Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 14-й де́нь.
Свята́го апо́стола Аки́лы.
Сего́ же дне́ пое́тся слу́жба Ки́рика и Іули́тты, вку́пѣ со апо́столомъ.

[ВЕЧЕРЪ,
На Го́споди, воззва́хъ:] стихи́ры апо́стола на 3, гла́съ 1. Подо́бенъ: Небе́сныхъ чино́въ.

Чи́стое твое́ се́рдце,* Боже́ственнаго Ду́ха свѣ́тлыми заря́ми* озари́вшеся бога́тно, Аки́ло богогла́се,* свѣтови́дно вои́стинну яви́ся* и е́ллиновъ тму́ лю́тую* Боже́ственною благода́тію разори́.

Иже хра́му твоему́ Боже́ственному притека́ющіи,* и въ не́мъ тя́ вѣ́рою моля́ще, Аки́ло,* избавля́ются неду́говъ вся́ческихъ,* и бѣ́дъ, и скорбе́й* свяще́нными твои́ми мольба́ми* и къ Бо́гу хода́тайствы, свяще́нне.

Ины стихи́ры му́чениковъ 3, гла́съ 4. Подо́бенъ: Яко до́бля.

Младоу́мнаго мучи́теля* соверше́ннымъ умо́мъ,* несоверше́ннымъ же тѣ́ломъ,* му́чениче Ки́риче,* мужему́дренно посрами́лъ еси́.* Тѣ́мже, на суди́щи тя́ тя́жко истязу́я,* налага́етъ сме́рть тебѣ́,* помина́ющу жи́знь нестарѣ́емую,* въ ню́же вше́лъ еси́,* неусѣ́ченою на лѣ́та* ороша́емь кро́вію.

Яко плодови́тъ виногра́дъ, напое́ніи духо́вными,* Іули́тта сла́вная,* отъ боку́ твое́ю прозя́бша Ки́рика* приво́диши закала́ема* и точи́лы му́ченическими вои́стинну изгнете́на,* съ ни́мже источи́вше умиле́нія вино́,* сердца́ веселите́* вѣ́рою творя́щихъ па́мять ва́шу.

Ра́намъ прибли́жившися,* и строга́ніе тѣлесе́* вои́стинну претерпѣ́ла еси́, досточу́дная,* очи́ма же зря́щи сыно́вне сконча́ніе,* муче́ніе сугу́бо, Іули́тто, прошла́ еси́,* тѣ́мже дае́тъ ти́* и сугу́бы вѣнцы́ Подвигополо́жникъ,* побѣ́ду стра́ждущимъ* всеси́льно да́руя.

Сла́ва, гла́съ 6:

Пріиди́те и у́зрите вси́ стра́нное видѣ́ніе и пресла́вное: кто́ ви́дѣ младе́нца, трилѣ́тна су́ща, мучи́теля посрами́вша? О, чудесе́! Ма́терь сса́ше и млекопита́тельницѣ вопія́ше: не бо́йся, ма́ти моя́, му́къ лю́таго міроде́ржца, Христо́съ бо е́сть крѣ́пость вѣ́рующимъ въ Него́.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Лю́ди беззако́ннѣйшія, безъ пра́вды пригвожда́юща Тя́ на дре́вѣ, Дѣ́ва и Чи́стая Ма́ти Твоя́ зря́щи, я́коже Симео́нъ прорече́, утро́бою, Спа́се, уязвля́шеся.

На стихо́внѣ окто́иха. Сла́ва, гла́съ 8:

Трилѣ́тенъ Тро́ицу проповѣ́даше и млеко́ ссы́й ма́терь утвержда́ше: преста́ни, о ма́ти моя́, отъ сле́зъ пла́чущи, свы́ше Зижди́тель зри́тъ и спасе́тъ ду́ши на́ша.

И ны́нѣ, богоро́диченъ или́ крестобогоро́диченъ. Подо́бенъ: Что́ ва́съ нарече́мъ.

Не терплю́, Ча́до,* ви́дящи Тя́, на дре́вѣ усну́вша,* бо́дрость всѣ́мъ подаю́щаго,* я́ко да и́же дре́вле преступле́нія плодо́мъ,* сно́мъ поги́бельнымъ усну́вшимъ* боже́ственную и спаси́тельную бо́дрость пода́си, —* Дѣ́ва глаго́лаше, пла́чущися,* Юже велича́емъ.

