Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 16-й де́нь.
Свята́го священному́ченика Аѳиноге́на и десяти́ учени́къ его́.

[ВЕЧЕРЪ,]
На Го́споди, воззва́хъ: стихи́ры, гла́съ 8. Подо́бенъ: О, пресла́внаго чудесе́!

Аѳиноге́нъ прему́дрый* ли́къ приведе́ Христу́ страда́льцевъ вѣ́рою,* тве́рдо пострада́вшихъ* и тече́ніе сконча́вшихъ,* съ ни́миже побѣди́въ многоко́зненнаго,* ли́ки му́ченическими воспріе́млется,* прича́стіемъ обожа́еми,* и мо́лятъ всегда́ о на́съ,* свяще́нную и́хъ па́мять соверша́ющихъ при́сно.

Десяти́ца учени́къ богоизбра́нная,* по́стными по́двиги* страсте́й взыгра́нія низложи́вши,* пострада́ и змíя умертви́,* Аѳиноге́на, наста́вника свяще́нна,* Боже́ственною си́лою пріобрѣ́тши.* Си́хъ мольба́ми спаси́ на́съ, Благоутро́бне,* всегда́ на Тя́ упова́ющія, Преблага́го.

Сла́ва, и ны́нѣ, богоро́диченъ, гла́съ и подо́бенъ то́йже:

Спаси́ мя, Влады́чице Пречи́стая,* Яже Спа́са Христа́ неизрече́нно ро́ждшая,* Тя́ бо еди́ну стяжа́хъ предста́тельницу,* и необори́мую стѣ́ну,* и покро́въ, и ра́дованіе,* и души́ моея́ боже́ственное утѣше́ніе.* Ты́ у́бо мя́ изба́ви неусыпа́ющаго че́рвія* и огня́ вѣ́чнующаго,* Ма́ти Христа́ Бо́га.

Крестобогоро́диченъ. Подо́бенъ то́йже:

Что́ зри́мое видѣ́ніе,* е́же Мои́ма очи́ма ви́дится, о Влады́ко!* Содержа́й всю́ тва́рь,* на дре́во воздви́женъ бы́въ,* и умира́еши, всѣ́мъ дая́й жи́знь? —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма,* изъ Нея́ неизрече́нно возсія́вшаго* Бо́га и Человѣ́ка.


НА УТРЕНИ,
Кано́нъ, его́же краегране́сіе: Твои́хъ страда́льцевъ пою́, Христе́, сла́ву. Іо́сифъ. Гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Съ чи́нми небе́сными ны́нѣ лику́я, достосла́вне святи́телю и му́чениче, пою́щія тя́ вѣ́рою спаса́й.

Зако́ны Влады́чними собо́ръ наставля́емь честны́й Христо́выхъ страда́лецъ, беззако́нныхъ совѣ́ты разори́сте.

Якоже непоро́чно заколе́ніе, ве́сь соже́гся, богоблаже́нне, огне́мъ му́къ приве́лся еси́ къ Бо́гу вѣ́ры ра́ди.

Богоро́диченъ: Пло́ть бы́вшаго отъ Твои́хъ крове́й, Неискусобра́чная, Превѣ́чное Сло́во па́че ума́ же и сло́ва родила́ еси́.

Пѣ́снь 3.

Ирмо́съ: Утверди́ на́шъ у́мъ и сердца́, небеса́ сло́вомъ утвержде́й, во е́же пѣ́ти и сла́вити Тя́, во спасе́ніе ду́шъ на́шихъ.

Разори́въ вра́жія лю́тая кова́рства къ Бо́гу неразори́мою любо́вію, Аѳиноге́нъ, му́ченикъ и святи́тель, со ученики́ сла́вы сподо́бися.

Притупи́ша врагу́ стрѣ́лы и жа́ла терпѣли́внымъ противле́ніемъ боже́ственніи и озаря́ютъ всѣ́хъ мы́сли свѣтолу́чными свои́ми сія́ніи.

Просте́ръ, тве́рдымъ реме́немъ безу́мный стру́жаетъ неща́дно, ураня́я непреста́нно, но не поколеба́ си́хъ по́мысла, е́же па́че сло́ва тве́рдость.

