, у нея́же а́зъ пребыва́ю, Ты́ озло́билъ еси́, е́же умори́ти сы́на ея́. И ду́ну на о́трочища трикра́ты, и призва́ Го́спода, и рече́: Го́споди Бо́же мо́й, да возврати́тся у́бо душа́ о́трочища сего́ въ о́нь. И бы́сть та́ко. И возопи́ Илія́, и услы́ша Госпо́дь гла́съ Иліи́нъ, и возврати́ся душа́ о́трочища, и оживе́. И поя́тъ Илія́ о́трочища, и сведе́ и́ отъ го́рницы въ до́мъ, и даде́ и́ ма́тере его́. И рече́ Илія́ къ не́й: ви́ждь, я́ко жи́въ е́сть сы́нъ тво́й. И рече́ жена́ ко Иліи́: се́ разумѣ́хъ, я́ко человѣ́къ Бо́жій еси́ ты́ и глаго́лъ Госпо́день во устѣ́хъ твои́хъ и́стиненъ.

Ца́рствъ тре́тіихъ чте́ніе. [Главы́ 18 и 19.]

Бы́сть глаго́лъ Бо́жій ко Иліи́ Ѳесви́тянину въ тре́тіе лѣ́то ца́рства Аха́вля, глаго́ля: иди́ и яви́ся Аха́ву, да́мъ бо до́ждь на лице́ земли́. И бы́сть, я́ко ви́дѣ Аха́въ Илію́ и рече́ къ нему́: а́ще ты́ еси́, развраща́яй Изра́иля? И рече́ Илія́: не развраща́ю а́зъ Изра́иля, но ты́ и до́мъ отца́ твоего́, внегда́ оста́висте вы́ Го́спода Бо́га своего́ и идо́сте въ слѣ́дъ Ваа́ла. И ны́нѣ посли́ и собери́ ко мнѣ́ ве́сь Изра́иль, на го́ру Карми́льскую, и проро́ки сту́дныя Ваа́ловы, и́хже три́ста и пятьдеся́тъ, и проро́къ ме́рзскихъ четы́реста, яду́щихъ трапе́зу Іезаве́лину. И по глаго́лу Иліину́ посла́ Аха́въ въ ве́сь Изра́иль, и собра́ вся́ проро́ки на го́ру Карми́льскую, и приведе́ ко всѣ́мъ и́мъ Илію́. И рече́ и́мъ Илія́: доко́лѣ вы́ хра́млете на о́ба колѣ́на ва́ша? Аще е́сть Госпо́дь Бо́гъ, иди́те въ слѣ́дъ Его́, а́ще ли Ваа́лъ е́сть, то иди́те за ни́мъ. И не отвѣща́ша ему́ лю́діе словесе́. И рече́ Илія́ къ лю́демъ: а́зъ е́смь оста́хъ проро́къ Госпо́день еди́нъ, и проро́цы Ваа́ловы, и́хже три́ста и пятьдеся́тъ муже́й, и проро́ковъ ме́рзскихъ четы́реста. И рече́ Илія́: дади́те ми́ два́ юнца́, да изберете́ себѣ́ еди́наго, и растеши́те и на у́ды, и возложи́те и́ на дрова́, да не приложите́ огня́. И а́зъ растешу́ юнца́ друга́го, и возложу́ на дрова́, и огня́ не возгнѣщу́. И да призовете́ имена́ бого́въ ва́шихъ, и а́зъ призову́ и́мя Го́спода Бо́га моего́. И бу́детъ Бо́гъ, Иже а́ще послу́шаетъ огне́мъ, То́й е́сть Бо́гъ. И отвѣща́ша вси́ лю́діе, и рѣ́ша: до́бръ глаго́лъ Иліи́нъ, и́же глаго́ла, да бу́детъ та́ко. И рече́ Илія́ проро́комъ сту́днымъ: избери́те себе́ юнца́ еди́наго, и сотвори́те вы́ пре́жде, я́ко ва́съ е́сть мно́жество, и призови́те имена́ бого́въ ва́шихъ, и огня́ не пригнѣща́йте. И поя́ша юнца́, и сотвори́ша та́ко. И призыва́ху и́мя Ваа́лово отъ у́тра и до полу́дне, и рѣ́ша: послу́шай на́съ, Ваа́ле, послу́шай на́съ. И не бѣ́ гла́са, ни послуша́нія, и рыска́ху о́коло же́ртвенника, и́же сотвори́ша сíи. И бы́сть полу́дне, и поруга́ся и́мъ Илія́ Ѳесви́тянинъ, и рече́: зови́те гла́сомъ вели́кимъ, я́ко бо́гу ва́шему непра́зднство е́сть, да еда́ что́ ино́е стро́итъ или́ усну́лъ е́сть, да убудите́ его́! И зовя́ху гла́сомъ вели́кимъ, и кроя́хуся по обы́чаю своему́ ножи́, и мно́зи би́ша себе́ бичьми́ до проли́тія кро́ве своея́. И прорица́ху, и бы́сть до ве́чера, я́ко бы́ти вре́мя взы́ти же́ртвѣ, и не бѣ́ гла́са. И глаго́ла Илія́ къ проро́комъ сту́днымъ, глаго́ля: отступи́те ны́нѣ, да и а́зъ сотворю́ же́ртву мою́. И отступи́ша тíи, и умо́лкнуша. И рече́ Илія́ къ лю́демъ: приступи́те ко мнѣ́. И приступи́ша къ нему́ вси́ лю́діе. И прія́тъ Илія́ двана́десять ка́меній, по числу́ колѣ́нъ сыно́въ Изра́илевыхъ, я́коже глаго́ла ему́ Госпо́дь: Изра́иль бу́детъ и́мя твое́. И созда́ ка́меніе во и́мя Госпо́дне, и исцѣли́ олта́рь раско́панный, и сотвори́ мо́ре, вмѣща́ющее двѣ́ мѣ́рѣ сѣ́мене, о́крестъ олтаря́. И воскладе́ полѣ́на на олта́рь, и́же сотвори́, и растеса́ на у́ды всесожега́емое, и возложи́ на полѣ́на, и обы́де олта́рь. И рече́ Илія́: принеси́те ми́ четы́ри водоно́сы воды́ и возлива́йте на всесожже́нія и на полѣ́на. И сотвори́ша та́ко. И рече́: удво́йте. И удво́иша. И