Тропа́рь, гла́съ 3:

Апо́столе святы́й Аки́ло, моли́ ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Тропа́рь му́ченикомъ, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости; тѣ́хъ моли́твами спаси́ ду́ши на́ша.


НА УТРЕНИ,
Кано́нъ окто́иха еди́нъ и апо́стола на 4, его́же краегране́сіе: Сла́внаго воспое́мъ Аки́лу любо́вію. Творе́ніе Іо́сифово, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Свяще́ннаго свяще́нными воспои́мъ Аки́лу пѣ́сньми и возопіе́мъ: того́ моли́твами, Ще́дре, вся́ спаси́, я́ко Пребла́гъ.

Ве́сь себе́, блаже́нне, прія́телище Ду́ха свѣтови́дно сотвори́лъ еси́, осія́емь Того́ свѣ́тлыми заря́ми, тѣ́мъ су́щія во тмѣ́ просвѣти́лъ еси́.

Зако́номъ Христо́вымъ огради́въ у́мъ тво́й, беззако́нныхъ шата́ніе все́ низложи́лъ еси́ и и́дольскія хра́мы вся́ разори́лъ еси́, пострада́въ, богоблаже́нне.

Богоро́диченъ: Сло́вомъ, Чи́стая, Сло́во во утро́бѣ зачала́ еси́, сло́вомъ вся́ содѣ́лавшаго. Сего́ ра́ди Тя́ словесы́ боже́ственными воспѣва́емъ, Богора́дованная.

Инъ кано́нъ му́чениковъ на 4, его́же краегране́сіе: Ки́рика пою́ съ ро́ждшею му́дренно. Творе́ніе Іо́сифово, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Проповѣ́давше Сло́ва, отъ Отца́ я́вѣ рожде́на, воплоще́на же отъ Ма́тере, свидѣ́тели Сего́ страсте́й страстьми́ и сме́ртію бы́сте.

Сла́вная му́ченица, я́ко свѣтоза́рная луна́, совоку́пльшися съ со́лнцемъ, изъ нея́ рожде́ннымъ Ки́рикомъ, всю́ тва́рь чуде́сными заря́ми просвѣща́ютъ.

Теку́щими измѣни́ла еси́, я́же ника́коже дви́жима, му́ченице, и, на рука́хъ твоего́ сы́на нося́щи, съ си́мъ беззако́нныхъ и діа́волю ле́сть омрачи́ла еси́.

Су́щи отъ ро́да сла́вна, муче́ніемъ же и страда́ніи многови́дными, му́ченице Іули́тто, Царя́ безсме́ртнаго дщи́ была́ еси́.

Богоро́диченъ: Упраздни́ся сме́рть Тебе́ ра́ди, и а́дово жа́ло потреби́ся, Ма́ти Чи́стая: Ты́ бо безсме́ртнаго Влады́ку, умерщвле́на пло́тію, родила́ еси́.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Возжела́лъ еси́ Бо́га, я́ко преподо́бенъ, сла́вне, еди́наго Влады́ку и Царя́, и Того́ боже́ственное хотѣ́ніе несумнѣ́ннымъ се́рдцемъ испо́лнилъ еси́.

Крѣ́постію Честна́го и Боже́ственнаго Ду́ха, Аки́ло прехва́льне, лука́ваго крѣ́пость всю́ низложи́лъ еси́, пострада́въ до́блественнѣ, свяще́ннѣйше.

Умо́мъ твои́мъ чи́стымъ созерца́я сла́ву Госпо́дню, тоя́ причасти́лся еси́ соверше́нно, блаже́нне, отше́дъ отъ вре́менныхъ къ пребыва́ющимъ.

Богоро́диченъ: Еди́нъ Чи́стый, еди́нъ Госпо́дь Тя́ еди́ну я́ко позна́, чистѣ́йшую всея́ тва́ри, Пренепоро́чная, отъ чи́стыхъ Твои́хъ крове́й воплоти́ся.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Небе́сныхъ черто́говъ и свѣтоза́рнаго поко́я, вѣ́чнующія же сла́вы сподо́бистеся, му́ченицы сла́вніи, діа́воля жа́ла болѣ́зньми страда́нія потре́бльше.

