Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 25.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣсяца Іулія въ 16-й день.
[Въ недѣ́лю, ближа́йшую къ 16-му числу́.]
Па́мять святы́хъ [оте́цъ] Вселе́нскихъ шести́ Собо́ровъ.

Прилучи́вшагося же свята́го пое́мъ на повече́ріи.



ВЪ СУББОТУ НА МАЛѢЙ ВЕЧЕРНИ,
Стихи́ры воскре́сны и Богоро́дицы, по обы́чаю.



НА ВЕЛИЦѢЙ ВЕЧЕРНИ,
По обы́чномъ псалмѣ́, пое́мъ: Блаже́нъ му́жъ.., каѳи́сму всю́. На Го́споди воззва́хъ: стихи́ры воскре́сны 4 и отце́въ 6, гла́съ 6. Подо́бенъ: Отча́янная.

Изъ чре́ва роди́лся еси́ пре́жде денни́цы, отъ Отца́ безма́теренъ пре́жде вѣкъ; а́ще и Арій тва́рь Тя́, а не Бо́га сла́витъ, де́рзостію смѣша́я Тя́, Зижди́теля, тва́ремъ безу́мно, вещество́ огня́ вѣ́чнаго себе́ сокро́вищствуяй. Но Собо́ръ, и́же въ Нике́и, Сы́на Бо́жія Тя́ проповѣ́да, Го́споди, Отцу́ и Ду́ху сопресто́льна. [Два́жды.]

Раздра́нную Христо́ву ри́зу и растерза́нную пе́сіими че́люстьми му́дрѣ сши́сте, честнíи отцы́, зрѣ́ти наготу́ Сего́ ника́коже терпя́ще, я́коже Симъ и Іа́феѳъ оте́ческую дре́вле, посрами́сте несмы́сленнаго и того́ единомы́сленники, Арія, гнѣ́ву тезоимени́таго. [Два́жды.]

Македо́няны, и несторіа́ны, и евтихíаны, и діоско́ряны, аполлинаріа́ны же, и савелліа́ны, и севи́ряны, во́лки тя́жкія, прише́дшія въ ко́жахъ о́вчіихъ, дале́че отъ ста́да Спа́сова я́коже и́стинніи па́стыріе отгна́сте, на́ги отъ ко́жъ о́вчіихъ треокая́нныя поста́вльше изря́днѣ. Тѣ́мже вы́ ублажа́емъ. [Два́жды.]

Сла́ва, гла́съ 6. Самогла́сенъ:

Та́йныя дне́сь Ду́ха трубы́ богоно́сныя отцы́ восхва́лимъ, пѣснопѣ́вшія посредѣ́ Це́ркве пѣ́снь сли́чную богосло́вія: Тро́ицу Еди́ну непремѣ́нную, Существо́ же и Божество́, низложи́тели Аріевы и правосла́вныхъ побо́рники, моля́щіяся всегда́ Го́споду поми́ловатися душа́мъ на́шимъ.

И ны́нѣ, богоро́диченъ пе́рвый гла́са.
По вхо́де проки́менъ дне́ и чте́нія три́.

Бытія́ чте́ніе. [Глава́ 14.]

Слы́шавъ Авра́мъ, я́ко плѣне́нъ бы́сть Ло́тъ, брата́ничь его́, сочте́ своя́ домоча́дцы, три́ста и осмьна́десять, и погна́ во слѣ́дъ и́хъ да́же до Да́на. И нападе́ на ня́ но́щію са́мъ и о́троцы его́ съ ни́мъ; и порази́ и́хъ, и гони́ и́хъ до Хова́ла, е́же е́сть ошу́юю Дама́ска. И возврати́ вся́каго коня́ содо́мскаго, и Ло́та, брата́нича своего́, возврати́, и вся имѣ́нія его́, и жены́, и лю́ди. Изы́де же ца́рь Содо́мскій въ срѣ́теніе ему́, повнегда́ возврати́тися ему́ отъ сѣ́ча Ходоллогомо́рскаго, и съ царьми́, и́же съ ни́мъ, во удо́ль Сави́ну; сіе́ же бя́ше по́ле царе́во. И Мелхиседе́къ, ца́рь Сали́мскій, изнесе́ хлѣ́бы и вино́, бя́ше же свяще́нникъ Бо́га Вы́шняго. И благослови́ Авра́ма, и рече́: благослове́нъ Авра́мъ Бо́гомъ Вы́шнимъ, Иже созда́ не́бо и зе́млю; и благослове́нъ Бо́гъ Вы́шній, Иже предаде́ враги́ твоя́ подъ ру́ки тебѣ́.

Втора́го зако́на чте́ніе. [Глава́ 1.]

