Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 13-й де́нь.
Собо́ръ свята́го арха́нгела Гавріи́ла и преподо́бнаго отца́ на́шего Стефа́на Савваи́та.

[ВЕЧЕРЪ,
На Го́споди воззва́хъ:] стихи́ры арха́нгела, гла́съ 4. Подо́бенъ: Да́лъ еси́ зна́меніе.

Престо́лу предстоя́ Трисо́лнечнаго Божества́* и бога́тно просіява́я Боже́ственными свѣтлостьми́,* испуща́емыми непреста́нно отту́ду,* су́щія на земли́, ра́достно лику́ющія* и восхваля́ющія тя́,* страсте́й мглы́ изба́ви и просвѣще́ніемъ уясни́,* Гавріи́ле архистрати́же,* моли́твенниче о душа́хъ на́шихъ.

Низложи́ шата́нія ага́рянская,* на ста́до твое́ ча́сто находя́щая,* уста́ви раздо́ры Це́ркве,* укроти́ бу́рю безмѣ́рныхъ искуше́ній,* изба́ви бѣ́дъ и обстоя́ній любо́вію чту́щія тя́* и подъ кро́въ тво́й прибѣга́ющія,* Гавріи́ле архистрати́же,* моли́твенниче о душа́хъ на́шихъ.

Ины стихи́ры преподо́бнаго, гла́съ 8. Подо́бенъ: О, пресла́внаго чудесе́!

Отче богоно́се Стефа́не,* боже́ственною му́дростію у́мъ укрѣ́пль свѣ́тло,* я́рость у́бо му́жествомъ,* цѣлому́дріемъ же жела́ніе,* пра́вдою же всю́ си́лу душе́вную* упра́вилъ еси́ любому́дренно,* колесни́цу красну́ добродѣ́телей соста́вилъ еси́,* на ню́же всѣ́дъ, ра́дуяся,* возше́лъ еси́ къ высотѣ́, сла́вне.

Отче богогла́се Стефа́не,* богосло́віемъ у́мъ* просвѣти́лъ еси́, преподо́бне,* я́коже копіе́, нося́ я́рость,* просте́рту на ху́льныя, блаже́нне, еретики́,* жела́ніемъ пи́щи го́рнія,* ея́же сподо́бился еси́ причасти́тися, чу́дне,* предстоя́ престо́лу* всѣ́хъ Царя́ и Вседержи́теля.

Отче богоглаго́ливый Стефа́не,* воздержа́ніемъ у́мъ огради́въ всю́ду,* къ Первовино́вному востещи́ сотвори́лъ еси́,* и ути́шилъ еси́ мірскíй мяте́жъ* и, молву́ оттря́съ,* ума́ чистото́ю удержа́нъ бы́лъ еси́, прему́дре,* жела́ніемъ вои́стинну кра́йнимъ,* богому́дре преподо́бне.

Сла́ва, гла́съ 6. Самогла́сенъ. Византíево:

Сра́дуйтеся съ на́ми, вся́ а́нгельская чинонача́лія: предста́тель бо ва́шъ и на́шъ засту́пникъ, вели́кій архистрати́гъ, въ дне́шній де́нь въ честнѣ́мъ его́ хра́мѣ пресла́вно явля́яся, освяща́етъ. Тѣ́мже, по до́лгу воспѣва́юще, тому́ возопіи́мъ: покры́й на́съ кро́вомъ крилу́ твое́ю, вели́кій Гавріи́ле арха́нгеле.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Всечи́стая, я́ко ви́дѣ Тебе́, на Крестѣ́ повѣ́шена, пла́чущи, вопія́ше ма́терски: Сы́не Мо́й и Бо́же Мо́й, сладча́йшее Мое́ Ча́до, ка́ко терпи́ши стра́сть поно́сную?