Птене́цъ я́ко красе́нъ, голуби́цѣ цѣлому́дреннѣй се́й подо́бился еси́, льсти́вому проти́вяся, сла́вне Ки́риче, льсти́вно присту́пльшу и укра́сти тща́щуся тя́ непобѣди́маго.

Го́рдаго змíя, на не́бо положи́вша уста́ и зе́млю потреби́ти хва́лящагося, младе́нецъ незло́бивъ кре́стнымъ всеору́жіемъ до конца́ низложи́ и потреби́.

Богоро́диченъ: Не истощи́въ нѣ́дръ Оте́ческихъ, Пречи́стая, Сло́во, вся́ осуществова́вшее, во Твою́, Пренепоро́чная, утро́бу всели́ся, и пло́ть непремѣ́нна бы́сть, и человѣ́ки обожи́ Пресу́щественный.

Конда́къ апо́стола, гла́съ 4:

Яко ве́ліе со́лнце, Це́рковь тя́ стяжа́вши, сла́вне Аки́ло, свѣтлостьми́ уче́нія твоего́ просвѣща́етъ вѣ́рно чту́щія тя́, Госпо́день апо́столе.

Та́же сѣда́ленъ, гла́съ 4. Подо́бенъ: Ско́ро предвари́.

Па́вла глаго́лы озари́въ твою́ ду́шу, я́ко со́лнце, просія́лъ еси́ богоразу́мія свѣ́томъ, Аки́ло блаже́нне, вѣне́цъ же муче́нія испле́лъ еси́ зако́нно. Тѣ́мже источа́еши рѣ́ки исцѣле́ній вѣ́рою пра́зднующимъ, блаже́нне, па́мять твою́.

Сла́ва, му́чениковъ, гла́съ то́йже. Подо́бенъ: Удиви́ся Іо́сифъ.

Тезоиме́нно, страда́льче, проповѣ́дникъ яви́лся еси́ и́стиненъ, пострада́въ съ ма́терію, Ки́риче сла́вне Христо́въ, благоче́стія тече́ніе сконча́въ, и бы́лъ еси́ на́мъ му́жество вѣ́ры, попра́въ вра́жію всю́ си́лу, и съ небесе́ прія́лъ еси́ вѣне́цъ съ ма́терію твое́ю, сла́вне. Христа́ моли́те спасти́ся всѣ́мъ, творя́щимъ па́мять ва́шу.

И ны́нѣ, богоро́диченъ:

Треволне́ніи страстны́ми безсо́вѣстный а́зъ обурева́емь, Чи́стая, призыва́ю Тя́ те́плѣ, да не пре́зриши мене́, окая́ннаго, поги́бнути, бе́здну милосе́рдія ро́ждши, ра́звѣ бо Тебе́, наде́жды не и́мамъ. Да не враго́мъ у́бо обра́дованіе и смѣ́хъ, надѣ́явся на Тя́, явлю́ся, и́бо мо́жеши, ели́ко хо́щеши, я́ко Ма́ти су́щи всѣ́хъ Бо́га.

Крестобогоро́диченъ:

Дѣ́ва и Агница, ви́дѣвши на Крестѣ́, безъ сѣ́мене изъ Нея́ Агнца ро́ждшагося и копіе́мъ прободе́на, печа́ли уя́звлена стрѣла́ми, вопія́ше болѣ́зненно, восклица́ющи: что́ но́вое та́инство? Ка́ко умира́еши, Иже живота́ еди́нъ Госпо́дь? Тѣ́мже воскресни́, па́дшаго воздвиза́я пра́отца.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Дрема́ніемъ спя́щія лука́ваго, Аки́ло, злоче́стія ко благоче́стія свѣ́ту воздви́глъ еси́.

Го́рдое свирѣ́пство врага́ низложи́лъ еси́, Аки́ло, смире́ніемъ боже́ственнымъ вооружи́вся.

Блаже́нно пострада́лъ еси́ за Христа́, кро́вь твою́ излія́въ, свяще́нникъ и свидѣ́тель страда́ній Его́.

