Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 13-й де́нь.
Собо́ръ преподо́бныхъ оте́цъ оби́тели Хиланда́рскія, и́же во Святѣ́й горѣ́ Аѳо́нстѣй просія́вшихъ.

НА ВЕЛИЦЕЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 4:

Пріиди́те, вѣ́рныхъ сосло́віе, пріиди́те, ли́къ соста́вимъ и благодаре́ніе Бо́гу принесе́мъ, дарова́вшему на́мъ крѣ́пкія засту́пники и предста́тели, о́трасли крестоно́снаго ро́да се́рбскаго, воспи́танники же святы́я оби́тели Хиланда́рскія, и воскли́кнемъ съ любо́вію: о отцы́ треблаже́нніи, моли́теся непреста́нно о на́съ Христу́ Бо́гу, да спасе́тъ ду́ши на́ша.

Просія́вше житіе́мъ свои́мъ, я́ко звѣ́зды многосвѣ́тлыя, духо́вными блиста́ньми просвѣща́ете всю́ благочести́вую страну́ Се́рбскую, благовѣ́рія догма́ты утвержда́юще, е́реси же тму́ отгоня́юще, моли́теся непреста́нно о всѣ́хъ, вѣ́рою творя́щихъ всечестну́ю па́мять ва́шу.

Богонача́льными свѣтлостьми́ благода́тію облиста́еми, засту́пницы ро́ду се́рбскому яви́стеся, душе́вное смуще́ніе отстраня́юще и печа́ли бу́рю разоря́юще, тѣ́мже мо́лимъ ва́съ: моли́твами ва́шими къ Бо́гу въ земли́ на́шей вкорени́те ми́ръ и безмяте́жіе, въ на́съ же самѣ́хъ любо́вь и единомы́сліе, вы́ бо есте́ на́ше огражде́ніе, сего́ ра́ди прославля́емъ ва́съ.

На зла́цѣ благоче́стія Христо́во ста́до слове́сныхъ ове́цъ до́брѣ упасли́ есте́, уча́ще и́хъ блюсти́ вся́, ели́ка заповѣ́далъ е́сть Христо́съ Бо́гъ, житіе́мъ же ва́шимъ подтвержда́юще вся́, ели́ка глаго́лете, тѣ́мже показа́стеся и́стинное жили́ще Ду́ха Пресвята́го, испо́лненное дарова́ній Бо́жіихъ, я́же тре́бующимъ раздава́сте ще́дро. Сего́ ра́ди мо́лимъ ва́съ: моли́теся Христу́ Бо́гу дарова́ти грѣхо́въ оставле́ніе всѣ́мъ, чту́щимъ любо́вію святу́ю па́мять ва́шу.

Ины стихи́ры, гла́съ 1:

Достохва́льніи отцы́, и́стинніи предста́теліе ро́да се́рбскаго, вси́ почита́емъ ва́съ, не то́кмо я́ко священносло́вящихъ свяще́нное Писа́ніе, но и уста́ми и житіе́мъ ва́шимъ проповѣ́дающихъ сло́во благоче́стія, ва́ми бо научи́хомся стра́ннымъ и неизрече́ннымъ. И ны́нѣ моли́теся, изба́витися на́мъ отъ вся́кихъ грѣхопаде́ній, да, пріи́мше грѣхо́въ проще́ніе, наслѣ́дницы бу́демъ жи́зни вѣ́чныя.

Всечестнѣ́йшіи отцы́, возвѣсти́теліе пути́ спаси́тельнаго, орга́ны Ду́ха Свята́го бы́сте, восперя́ющіи ду́ши наро́да се́рбскаго къ Бо́гу, я́ко богому́дріи вожди́, научи́сте его́ небе́сная му́дрствовати, сего́ ра́ди возлюби́ ва́съ Христо́съ Бо́гъ, я́ко вѣ́рныя рачи́тели Своя́, и вѣнцы́ нетлѣ́нными увязе́, и въ Ца́рство небе́сное всели́.

Приснопа́мятніи отцы́, я́ко Спа́сова духодвижи́мая ли́ра на земли́ показа́стеся, доброгла́сную пѣ́снь пою́ще, тѣ́мъ бо повину́сте всю́ страну́ Се́рбскую Небе́снаго Царя́ чести́, Ему́ покланя́тися и славосло́вити, я́ко Бо́га, во вѣ́ки.