Во дне́хъ о́нѣхъ, рече́ Моисе́й къ сыно́мъ Изра́илевымъ: ви́дите, преда́хъ предъ лице́мъ ва́шимъ зе́млю, вше́дше, наслѣ́дуйте зе́млю, ю́же кля́тся Госпо́дь отце́мъ ва́шимъ — Авраа́му, и Исаа́ку, и Іа́кову — да́ти и́мъ и сѣ́мени и́хъ по ни́хъ. И реко́хъ къ ва́мъ во вре́мя о́но, глаго́ля: не возмогу́ еди́нъ води́ти ва́съ. Госпо́дь Бо́гъ на́шъ умно́жилъ вы́ е́сть, и се́, есте́ дне́сь, я́ко звѣ́зды небе́сныя, мно́жествомъ. Госпо́дь Бо́гъ оте́цъ на́шихъ да приложи́тъ ва́мъ, я́ко да бу́дете ты́сящами сугу́бо, и да благослови́тъ ва́съ, я́коже глаго́ла ва́мъ. И взя́хъ отъ ва́съ му́жы му́дры, и свѣ́домы, и смы́сленны и поста́вихъ и́хъ владѣ́ти надъ ва́ми: тысященача́льники, и стонача́льники, и пятдесятонача́льники, и десятонача́льники, и писмовводи́тели судія́мъ ва́шимъ. И заповѣ́дахъ судія́мъ вашимъ во время оно, глаголя: разслушайте посредѣ братій ва́шихъ и суди́те пра́ведно посредѣ́ му́жа, и посредѣ́ бра́та его́, и посредѣ́ прише́льца его́. Да не позна́ете лица́ въ судѣ́, ма́лому и вели́кому су́диши, и не устыди́шися лица́ человѣ́ческа, я́ко су́дъ Бо́жій е́сть.

Втора́го зако́на чте́ніе. [Глава́ 10.]

Во дне́хъ о́нѣхъ рече́ Моисе́й къ сыно́мъ Изра́илевымъ: се́ Го́спода Бо́га твоего́ не́бо, и Не́бо небесе́, земля́ и вся́, ели́ка су́ть на не́й. Оба́че отцы́ ва́ша произво́ли Госпо́дь люби́ти я́ и избра́ сѣ́мя и́хъ по ни́хъ, ва́съ, па́че всѣ́хъ язы́къ, въ де́нь се́й. И обрѣ́жите жестосе́рдіе ва́ше и вы́и ва́шея не ожесточи́те ктому́. Ибо Госпо́дь Бо́гъ на́шъ, Се́й Бо́гъ бого́въ и Госпо́дь господе́й; Бо́гъ Вели́кій, и Крѣ́пкій, и Стра́шный, Иже не диви́тся лицу́, ниже́ взе́млетъ да́ръ. Творя́й су́дъ прише́льцу, и сиротѣ́, и вдовѣ́, и лю́битъ прише́льца, да́ти ему́ хлѣ́бъ и ри́зу. И возлюби́те прише́льца, прише́льцы бо бѣ́сте въ земли́ Еги́петстѣй. Го́спода Бо́га твоего́ да убои́шися, и Тому́ еди́ному послу́жиши, и къ Нему́ прилѣпи́шися, и и́менемъ Его́ клене́шися. То́й хвала́ твоя́, и То́й Бо́гъ тво́й, Иже сотвори́ тебѣ́ вели́кая и сла́вная сія́, я́же ви́дѣста о́чи твои́.

На литíи стихи́ра хра́ма. Сла́ва, гла́съ 3:

Апо́стольскихъ преда́ній извѣ́стніи храни́теліе бы́сте, святíи отцы́: Святы́я бо Тро́ицы Единосу́щное, правосла́вно проповѣ́давше, Аріево хуле́ніе собо́рнѣ низложи́сте, съ ни́мже и Македо́нія духобо́рца обличи́вше, осуди́сте Несто́рія, Евти́хія и Діоско́ра, Саве́ллія же и Севи́ра безгла́внаго. Ихже пре́лести испроси́те изба́витися на́мъ, нескве́рну на́шему житію́ въ вѣ́рѣ сохрани́тися, мо́лимся.

И ны́нѣ, богоро́диченъ:

Безъ сѣ́мене отъ Боже́ственнаго [Ду́ха во́лею же Отчею зачала́ еси́ Сы́на Бо́жія, отъ Отца́ безъ ма́тере пре́жде вѣ́къ су́ща, на́съ же ра́ди, изъ Тебе́ безъ отца́ бы́вша, пло́тію родила́ еси́ и Младе́нца млеко́мъ пита́ла еси́. Тѣ́мже не преста́й моли́ти изба́витися отъ бѣ́дъ душа́мъ на́шимъ].

На стихо́внѣ окто́иха. Сла́ва, отце́въ, гла́съ 4:

Моле́бную па́мять дне́сь богоно́сныхъ отце́въ, отъ всея́ вселе́нныя собра́вшихся во свѣ́тлѣмъ гра́дѣ Нике́йстѣмъ, правосла́вныхъ собра́нія, благоче́ствующе, вѣ́рно пра́зднуемъ: сíи бо лю́таго Арія безбо́жное велѣ́ніе благочестному́дреннѣ низложи́ша, и отъ Собо́рныя Це́ркве собо́рнѣ того́ изгна́ша, и я́сно Сы́на Бо́жія единосу́щна и соприсносу́щна, пре́жде вѣ́къ Су́ща, всѣ́хъ научи́ша исповѣ́дати во изображе́ніи вѣ́ры, извѣ́стно и благоче́стно сіе́ изложи́вше. Тѣ́мже и мы́, боже́ственнымъ и́хъ повелѣ́ніемъ послѣ́дствующе, извѣ́стно вѣ́рующе, слу́жимъ, со Отце́мъ Сы́ну и Ду́ху Всесвято́му, во еди́номъ Божествѣ́, Тро́ицѣ Единосу́щнѣй.

