Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 12-й де́нь.
Пра́зднованіе Пресвятѣ́й Влады́чицѣ Богоро́дицѣ въ че́сть и па́мять прише́ствія во оби́тель Хиланда́рскую, я́же во святѣ́й вели́цѣй горѣ́ Аѳо́нстѣй, чудотво́рныя ико́ны Ея́, нарица́емыя «Троеру́чица».

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 2:

Утѣ́шительница Блага́я яви́лася еси́ вѣ́рному рабу́ Своему́, преподо́бному Іоа́нну Дамаски́ну, пода́ждь утѣше́ніе и на́мъ, рабо́мъ Твои́мъ, и спаси́ на́съ моли́твами Твои́ми.

Ико́ны Твоея́ чуде́снымъ прише́ствіемъ яви́ла еси́ Твое́ къ на́мъ благоволе́ніе, тѣ́мже Аѳо́нъ ра́дуется, оби́тель Хиланда́рская ликовству́етъ, съ ни́ми же и вся́ страна́ Се́рбская.

Покрови́тельница Се́рбскія земли́ и помо́щница всегда́ была́ еси́, Богоро́дице, наипа́че же оби́тели Хиланда́рскія, не пре́зри и ны́нѣ моли́твы вѣ́рныхъ рабо́въ Твои́хъ, но всѣ́хъ, хва́лящихъ Тя́, защити́.

Ико́на Твоя́, Богоро́дице, Троеру́чица духо́вное врачевство́ всѣ́мъ вѣ́рнымъ е́сть, къ не́йже прибѣга́юще, Тебѣ́ припа́даемъ и мо́лимся: не забу́ди на́съ никогда́, о Ма́ти на́ша Милосе́рдая.

Сла́ва, и ны́нѣ, гла́съ 1:

Небе́сныхъ чино́въ ра́дованіе и на земли́ всѣ́хъ вѣ́рныхъ весе́ліе, Защи́тнице всего́ ро́да Се́рбскаго, его́же избра́ла еси́ въ жили́ще Себѣ́ на земли́, два́жды бо оби́тель Се́рбскую учреди́ла еси́ во оби́тель честны́хъ ико́нъ Свои́хъ: Пе́кскую патріархíю — первопи́саннѣй, Хиланда́ръ же — Троеру́чицѣ. Сего́ ра́ди, зря́ще ико́ну Твою́, Тебѣ́ покланя́емся и, благодаря́ще, вопіе́мъ Ти́: Ма́ти Благода́тная, сла́ва Ти́ и хвала́ во вся́ вѣ́ки.

На стихо́внѣ стихи́ры, гла́съ 3:

Хва́лимъ Тя́, Богоро́дице Пречи́стая, я́ко прише́ствіемъ пречестны́я ико́ны Твоея́ Троеру́чицы всѣ́хъ на́съ освяща́еши.

Сти́хъ: Воскресни́, Го́споди, въ поко́й Тво́й, Ты́ и Киво́тъ святы́ни Твоея́.

Прише́ствіемъ ико́ны Твоея́, Всенепоро́чная, мно́жествомъ благода́ти испо́лнихомся, сего́ ра́ди восхваля́емъ Тя́, Ма́ти Безневѣ́стная.

Сти́хъ: Кля́тся Госпо́дь Дави́ду и́стиною и не отве́ржется ея́.

Исцѣле́нія и цѣльбы́ оби́льно подаю́тся отъ святы́я ико́ны Твоея́ всѣ́мъ, съ вѣ́рою приходя́щимъ къ не́й; ду́шу мою́ и тѣ́ло исцѣли́, еди́на Всепѣ́тая.

Сла́ва, и ны́нѣ, гла́съ 6:

Гото́вися, оби́тель Хиланда́рская, красу́йся, свята́я горо́ Аѳо́нская, се́ бо изъ Се́рбіи ше́ствуетъ чу́дная ико́на Богома́тере, на осля́ти, ники́мже води́мѣмъ, носи́мая, пріи́де на го́ру Аѳо́нскую ко врато́мъ оби́тели Хиланда́рскія, неизрече́ннымъ свѣ́томъ сія́ющая, вся́кій мра́къ прогоня́ющи и всѣ́хъ озаря́ющи луча́ми Своея́ ми́лости.