Богоро́диченъ: Херуви́мовъ и серафи́мовъ превы́шши яви́лася еси́, Богоро́дице: Ты́ бо еди́на прія́ла еси́ Невмѣсти́маго Бо́га въ Твое́мъ чре́вѣ, Нескве́рная. Тѣ́мже Тя́, вѣ́рніи вси́, пѣ́сньми, Чи́стая, ублажа́емъ.

Сѣда́ленъ, гла́съ 4. Подо́бенъ: Ско́ро предвари́.

Воздержа́ніемъ пе́рвѣе предочи́стивъ ду́шу, страда́ніемъ второ́е и соверше́ннымъ умо́мъ Бо́гу угоди́лъ еси́, святи́тель и му́ченикъ бы́въ, богоно́се. Собо́ръ же приве́лъ еси́ учени́къ Влады́цѣ, съ ни́миже о на́съ моли́ся прилѣ́жно, сла́вне.

Сла́ва, и ны́нѣ, богоро́диченъ:

Чи́стая, Всенепоро́чная и Неискусому́жная, Яже еди́на Безлѣ́тнаго Сы́на и Сло́ва Бо́жія въ лѣ́то ро́ждши, Сего́ со святы́ми и честны́ми патріа́рхи и му́ченики, и проро́ки, и преподо́бными моли́ дарова́ти на́мъ очище́ніе и ве́лію ми́лость.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Ума́ вся́каго превы́шши боже́ственными мечта́еми восхожде́ніи, плотски́хъ не убоя́шася го́рькихъ ра́нъ, богому́дріи.

Христопроповѣ́дникъ богопрія́тенъ и священному́ченикъ непоро́ченъ бы́въ, сподо́бися Аѳиноге́нъ Боже́ственныя благода́ти.

Вѣтíйствующе му́ченицы воплоще́ніе Сло́ва, претерпѣ́сте ра́ны и сме́рть, къ безсме́ртію преше́дше.

Богородиченъ: Равноси́льна, сопресто́льна Роди́телю, Пресу́щнаго воплоти́ла еси́, Пренепоро́чная, земны́мъ за милосе́рдіе пріобщи́вшагося.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Загради́въ безстра́стіемъ мудрова́ніе пло́ти твоея́, стра́сть изобрази́лъ еси́ Безстра́стнаго, досточу́дне.

Боже́ственными предповелѣ́ніи приведе́ Влады́цѣ ученико́въ ли́къ Аѳиноге́нъ сла́вный.

Свѣ́тлу сотвори́ па́мять твою́, му́чениче, Свѣтода́вецъ, исполня́я проше́нія твоя́ къ тѣ́мъ, и́же вѣ́рою тебѣ́ притека́ющимъ.

Богоро́диченъ: Ма́терь и Дѣ́ву вѣ́дуще Тя́, Пресвята́я, согла́сно почита́емъ и благоче́стно ублажа́емъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Благозва́ніе му́ченическое Аѳиноге́нъ получи́, и съ ни́мъ ученико́въ ли́къ вѣнча́ся, пости́вся пе́рвѣе и де́монскія побѣ́ждь ко́зни.

Свѣ́тлу содѣва́етъ твою́ честну́ю па́мять Влады́ка Христо́съ, исполня́я твоя́ я́же къ Нему́ моле́нія, блаже́нне: се́ бо еле́нь свое́ тебѣ́ исча́діе приво́дитъ Боже́ственнымъ манове́ніемъ.

Ра́й мы́сленный яви́лся еси́, достосла́вне, и́же дре́во жи́зни посреди́ имѣ́я, и боже́ственныхъ цвѣто́въ благово́ніемъ вся́ благоуха́еши я́снѣ.

Богоро́диченъ: Яко мы́сленный ковче́гъ, Законода́вца носи́ла еси́, я́ко свѣ́щникъ свѣтоза́ренъ, Свѣ́тъ породила́ еси́, я́ко ко́рень ненапое́нъ, жи́зни гро́здъ, Богоро́дице, прозябла́ еси́.

