Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 19-й де́нь.
Па́мять свята́го пра́веднаго Стефа́на Высо́каго, Де́спота Се́рбскаго.

НА ВЕЛИЦѢЙ ВЕЧЕРНИ,
Блаже́нъ му́жъ.., антифо́нъ 1-й. На Го́споди воззва́хъ: стихи́ры на 8, гла́съ 2:

Весели́ся дне́сь, сла́вная ла́вро Манасíе, се́ бо вѣ́рніи ро́да се́рбскаго собира́ются подъ святы́я ку́полы твоя́ просла́вити и́мя свята́го кти́тора твоего́, и́же со святы́ми а́нгелы и богоуго́дники предстои́тъ престо́лу Бо́жію и съ ни́ми мо́лится о оте́чествіи на́шемъ. Мы́ же, почита́юще па́мять его́, Го́сподеви вопіе́мъ: моли́твами му́драго Стефа́на, Го́споди, поми́луй и сохрани́ на́съ. [Два́жды.]

Кíими похвала́ми воспое́мъ, Стефа́не, труды́ твоя́, и́миже, утвержда́я свято́е Правосла́віе, въ земли́ свое́й хра́мы стро́илъ еси́, лю́демъ же свои́мъ велѣ́лъ еси́ о зако́нѣ Бо́жіи прилѣжа́ти и, всѣ́хъ вели́кою любо́вію возлюби́въ, оте́чество свое́ благода́ти Христо́вой возве́лъ еси́, тѣ́мже и вся́ земля́ на́ша сла́витъ тя́ дне́сь и, чту́щи па́мять твою́, вопіе́тъ: Стефа́не прему́дре, побо́рствуй на́мъ моли́твами твои́ми у Го́спода на́шего и укрѣпи́ ны́ духо́вными си́лами. [Два́жды.]

Вели́кою ра́достію се́рдце на́ше исполня́ется дне́сь, и се́ ны́нѣ собра́хомся поклони́тися ра́цѣ свята́го, избавля́ющаго моли́твами свои́ми сы́ны ро́да своего́ и возводя́щаго и́хъ лѣ́ствицами жи́зни вѣ́чныя, да приведе́тъ ихъ ку́пно съ ни́мъ сла́вити вели́чіе Бо́жіе и служи́ти престо́лу Христо́ву огнезра́чному.

Боже́ственною благода́тію озаря́емь, Стефа́не великоимени́те, уразумѣ́лъ еси́, кíими по́двиги одушевля́ти лю́ди своя́, любо́вію вѣ́ры Правосла́вныя сердца́ и́хъ возгрѣва́лъ еси́ и, собира́я и́хъ подъ ма́терни крилѣ́ ея́, оте́чество твое́ уподо́билъ еси́ Ца́рствію Бо́жію, сего́ ра́ди мо́лимъ тя́, свя́те: моли́твами твои́ми отжени́ отъ на́съ о́блаки невѣ́рія и борю́щія ны́ враги́ сокруши́.

Сла́ва, гла́съ 2:

Что́ тя́ нарече́мъ, похвало́ оте́чества се́рбскаго? Со́лнце ли, благода́тною теплото́ю оживля́ющее мíръ христіа́нскій, звѣзду́ ли, бога́тою наде́ждею сія́ющую удруче́нному ро́ду христіа́нскому? Се́ ны́нѣ, вѣ́дяще тя́ ангелоподо́бна, ку́пно съ пра́ведники служа́ща Го́сподеви, отверза́емъ ти́ сердца́ своя́, мірски́ми страда́ньми уязвле́ная, и мо́лимъ тя́, великоимени́те: хода́тайствуй у престо́ла Го́спода си́лъ о укрѣпле́ніи оте́чества своего́ и спасе́ніи ду́шъ на́шихъ.

И ны́нѣ, богоро́диченъ:

Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.

Вхо́дъ. Проки́менъ дне́ и чте́нія три́.

При́тчей чте́ніе. [Главы́ 10 и 11.]