На стихо́внѣ окто́иха. Сла́ва, и ны́нѣ, гла́съ 8. Іоа́нна Мона́ха:

Яко чинонача́льникъ, и побо́рникъ, и а́нгеловъ пе́рвый во́ждь, архистрати́же, вся́кія ну́жды и ско́рби, неду́гъ и лю́тыхъ согрѣше́ній свободи́, вѣ́рно пою́щихъ и моля́щихъ тя́, сла́вне, я́вѣ, я́ко невеще́ственъ, Невеще́ственнаго зря́, и непристу́пнымъ свѣ́томъ Влады́чнія сла́вы осіявае́мь. То́й бо человѣколю́бнѣ пло́ть на́съ ра́ди отъ Дѣ́вы прія́тъ, спасти́ восхотѣ́въ человѣ́чество.

Тропа́рь, гла́съ 4:

Небе́сныхъ во́инствъ архистрати́же, мо́лимъ тя́ при́сно мы́, недосто́йніи, да твои́ми моли́твами огради́ши на́съ кро́вомъ крилу́ невеще́ственныя твоея́ сла́вы, сохраня́я на́съ, припа́дающихъ прилѣ́жно и вопію́щихъ: отъ бѣ́дъ изба́ви на́съ, я́ко чинонача́льникъ вы́шнихъ си́лъ.


НА УТРЕНИ,
Еди́нъ кано́нъ окто́иха со ирмосо́мъ на 4 и арха́нгела на 6. Творе́ніе Іо́сифово, его́же краегране́сіе: Яко всече́стна Гавріи́ла хвалю́. Гла́съ 4.

Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Яко свѣ́та су́ща къ Свѣ́ту кра́йнему невеще́ственными причаще́ніи, боже́ственнаго и невеще́ственнаго, молю́ тя, арха́нгеле Госпо́день: у́мъ мо́й просвѣти́ моли́твами твои́ми, я́ко да воспѣва́ю тя́.

Соста́вимъ дне́сь ли́къ боже́ственный, веселя́щеся, пе́рваго почита́юще безпло́тныхъ умо́въ, неизрече́нную ра́дость возвѣсти́вшаго, въ мíръ прише́дшую за бла́гость.

Предста́теля тя́ вели́ка, и къ Бо́гу засту́пника, и стѣ́ну, и утвержде́ніе, Гавріи́ле, иму́ще, лю́бящіи тя́, избавля́емся отъ бѣ́дъ и вре́да зміи́на, восхваля́ющіи тя́.

Богоро́диченъ: Чи́сту Тя́, Всенепоро́чную, Гавріи́лъ я́ко узрѣ́, — ра́дуйся! — Тебѣ́, Влады́чице, свѣ́тло возопи́, браконеиску́сная, человѣ́ковъ спасе́ніе, а́нгеловъ похвала́ и честносло́віе.

Инъ кано́нъ преподо́бнаго на 4, гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Тебѣ́ твоего́, преблаже́нне, уче́нія до́лгъ принося́ще, воздая́нія простира́емъ, вѣне́цъ похва́лъ плету́ще, ты́ же ми́лостивъ яви́ся, пребога́те, твои́ми мольба́ми благода́ть ми́ пода́ждь духо́вную.

Всегуби́тельное стремле́ніе страсте́й, о́тче, увяди́лъ еси́, слове́снымъ объя́тъ богому́дріемъ, благопребы́тенъ бо бы́лъ еси́, благогла́сенъ, кро́токъ же и смире́нъ, сло́вомъ же прему́дрости, Стефа́не, и ра́зума вѣнча́емь.

Свяще́нно украси́лъ еси́ себе́, о́тче, ра́зумомъ и дѣ́тельнымъ дѣ́йствомъ благода́ти, богоглаго́ливе Стефа́не, жела́я вѣнца́ сла́вы Христо́вы, и твоея́ наде́жди изря́дно, преблаже́нне, не погрѣши́лъ еси́.

Цѣлому́дріе удержа́лъ еси́ я́вѣ, кра́йнюю же кро́тость и высо́кое, богоно́се, смире́ніе, и́миже возвыша́емь, трудо́въ твои́хъ дѣ́йствомъ и видѣ́ніемъ, ра́дуяся, прине́слся еси́, вѣне́цъ неувяда́емый пріе́мъ.