Тропа́рь Богоро́дицѣ, гла́съ 4:

Яко звѣзда́ свѣтозаря́ющая, изъ Се́рбіи на Аѳо́нъ чуде́сно пріи́де всечестна́я ико́на Твоя́ Троеру́чица, ю́же оби́тель Хиланда́рская благоговѣ́йно воспріе́мши, я́ко Боже́ственный да́ръ свы́ше, прославля́етъ Тя́, Влады́чицу, и уми́льно вопіе́тъ: не оста́ви ми́лость Твою́ отъ на́съ, но пребу́ди съ на́ми во вѣ́ки.


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 2:

Пріиди́те, возра́дуемся Приснодѣ́вѣ за мно́гую благосты́ню Ея́, пріиди́те, поклони́мся Цари́цѣ на́шей Богоро́дицѣ, пріиди́те, припаде́мъ и цѣлу́емъ ико́ну Ея́ Троеру́чицу, я́же по во́ли Всенепоро́чныя Дѣ́вы на осля́ти, ники́мже води́мѣмъ, принесе́на бы́сть во оби́тель Хиланда́рскую. Ейже покланя́ющеся, уми́льно помо́лимся: о Всеми́лостивая Покрови́тельнице и Засту́пнице на́ша, покры́й на́съ и заступи́ отъ всѣ́хъ бѣ́дъ и ну́ждъ душе́вныхъ и тѣле́сныхъ и да́руй на́мъ житіе́ безгрѣ́шно, зача́ти и роди́ти плоды́ покая́нія. [Два́жды.]

Богоро́дице Дѣ́во, Ма́ти Милосе́рдая, всѣ́хъ больны́хъ и печа́льныхъ ско́рое утѣше́ніе, яви́ ми́лость Свою́ и на на́съ, въ печа́ли су́щихъ и во грѣсѣ́хъ пребыва́ющихъ, сердца́ на́ша, неразу́міемъ омраче́нная, благоразу́міемъ освѣти́ и льсти́ тму́ разори́.

Достохва́льныя да́ры прино́сятъ Тебѣ́ вси́ ро́ди человѣ́честіи, я́ко Цари́цѣ и Ма́тери Бо́жіи: архіере́е Тя́ проповѣ́даютъ, свяще́нницы благословля́ютъ, мона́си и простíи благоговѣ́ютъ, вся́къ во́зрастъ и вся́ко преспѣ́яніе, подъ кро́въ Тво́й прибѣга́емъ, покры́й и соблюди́ на́съ моли́твами Твои́ми и спаси́ отъ бѣ́дъ ду́ши на́ша.

Ины стихи́ры, гла́съ 4:

Пресвята́я Влады́чице на́ша Богоро́дице, повѣ́дающе сла́ву Бо́жію, небеса́ повѣ́даютъ и Твою́ сла́ву, пречу́днымъ бо ше́ствіемъ ико́ны Твоея́ Троеру́чицы всю́ Се́рбскую страну́ удиви́ла еси́; ди́внымъ явле́ніемъ ея́ ве́сь Аѳо́нъ освяти́ся, прише́ствіемъ же ея́ Хиланда́рская оби́тель вельми́ возра́довася. Тѣ́мже и мы́ вопіе́мъ Ти́: Ты́ Ма́ти еси́ на́ша и наде́жда, бу́ди на́мъ покро́въ, заступле́ніе и по́мощь. [Два́жды.]

Пречи́стая Дѣ́во, Ма́ти Го́спода Вы́шняго, кто́ по Бо́зѣ подо́бенъ Тебѣ́ на небеси́ и на земли́? Ибо сла́вою и че́стію превосхо́диши небожи́телей и всѣ́хъ земноро́дныхъ. Ты́ пришла́ еси́ ико́ною Твое́ю честно́ю Троеру́чицею во оби́тель Хиланда́рскую, идѣ́же и ны́нѣ водворя́ешися и се́ю настоя́тельствуеши, неотсту́пна бу́ди во вѣ́ки, подаю́щи на́мъ ве́лію и бога́тую ми́лость.

Преблага́я Дѣ́во Богороди́тельнице, Твои́мъ милосе́рднымъ присѣще́ніемъ оби́тель Хиланда́рская я́ко небе́сный гра́дъ явля́ется и хра́мъ присносвѣ́телъ, въ не́мже чу́дная ико́на Твоя́ Троеру́чица я́ко вели́кое сокро́вище показу́ется, е́йже мы́ покланя́ющеся, ра́достію и стра́хомъ цѣлу́емъ ю́ и вопіе́мъ Ти́: озари́ и на́съ заре́ю благода́ти Твоего́ заступле́нія.