Преблаже́нніи отцы́, Со́лнца Пра́вды су́ще служи́теліе, всесвѣ́тлая свѣти́ла яви́стеся ро́ду се́рбскому, просвѣща́юще земны́й мíръ, мра́къ же пре́лести отгоня́юще, тѣ́мже вопіе́мъ: благослове́нная и всечестна́я шестьнадеся́тице, моли́те Христа́ Бо́га спасти́ и просвѣти́ти ду́ши на́ша.

Сла́ва, гла́съ 8:

Пріиди́те, вси́ празднолю́бцы, пріиди́те, ли́къ соста́вимъ и псало́мски воскли́кнемъ, восхваля́юще богому́дрыя отцы́: Симео́на, Са́вву, Арсе́нія и Са́вву втора́го, съ ни́ми же Іоанни́кія, Евста́ѳія, Са́вву тре́тіяго, Никоди́ма, Даніи́ла и Ефре́ма, и́же вси́ просія́ша въ Се́рбстѣй странѣ́, къ си́мъ и Кипріа́на Кíевскаго, Некта́рія Би́тольскаго и Васи́лія Остро́жскаго, ку́пно же Дамаски́на Га́бровскаго со Ону́фріемъ и Рафаи́ла Бана́тскаго. О, всечестнѣ́йшіи отцы́, воспѣва́емъ ва́шъ собо́ръ и во умиле́ніи се́рдца мо́лимся: Христа́ Бо́га моли́те грѣхо́въ оставле́ніе дарова́ти всѣ́мъ, любо́вію пра́зднующимъ достохва́льную па́мять ва́шу.

И ны́нѣ, богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.]

Вхо́дъ. Проки́менъ дне́ и чте́нія.

При́тчей чте́ніе. [Главы́ 10 и 11.]

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 3:

Мно́гія печа́ли и бѣды́ погубля́ютъ ду́ши на́ша, тѣ́мже прибѣга́емъ къ ва́мъ: изба́вите на́съ и отъ печа́ли на весе́ліе преложи́те.

Сти́хъ: Честна́ предъ Го́сподемъ сме́рть преподо́бныхъ Его́.

Не пре́зрите тре́бующія ва́шея по́мощи, о учи́теліе Правосла́вія, но всѣ́мъ подава́йте утѣше́ніе, и́же ублажа́ютъ ва́съ.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Весе́лія живо́тъ на́шъ испо́лните, отцы́ святíи, разруша́юще мглу́ прегрѣше́ній на́шихъ и очища́юще ду́ши на́ша ва́шими къ Бо́гу моли́твами.

Сла́ва, гла́съ 5:

Востру́бимъ трубо́ю пѣ́сней, воскли́кнемъ пра́зднственная и воспле́щемъ рука́ми вси́ въ настоя́щее торжество́ богоблаже́нныхъ оте́цъ на́шихъ, воспѣва́юще моли́твенники на́ша неусы́пныя и крѣ́пкія храни́тели оби́тели Хиланда́рстѣй. Къ си́мъ бо прибѣга́юще, ми́лость пріе́млемъ, бѣ́дъ избавля́емся и вси́ спаса́емся.

И ны́нѣ, богоро́диченъ, гла́съ то́йже:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую Предста́тельницу и прибѣ́жище ду́шъ на́шихъ.

Тропа́рь, гла́съ 4:

Отцы́ на́ши богоблаже́нніи, Аѳо́нстіи подви́жницы, Хиланда́рстіи свѣти́льницы, непоколеби́міи столпи́ Правосла́вія, и́стинніи наста́вницы ева́нгельскихъ преда́ній, Влады́ку всѣ́хъ, Христа́, моли́те ми́ръ вселе́ннѣй дарова́ти и душа́мъ на́шимъ ве́лію ми́лость.

Сла́ва, и ны́нѣ, богоро́диченъ:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].


НА УТРЕНИ,
На Бо́гъ Госпо́дь: Тропа́рь отце́въ, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 5:

Та́инственными вода́ми Ду́ха пома́зани, процвѣли́ есте́ въ Хиланда́рстѣй оби́тели въ вѣ́рѣ благопло́діемъ добродѣ́телей. Тѣ́мже и къ небе́снымъ оби́телемъ востекли́ есте́, въ ни́хже ны́нѣ наслажда́етеся добро́ты неизрече́нныя. [Два́жды.]

