Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 17-й де́нь.
Святы́я великому́ченицы Мари́ны.

[ВЕЧЕРЪ,]
На Го́споди воззва́хъ: стихи́ры на 6, гла́съ 8. Подо́бенъ: О, пресла́внаго чудесе́!

Му́ченице Мари́но прехва́льная,* ни муче́нія тя́ о́гнь,* ни пи́щи наслажде́ніе,* ни мірскíя ра́дости,* ни красота́ ю́ности* я́же ко Христу́ любве́ отлучи́,* жела́ющую красоты́, ю́же па́че ума́,* честна́го Жениха́ твоего́ получи́ти,* ея́же сподо́билася еси́, богоблаже́нная. [Два́жды.]

Му́ченице Мари́но всесла́вная,* въ небе́сныхъ оби́телехъ всели́вшися досто́йно* съ дѣви́ческими чи́нми* и му́ченикъ во́инствы,* творя́щихъ вѣ́рою па́мять твою́* и приступа́ющихъ вѣ́рно покро́ву твоему́* спаса́й моли́твами твои́ми* и согрѣше́ній оставле́ніе у Бо́га испроси́, и избавле́ніе,* и ве́лію ми́лость. [Два́жды.]

Сла́ва, гла́съ 2:

Во гра́дѣ Бо́га на́шего, въ горѣ́ святѣ́й Его́, ту́ всели́ся свята́я, свѣщу́ неугаси́му соблю́дши, услы́шимъ дѣ́выя похвалу́. О дѣ́вство, Це́ркви Бо́жія! О дѣ́вство, му́ченикомъ сла́ва! О дѣ́вство, а́нгеломъ соприча́стниче!

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Дре́ву кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до сла́дкое, почто́ оста́вилъ еси́ Мене́, ро́ждшую Тя́, еди́ну, Свѣ́те непристу́пный, Пребезнача́льнаго Отца́? Потщи́ся и просла́вися, я́ко да сла́ву получа́тъ Боже́ственную, и́же Боже́ственныя стра́сти Твоя́ сла́вящіи.

На стихо́внѣ окто́иха. Сла́ва, гла́съ 2:

Во гла́сѣ ра́дованія и во псалмѣ́хъ восклица́нія воспои́мъ Мари́ну му́ченицу, я́ко низложи́ на зе́млю и́дольскую пре́лесть и сопроти́внаго врага́ му́жески подъ но́зѣ свои́ подложи́. Тѣ́мже и, сконча́вшися, на небеса́ возлетѣ́, на главѣ́ вѣне́цъ нося́щи и взыва́ющи: Тебе́, Женише́ мо́й, жела́ю и, жела́нія любо́вь иму́щи, за Тя́ пло́ть мою́ огню́ преда́хъ, да вселю́ся у́бо въ вѣ́чныя Твоя́ оби́тели, идѣ́же е́сть веселя́щихся жили́ще.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Егда́ Нескве́рная Агница ви́дѣ Своего́ Агнца, на заколе́ніе, я́ко человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, Ро́ждшую Тя́, что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.

Тропа́рь, гла́съ 4:

Агница Твоя́, Іису́се, Мари́на, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.


НА УТРЕНИ,
Кано́на о́ба окто́иха безъ му́ченичновъ и святы́я на 6, его́же краегране́сіе: Христо́ву дѣ́ву му́ченицу невѣ́сту пѣ́сньми пою́. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Лику́ющи, му́ченице, о Бо́зѣ и луча́ми исполня́ема отъ Него́, зарю́ мнѣ́ пода́ждь свѣтоно́сну твои́ми моли́твами, до́брая дѣ́во.

Теку́щихъ и нестоя́тельное и тлѣ́нное, му́дрымъ умо́мъ обложе́на, му́ченице Христо́ва, презрѣ́ла еси́ разу́мно и пра́ведныхъ сподо́билася еси́ вы́шнія свѣ́тлости.