Сла́ва, и ны́нѣ, гла́съ 5:

Ра́дуются дне́сь вси́ христолюби́віи зе́мли и свята́я богохвали́мая гора́ Аѳо́нская, лику́етъ и весели́тся честна́я оби́тель Хиланда́рская, сла́ва бо Ма́тере Бо́жія всѣ́мъ возсія́ пресла́внымъ ше́ствіемъ ико́ны Ея́ Троеру́чицы, ю́же цѣлу́юще съ любо́вію, благоговѣ́йно взира́емъ къ Приснодѣ́вѣ и вопіе́мъ Ей: о Всемилосе́рдая Влады́чице, Ты́ иногда́ рекла́ еси́: съ си́мъ о́бразомъ благода́ть Моя́ и си́ла. Мы́ же и́стинно вѣ́руемъ, я́ко се́ рекла́ еси́, Богоро́дице, и́бо си́мъ о́бразомъ досе́лѣ съ на́ми была́ еси́ вы́ну, сего́ ра́ди вопіе́мъ Ти́: ми́лость Твоя́ неизрече́нная, и отсе́лѣ бу́ди съ на́ми во вѣ́ки.

Вхо́дъ. Проки́менъ дне́. Чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.]

На литíи стихи́ры, гла́съ 1. Самогла́сны:

Ра́дуйся, Ма́ти Ми́лости, неистощи́мо бо излива́еши на на́съ, грѣ́шныхъ, да́ры благода́ти Твоея́, Твои́мъ предста́тельствомъ къ Возлю́бленному Сы́ну Твоему́ и Бо́гу на́шему я́звы на́ша грѣхо́вныя врачу́ются. Коли́ко грѣ́шниковъ, изъ самы́я бе́здны паде́нія къ Тебѣ́ со слеза́ми воззва́вшихъ, Ты́ премилосе́рдно исхи́тила еси́ и въ ра́дость вѣ́чно-блаже́нную вни́ти сподо́била еси́. Сего́ ра́ди вопіе́мъ Ти́: сла́ва Тебѣ́, Премилосе́рдая Ма́ти.

Земны́й а́нгелъ и небе́сный человѣ́къ, преподо́бный Іоа́ннъ Дамаски́нъ, имѣ́я къ Тебѣ́, Богоро́дице Дѣ́во, те́плую любо́вь, предъ ико́ною Твое́ю уми́льно моля́шеся, но, по навѣ́ту беззако́ннаго царя́ иконобо́рца, отсѣчена́ бы́сть десни́ца его́. Онъ же, испроси́въ ю́ отъ безбо́жнаго мучи́теля, предъ честно́ю ико́ною Твое́ю сле́зно къ Тебѣ́ моля́шеся, о е́же исцѣли́тися е́й, Ты́ же моли́тву его́ ско́ро услы́шала еси́ и, предста́въ ему́ во снѣ́, усѣче́ннѣй руцѣ́ его́ исцѣле́ніе дарова́ла еси́.

Гла́съ 2:

Ве́ліе чу́до соверши́ся ико́ною Твое́ю, о Богома́ти Всепѣ́тая, е́же никто́же мо́жетъ изъясни́ти: ка́ко отсѣче́нная десни́ца преподо́бнаго во еди́ну но́щь цѣла́ и здра́ва обрѣ́теся, то́кмо червле́ный зна́къ на не́й бы́вшія я́звы оста́вленъ бы́сть, но мы́, вѣ́дуще Тя́ скорбя́щихъ Утѣ́шительницу и Цѣли́тельницу ду́шъ и тѣле́съ, вѣ́мы и́стинно, я́ко ничто́же невозмо́жно Тебѣ́, отъ всея́ души́ вопіе́мъ Ти́: сла́ва Тебѣ́, небе́сная Цари́це.

Сла́ва, и ны́нѣ, гла́съ 3. Самогла́сенъ:

Да веселя́тся небеса́, земноро́дніи вси́ да ра́дуются, я́ко яви́ ми́лость Свою́ Богоро́дица, исцѣли́вши отсѣче́нную десни́цу преподо́бнаго и ико́ну Свою́ боже́ственную Троеру́чицу поста́вивши на игу́менстѣмъ мѣ́стѣ во святѣ́й оби́тели Хиланда́рстѣй, откры́вши же еди́ному отъ и́ноковъ, я́ко та́ Сама́ хо́щетъ ико́ною Свое́ю честно́ю настоя́тельствовати во оби́тели се́й, идѣ́же досе́лѣ водворя́ется и всеси́льнымъ Свои́мъ предста́тельствомъ непреста́нно всѣ́мъ да́руетъ ве́лію ми́лость.

