Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 19-й де́нь.
Преподо́бныя ма́тере на́шея Макри́ны, сестры́ святи́теля вели́каго Васи́лія, и преподо́бнаго отца́ на́шего Дíя.

[ВЕЧЕРЪ,
На Го́споди воззва́хъ:] стихи́ры святы́я, гла́съ 4. Подо́бенъ: Да́лъ еси́ зна́меніе.

Любому́дренно душе́вное* самодви́жимо и безсме́ртно показа́ла еси́.* Тѣ́мже и потща́лася еси́ не примѣси́тися скве́рнѣ грѣхо́внѣй* и чиста́ отъ вся́каго ка́ла* премѣни́тися соу́зъ тѣле́сныхъ,* ни еди́ны скве́рны иму́щи,* ни вра́ски, богопрія́тная,* но чиста́ и всенепоро́чна* Жениху́ твоему́ предста́ти.

Заре́ю просвѣти́ся свѣтови́дное твое́ лице́,* и уме́рши, прехва́льная,* Христу́ тя просла́вльшу,* я́ко Свою́ дѣ́ву богови́дну,* я́ко ми́лостиву и я́сну,* я́ко сострада́тельну же и богоглаго́ливу:* жи́знь бо равноа́нгельну на земли́ пожи́вши,* Бо́гу угоди́ла еси́ житія́ свѣ́тлостію.

Ины стихи́ры преподо́бнаго, гла́съ то́йже. Подо́бенъ: Яко до́бля.

Яко звѣзду́ всемíрну,* мы́сленно возсія́вши* на церко́внѣй тве́рди* восхваля́емъ тя́, блаже́нне,* боже́ственными твои́ми сія́ніи просвѣща́еми при́сно,* и душе́ю и умо́мъ* чту́щіи тво́й свѣтоно́сный де́нь моле́бно,* свяще́нне чудоно́сне,* мона́шествующихъ удобре́ніе.

Якоже вторы́й Ааро́нъ,* жезла́ прозябе́ніемъ* боже́ственно освяще́ніе, о́тче, бы́лъ еси́,* я́коже Моисе́й, во́ду, преподо́бне,* изъ ка́мене изве́лъ еси́,* я́коже Илія́, мертвеца́ моли́твою твое́ю воздви́глъ еси́,* удивля́емь вели́кими чудесы́* и Боже́ственными просвѣща́емь благозва́ніи,* Дíе богому́дре пребога́те.

Духо́вное сія́ніе* проявле́нно пріе́мъ,* лука́вствія ду́хи отгна́лъ еси́* и свяще́нно попече́ніе душа́мъ устро́илъ еси́,* въ не́мже спаса́ются мно́жества всегда́,* чту́щія твою́ па́мять,* му́жескія по́двиги* и чуде́съ пресла́вная вѣ́рою,* Дíе, отце́въ похвало́.

Сла́ва, и ны́нѣ, богоро́диченъ, гла́съ и подо́бенъ то́йже:

Яже Бо́га Невмѣсти́маго* во чре́вѣ Твое́мъ вмѣсти́вшая,* человѣколю́бно Человѣ́ка бы́вша,* и на́ше смѣше́ніе изъ Тебе́ пріи́мша,* и обожи́вша я́вѣ,* не пре́зри мене́, Всечи́стая, ны́нѣ скорбя́ща,* но уще́дри ско́ро* и разли́чныя вражды́ же* и вре́да лука́ваго свободи́.

Крестобогоро́диченъ, подо́бенъ то́йже:

Агнца и Па́стыря, Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Тебѣ́ вѣща́ше:* Сы́не возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь святы́я, гла́съ 8:

Въ тебѣ́, ма́ти, извѣ́стно спасе́ся, е́же по о́бразу: пріи́мши бо кре́стъ, послѣ́довала еси́ Христу́, и, дѣ́ющи, учи́ла еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй. Тѣ́мже и со а́нгелы сра́дуется, преподо́бная Макри́но, ду́хъ тво́й.

