Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 21 сентября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 18-й де́нь.
Слу́жба преподо́бному отцу́ на́шему Іоа́нну Многострада́льному.

ВЕЧЕРЪ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 6, гла́съ 8. Подо́бенъ: О, пресла́внаго чудесе́!

Отче Іоа́нне блаже́нне,* ду́шу свою́ Бо́гови хотя́ украси́ти* чи́стыхъ помышле́ній испещре́ньми,* вре́менную сію́ жи́знь презрѣ́лъ еси́,* въ те́мную пеще́ру всели́вся* и въ не́й жи́въ погре́бся,* жела́я отъ тѣ́ла резрѣши́тися* и со Христо́мъ жи́ти.* Съ Ни́мже ны́нѣ водворя́яся,* не забу́ди и на́съ, почита́ющихъ святу́ю па́мять твою́. [Два́жды.]

Отче Іоа́нне преподо́бне,* вѣ́чныхъ бла́гъ жела́ніемъ разжиза́емь,* тя́жкія стра́сти пло́ти своея́* связа́лъ еси́ тя́жкихъ у́зъ обложе́ніемъ* и не сотвори́лъ себѣ́ осла́бы,* до́ндеже прія́лъ еси́ осла́бу отъ Свѣ́та Боже́ственнаго,* въ Не́мже ны́нѣ ра́дуяся,* моли́ о на́съ, порабо́тити стра́сти ду́ху на́шему* и легко́ прейти́ къ животу́ безконе́чному. [Два́жды.]

Сла́ва, гла́съ 2:

Отче Іоа́нне, егда́ жела́ніе любве́ Бо́жія всели́ся во святу́ю твою́ ду́шу, тогда́ вра́гъ началозло́бный тща́шеся сіе́ отъя́ти, волну́ющуюся бу́рю плотски́хъ разжиза́ній наведе́ на тя́, ю́же ты́ ощути́въ, ста́лъ еси́ на ка́мени тве́рдаго страда́нія и неподви́женъ пребы́лъ, до́ндеже сія́ укроти́лъ еси́ Свѣ́та Боже́ственнаго явле́ніемъ; и ны́нѣ ра́дуяся въ небе́сныхъ дво́рѣхъ, низпосли́ благода́ть къ безстра́стію и на́мъ, свя́те, моли́твами твои́ми.

И ны́нѣ, богоро́диченъ:

Пре́йде сѣ́нь [зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.]

Вхо́дъ. Проки́менъ дне́, и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Отче Іоа́нне богому́дре,* чи́стый дѣ́вства сосу́де,* и́ночествующимъ о́бразе,* ты́, еди́ныя ра́ди чистоты́* мно́гое претерпѣ́въ искуше́ніе,* пребы́лъ еси́ неврежде́нъ,* Бо́жіею благода́тію сохраня́емь,* ея́же и мы́ да не лиши́мся* моли́твами твои́ми.

Сти́хъ: Блаже́ни вси́, боя́щіися Го́спода,* ходя́щіи въ путе́хъ Его́.

До́брый по́двигъ тво́й, преблаже́нне,* и ко врагу́ ополче́ніе ви́дя,* тва́ри Созда́тель ско́рую по́мощь посла́ свы́ше* во свѣ́тѣ духо́вныя благода́ти,* е́юже тма́ бѣсо́вскаго нападе́нія* а́біе отъ тебе́ прогна́ся,* ты́ же, пріе́мь ми́ръ въ души́ твое́й,* теплѣ́йшею любо́вію Христо́ви приложи́лся еси́,* къ Нему́же и мы́ да присоедини́мся* моли́твами твои́ми.

Сти́хъ: Пра́ведникъ, я́ко фи́никсъ, процвѣте́тъ* и, я́ко ке́дръ, и́же въ Лива́нѣ, умно́жится.

По мра́цѣ многобу́рныхъ страсте́й* возжже́ся тебѣ́ свѣща́ отъ мы́сленнаго свѣ́та,* и гла́съ принесе́ся къ твоему́ ра́дованію,* его́же ощути́въ въ се́рдцѣ многотерпѣли́ваго твоего́ тѣ́ла,* неизрече́ннаго весе́лія испо́лнился еси́;* сего́ и мы́ да сподо́бимся, Іоа́нне многострада́льне,* ско́рыми къ Бо́гу моли́твами твои́ми.