Богоро́диченъ: Мы́сленну Тя́ пала́ту и высо́кій престо́лъ Царя́, Богоро́дице Влады́чице, имену́емъ.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Младе́нствуя тѣ́ломъ, и соверше́ннымъ, му́чениче, умо́мъ злонача́льнаго низложи́лъ еси́, лука́вство злосотво́ршаго.

Яко плодови́та лоза́, му́ченице Іули́тто, гро́здъ израсти́ла еси́, до́бляго вои́стинну Ки́рика, муче́нія сла́дость иска́пающа.

Ми́лостивно взира́ющи, я́коже а́гница на а́гнца му́ченика, Іули́тта досточу́дная, закала́ема усе́рдно.

Богоро́диченъ: Зако́ны естества́, Пречи́стая, па́че естества́ въ рождествѣ́ Твое́мъ измѣня́ются: Содѣ́теля бо па́че ума́ и сло́ва породила́ еси́.

Пѣ́снь 5.

Ирмо́съ: Свѣ́та Пода́телю, и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Сла́дко сло́во при́сно источа́я благоче́стія, прему́дре, го́рькою пре́лестію одебелѣ́вшія услади́лъ еси́ ду́ши, я́ко священнотаи́нникъ, Аки́ло прехва́льне.

Твоя́ похвалы́ Лука́ богогла́сный вои́стинну написа́, свяще́ннаго бо Па́вла учени́къ и боже́ственъ странново́децъ бы́въ, боже́ственнымъ я́вѣ наказу́я.

Якоже звѣзду́ я́сну, свѣ́тлы лучи́ испуща́ющу, честно́е проповѣ́даніе, свяще́ннаго обрѣ́тъ Па́вла, отъ того́ зари́ прія́лъ еси́ словеса́ и свѣ́тъ бы́лъ еси́.

Богоро́диченъ: Ма́ти и раба́ Христа́, вопло́щшагося на́съ ра́ди, была́ еси́, Его́же прилѣ́жно всегда́ моли́, е́же спасти́ на́съ, Богоро́дицу Тя́ Чи́стую имену́ющихъ.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Терза́ему, богому́драя, ра́нами тѣ́лу твоему́, и раздробля́ему, тлѣ́нія дебельство́ совлекла́ еси́, во оде́жду же облекла́ся еси́, ю́же отъ Дѣ́вы Единоро́дный, пло́ть поне́съ, человѣ́ки обожи́въ, облече́.

Обнажи́лася еси́ тѣ́ломъ, му́ченице всесла́вная, преоби́дѣвши плотскíй сту́дъ, и врага́, Еву обнажи́вшаго, Іули́тто, дре́вле, терпѣли́вно вмужи́вшися, въ вѣ́чный сту́дъ одѣ́яла еси́.

Во главу́ усѣ́чена бы́вши, главу́ змíя, му́ченице, сокруши́ла еси́, лише́на бы́вши бога́тства, небе́сное бога́тство наслѣ́довала еси́, недви́жимое пріи́мши Ца́рство со всѣ́ми му́ченики, прехва́льная.

Богоро́диченъ: Бо́жіе Бо́гъ Сло́во пло́ть прія́тъ, мы́сленну и одушевле́ну, отъ Тебе́, Пречи́стая, и за милосе́рдіе бы́сть Человѣ́къ, и обожи́ мя, преступле́ніемъ отринове́на, Его́же моли́ спасти́ вся́ческая.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Излія́ся благода́ть во устну́ твое́ю, блаже́нне свяще́нне, тѣ́мже благослови́ тя́ всѣ́хъ Госпо́дь во вѣ́ки, Аки́ло богодохнове́нне.

Неду́гомъ разли́чнымъ измѣне́ніе и согрѣша́ющимъ душа́мъ очисти́лище твоя́ моли́тва бы́сть, богоно́се Аки́ло блаже́нне.

Ше́ствія твоя́, боже́ственно сотворя́ема и къ путе́мъ Бо́жіимъ направля́ема, блудя́щимъ яви́шася наставле́ніе и стезя́ спаси́тельная.