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 3:

Пріиди́те, бра́тіе, восхва́лимъ, ра́дующеся, Де́спота Высо́каго, его́же Госпо́дь возлюби́въ, показа́ мудрѣ́йша человѣ́къ кни́жныхъ, и́хже и собра́въ въ сла́внѣмъ гра́дѣ Ре́савѣ, я́коже пче́лы трудолю́бныя, повелѣ́ и́мъ писа́ньми святы́ми свои́ми возноси́ти сла́ву Це́ркве Христо́вы и напая́ти ду́ши люде́й его́ уче́ніемъ сло́ва Бо́жія, его́же сла́достію освяти́ и ду́ши на́ша.

Лю́діе ро́да се́рбскаго, тецы́те хра́момъ Стефа́на Высо́каго и принеси́те благода́рственныя моли́твы, помина́юще па́мять его́ святу́ю и пѣ́снь ему́ благоговѣ́йно воспѣва́юще: ра́дуйся, Стефа́не люби́ме, во дво́рѣхъ небе́сныхъ и моли́ся о спасе́ніи на́шемъ.

Сла́ва, гла́съ 8:

Дне́сь Де́спотъ Стефа́нъ предстои́тъ Го́споду и со а́нгелы возно́ситъ благода́рныя хвалы́, мно́гими бо благодѣя́ньми уми́лостивися Госпо́дь ча́домъ его́ се́рбскимъ. Пріи́демъ у́бо и мы́ и, припа́дая ра́цѣ его́, помо́лимся: Го́споди, спаси́ ны́ и во свято́мъ Правосла́віи утверди́ ны́.

И ны́нѣ, богоро́диченъ, гла́съ то́йже:

Исхи́ти мя́, Влады́чице, руки́ змíя человѣкоубíйцы, хотя́ща мя́ лука́вствомъ поглоти́ти до конца́; сокруши́ че́люсти его́, молю́ Тя́, и ко́зни разори́, я́ко да избы́въ отъ ногте́й его́, велича́ю заступле́ніе Твое́.

На стихо́внѣ стихи́ры, гла́съ 2:

Му́дра тя́ ревни́теля Правосла́вія восхваля́емъ дне́сь и, и́щуще моли́твъ твои́хъ пра́ведныхъ ко Спаси́телю на́шему, припа́даемъ ти́, Стефа́не, вознося́ще въ вѣ́рѣ всехва́льную па́мять твою́: на тебѣ́ бо почи́ Ду́хъ Святы́й, Его́же благода́тію не премолчи́ моли́тися утверди́ти ду́ши на́ша.

Сти́хъ: Вознесо́хъ избра́ннаго отъ люде́й Мои́хъ.

Всехва́льне де́споте Высо́кій, еще́ въ жи́зни на земли́ восте́клъ еси́ на высоту́ добродѣ́тели, да небе́сными вѣнцы́ укра́шенъ бу́деши и со а́нгелы святы́ми водвори́шися во оби́тели пра́ведникъ, идѣ́же не преста́й съ ни́ми моли́тися о спасе́ніи ду́шъ на́шихъ.

Сти́хъ: Сего́ ра́ди пома́за Тя́, Бо́же, Бо́гъ Тво́й еле́емъ ра́дости [па́че прича́стникъ Твои́хъ].

На скрижа́лехъ се́рдца твоего́ имѣ́я напи́санныя за́повѣди Бо́жія, подража́лъ еси́ богому́дрымъ роди́телемъ свои́мъ: до́брая дѣ́лалъ еси́, чу́ждъ же бы́лъ еси́ тщесла́вныя горды́ни. Сего́ ра́ди ны́нѣ мо́лимъ тя́: моли́ся вы́ну о спасе́ніи всѣ́хъ на́съ.

[Сла́ва, гла́съ 8:

Дне́сь а́нгели на небеси́ ра́дуются, зря́ще лю́ди Бо́жія, вознося́щія па́мять му́жа богоизбра́ннаго. Мы́ же, съ ни́ми сла́вяще и́мя Стефа́на равноапо́стольнаго, воскли́кнемъ къ нему́ съ любо́вію сыно́внею: ра́дуйся,] Стефа́не Высо́кій, со́лнце незаходи́мое земли́ Се́рбскія, не забу́ди ны́, сы́ны твоя́, и пра́ведными свои́ми моли́твами проси́ у Вы́шняго, да укрѣпи́тъ десни́цу на́шу на враги́ оте́чества на́шего и пода́стъ душа́мъ на́шимъ ве́лію Свою́ ми́лость.