И ны́нѣ, богоро́диченъ:

При́зри на моле́нія [Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ].

На благослове́ніи хлѣ́бовъ тропа́рь: Богоро́дице Дѣ́во.., два́жды.
И отце́въ, гла́съ 8:

Препросла́вленъ еси́, Христе́ Бо́же на́шъ, свѣти́ла на земли́ отцы́ на́ши основа́вый, и тѣ́ми ко и́стиннѣй вѣ́рѣ вся́ ны́ наста́вивый, Многоблагоутро́бне, сла́ва Тебѣ́.

Еди́ножды.



НА УТРЕНИ,
На Бо́гъ Госпо́дь: тропа́рь воскре́сенъ, два́жды. Сла́ва, отце́въ. И ны́нѣ, богоро́диченъ: Иже на́съ ра́ди рожде́йся...

По каѳи́смахъ сѣда́льны окто́иха.

Кано́нъ воскре́сенъ со ирмосо́мъ на 4, и Богоро́дицы на 2, и отце́въ на 8. Творе́ніе свяще́ннаго и вселе́нскаго патріа́рха ки́ръ Ге́рмана. Гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Иже отъ Нике́и, я́коже отъ нѣ́коего небесе́, всю́ду возгремѣ́вше Сло́во Жива́го Отца́ и Сего́ показа́вше враги́, гро́момъ избіе́ны, свяще́нными словесы́ да почту́тся.

Духобо́рцевъ ду́хъ лука́вый Святы́мъ Ду́хомъ Христо́съ отъ Своея́ Це́ркве дале́че отгна́, вторы́мъ дѣ́йствомъ Собо́ра совокупи́въ.

Христобо́рца пре́лесть изгна́ Несто́рія Кири́ллъ, Собо́ра нача́льникъ, и́же я́сно Дѣ́ву Марíю исповѣ́да, Бо́гу Ма́терь чи́стую.

Богоро́диченъ: Несозда́нныя Тро́ицы Еди́наго Христа́ во двою́ естеству́ и хотѣ́нію, Чи́стая, ражда́еши, соедине́ніе человѣ́комъ и а́нгеломъ Тебе́ ра́ди содѣ́лавшаго.

Другíй кано́нъ святы́хъ отце́въ, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Оте́цъ благочести́вое собра́ніе, сте́кшееся иногда́ на Евти́ха, вои́стинну Спа́са проповѣ́да въ нераздѣ́льныхъ естества́хъ сугу́быхъ, боже́ственнаго отца́ Кири́лла уче́ніемъ ше́ствующее я́вѣ и пребыва́ющее.

Число́ шестьсо́тъ тридеся́тое благочести́вѣйшихъ муже́й, Евти́хову пре́лесть и Севи́рову е́ресь низло́жше, достиго́ша воспѣ́ти си́це: Христа́ во двою́ существу́ проповѣ́дуемъ, ше́ствующе рече́ніемъ Кири́лла блаже́ннаго.

Иже не проповѣ́дуетъ, во двою́ естеству́ и дѣ́йствіихъ Христа́, Сло́во Отчее, пріи́метъ ана́ѳему, четве́ртый бо Собо́ръ святы́хъ оте́цъ единому́дренно си́це проповѣ́да. Вси́ у́бо и́хъ да ублажи́мъ.

Богоро́диченъ: Пресла́вная о Тебѣ́ возглаго́лашася въ ро́дѣхъ родо́въ, Яже Бо́га Сло́ва во чре́вѣ вмѣсти́вшая, чиста́ же пребы́вши, Богоро́дице Марíе, тѣ́мъ Тя́ вси́ почита́емъ, по Бо́зѣ Предста́тельницу на́шу.

Катава́сія: Отве́рзу уста́ моя́...

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Тва́ри служи́тель я́влься Арій безу́мный, и Македо́ній па́ки ме́рзокъ я́влься, въ гее́ннѣ о́гненнѣй ра́вно му́чатся со е́ллины.

Седмію́ Собо́ры свяще́нными святы́хъ оте́цъ честну́ю Це́рковь уясни́лъ еси́, Христе́, я́коже седми́хъ свѣти́льникъ свѣ́томъ пре́лести тму́ прогна́въ дале́че.

Ста́до Твое́, Сло́ве, погубля́етъ многообра́зная кра́ста ерети́къ, па́стыріе же Твои́хъ слове́сныхъ ове́цъ уче́ніемъ сіе́ премѣни́ша.

Богоро́диченъ: Еди́наго родила́ еси́, Пречи́стая, отъ Несозда́нныя Тро́ицы во двою́ существу́ и хотѣ́нію, Его́же о́бразу честно́му покланя́емся, благода́ти исполня́еми.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Иже Севи́ра безсту́дно прекло́ншеся словесе́мъ, я́да смертото́чнаго испо́лненнымъ, посрами́теся при́сно, отлуча́ющеся вси́ Це́ркве, я́коже во́лцы и пси́ хи́щніи.