Сла́ва, гла́съ 1:

Ко́е хвале́ніе принесе́мъ тебѣ́, преподо́бне о́тче? Или́ ко́ими пѣ́сньми воспое́мъ по́двиги твоя́, Іоа́нне прему́дре? Во пло́ти бо сы́й, безпло́тнаго врага́ по́двиги твои́ми побѣди́лъ еси́ и чистоту́ соблю́лъ еси́, ея́же ра́ди мно́го пострада́въ, и ны́нѣ на мѣ́стѣ поко́я съ дѣ́вственники водворя́яся, моли́ся Христу́ Влады́цѣ умири́ти мíръ и спасти́ ду́ши на́ша.

И ны́нѣ, богоро́диченъ:

Се́ испо́лнися [Иса́іино прорече́ніе: Дѣ́ва бо родила́ еси́ и по рождествѣ́, я́ко пре́жде рождества́, пребыла́ еси́, Бо́гъ бо бѣ́ Рожде́йся, тѣ́мже и естества́ новопресѣче́. Но, о Богома́ти, моле́нія Твои́хъ рабо́въ, въ Твое́мъ хра́мѣ приноси́мая Тебѣ́, не пре́зри, но я́ко Благоутро́бнаго Твои́ма рука́ма нося́щи, на Твоя́ рабы́ умилосе́рдися, и моли́ спасти́ся душа́мъ на́шимъ].

Тропа́рь, гла́съ 1:

Терпѣ́нія сто́лпъ вои́стинну непоколѣби́мый и забра́ло отъ вра́жіихъ стрѣля́ній необори́мо, равноа́нгельне и многострада́льне о́тче на́шъ Іоа́нне, иму́ще тя́, мы́, недосто́йніи, мо́лимся, припа́дающе къ честны́мъ твои́мъ моще́мъ те́плѣ: изба́ви на́съ душетлѣ́нныхъ страсте́й плотски́хъ и спаси́ твои́ми моли́твами.

Сла́ва, и ны́нѣ богоро́диченъ:

Гавріи́лу вѣща́вшу [Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ].


НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Житіе́, благи́ми дѣ́лы испо́лнено, имы́й, преподо́бне, поостри́лъ еси́ злоко́зненнаго врага́ на за́висть, и́же нападе́ на тя́ о́бразомъ змíя вселука́вно и, пла́менемъ ды́ша, усты́ зія́ше, хотя́щи пожрѣ́ти, мы́сленный всея́децъ, но Бо́жія благода́ть соблюде́ тя́ невреди́ма; сію́ и на́мъ да́ждь получи́ти, Іоа́нне многострада́льне, хода́тайствы твои́ми. [Два́жды.]

Сла́ва, и ны́нѣ, богоро́диченъ:

Житіе́ сту́дными дѣ́лы имы́й испо́лнено, злоко́зненному врагу́ ло́въ сотвори́хся, но къ Тебѣ́ вопію́, Чи́стая Дѣ́во: сокруши́ зу́бы несы́таго всея́дна и изми́ мя отъ страсте́й неподо́бныхъ, да вы́ну воспою́ Ти гла́сомъ ра́дованія: ра́дуйся, изыма́ющая дѣ́лъ скве́рныхъ.

По 2-мъ стихосло́віи сѣда́ленъ, гла́съ 4. Подо́бенъ: Яви́лся еси́.

Чистотѣ́ дѣ́вства твоего́, о́тче преподо́бне, непреста́нно зави́дя, вра́гъ всезло́бный ве́рже стрѣ́лы на тя́ нечи́стыхъ разжже́ній, я́же прира́зшеся, сокруше́ны бы́ша о ка́мень терпѣ́нія твоего́, и въ се́мъ стяжа́лъ еси́ мзду́ свою́, преблаже́нне, ея́же и мы́ прича́стницы да бу́демъ моли́твами твои́ми. [Два́жды.]

Сла́ва, и ны́нѣ, богоро́диченъ:

Въ ка́лъ грѣхо́вныхъ страсте́й низри́ну мя́ вра́гъ вселука́вый, и лежу́ въ ти́нѣ дѣ́лъ неподо́бныхъ, но Ты́, Пречи́стая Дѣ́во, предста́тельствомъ Твои́мъ ско́рымъ изведи́ ми во́ду умиле́нія, да, омы́въ смра́дъ грѣхо́въ мно́гихъ, воспою́: ра́дуйся, ба́не, омыва́ющая со́вѣсть.