рече́: утро́йте. И утро́иша. И прохожда́ше вода́ о́крестъ олтаря́, и мо́ре испо́лнися воды́. И возопи́ Илія́ на не́бо, и рече́: Го́споди Бо́же Авраа́мовъ, и Исаа́ковъ, и Іа́ковль, послу́шай мене́, Го́споди, послу́шай мене́ дне́сь огне́мъ: да разумѣ́ютъ вси́ лю́діе сíи, я́ко Ты́ еси́ еди́нъ Госпо́дь Бо́гъ Изра́илевъ, и а́зъ ра́бъ Тво́й, и Тебе́ ра́ди сотвори́хъ дѣла́ сія́ вся́, и Ты́ обрати́ сердца́ люде́й си́хъ въ слѣ́дъ Тебе́. И паде́ о́гнь отъ Го́спода съ небесе́, и пояде́ всесожже́нія, и полѣ́на, и ка́меніе, и пе́рсть, и во́ду, я́же бѣ́ въ мо́ри, вся́ полиза́ о́гнь. И падо́ша вси́ лю́діе на лицы́ свое́мъ и рѣ́ша: вои́стинну Госпо́дь Бо́гъ, То́й е́сть Бо́гъ. И рече́ Илія́ къ лю́демъ: поима́йте проро́ки Ваа́ловы, да ни еди́нъ скры́ется отъ ни́хъ. И я́ша и́хъ, и веде́ я́ Илія́ на пото́къ Ки́ссовъ, и ту́ и́хъ закла́. И рече́ Илія́ посе́мъ Аха́вови: се́ гла́съ хожде́нія дожде́внаго, впрязи́ колесни́цу твою́ и сни́ди, да не пости́гнетъ тебе́ до́ждь. И взы́де Илія́ на Карми́льскую го́ру, и преклони́ся на зе́млю, и положи́ лице́ свое́ между́ колѣ́нома свои́ма, и помоли́ся ко Го́споду. И не́бо помрачи́ся о́блаки и ду́хомъ, и бы́сть до́ждь ве́лій, и пла́чася Аха́въ, и́де до Іезрае́ля. И рука́ Госпо́дня бы́сть на Иліи́. И стягну́въ чре́сла своя́, и тече́ предъ Аха́вомъ до Іезрае́ля. И возвѣсти́ Аха́въ женѣ́ свое́й Іезаве́ли вся́, ели́ка сотвори́ Илія́, и я́ко закла́ проро́ки ноже́мъ. И посла́ Іезаве́ль ко Иліи́, глаго́ля: у́тро въ се́й же ча́съ положу́ ду́шу твою́, я́коже ду́шу еди́наго отъ си́хъ. И слы́ша, и убоя́ся Илія́, воста́въ, и́де души́ ра́ди своея́, и пріи́де въ Вирса́вію, зе́млю Іу́дову. И оста́ви о́трочища своего́ та́мо, и и́де въ пусты́ню дне́ пу́ть. И, прише́дъ, сѣ́де подъ сме́рчіемъ, и проси́ души́ свое́й сме́рти, и рече́: довлѣ́етъ ми, Го́споди, пріими́ у́бо ду́шу мою́ отъ мене́, я́ко нѣ́смь а́зъ па́че оте́цъ мои́хъ. И ля́же, и у́спе подъ са́домъ. И се́ а́нгелъ Госпо́день косну́ся ему́, и рече́ ему́: воста́ни, я́ждь и пíй. И воззрѣ́въ Илія́, и се́, при возгла́віи его́ опрѣсно́къ ячме́нный и корча́гъ воды́. И воста́, и яде́, и пи́тъ, и, обра́щся, у́спе. И обра́щся а́нгелъ Госпо́день втори́цею, и косну́ся ему́, и рече́ ему́: воста́ни, я́ждь и пíй, я́ко мно́гъ отъ тебе́ пу́ть. И воста́, и яде́, и пи́тъ, и и́де въ крѣ́пости я́ди тоя́ четы́редесять дне́й и четы́редесять ноще́й до горы́ Хори́вскія. И вни́де та́мо въ пеще́ру, и всели́ся въ не́й. И се́ глаго́лъ Госпо́день къ нему́, и рече́ ему́ Госпо́дь: что́ ты́ здѣ́, Иліе́? И рече́ Илія́: ревну́я, поревнова́хъ по Го́сподѣ Бо́зѣ Вседержи́тели, я́ко оста́виша Тя́ сы́нове Изра́илевы, и олтари́ Твоя́ раскопа́ша, и проро́ки Твоя́ ору́жіемъ изби́ша, и оста́хъ а́зъ еди́нъ, и и́щутъ души́ моея́, изъя́ти ю́. И рече́ а́нгелъ: изы́ди у́тро и ста́ни въ горѣ́ предъ Го́сподемъ, и се́ мимои́детъ Госпо́дь. И ду́хъ ве́лій и крѣ́покъ, разоря́я го́ры и сокруша́я ка́меніе предъ Го́сподемъ: не въ ду́сѣ Госпо́дь. И по ду́сѣ ви́хръ, и не въ ви́хрѣ Госпо́дь. И по ви́хрѣ о́гнь, и не во огни́ Госпо́дь. И по огни́ гла́съ хла́да то́нка, и та́мо Госпо́дь. И бы́сть, я́ко услы́ша Илія́, покры́ лице́ свое́ ми́лотію свое́ю, и изы́де, и ста́ при пеще́рѣ. И се́ къ нему́ бы́сть гла́съ и рече́: что́ здѣ́ ты́, Иліе́? И рече́ Илія́: ревну́я, поревнова́хъ по Го́сподѣ Бо́зѣ Вседержи́тели, я́ко оста́виша завѣ́тъ Тво́й сы́нове Изра́илевы, и олтари́ Твоя́ раскопа́ша, и проро́ки Твоя́ изби́ша ору́жіемъ, и оста́хъ а́зъ еди́нъ, и и́щутъ души́ моея́, изъя́ти ю́. И рече́ Госпо́дь къ нему́: иди́, возврати́ся путе́мъ твои́мъ, и по́йдеши въ пу́ть пусты́ни Дама́сковы, и пома́жеши Азаи́ла на ца́рство во Ассирíи; и Иіу́я, сы́на Амессíина, пома́жеши въ царя́ Изра́илю; и Елиссе́я, сы́на Асафа́това, пома́жеши вмѣ́сто себе́ проро́ка.

Ца́рствъ четве́ртыхъ чте́ніе. [Глава́ 2.]