Лико́вственницы и вѣ́рніи, Вседѣ́теля и Спа́са во двою́ нераздѣ́льныхъ суще́ствъ и хотѣ́ніихъ сугу́быхъ и дѣ́йствіихъ почита́емъ, тѣ́мже Севи́ра пре́лести вконе́цъ отвраща́емся.

Пріиди́те, Севи́ра и Іа́кова неблагополу́чныхъ пре́лесть, съ си́ми Ѳеодо́сія, Діоско́ра отме́щемъ я́вѣ, четве́ртый же Собо́ръ благочести́выхъ оте́цъ воспое́мъ пѣ́сньми боже́ственными.

Богоро́диченъ: Херуви́мъ и серафи́мъ яви́лася еси́ вы́шши, Богоро́дице: Ты́ бо еди́на прія́ла еси́ Невмѣсти́маго Бо́га во Твое́мъ чре́вѣ, Нескве́рная. Тѣ́мже Тя́, вси́ вѣ́рніи, пѣ́сньми, Чи́стая, ублажа́емъ.

Конда́къ и и́косъ воскре́сенъ.
Та́же сѣда́ленъ отце́въ, гла́съ 4. Подо́бенъ: Ско́ро предвари́.

Свѣти́льницы пресвѣ́тліи и́стины Христо́вы мíру яви́стеся на земли́, вои́стинну блаже́ннѣйшій, отцы́ боговѣща́нніи, изсуши́вше е́реси ху́льныхъ языковре́дій и угаси́вше пламенови́дная злосла́вныхъ смуще́нія: тѣ́мже, я́ко святи́теліе Христо́вы, моли́теся спасти́ся на́мъ. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Врази́ Твои́ возшумѣ́ша, и ненави́дящіи Тя́ главу́ воздвиго́ша, Спа́се, вма́лѣ, но а́біе падо́ша, не терпя́ще гла́са тру́бъ духо́вныхъ.

Со́лнца Со́лнцы сугу́бо озари́ша, Сы́нъ и Ду́хъ отъ Отца́, несозда́ни, Собезнача́льни: Обои́мъ Оте́цъ Еди́нъ вино́венъ вѣ́руется.

Се́дмь у́бо духо́въ, и́же почи́ша на Христѣ́, Иса́ія сіе́ рече́, на седми́хъ же Собо́рѣхъ почи́ Христо́съ со Отце́мъ и Боже́ственнымъ Ду́хомъ.

Богоро́диченъ: Бо́га родила́ еси́, пло́ть носи́вшаго, отъ чи́стыхъ Твои́хъ крове́й, Отрокови́це Чи́стая, Его́же, сугу́ба естество́мъ, во Ѵпоста́си же еди́нѣй, отцы́ проповѣ́даша.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Рцы́ на́мъ, безу́мный Севи́ре и су́етный: еди́но естество́ сло́жно безнача́льно, свѣ́тъ Сло́во Отчее и Сы́на? Аще бо си́це рече́ши, и друго́е естество́ знамена́лъ еси́: пло́ть бо и Сло́во, не еди́но существо́, но сугу́бо су́щее, окая́нне.

Еди́но ре́кши естество́ Сло́ва, наведе́ вопло́щшееся естество́ человѣ́чества, кромѣ́ измѣне́нія вся́чески и смѣше́нія, александрíомъ учи́тель же и предсѣда́тель, я́сно два́ естества́ и хотѣ́нія науча́я правосла́вно му́дрствовати хотя́щихъ.

Два́ естества́ Христо́ва вси́ проповѣ́даемъ неслія́нно, вся́кое нече́стіе Евти́хія, вѣ́рніи, а́біе и Діоско́ра безу́мнаго попира́юще, послѣ́дуемъ предѣ́лу святы́хъ оте́цъ и Кири́лла боже́ственнаго рече́ніемъ.

Богоро́диченъ: Херуви́мское носи́ло Ты́, Богома́ти Чи́стая, Ты́ вмѣсти́лище, Ты́ и прія́телище Сло́ва Отча и Бо́га, отъ пречи́стыхъ ложе́снъ въ пло́ть обле́кшагося. Тѣ́мже, во двою́ существу́ изъ Тебе́ Вопло́щшемуся покланя́ющеся, непреста́нно сла́вимъ.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Боже́ственный виногра́дъ Христо́въ, и́же отъ Еги́пта пренесе́нъ, те́мнаго отча́янна губи́теля звѣ́ріе пе́рвѣе пояда́ху, пра́щею же святы́хъ оте́цъ дале́че отгна́шася.

Боже́ственнымъ сія́ніемъ трисія́ннымъ у́мъ просвѣ́щше, честнíи отцы́ Еди́наго проповѣ́даша Честны́я Тро́ицы Христа́ Го́спода, сугу́ба естествы́ и хотѣ́ніи.