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

До́браго тя́ ору́жника и чистоты́ рачи́теля кто́ не ублажи́тъ, Іоа́нне прему́дре, или́ кто́ пѣ́сньми не воспое́тъ многообра́зныхъ твои́хъ по́двиговъ? Ка́ко въ чистотѣ́ бра́лся еси́ съ враго́мъ неви́димымъ и, побѣди́въ того́, показа́лся еси́ вѣнцено́сецъ, и ны́нѣ предстоя́ Христу́ Бо́гу во Свѣ́тѣ непристу́пнѣмъ, моли́ о чту́щихъ мно́гое твое́ страда́ніе. [Два́жды.]

Сла́ва, и ны́нѣ, богоро́диченъ:

До́брую Тя́ въ жена́хъ и еди́ну Непоро́чную, чистото́ю а́нгеловъ и арха́нгеловъ превозше́дшую, кто́ не восхва́литъ, Дѣ́во Пресвята́я, или́ кто́ пѣ́сньми не почте́тъ Рождества́ Твоего́, Безму́жная Ма́ти, Юже, вси́ ро́ди, согла́сно велича́емъ.

Степе́нна, 1-й антифо́нъ 4-го гла́са. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 1:

Ко́е хвале́ніе принесе́мъ тебѣ́, [преподо́бне о́тче? Или́ ко́ими пѣ́сньми воспое́мъ по́двиги твоя́, Іоа́нне прему́дре? Во пло́ти бо сы́й, безпло́тнаго врага́ по́двиги твои́ми побѣди́лъ еси́ и чистоту́ соблю́лъ еси́, ея́же ра́ди мно́го пострада́въ, и ны́нѣ на мѣ́стѣ поко́я съ дѣ́вственники водворя́яся, моли́ся Христу́ Влады́цѣ умири́ти мíръ и спасти́ ду́ши на́ша].

Кано́нъ Богоро́дицы со ирмосо́мъ на 6 и преподо́бнаго на 8. Гла́съ 3.

Пѣ́снь 1.

Ирмо́съ: Во́ды дре́вле, ма́ніемъ Боже́ственнымъ, во еди́но со́нмище совокупи́вый, и раздѣли́вый мо́ре Изра́ильтескимъ лю́демъ, Се́й Бо́гъ на́шъ, препросла́вленъ е́сть, Тому́ Еди́ному пои́мъ, я́ко просла́вися.

Во́ды жа́ждущимъ въ пусты́нѣ лю́демъ Твои́мъ иногда́ да́вый, и мнѣ́, Христе́ мо́й, жа́ждущему хвалу́ принести́ Тебѣ́, да́ждь во́ду благода́ти, да въ па́мяти преподо́бнаго Твоего́ воспою́ пѣ́снь: я́ко просла́вися.

Тѣ́сный пу́ть и мно́гія ско́рби Ты́ Са́мъ показа́лъ еси́, Го́споди, ше́ствующимъ къ Ца́рствію Твоему́, его́же жела́я, преподо́бный Тво́й ра́достно ско́рби подъя́лъ е́сть въ жи́зни се́й, да та́мо возвесели́тся, поя́: я́ко просла́вися.

Гла́съ всегда́шняго ра́дованія и шу́мъ пра́зднующихъ непреста́нно помина́я, свя́те Іоа́нне, зову́щія къ суетѣ́ пре́лести оста́вль, Христо́въ яре́мъ взя́лъ еси́ на ся́ и ле́гцѣ то́й въ наде́ждѣ ско́раго премѣне́нія носи́лъ еси́, поя́ Бо́гу: я́ко просла́вися.

Удали́вся стра́стнаго мíра, блаже́нне, прите́клъ еси́, я́ко еле́нь, на Пече́рскую го́ру, идѣ́же струя́ми духо́внаго пото́ка, блаже́нныхъ оте́цъ, напои́въ ду́шу, воспѣ́лъ еси́ Бо́гу: я́ко просла́вися.