Бы́сть во дни́ о́ны, обрѣ́те Илія́ Елиссе́я, сы́на Асафа́това, и то́й ора́ше вола́ми. И и́де Илія́ къ нему́, и пове́рже Илія́ ми́лоть свою́ на не́мъ, и оста́ви Елиссе́й волы́, и тече́ созади́ Иліи́, и служа́ше ему́. И бы́сть, егда́ взя́ту бы́ти Иліи́ Го́сподемъ въ ви́хрѣ я́ко на не́бо, и идо́ста Илія́ и Елиссе́й въ Галга́лы. Рече́ Илія́ ко Елиссе́ю: сѣди́ у́бо здѣ́, я́ко Госпо́дь посла́ мя до Іорда́на. И рече́ Елиссе́й: жи́въ Госпо́дь, и жива́ душа́ твоя́, а́ще оста́влю тебе́. И поидо́ста о́ба, и пятьдеся́тъ муже́й отъ сыно́въ проро́ческихъ пріидо́ша и ста́ша пря́мо издале́ча. Оба же ста́ста при Іорда́нѣ. И прія́тъ Илія́ ми́лоть свою́, и сви́тъ ю́, и порази́ е́ю во́ды, и раздѣли́ся вода́ сю́ду и сю́ду, и преидо́ста о́ба по су́ху. И бы́сть, я́ко преидо́ста, и рече́ Илія́ Елиссе́ю: проси́, что́ сотворю́ тебѣ́, пре́жде да́же не взя́тъ бу́ду отъ тебе́. И рече́ Елиссе́й: да бу́детъ у́бо ду́хъ, и́же въ тебѣ́, сугу́бъ во мнѣ́. И рече́ Илія́: ожесточи́лъ еси́ проси́ти; оба́че а́ще уви́диши мя́, взе́млема отъ тебе́, бу́детъ ти́ та́ко, а́ще ли же не уви́диши, не бу́детъ. И бы́сть иду́щимъ и́мъ и глаго́лющимъ, и се́ колесни́ца о́гненна и ко́ни о́гненни и раздѣли́ между́ обѣ́ма, и взя́тся Илія́ тру́сомъ, я́ко на не́бо. И Елиссе́й зря́ше, и то́й вопія́ше: о́тче, о́тче, колесни́ца Изра́илева и ко́ни его́! И не ви́дѣ его́ ктому́. И я́тся Елиссе́й за ри́зы своя́, и раздра́ я́ на дво́е. И взя́тъ ми́лоть Иліину́ Елиссе́й, па́дшую верху́ его́. И обрати́ся Елиссе́й, и ста́ на бре́зѣ Іорда́на. И прія́тъ Елиссе́й ми́лоть Иліину́, па́дшую верху́ его́, и уда́ри во́ды, и не раздѣли́шася. И рече́ Елиссе́й: гдѣ́ у́бо е́сть Бо́гъ Иліи́нъ, апфо́? И уда́ри Елиссе́й во́ды второ́е, и раздѣли́шася во́ды, и пре́йде по су́ху.

На литíи стихи́ра хра́ма и свята́го самогла́сны, гла́съ 4:

Нетлѣ́ннаго соедине́нія прича́стникъ, блаже́нне проро́че, бы́лъ еси́. О Бо́зѣ, Спа́сѣ мое́мъ, моли́твою Іорда́нъ раздѣли́въ, по су́ху преше́лъ еси́ и на о́гненнѣй колесни́цѣ я́ко на небеса́ восхище́нъ бы́лъ еси́, сугу́бую благода́ть Елиссе́ю оста́вль. Тѣ́мже мо́лимъ тя́, а́ще и тѣ́ломъ восхище́нъ бы́лъ еси́, но ду́хомъ отъ на́съ не разлуча́йся и всегда́ Христу́ моли́ся спасти́ся душа́мъ на́шимъ.

Свѣтоза́ренъ о́блакъ, боже́ственный проро́че, яви́лся еси́, иска́пая ту́чу богоразу́мія всѣ́мъ вѣ́рнымъ, напая́я бога́тно вино́мъ весе́лія всѣ́хъ, вѣ́рою прити́чущихъ къ боже́ственнѣйшему хра́му твоему́. Тѣ́мже мо́лимъ тя́, боже́ственный проро́че и богови́дче Иліе́, побѣ́ды на враги́ Импера́тору на́шему да́руй и душа́мъ на́шимъ ве́лію ми́лость.

Самоде́ржцу уму́ пло́ть покори́лъ еси́, боже́ственный Иліе́ проро́че, усе́рдно восхожде́нія, я́ко по степе́немъ, въ се́рдцы твое́мъ полага́я. Тѣ́мже и непра́вдовавша царя́ обличи́въ, гнѣ́ва Бо́жія запреще́ніе изре́къ, и сту́дныя свяще́нники я́ко непра́ведны ноже́мъ погуби́лъ еси́, и всѣ́хъ научи́лъ еси́ я́сно вопи́ти: вои́стинну еди́нъ е́сть Бо́гъ, Его́же Илія́ проповѣ́да.

Сла́ва, гла́съ 6:

О, нечести́ва царя́ повелѣ́нія! О, поста́, испо́лнена кро́ве и беззако́нія! Заповѣ́да по́стъ, да убíйство сотвори́тъ, и а́біе убіе́нъ бы́сть Навуѳе́й изра́ильтянинъ. Что́ же, проро́че, къ си́мъ ре́клъ еси́? Яко та́ко глаго́летъ Госпо́дь: поне́же безъ пра́вды му́жа изра́ильтянина уби́лъ еси́, та́кожде и твоя́ кро́вь проліе́на бу́детъ, и блудни́цы въ кро́ви твое́й измы́ются. Но моли́твами, Христе́, Твоего́ проро́ка и проповѣ́дника такова́го безчеловѣ́чества изба́ви ду́ши на́ша, я́ко Человѣколю́бецъ.

И ны́нѣ, [богоро́диченъ]:

Богоро́дице, Ты́ еси́ лоза́ [и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Илія́, проро́къ преди́вный,* заре́ю у́мъ просвѣти́въ,* ве́сь бы́сть боже́ственъ* и, царя́ нечести́ва су́дъ непра́ведный зря́, негоду́етъ,* тѣ́мже и судо́мъ Бо́жіимъ отрече́ніе посыла́етъ на него́.* Та́кожде и цари́цу,* я́ко неми́лостиву и златолюби́ву,* суду́ Бо́жію предаде́.* Но моли́твами, Христе́, Твоего́ проро́ка Иліи́* спаси́ всѣ́хъ на́съ, я́ко Милосе́рдъ.

Сти́хъ: Моисе́й и Ааро́нъ во іере́ехъ Его́* и Саму́илъ въ призыва́ющихъ и́мя Его́.

Доко́лѣ, Го́споди,* пу́ть нечести́выхъ спѣ́ется?* проро́че, ре́клъ еси́:* Ты́ насади́лъ еси́, и вкорени́шася,* и сотвори́ша пло́дъ беззако́нія,* вои́стинну и са́ми злѣ́ погибо́ша нече́стіемъ свои́мъ,* возопію́тъ къ Тебѣ́, и не услы́шиши.* Вску́ю ми́ показа́лъ еси́ нече́стіе* суде́й законопресту́пныхъ?

Сти́хъ: Ты́ еси́ іере́й во вѣ́къ,* по чи́ну Мелхиседе́кову.

Иже честно́е твое восхожде́ніе,* честны́й во проро́цѣхъ вели́кій Иліе́,* пра́зднующихъ, твои́ми моли́твами* отъ бѣ́дъ избавля́й, и скорбе́й,* и лю́тыхъ нахожде́ній:* да всегда́ тебе́, пресла́вный проро́че,* христоимени́тіи лю́діе,* почита́емъ и ублажа́емъ.