Богоро́диченъ: Тва́рей яви́лася еси́, Чи́стая, всѣ́хъ ви́димыхъ и неви́димыхъ превы́шши, Всенепоро́чная: Зижди́теля бо родила́ еси́, я́коже изво́ли воплоти́тся во утро́бѣ Твое́й, Его́же со дерзнове́ніемъ моли́ спасти́ пою́щія Тя́.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Прича́стіемъ Свѣ́та невеще́ственнаго, я́ко невеще́ственъ вои́стинну, Гавріи́ле, невеще́ственно просвѣща́емь, свѣ́тъ ви́дѣнъ бы́лъ еси́ вторы́й, веще́ственныя всегда́ человѣ́ки просвѣща́я, пою́щія тя́.

Вели́каго благозва́нія сподо́бился еси́, вели́кое та́инство на́мъ откры́въ, вели́кій а́нгеловъ, и́мже взя́ти бы́хомъ отъ земли́ къ велича́йшей высотѣ́ вельми́ чту́щіи тя́.

Яви́ся всѣ́мъ съ небесе́, любо́вію ищу́щимъ тя́ при́сно, и уста́ви бу́рю на ны́ дви́жимую напа́стей же и скорбе́й, о Гавріи́ле архистрати́же!

Богоро́диченъ: Сказу́я е́же дре́вле сокрове́нное та́инство, Отрокови́це, Тебѣ́ иногда́ Гавріи́лъ взыва́ше: ра́дуйся, Бо́жія пала́то, въ ню́же всели́вся, вся́ человѣ́ки обожи́, я́ко Милосе́рдъ.

Инъ.

Ирмо́съ: Процвѣла́ е́сть пусты́ня, я́ко кри́нъ, Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Просія́ житіе́ твое́, богоно́се Стефа́не, всесвѣ́тло, я́ко со́лнце, въ мíрѣ и просвѣти́ къ тебѣ́ вѣ́рою и любо́вію приходя́щія.

Просвѣща́ются концы́ уче́ніи твои́ми, преподо́бне: я́коже бо свѣти́льникъ, просія́лъ еси́, богоно́се, Це́ркви Христо́вѣ, въ не́йже утверди́ся мое́ се́рдце.

Непорабоще́нну соблю́лъ еси́ ду́шу твою́ страстьми́ и сластьми́ тѣле́сными, богоно́се Стефа́не че́стне. Тѣ́мже ны́нѣ по достоя́нію восхваля́емъ тя́.

Богоро́диченъ: Яви́лася еси́ чистото́ю, я́ко кри́нъ, Влады́чице, посредѣ́ те́рнія просія́вши луча́ми дѣ́вства Твоего́, Богоро́дице Пречи́стая.

Конда́къ, гла́съ 2:

На небесѣ́хъ зря́ Бо́жію сла́ву и на земли́ съ высоты́ подая́ благода́ть, нача́льниче а́нгеловъ, му́дре Гавріи́ле, Бо́жія сла́вы служи́телю и мíра боже́ственный побо́рниче, спаса́й, соблюда́й вопію́щія ти́: са́мъ бу́ди помо́щникъ, и никто́же на ны́.

Сѣда́ленъ, гла́съ 4. Подо́бенъ: Вознесы́йся.

Безпло́тныхъ служи́телей ты́ пе́рвствуяй, первовѣ́чное повелѣ́нное стра́шное та́инство, тебѣ́ еди́ному, Гавріи́ле сла́вне, ввѣря́ется, рождество́ неизрече́нное Святы́я Дѣ́вы: ра́дуйся, — провозглаша́я Ей, — Обра́дованная. Тѣ́мже тя́ до́лжно, вѣ́рніи, съ весе́ліемъ при́сно ублажа́емъ.

Сла́ва, преподо́бнаго, гла́съ 3. Подо́бенъ: Красотѣ́ дѣ́вства.

Исправле́ніе житія́ твоего́ всѣ́хъ просвѣща́етъ, стопы́, Стефа́не о́тче, вои́стинну, вѣ́рою подо́бящихся тебѣ́. Тѣ́мже любо́вію тя́ блажа́щія всегда́ спаса́й моли́твами твои́ми отъ вся́кія тѣсноты́, Христа́ блага́го моля́, преподо́бне блаже́нне досточу́дне.