Тропа́рь преподо́бнаго, гла́съ 1:

Пусты́нный жи́тель, и въ тѣлеси́ а́нгелъ, и чудотво́рецъ яви́лся еси́, богоно́се о́тче на́шъ Дíе: посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою притека́ющихъ ти́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


[НА УТРЕНИ,]
Кано́нъ преподо́бныя, его́же краегране́сіе: Невѣ́сту чи́сту тя́ Христу́, Макри́но, вѣнча́ю. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Жениха́ пречи́стаго, ду́шъ красоту́, Макри́но всесла́вная, Его́же возжела́вши, возлюби́ла еси́ отъ всего́ се́рдца твоего́, просвѣти́ти моли́ пою́щія тя́.

Сы́й бе́здна па́че ума́ бла́гости, Христе́, Твою́ нескве́рную невѣ́сту просла́вилъ еси́, жела́ніемъ Твои́мъ пригвожде́ную, Макри́ну непоро́чную и пресла́вную.

Макри́но богому́драя, дѣ́вства похвало́, те́плѣ соблюла́ еси́ невре́дно воздержа́ніемъ твое́ житіе́, пло́ть ду́ху покори́вши.

Богоро́диченъ: Свѣтоно́сно возсія́ въ сердца́хъ, Пренепоро́чная, вѣ́рою чту́щихъ Тя́, Бо́жію Ма́терь, и озари́ де́нь свѣтоно́сный Христо́съ, изъ утро́бы Твоея́ возсія́вый, Богоневѣ́сто.

Инъ кано́нъ преподо́бнаго, творе́ніе Іо́сифово, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Вы́ну къ Бо́гу манове́ньми удобря́емь, тво́й кре́стъ воспрія́лъ еси́ и Христу́ послѣ́довалъ еси́, пло́ти твоея́ мудрова́ніе, Дíе, умертви́въ воздержа́ніемъ.

Утреневалъ еси́ къ сла́вѣ незаходи́маго Со́лнца, преподо́бне, всесвѣ́тла бы́лъ еси́ звѣзда́ и вѣ́рныя просвѣти́лъ еси́, добродѣ́телей, блаже́нне, и чуде́съ твои́хъ свѣ́тлостію.

Устрани́лъ еси́ по́мыслъ тво́й, прему́дре, су́щихъ въ мíрѣ кра́сныхъ, премíрныя сла́вы рачи́тель и́стиненъ бы́лъ еси́, съ пло́тію безпло́тнаго побѣди́въ Боже́ственною благода́тію.

Богоро́диченъ: Со́лнца мы́сленнаго, Всенепоро́чная, селе́ніе была́ еси́, Боже́ственными свѣтлостьми́ на́съ благоче́стно озари́вшаго и мглу́ отгна́вша неразу́мія, Приснодѣ́во.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Укра́шена добро́тою богода́нною и благода́тію, и му́ченикъ благосла́віе, изводи́ма ро́да че́стна, нра́ву поревнова́ла еси́ си́хъ боже́ственному.

Зако́ну Боже́ственному повину́ющися, дѣ́во, оста́вила еси́ житія́ мяте́жъ и молвы́ убѣжа́ла еси́, поще́ніемъ и моли́твами, жела́ніемъ упражня́ющися.

Свяще́ніе отъ мя́гкихъ ногте́й возлюби́ла еси́, очи́ма же ма́тернима блюдо́ма, пребыла́ еси́, Макри́но, нетлѣ́нна и непоро́чна.

Богоро́диченъ: Зе́млю Тя́, Дѣ́во, Всенепоро́чная Отрокови́це, вѣ́мы, я́ко кла́съ жи́зни на́мъ безсѣ́менно прозя́бшую, Имже утвержда́еми, Тя́ ублажа́емъ.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Боже́ственными блиста́яся сія́ніи, свѣти́льникъ бы́лъ еси́, наставля́я вѣ́рою къ тебѣ́ приходя́щія, блаже́нне.

Наста́вилъ еси́ къ жи́зни послѣ́дующія до́брѣ, преподо́бне, плотскíя бо стра́сти Боже́ственною си́лою умертви́лъ еси́.

Совокупи́лся еси́ боголѣ́пно съ небе́сными, на земли́ бо житіе́ а́нгельское пожи́лъ еси́, Дíе богоно́се, о́тче на́шъ.