И ны́нѣ, богоро́диченъ, гла́съ то́йже:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

На благослове́ніи хлѣ́бовъ: Тропа́рь свята́го, два́жды. И Богоро́дице, Дѣ́во.., еди́ножды.

Тропа́рь свята́го, гла́съ 8:

Яко забра́ло крѣ́пкое яви́лся еси́ стра́ждущему ро́ду на́шему, Стефа́не прему́дре, и послѣ́довавъ ца́рственнымъ роди́телемъ твои́мъ, оте́чество на́ше украси́лъ еси́ це́рквами мно́гими. Въ вѣ́рѣ же святѣ́й отцы́ на́ша наста́вилъ еси́, въ не́йже не преста́й и на́съ укрѣпля́ти моли́твами твои́ми у престо́ла Вы́шняго.


НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1:

Образъ благоче́стія яви́вся, бога́тая дарова́нія духо́вная обрѣ́лъ еси́ у Христа́, Иже и просла́ви тя́ сла́вою неувяда́емою, дру́га тя́ въ раи́ содѣ́лавъ а́нгеломъ Свои́мъ. Съ ни́миже моли́ся о спасе́ніи ду́шъ на́шихъ. [Два́жды.]

Сла́ва, и ны́нѣ, богоро́диченъ, гла́съ то́йже:

О, Ма́ти Христа́ Бо́га на́шего, вонми́ моли́твамъ на́съ, недосто́йныхъ, се́ бо, окая́нніи, въ бѣда́хъ призыва́емъ Тя́, вопію́ще: ра́дуйся, Благода́тная! И про́симъ Тя́: моли́ся Сы́ну Твоему́ и Бо́гу на́шему о спасе́ніи ду́шъ на́шихъ.

По 2-мъ стихосло́віи сѣда́ленъ, гла́съ 4:

Бога́тствомъ духо́внымъ жела́я обогати́ти ро́дъ сво́й, писа́тели Боже́ственныхъ велѣ́ній я́ко напе́рсныя дру́ги имѣ́лъ еси́ и, вку́пѣ съ ни́ми труди́вся, кни́жныя ри́зницы своя́ исполня́лъ еси́, я́ко жи́тницы, Бо́жія благода́ти, въ ни́хже всегда́ сы́нове ро́да се́рбскаго ду́ши своя́ насыща́юще, сла́вятъ па́мять твою́. [Два́жды.]

Сла́ва, и ны́нѣ, богоро́диченъ, гла́съ то́йже:

Пресвята́я Влады́чице Богоро́дице, испроси́ на́мъ у Сы́на Твоего́ благода́ть неугаса́ющую и спасе́ніе вѣ́чное душа́мъ на́шимъ.

Поліеле́й.

Велича́ніе: Велича́емъ тя́, святы́й пра́ведный де́споте Стефа́не, и чте́мъ святу́ю па́мять твою́, ты́ бо мо́лиши за на́съ Христа́, Бо́га на́шего. Псало́мъ избра́нный: [Госпо́дь мнѣ́ Помо́щникъ и не убою́ся...]

По поліеле́и сѣда́ленъ, гла́съ 8:

Присту́пимъ, бра́тіе, ра́цѣ Стефа́на богому́драго и воздади́мъ досто́йную хвалу́ и́мени его́, велегла́сно вопію́ще: ра́дуйся, похвало́ ро́да се́рбскаго, досто́инъ бо яви́лся еси́ вѣнце́въ неувяда́емыхъ у престо́ла Христо́ва, Ему́же, припа́дая, моли́ся утверди́ти оте́чество на́ше въ благоде́нствіи и святѣ́мъ Правосла́віи. [Два́жды.]

Сла́ва, и ны́нѣ, богоро́диченъ, гла́съ то́йже:

Иму́ще Тя́ неотсту́пную Хода́таицу у престо́ла Отца́ Небе́снаго о грѣ́шнѣмъ ро́дѣ человѣ́честѣмъ, смире́нно припа́даемъ Ти́ и мо́лимъ Тя́: на стези́ покая́нія наста́ви ны́, изба́ви ду́ши на́ша отъ грѣхо́вныхъ поги́белей и сотвори́ ны́ досто́йны со а́нгеломъ взыва́ти Ти́: ра́дуйся, Невѣ́сто неневѣ́стная.