Сла́ва, и ны́нѣ, богоро́диченъ, гла́съ то́йже:

Душе́вныя на́ша не́мощи исцѣли́, о Пречи́стая, и стра́сти тѣле́сныя погаси́, заря́ми Твоего́ свѣ́та мра́къ невѣ́дѣнія отгоня́ющи и спаса́ющи всѣ́хъ, и́же благовѣ́рно Богоро́дицу Тя́ исповѣ́дающихъ.

По 2-мъ стихосло́віи сѣда́ленъ, гла́съ 2:

Собо́ръ Хиланда́рскихъ святы́хъ воспое́мъ, глаго́люще: вы́ до́брѣ Бо́гу угоди́сте, лю́ди же къ богоразу́мію наста́висте, сего́ ра́ди нетлѣ́ніемъ и чудесы́ отъ Него́ просла́вистеся, я́ко и́стинніи уго́дницы Бо́жіи. [Два́жды.]

Сла́ва, и ны́нѣ, богоро́диченъ, гла́съ то́йже:

Тя́ велича́емъ, Богома́ти Чи́стая, на объя́тіихъ Свои́хъ носи́вшую Непристу́пнаго Бо́га, на небесѣ́хъ сла́вимаго отъ вся́кія си́лы и Тобо́ю да́рующаго на́мъ спасе́ніе вѣ́чное.

Велича́ніе:

Велича́емъ ва́съ, святи́теліе Христо́вы, и чте́мъ всечестны́й собо́ръ ва́шъ, вы́ бо мо́лите за на́съ Христа́ Бо́га на́шего.

Псало́мъ избра́нный святи́телемъ: [Услы́шите сія́ вси́ язы́цы...]

По поліеле́и сѣда́ленъ, гла́съ 3:

Боже́ственнѣй сла́вѣ прича́стницы, свѣти́льницы Це́ркве разу́мніи, просвѣти́те всѣ́хъ свѣ́томъ Правосла́вія и моли́теся непреста́нно ко Го́споду дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ, гла́съ то́йже:

Послѣ́дующе, Дѣ́во, богодухнове́ннымъ глаго́ломъ Твои́мъ, блажи́мъ Тя́, вси́ ро́ди, я́ко Роди́тельницу Бо́га блаже́ннаго.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Матѳе́я, зача́ло 11.

По 50-мъ псалмѣ́ стихи́ра, гла́съ 6:

Два́ или́ три́ со́бранныя во и́мя Его́ Христо́съ почеству́я, прису́тствуетъ посредѣ́ и́хъ, оби́тель же Хиланда́рская представля́етъ дне́сь не два́ и три́ то́кмо, но собо́ръ шестьна́десятихъ святы́хъ свои́хъ, со́бранныхъ и просія́вшихъ здѣ́ во и́мя Его́.

Кано́нъ Богоро́дицы, со ирмосо́мъ на 6, гла́съ 4: Нѣ́сть Тебѣ́ подо́бенъ...
И святы́хъ на 8, его́же краегране́сіе: Ангелы наро́да се́рбскаго пою́. Въ Богоро́дичнахъ же и въ сѣда́льнахъ: Про́та Ми́рко. Гла́съ 1.

Пѣ́снь 1.

Ирмо́съ: Вознесу́ Тя́, Бо́же, Спа́се мо́й, я́ко воскре́слъ еси́ отъ ме́ртвыхъ, попра́въ сме́рть.

Ангели земнíи и человѣ́цы небе́сніи, облагода́тельствуйте у́мъ мо́й, во е́же досто́йно пѣ́ти по́двиги ва́ша.

Ны́нѣ Се́рбская страна́ вся́ ра́дуется, прославля́ющи ва́съ вку́пѣ шестьна́десять засту́пниковъ свои́хъ предъ престо́ломъ Вы́шняго.

Гро́здіе вы́ есте́ виногра́да Христо́ва, иска́пающіи на́мъ вино́ жи́зни и спасе́нія.

Богоро́диченъ: Пою́тъ Тя́ и превозно́сятъ вся́ дѣла́ Госпо́дня, и́стинную Ма́терь Бо́га на́шего, — ра́дуйся! — со Гавріи́ломъ принося́ще Ти́, Всенепоро́чная Влады́чице.

Катава́сія: Отве́рзу уста́ моя́...

Пѣ́снь 3.