Богоро́диченъ: Съ корабле́мъ потопля́емь душе́внымъ въ мо́ри страсте́й, вопію́ Ти, Чи́стая: ми́лостію Твое́ю помози́ мнѣ́ и отъ потопле́нія изба́ви, еси́ бо кора́бль хотя́щимъ спасти́ся и ти́хое приста́нище жите́йскихъ пла́ваній.

Пѣ́снь 3.

Ирмо́съ: Иже отъ не су́щихъ вся́ приведы́й, Сло́вомъ созида́емая, соверша́емая Ду́хомъ, Вседержи́телю Вы́шній, въ любви́ Твое́й утверди́ мене́.

Яко отъ не су́щія, мірскíя ве́щи избѣ́гъ, въ ти́хое приста́нище и́ночествующихъ прите́клъ еси́, о́тче, съ ни́миже живы́й, Еди́наго любя́ Бо́га, воспѣ́лъ еси́: Христе́ мо́й, въ любви́ Твое́й утверди́ мене́.

Пречи́стому и Непоро́чному Агнцу послѣ́довати хотя́ща тя́ въ чистотѣ́, блаже́нне, ви́дя, вра́гъ скве́рный нападе́ на тя́ разжже́ніемъ плотски́мъ, ему́же проти́ву ста́лъ еси́, смиря́я пло́ть свою́ посто́мъ и жа́ждею и въ моли́твѣ поя́: Христе́ мо́й, утверди́ мене́.

Отпаде́ніе Присносу́щнаго Свѣ́та блуднико́мъ помина́я, преподо́бне, въ те́мную всели́лся еси́ пеще́ру, и, при гро́бѣ вели́каго Анто́нія безмо́лвствуя, сво́й исхо́дъ помина́лъ еси́ при́сно, и та́ко обрѣ́лъ еси́ ми́ръ въ косте́хъ твои́хъ.

Не сме́рть, но премѣне́ніе на живо́тъ лу́чшій святы́мъ Бо́жіимъ е́сть, и́бо а́ще и во гро́бѣхъ положе́ни су́ть, но Бо́гови живу́тъ при́сно и гла́съ испуща́ютъ; я́коже и къ тебѣ́, о́тче Іоа́нне, отъ гро́ба вели́каго Анто́нія гла́съ бы́сть, на безмо́лвіе тя́ призыва́ющъ.

Богоро́диченъ: Ча́съ Су́дный помина́ю, но премѣне́нія отъ страсте́й на живо́тъ безстра́стный не и́мамъ, Чи́стая Богоро́дице; моли́твъ ра́ди преподо́бнаго дѣ́вственника Іоа́нна отъ любве́ страсте́й отврати́ и въ любви́ Сы́на Твоего́ утверди́ мене́.

Сѣда́ленъ, гла́съ 8:

Блаже́нству не оскверни́вшихся съ жена́ми поревнова́въ, да послѣ́дуеши Агнцу на горѣ́ Сіо́нстѣй, поста́вилъ еси́ дѣ́вство свое́ соблюсти́ нескве́рно и соблю́лъ еси́ е́ цѣ́ло, мно́гими напа́стьми бѣсо́вскими невреди́мо; тѣ́мже пое́ши пѣ́снь но́вую, преподо́бне Іоа́нне, и ра́дуется со а́нгелы ду́хъ тво́й. [Два́жды.]

Сла́ва, и ны́нѣ, богоро́диченъ:

Блаже́нству дѣ́вственникъ не поревнова́хъ, окая́нный, оскверни́хъ креще́нія моего́ ри́зу блу́дными растлѣ́ніи и удали́хся благода́ти Твоея́, Нескве́рный Агнче, Сы́не Бо́жій, страсте́й ра́ди святы́хъ Твои́хъ и Пречи́стыя Богоро́дицы да́ждь ми́ исправле́ніе и поми́луй мя́.

Пѣ́снь 4.

Ирмо́съ: Положи́лъ еси́ къ на́мъ тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́лъ еси́. Тѣ́мже Ти́ зове́мъ, благодаря́ще: сла́ва си́лѣ Твое́й, Го́споди.

Положи́лъ еси́ житіе́ твое́ въ те́мнѣй пеще́рѣ, о́тче, неисхо́дно, до́ндеже стра́стная мгла́ во свѣ́тъ преложи́тся молча́ніемъ и неви́дѣніемъ чу́вственнаго свѣ́та.