Посе́мъ 1-й антифо́нъ 4-го гла́са. Проки́менъ, гла́съ 4: Десни́ца Госпо́дня вознесе́ мя́,* десни́ца Госпо́дня сотвори́ си́лу. Сти́хъ: Не умру́, но жи́въ бу́ду и повѣ́мъ дѣла́ Госпо́дня. Та́же: Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Отъ ю́ности твоея́ избра́лъ еси́ пу́ть свѣ́та Боже́ственнаго, Стефа́не ди́вне, и, ше́ствуя и́мъ, лю́ди твоя́ ко Христу́ приводи́лъ еси́. Го́рькая страда́нія испыта́ху се́рдце твое́, но си́ла благода́ти Христо́вы крѣпля́ше ду́хъ тво́й и яви́ тя́ благодѣ́теля стра́ждущимъ и утѣ́шителя опеча́леннѣй ма́тери твое́й. Бу́ди же и на́мъ всѣ́мъ путеводи́тель ко всему́ благо́му и моли́ся Влады́цѣ Христу́ дарова́ти душа́мъ на́шимъ ми́ръ и ве́лію ми́лость.

Кано́нъ Богоро́дицы со ирмосо́мъ на 6 и свята́го на 8.

Кано́нъ свята́го, гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Восхвали́ти прему́драго отве́рзи ми́ у́мъ, Го́споди, наста́ви мя́ Ду́хомъ Твои́мъ Святы́мъ, да воспою́ па́мять его́ по достоя́нію.

Похвало́ вели́кая кни́жнымъ лю́демъ земли́ Се́рбскія, утѣ́хо уничиже́ннымъ и ра́досте опеча́леннымъ, помяни́ всѣ́хъ си́рыхъ, стра́ждущихъ ны́нѣ, и моли́ся о ни́хъ у престо́ла огнезра́чнаго.

О, блаже́нне Де́споте Высо́кій, на свѣ́щницѣ оте́чества твоего́ свѣти́ло вели́кое всѣ́мъ бы́лъ еси́ въ ро́дѣ на́шемъ, освѣща́я пу́ть къ Ца́рствію небе́сному.

Богоро́диченъ: Ма́ти ми́лостивая Христа́ Бо́га на́шего, Его́же кромѣ́ зако́на естества́ родила́ еси́, не преста́й моли́твами Свои́ми проси́ти ми́лости Его́, да спасе́тъ ны́ отъ прегрѣше́ній на́шихъ.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Наде́ждею испо́лнилъ еси́ сердца́ люде́й твои́хъ, опеча́ленныхъ поги́бельными ра́ти ага́рянскими, и, укрѣпи́въ сердца́ и́хъ му́жествомъ, подо́бно Іису́су Нави́ну, возве́лъ еси́ и́хъ къ побѣ́дѣ враго́въ.

Сто́лпе вѣ́ры, вождю́ богоизбра́нный, научи́лъ еси́ на́съ въ бѣда́хъ бо́дрствовати и въ моли́твахъ Го́сподеви неусыпа́ти.

Му́дрости ева́нгельскія носи́телю, а́нгельскихъ медото́чныхъ слове́съ учи́телю, утверди́ ны́ въ си́лѣ боговѣ́дѣнія.

Богоро́диченъ: Притецы́те, бра́тіе, единоду́шно принесе́мъ Богоро́дицѣ досто́йное Ея́ хвале́ніе, Та́ бо на́съ спаса́етъ моли́твами Свои́ми воплоти́вшемуся отъ Нея́ Спаси́телю.

Сѣда́ленъ, гла́съ 6:

Свѣ́тлость небе́снаго сія́нія яви́лся еси́ оте́честву твоему́, обновля́я въ не́мъ ра́дости непобѣди́маго Креста́ и просвѣща́я погиба́ющія во тмѣ́ лю́ди твоя́, Стефа́не ангелоподо́бне, хва́лимъ тя́. [Два́жды.]