На стихо́внѣ стихи́ры, гла́съ 1:

Не́бо и земля́ согла́сно да восхваля́ютъ Тя́, Богоро́дице Чи́стая, Боже́ственную рѣку́ во́дъ живо́тныхъ, ра́йскихъ двере́й отверзе́ніе и всего́ мíра очище́ніе.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Ра́дости и весе́лія вси́ исполня́емся, сла́вяще святы́я ико́ны Твоея́ Троеру́чицы пресла́вное прише́ствіе, всѣ́хъ и́ноковъ Хиланда́рскія оби́тели моле́нія пріими́ и проше́нія испо́лни.

Сти́хъ: Слы́ши, Дщи́, и ви́ждь, и приклони́ у́хо Твое́.

Ангельстіи чи́нове Тебе́, всѣ́хъ Цари́це, раболѣ́пно слу́жатъ и благоговѣ́йно почита́ютъ святу́ю Твою́ ико́ну, ка́ко же Тя́ возмо́жемъ досто́йно пѣ́ти, мы́, смире́нніи и недосто́йніи?

Сла́ва, и ны́нѣ, гла́съ то́йже. Самогла́сенъ:

Пріиди́те, вѣ́рніи, поклони́мся о́бразу Пречи́стыя Дѣ́вы, и поклони́мся ико́нѣ Троеру́чицѣ, поклони́мся и припаде́мъ къ Цари́цѣ на́шей Богоро́дицѣ, съ любо́вію вопію́ще: испроси́, о Благосе́рдая, у Сы́на Твоего́, Христа́ Бо́га на́шего, благода́ть и ми́лость на́мъ, рабо́мъ Твои́мъ, и всему́ христолюби́вому ро́ду Се́рбскому.

На благослове́ніи хлѣ́бовъ: Тропа́рь Богоро́дицы, три́жды. [Пи́санъ на ма́лѣй вече́рни.]



НА УТРЕНИ,
На Бо́гъ Госпо́дь: Тропа́рь Богоро́дицы, три́жды.

По 1-мъ стихосло́віи сѣда́ленъ, гла́съ 1:

Благода́рственное пѣ́ніе прино́симъ Ти́, Богоро́дице, предъ свято́ю ико́ною Твое́ю Троеру́чицею, я́же свидѣ́тельствуетъ Твою́ неизрече́нную ми́лость ко преподо́бному отцу́ Іоа́нну Дамаски́ну, е́юже спаси́ на́съ и всѣ́хъ, благоче́стно покланя́ющихся е́й.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 2:

О, Всепѣ́тая Дѣ́во Влады́чице, спаси́ вся́, на Тя́ надѣ́ющіяся и къ честнѣ́й ико́нѣ Твое́й притека́ющія, я́же е́сть зало́гъ Твоего́ къ на́мъ благоволе́нія, ю́же лобыза́юще, Тебѣ́ зове́мъ: не забу́ди на́съ, о недре́млющая на́ша Храни́тельнице.

Сла́ва, и ны́нѣ, то́йже.

Велича́ніе:

Велича́емъ Тя́, Пресвята́я Дѣ́во, Богоизбра́нная Отрокови́це, и чте́мъ о́бразъ Тво́й святы́й, и́мже то́чиши исцѣле́нія съ вѣ́рою всѣ́мъ притека́ющимъ.

Псало́мъ избра́нный Богоро́диченъ.

По поліеле́и сѣда́ленъ, гла́съ 8:

Просвѣти́ на́съ Твои́мъ свѣ́томъ, Всечи́стая, и да́ждь на́мъ ру́ку по́мощи: вѣ́мы бо и исповѣ́дуемъ, я́ко лу́чше е́сть со́лнцу уга́снути, не́жели лиши́тися на́мъ Твоего́ за на́съ къ Бо́гу хода́тайства.

Сла́ва, и ны́нѣ, то́йже.

Степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Отры́гну се́рдце мое́ сло́во бла́го, глаго́лю а́зъ дѣла́ моя́ Царе́ви. Вся́кое дыха́ніе... Ева́нгеліе отъ Луки́, зача́ло 4.

По 50-мъ псалмѣ́ стихи́ра, гла́съ 6:

Припа́дающе о́бразу Твоему́ честно́му, Пречи́стая Богоро́дице, покланя́емся Тебѣ́, Тя́ бо еди́ну и́мамы вси́ прибѣ́жище и стѣ́ну и Тя́ сла́вимъ немо́лчно, Ма́ти Чадолюби́вая.

Кано́нъ Богоро́дицѣ [благода́ренъ, со ирмосо́мъ на 6 и пра́здника на 8], гла́съ 4, его́же краегране́сіе: Подъ Твою́ ми́лость прибѣга́емъ, Богоро́дице. Творе́ніе протоіере́я Ми́рка.