Ирмо́съ: Утвержде́й сло́вомъ Твои́мъ вселе́нную, я́же не подви́жится, утверди́ и на́шу мы́сль въ стра́хъ Тво́й, Влады́ко Го́споди.

Его́же возлюби́сте па́че всѣ́хъ, Его́же ра́ди подвиза́стеся на земли́, моли́те, да и на́съ, вѣ́рныхъ рабо́въ Его́, объе́млетъ любо́вію Свое́ю.

Луча́ми небе́сными у́мъ сво́й озари́вше, житіе́мъ свои́мъ Вседержи́телю и Творцу́ всѣ́хъ послужи́ли есте́, Иже и всели́ ва́съ въ Ца́рство Свое́ небе́сное.

Истинно Христу́ послѣ́довасте, избра́нніи Бо́жіи, Симео́не мѵроточи́вый и Са́вво первопресто́льне, приводя́ще Ему́ ве́сь боголюби́вый ро́дъ се́рбскій, я́ко вожди́ богому́дріи.

Богоро́диченъ: Родила́ еси́ Еди́наго отъ Тро́ицы, Богома́ти Чи́стая, и млеко́мъ пита́ла еси́ Пита́ющаго и Укрѣпля́ющаго вся́ческая.

Сѣда́ленъ, гла́съ 2:

Отцы́ всечестнíи и богому́дріи, въ терпѣ́ніи и въ безстра́стіи пожи́сте, ева́нгельская повелѣ́нія житіе́мъ свои́мъ изъясня́юще, яви́стеся я́ко непоколеби́міи столпи́ Це́ркве и некра́домое бога́тство благоче́стія, тѣ́мже ра́йскія сла́дости ны́нѣ наслажда́етеся. [Два́жды.]

Сла́ва, и ны́нѣ, богоро́диченъ, гла́съ то́йже:

Твоя́ вели́чія а́нгели пою́тъ, Пресвята́я Дѣ́во Богоро́дице, съ ни́миже и проро́цы со апо́столы, святи́теліе съ му́ченикъ ли́ки и преподо́бныхъ все́ мно́жество, тѣ́мже и мы́ съ ни́ми покланя́емся Тебѣ́.

Пѣ́снь 4.

Ирмо́съ: Разумѣ́хъ, Всеси́льне, Твое́ смотре́ніе и со стра́хомъ просла́вихъ Тя́, Спа́се.

Наслѣ́довавъ оте́ческую му́дрость и добродѣ́тель, я́ко сы́нъ возлю́бленный, святи́телю о́тче Арсе́ніе, прее́мникъ бы́лъ еси́ боже́ственнаго престо́ла Са́ввы пе́рваго, его́же стопа́мъ послѣ́довалъ еси́.

Арсе́нію богому́дрому на престо́лѣ наслѣ́дникъ бы́въ, святи́телю о́тче Са́вво вторы́й, Са́ввѣ же пе́рвому во все́мъ подража́лъ еси́, и ны́нѣ вку́пѣ съ ни́ми не преста́й моли́ти за ве́сь правосла́вный ро́дъ се́рбскій.

Ра́дуйся, вели́кая и сла́вная патріа́рхіе Се́рбская, свѣ́тло торжеству́ющи па́мять пе́рваго патріа́рха се́рбскаго Іоанни́кія, сиро́тъ и вдо́въ предста́теля, скорбя́щихъ утѣ́шителя и всѣ́мъ те́пла предъ Бо́гомъ засту́пника.

Богоро́диченъ: Ангельстіи чи́ни и земны́хъ собо́ри совокупля́ются воспѣва́ти Миронача́льника и Спа́са всѣ́хъ Христа́, Его́же Ты́ родила́ еси́.

Пѣ́снь 5.

Ирмо́съ: Отъ но́щи невѣ́дѣнія просвѣще́й концы́, просвѣти́ мя́ у́тромъ человѣколю́бія Твоего́, Го́споди.

Отче Евста́ѳіе, іера́рше Госпо́день, и́же сама́го себе́ я́ко непоро́чну же́ртву прине́слъ еси́ Христу́, моли́ Его́ дарова́ти душа́мъ на́шимъ ми́ръ и ве́лію ми́лость.