Сла́ва, и ны́нѣ, [тро́иченъ], гла́съ то́йже:

О, Пресвята́я Тро́ице, въ Не́йже сла́вимъ Еди́наго Бо́га, при́зри на ны́, въ вѣ́рѣ коле́блемыя, и сохрани́ ду́ши на́ша невреди́мы, я́ко да сла́вимъ Тя́ со а́нгелы, при́сно Ти́ хвалы́ принося́ще.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Стефа́не, се́рбскихъ ду́шъ ра́дованіе, разумѣ́хомъ бо́ли души́ твоея́ о поги́бшемъ роди́тели твое́мъ и друго́въ его́, пре́дковъ на́шихъ, и се́ мо́лимъ тя́: отжени́ отъ на́съ подо́бную печа́ль.

Лю́діе се́рбстіи, возведи́те очеса́ своя́ къ небеси́ и у́зрите до́блестнаго Стефа́на Высо́каго посредѣ́ пре́дковъ на́шихъ, торжеству́юща ны́нѣ съ ни́ми во сла́вѣ Бо́жіей, всегда́ побѣжда́ющей враги́ Креста́ Правосла́внаго.

Яко оре́лъ, паря́щій небе́сными высота́ми, Стефа́нъ му́дрый воздви́жеся на высоту́ Боже́ственнаго уче́нія и наставля́ше духо́вными писа́ньми пре́дки на́ша, отъ ни́хже и мы́ сія́ прія́вше, восхваля́емъ и́мя его́, я́ко вели́каго благодѣ́теля ро́да се́рбскаго.

Богоро́диченъ: Богоро́дице, Ма́ти Христа́ Бо́га на́шего, всегда́ помина́емъ Тя́ и въ моли́твахъ возно́симъ и́мя Твое́, прося́ще Твоего́ хода́тайства у престо́ла Сотво́ршаго вселе́нную о спасе́ніи ду́шъ на́шихъ.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Се́рбіе, Бо́гомъ возлю́бленная, помни́ всегда́ дни́ вели́кихъ скорбе́й и страда́ній, я́же ча́да твоя́ терпя́ху грѣхо́въ ра́ди роди́телей свои́хъ, отъ ни́хже всегда́ да сохрани́тъ ны́ Госпо́дь.

Стефа́нъ яви́ся любому́дръ наро́ду своему́ и, повину́яся словесе́мъ ева́нгельскимъ, крѣпля́ше се́рдце свое́ ду́хомъ пра́вды, ду́хомъ любве́ и соболѣ́знованія къ лю́демъ свои́мъ.

Пріиди́те, рачи́теліе Боже́ственнаго законовѣ́дѣнія, и почерпи́те му́дрость исто́чниковъ Христо́выхъ учи́лищъ, я́же откры́ Стефа́нъ Высо́кій душа́мъ на́шимъ.

Богоро́диченъ: Ве́лія сла́ва Твоя́, Пресвята́я Богоро́дице, возно́сится въ ро́дѣ се́рбстѣмъ, ему́же Сы́нъ Тво́й посла́ апостолоподо́бна ревни́теля, Стефа́на де́спота, и́же воздви́же и освяти́ лю́ди своя́ вѣ́рою Христо́ва спасе́нія.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Игомъ лю́таго порабоще́нія оте́чество на́ше обремене́но бы́сть, и вси́ го́рько пла́кахуся, но Стефа́нъ му́дрый утѣша́ше всѣ́хъ упова́ніемъ ве́ліимъ на Го́спода Всеси́льнаго.

Земле́ Се́рбская, преда́ждь забве́нію лю́тыя го́рести и возвесели́ся со́лнцу благода́ти, получе́нномъ де́спотомъ Стефа́номъ, его́же теплото́ю согрѣва́етъ всегда́ сердца́ сыно́въ твои́хъ.

Мно́жество вдо́въ и стра́ждущихъ припа́даху тебѣ́, Стефа́не, и пла́кахуся о ча́дѣхъ свои́хъ и о бра́тіи, изги́бшихъ съ роди́телемъ твои́мъ, ты́ же, милосе́рдовавъ о ни́хъ, вся́кому воздава́лъ еси́ къ жи́зни потре́бная, утѣша́я и́хъ Бо́жіимъ правдолю́біемъ.

Богоро́диченъ: Ра́дуйся, Звѣздо́, Со́лнце спасе́нія ро́ждшая, къ Твоему́ покро́ву прибѣга́емъ и мо́лимся: изба́ви ны́, стра́ждущія, отъ мно́жества лю́тыхъ прегрѣше́ній и къ Сы́ну Твоему́ приведи́ на́съ.