Мно́гія ско́рби подъя́лъ еси́, свя́те, со страстьми́ боря́ся, а́ки съ лю́тыми звѣрьми́, жесто́кая тѣ́хъ нападе́нія посто́мъ и бдѣ́ніемъ въ тѣле́сномъ соста́вѣ свое́мъ крѣ́пко обуздава́я.

Огне́мъ бѣсо́вскихъ прило́гъ пали́мую пло́ть твою́ не могíй устуди́ти, блаже́нне, на́гъ изво́лилъ еси́ жи́ти въ тѣ́снѣ мѣ́стѣ, сту́денію къ теплотѣ́ духо́внѣй та́мо подвиза́яся.

Звѣ́ря лю́та и неукроти́ма — свирѣпѣ́ющее тѣ́ло свое́, смири́ти хотя́, тя́жкими желѣ́зы связа́лъ еси́, преподо́бне, да не по́хотствуетъ на ду́ха, но па́че да повину́ется ду́ху.

Богоро́диченъ: Отъ мно́гаго невоздержа́нія востаю́щихъ на мя́ страсте́й не могíй укроти́ти, къ Тебѣ́ прибѣга́ю, Влады́чице: Ты́, Пречи́стая, си́хъ нечистоту́ смири́ и спаси́ мя отъ тѣ́хъ нападе́нія.

Пѣ́снь 5.

Ирмо́съ: На земли́ Неви́димый яви́лся еси́ и человѣ́комъ во́лею сожи́лъ еси́, Непостижи́мый, и, къ Тебѣ́ у́тренююще, воспѣва́емъ Тя́, Человѣколю́бче.

На земли́ живы́й вся́къ, кто́ не удиви́тся терпѣ́нію твоему́, о́тче, и́бо, ископа́въ себѣ́ ро́въ и на́гъ вше́дъ, окопа́лся еси́ до ра́му, пе́рстію угнѣта́я плотско́е стремле́ніе, отъ супоста́та врага́ дви́жимое.

Твое́ тѣ́ло, пе́рстію угнѣта́емо, уныва́ше, но вра́гъ бо́дрствоваше, крѣ́пко востаю́щи бра́нію и напа́дающи страхова́ньми, хотя́ та́ко одолѣ́ти тебе́, да не я́звенъ паде́тъ отъ тебе́, преподо́бне.

Умъ тво́й, всече́стне Іоа́нне, горя́щъ къ Бо́гу, ви́дя, діа́волъ злохи́трымъ пла́менемъ со дна́ паля́ше у́ды твоя́ и утро́бу, но ты́, о се́й болѣ́зни неради́въ, изво́лилъ еси́ Го́спода ра́ди сгорѣ́ти, не́же бы́ти поруга́нъ бѣ́сомъ.

Ядомъ а́спиднымъ не могíй сатана́ чистоты́ твоея́ порази́ти, блаже́нне, во змíя, огне́мъ ды́шуща, преобрази́ся, да поне́ та́ко устраши́въ, побѣди́тъ тя́, непобѣди́маго во́ина Христо́ва.

Богоро́диченъ: Ядъ а́спиденъ, стра́стныя прило́ги, и́миже вра́гъ се́рдце ми́ уязвля́етъ, цѣльбо́ю ми́лости Твоея́ уврачу́й, Безневѣ́стная Дѣ́во, я́ко да спасе́нъ отъ си́хъ, пло́дъ покая́нія принесу́ Ти всецѣ́лый.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и исчеза́етъ ду́хъ мо́й; но простры́й, Влады́ко, высо́кую Твою́ мы́шцу, я́ко Петра́ мя́, Упра́вителю, спаси́.

Бе́здна послѣ́дняя отве́рзе горта́нь, нечи́стый во змíя преобрази́выйся діа́волъ воспѣ́нися, пламеноно́сными ды́ша зія́ніи, хотя́щи поглоти́ти тя́, но ты́, о́тче, бы́лъ еси́ а́ки сто́лпъ недви́жимь, поя́: Бо́же мо́й, Упра́вителю, мя́ спаси́.

На ка́мени тве́рдыя вѣ́ры стоя́, преподо́бне, щито́мъ наде́жды покры́лся еси́, и, бу́рю злоко́зненнаго врага́ ни во что́ же вмѣни́въ, на главу́ его́ обрати́лъ еси́, и, въ горта́ни того́ сы́й, не устраши́лся еси́, зовы́й ко Христу́: Упра́вителю, мя́ спаси́.