Богоро́диченъ: Господоиме́нная Дѣ́во Всенепоро́чная, Яже благи́хъ Пода́теля Бо́га ро́ждшая, Тя́ пою́щія всегда́ отъ напа́стей многообра́зныхъ спаси́.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Преплы́вше безмѣ́рныхъ му́къ, прехва́льніи, непостоя́нную во́ду кре́стнымъ окормле́ніемъ и ко приста́нищу ти́хому я́вѣ доидо́ша, погрузи́вше фарао́на неви́димаго кро́вными струя́ми.

Игра́етъ Иконíйскій гра́дъ, тебе́ воспита́вый, и краси́тся па́мятію твое́ю честно́ю Та́рсъ, Іули́тто: муче́ніе бо въ то́мъ сконча́ла еси́ съ сы́номъ твои́мъ и вѣнце́въ побѣ́ды сподо́билася еси́.

Презрѣ́ла еси́ многоплете́нныя му́ки, и го́рлица прекра́сная яви́лася еси́, со птенце́мъ возлетѣ́вши и надъ всѣ́ми возвы́сившися сѣтьми́ змíя, всехва́льная, и во оби́телехъ небе́сныхъ прему́дро почи́ла еси́.

Богоро́диченъ: Кореносѣка́тельнымъ серпо́мъ Твоея́ моли́твы посѣцы́, Отрокови́це, лука́вая помышле́нія души́ моея́ и плодоно́сну покажи́, молю́ся, всѣ́хъ бо Содѣ́теля, Бо́га и Спа́са, родила́ еси́.

Конда́къ му́чениковъ, гла́съ 4. Подо́бенъ: Яви́лся еси́.

Во объя́тіяхъ нося́щи христому́ченица Іули́тта Ки́рика, на по́двизѣ му́жески веселя́щися, взыва́ше: Христо́съ е́сть му́чениковъ похвала́.

Икосъ:

Умъ мо́й просвѣти́, Христе́, свѣ́томъ за́повѣдей Твои́хъ, я́ко да возмогу́ воспѣ́ти святы́я и по́двиги изрещи́. Кíй же язы́къ изглаго́лати возмо́жетъ страда́нія, я́же претерпѣ́ша? Тѣ́мъ припа́даю Тебѣ́, Человѣколю́бче: оставле́ніе пода́ждь души́ мое́й окая́ннѣй, да́руй ми́ вре́мя покая́нія, на се́ бо во́лею воспрія́лъ еси́ пло́ть, да вся́ на живо́тъ возведе́ши, его́же страда́льцы получи́вше, непреста́нно пою́тъ: Христо́съ е́сть му́чениковъ похвала́.

Пѣ́снь 7.

Ирмо́съ: Образу злато́му, на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси́, Бо́же оте́цъ на́шихъ.

Истка́въ себѣ́ нетлѣ́нія оде́жду Боже́ственнымъ Ду́хомъ, ве́сь красе́нъ бы́лъ еси́ и врага́ обнажи́лъ еси́, и́же отъ него́, Аки́ло, обнаже́нныя одѣ́ялъ еси́ во оде́жду свѣтови́дну и свѣ́тъ спаси́тельный.

Гла́домъ мы́сленнымъ одержи́мыя лю́ди и бѣ́дствующія хлѣ́бомъ слове́съ, досточу́дне богому́дре напита́лъ еси́ и небе́сныя трапе́зы прича́стники сотвори́лъ еси́, священнотаи́нникъ бы́въ богови́денъ.

Свято́му хра́му твоему́ притека́ющіи здра́віе пріе́млютъ, и страсте́й разрѣша́ются, и отъ неду́гъ очища́ются, воспѣва́юще тя́ любо́вію и вопію́ще, прехва́льне: благослове́нъ еси́, Бо́же оте́цъ на́шихъ.

Богоро́диченъ: Умертви́ся пе́рвѣе Ада́мъ тлетво́рною снѣ́дію, Всенепоро́чная, Ты́ же, ро́ждши Живо́тъ на́шъ, сего́, Дѣ́во, оживи́ла еси́. Тѣ́мъ я́ко до́брыхъ Тя́ вино́вну воспѣва́юще, вопіе́мъ: благослове́нна еси́, Яже Бо́га пло́тію ро́ждши.

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Па́лицами сокруша́етъ твое́ тѣ́ло беззако́нный, богому́драя Іули́тто, по́мысла крѣ́пость ника́коже подви́же: же́злъ бо си́лы — Кре́стъ Христо́въ держа́ла еси́.