Конда́къ, гла́съ 4:

Вѣ́рнаго Ти́ во́ина Стефа́на Высо́каго возлюби́въ, Христе́ Бо́же, низпосла́лъ еси́ ему́ си́лу благода́ти, во е́же увѣ́дѣти та́йны небе́сныя и ревнова́ти о сла́вѣ Твое́й, е́йже кла́няющеся и мы́, всегда́ мо́лимъ Тя́: поми́луй ны́, Спа́се, во Ца́рствіи Твое́мъ.

Икосъ:

Му́дрости исто́чникъ обрѣ́тъ въ Христо́вомъ Ева́нгеліи, Де́споте всехва́льне, ду́ши ро́да своего́ воздви́глъ еси́ къ высотѣ́ престо́ла Вы́шняго. Сего́ ра́ди и мы́, сы́нове твои́, припа́даемъ ти́ и, сла́вяще и́мя твое́, вопіе́мъ: ра́дуйся, Стефа́не, о́трасле благоче́стія роди́теля великому́ченика; ра́дуйся, благоговѣ́йныя ма́тере ча́до вожделѣ́нное; ра́дуйся, полко́въ ага́рянскихъ потреби́телю; ра́дуйся, защи́тниче оте́чества и стра́ждущаго ро́да христіа́нскаго; ра́дуйся, дру́же проповѣ́дниковъ Боже́ственныхъ уче́ній; ра́дуйся, опеча́ленныхъ утѣ́шителю; ра́дуйся, крѣ́посте духо́вная престо́льнаго Бѣ́лграда твоего́ и всего́ ро́да се́рбскаго; ра́дуйся, святи́телей на́шихъ Са́ввы и Симео́на Мѵроточи́ваго сомоли́твенниче; ра́дуйся, Де́споте Высо́кій, хвало́ на́ша, вѣ́чно живу́щая; ра́дуйся, Стефа́не, Ца́рствія Бо́жія сожи́телю; ра́дуйся, моли́твенниче о низпосла́ніи на́мъ благода́ти Христо́вы; ра́дуйся, свѣти́льниче, Бо́гомъ поста́вленный освѣща́ти на́мъ пу́ть къ Ца́рствію небе́сному; ра́дуйся, а́нгеловъ собесѣ́дниче о спасе́ніи ду́шъ на́шихъ; ра́дуйся, наде́ждо на́ша въ бѣда́хъ мíра сего́; ра́дуйся, Де́споте Высо́кій, живу́щій высото́ю а́нгельскія жи́зни; ра́дуйся, сла́вныя ла́вры Манасíи зижди́телю; ра́дуйся, Стефа́не, Бо́гомъ избра́нный вождю́ на́шъ духо́вный; ра́дуйся и моли́ся ко Го́споду дарова́ти на́мъ и всему́ ро́ду се́рбскому крѣ́пость къ побѣ́дѣ на враго́въ на́шихъ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Въ хра́мѣхъ твои́хъ собира́емся дне́сь пра́здновати па́мять твою́, Стефа́не, изоби́льно бо въ ни́хъ источа́ется благода́ть лю́демъ твои́мъ, отъ се́рдца призыва́ющимъ тя́ въ моли́твахъ свои́хъ.

Вне́млюще моли́твамъ ча́дъ твои́хъ, Стефа́не, не оставля́еши си́рыхъ страда́ти, благодѣ́тель бо еси́ ро́да своего́, и про́сиши всѣ́мъ по́мощь у Го́спода.

Съ похвала́ми па́мяти твое́й прихо́димъ ти́ дне́сь, Стефа́не му́дре, крѣ́пость бо еси́ всѣ́мъ, а́лчущимъ пра́вды Бо́жія и исцѣле́нія духо́внаго въ печа́лѣхъ жи́зни мíра сего́.