Пѣ́снь 1.

Ирмо́съ: Нѣ́сть Тебѣ́ подо́бенъ, Препросла́вленный Го́споди: руко́ю бо крѣ́пкою изба́вилъ еси́ лю́ди, я́же стяжа́лъ еси́, Человѣколю́бче.

Просвѣти́ ду́шу мою́, у́мъ и се́рдце, Преми́лостивая Ма́ти Бо́жія, и да́ждь ми́ да́ръ воспѣ́ти Тя́, крѣ́пкую Предста́тельницу, благи́хъ Хода́таицу и въ печа́лехъ сла́дкое Утѣше́ніе.

Облакъ свѣтоза́рный яви́лася еси́ преподо́бному Іоа́нну Дамаски́ну, егда́ моли́тву его́ ско́ро услы́шала еси́ и отсѣче́нную десни́цу его́ здра́ву сотвори́ла еси́.

Дне́сь согла́сно торжеству́ютъ вси́ концы́ земли́, вку́пѣ Тя́ воспѣва́юще, тве́рдую По́мощь и Храни́тельницу жи́зни на́шея.

Твою́ всечестну́ю и чудотво́рную ико́ну Троеру́чицу стяжа́вши, свята́я оби́тель Хиланда́ръ вопіе́тъ Ти́: ра́дуйся, стѣно́ неруши́мая и крѣ́пкое заступле́ніе оби́тели сея́.

Пѣ́снь 3.

Ирмо́съ: Свя́тъ еси́, Го́споди Бо́же на́шъ, утверди́ и на́ша сердца́ непреста́нно вопи́ти Тебѣ́: пра́веденъ нѣ́сть, па́че Тебе́, Го́споди.

Вѣ́рныхъ собо́ри совокупля́ются дне́сь къ прославле́нію Твоего́ благосе́рдія, е́же яви́ла еси́ преподо́бному Іоа́нну Дамаски́ну, исцѣли́вши отсѣче́нную десни́цу его́.

Очи серде́цъ на́шихъ воспуща́емъ къ Тебѣ́, Влады́чице, егда́ взира́емъ на чудотво́рную ико́ну Троеру́чицу, бу́ди на́мъ держа́ва и огражде́ніе и вы́шняго прича́стія сподо́би на́съ.

Юже славосло́вятъ си́лы небе́сныя, пое́мъ Тя́, Всепѣ́тая Дѣ́во, спаси́ ны отъ грѣхо́внаго плѣне́нія и вся́кія ско́рби, находя́щія на ны́.

Моли́, Его́же родила́ еси́, Ма́ти Безневѣ́стная, о всѣ́хъ, притека́ющихъ къ честнѣ́й ико́нѣ Твое́й, я́ко да защити́тъ и́хъ и просвѣти́тъ.

Сѣда́ленъ, гла́съ 4:

Егда́ и́ноцы Хиланда́рстіи ви́дѣша пречестну́ю ико́ну Твою́, Влады́чице, на осля́ти, ники́мже води́мѣмъ, ко врато́мъ оби́тели Хиланда́рскія принесе́нную, ра́достію ве́ліею возра́довашася и, покланя́ющеся е́й, прославля́ху Твое́ къ ни́мъ благоволе́ніе.

Сла́ва, и ны́нѣ, то́йже.

Пѣ́снь 4.

Ирмо́съ: Услы́шахъ слу́хъ Тво́й, Го́споди, я́ко яви́лся еси́ на земли́, и просла́вихъ Твою́ си́лу.

Исто́чника Приснотеку́щаго источи́ла еси́, Пречи́стая Дѣ́во, вся́ удо́лія напая́юща, погрузи́ и вся́ на́ша собла́зны и до конца́ потреби́.

Лѣ́ствицу Іа́ковлю, Гедео́ново руно́, ра́дости Хода́таицу, крѣ́пость и похвалу́ всѣ́хъ вѣ́рныхъ, пріиди́те, вси́ воспои́мъ, глаго́люще: ра́дуйся, Дѣ́во Чи́стая.

Образъ Тво́й честны́й цѣлу́юще, Всечи́стая, къ Твое́й бла́гости прибѣга́емъ и, колѣ́на преклоня́юще, съ пла́чемъ мо́лимъ Тя́: не пре́зри на́шего воздыха́нія, но въ де́нь су́дный бу́ди на́мъ Покро́въ и Помо́щница.