Конда́къ, гла́съ 4. Подо́бенъ: Вознесы́йся.

Влады́чню рече́нію послѣ́довавъ, я́ко па́стырь изря́дный ду́шу твою́ положи́лъ еси́ за Христо́вы о́вцы, священному́чениче Аѳиноге́не, сего́ ра́ди восхваля́емъ тя́ и съ тобо́ю десяти́цу учени́къ твои́хъ, и́же пострада́ша, стра́хомъ Бо́жіимъ и твои́мъ уче́ніемъ наставля́еми. Тѣ́мъ угоди́вшихъ Влады́ка вѣнча́ ва́съ живонача́льною десни́цею, Его́же о всѣ́хъ на́съ моли́те.

Пѣ́снь 7.

Ирмо́съ: Халде́йская пе́щь, огне́мъ распаля́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

То́ками крове́й твои́хъ пре́лести угаси́въ пла́мень, огне́мъ по́двигъ твои́хъ попали́лъ еси́ ве́щь зло́бы, блаже́нне, — благослове́нъ, — вопія́, — Бо́гъ оте́цъ на́шихъ.

Пло́ти взыгра́нія воздержа́нія болѣ́зньми и пре́лести служе́нія кро́вными ту́чами потре́бльше, му́ченицы, я́ко во́ини Христо́вы, да восхва́лятся.

Гла́въ отсѣче́ніемъ беззако́нныхъ повелѣ́ніемъ, и пло́ти строга́ніемъ, и многообра́зными му́ками, я́ко столпи́ непрекло́нни, не поколеба́стеся, преподобному́ченицы.

Богоро́диченъ: Изба́вльшеся, Пренепоро́чная, Тебе́ ра́ди пе́рваго прароди́тельнаго паде́нія, — ра́дуйся, — Тебѣ́ вопіе́мъ и вѣ́рою сла́вимъ Тобо́ю на́съ отъ тли́ Изба́вльшаго.

Пѣ́снь 8.

Ирмо́съ: Богоглаго́ливіи о́троцы въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Взира́я къ Боже́ственнымъ свѣтозаре́ніемъ, и́дольскія ле́сти Аѳиноге́нъ разори́ глубо́кую тму́, и свѣ́тъ бы́лъ е́сть.

Ангельскій ли́къ и му́ченикъ, святи́телей и преподо́бныхъ въ па́мяти веселя́тся честны́хъ страстоте́рпецъ, сла́вяще Го́спода.

Приче́лся еси́ му́ченическимъ стадо́мъ со ученики́ десятьми́, на муче́ніе иды́й, святи́телю, съ ни́миже тя́ вѣ́рно ублажа́емъ.

Богоро́диченъ: Его́же породила́ еси́ Сло́ва па́че сло́ва, Богороди́тельнице Марíе, о на́съ моли́, вѣ́рно Тя́ пою́щихъ и ублажа́ющихъ, Пречи́стая.

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Се́ свѣтоза́рный де́нь дне́сь му́ченикъ, облиста́ющь благода́тію и Боже́ственными свѣтлостьми́ озаря́ющь вѣ́рныхъ сердца́, пріиди́те, просвѣще́ніе почерпе́мъ.

Якоже приноше́нія чи́стая и непоро́чніи а́гнцы, приведо́стеся, му́ченицы, на́съ ра́ди Закла́вшемуся, отъ Него́ вѣнцы́ побѣ́ды, я́ко отъ Подвигополо́жника, пріе́мше.

Ка́плютъ сла́дость твоя́, страда́льче, болѣ́зни и го́ресть вся́ку страсте́й отго́нятъ, вѣ́рою хра́му твоему́ притека́ющимъ и па́мять твою́ пра́зднующимъ спаси́тельную.

Богоро́диченъ: Но́сиши на руку́ Бо́га, нося́щаго вся́ческая, пита́еши Пита́теля, Чи́стая, на́мъ уподо́бльшася, Его́же моли́ лю́демъ Твои́мъ дарова́ти всѣ́хъ лю́тыхъ избавле́ніе.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 150 об. – 153 об.

/ Къ оглавленію раздѣла /


Наверхъ / Къ титульной страницѣ

0