Тро́иченъ: Въ ве́щныхъ, я́коже въ серафи́мскихъ, му́дрыми отцы́, о Тро́ице, Це́рковь онебеси́ся, трисвяту́ю пѣ́снь при́сно Тебѣ́ пою́щи, собира́етъ Тро́ическое Твое́ Еди́но Божество́.

Богоро́диченъ: Ма́ти и раба́ Твоего́ Сы́на бы́ла еси́, Чи́стая, и́бо Иже изъ Тебе́ пре́жде Тебе́ бя́ше, я́ко Содѣ́тель Тво́й, Его́же во двою́ существу́ познава́емъ и соединя́емъ Сло́вомъ Ѵпоста́снымъ.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

О, Севи́ре! Есте́ствъ Христо́выхъ не слива́й лю́тѣ, законопресту́пне, и́бо жри́теліе и преблаже́нніи учи́теліе вси́, во двою́ существу́ и во еди́номъ Христо́вомъ Лицѣ́ провозвѣсти́вше, всѣ́мъ изложи́ша.

Прія́тъ естество́ человѣ́ческое я́вѣ Безнача́льный, Отчее Сло́во, я́ко Человѣколю́бецъ, хотя́ уще́дрити на́съ, поги́бшихъ. Тѣ́мже Того́ проповѣ́дую во двою́ существу́ и хотѣ́нію.

Низложи́въ Севи́ра четве́ртый Собо́ръ и Діоско́ра, Христа́ ху́лящія, извѣща́я сви́токъ Ле́онта, первосѣда́льника Ри́мскаго, зѣло́ до́брѣ, сугу́ба естества́ Спа́сова несѣко́мо явля́я.

Богоро́диченъ: Ма́тернее дерзнове́ніе, е́же къ Сы́ну Твоему́ иму́щи, Всечи́стая, сро́днаго промышле́нія, е́же о на́съ, не пре́зри, мо́лимся, я́ко Тебе́ и еди́ну, христіа́не, ко Влады́цѣ очище́ніе ми́лостивно предлага́емъ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Бо́гъ бого́въ Госпо́дь, — Дави́дъ, пре́жде воспѣ́въ, — глаго́ла и призва́ отъ восто́къ, отъ коне́цъ всея́ земли́, да́же до за́падъ и́хъ, — Вселе́нскія Собо́ры оте́цъ назна́менуя.

Се́дмь столпо́въ утверди́ прему́дрость Бо́жія, Твою́ Це́рковь, Влады́ко, седмочи́сленными Собо́ры свяще́нныхъ оте́цъ неукло́нну соблюда́ему отъ вся́кихъ ересе́й.

Сты́дъ лица́ да покры́етъ Евти́ха и Діоско́ра, слія́ніе буесло́вившихъ естества́ Христо́ва: не въ привидѣ́ніи бо, но во обоже́ніи естество́ земноро́дныхъ прія́тъ.

Богоро́диченъ: Да во́змется Несто́рій во евре́йскія те́мныя собо́ры, и язы́къ же отсѣче́тся ху́льный: Бо́га бо роди́ Дѣ́ва Марíя, Плотоно́сца на́мъ.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Два́ посла́нія Кири́лла, я́же ко Си́нгелу по́сланная иногда́, восто́ку преоблада́ющу, облича́ютъ Севи́рову всю́ пре́лесть, благоче́стно Христа́ проповѣ́дующая. [Два́жды.]

Кири́ллъ Христа́ проповѣ́дуетъ во двою́ естеству́ и дѣ́йствіихъ сугу́быхъ, Севи́ра несмы́сленнаго е́ресь отсѣца́я. Тѣ́мже вси́ во уче́ніихъ того́ пребу́демъ.

Богоро́диченъ: Дѣ́ву Тя́ и Чи́стую Пресла́вную, Богороди́тельнице Марíе, благочести́віи, вои́стину проповѣ́дуемъ, загражда́юще безсту́дная уста́ Несто́рія, и Діоско́ра зломы́сліе.

Конда́къ, гла́съ 8. Подо́бенъ: Яко нача́тки.

Апо́столъ проповѣ́даніе и оте́цъ догма́ты Це́ркве еди́ну вѣ́ру запечатлѣ́ша, я́же и ри́зу нося́щи и́стины, истка́нну отъ е́же свы́ше богосло́вія, исправля́етъ и сла́витъ благоче́стія вели́кое та́инство.

Икосъ:

Высо́кимъ проповѣ́даніемъ Бо́жію Це́рковь услы́шимъ, вопію́щу: жа́ждай, да гряде́тъ ко мнѣ́ и піе́тъ ча́шу, ю́же держу́, ча́ша е́сть прему́дрости. Сіе́ питіе́ и́стины сло́вомъ почерпо́хъ, во́ду пролива́ющую не прекосло́вія, но исповѣ́данія, ю́же пія́, ны́нѣшній Изра́иль Бо́га зри́тъ, вѣща́юща: ви́дите, ви́дите, я́ко Са́мъ Азъ е́смь и не премѣня́юся: Азъ Бо́гъ пе́рвый, Азъ же и по си́хъ, и ра́звѣ Мене́, нѣ́сть ино́го отню́дъ. Отсю́ду причаща́ющіися насы́тятся и восхва́лятъ благоче́стія вели́кое та́инство.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Вавило́нскаго у́бо змíя разрази́ Даніи́лъ пе́рвѣе, моли́твами же оте́цъ прося́деся лю́тый еги́петскій змíй, я́вѣ Арій, пояда́ющій Христо́во ста́до.