Богоро́диченъ: Всели́ся въ Тя́ Живы́й на небесѣ́хъ, Чи́стая, Его́же прилѣ́жно моли́ спасти́ ду́ши пою́щихъ Тя́.

Конда́къ преподо́бнаго, гла́съ 2. Подо́бенъ: Тве́рдыя.

Чистото́ю души́ боже́ственнѣ вооружи́вся, непреста́нную моли́тву, я́ко копіе́, пріи́мъ держа́вно, разсѣ́клъ еси́ де́моновъ полки́, чудотво́рче, о́тче на́шъ Дíе, моли́ непреста́нно о всѣ́хъ на́съ.

Сѣда́ленъ святы́я, гла́съ 4. Подо́бенъ: Ско́ро предвари́.

Боже́ственная па́мять твоя́, Макри́но, дне́сь возсія́вши, яви́ся мíрови, я́ко со́лнце, сказу́ющи житіе́ твое́: ты́ бо, воздержа́ніемъ плотска́я движе́нія разо́рши, уневѣ́стилася еси́ Христу́ отъ младе́нства. Тѣ́мже хва́лящія тя́ изба́ви отъ вся́кихъ зо́лъ.

Сла́ва, преподо́бнаго, гла́съ 8. Подо́бенъ: Прему́дрости.

Бо́гу отъ младе́нства возложе́нъ бы́въ и Тому́ да́же до конца́ благоугожда́я, о́тче на́шъ преподо́бне, дарова́нія улучи́лъ еси́ и де́моновъ мно́жество отгна́лъ еси́ благода́тію, въ Госпо́дню похвалу́ оби́тель созда́лъ еси́. Тѣ́мже пресла́вно и ме́ртвыя сподо́бился еси́ воздви́гнути, прехва́льне, несумнѣ́нною моли́твою твое́ю. Сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

И ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́, прегрѣше́ній оставле́ніе дарова́ти, благоче́стно покланя́ющимся всесвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Умертви́вшися мíру и мірски́мъ ве́щемъ, Бо́гу жи́ти еди́ному жела́ніемъ боже́ственнымъ испра́вила еси́, твоего́ Жениха́ жела́ющи добро́ты, спаса́ющаго нетлѣ́нну и чи́сту, всечестна́я.

Поревнова́вши Ѳе́клѣ честнѣ́й, первому́ченицѣ, и боже́ственному тоя́ житію́ вои́стинну подо́бящися, отъ вдохнове́нія Боже́ственнаго свы́ше и и́мя обра́зно прія́тъ.

Невѣстоводя́щи, дѣ́вы ты́, Макри́но, привела́ еси́ дѣ́вственному Сло́ву, отъ Дѣ́вы возсія́вшему, безстра́стнымъ у́бо присвое́ніемъ и подо́біемъ безстра́стіе я́вѣ пока́зовала еси́.

Богоро́диченъ: Дарова́ній Боже́ственныя струи́ и исто́чницы исцѣле́ній, Боже́ственнаго бога́тства раздая́нія даю́тся живонача́льною дла́нію, Богоневѣ́стная, ро́ждшагося отъ Твоея́ утро́бы Вседержи́теля.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Ду́ха невеще́ственною свѣще́ю у́мъ тво́й просвѣща́я, плотску́ю пре́лесть со́нъ вмѣни́лъ еси́, вы́шняго тя́ ча́юща гра́да, богоно́се, смотря́я.

Яко о́блакъ, до́ждь нося́щій, Ца́рскому гра́ду я́влься, напои́лъ еси́ сего́ напое́ніи Свята́го Ду́ха, душа́мъ попече́ніе воздви́глъ еси́ прекра́сно.

Умертви́вся грѣху́ воздержа́ніемъ, ме́ртвымъ живо́тъ дарова́лъ еси́ Боже́ственнымъ посо́біемъ, во́ду же источи́лъ еси́ на́мъ умиле́нія, преподо́бне, творя́щимъ па́мять твою́.