И ны́нѣ, богоро́диченъ:

Яко невоздѣ́ланная, Дѣ́во, лоза́, краснѣ́йшій Гро́здъ прозябла́ еси́, источа́ющъ на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже я́ко вину́ Тя́ до́брыхъ блажа́ще при́сно, со а́нгеломъ вопіе́мъ Ти́: ра́дуйся, Благода́тная.

Крестобогоро́диченъ:

Неискусобра́чная Чи́стая и Ма́ти Твоя́, Христе́, ви́дящи Тя́, ме́ртва ви́сяща на Крестѣ́, ма́терски пла́чущи, глаго́лаше: что́ Тебѣ́ воздаде́ евре́йскій беззако́нный собо́ръ и неблагода́рный, и́же мно́гихъ и вели́кихъ Твои́хъ, Сы́не Мо́й, даро́въ наслади́выйся? Пою́ Твое́ Боже́ственное снизхожде́ніе.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Стоя́лъ еси́, прича́стіемъ богонача́льнымъ дре́вле, Гавріи́ле досточу́дне, просвѣща́я проро́ка Даніи́ла и изложи́въ явле́ніе недовѣ́домыхъ ду́хомъ.

Усты́ бре́нными тя́ ра́достно, о́гненное естество́ су́ща, восхваля́емъ: изми́ на́съ огня́ всегда́ паля́щаго, боже́ственными, Гавріи́ле, хода́тайствы твои́ми.

Па́че со́лнца въ боже́ственную оде́жду, сла́вою непристу́пною блиста́ющуся, одѣва́емь, архистрати́же служи́телей, Царю́ предстои́ши Небе́сному, веселя́ся.

Богоро́диченъ: Всю́ Тя́, Ду́хомъ Гавріи́лъ преочище́ну, Всенепоро́чная, разумѣ́въ, вопіе́тъ Тебѣ́ я́вственно: ра́дуйся, кля́твы избавле́ніе и пра́отцевъ воззва́ніе.

Инъ.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Ты́, Стефа́не, мона́шествующихъ бы́лъ еси́ вѣне́цъ, я́ко ка́меніемъ многоцѣ́ннымъ, добродѣ́тельми обложе́нъ, яви́лся бо еси́, блаже́нне, богора́дованно вои́стинну украше́ніе.

Боже́ственную, богоно́се, прему́дрость поче́лъ еси́, тѣ́мже дарова́ній тя́ сія́ вѣнцы́ уясни́, сла́ву вѣ́чную тебѣ́ хода́тайствовавши, о́тче всече́стне.

Свѣ́тлостію нра́вовъ твои́хъ и о́бразы бла́гости, преподо́бне Стефа́не, подо́бнѣ пожи́лъ еси́, тѣ́мже присту́пенъ всѣ́мъ бы́лъ еси́, всеблаже́нне пречу́дне.

Богоро́диченъ: Умерщвле́нія пло́дъ мнѣ́ Ева принесе́, Жи́знь же ро́ждшая Ѵпоста́сную, Пречи́стая, а́біе испра́вила еси́. Тѣ́мже зову́ Ти: ра́дуйся, Приснодѣ́во.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Ума́ прича́стіемъ Пе́рваго просвѣща́емь, вторы́й ви́дѣнъ бы́лъ еси́ свѣ́тъ, зовы́й со безчи́сленными а́нгелъ чи́нми: Свя́тъ Оте́цъ Вседѣ́тель, Сы́нъ Собезнача́ленъ и Ду́хъ Сопресто́ленъ.

Ви́дъ тво́й о́гненъ, добро́та пречу́дна, вся́ку мы́сль удивля́я, ве́лія сла́ва, Гавріи́ле вели́кій, боже́ственныхъ безпло́тныхъ нача́льниче, всѣ́хъ удобре́ніе, вѣ́рно воспѣва́ющихъ тя́.

Боже́ственный я́ко ви́дѣ тя́, во вре́мя кажде́нія дре́вле стоя́ща, Заха́рія, быва́етъ нѣ́мъ: не вѣ́рова бо твоему́ возвѣще́нію стра́шному, его́же изгласи́лъ еси́, Гавріи́ле архистрати́же.