Ки́тъ мы́сленный главу́ твою́, блаже́нне, въ горта́нь сво́й вложи́, и опали́шася тебѣ́ власи́, но не опали́ся малоду́шіемъ се́рдце твое́, о́тче, и́мже взыва́лъ еси́. И Госпо́дь услы́ша тя́, я́ко До́бръ Ко́рмчій, любопріима́тельнѣ спаса́я.

Моли́тва твоя́, Іоа́нне, бы́сть стрѣ́лы мо́лніины на сопроти́внаго си́лу, ре́клъ бо еси́: Бо́же мо́й, вску́ю мя́ еси́ оста́вилъ? И а́біе исчезе́ льсти́вый я́звенъ и ктому́ не прибли́жися уже́ къ тебѣ́, Свѣ́томъ Боже́ственнымъ прогна́нъ.

Богоро́диченъ: Стрѣ́лы мы́сленнаго супоста́та страстьми́ ура́ниша ми́ се́рдце, тѣ́мъ отъ го́рести души́ моея́ къ тебѣ́ вопію́, Чи́стая: исто́ргни ты́я руко́ю Твое́ю, я́ко ро́ждшая Христа́, Цѣли́теля моего́.

Конда́къ, гла́съ 2:

Сто́лпъ цѣлому́дрія, вра́жіими боре́ньми непобѣди́мь сы́й, а́ки сто́лпъ, многострада́льное водруже́нно оста́вилъ еси́ на́мъ тѣ́ло твое́, всече́стне Іоа́нне, ему́же въ не́мощехъ душе́вныхъ и тѣле́сныхъ покланя́ющеся, мо́лимъ тя́, преподо́бне: моли́ Христа́ Бо́га непреста́нно о всѣ́хъ на́съ.

Икосъ:

Возлюби́въ, преподо́бне, Христо́вы Боже́ственныя за́повѣди и возненави́дѣвъ мíра сего́ наслажде́ніе, прише́лъ еси́ усе́рдно къ Тому́ и бы́лъ еси́ свѣти́льникъ, просвѣща́я концы́ блиста́ніемъ духо́внымъ. Тѣ́мъ, припа́дая, молю́ тя: просвѣти́ мои́ о́чи душе́вныя воспѣ́ти твоя́ по́двиги, поще́ніе, и бдѣ́ніе, и сле́зы, болѣ́зни и изможде́ніе тѣ́ла блаже́нныя ра́ди бу́дущія жи́зни, ея́же ны́нѣ наслажда́яся, моли́ непреста́нно о всѣ́хъ на́съ.

Пѣ́снь 7.

Ирмо́съ: Якоже дре́вле благочести́выя три́ о́троки ороси́лъ еси́ въ пла́мени халде́йстѣмъ, свѣ́тлымъ Божества́ огне́мъ и на́съ озари́, благослове́нъ еси́, взыва́ющія, Бо́же оте́цъ на́шихъ.

Якоже пра́хъ отъ вѣ́тра и я́коже ды́мъ отъ тучено́снаго о́блака погиба́етъ, та́ко и Свѣ́ту Боже́ственному прише́дшу, исчезе́ лука́вый, ты́ же, о́тче, поклони́лся еси́ Го́сподеви, поя́: Бо́же, благослове́нъ еси́.

Бли́зъ Госпо́дь бы́сть призыва́ющу ти́ въ по́мощь, свя́те, Его́же благода́ть ощути́въ, ра́достною душе́ю изъ глубины́ се́рдца воспѣ́лъ еси́: Бо́же, благослове́нъ еси́.

Якоже прему́дръ господи́нъ крѣ́пкому рабу́ вели́кое налага́етъ дѣ́ло, та́ко и Госпо́дь попусти́ тебѣ́ терпѣ́ти дневны́й и нощны́й ва́ръ раздеже́ній плотски́хъ, ты́ же терпѣливоду́шнѣ поне́слъ еси́ его́, поя́: Бо́же, благослове́нъ еси́.