Сло́во Бо́жіе ро́ждшая, посѣти́ на́съ благода́тію Твое́ю, и омраче́нныя на́ша ду́ши и сердца́ просвѣти́, и пода́ждь на́мъ отъ бѣ́дъ избавле́ніе и всѣ́хъ грѣхо́въ оставле́ніе.

Пѣ́снь 5.

Ирмо́съ: Зако́номъ за́повѣдей Твои́хъ, еди́не Человѣколю́бче, просвѣти́ се́рдце мое́, молю́ся, Го́споди, и поми́луй мя́.

Твоя́ всечестна́я ико́на Троеру́чица я́сно всѣ́мъ свидѣ́тельствуетъ, я́ко Ты́ крѣ́пость на́ша и си́ла еси́, сего́ ра́ди прославля́емъ Ма́тернее Твое́ къ на́мъ милосе́рдіе.

Преподо́бный Іоа́ннъ Дамаски́нъ сле́зно моля́шеся Тебѣ́ предъ честно́ю ико́ною Твое́ю, Ты́ же моли́тву его́ ско́ро услы́шала еси́ и усѣче́ннѣй руцѣ́ его́ исцѣле́ніе дарова́ла еси́.

Ра́дости Хода́таице, мольбы́ ра́бъ Твои́хъ пріими́, вся́ проти́вныхъ враго́въ совѣ́ты разжени́ и ста́до Твое́ невреди́мо сохрани́ и отъ всѣ́хъ скорбе́й спаси́.

Избавля́еми прегрѣше́ній Твои́ми святы́ми моли́твами, Благослове́нная Богоро́дице, благоразу́мно Тя́ вси́ ублажа́емъ.

Пѣ́снь 6.

Ирмо́съ: Ве́черъ, и у́тро, и полу́дне хва́лимъ Тя́, Го́споди Бо́же на́шъ, услы́ши гла́съ на́шъ.

Блажи́мъ Тя́ и сла́вимъ, Богоро́дице Дѣ́во, и́бо Ты́, о Благода́тная, благода́тію Твое́ю всегда́ на́съ осѣня́еши, покрыва́ющи, и заступа́ющи, и отъ лука́выхъ враго́въ избавля́ющи.

Ѣздяй на херуви́мѣхъ и Пѣва́емый отъ серафи́мъ изъ Твои́хъ ложе́снъ яви́ся, и все́ человѣ́чество спасе́но бы́сть, сего́ ра́ди сла́вимъ Тя́, я́ко Засту́пницу на́шу непосты́дную.

Гряди́те, лю́діе, на поклоне́ніе Бо́жіей Ма́тери, благода́ть бо свѣ́та Ея́ и на́мъ возсія́ и научи́ пѣ́ти: сподо́би на́съ, о Благода́тная, вы́шняго прича́стія.

Ангеловъ ра́дость Ты́ еси́, Богоро́дице, и всѣ́хъ человѣ́ковъ вои́стинну весе́ліе; спаси́ ду́ши всѣ́хъ, пою́щихъ Тя́, Чи́стая.

Конда́къ, гла́съ 3. Подо́бенъ: Дѣ́ва дне́сь.

Дѣ́ва дне́сь благоволе́ніе къ на́мъ явля́етъ, гора́ же Аѳо́нъ благодаре́ніе Ей прино́ситъ, а́нгели и и́ноцы славосло́вятъ, Троеру́чица изъ Се́рбіи чуде́сно путеше́ствуетъ: на́съ бо ра́ди пріи́де и всели́ся во святу́ю оби́тель Хиланда́рскую.

Икосъ:

Вои́стинну пречу́дное явле́ніе: пресла́вная ико́на Твоя́ Троеру́чица, ю́же первосвяти́тель се́рбскій, Са́вва, отъ святы́я Ла́вры Са́ввы Освяще́ннаго, со благоговѣ́ніемъ, я́ко многоцѣ́ненъ да́ръ, въ страну́ Се́рбскую принесе́, на безслове́снѣмъ осля́ти отъ Се́рбіи на Аѳо́нъ чуде́сно прино́сится и ко святѣ́й оби́тели Хиланда́рстѣй пріи́де. Иноцы же оби́тели сея́, воспріи́мше сію́ съ ра́достію, я́ко да́ръ небе́сный, поста́виша ю́ въ олтари́ собо́рныя це́ркве оби́тели, и́бо разумѣ́ша сбытіе́ сіе́ я́ко я́вное Твое́ къ ни́мъ благоволе́ніе. Сего́ ра́ди съ ра́достію и любо́вію покланя́хуся всечестнѣ́й ико́нѣ Твое́й, цѣлу́юще ю́ и Тебѣ́ воспѣва́юще: ра́дуйся, святу́ю ико́ну Твою́ зало́гомъ ми́лости на́мъ дарова́вшая, всѣ́мъ вѣ́рнымъ ско́рое поможе́ніе.