Богоро́диченъ: Пита́тельница еси́ Пита́теля тва́ри, Богоро́дице Пресвята́я, сего́ ра́ди, а́ще и недосто́йніи, припа́даемъ Ти́ и про́симъ моли́твъ Твои́хъ Сы́ну Твоему́, да пода́стъ душа́мъ на́шимъ крѣ́пость спасе́нія въ причаще́ніи свята́го Тѣ́ла и Кро́ве Его́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Оте́чество твое́ ра́дуется, Стефа́не, сла́вяще пра́здникъ па́мяти твоея́, благода́тными бо да́ры Ду́ха Свята́го укра́шенъ бы́лъ еси́; моли́ся у́бо, да и ду́ши на́ша бу́дутъ просвѣще́ны благода́тію Его́ Боже́ственною.

Па́че зла́та и ка́меній многоцѣ́нныхъ душа́ твоя́ возлюби́ му́дрость Ева́нгелія Христо́ва, тѣ́мже и мо́лимъ тя́, Стефа́не вожделѣ́нне, да и на́съ во́диши ко спасе́нію, пита́юще ду́ши на́ша се́ю му́дростію.

Ко́ль свѣтла́ яви́ся на́мъ дне́сь па́мять твоя́, христолюби́ве на́шъ просвѣти́телю, ко́ль вели́кое твое́ попече́ніе бы́сть о правосла́вномъ благоче́стіи ро́да се́рбскаго, сего́ ра́ди моли́твенно припа́даемъ ти́ и ублажа́емъ па́мять твою́, вѣ́чно живу́щую.

Богоро́диченъ: Яко ю́ноши, въ пещи́ несгара́еміи, просла́виша Тріѵпоста́снаго Бо́га, та́ко и мы́, Пресвята́я Богоро́дице, вѣ́рою озаря́еміи, сла́вимъ дѣ́вство Твое́, нетлѣ́нное и по рождествѣ́ на́шего Спаси́теля.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Яко стѣна́ вѣ́ры неколеби́мая, показа́лся еси́ о́бразъ ро́ду на́шему, Де́споте всехва́льне, и душа́ твоя́ въ вѣ́рѣ вознесе́на бы́сть ли́ку а́нгельскому, моли́ся и о на́съ, да и мы́ поми́ловани бу́демъ отъ прегрѣше́ній и со а́нгелы да пое́мъ сла́ву Бо́жію.

Сквозѣ́ о́гнь и во́ду искуше́ни бы́хомъ грѣхо́въ ра́ди оте́цъ на́шихъ, ны́нѣ же, иму́ще тя́ хода́тая у престо́ла Бо́жія, припа́даемъ ра́цѣ твое́й и про́симъ тя́, Стефа́не, да моли́твами твои́ми огради́ши на́съ отъ искуше́ній и утверди́ши ны́ въ братолю́біи.

Въ словесѣ́хъ Боже́ственныхъ писа́ній созна́лъ еси́ бла́гость и милосе́рдіе Бо́жіе, Де́споте всехва́льне, и сподо́бился еси́ Ца́рствія Его́ вы́шняго, моли́ и о на́съ, ча́дѣхъ твои́хъ, да сподо́бимся съ тобо́ю бы́ти въ Ца́рствіи Бо́жіи.

Богоро́диченъ: Христо́съ, Сія́ніе вѣ́чное, возсія́ на́мъ отъ ложе́снъ Твои́хъ, Богоро́дице, сего́ ра́ди, грѣ́шніи, припа́даемъ Ти́, да моли́твами Твои́ми хода́тайствуеши у Сы́на Своего́ спасти́ ны́ отъ тмы́ грѣхо́вныя.

Свѣти́ленъ:

Свѣ́томъ Богодухнове́нныхъ Писа́ній озари́вся, во́ждь крѣ́покъ во́иномъ избра́ннымъ яви́лся еси́, Стефа́не, и́мя се́рбское просла́вилъ еси́, любому́дрыя му́жи удиви́лъ еси́, сердца́ же Христо́выхъ враго́въ стра́хомъ испо́лнилъ еси́, при́зри ны́нѣ и на ны́ отъ небе́сныхъ черто́говъ и сокруши́ враги́, борю́щія на́съ. [Два́жды.]

[Сла́ва, и ны́нѣ,] богоро́диченъ:

Изба́вивши мíръ отъ кля́твы зако́нныя безсѣ́меннымъ Рождество́мъ, Богоотрокови́це, вели́кія сла́вы сподо́билася еси́, и ны́нѣ предстоя́ огнезра́чному престо́лу отъ Тебе́ Рожде́ннаго, моли́ся о спасе́ніи вѣ́рно почита́ющихъ Тя́.