Ра́бски прихожду́ къ тебѣ́, честна́я, твои́ми мольба́ми жите́йскихъ мя́ бѣ́дъ спаси́, му́ченице страстоно́сице, и страсте́й мои́хъ утиши́ смуще́ніе.

Му́дростію и благода́тію просвѣ́щся у́мъ тво́й, Мари́но, мучи́телей преще́нія не устраши́лася еси́, му́ченице Спа́сова, Боже́ственною си́лою укрѣпля́ема.

Богоро́диченъ: Стезю́ показа́ла еси́ жи́зни, Жи́знь су́щую заче́нши и пло́тски ро́ждши Сію́, Богома́ти, и у́зы сме́ртныя расто́ргла еси́.

Пѣ́снь 3.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ, па́че, Тебе́, Го́споди.

Ни о́гнь, ниже́ ра́ны, ни ме́чное сѣче́ніе, ни мучи́телей суровство́, ни сме́рть же, ни звѣре́й свирѣ́пство Боже́ственныя отлучи́ тя любве́, прехва́льная.

Была́ еси́ непоколеби́мь и непреклони́мь во вре́мя обстоя́нія сто́лпъ, всесла́вная, благоче́стія основа́ніе положе́но вѣ́ры на ка́мени, преблаже́нная.

Дѣ́ва въ му́ченицахъ была́ еси́, въ дѣ́вахъ непобѣди́ма му́ченица была́ еси́ ты́, Христу́ уневѣ́стившися, сугу́бъ тебѣ́ подаю́щу вѣне́цъ, всенепоро́чная.

Святы́хъ крове́й твои́хъ, до́брая дѣ́во, то́ки излива́емы всю́ угаси́ша и́дольскую ле́сть, и собо́ръ привела́ еси́ му́ченикъ Жениху́ твоему́.

Богоро́диченъ: Укрѣ́пльшеся благода́тію, Богоро́дицу Тя́ единому́дренно сла́вимъ, пло́ть бы́вшаго, е́же бы́ти всѣ́мъ Даю́щаго, родила́ еси́ и ми́ръ обнови́ла еси́.

Сѣда́ленъ, гла́съ 4. Подо́бенъ: Ско́ро предвари́.

Наста́, празднолю́бцы, свѣ́тло торжество́, па́мять сла́вныя страстоно́сицы Христо́вы, веселя́щи вся́ческая, сія́ющи заря́ми чуде́съ въ мíрѣ, нося́щи человѣ́комъ непреста́нную благода́ть, тоя́ моли́твами, Христе́, спаси́ ду́ши на́ша. [Два́жды.]

Сла́ва, и ны́нѣ, богоро́диченъ:

Дѣ́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Крестобогоро́диченъ:

На Крестѣ́ Тя возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, вкуша́еши сме́рти, оживи́ти ме́ртвыя хотя́, я́ко Милосе́рдъ?

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Боголѣ́пно бы́сть вои́стинну житіе́ твое́, а́нгеломъ яви́ся любе́зно, де́монскому же во́инству и слуга́мъ и́хъ свирѣ́пству непристу́пно показа́ся. Христу́ бо вопія́ла еси́: си́лѣ Твое́й сла́ва, Человѣколю́бче.

На земли́ подвиза́вшися, всебога́тая, и вре́менныя болѣ́зни претерпѣ́вши, на небесѣ́хъ ны́нѣ воздая́нія отъ Влады́ки пріе́млеши, му́ченице непобѣди́мая, во вѣ́ки безконе́чныя, со а́нгелы вопію́щи: си́лѣ Твое́й сла́ва, Человѣколю́бче.

Ны́нѣ о тебѣ́ ра́дуется дѣви́ческій ли́къ, ны́нѣ му́ченикъ собо́ръ весели́тся, ны́нѣ и мно́жество благочести́выхъ, собра́вшеся, лику́ютъ, ра́дующеся, Влады́цѣ вопію́ще гла́сы немо́лчными: си́лѣ Твое́й сла́ва, Человѣколю́бче.