Сла́ва, гла́съ 6:

Проро́че, проповѣ́дниче Христо́въ, престо́ла вели́чествія никогда́же отступа́еши и коему́ждо боля́щу при́сно предстои́ши; въ вы́шнихъ служа́, вселе́нную благословля́еши, всю́ду прославля́емь, проси́ очище́нія душа́мъ на́шимъ.

И ны́нѣ, богоро́диченъ:

Творе́цъ и Изба́витель [мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

Тропа́рь, гла́съ 4:

Во пло́ти а́нгелъ, проро́ковъ основа́ніе, вторы́й предте́ча прише́ствія Христо́ва, Илія́ сла́вный, свы́ше посла́вый Елиссе́еви благода́ть неду́ги отгоня́ти и прокаже́нныя очища́ти, тѣ́мже и почита́ющимъ его́ то́читъ исцѣле́нія.

Сла́ва, и ны́нѣ, богоро́диченъ:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].


НА УТРЕНИ,
На Бо́гъ Госпо́дь: Тропа́рь, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1:

На о́гненную колесни́цу, я́ко на крилу́ вѣ́тренню, возше́дъ, боже́ственный проро́че, къ небесе́мъ пресла́вно ше́ствіе дне́сь твори́ши, свы́ше сугу́бую благода́ть и ми́лоть Елиссе́еви оста́вль. [Два́жды.]

Сла́ва, и ны́нѣ, богоро́диченъ:

Ма́терь Тя́ Бо́жію мо́лимъ вси́, Дѣ́ву вои́стинну, и по рождествѣ́ я́вльшуюся, любо́вію прибѣга́ющіи къ Твое́й бла́гости: Тебе́ бо и́мамы, грѣ́шніи, предста́тельницу, Тебе́ стяжа́хомъ въ напа́стехъ спасе́ніе, еди́ну Всенепоро́чную.

По 2-мъ стихосло́віи сѣда́ленъ, гла́съ 3:

Хра́мъ тво́й боже́ственный всѣ́мъ исцѣле́нія незави́стно источа́етъ, проро́че пречу́дне, съ Елиссе́емъ преди́внымъ Христу́ вку́пѣ моля́щеся низпосла́ти ми́ръ мíрови и лю́демъ, чту́щимъ ва́съ, ве́лію ми́лость. [Два́жды.]

Сла́ва, и ны́нѣ, богоро́диченъ:

Кíйждо, идѣ́же спаса́ется, та́мо пра́ведно и притека́етъ; и ко́е ино́е таково́е прибѣ́жище, я́ко Ты́, Богоро́дице, покрыва́ющее ду́ши на́ша?

[Велича́ніе:

Велича́емъ тя́, святы́й проро́че Бо́жій Иліе́ сла́вне, и почита́емъ, е́же на небеса́ съ пло́тію, о́гненное восхожде́ніе твое́.

Псало́мъ избра́нный: Блаже́нъ му́жъ, боя́йся Го́спода...]

По поліеле́и сѣда́ленъ, гла́съ 8:

Прему́дрости я́ко рачи́тель бы́въ, проро́че всече́стне, непра́ведна царя́ непра́вдующа я́вѣ обличи́въ и увѣ́рилъ еси́ вопи́ти: вои́стинну Бо́гъ еди́нъ е́сть, Иже Иліе́ю проповѣ́дуемый. Отсю́ду же Іезаве́ль о восхище́ніи и о златолю́біи обличи́лъ еси́, проро́че и Предте́че прише́ствія Христо́ва, Иліе́ великоимени́те, моли́ Христа́ Бо́га грѣхо́въ оставле́ніе дарова́ти восхожде́ніе твое́ вѣ́рно сла́вящимъ. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Та́же степе́нна, 1-й антифо́нъ 4-го гла́са. Проки́менъ, гла́съ 4: Ты́ еси́ іере́й во вѣ́къ,* по чи́ну Мелхиседе́кову. Сти́хъ: Рече́ Госпо́дь Го́сподеви моему́: сѣди́ одесну́ю Мене́, до́ндеже положу́ враги́ Твоя́ подно́жіе но́гъ Твои́хъ. Вся́кое дыха́ніе... Ева́нгеліе Луки́, зача́ло 14.

По 50-мъ псалмѣ́ стихи́ра, гла́съ 4:

На о́гненнѣй колесни́цѣ на о́блакъ взя́лся еси́ и во страну́ свѣтови́дну преложи́лся еси́, о Ѳесви́тянине Иліе́, сту́дныя проро́ки посрами́въ. Иже не́бо сло́вомъ связа́вый, та́ко разрѣши́ и на́ша согрѣше́нія ко Го́споду моли́твами твои́ми и спаси́ ду́ши на́ша.

Кано́нъ Богоро́дицы со ирмосо́мъ на 6, гла́съ 8: Во́ду проше́дъ.., и проро́ка два́ кано́на, на 8.

Пе́рвый кано́нъ, гла́съ 2.
Пѣ́снь 1.

Ирмо́съ: Пои́мъ Го́сподеви, въ мо́ри дре́вле лю́ди наста́вльшему и въ не́мъ фарао́на со всево́инствомъ погрузи́вшему, пѣ́снь побѣ́дную, я́ко просла́вися.

Ви́дѣти жела́ющіи Иліи́ чуде́съ огнедохнове́нную си́лу, огнезра́чнаго и честна́го язы́ка, ду́ха крѣ́пость, по достоя́нію собра́хомся.

Устнѣ́, богоно́се, и недоумѣ́ннаго язы́ка тѣсноту́ же и худогла́сіе, дѣ́йствомъ, е́же въ тебѣ́, Ду́ха отве́рзи и уясни́ къ пѣ́нію чуде́съ твои́хъ.

Дае́ши па́че естества́ повину́вшимся, Сло́ве, честны́мъ Твои́мъ повелѣ́ніемъ и покоря́еши дождю́ две́ри ду́хомъ, утвержда́емо сло́во содѣва́я.

Богоро́диченъ: Пое́мъ Го́сподеви, отъ Дѣ́вы рожде́нному, и мíръ обно́вльшему, и Тоя́ ра́ди на́мъ жи́знь боже́ственную дарова́вшему, пѣ́снь побѣ́дную, я́ко просла́вися.

Другíй кано́нъ, [творе́ніе іеромона́ха Пахо́мія,] его́же краегране́сіе: Пою́ хвалу́ вели́кому Иліи́. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Орга́нъ яви́лся еси́, ударя́емь боже́ственнымъ бряца́ломъ, проро́че пречу́дный, Всевѣ́дца Бо́га воспѣва́я, отмще́ніе пра́ведно всѣ́мъ даю́ща по дѣло́мъ и́хъ.

Иже не терпя́ пре́лести, проро́че чу́дный, царя́ обличи́лъ еси́, непра́вдующа о беззако́ніи. Тѣ́мже су́дъ Бо́жій, по́лнъ гнѣ́ва, тому́ нане́слъ еси́ осужде́нія.