На хвали́техъ стихи́ры, гла́съ 8:

Пріиди́те, бра́тіе, ублажи́мъ вели́каго Бо́жія уго́дника, и́же похвала́ бѣ́ оте́честву своему́, му́жествомъ бо и му́дростію просла́вися, сме́ртію же взя́тъ бы́въ, земли́ предаде́ся, но душа́ его́ на не́бо вознесе́ся, идѣ́же отъ а́нгеловъ святы́хъ украше́нъ бы́сть вѣнцы́ неувяда́емыми, да, вѣ́чно живу́ще, сла́витъ и́мя Госпо́дне.

Стефа́не прему́дре, мно́гою сла́вою на земли́ обле́клся еси́, мно́гія бо враги́ безбо́жныя низложи́вши, благоче́стіе въ ста́дѣ Христо́вѣ утверди́лъ еси́, сего́ ра́ди и вѣ́чныя жи́зни удосто́ился еси́, въ не́йже пребыва́я, не преста́й моли́тися о спасе́ніи ду́шъ на́шихъ.

Ви́дѣхомъ тя́, Де́споте блаже́нне, пеку́щася о ча́дѣхъ твои́хъ, мно́гія супоста́ты побѣжда́юща и моля́щася Го́сподеви дарова́ти на́мъ, сыново́мъ твои́мъ, крѣ́пость духо́вную и вѣ́ру непоколеби́мую, сего́ ра́ди помина́юще тя́ въ бѣда́хъ вѣ́ка сего́, взыва́емъ ти́: моли́ся ко Го́споду дарова́ти на́мъ побѣ́ды на сопроти́вныя и душа́мъ на́шимъ ве́лію ми́лость.

Просвѣще́ніемъ Христо́вымъ духо́вная очеса́ вѣ́рнаго ти́ наро́да отверза́лъ еси́ и ду́ши всѣ́хъ въ оте́ческой вѣ́рѣ утвержда́лъ еси́, Стефа́не, Де́споте ди́вне, сего́ ра́ди и мы́ мо́лимъ тя́, да моли́твами свои́ми утверди́ши и на́съ во свято́мъ Правосла́віи и укрѣпи́ши ны́ [въ] любви́ ко Христу́, Спаси́телю ро́да на́шего.

Сла́ва, гла́съ 6:

Изоби́лующе любо́вію ко свято́му Правосла́вію и святи́телемъ наро́да своего́ подража́я, хра́мы мно́ги и оби́тели благоговѣ́йнымъ и́нокомъ стро́илъ еси́, они́ же, изоби́лующе уче́ніемъ богопре́даннаго на́мъ зако́на Бо́жія, возноша́ху пѣ́сньми и́мя твое́ и роди́телей твои́хъ, воздава́я хвалы́ досто́йныя благоче́стію и любви́ всѣ́хъ ва́съ ко Христу́, Ему́же моли́теся всегда́ поми́ловати ду́ши на́ша.

И ны́нѣ, богоро́диченъ, гла́съ то́йже:

Влады́чице, пріими́ моле́нія на́ша и испроси́ на́мъ у Сы́на Твоего́ благода́ть вѣ́чную и спасе́ніе душа́мъ на́шимъ.

[Славосло́віе вели́кое, ектеніи́ и отпу́стъ.]



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 4: Десни́ца Госпо́дня вознесе́ мя́,* десни́ца Госпо́дня сотвори́ си́лу. Сти́хъ: Не умру́, но жи́въ бу́ду и повѣ́мъ дѣла́ Госпо́дня. Апо́столъ ко Ефесе́емъ, зача́ло 233. Аллилу́ія, гла́съ 1: Сохрани́ душа́ моя́ свидѣ́нія Твоя́ и возлюби́ я́ зѣло́. Сти́хъ: Яко нѣ́сть льсти́ во язы́цѣ мое́мъ. Ева́нгеліе отъ Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Србљак. — Београд: Издаjе Свети Архиjереjски Синод Српске Православне Цркве, 1986. — С. 449-459.

/ Къ оглавленію раздѣла /


Наверхъ / Къ титульной страницѣ

0