Пѣ́снь 7.

Ирмо́съ: Въ нача́лѣ Безнача́льное Сло́во, со Отце́мъ и Ду́хомъ Сы́нъ Единоро́дный, благослове́нъ еси́, и превозноси́мый Бо́же оте́цъ на́шихъ.

Еди́ну Тя́ обрѣ́те Чи́стую Содѣ́тель всѣ́хъ и всели́ся въ Тя́, я́ко въ хра́мъ прекра́сный, сего́ ра́ди пое́мъ Ти́: Христа́ Бо́га на́шего Ма́ти, благослове́на еси́.

Ми́лостію Твое́ю ве́сь мíръ обогаща́еши и ду́ши просвѣща́еши, еди́на Всепѣ́тая, тѣ́мже воспѣва́емъ Ти́: Христа́ Бо́га на́шего Ма́ти, благослове́на еси́.

Безневѣ́стная Дѣ́во, многопло́дное дре́во яви́лася еси́, снѣ́дію небе́сною вся́ насыща́ющее, добродѣя́нія всѣ́мъ источи́, да вси́ пое́мъ Ти́: Христа́ Бо́га на́шего Ма́ти, благослове́на еси́.

Образа Твоего́ прише́ствіемъ отъ злы́хъ избавля́емся и посрамля́ются вси́, рабо́мъ Твои́мъ зла́я явля́ющіи, сего́ ра́ди вопіе́мъ: благослове́на еси́, Ма́ти Христа́ Бо́га на́шего.

Пѣ́снь 8.

Ирмо́съ: Во о́бразѣ а́нгела, я́вльшагося въ пещи́ о́гненнѣй пѣсносло́вцемъ, Христа́ Бо́га по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.

Гла́сы моле́бными, пріиди́те, вси́ воспои́мъ Чи́стую Дѣ́ву, се́ бо ны́нѣ весе́ліе приближа́ется, вѣ́рніи спаса́ются, и воскли́кнемъ въ весе́ліи: Богоро́дицу по́йте и превозноси́те во вся́ вѣ́ки.

Очи́ма а́нгельскима глубина́ неудобозри́мая, человѣ́ческими по́мыслы высота́ неудобовосходи́мая пріи́де къ на́мъ во о́бразѣ Троеру́чицы, поклони́мся у́бо честно́му о́бразу и возопіи́мъ: Богоро́дицу по́йте и превозноси́те во вся́ вѣ́ки.

Ра́дующеся, приступа́емъ о́бразу Твоему́ честно́му и, уми́льно моля́щеся, изъ глубины́ души́ взыва́емъ: Богоро́дицу по́йте и превозноси́те во вся́ вѣ́ки.

Огне́мъ возгара́шеся гора́ Сина́йская, не терпя́ше бо сни́тія сла́вы Бо́жія, Ты́ Боже́ственный Огнь су́щъ, Бо́жіе Сло́во во чре́вѣ Твое́мъ неопа́льно носи́ла еси́, сего́ ра́ди пое́мъ: Богоро́дицу по́йте и превозноси́те во вся́ вѣ́ки.

Пѣ́снь 9.

Ирмо́съ: Безсѣ́менное Рождество́ Твое́, Богоро́дице Чи́стая, Христа́ Бо́га на́шего пѣ́сньми немо́лчными велича́емъ.

Дне́сь ра́дуется Правосла́вная Се́рбія и вся́ гора́ Аѳо́нская, изря́днѣе же оби́тель Хиланда́рская, и́бо пріи́де и всели́ся въ ню́ всечестна́я ико́на Троеру́чица, явля́ющи къ на́мъ благоволе́ніе Бо́жія Ма́тере.

Имѣ́ющи святу́ю ико́ну Твою́ Троеру́чицу во игу́мена себѣ́, я́коже Твоя́ во́ля бы́сть, Богоро́дице, оби́тель Хиланда́рская благоуха́ніемъ святы́ни исполня́ется и непреста́нно славосло́витъ и́мя Твое́.

Цвѣ́те прекра́сный, облагоуха́яй вся́, проти́вныхъ нахожде́нія отгоня́яй и весе́лія всѣ́хъ исполня́яй, бу́ди на́мъ стѣна́, и огражде́ніе, и спаси́тельное прибѣ́жище.