Богоро́диченъ: Свѣтоно́сенъ Тя́ свѣ́щникъ, Боже́ственное сія́ніе во утро́бѣ носи́вшую, позна́хомъ, Дѣ́во. Тѣ́мже мо́лимся Тебѣ́: свѣ́томъ Твои́мъ озари́ всѣ́хъ ду́ши, пою́щихъ Тя́.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Оскверни́тися страстьми́ добро́тѣ кра́снѣй, душе́внѣй и богови́днѣй не стерпѣ́ла еси́, всему́драя, добро́ту несказа́нную честна́го Жениха́ твоего́ поразумѣ́вши, до́брая дѣ́во.

Крѣ́пкимъ утѣше́ніемъ обогати́вшися Христа́, тве́рдо же и незы́блемо страсте́й умертви́ла еси́ мно́гій мяте́жъ, отъ но́щи у́треневавши и сла́вящи Го́спода.

Тве́рдъ соблюла́ еси́ ра́зумъ Христу́, Тому́ бо отъ утро́бы приве́рглася еси́, непоро́чная, Ему́же и возложи́ла еси́ ду́шу и тѣ́ло твое́, отъ ю́ности пости́вшися.

Богоро́диченъ: Христа́ родила́ еси́, Изба́вителя вся́ческихъ, на́съ, къ тлѣ́нію во́лею па́дшихся, вообрази́вша и къ сла́вѣ несказа́ннѣй, Богома́ти, возне́сша.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

На горѣ́ свяще́ннѣй житія́ стоя́, восхожде́ніемъ се́рдца разори́лъ еси́ стра́сти и Бо́гу прибли́жился еси́.

Же́злъ я́коже Ааро́новъ, страннолѣ́пнымъ прозябе́ніемъ бы́лъ еси́, богоно́се, чи́сто Влады́цѣ и Боже́ственно свяще́ніе.

О, Боже́ственныхъ даро́въ, отъ Бо́га дарова́нныхъ тебѣ́! Моты́кою бо моли́твъ твои́хъ во́ду жи́ву отъ боко́въ землены́хъ, о́тче, изве́лъ еси́.

Богоро́диченъ: Ни а́нгельскій у́мъ, ни человѣ́ческій мо́жетъ, Всенепоро́чная, сказа́ти стра́шнаго рождества́ глубину́ недовѣ́домую.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Жела́ніе Христо́во возраста́я явле́ннѣе, у́мъ тво́й ве́сь добродѣ́тель сво́йственну нося́ше, насади́ и благоче́стна Боже́ственная уче́нія.

Пою́щи Христа́ непреста́нными моли́твами, тве́рдую извлекла́ еси́ отъ Него́, дѣ́во, по́мощь и Боже́ственную дѣ́вства благода́ть соблюла́ еси́.

Вѣнце́мъ дарова́ній Христо́съ вѣнча́ тя, я́ко чи́стую дѣ́ву и ли́ку дѣ́вственному наста́вницу, и въ черто́зѣхъ небе́сныхъ, богому́драя, всели́ тя.

Богоро́диченъ: Едине́ніемъ я́же пе́рвѣе разстоя́щаяся совокупи́, два́ бо естества́ совокупле́на родила́ еси́ неизрече́нно Бо́га Сло́ва, вои́стинну воплоще́нна, Всенепоро́чная.

Инъ. Ирмо́съ то́йже.

Возвы́силъ еси́ къ Бо́гу серде́чное жела́ніе, и смири́лъ еси́ стра́сти, и свирѣ́пство де́моновъ низложи́лъ еси́, богоно́се, мона́шествующихъ недви́жимое основа́ніе.

Ура́нилъ еси́ воздержа́ніемъ ра́нами, о́тче, Еги́петъ, страстны́я свободи́лъ еси́ его́ рабо́ты, мно́жество неспряже́ныхъ и супру́жныхъ, благоче́стно послѣ́дующихъ ти́, преподо́бне.

Бога́тъ добродѣ́тельми и чуде́съ свѣ́тлостію бы́въ испо́лненъ, преста́вился еси́ къ вы́шнему гра́ду, Дíе богому́дре, и мо́лишися изба́витися отъ бѣ́дъ ста́ду твоему́.