Ту́чами кро́вныхъ наводне́ній погаси́ша о́гнь безбо́жія Христо́вы страда́льцы, зову́ще усе́рдно: благослове́нъ еси́, Го́споди Бо́же, во вѣ́ки.

Нося́щи на руку́, му́ченице, его́же родила́ еси́, предста́ла суди́щу и сугу́бъ до́брый сконча́ла еси́ по́двигъ, вопію́щи: благослове́нъ еси́, Го́споди Бо́же, во вѣ́ки.

Богоро́диченъ: Глаго́ломъ Твои́мъ послѣ́дующе, блажи́мъ Тя́, ро́ди вси́, Отрокови́це, Блаже́ннаго Бо́га Ма́терь я́вльшуюся, въ Него́ вѣ́рующія блаже́нны содѣ́лавшаго.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго, и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Ра́достно на небесѣ́хъ съ боже́ственными ученики́, и слуги́, и самови́дцы Сло́ва, я́ко учени́къ живы́й, Аки́ло, и боже́ственнѣ обожа́емь, помина́й вѣ́рою и любо́вію тя́ пою́щія.

По́товъ твои́хъ то́ки, рѣ́ки всѣ́мъ на́мъ Боже́ственныхъ чуде́съ источа́ютъ, блаже́нне, и то́ки страсте́й безмѣ́стныхъ изсуша́ютъ всегда́, и ополче́нія погружа́ютъ льсти́ваго.

Приступле́ніемъ обожа́емь при́сно, я́ко приближа́яся Бо́гу умо́мъ невеще́ственнымъ, ве́сь свѣ́тъ еси́, отрѣши́вся отъ пло́ти, и ви́диши, я́же ви́дятъ а́нгели, сла́вне Аки́ло, Христо́въ священному́чениче.

Богоро́диченъ: Яко всѣ́хъ вино́внаго Бо́га, вы́шше вся́кія вои́стинну, Чи́стая, вины́ во утро́бѣ заче́нши, и на́съ ра́ди по на́мъ я́вльшася, ро́ждшая, Пренепоро́чная, Сего́ моли́ о пою́щихъ Тя́.

Инъ.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Свѣ́тлыя звѣ́зды, я́же на тве́рди церко́внѣй неле́стно водрузи́вшеся и зе́млю чудесы́ просвѣ́щше, благоче́стно чту́тся отъ всѣ́хъ дне́сь, пѣсносло́вящихъ Христа́ во вѣ́ки.

Якоже нова́ вѣ́твь ко́рене богонасажде́нна су́щи, богому́драя, честна́го твоего́ сы́на нося́щи, увяди́ла еси́ нече́стія сады́, вопію́щи съ ни́мъ и глаго́лющи: Тя́ превозно́симъ, Христе́, во вѣ́ки.

Якоже тельца́ ю́на, ю́ница су́щи прекра́сна, Іули́тто, но́сищи Ки́рика сла́внаго, же́ртву жи́ву отъ Дѣ́вы Агнцу возсія́вшему и заколе́ному за кра́йнее милосе́рдіе.

Богоро́диченъ: Вопло́щся Сло́во отъ пречи́стыхъ Твои́хъ крове́й, Отрокови́це, прини́кшія къ безслове́снымъ плотски́мъ страсте́мъ позна́ніемъ Боже́ственнымъ обожи́, Чи́стая, Его́же превозно́симъ во вся́ вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Свяще́нными тя́ пѣ́сньми свяще́нна бы́вша сосу́да Сло́ва и че́стна, Сего́ и прему́дра проповѣ́дника, и мíра свѣти́льника, и утвержде́ніе вѣ́ры на́шея, соше́дшеся, Аки́ло, согла́сно ублажа́емъ.

Яко потреби́тель ле́сти, и язы́ковъ наста́вникъ, и боже́ственный Спа́са страда́лецъ, и сограждани́нъ, и ссе́льникъ святы́хъ а́нгеловъ, Аки́ло богогла́се, съ ни́ми Влады́ку умоли́ спасти́ ду́ши на́ша.