Вся́ добра́ еси́, дѣ́во, и нескве́рная, яви́лася еси́ невѣ́ста всенепоро́чная, душа́мъ добро́ты рачи́тельна, мучи́тельными разжже́ніи, всеблаже́нная, яви́лася еси́ свѣтлѣ́йши, Христу́ пою́щи: си́лѣ Твое́й сла́ва, Человѣколю́бче.

Богоро́диченъ: Еди́на чи́ста и по рождествѣ́ пребыла́ еси́: Ты́ бо еди́на Сло́во, Ѵпоста́сное Отцу́, Сопресто́льна Сы́на, изъ Тебе́ воплоще́нна, родила́ еси́, Богоневѣ́сто, и но́сиши на руку́ Невмѣсти́маго всѣ́ми и вся́ концы́ Содержа́щаго.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

На суди́щи страда́лецъ тече́ніе крѣ́пко, отрокови́це, прешла́ еси́. Боже́ственное бо жела́ніе же́нскую не́мощь укрѣпи́, проявле́ніе показу́я, промышле́ніемъ страда́нія самодержа́вна му́ченица су́щи.

Ка́пли твои́хъ крове́й, му́ченице, иска́пающе, багряни́цу многоцѣ́нну и нетлѣ́ннаго весе́лія ри́зу истка́ша, е́юже ны́нѣ, богому́драя, на небесѣ́хъ одѣ́яна, у́мно Жениху́ предстои́ши.

Узами моли́твъ твои́хъ, отрокови́це, всехва́льнаго змíя связа́вши, горды́ню пе́рвѣе превознесе́нную къ земли́ смири́ла еси́: испо́лнити бо вѣ́сть, я́ко Бла́гъ Всевѣ́децъ, Того́ боя́щихся во́лю.

Превозноси́мыя тя́ сла́вы боже́ственными вѣнцы́ вои́стинну украси́ Жени́хъ — Сло́во, Его́ ра́ди страда́вшую обожа́я и огня́ пла́мень и біе́нія ра́нъ терпѣли́вно претерпѣ́вшую, сла́вная.

Богоро́диченъ: Очища́емо зря́ще дѣ́вства Твоего́ рождество́мъ, Всенепоро́чная, земны́хъ естество́ отъ пе́рвыя кля́твы, сла́вимъ изъ Тебе́ Рожде́ннаго, единоча́даго за милосе́рдіе, Его́же моли́, Дѣ́во, спасти́ на́съ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Возложе́на Христу́, яви́лася еси́ добра́ и нескве́рна, и я́ко исто́чникъ чи́стъ, и вертогра́дъ многопло́денъ, Мари́но всесла́вная, и бли́жняя невѣ́сто, и ра́й неокра́домъ.

Отрокови́ца всеблаголѣ́пна вслѣ́дъ Тебе́ послѣ́дова, теку́щи ко благово́нію мѵ́ра Твоего́, Влады́ко, пречи́стѣй стра́сти Твое́й терпѣ́ніемъ подо́бящися и пречестнѣ́й.

Претерпѣ́ла еси́ му́жески по́двиги, му́ченице многострада́льная, и пе́рвѣе умовре́дно вельми́ хва́лящагося съ шу́момъ погуби́ла еси́ кре́стною си́лою, о Мари́но господоимени́тая!

Богоро́диченъ: Марíе, чи́стый и пречи́стый сосу́де всѣ́хъ Содѣ́теля, души́ очисти́лище, пода́ждь ми́ сле́зы и услы́ши мольбу́ мою́, Всенепоро́чная.

Конда́къ, гла́съ 3. Подо́бенъ: Дѣ́ва дне́сь.