Богоро́диченъ: Умертви́ души́ моея́ стра́сти, Всенепоро́чная, Жи́знь всѣ́хъ неизрече́ннымъ сло́вомъ ро́ждши, и у́мъ мо́й смуща́емый, Отрокови́це, умири́.

Конда́къ святы́я, гла́съ 4. Подо́бенъ: Яви́лся еси́.

Бо́га Блага́го всѣ́мъ се́рдцемъ возлюби́ла еси́, Макри́но преподо́бная, и, Сего́ кре́стъ честны́й на ра́мо пріе́мши, усе́рдно послѣ́довала еси́ Ему́, отону́дуже согрѣше́ній обрѣла́ еси́ проще́ніе.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Еди́наго жела́юши Христа́ и соверше́нною любо́вію я́ко уя́звена я́вѣ, вопія́ше: теку́ въ слѣ́дъ Тебе́, препѣ́тый Го́споди, Бо́же оте́цъ на́шихъ, благослове́нъ еси́.

Отри́нувши стра́сти и многомяте́жная движе́нія, въ безстра́стія свѣ́тлую облече́ся ри́зу, зову́щи: препѣ́тый Го́споди, Бо́же оте́цъ на́шихъ, благослове́нъ еси́.

Низложи́вши шата́ніе звѣрови́дное вознесе́нное злонача́льнаго врага́, и по́честь побѣ́ды прія́ла еси́, достохва́льная, пою́ши: Го́споди, Бо́же оте́цъ на́шихъ, благослове́нъ еси́.

Богоро́диченъ: Расто́ргни согрѣше́ній плени́цы Твои́мъ Ма́тернимъ дерзнове́ніемъ благоче́стно и вѣ́рно пою́щихъ, Дѣ́во, Рождество́ Твое́.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Оби́тель Тро́ицѣ твое́ се́рдце сотвори́лъ еси́, тѣ́мже мона́шествующимъ воздви́глъ еси́ благопотре́бно, богоно́се, попече́ніе, — благослове́нъ еси́, — зовы́й, — въ хра́мѣ сла́вы Твоея́, Го́споди.

Обыстри́въ тво́й исто́чникъ чуде́сный, о́тче богому́дре, во́ду спасе́нія источи́лъ еси́ вѣ́рно творя́щимъ твое́ успе́ніе, Дíе чу́дне, мона́шествующихъ свѣти́ло пресвѣ́тлое.

Украси́въ добродѣ́тельми твое́ житіе́, бы́лъ еси́ ве́сь свѣтоза́ренъ и сто́лпъ свѣтови́денъ, пою́щимъ наста́вникъ: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Святѣ́йшу Тя́ херуви́мъ содѣ́ла, Отрокови́це, Бо́гъ Святы́й я́вѣ, освяща́я пою́щія: благослове́нна Ты́ въ жена́хъ, Пренепоро́чная Влады́чице.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Священнолѣ́пно ты́ житіе́ и жи́знь чи́сту препроводи́ла еси́, некра́домо возложе́ніе, добро́та же сокрове́на, богови́дно украше́ніе яви́лася еси́, богодохнове́нная, зову́щи: Го́спода по́йте, дѣла́, и превозноси́те Его́ во вся́ вѣ́ки.

Умерщвле́ніемъ стра́сти одѣ́янна, къ Боже́ственному безсме́ртію премину́ла еси́, изря́дная научи́вши и любому́дреная души́ безсме́ртнѣй и самодви́жнѣй, — Го́спода по́йте, — вопію́щи, — и превозноси́те Его́ во вся́ вѣ́ки.

Заре́ю трисія́ннаго свѣтоли́тія у́мъ просвѣ́щши и лице́, усну́ла еси́, пребога́тая, успе́ніемъ блаже́ннымъ, съ весе́ліемъ ви́дящи тебѣ́ Жела́емаго, — Го́спода по́йте, — вопію́щи, — и превозноси́те Его́ во вся́ вѣ́ки.