Непроще́нымъ нече́стіемъ негодова́ во́лкъ Македо́ній, прирази́вся Ду́ху, обожа́ющему человѣ́ки и вся́ ба́нею креще́нія на пе́рвую добро́ту вообража́ющу вѣ́рныя.

Діоско́ръ, и Евти́хъ, и Севи́ръ левіаѳа́мъ, тріе́, слива́ющіи и смѣша́ющіи Христо́ва существа́ смѣше́ніемъ у́мнымъ, къ Тро́ицѣ Честнѣ́й прирази́шася де́рзостію.

Богоро́диченъ: Плотска́го Твоего́ зра́ка о́бразъ, Влады́ко, че́стно облобыза́емъ, и Ма́тере Твоея́, и святы́хъ всѣ́хъ, по́честь вѣ́дяще пра́вымъ по́мысломъ преходи́ти до́брѣ къ первообра́зному.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Во двою́ у́бо естеству́ и дѣ́йствіяхъ исповѣ́дающе Христа́, несли́тнѣ, непрело́жнѣ, пре́лесть Севи́ра побѣжда́емъ, тѣ́мже, пло́ти прія́тіемъ стра́сть претерпѣ́вшему, вопіе́мъ Ему́: благослове́нъ Бо́гъ оте́цъ на́шихъ.

Еди́наго разумѣ́емъ, Иже на дре́вѣ и въ нѣ́дрѣхъ Оте́ческихъ, я́ко Бо́га въ вы́шнихъ и во гро́бѣ, я́ко совокупле́нна пло́тію. Ему́же пое́мъ, согла́сно взыва́юще: благослове́нъ еси́, Бо́же оте́цъ на́шихъ.

Аріево истоща́ніе, пресѣче́ніе же, Бо́га умаля́ющаго, вѣ́рніи, соединомы́сліе а́біе Саве́лліево, Тро́ическія враги́ возненави́дѣвше, Тро́ицѣ возопіе́мъ: благослове́нъ Бо́гъ оте́цъ на́шихъ.

Тро́иченъ: Всѣ́хъ у́бо Госпо́дь, Еди́наго же то́чію Единоро́днаго Сы́на, правосла́вно Отца́ богосло́вяще, Тя́ возвѣща́емъ, и Еди́нъ вѣ́дяще Тво́й исходя́щій Ду́хъ, пра́въ, сра́сленъ и соприсносу́щенъ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Якоже еди́наго ко́рене о́трасли Богоса́дны, Сы́нъ и Ду́хъ возсія́вше: и́бо Оте́цъ Единовино́венъ е́сть, Безлѣ́тный, Безлѣ́тнымъ Ли́цамъ Единоче́стенъ.

Изъ чре́ва невеще́ственна безлѣ́тно возсія́лъ еси́, Единосу́щное Сло́во Отцу́ и Ду́ху, но на́съ ра́ди въ лѣ́тнюю всели́ся веще́ственную утро́бу еди́ныя Богоро́дицы.

Разжже́нныя стрѣ́лы огне́мъ духо́внымъ въ студе́ная сердца́ враго́въ вонзо́шася еретико́въ и на сме́рть удави́ша и́хъ совокупле́ніи оте́цъ седмочи́сленныхъ и боже́ственныхъ.

Богоро́диченъ: Не ли́цы Еди́наго Христа́ сла́вимъ, не смѣше́ніемъ существа́ Сего́ соединя́емъ: Еди́нъ бо Сы́й и То́йже Лице́мъ, раздвоя́ется естествы́, Дѣ́во, Тво́й Сы́нъ и Содѣ́тель.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Да постыдя́тся ли́ца, и да заградя́тся уста́, не проповѣ́дающихъ во двою́ естеству́ несѣко́мо, непрело́жно же и несли́тно, Еди́наго Сы́на: благочести́віи бо мы́ прославля́емъ, и́нако у́бо и и́нако, дѣ́йствовати же и хотѣ́ти Христу́, не у́бо ли́цы, но во двои́хъ естества́хъ.

Иже Іа́кова иму́щіи Кенто́на назва́ніе, того́жде и́мя себѣ́ напису́ющіи, отвѣща́йте намъ: а́ще въ назва́ніи его́ вы́ въ купѣ́ли крести́стеся дре́вле? Тѣ́мже си́хъ ра́ди благода́ти Христа́ отступи́сте вои́стинну, во́лею со лжи́вымъ си́мъ безсту́дствующе.

Въ Халкидо́нѣ Собо́ръ четве́ртый Діоско́ра, Евти́ха же и Севи́ра лю́тыхъ низложи́ и до конца́ отсѣче́ терно́вную и́хъ пре́лесть, слія́тельную суще́ствъ Спа́совыхъ, отъ Це́ркве Христа́ и Влады́ки; съ не́юже правосла́вящіи, возненави́димъ си́хъ.