Дѣ́вства добро́тами преиспещре́нна, дѣ́во, нетлѣ́нными вѣнцы́ вѣнча́лася еси́, Мари́но, кровьми́ же му́ченичества обагре́на, чудесы́ просвѣти́вшися исцѣле́ній, благоче́стно, му́ченице, прія́ла еси́ по́честь побѣ́ды твоего́ страда́нія.

Икосъ:

Жениху́ Христу́ раче́ніемъ се́рдца твоего́ отъ младе́нства, честна́я, разже́гшися, потекла́ еси́, я́ко еле́нь, жа́ждущи исто́чникомъ приснотеку́щимъ, дѣвому́ченица, страда́ніемъ же тебе́ саму́ю соблю́дши, въ нетлѣ́нномъ су́щно Зижди́теля твоего́, невѣ́сто благосла́вная, черто́зѣ дости́гла еси́, укра́шена и упещре́на, вѣнцено́сица побѣди́тельная, свѣщено́сица благоцвѣту́щая, нетлѣ́ннаго невѣ́стника получи́вши и пріе́мши, я́ко зла́то, по́честь побѣ́ды твоего́ страда́нія.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Свѣ́тъ непристу́пный, Мари́но, просвѣти́ досто́йно ду́шу твою́ и свѣща́ми свѣ́тлыми озари́ пою́щія: благослове́нъ еси́, Го́споди Бо́же, во вѣ́ки.

Взя́тся къ Боже́ственнѣй вои́стинну высотѣ́, высо́къ бо ты́ стяжа́ла еси́ ра́зумъ и въ черто́гъ свѣ́телъ всели́лася еси́, вопію́щи: благослове́нъ еси́, Го́споди Бо́же, во вѣ́ки.

Невѣ́ста бли́жняя Влады́цѣ показа́лася еси́, Мари́но богоно́сная, и я́ко му́ченица непобѣ́дима Тому́ зове́ши: благослове́нъ еси́, Го́споди Бо́же, во вѣ́ки.

Богоро́диченъ: Кня́зь не ктому́ отъ Іу́ды оскудѣ́, изъ Тебе́ бо Влады́ка, язы́ковъ наде́жда, возсія́ несказа́нно: благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: Мусикíйскимъ орга́номъ согласу́ющимъ и лю́демъ безчи́сленнымъ, покланя́ющимся о́бразу въ Деи́рѣ, три́ о́троцы не повину́вшеся, Го́спода воспѣва́ху и славосло́вяху во вся́ вѣ́ки.

Тве́рдъ нра́въ стяжа́вши, тве́рдо страда́нія терпя́ше, и вѣнцы́ побѣ́дными вѣнча́ся, пою́щи: Го́спода по́йте и превозноси́те Его́ во вѣ́ки.

Та́йный, Мари́но, тебѣ́ черто́гъ ду́шъ Жени́хъ, Бо́гъ Сло́во, угото́ва на небесѣ́хъ, Его́же ви́дящи, зове́ши: Го́спода по́йте и превозноси́те Его́ во вѣ́ки.

Добродѣ́тельми разли́чными укра́шена, даро́въ мно́жайшихъ сподо́бися, кра́йнее жела́ній зря́щи и вопію́щи: Го́спода по́йте и превозноси́те Его́ во вѣ́ки.

Спасе́нія яви́лася еси́, страстоте́рпице, мно́гимъ вина́ и му́ченикъ собо́ры Христу́ привела́ еси́, согла́сно вопію́щи: Го́спода по́йте и превозноси́те Его́ во вѣ́ки.

Богоро́диченъ: Очище́ніе на́мъ, Богороди́тельнице, Тобо́ю даде́ся: Ты́ бо еди́на отдала́ еси́ до́лгъ, всѣ́хъ заче́нши Го́спода, Дѣ́во, Его́же превозно́симъ во вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Мари́но, му́ченице Христо́ва, жи́знь вѣ́чную и неги́бнущую въ ра́йстѣй пи́щи прилѣ́жно вои́стинну объя́ла еси́, обраща́ющееся бо безъ вре́да ору́жіе премину́ла еси́, му́ченическими кровьми́ сія́ющи издале́ча, до́брая дѣ́во.