Богоро́диченъ: Хра́мъ свяще́нія су́щи, Пренепоро́чная, гла́сомъ Гавріи́ла арха́нгела, во святы́хъ почива́ющаго родила́ еси́ Пресвята́го Бо́га, вся́ освяща́ющаго и лю́тыхъ изыма́ющаго.

Инъ.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Стремле́ніе страсте́й безстра́стія жела́ніемъ угаси́лъ еси́, богоно́се Стефа́не, и видѣ́ніи и дѣя́ніи просвѣти́лъ еси́, о́тче, душе́вное устрое́ніе.

Умо́мъ чи́стымъ писа́ніи бесѣ́довалъ еси́ духо́вными, богоглаго́ливе Стефа́не, и видѣ́нія и дѣя́нія собра́лъ еси́ бога́тство боже́ственно, о́тче преподо́бне.

Прему́дрости глубину́ испыта́въ, Стефа́не, дости́глъ еси́ обрѣсти́, ели́ко благопотре́бно, и би́серъ многоцѣ́нный болѣ́зньми стяжа́лъ еси́, преблаже́нне, ра́зума.

Богоро́диченъ: Се́ во чре́вѣ, Богоро́дице Пречи́стая, Христа́ Бо́га па́че сло́ва имѣ́ла еси́, я́коже Иса́ія провозгласи́, вы́ше естества́ Сего́, Богороди́тельнице, родила́ еси́.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ.

Земнíи язы́цы почести́ тя, ума́ свѣтоза́рнаго и небе́снаго, не возмо́гутъ, пресвѣ́тло просвѣща́ема па́че ума́ и сло́ва Боже́ственными свѣтлостьми́.

Заря́ со́лнца многосвѣ́тлая, о́гненныхъ слу́гъ нача́льниче, свѣтоно́сными твои́ми ко Влады́цѣ мольба́ми пою́щія тя́ тмы́ страсте́й исхи́ти.

Совѣ́ты язы́ковъ разори́, вѣ́ру правосла́вную утверди́, уста́ви раздира́нія церко́вныя, арха́нгеле, ко всѣ́хъ Творцу́ твои́ми моли́твами.

Богоро́диченъ: Глаго́ловъ Боже́ственныхъ послушли́ва, Чи́стая, Гавріи́ловыхъ была́ еси́, и Пребезнача́льнаго Сло́ва пло́тію родила́ еси́, безслове́сія мíръ изба́вльшаго.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Вселе́ннѣй свѣти́ло пресвѣ́тлое, о́тче, яви́лся еси́, слове́съ свѣ́тлостію просвѣща́я, Стефа́не, вѣ́рою и любо́вію къ тебѣ́ притека́ющія.

Блаже́нно житіе́ проше́лъ еси́, успи́въ у́бо чу́вства, внѣ́ бы́въ мірска́го мяте́жа, и Бо́гу прибли́жился еси́, Стефа́не.

Яко до́бръ, я́ко красе́нъ вѣне́цъ, и́мже ны́нѣ вѣнча́лся еси́, прему́дре Стефа́не, добродѣ́тельми вѣнча́емь, и надъ страстьми́ ца́рствовалъ еси́, преизря́дне.

Богоро́диченъ: Вы́ше естества́, Дѣ́во, родила́ еси́ и вѣ́чнуеши Дѣ́вою, я́вльши и́стиннаго Божества́, Сы́на и Бо́га Твоего́, о́бразы.

Конда́къ, гла́съ 2. Подо́бенъ: Тве́рдыя.

Архистрати́же Бо́жій, служи́телю боже́ственныя сла́вы, а́нгеловъ нача́льниче и человѣ́ковъ наста́вниче, поле́зное на́мъ проси́, и ве́лію ми́лость, я́ко безпло́тныхъ архистрати́гъ.