Тро́иченъ: Трисвѣ́тлую Божества́ еди́нственную сія́ющую зарю́ отъ Еди́наго Тріѵпоста́снаго Естества́: Роди́теля Безнача́льна, сра́слена же Сло́ва Отча и сца́рствующій Единосу́щный Ду́хъ, дѣ́ти, благослови́те, свяще́нницы, воспо́йте, лю́діе, превозноси́те Его́ во вся́ вѣ́ки.

Богоро́диченъ: Богороди́тельнице Пречи́стая, души́ моея́ я́звы и грѣхо́вныя собла́зны очи́сти, исто́чникомъ омыва́ющи изъ ре́бръ Сы́на Твоего́ и и́же изъ ни́хъ исте́кшими струя́ми, къ Тебѣ́ бо взыва́ю, и къ Тебѣ́ прибѣга́ю, и Тебе́ призыва́ю, Богоблагода́тную.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Не подоба́етъ приложи́ти или́ оста́вити что́ свяще́ннаго преда́нія правосла́вныя на́шея вѣ́ры: въ не́йже бо вѣ́рно крести́хомся, а и́же приложи́тели сея́ вѣ́ры впра́вду пре́дани бу́дутъ преще́нію прокля́тія.

Ра́достію се́рдца вси́ взыгра́имъ, свяще́нныя Собо́ры оте́цъ совоку́пльше: тѣ́хъ бо ра́ди свѣ́тъ ви́дѣхомъ правосла́вія. Свѣти́льницы бо яви́шася, вся́ наставля́юще къ пра́вымъ уче́нія обрѣ́теніемъ.

Душа́мъ испро́симъ очище́ніе и благоче́стно житіе́ препроводи́ти потщи́мся, я́ко да прича́стницы бу́демъ святы́мъ отце́мъ, и́же скры́ша пра́выхъ уче́ній бога́тство на́мъ, ча́домъ и́хъ.

Богоро́диченъ: Бо́гъ отъ боку́ Твое́ю возсія́, Ма́ти Бо́жія, и человѣ́ческій ро́дъ обожи́, и сла́вы Своея́ сподо́би, и наслѣ́дники вся́ показа́, и́же Тя́ Богоро́дицу вои́стинну при́сно проповѣ́дающія.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Преше́дъ Севи́ръ Христо́ву благосла́вную Це́рковь льсти́вый, и отмще́ніе совѣ́томъ оте́цъ благочести́выхъ хуле́нія ра́ди и хитростносло́вія своего́ прія́тъ пра́ведно, и отрѣва́ется учи́телей сосло́вія, осужде́нный. [Два́жды.]

Естества́ Христо́ва что́ слива́еши и смѣше́ніе вво́диши и сли́тіе, кре́стную стра́сть и погребе́ніе прилага́яй безстра́стному Божеству́ Единоро́днаго Сло́ва Бо́жія, о окая́нне Севи́ре? Тѣ́мже вели́каго твоего́ хуле́нія гнуша́емся.

Богоро́диченъ: Бро́ви и де́рзость вку́пѣ вражде́бныхъ рожде́йся отъ Дѣ́вы низложи́ и совѣ́ты злосло́вящихъ Содѣ́теля, вѣ́рныхъ же Собо́ръ утверди́ непоколе́блемь, я́ко Бо́гъ, ро́гъ вознесы́й и вѣ́рою укрѣпи́вый, да Тя́ вси́ велича́емъ.

Свѣти́ленъ. Подо́бенъ: Жены́, услы́шите.

Оте́цъ Боже́ственныхъ дне́сь па́мять пра́зднующе, моле́ньми тѣ́хъ мо́лимъ, Всеще́дре: вся́каго вре́да ересе́й изба́ви лю́ди Твоя́, Го́споди, и вся́ сподо́би Отца́, Сло́во сла́вити и Всесвята́го Ду́ха.

Богоро́диченъ. Подо́бенъ:

Ра́дуйся, Бо́жія пала́то. Ра́дуйся, горо́ присѣ́нная. Ра́дуйся, неопали́мая купино́. Ра́дуйся, престо́ле сла́вы. Ра́дуйся, Боже́ственная трапе́зо. Ра́дуйся, ру́чко всезла́тая. Ра́дуйся, свѣти́льниче всесвѣ́тлый. Ра́дуйся, ле́гкій о́блаче, Дѣ́во Ма́ти Марíе.

На хвали́техъ стихи́ры воскре́сны 4, и отце́въ 4, гла́съ 6: Подо́бенъ: Все́ отло́жше.

Все собра́вше* душе́вное худо́жество* и Боже́ственнымъ Ду́хомъ разсмотри́вше* небе́сный и честны́й Симво́лъ вѣ́ры,* честнíи отцы́ богопи́саннѣ начерта́ша;* въ не́мже я́вственнѣйше* Ро́ждшему Собезнача́льнаго Сло́ва науча́ютъ* и всеи́стинно Единосу́щнаго,* апо́стольскимъ послѣ́дующе проявле́нно уче́ніемъ,* благосла́вніи и пребога́тіи* и́стинно и богому́дріи. [Два́жды.]