Тя́, ученика́ у́бо Па́влу, увѣ́дѣвше, Аки́ло, мíрови же свѣти́льника неле́стна и свяще́ннаго му́ченика, потреби́теля и́доловъ и ра́зума Бо́жія вводи́теля, благоче́стною мы́слію, богому́дре, ублажа́емъ.

Всесвята́я твоя́ па́мять возсія́вши мíру, я́ко со́лнце, просвѣща́етъ ду́ши благоче́стно пою́щихъ тя́, въ не́йже моли́ся, блаже́нне, да́ти очище́ніе грѣхо́въ, и ми́ръ глубо́къ, и ве́лію всѣ́мъ ми́лость.

Богоро́диченъ: Свѣ́телъ Тя́ свѣ́щникъ прозря́ше проро́къ, Свѣ́та, возсія́вшаго отъ Свѣ́та, Дѣ́во Ма́ти, нося́щу, просвѣща́ющаго бога́тно пе́рвѣе омраче́нныя заря́ми несказа́ннаго Своего́, Пренепоро́чная, Божества́.

Инъ.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Исцѣле́ніе приноша́етъ ра́ка сла́вныхъ страда́лецъ, благода́тію Боже́ственнаго Ду́ха напая́емая: пріиди́те, почерпи́те, и освяти́те ду́ши, и отъ неду́гъ очи́ститеся, мучениколю́бцы, Да́теля до́брыхъ велича́юще.

Якоже ши́покъ, му́ченическими прозябо́сте удо́ліи, всеблаже́нніи, я́коже кри́нъ благово́ненъ, я́ко рая́ боже́ственное прозябе́ніе, мѵ́рно я́ко вои́стинну иска́пающе украше́ніе, и вѣ́рныхъ ду́ши благово́ніемъ та́йнымъ веселите́.

Ра́нами му́ченическими украси́стеся, добропобѣ́дніи му́ченицы, и а́нгеломъ я́вѣ уподо́бльшеся, Бо́гу предстоите́, побѣ́днымъ вѣнце́мъ свѣ́тло обложе́ни и чту́щимъ ва́съ очище́ніе грѣхо́въ прося́ще.

Му́ченица, я́коже а́гница, я́ко а́гнца сы́на своего́ нося́щи, посредѣ́ волко́въ невре́дно про́йде и въ небе́сную огра́ду всели́ся; при́сно си́хъ моли́твами, Го́споди, спаси́ ны́, тѣ́хъ свяще́нную па́мять чту́щія.

Богоро́диченъ: Просвѣти́, две́ре Свѣ́та, ослѣпле́нную ду́шу мою́ страстьми́, и злы́ми по́мыслы омраче́нную, и бѣ́дствующую, и изми́ мя́ отъ напа́стей, и бѣ́дъ, и скорбе́й, да сла́влю Тя́, упова́ніе вѣ́рныхъ и утвержде́ніе.

Свѣти́ленъ окто́иха. Сла́ва, му́чениковъ. Подо́бенъ: Жены́, услы́шите.

Ра́дуйся, красу́йся и лику́й, свѣ́тло торжеству́я, Иконíйскій гра́де, я́ко изъ тебе́ возсія́ша два́ свѣти́льника прему́дра, Іули́тта сла́вная и богому́дрый Ки́рикъ, зако́нно бо пострада́вше, вѣне́цъ прія́ша сла́вы.

И ны́нѣ, богоро́диченъ:

Ма́терь и Дѣ́ву Тя́ пое́мъ, Всенепоро́чная: Ты́ бо Бо́га всѣ́хъ во чре́вѣ носи́ла еси́, Его́же совокупле́ніе проповѣ́дающе, непрело́жно по ѵпоста́си, Тя́, Богоро́дицу Влады́чицу, исповѣ́даемъ вои́стинну, и́же Тебе́ ра́ди спаса́еміи.

На хвали́техъ стихи́ры на 4, гла́съ 1. Самогла́сны. Ге́рманово:

До́бляго страда́льца и проповѣ́дника вѣ́ры съ ма́терію богому́дрою досто́йно восхва́лимъ: сíи бо, терпѣли́вно пострада́вше, злонача́льнаго врага́ си́лою Креста́ му́жески низложи́ша, тѣ́мже вѣнцы́ прія́ша отъ Подвигополо́жника Бо́га и мо́лятъ Его́ со дерзнове́ніемъ непреста́нно спасти́ вѣ́рою творя́щихъ свяще́нное и́хъ страда́ніе. [Два́жды.]