Попали́ всеве́щную и любомірску́ю, дѣ́во, мы́сль жела́ніе боже́ственное и твердѣ́йшу показа́ му́ченицу, дѣ́вственными сія́ньми пе́рвѣе сія́ющую, Мари́но всему́драя. Тѣ́мже вси́ тя́, вѣ́рніи, ублажа́емъ.

Разрѣши́ ми, невѣ́сто избра́нная, согрѣше́ній плени́цы моли́твами твои́ми, и рукописа́ніе грѣхо́вное расто́ргни, му́ченице, предстоя́щи благолѣ́пно Христу́, Жениху́ твоему́ Всеще́дрому, и страсте́й мои́хъ мглу́ разори́.

Преста́ шата́ніе лю́тое льсти́ваго: се́ бо отрокови́ца, забыва́ющи же́нское естество́, пострада́, и на него́ свѣ́тло побѣ́ду взе́мши, и ны́нѣ прама́тернее назда́ я́вѣ паде́ніе.

Богоро́диченъ: Зрѣ́лу пожина́ю жи́знь, невреди́мь дре́вомъ ра́зума: Ты́ бо, Пресвята́я, жи́зни дре́во — Христа́ прозябла́ еси́, вхо́ды жи́зни всѣ́мъ показа́вшаго. Тѣ́мже Тя́, Всечи́стая, благоче́стно Богоро́дицу проповѣ́даемъ.

Свѣти́ленъ. Подо́бенъ: Жены́, услы́шите.

Укрѣ́пльшися, до́брая дѣ́во, Кресто́мъ Го́спода твоего́, мучи́телей погуби́ла еси́ горды́ню, пострада́вши, му́ченице, му́жески, и отъ Христа́ прія́ла еси́ по́чести побѣ́ды, всему́драя Мари́но господоимени́тая, о на́съ моля́щи, тя́ почита́ющихъ любо́вію.

Богоро́диченъ: Стоя́ще о́крестъ Тебе́ дѣ́вы богому́дрыя, Богороди́тельнице Марíе, я́ко Цари́цѣ ро́да, Твоему́ Сы́ну приведо́шася, женихолѣ́пно, Пречи́стая, я́ко Царю́ вся́ческихъ, Его́же, Ма́ти Дѣ́во Отрокови́це, о на́съ умоли́.

На стихо́внѣ, окто́иха. Сла́ва, гла́съ 1:

Яко на ка́мени тве́рдѣ исповѣ́данія Бо́жія утве́рждшися, Мари́но прехва́льная, убíйцу врага́ въ про́пасть потопи́ла еси́ и вѣне́цъ побѣ́дный досто́йно прія́ла еси́.

И ны́нѣ, богоро́диченъ или крестобогоро́диченъ. Подо́бенъ: Всехва́льніи му́ченицы.

Своего́ Агнца* Агница и непоро́чная Влады́чица* на Крестѣ́ я́ко ви́дѣ,* зра́ка не иму́ща, ниже́ добро́ты, —* увы́ Мнѣ́, — рыда́ющи, глаго́лаше, —* гдѣ́ добро́та Твоя́ за́йде, Сладча́йшій?* гдѣ́ благолѣ́піе?* гдѣ́ благода́ть блиста́ющая* о́браза Твоего́,* Сы́не Мо́й любе́знѣйшій?


НА ЛИТУРГІИ,

Блаже́нна окто́иха, на 4. И святы́я пѣ́снь 3-я, на 4. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. Аллилу́ія, гла́съ 1: Терпя́, потерпѣ́хъ Го́спода, и вня́тъ ми́ [и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Луки́, зача́ло 33. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 162 – 166 об.

/ Къ оглавленію раздѣла /


Наверхъ / Къ титульной страницѣ

0