Проро́че и Предте́че благода́ти, боже́ственный Иліе́, Аха́ва, нечести́ваго царя́, ты́ я́ко законопресту́пника обличи́въ, сту́дныя свяще́нники, я́ко непреподо́бны погуби́лъ еси́.

Богоро́диченъ: Христо́ву Ма́терь въ пѣ́снехъ воспѣ́ти досто́йно, вѣ́рніи, потщи́мся, я́ко Спа́са всѣ́хъ ро́ждшую, живото́мъ и сме́ртію влады́чествующаго.

Катава́сія: Отве́рзу уста́ моя́...

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Яко изря́денъ, проро́че, Учрежди́тель, и́же вра́номъ творя́ тебѣ́ гоще́ніе, еди́ный, насыща́яй вся́ко живо́тно благоволе́нія. Ему́же вси́ зове́мъ: Ты́ еси́ Бо́гъ на́шъ, и нѣ́сть свя́та, па́че Тебе́, Го́споди.

Благода́ть Благодѣ́телю и Строи́телю, вдови́цу и проро́ка напита́вшему неизрече́ннымъ промышле́ніемъ. Ему́же вси́ зове́мъ: Ты́ еси́ Бо́гъ на́шъ, и нѣ́сть свя́та, па́че Тебе́, Го́споди.

Затвори́вый тучено́сныя о́блаки одожди́ти, пи́щи лиша́емѣ Саре́фѳѣ, оста́нокъ бра́шна непреста́нно роси́ти сотвори́. Ты́ же взыва́лъ еси́: нѣ́сть свя́та, па́че Тебе́, Го́споди.

Богоро́диченъ: Ты́ еди́на па́че всѣ́хъ отъ вѣ́ка вели́кимъ сподо́билася еси́ и па́че естества́: Бо́га бо, Невмѣсти́маго все́ю тва́рію, во чре́вѣ прія́ла еси́ и воплоти́ла еси́. Тѣ́мже Богоро́дицу Тя́ вси́ почита́емъ.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Всѣ́хъ ми́лостивно, проро́че, наказу́еши и всѣ́хъ ми́луеши, къ тебѣ́ вѣ́рою притека́ющихъ во хра́мъ тво́й, и по́мощи отъ тебе́ прося́щіи, ника́коже погрѣши́ша.

Аха́ва, нечести́ваго царя́, ты́, боже́ственный проро́че, обличи́лъ еси́ и я́ко престу́пника зако́на судо́мъ Бо́жіимъ осуди́лъ еси́.

Безсту́дная цари́ца Іезаве́ль тебе́, боже́ственнѣйшій проро́че, иска́ше уби́ти, я́ко на тоя́ несвяще́нныя свяще́нники по достоя́нію су́дъ сме́ртный наве́лъ еси́.

Богоро́диченъ: Мѣ́сто свяще́нія сла́вы и мы́сленную, Чи́стая, трапе́зу, хлѣ́бъ, Христа́, жи́знь всѣ́хъ пріе́мшую, пое́мъ Тя́, Влады́чице.

Сѣда́ленъ, гла́съ 8. Подо́бенъ: Прему́дрости.

Исто́чника чуде́съ, проро́ковъ удобре́ніе вси́ пѣ́сненно, вѣ́рніи, восхва́лимъ, Ѳесви́тянина Илію́: съ пло́тію бо еще́ сы́й безсме́ртенъ, я́ко ме́ртвъ увѣря́етъ ме́ртвыхъ воста́ніе. Тѣ́мже дерзнове́ніе къ Бо́гу имѣ́я, подава́етъ исцѣле́нія вѣ́рою прося́щимъ и мо́лится Христу́ прилѣ́жно согрѣше́ній оставле́ніе пода́ти пра́зднующимъ любо́вію святу́ю па́мять его́. [Два́жды.]

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безъ сѣ́мене, моли́ся прилѣ́жно о всѣ́хъ рабѣ́хъ Твои́хъ, непреста́нно моля́щих Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти, воспѣва́ющимъ досто́йно сла́ву Твою́.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, еди́не Человѣколю́бче.

Кореносѣка́тель у́бо яви́лся еси́ зло́бы, му́дре проро́че, добродѣ́тели же насади́тель, тѣ́мже тя́ ублажа́емъ.

Укоря́ше тя́ словесы́ вдови́ца, пи́щею сме́рти, проро́че, о́трока воста́ніе увѣря́ющи.

Назна́менова сла́ву Тро́ическую я́вѣ дунове́ніемъ тричи́сленнымъ, ма́тери дѣ́тища жи́ва дарова́.

Ко́ль разже́глся еси́, паля́ Боже́ственнымъ огне́мъ и ре́вностію, о проро́че, царя́ облича́я, творя́ща беззако́нія.

Богоро́диченъ: Мо́лимъ Тя́, Чи́стая, Бо́га безъ сѣ́мене заче́ншую, при́сно моли́тися за рабы́ Твоя́.

Инъ.

Ирмо́съ: Услы́шахъ, Го́споди, слу́хъ Тво́й и убоя́хся, я́ко неизрече́ннымъ совѣ́томъ, Бо́гъ сы́й Присносу́щный, отъ Дѣ́вы прише́лъ еси́, вопло́щся. Сла́ва снизхожде́нію Твоему́, Христе́, сла́ва си́лѣ Твое́й.

Вѣнча́ тя́ Госпо́дь проро́ка, прему́дре, и благода́ть тебѣ́ да́руя прорица́ти бу́дущая, я́ко настоя́щая. Тѣ́мже, ны́нѣ словесе́мъ сбытіе́ зря́ще, хвала́ми при́сно тя́, я́ко и́стиннаго проро́ка, ублажа́емъ.

Ели́ко попремно́гу смиренному́дріемъ укра́шена проро́ка Твоего́ душа́, Христе́ Бо́же, толи́ко па́че огня́ ре́вностію распала́ема, сту́дныя свяще́нники погуби́.

Лице́мъ, я́ко зерца́ломъ разрѣ́шшимся, лицу́ Христо́ву предстои́ши, пречу́дне проро́че, отону́дуже, на́съ ми́лостивно посѣща́й, да вси́ тя хвала́ми, я́ко проро́ка, ублажа́емъ.

Богоро́диченъ: Наде́жду, и утвержде́ніе, и спасе́нія стѣ́ну неруши́му Тя́ стяжа́вше, Всепѣ́тая, зло́бы вся́кій избавля́емся.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Зако́нъ оте́ческій тя́ я́ко моли́твенника всеи́стинна показа́, чудодѣ́йственника, обраща́юща естества́ стихíй, Иліе́, и преподо́бну же́ртву попаля́юща вода́ми.

Посрами́лъ еси́ изря́дно, я́ко и́стины служи́тель, преподо́бне, скве́рнаго студа́ проро́ки, всеблаже́нне Иліе́, я́вѣ начерта́въ Тро́ическую си́лу.