Икосъ:

Ре́клъ еси́, Человѣколю́бче, въ Писа́ніихъ Твои́хъ: мно́жеству ра́доватися а́нгелъ на небеси́ о человѣ́цѣ еди́номъ ка́ющемся, Безсме́ртне. Тѣ́мже мы́, и́же въ беззако́ніихъ, Безгрѣ́шне еди́не Сердцевѣ́дче, Тя́ моли́ти всегда́ дерза́емъ, я́ко Благоутро́бнаго, уще́дрити и низпосла́ти недосто́йнымъ умиле́ніе, Влады́ко, подая́й на́мъ проще́ніе, о всѣ́хъ бо на́съ мо́лится Тебѣ́ безпло́тныхъ архистрати́гъ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Іоа́нново рождество́, сла́вне, возвѣсти́лъ еси́ Заха́ріи иногда́, вну́трь Боже́ственнаго хра́ма предстоя́щу и пою́щу Изба́вителю и Бо́гу: препѣ́тый отце́въ Госпо́дь и Бо́гъ, благослове́нъ еси́.

Пресла́вное хра́ма твоего́ благолѣ́піе пресвѣ́тло, Гавріи́ле, освяща́етъ ду́ши вѣ́рныхъ и повелѣва́етъ велегла́сно вопи́ти: препѣ́тый отце́въ Госпо́дь и Бо́гъ, благослове́нъ еси́.

Просвѣща́емь прича́стіемъ, архистрати́же, пе́рваго Свѣ́та та́йно, вторы́й свѣ́тъ вои́стинну ви́дѣнъ бы́лъ еси́, пою́щія просвѣща́еши всегда́: препѣ́тый отце́въ Госпо́дь и Бо́гъ, благослове́нъ еси́.

Богоро́диченъ: По́сланъ бы́сть Гавріи́лъ архистрати́гъ, ра́дость возвѣща́я Тебѣ́, Дѣ́во-Ма́ти Чи́стая, Ея́же ра́ди печа́ль преста́, и кля́тва вои́стинну непло́дна бы́сть, и благослове́ніе процвѣте́ вѣ́рнымъ во вѣ́ки.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Благово́нствуютъ, преподо́бне, твои́хъ уче́ній словеса́, благода́тію Ду́ха сія́юще: Божество́ бо еди́но честву́я въ тре́хъ Ли́цахъ, Сло́ва же воплоще́ніе поя́, благово́нствуеши на́съ, пребога́те.

Ума́ чистото́ю и ра́зума, богому́дре, свѣ́тлостію житіе́ преше́лъ еси́, чистото́ю же тѣлесе́ и дѣ́вства сія́ніемъ изря́дно возложе́ніе я́влься Всеви́дцу и Вседержи́телю.

Сло́во твое́ со́лію растворе́но, житіе́ твое́, благода́тію, преблаже́нне, сія́я, яви́ся, пречу́дне, тѣ́мже въ вы́шнія оби́тели всели́лся еси́, ра́дуяся, Христу́ со дерзнове́ніемъ ны́нѣ предстоя́.

Богоро́диченъ: Управля́ющи, Пречи́стая, мое́ житіе́, къ Твоему́ всети́хому приста́нищу напра́ви, Бо́га ро́ждшая, благи́хъ Исто́чника, всѣ́мъ подаю́щаго вѣ́рнымъ изоби́ліе бла́гости.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Священносло́віи свяще́нными тя́ лю́діе свяще́нніи пою́тъ, веселя́щеся, ты́ бо всевино́вное Сло́во воплоща́емо, е́же по на́мъ, арха́нгеле, и е́же отъ на́съ приглаша́еши Дѣ́вѣ па́че ума́ же и сло́ва. Тѣ́мже тя́ почита́емъ во вся́ вѣ́ки.

Уму вели́кому же и пе́рвому невеще́ственно, арха́нгеле, соединя́яся усты́ о́гненными твои́ми пое́ши пѣ́ніе стра́шное, е́же пою́тъ вси́ а́нгельстіи ли́цы: Го́спода по́йте, дѣла́, и превозноси́те Его́ во вся́ вѣ́ки.

Благолѣ́піемъ я́вѣ испещре́нъ Боже́ственнымъ, прохо́диши небе́сная, та́же и земна́я, соверша́я свяще́нная хотѣ́нія Христа́, всѣ́хъ Бо́га, а́нгеловъ нача́льниче Гавріи́ле, красота́ вѣ́рою при́сно тя́ хва́лящихъ.