До́брый па́стырь бы́лъ еси́, я́ко прее́мникъ Са́ввы тре́тіяго, преподо́бне о́тче Никоди́ме, Ду́ха Свята́го трео́стрымъ мече́мъ вооруже́нный, яви́лся еси́ я́ко сѣки́ра, посѣка́ющая вся́ еретико́въ стремле́нія.

Архіере́евъ похвалу́, свяще́нниковъ сла́ву, мона́шествующихъ пра́вило и Це́ркве утвержде́ніе, пое́мъ тя́, іера́рше Даніи́ле, и хва́лимъ, я́ко те́пла моли́твенника къ Бо́гу и предста́теля на́шего и храни́теля.

Богоро́диченъ: Ма́ти Дѣ́во Всенепоро́чная, Ты́ была́ еси́ святы́хъ святѣ́йши, я́ко Бо́га несказа́нно родила́ еси́, Его́же воспѣва́юще, непреста́нно Тя́ велича́емъ.

Пѣ́снь 6.

Ирмо́съ: Со Іо́ною вопіе́мъ Ти́, Го́споди, со гла́сомъ хвале́нія моля́щеся: возведи́ отъ тли́ живо́тъ на́шъ.

Свѣ́томъ Трисія́ннаго Божества́ озаря́емь, святи́телю о́тче Ефре́ме, вслѣ́дъ Христа́ поте́клъ еси́ и, кре́стъ Его́ на ра́мо взе́мъ, Того́ взыска́лъ еси́, Его́же моли́ о всѣ́хъ на́съ.

Еди́наго Человѣколю́бца имѣ́я въ себѣ́ руководи́теля, преблаже́нне о́тче Кипріа́не, Ему́же и служи́лъ еси́, моли́ Его́ спасти́ и просвѣти́ти ве́сь ро́дъ на́шъ.

Ра́дуйся, преподо́бне о́тче Некта́ріе, Би́тольская похвало́, горы́ Аѳо́нскія чи́стое прозябе́ніе, и́же ю́ность твою́ воздержа́ніемъ увяди́лъ еси́, стра́сти же тѣле́сныя ду́ху повину́лъ еси́, сего́ ра́ди Христо́съ Бо́гъ чудесы́ тя́ вѣнча́етъ пресла́вно.

Богоро́диченъ: Изба́вльшаго на́съ дре́внія кля́твы и благослове́ніе на́мъ дарова́вшаго родила́ еси́ неизрече́нно, Богома́ти Всепѣ́тая, Его́же моли́ о спасе́ніи ду́шъ на́шихъ.

Конда́къ, гла́съ 4:

Благоче́стно на земли́ пожи́сте, ева́нгельскія и́стины на Аѳо́нѣ напои́вшеся, крѣ́постію Ду́ха Свята́го просія́сте и ны́нѣ на небесѣ́хъ весели́теся, тѣ́мже мо́лимъ ва́съ мы́, недосто́йніи: моли́твами ва́шими святы́ми изба́вите на́съ отъ всѣ́хъ бѣ́дъ и печа́ли.

Икосъ:

Кре́стъ сво́й на ра́мо взе́мше, вседу́шно Христу́ послѣ́довасте, любо́вію же Его́ связу́еми, а́ще и отъ мно́гихъ стра́нъ пришли́ есте́, я́коже единокро́вніи Дави́дски вопія́сте: се́, что́ добро́, или́ что́ красно́, но е́же жи́ти бра́тіи вку́пѣ, сего́ ра́ди мо́лимъ ва́съ мы́, недосто́йніи: моли́твами ва́шими святы́ми изба́вите на́съ отъ всѣ́хъ бѣ́дъ и печа́ли.

Пѣ́снь 7.

Ирмо́съ: Вся́ дѣла́ Твоя́ и́стинна и пра́ви путіе́ Твои́, Бо́же оте́цъ на́шихъ.

Благово́ніе источа́етъ гро́бъ тво́й, о́тче Васи́ліе, идѣ́же лежи́тъ честно́е тѣ́ло твое́, Остро́гъ же явля́ется я́коже ра́й Бо́жій, исцеля́еши неду́ги всѣ́хъ, и́же съ вѣ́рою и упова́ніемъ притека́ютъ къ ра́цѣ моще́й твои́хъ и вѣ́рно взыва́ютъ: благослове́нъ Бо́гъ оте́цъ на́шихъ.