Сло́вомъ благода́ти свяще́нствуя, Иліе́, закла́лъ еси́ свяще́нники сту́дныя непови́нными твои́ми рука́ми, я́коже огне́мъ, ре́вностію опаля́емь.

Богоро́диченъ: Тебѣ́, ро́ждшей Христа́, всему́ Содѣ́теля, взыва́емъ: ра́дуйся, Чи́стая; ра́дуйся, Свѣ́тъ возсія́вшая на́мъ; ра́дуйся, вмѣсти́вшая Бо́га Невмѣсти́маго.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Иже боже́ственныя благода́ти явле́на незаходи́мая заря́ и у́мъ боже́ственнѣйшій, проро́че Иліе́, и́скренно стяжа́въ, благочести́выхъ къ пѣ́нію возставля́еши.

Кто́ не удиви́тся боже́ственнѣй ре́вности твое́й, проро́че всече́стне? Кто́ ли не воспое́тъ Христа́, толи́ку крѣ́пость тебѣ́ дарова́вшаго?

Отъ Бо́га, проро́че, украси́лся еси́ проро́чествомъ, Иліе́ пречу́дне, отню́дъ Бо́гу ве́сь соедини́вся, пре́лесть облича́я, изра́ильтяны къ Бо́жію позна́нію приве́лъ еси́.

Богоро́диченъ: Со́лнце ро́ждши, Богоро́дице, незаходи́мое, всего́ мя́ просвѣти́, омраче́ннаго страстьми́, и испо́лни мя́ Боже́ственнаго свѣ́та.

Пѣ́снь 6.

Ирмо́съ: Бе́здна согрѣше́ній обы́де мя́ послѣ́дняя, но, я́ко проро́ка Іо́ну, Го́споди, Го́споди, возведи́ изъ истлѣ́нія живо́тъ мо́й.

Сто́лпъ благоче́стія и житія́ чи́стаго, сади́тель чистоты́ бы́лъ еси́, а́нгеломъ же подо́бникъ, чу́дный Иліе́ богоно́се.

Гнѣ́въ тя́ пророкоубíйцы жены́ устраши́въ, вяза́ти и рѣши́ти пріи́мша дожде́въ тече́ніе, чу́дный Иліе́, бѣ́гати твори́тъ.

Возвы́силъ еси́, колѣ́на преклони́въ, ума́ превознесе́нное о́ко, мольбо́ю изря́дною рѣше́ніе творя́, и бразды́ земны́я упои́лъ еси́ ту́чами.

Богоро́диченъ: Купина́ Тя́ въ Сина́и, неопа́льно прибли́жився огню́, преднапи́суетъ Ма́терь Приснодѣ́ву, Всепѣ́тая Богоро́дице Марíе.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Моле́бное пѣ́ніе приноси́ къ Бо́гу, проро́че всечестны́й, о всѣ́хъ, въ Боже́ственный хра́мъ тво́й притека́ющихъ, да тя́ всегда́, я́ко вели́ка засту́пника, почита́емъ.

Умъ человѣ́чь не дости́гнетъ житіе́ твое́, проро́че, по досто́инству похвали́ти: па́че у́бо у́мныхъ чино́въ возвели́чился еси́, зря́ Христо́во преображе́ніе.

Иже вся́ческихъ Госпо́дь и Творе́цъ на́мъ яви́ся, по твоему́ проро́честву, блаже́нне Иліе́, вся́ человѣ́ки призыва́я къ позна́нію Своему́, я́ко Человѣколю́бецъ.

Богоро́диченъ: Марíе, чи́стый дѣ́вства сосу́де, очи́сти мо́й у́мъ отъ страстна́го омраче́нія и испо́лни благода́ти и пра́вды се́рдце мое́, Всенепоро́чная.

Конда́къ, гла́съ 2:

Проро́че и прови́дче вели́кихъ дѣ́лъ Бо́га на́шего, Иліе́ великоимени́те, вѣща́ніемъ твои́мъ уста́вивый водото́чныя о́блаки, моли́ о на́съ еди́наго Человѣколю́бца.

Икосъ:

Мно́гое человѣ́ковъ беззако́ніе, Бо́жіе же мно́гое человѣколю́біе зря́, проро́къ смуща́шеся Илія́, яря́ся, и словеса́ неми́лостивна къ Ми́лостивному подви́же, прогнѣ́вайся, возопи́въ, на отме́щущіяся Тебе́, Судіе́ пра́ведный! Но утро́бу Блага́го ника́коже подви́же, е́же му́чити Того́ отмета́ющіяся: при́сно бо покая́нія всѣ́хъ жде́тъ еди́ный Человѣколю́бецъ.

Пѣ́снь 7.

Ирмо́съ: Купина́ въ горѣ́ огненеопа́льная и росоно́сная пе́щь халде́йская, я́вѣ предписа́ Тя, Богоневѣ́сто, Боже́ственный бо невеще́ственный въ веще́ственнѣмъ чре́вѣ, Огнь неопа́льно прія́ла еси́. Тѣ́мже изъ Тебе́ Ро́ждшемуся пое́мъ: благослове́нъ еси́, Бо́же оте́цъ на́шихъ.

Пресла́вно Боже́ственною ты́ воображе́нною си́лою обле́клся, пи́щею четыредесятодне́вною, Иліе́ чу́дный, до́лгій ше́ствовалъ еси́ пу́ть. Тѣ́мже въ Хори́вѣ глаго́лалъ еси́: благослове́нъ Бо́гъ оте́цъ на́шихъ.

Хла́дъ кро́токъ показа́ и то́нокъ Го́спода тебѣ́, Иліе́, по Бо́зѣ ревну́ющу Вседержи́тели, не ду́хъ бу́ренъ, ни тру́съ, ни о́гнь страша́яй. Тѣ́мже Іису́су кро́ткому пѣ́лъ еси́: благослове́нъ еси́, Бо́же оте́цъ на́шихъ.

Богоявле́нія сподо́бился еси́ и проро́чества, я́коже вели́кій Моисе́й, проро́ки помазу́я Ду́хомъ и цари́, Иліе́ чу́дный. И, сла́вы на Ѳаво́рѣ Христо́вы зри́тель бы́въ, пѣ́лъ еси́: благослове́нъ еси́, Бо́же оте́цъ на́шихъ.

Богоро́диченъ: Ражда́еши безъ Сѣ́мене Безнача́льнаго и Превѣ́чнаго Го́спода, Отча Сы́на, му́дрость же и си́лу, напослѣ́докъ, Пречи́стая, па́че естества́ пло́тію, на обновле́ніе земны́хъ. Тѣ́мже изъ Тебе́ ро́ждшемуся зове́мъ: благослове́нъ Бо́гъ оте́цъ на́шихъ.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Лю́ди Изра́илевы, съ пятидесятонача́льникомъ къ тебѣ́, боже́ственный Иліе́, прише́дшія, огне́мъ съ небесе́, я́ко недосто́йныя, попали́лъ еси́.