Богоро́диченъ: Яко прему́дръ Влады́ка, Сы́нъ Тво́й, Дѣ́во, на лѣни́ваго мя́ ле́гкимъ страсте́мъ пріити́ попуща́етъ, но пре́жде да́же не пріидо́ша о́ныя, а́зъ изнемого́хъ, тѣ́мъ къ Тебѣ́ вопію́: помози́ ми, о Ма́ти Сло́ва, Ты́ бо благослове́нна еси́.

Пѣ́снь 8.

Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Въ нестерпи́момъ огни́ разжже́ній плотски́хъ повелѣва́етъ тебѣ́, блаже́нне, свы́ше гла́съ помоли́тися мертвецу́, могу́щему во страсте́хъ блу́дныхъ помога́ти и про́чіимъ, да пою́тъ Го́спода во вѣ́ки.

Иже бо́лѣе Іо́сифа сотвори́вый, внегда́, плѣне́нъ сы́й, скве́рнѣй женѣ́ не повину́ся, то́й и тебѣ́, свя́те, посо́бствова хода́тайствомъ къ Бо́гу, Имже избы́въ страсте́й тлѣ́нныхъ, ны́нѣ пое́ши Го́спода во вѣ́ки.

Твое́ великоду́шіе, о́тче, тма́ми свѣтлѣ́йшее со́лнца ви́дя Бо́жіе Око, свѣ́тъ низпосла́ благода́ти, и мра́къ па́губнаго блуда́ отъ косте́й твои́хъ поги́бе весьма́. Про́чее же пожи́въ въ тишинѣ́, ны́нѣ пое́ши Го́спода во вѣ́ки.

Безстра́стнымъ подая́й у́мное весе́ліе Влады́ка, подаде́ и тебѣ́, преподо́бне Іоа́нне, по мно́гихъ трудѣ́хъ, е́же отъ Свѣ́та Боже́ственного пріе́мь, возра́довался еси́ и ны́нѣ на небеси́ весели́шися съ пою́щими Го́спода во вѣ́ки.

Богоро́диченъ: Внѣ́ страсте́й заче́ншая, Дѣ́во, и безъ по́хоти му́жескія ро́ждшая Бо́жіе Сло́во, начина́ющіяся во тмѣ́ лука́ваго прило́ги истреби́, да, грѣхолю́бія избы́въ, сподо́блюся Го́спода пѣ́ти во вѣ́ки.

Пѣ́снь 9.

Ирмо́съ: Но́вое чу́до и боголѣ́пное, дѣви́ческую бо две́рь затворе́нную я́вѣ прохо́дитъ Госпо́дь, на́гъ во вхо́дѣ, и плотоно́сецъ яви́ся во исхо́дѣ Бо́гъ, и пребыва́етъ две́рь затворе́на; Сію́ неизрече́нно, я́ко Богома́терь велича́емъ.

Но́вую жи́знь нача́лъ еси́, егда́ по мно́гомъ страда́ніи страсте́й бу́ря въ тебѣ́ ути́шися, о́тче, и пожи́лъ еси́ въ тишинѣ́ про́чее вре́мя, си́лу Бо́жію велича́яй.

На тве́рдомъ ка́мени терпѣ́нія стоя́, бы́лъ еси́ а́ки сто́лпъ крѣ́покъ, проти́ву лица́ вра́жія, его́же стрѣ́лы, прира́жшеся тебѣ́, сокруши́шася, тѣ́мъ тя́, Іоа́нне, велича́емъ.

Чи́стъ душе́ю и тѣ́ломъ на земли́ пожи́въ, отше́лъ еси́ къ небе́снымъ, съ чи́стыми се́рдцемъ лице́ Бо́жіе ви́дѣти, Его́же зрѣ́ніемъ наслажда́яся, моли́ся о на́съ, преподо́бне, да съ тобо́ю Тро́ицу велича́емъ.

Блаже́нна жи́знь твоя́, Іоа́нне, блаже́нна кончи́на, но блаже́ннѣйшій живо́тъ въ немерца́ющемъ свѣ́тѣ, его́же ра́ди мно́гія поне́слъ еси́ ско́рби, ны́нѣ, ра́дуяся, моли́ся о на́съ, чту́щихъ па́мять твою́, всему́дре.

Богоро́диченъ: Жи́зни Нача́льника отъ крове́й Твои́хъ ро́ждшая, Дѣ́во, безсѣ́менно, моли́твъ ра́ди дѣ́вственника Іоа́нна на́съ, покланя́ющихся Тебѣ́, къ жи́зни вѣ́чной упра́ви, да Тя́, Исто́чника жи́зни ро́ждшую, велича́емъ.