Смотря́я бу́дущую жи́знь, о́тче Дамаски́не блаже́нне, и́стинно мíру умертви́лся еси́, тѣ́мже и тѣле́сныя я́звы за Христа́ претерпѣ́лъ еси́, услажда́яся, Его́же ра́ди и пострада́лъ еси́, повѣ́шенъ бы́въ, но получи́лъ еси́ живо́тъ во вѣ́ки, ны́нѣ же, Христу́ предстоя́, вопіе́ши: благослове́нъ Бо́гъ оте́цъ на́шихъ.

Кре́стъ Христо́въ на ра́мена взе́мъ, преподо́бне о́тче Рафаи́ле, земна́я вся́ оста́вилъ еси́, стра́сти же тѣле́сныя умертви́въ, Христу́ послѣ́довалъ еси́, Его́же моли́, да спасе́тъ ду́ши всѣ́хъ воспѣва́ющихъ: благослове́нъ Бо́гъ оте́цъ на́шихъ.

Богоро́диченъ: Разумѣ́ти та́йну стра́шнаго рождества́ Твоего́ ника́коже мо́жетъ у́мъ человѣ́ческій, но ниже́ а́нгельскій, я́ко Ты́ Бо́га воплоще́ннаго родила́ еси́ па́че естества́.

Пѣ́снь 8.

Ирмо́съ: Царя́ сла́вы и Побѣди́теля сме́рти, Іису́са Назоре́я, Того́ превозноси́те во вся́ вѣ́ки.

Аѳо́нскія горы́ о́трасль, мо́лимъ тя́, о́тче Ону́фріе, душе́вное смуще́ніе разори́ти, ми́ръ же и единомы́сліе утверди́ти въ на́съ, е́же вопи́ти непреста́нно: Христа́ превозно́симъ во вся́ вѣ́ки.

Го́спода сла́вы моли́те, святíи, я́ко предста́теліе на́ши и моли́твенницы, да отъ бѣ́дъ и скорбе́й изба́витъ пою́щія: Христа́ превозно́симъ во вся́ вѣ́ки.

О, Го́споди Ще́дрый и Ми́лостивый, не отврати́ отъ на́съ лица́ Твоего́, но услы́ши ны́, вопію́щихъ: Христа́ превозно́симъ во вся́ вѣ́ки.

Богоро́диченъ: Кíими Тя́ пѣ́сньми досто́йно ублажи́мъ, Богоро́дице, я́ко херуви́мъ святѣ́йшую и серафи́мъ сла́внѣйшую, Христа́ ро́ждшую, пребезнача́льно отъ Отца́ возсія́вшаго?

Пѣ́снь 9.

Ирмо́съ: Тебе́, небе́съ вы́шшую и на земли́ Не́бо и Престо́лъ бы́вшую, Ма́терь Бо́жію, вси́ ро́ди, велича́емъ.

Предста́теліе ро́да на́шего, и́стинніи уго́дницы Христо́вы, сердца́ на́ша ра́дости испо́лните ва́шими къ Бо́гу моли́твами.

Отцы́ на́ши преблаже́нніи, помина́йте всегда́ ублажа́ющихъ ва́съ на земли́ и моли́те Бо́га о всѣ́хъ на́съ.

Юже сла́ву улучи́сте на небеси́, богоблаже́нніи отцы́ преподо́бніи, моли́те Бо́га, о е́же и на́мъ пріобрѣсти́ ю́.

Богоро́диченъ: Отрокови́це Всенепоро́чная, Ты́ зако́ны естества́ еди́на обнови́ла еси́, ро́ждши Безсме́ртнаго Бо́га, въ ме́ртвенную пло́ть одѣ́явшася, да ме́ртвыя оживи́тъ бла́гостію.

Свѣти́ленъ:

Свѣтоза́рніи свѣти́льницы неугаси́міи, свѣ́тлостію житія́ ва́шего всю́ Се́рбскую страну́ просвѣти́ли есте́, добродѣ́тели дѣя́нію вся́ науча́юще, тѣ́мже ны́нѣ моли́теся Христу́, о е́же въ ми́рѣ сохрани́ти оби́тель на́шу и все́ оте́чество. [Два́жды.]

Сла́ва, и ны́нѣ, богоро́диченъ:

О, Пречи́стая Дѣ́во, вѣ́мы Тя́ вси́ Предста́тельницу, изъ Тебе́ на́мъ Христо́съ возсія́ и небе́съ Тя́ простра́ннѣйшу показа́, Того́ бо неискусому́жно родила́ еси́, воплоще́нна за милосе́рдіе неисповѣди́мое.