Пло́тію по ѵпоста́си Сло́во человѣ́комъ примѣси́тися хотя́, имя́ше тя́, предтеку́ща и проуготовля́юща свяще́нную пала́ту, о свяще́нный Гавріи́ле: Го́спода по́йте, вопію́ща, и превозноси́те Его́ во вся́ вѣ́ки.

Богоро́диченъ: Яко престо́лъ красе́нъ Царе́въ, я́ко всѣ́хъ тва́рей преиму́щую, я́ко Пресу́щнаго еди́ну осуществова́вшую, человѣ́ки обожи́вшаго соедине́ніемъ лу́чшимъ рождества́ неизрече́ннаго и стра́ннаго, благослове́нную воспои́мъ Дѣ́ву.

Инъ.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Вѣне́цъ благолѣ́пенъ Христо́съ Жизнода́вецъ на ве́рхъ тво́й положи́, тезоимени́те Стефа́не, и́бо дѣя́ньми просія́лъ еси́ и видѣ́ніи, яви́лся еси́, зовы́й: благослови́те, вся́ дѣла́ Госпо́дня, Го́спода.

Все́ преше́дъ чу́вство, преблаже́нне, Уму́ пе́рвому прибли́жился еси́ души́ чистото́ю, житія́ же свѣ́тлостію вѣне́цъ но́сиши, Стефа́не, зовы́й: благослови́те, вся́ дѣла́ Госпо́дня, Го́спода.

Жела́ніемъ зѣ́льнымъ, преблаже́нне, изслѣ́дилъ еси́ богоно́снаго Са́ввы, Стефа́не, житіе́ боже́ственное, жи́зни же свѣ́тлостію поревнова́лъ еси́, прехва́льне, бы́въ у́бо учени́къ сего́ вои́стинну изря́денъ.

Богоро́диченъ: Умъ безстра́стный во утро́бѣ Твое́й соединя́ется человѣ́ческому уму́, Пречи́стая, пло́ти же дебельство́мъ подъ лѣ́томъ бы́въ, лѣ́тъ Превы́шшій. Тѣ́мъ Тя́, Богоро́дице, вѣ́рою и любо́вію сла́вимъ.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Предстои́ши, стра́шно престо́лу благода́ти служа́, и облиста́емь свѣтоли́тіи е́же па́че ума́, и свяще́нно обожа́емь, и Свѣ́тъ зри́мь, и просвѣща́яй вѣ́рою чту́щія тя́, свяще́нне Гавріи́ле архистрати́же.

Якоже не́бо, зри́шися, звѣзда́ми укра́шено, Боже́ственными свѣтлостьми́, и, я́коже воево́да, рука́ми держи́ши ски́птръ пресвѣ́тлый и претека́еши всю́ зе́млю, во́лю Влады́чню всегда́ соверша́я и лю́тыхъ вѣ́рныя изыма́я.

Ути́ши лю́тую ва́рварскую бу́рю, воздви́жемую всегда́ на рабы́ твоя́, церко́вныя уста́ви раздо́ры, пою́щимъ тя́ пода́ждь прегрѣше́ній избавле́ніе, Импера́тору же да́руй побѣди́тельная, Гавріи́ле, те́плымъ предста́тельствомъ твои́мъ.

Предо́брая дво́ице и пресла́вная, Михаи́ле и Гавріи́ле, престо́лу предстоя́ще Боже́ственныя сла́вы, всѣ́мъ проси́те грѣхо́въ проще́нія и злы́хъ премѣне́нія, я́ко предста́теліе и я́ко бла́гости Влады́чнѣй во все́мъ подо́бящеся.

Богоро́диченъ: Свѣ́тъ блиста́нія рождество́мъ Твои́мъ возсія́, и просвѣти́ всю́ подсо́лнечную, и предста́теля тмы́ погуби́, Богороди́тельнице Пречи́стая, а́нгеловъ хвало́ и человѣ́ковъ всѣ́хъ спасе́ніе, непреста́нными гла́сы восхваля́ющихъ Тя́.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Пречестны́й Стефа́не, ны́нѣ чи́сто услажда́яся и пи́щу пріе́мля па́че у́мныя, идѣ́же святы́хъ собо́ри о Бо́зѣ лику́ютъ, блаже́нне, тя́ ны́нѣ чту́щія, хода́тайствуя, къ себѣ́ привлецы́.