Сти́хъ: Благослове́нъ еси́, Го́споди, Бо́же оте́цъ на́шихъ,* и хва́льно, и просла́влено и́мя Твое́ во вѣ́ки.

Все́ пріе́мше* у́мное сія́ніе Свята́го Ду́ха,* преесте́ственнѣйшее благосло́віе* кра́ткими глаго́лы и мно́гимъ ра́зумомъ* богодохнове́нно провѣща́ша,* я́ко Христо́вы проповѣ́дницы,* ева́нгельскихъ предста́теліе* уче́ній, блаже́нніи,* и благочести́выхъ преда́ній,* свы́ше пріе́мше си́хъ открове́ніе я́вѣ,* и просвѣ́щшеся, изложи́ша* вѣ́ру Богонауче́нную.

Сти́хъ: Собери́те Ему́ преподо́бныя Его́,* [завѣща́ющія завѣ́тъ Его́ о же́ртвахъ].

Все́ собра́вше* па́стырское иску́сство* и я́рость дви́гше ны́нѣ пра́веднѣйшую,* отмсти́тельнѣ тя́жкія отгна́ша и па́губныя во́лки,* пра́щею Ду́ха изве́ргше* отъ церко́внаго исполне́нія* па́дшія я́ко къ сме́рти,* и я́ко неисцѣ́льно неду́говавшія,* боже́ственніи па́стыріе,* я́ко раби́ и́стиннѣйшіи Христо́вы* и Боже́ственнаго проповѣ́данія* таи́нницы свяще́ннѣйшіи.

Сла́ва, гла́съ 8. Гео́ргія Никомидíйскаго:

Святы́хъ отце́въ ли́къ, отъ коне́цъ вселе́нныя сте́кшійся, Отца́ и Сы́на и Ду́ха Свята́го, Еди́но Существо́ научи́ша и Естество́, и та́йну богосло́вія я́сно преда́ша Це́ркви; и́хже, похваля́юще вѣ́рою, ублажи́мъ, глаго́люще: О, боже́ственный по́лче! богоглаго́ливіи ору́жницы ополче́нія Госпо́дня, звѣ́зды многосвѣ́тлыя мы́сленныя тве́рди, та́инственнаго Сіо́на необори́міи столпи́, мѵродохнове́нніи цвѣ́ти ра́йстіи, всезлата́я уста́ Сло́ва, Нике́йская похвало́, вселе́нныя украше́ніе, прилѣ́жно моли́теся о душа́хъ на́шихъ.

И ны́нѣ:

Преблагослове́нна еси́, Богоро́дице Дѣ́во, [Вопло́щшимъ бо ся изъ Тебе́ а́дъ плѣни́ся, Ада́мъ воззва́ся, кля́тва потреби́ся, Ева свободи́ся, сме́рть умертви́ся, и мы́ ожи́хомъ. Тѣ́мъ, воспѣва́юще, вопіе́мъ: благослове́нъ Христо́съ Бо́гъ, благоволи́вый та́ко, сла́ва Тебѣ́.]

Славосло́віе вели́кое. По трисвято́мъ, тропа́рь воскре́сенъ то́чію. Ектеніи́, и отпу́стъ. И оглаше́ніе Студи́тово. И исхожде́ніе въ притво́ръ. Сла́ва, и ны́нѣ, сти́хира ева́нгельская. И ча́съ 1-й. И коне́чный отпу́стъ.

На часѣ́хъ: Тропа́рь воскре́сенъ. Сла́ва, отце́въ. И ны́нѣ, богоро́диченъ часо́въ. По Отче на́шъ: конда́къ воскре́сенъ.


НА ЛИТУРГІИ,

Блаже́нна окто́иха на 6, и отце́въ пѣ́снь 3, на 4. По вхо́дѣ: Тропа́рь воскре́сенъ и отце́въ. Та́же конда́къ воскре́сенъ. Сла́ва, отце́въ. И ны́нѣ, Богоро́дицы, или́ Предста́тельство христіа́нъ... Проки́менъ гла́са. И отце́въ пѣ́снь, гла́съ 4: Благослове́нъ еси́, Го́споди, Бо́же оте́цъ на́шихъ, и хва́льно и просла́влено и́мя Твое́ во вѣ́ки. Апо́столъ дне́. И отце́въ, къ Евре́емъ, зача́ло 334. Аллилу́ія гла́са. И отце́въ, гла́съ 1: Бо́гъ бого́въ, Госпо́дь глаго́ла [и призва́ зе́млю отъ восто́къ со́лнца до за́падъ]. Сти́хъ: Собери́те Ему́ преподо́бныя Его́, [завѣща́ющія завѣ́тъ Его́ о же́ртвахъ]. Ева́нгеліе дне́. И отце́въ, Іоа́нна зача́ло 56. Прича́стенъ: Хвали́те Го́спода съ небе́съ, [хвали́те Его́ въ вы́шнихъ]. И отце́въ: Ра́дуйтеся пра́ведніи о Го́сподѣ, [пра́вымъ подоба́етъ похвала́.]

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 153 об. – 161 об.

/ Къ оглавленію раздѣла /


Наверхъ / Къ титульной страницѣ

0