Гла́съ 2:

Иже отъ пеле́нъ испо́лненъ благода́ти, имѣ́яй сѣ́дъ ра́зумъ, въ побѣ́дѣ подвиго́въ твои́хъ, му́чениче Ки́риче, моли́ся съ ма́терію твое́ю Христу́ Бо́гу дарова́ти ми́ръ мíру, я́ко Тро́ицы ве́лій исповѣ́дникъ.

Младе́нецъ яви́лся еси́ въ му́ченицѣхъ, соверше́нъ же показа́лся еси́ ра́зумомъ, отне́лѣже безнача́льное Сло́во прія́тъ, всехва́льне, огня́ не устраши́лся еси́ беззако́нныхъ. Съ ма́терію твое́ю Зижди́теля моли́, да спасе́тъ я́ко Спа́съ ду́ши на́ша.

Сла́ва, гла́съ то́йже. Византíево:

Пріиди́те, вѣ́рніи, хвала́ми, соше́дшеся, вѣнча́емъ дво́ицу всесвяту́ю, Тро́ицѣ че́сть держа́щую: и́дольскую бо пре́лесть и мучи́телей умышле́ніе свои́ми нога́ми попра́ша. Си́хъ восхваля́юще, вѣ́рніи, взыва́емъ, глаго́люще: ра́дуйся, Іули́тто всечестна́я, я́же же́нскую не́мощь отве́ргши и му́жески подви́гшися; ра́дуйся, Ки́риче всеблаже́нне, и́же трилѣ́тенъ тѣ́ломъ и многоко́зненнаго врага́ низло́жь; ра́дуйтеся, на́ша похвала́ и сла́ва, вѣ́рою пра́зднующихъ свяще́нное ва́ше страда́ніе. Еюже мо́лимъ моли́ти при́сно всѣ́хъ Го́спода мíру дарова́ти ми́ръ и душа́мъ на́шимъ ве́лію ми́лость.

И ны́нѣ, богоро́диченъ, или́ крестобогоро́диченъ. Подо́бенъ: Егда́ отъ дре́ва.

Дре́ву кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до сла́дкое, почто́ оста́вилъ еси́ Мя́, ро́ждшую Тя́, еди́ну, Свѣ́те непристу́пный, Пребезнача́льнаго Отца́? Потщи́ся и просла́вися, я́ко да сла́ву получа́тъ Боже́ственную, и́же Боже́ственныя стра́сти Твоя́ сла́вящіи.

На стихо́внѣ окто́иха. Сла́ва, гла́съ 4. Анато́ліево:

Ра́дуйся, красу́йся и весели́ся, Иконíйскій гра́де, я́ко изъ тебе́ прозябе́ пло́дъ сла́венъ, Іули́тта, прекра́сная и добропобѣ́дная му́ченица, и изъ нея́ честны́й о́трокъ, Ки́рикъ тезоимени́тый: все́ бо кова́рство мучи́теля врага́ му́жески попра́вше, вѣнцы́ побѣ́ды досто́йно прія́ша, проповѣ́давше лю́демъ чести́ и покланя́тися Пресвятѣ́й Тро́ицѣ. Тѣ́мже и мы́ со дерзнове́ніемъ возопіе́мъ си́хъ просла́вльшему Христу́ Бо́гу на́шему, умири́ти мíръ и спасти́ ду́ши на́ша.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?


НА ЛИТУРГІИ,

Блаже́нна окто́иха и му́чениковъ, пѣ́снь 3-я на 4. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 154, отъ полу́. Аллилу́ія, гла́съ 7: Изъ у́стъ младе́нецъ и ссу́шихъ соверши́лъ еси́ хвалу́. [Сти́хъ: Го́споди Госпо́дь на́шъ, я́ко чу́дно и́мя Твое́ по все́й земли́.] Ева́нгеліе Луки́, зача́ло 51, отъ полу́. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́.]

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 133 – 140 об.

/ Къ оглавленію раздѣла /


Наверхъ / Къ титульной страницѣ

0