Пре́йде, ра́дуяся, къ жела́нію кра́йнему, ко еди́ному су́щему я́вѣ блаже́нству, къ пребо́льшей добро́тѣ, къ жи́зни, вои́стинну нестарѣ́емѣй, къ Свѣ́ту невече́рнему, богоно́се о́тче Стефа́не.

Яко со́лнце, просія́лъ еси́ въ мона́шескихъ собо́рѣхъ, отъ мя́гкихъ ногте́й освяще́нъ, я́коже зарю́, испуща́я добродѣ́тели твоего́ житія́, пресла́дкій Стефа́не, богоно́се о́тче преподо́бне.

Богоро́диченъ: Разумѣ́вше издале́ча прозорли́выма очи́ма, проро́цы Тя́ я́вѣ провозвѣсти́ша, хотя́щую Ма́терь бы́ти Вседѣ́теля и всѣ́хъ Влады́ки, тѣ́мже Тя́, Всепѣ́тая, Богоро́дицу исповѣ́даемъ.

Свѣти́ленъ. Подо́бенъ: Посѣти́лъ ны́.

Архистрати́же Бо́жій, въ кро́вѣ крилу́ твое́ю ополчи́вся, огради́ мя́, прибѣга́ющаго къ тебѣ́, и во исхо́дѣ изба́ви мя́ го́рькихъ истяза́телей, и спаси́ мя мольба́ми твои́ми.

Богоро́диченъ: Бо́гъ на́мъ, Чи́стая, прибѣ́жище, и си́лу, и по́мощь Тя́ подаде́ въ ско́рбехъ на́шихъ и во обстоя́ніихъ, всѣ́хъ у́бо на́съ изба́ви отъ бѣ́дъ на́шихъ.

На стихо́внѣ окто́иха. Сла́ва, гла́съ 5:

Идѣ́же осѣня́етъ благода́ть твоя́, арха́нгеле, отту́ду діа́воля прого́нится си́ла, не терпи́тъ бо свѣ́та твоего́ ви́дѣти спады́й денни́ца. Тѣ́мъ мо́лимъ тя́, о́гненныя его́ стрѣ́лы, я́же на ны́ дви́жимыя, угаси́ хода́тайствомъ твои́мъ, избавля́я на́съ отъ собла́зновъ его́, достохва́льный Гавріи́ле архистрати́же.

И ны́нѣ, богоро́диченъ, или́ крестобогоро́диченъ:

Зря́щи дре́вле Агнца и Сы́на Своего́ Дѣ́ва Ма́ти и Всеблаже́нная Отрокови́ца, на Кре́стъ воздви́жена, вопія́ше, слезя́щи: увы́ Мнѣ́, Сы́не Мо́й, ка́ко умира́еши, Бо́гъ естество́мъ сы́й Безсме́ртенъ?


НА ЛИТУРГІИ,

Блаже́нна окто́иха, на 4, и арха́нгела пѣ́снь 3-я, на 4. Проки́менъ, гла́съ 4: Творя́й а́нгелы Своя́ ду́хи, [и слуги́ Своя́ пла́мень о́гненный]. Сти́хъ: Благослови́, душе́ моя́, Го́спода, [Го́споди Бо́же мо́й, возвели́чился еси́ зѣло́]. Апо́столъ ко Евре́емъ, зача́ло 305. Аллилу́ія, гла́съ 5: Хвали́те Го́спода, вси́ а́нгели Его́, [хвали́те Его́ вся́ си́лы Его́]. Сти́хъ: Яко То́й рече́, и бы́ша, [То́й повелѣ́, и созда́шася]. Ева́нгеліе Луки́, зача́ло 51. Прича́стенъ: Творя́й а́нгелы Своя́ ду́хи, [и слуги́ Своя́ пла́мень о́гненный].

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 126 – 133.

/ Къ оглавленію раздѣла /


Наверхъ / Къ титульной страницѣ

0