На хвали́техъ стихи́ры на 4, гла́съ 1:

Дне́сь пра́зднуетъ оби́тель Хиланда́рская, торжеству́етъ же и вся́ Свята́я гора́ Аѳо́нская, шестьна́десятихъ святы́хъ свои́хъ па́мять пра́зднующе, и́же дѣ́лы и словесы́ на земли́ Бо́га просла́виша, пріи́демъ и мы́, бра́тіе, воспои́мъ и наслади́мся.

Ра́дуется дне́сь мно́жество вѣ́рныхъ, воспѣва́юще па́мять ва́шу, вы́ бо, и́го Христо́во на ра́мена взе́мше, вся́кое вра́жіе наи́тіе до́блественнѣ попра́ли есте́, Аѳо́нскія пусты́ни гра́ды показа́ли есте́, тѣ́мже ва́съ почита́емъ и мо́лимъ: Христа́ непреста́нно моли́те, о е́же спасти́ся всѣ́мъ на́мъ.

Веселя́щеся, стезю́ жи́зни соверши́ли есте́, зако́ну Бо́жію себе́ покори́вше, спасе́ніе заблужда́емымъ яви́ли есте́, я́ко со́лнце, отъ пусты́ни Аѳо́нскія возсія́вше, и ны́нѣ на небесѣ́хъ водворя́етеся со всѣ́ми святы́ми, ра́дующеся.

Сла́ву удобоувяда́емую, су́щую на земли́, и че́сть, отцы́ святíи, отри́нули есте́, но Христо́съ ва́мъ возме́здіе дарова́, неувяда́емую сла́ву, и жи́знь присносу́щную, и наслѣ́діе нетлѣ́нное, и всели́ ва́съ въ небе́сная селе́нія.

Сла́ва, гла́съ 6:

Шестьна́десятице богоизбра́нная, свѣще́ шестьнадесятосвѣ́тлая, боже́ственными свои́ми сія́ніи озаря́ете исполне́ніе оби́тели Хиланда́рскія, ли́че святоизбра́нный, моли́те Христа́ Бо́га, о е́же спасти́ся всѣ́мъ на́мъ.

И ны́нѣ, богоро́диченъ, гла́съ то́йже:

Никто́же, притека́яй къ Тебѣ́, посра́мленъ отъ Тебе́ исхо́дитъ, Пречи́стая Богоро́дице Дѣ́во, но про́ситъ благода́ти и пріе́млетъ дарова́ніе къ поле́зному проше́нію.

Славосло́віе вели́кое.

Тропа́рь святы́хъ, [гла́съ 4:

Отцы́ на́ши богоблаже́нніи, Аѳо́нстіи подви́жницы, Хиланда́рстіи свѣти́льницы, непоколеби́міи столпи́ Правосла́вія, и́стинніи наста́вницы ева́нгельскихъ преда́ній, Влады́ку всѣ́хъ, Христа́, моли́те ми́ръ вселе́ннѣй дарова́ти и душа́мъ на́шимъ ве́лію ми́лость.]

Сла́ва, и ны́нѣ, Тропа́рь ико́ны Пресвяты́я Влады́чицы на́шея Богоро́дицы, Троеру́чицы:

Яко звѣзда́ [свѣтозаря́ющая, изъ Се́рбіи на Аѳо́нъ чуде́сно пріи́де всечестна́я ико́на Твоя́ Троеру́чица, ю́же оби́тель Хиланда́рская благоговѣ́йно воспріе́мши, я́ко Боже́ственный да́ръ свы́ше, прославля́етъ Тя́, Влады́чицу, и уми́льно вопіе́тъ: не оста́ви ми́лость Твою́ отъ на́съ, но пребу́ди съ на́ми во вѣ́ки].

Ектеніи́ и отпу́стъ.



НА ЛИТУРГІИ,

Блаже́нна отъ кано́на святы́хъ, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́, [ро́дъ пра́выхъ благослови́тся]. Ева́нгеліе отъ Матѳе́я, зача́ло 43. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Мине́я Ию́ль. Ча́сть втора́я. — М.: Издательскій совѣтъ Русской Православной Церкви, 2002. — С. 119-129.

/ Къ оглавленію раздѣла /


Наверхъ / Къ титульной страницѣ

0