Иже боговидѣ́ніемъ осія́емь, досто́йно боже́ственнѣйшій проро́къ бы́лъ еси́, Иліе́ всечестны́й, и Ваа́ловы же́ртвы отню́дъ упраздни́лъ еси́.

Ели́ко Ду́хъ Пресвяты́й подаде́ прорица́ти, всечестны́й проро́че Иліе́, проре́клъ еси́ о прише́ствіи Сы́на Бо́жія и не погрѣши́лъ, всеблаже́нне. Ему́же пое́мъ: благослове́нъ Бо́гъ оте́цъ на́шихъ.

Сту́днымъ свяще́нникомъ, трапе́зу Іезаве́лину непра́ведно яду́щимъ, вои́стинну судо́мъ Бо́жіимъ и проро́ка руко́ю я́дъ сме́рти по достоя́нію отры́гнуся.

Богоро́диченъ: Спаси́ мя, Ма́ти Бо́жія, содержи́ма глубино́ю согрѣше́ній, и вся́кія враго́въ исхити́ зло́бы, да Твое́, спаса́емь, велича́ю заступле́ніе.

Пѣ́снь 8.

Ирмо́съ: Устраши́ся отроко́въ благочести́выхъ сообра́знаго души́ нескве́рнаго тѣ́ла и устрани́ся воспита́нный въ безмѣ́рномъ веществѣ́ неутружде́нъ о́гнь, присноживу́щу же, изувя́дщу пла́меню, вѣ́чнующая пѣ́снь воспѣва́шеся: Го́спода, вся́ дѣла́, по́йте и превозноси́те во вся́ вѣ́ки.

Изря́дно обрѣ́те Аха́въ ро́да отраже́ніе всегуби́тельное, проро́ка обличе́ніемъ, скве́рнаго убíйства ме́рзское муче́ніе: Ѳесви́тянинъ же отъ огнедохнове́нна ума́ Жизнода́телю пѣ́снь воспѣва́ше: Го́спода, вся́ дѣла́, по́йте и превозноси́те во вся́ вѣ́ки.

Дожди́тъ тебѣ́ о́гнь съ небесе́, попаля́я, Иліе́, одержи́мыхъ пятьдеся́тъ сугу́бо, я́ко Бо́жію изря́дну служи́телю: Держа́щему бо присноживо́тную жи́знь боголѣ́пно пѣ́снь взыва́лъ еси́: Го́спода, вся́ дѣла́, по́йте и превозноси́те во вся́ вѣ́ки.

Таи́нника тя́ показа́ Христо́съ, я́ко чистоты́ сади́теля и дѣ́вства Пребоже́ственное прозябе́ніе на Ѳаво́рѣ Боже́ственнаго воплоще́нія, Божества́ непостижи́мый свѣ́тъ во Свое́й пло́ти показа́въ тебѣ́, зову́щу: Го́спода, вся́ дѣла́, по́йте и превозноси́те во вся́ вѣ́ки.

Богоро́диченъ: Всебога́тна бы́сть утро́ба Бо́жія Ма́тере, я́ко пріи́мши Сло́во дебельство́мъ пло́ти, отъ Нея́ смѣ́шена земна́го зра́ка по ѵпоста́си яви́ся гра́дъ Бо́жій, въ не́мже Вы́шній жи́ти благоволи́. Ему́же пое́мъ: Го́спода, вся́ дѣла́, по́йте и превозноси́те во вся́ вѣ́ки.

Инъ.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Иже вся́ вѣ́дый, я́ко Бо́гъ, бу́дущихъ и бы́ти хотя́щихъ ра́зумъ, тебѣ́, Иліе́, я́ко вѣ́рну су́щу ввѣря́етъ и дале́че су́щая, я́ко бли́зъ, показу́етъ.

Благочести́вымъ дерзнове́ніемъ вжили́въ у́мъ тво́й, блаже́нне проро́че, прорица́еши разстоя́щаяся, я́ко бли́зъ су́щая, всечестны́й проро́че.

Очи́стивъ отъ вся́кія скве́рны, боже́ственный проро́че, тво́й у́мъ, тѣ́мъ и ве́сь свя́тъ бы́лъ еси́, къ Боже́ственному свѣ́ту всѣ́хъ наставля́я.

Богоро́диченъ: Его́же родила́ еси́, Сло́во, па́че сло́ва, Богороди́тельнице Чи́стая, о на́съ моли́, вѣ́рно чту́щихъ Тя́.

Пѣ́снь 9.

Ирмо́съ: Яже пре́жде Со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.

Нетре́нное человѣ́ки ше́ствіе на земли́ пожи́въ, ми́лотію струю́ Іорда́нскую Ѳесви́тянинъ преше́дъ, ору́жникъ возду́шный, неботе́чное соверши́ стра́нное ше́ствіе Ду́хомъ.

Благоче́стія ре́вностію Ѳесви́тянинъ опаля́емь, на огнезра́чнѣй колесни́цѣ взима́ется, ми́лоть же све́рже, е́юже, утаи́тися не возмо́же Елиссе́й, одѣ́явся, пріе́млетъ Боже́ственную благода́ть.

Открове́ннѣ богови́децъ Ѳесви́тянинъ съ Моисе́емъ зри́тъ, я́же о́ко не ви́дѣ, и у́хо не слы́ша, и на се́рдце человѣ́къ земноро́дныхъ не взы́де, воплоще́на Го́спода, на Ѳаво́рѣ Вседержи́теля.

Богоро́диченъ: Напра́снаго дре́вняго отъя́тельницу осужде́нія и прама́тере исправле́ніе, Юже ро́да къ Бо́гу вину́ присвое́нія, къ Зижди́телю мо́стъ, Тя́, Богоро́дице, велича́емъ.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Заре́ю невеще́ственною Живонача́льныя Тро́ицы, проро́че Иліе́, обожа́емь, тѣ́мъ тебе́ вси́ къ Бо́гу о мíрѣ моли́твенника приво́димъ, блаже́нне.

На земли́ тя а́нгела позна́хомъ, боже́ственный проро́че, и на небеси́ отню́дъ человѣ́ка Бо́жія, я́коже и Са́мъ Госпо́дь рече́: поне́же Илія́ человѣ́къ жесто́къ еси́, согрѣша́ющу Изра́илю терпѣ́ти не мо́жеши, взы́ди ты́ ко Мнѣ́, да Азъ до́лѣ сни́ду.

На земли́, боже́ственный проро́че, я́ко безпло́тенъ, пожи́лъ еси́ и ны́нѣ, на небеса́ возноси́мь, со а́нгельскими ли́ки ликовству́еши; на́съ свы́ше назира́й, пою́щихъ тя́, блаже́нне.

Богоро́диченъ: Но́сиши на объя́тіяхъ Бо́га, нося́щаго вся́ческая, и пита́еши Пита́теля, Чи́стая, на́мъ уподо́бльшася, Его́же моли́ лю́демъ Твои́мъ дарова́ти всѣ́хъ лю́тыхъ избавле́ніе.