Свѣти́ленъ:

Чистоты́ ра́ди своея́ ско́рбную ше́ствуя стезю́, сѣ́ялъ еси́ мно́гія сле́зы; ны́нѣ же съ весе́ліемъ жня́й блаже́нныя рукоя́ти, моли́ся о на́съ, преподо́бне, со святы́ми отцы́, да и мы́ прича́стницы ва́шего блаже́нства бу́демъ: мы́ бо ча́да ва́ша и о́вцы слове́сныя уче́ній ва́шихъ. [Два́жды.]

Сла́ва, и ны́нѣ, богоро́диченъ:

Чи́стая Дѣ́во, Сло́ва врата́, Ма́ти Христа́ Бо́га на́шего, моли́ спасти́ся на́мъ, рабо́мъ Твои́мъ.

На хвали́техъ стихи́ры, гла́съ 4. Подо́бенъ: Да́лъ еси́ зна́меніе.

Да́лъ еси́ жела́ніе* и къ чистотѣ́ непреста́нное раче́ніе* Твоему́ рабу́, Го́споди,* и то́й, пріе́мь отъ Тебе́ наказа́ніе,* мно́гое подъя́тъ отъ враго́въ томле́ніе,* но, си́хъ побѣди́въ до конца́,* вѣнцено́сецъ показа́ся,* его́же ра́ди и на́съ сохрани́ нескве́рны,* Іису́се Человѣколю́бче* и Спа́се ду́шъ на́шихъ. [Два́жды.]

Чи́стъ еле́й въ сосу́дѣ се́рдца твоего́ имы́й,* Іоа́нне прему́дре,* возже́гъ о́гнь у́мнаго жела́нія,* съ му́дрыми дѣ́вами вше́лъ еси́ въ Черто́гъ небе́сный,* на бра́къ Агнца Непоро́чнаго,* съ ни́миже ны́нѣ веселя́ся,* помяни́ и на́съ, чту́щихъ честно́е твое́ успе́ніе,* о́тче блаже́ннѣйшій.

Пла́мень любве́ твоея́ къ Бо́гу* и вседне́вное жела́ніе* опаля́ющаго тя́ змíя опали́ главу́* и прогна́ си́лою Вы́шняго Свѣ́та,* я́ко не смѣ́яше мѣ́сту твоему́ прибли́житися,* идѣ́же многотерпѣли́выя мо́щи твоя́ ны́нѣ ви́дяще,* покланя́емся и мо́лимъ:* моли́ о на́съ, Іоа́нне сла́вне,* я́ко при́сно сы́й моли́твенникъ о душа́хъ на́шихъ.

Сла́ва, гла́съ 2:

Дѣ́вственный сосу́дъ и чистоты́ люби́теля, пріиди́те, лю́діе, ублажи́мъ Іоа́нна многострада́льнаго, пѣ́ніи и пѣ́сньми того́ восхваля́юще: то́й бо мно́гими страда́ніи свои́ми многоко́зненнаго змíя сокруши́ главу́, блу́днымъ пла́менемъ не опали́въ своего́ тѣ́ла, чи́стъ изы́де съ чи́стыми се́рдцемъ предста́ти Непоро́чному Агнцу, Христу́ Бо́гу. И ны́нѣ служа́ со́лнца свѣтлѣ́йшему Свѣ́ту, мо́лится о на́съ прилѣ́жно, чту́щихъ любо́вію его́ па́мять, и подае́тъ исцѣле́ніе вѣ́рою къ нему́ притека́ющимъ.

И ны́нѣ, богоро́диченъ:

Спаси́ отъ бѣ́дъ [рабы́ Твоя́, Богоро́дице Дѣ́во, я́ко вси́ по Бо́зѣ къ Тебѣ́ прибѣга́емъ, я́ко неруши́мѣй стѣнѣ́ и предста́тельству].

Славосло́віе вели́кое. [Ектеніи́.] И отпу́стъ.



НА ЛИТУРГІИ,

Слу́жба преподо́бному о́бща: [Блаже́нна отъ кано́на преподо́бнаго, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 101 об. – 106.

/ Къ оглавленію раздѣла /


Наверхъ / Къ титульной страницѣ

0