Богоро́диченъ: Тя́, ковче́гъ пресвяты́й, осѣня́емый Боже́ственнымъ Ду́хомъ, Превѣ́чное Сло́во и Присносу́щное, за милосе́рдіе неизрече́нное вочеловѣ́чшееся, ро́ждшую Богома́терь пое́мъ и превозно́симъ во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Жезла́ твоего́ прозябе́ніемъ Бо́гъ твою́ плодоно́сну ду́шу явля́ше, прему́дре, насажда́ющую плодови́ты и слове́сны са́ды Боже́ственнымъ манове́ніемъ, въ раи́ пи́щи мона́ховъ мно́жество, вопію́щихъ: вся́ дѣла́, благослови́те, Госпо́дня, Го́спода.

Умъ тво́й, Боже́ственными добро́тами облиста́емь, красе́нъ пребы́сть. И ны́нѣ послѣ́днее дости́глъ еси́ до́брыхъ, я́ко чи́стъ, прича́стіемъ обожа́емь при́сно и поя́: благослови́те, вся́ дѣла́ Госпо́дня, Го́спода.

Да тя́ гла́сы ра́достными, торжеству́юще, Дíе, почита́емъ, спаса́й ста́до твое́ всегда́, твою́ па́мять пра́зднующее, и наста́ви къ жи́зненнымъ вхо́домъ пою́щія: благослови́те, вся́ дѣла́ Госпо́дня, Го́спода.

Богоро́диченъ: Яви́лася еси́ ши́рши небе́съ, Бо́га вмѣ́щши, Марíе Пречи́стая, Его́же моли́ спасти́ мя отъ страсте́й содержа́щихъ и бу́дущаго стра́шнаго осужде́нія изба́вити мя́, вопію́щаго: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Ми́лости вои́стинну Бо́жіей бога́тѣй подо́бящися, сконча́ла еси́, пита́ющи вся́, нището́ю снѣда́емыя, прехва́льная, отсю́ду Ми́лостивый просла́ви тя́, я́вльшуюся ми́лостиву.

Предъ лице́мъ ста́ла еси́ Бо́жіимъ, всехва́льная, свѣтоно́сна бо была́ еси́, житіе́мъ и сло́вомъ укра́шена и вся́ческими хвала́ми и ро́да благосла́віемъ сія́ющи, превысо́кими восхожде́ніи.

Въ пресвѣ́телъ всели́лася еси́ черто́гъ и во хра́мъ, о Макри́но, небе́сный, идѣ́же, дѣ́во, пребыва́еши со святи́тели, сро́дники твои́ми. Моли́ со дерзнове́ніемъ Го́спода вся́ спасти́, пою́щія тя́.

Богоро́диченъ: Красе́нъ добро́тою Пло́дъ и свѣ́телъ па́че всѣ́хъ чре́ва Твоего́: Ты́ бо, Дѣ́во Богоро́дице, Бо́га воплоще́нна родила́ еси́, я́вльшася, за е́же спасти́ человѣ́ка. Тѣ́мже Тя́ вси́ велича́емъ.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Тя́ добродѣ́телей благозра́чіемъ, о́тче, я́ко а́нгела, я́вльшася и къ небесе́мъ возлетѣ́вша, позлаще́нѣ иму́ща крилѣ́, ра́достно почита́емъ и благоче́стно похваля́емъ.

Якоже со́лнце многосвѣ́тло, отъ восто́ка возсія́въ, Дíе, всю́ду зарю́ добродѣ́телей и чуде́съ твои́хъ бога́тно просте́рлъ еси́, просвѣща́я мíра концы́.

Къ Свѣ́ту незаходи́мому, о́тче, свѣтови́денъ бы́въ добродѣ́телей свѣтозаре́ніемъ, преше́лъ еси́, ра́дуяся, и всели́лся еси́, идѣ́же преподо́бныхъ ду́си. О ста́дѣ твое́мъ моли́ся.

Богоро́диченъ: Пощади́ мя, Христе́, егда́ пріи́деши суди́ти мíру со сла́вою, имѣ́я моля́щую Тя́, Сло́ве, Богоро́дицу Приснодѣ́ву, и а́нгельскія чи́ны, и преподо́бныхъ совокупле́нія.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 170 – 176.

/ Къ оглавленію раздѣла /


Наверхъ / Къ титульной страницѣ

0