Свѣти́ленъ. Подо́бенъ: Свѣ́те неизмѣ́нный.

Свѣ́тъ, на о́гненнѣй четвероко́нной колесни́цѣ небоше́ственна тя́ показа́вый ору́жника, Иліе́, не пожре́ вконе́цъ: о́гнь бо язы́комъ о́гненнымъ привле́клъ еси́ ни́зу и изсуши́лъ еси́ ту́чи.

Сла́ва: На небе́сныя кру́ги о́гненною колесни́цею возне́слся еси́, ны́нѣ твою́ соверша́ющія па́мять вѣ́рно назира́я, я́ко Свѣ́та бли́зъ сы́й, свѣ́тъ мы́сленный на́мъ да́вай.

И ны́нѣ, богоро́диченъ: Иже отъ Бо́га мíрови пода́ннымъ благи́мъ Ты́ вина́ была́ еси́, Богоро́дице, но и ны́нѣ моли́ о о́бщемъ спасе́ніи благопремѣ́ннаго Бо́га.

На хвали́техъ стихи́ры на 6, гла́съ 8. Подо́бенъ: Что́ ва́съ нарече́мъ.

Егда́ ты́, проро́че чу́дный,* Бо́гу добродѣ́телію и житіе́мъ чи́стымъ* сраствори́вся съ Ни́мъ, о́бласть пріе́мъ,* тва́рь по ра́зуму измѣ́рилъ еси́,* и две́ри дожде́вныя во́лею затвори́лъ еси́,* и свы́ше о́гнь низве́лъ еси́,* и враги́ погуби́лъ еси́.* Моли́ спасти́ся душа́мъ на́шимъ.

Ре́вностію Госпо́днею распала́емь,* беззако́нныя цари́ ты́ изобличи́лъ еси́ я́вѣ,* сту́дныя свяще́нники ты́ умори́лъ еси́ те́плѣ,* вже́гъ о́гнь въ водѣ́, блаже́нне,* пи́щу же недѣ́ланную источи́лъ еси́* и во́ды Іорда́нскія ми́лотію твое́ю пресѣ́клъ еси́.* Моли́ спасти́ся душа́мъ на́шимъ.

Егда́ ты́, проро́че, показа́лъ еси́* на земли́ я́ко вои́стинну ю́же на небеси́ жи́знь,* жи́знію су́щею въ тебѣ́ соста́вною обогатѣ́яся,* о́трока ме́ртва твои́мъ вдохнове́ніемъ воскреси́лъ еси́,* сме́рти кромѣ́ на лѣ́та лу́чша пребыва́еши,* на колесни́цу о́гненну всѣ́лъ еси́,* на высоту́ возвыша́емь.* Моли́ спасти́ся душа́мъ на́шимъ.

Ины стихи́ры, гла́съ 1, самогла́сны.

[Ге́рмана:] Илія́ ревни́вый и страсте́й самоде́ржецъ* на возду́сѣ носи́мь бя́ше дне́сь,* всемíрнаго таи́нникъ спасе́нія начина́тель.* О, сла́вы честны́я,* е́йже сподо́бися небопа́рный проро́къ* и проро́ковъ изря́дное удобре́ніе!* Се́й бо во пло́ти а́нгелъ* и безпло́тенъ человѣ́къ показа́ся исправле́ньми.* Его́же хва́ляще, рце́мъ:* заступи́ на́съ, му́дре, въ де́нь Су́дный.

Духо́вными пѣ́сньми проро́ки Христо́вы вси́ восхва́лимъ:* Илія́ бо Ѳесви́тянинъ небоше́ственникъ бы́сть,* и ми́лотію Елиссе́й благода́ть прія́тъ сугу́бу отъ Бо́га,* и свѣти́льницы свѣ́тліи вселе́ннѣй яви́шася,* моля́ще непреста́нно о душа́хъ на́шихъ.

Дави́дски дне́сь, вѣ́рніи,* проро́ка Госпо́дня пѣ́сньми почти́мъ,* Илію́ Ѳесви́тянина, и ревни́теля пресвѣ́тла:* се́й бо язы́комъ не́бо, я́ко ко́жу, затвори́* и зе́млю плодови́тую непло́дну сотвори́.* О, пресла́внаго чудесе́!* зе́мленъ человѣ́къ небесе́мъ одожди́ти дождя́ не даде́.* О, чудесе́! тлѣ́ненъ человѣ́къ въ нетлѣ́ніе одѣ́яся* и на небеса́ востече́ о́гненною колесни́цею,* ми́лотію же Елиссе́ю сугу́бу благода́ть дарова́въ,* царя́ облича́я,* и лю́ди непокори́выя гла́домъ растлѣва́етъ,* іере́и сту́дныя вся́ посрами́* и вдови́ча сы́на сло́вомъ воскреси́.* Того́ мольба́ми, Христе́ Бо́же на́шъ,* въ ми́рѣ сохрани́ правосла́внаго Импера́тора на́шего* и побѣ́ды одолѣ́нія на враги́ Тому́ да́руй.

Сла́ва, гла́съ 8:

Проро́ковъ верхо́вники и всесвѣ́тлыя свѣти́льники вселе́нныя въ пѣ́снехъ почти́мъ, вѣ́рніи, Илію́ и Елиссе́я, и Христу́ возопіе́мъ ра́достно: Благоутро́бне Го́споди, пода́ждь лю́демъ Твои́мъ, мольба́ми проро́къ Твои́хъ, оставле́ніе грѣхо́въ и ве́лію ми́лость.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ [и изба́ви на́съ отъ вся́кія ну́жды и печа́ли].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна пе́рваго кано́на, пѣ́снь 3-я, и втора́го, 6-я. Проки́менъ, гла́съ 4: Ты́ еси́ іере́й во вѣ́къ,* по чи́ну Мелхиседе́кову. Сти́хъ: Рече́ Госпо́дь Го́сподеви моему́: сѣди́ одесну́ю Мене́, до́ндеже положу́ враги́ Твоя́ подно́жіе но́гъ Твои́хъ. Апо́столъ Іа́ковля посла́нія, зача́ло 57. Аллилу́ія, гла́съ 4: Моисе́й и Ааро́нъ во іере́ехъ Его́ и Саму́илъ въ призыва́ющихъ и́мя Его. [Сти́хъ: Призыва́ху Го́спода, и То́й послу́шаше и́хъ.] Ева́нгеліе отъ Луки́, зача́ло 14. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Мине́я пра́здничная, имену́емая Анѳоло́гіонъ, содержа́щая слу́жбы Госпо́дскимъ и Богоро́дичнымъ пра́здникомъ и святы́мъ избра́ннымъ. — М.: Сѵнода́льная Тѵпогра́фія, 1901. — Л. 369 об. – 382 об.

/ Къ оглавленію раздѣла /


Наверхъ / Къ титульной страницѣ

0