Его́же воспѣва́ютъ а́нгели, родила́ еси́, но и Дѣ́вою пребыла́ еси́, сего́ ра́ди вопіе́мъ Ти́: ра́дуйся, ско́рая Помо́щнице и крѣ́пкая Засту́пнице всего́ мíра.

Свѣти́ленъ:

Свѣ́томъ благосе́рдія Твоего́ всѣ́хъ озаря́ющи, вся́кую болѣ́знь и неду́гъ исцѣля́еши, не забу́ди и на́съ, вѣ́рныхъ ра́бъ Твои́хъ, но да зна́менается на на́съ свѣ́тъ лица́ Твоего́ во вся́ дни́ живота́ на́шего.

Сла́ва, и ны́нѣ:

Ико́на Твоя́ пречу́дная, Богоро́дице, да бу́детъ на́мъ сто́лпъ о́гненный, руководя́щій на́съ къ вѣ́чному наслѣ́дію, и да зна́менается на на́съ свѣ́тъ лица́ Твоего́ во вся́ дни́ живота́ на́шего.

На хвали́техъ стихи́ры на 4, гла́съ 4:

Прови́дя Тя́ издале́ча, проро́къ Дави́дъ богодухнове́нно глаго́ла: лицу́ Твоему́ помо́лятся бога́тіи лю́дстіи. Се́ бо дне́сь вси́ вѣ́рніи Твои́, Благослове́нная Богоро́дице, покланя́ются Тебѣ́ и лобыза́ютъ честну́ю ико́ну Твою́ Троеру́чицу, освяща́ются душа́ми, ку́пно и тѣлесы́ и отъ всея́ души́ и се́рдца вопію́тъ Ти́: Ты́ на́ша наде́жда еси́ и упова́ніе, бу́ди съ на́ми во вѣ́ки.

Ра́дуется дне́сь, Богоро́дице, оби́тель Хиланда́рская, имѣ́ющи всечестну́ю ико́ну Троеру́чицу я́ко зало́гъ спасе́нія, и съ вѣ́рою и любо́вію взыва́етъ Ти́: сохрани́, о Всеми́лостивая, оби́тель на́шу и оте́чество отъ тлѣтво́рныхъ уче́ній невѣ́рія и суевѣ́рія, умно́жи же любо́вь и единомы́сліе и сподо́би, о Всеблага́я, всегда́ пѣ́ти Тя́.

Преукраше́нная Приснодѣ́во, во вся́ вѣ́ки Благослове́нная, не пре́зри моли́твы призыва́ющихъ Тя́, но услы́ши серде́чное воздыха́ніе взира́ющихъ къ Тебѣ́ и, я́коже преподо́бному Іоа́нну ско́ро притекла́ еси́ въ по́мощь, притецы́ съ кро́тостію къ душа́мъ на́шимъ. Бу́ди на́мъ Путеводи́тельница къ небе́сному оте́честву и сопричти́ на́съ къ блаже́нному собо́ру избра́нныхъ Бо́жіихъ.

Пресвята́я, Преблагослове́нная, вѣ́мы Тя́ Милосе́рдую, и́бо о́чи Твои́ на ни́щія призира́ютъ и ру́цѣ Твои́ къ сирота́мъ просте́рты. Се́, колѣнопреклоня́ющеся предъ свято́ю ико́ною Твое́ю, мо́лимъ Тя́: не оста́ви на́съ въ печа́ли, но Ма́тернее лице́ Твое́ обрати́ на моли́твы на́ша и не помяни́ беззако́ній на́шихъ, но, я́ко Милосе́рдая, спаси́ ду́ши на́ша.

Сла́ва, и ны́нѣ, гла́съ 8:

Зря́ще пречу́дный о́бразъ Тво́й, Богома́ти Милосе́рдая, Саму́ю Тя́ вои́стинну зри́мъ, Богоро́дицу су́щую, и слы́шимъ гла́съ Тво́й сладковѣща́нный, его́же къ первопи́саннѣй ико́нѣ Твое́й со вла́стію рекла́ еси́: съ то́ю Моя́ благода́ть. Та́ же благода́ть и въ подобообра́зныхъ и́стинствуетъ и во ико́нѣ Троеру́чицѣ преизбы́точествуетъ, ю́же почита́юще, благодаре́ніе Тебѣ́ прино́симъ: ра́дуйся, Благода́тная, съ Тобо́ю Госпо́дь, Тебе́ же ра́ди и съ на́ми, спаса́я на́съ всегда́.

Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна отъ кано́на Богоро́дицы, пѣ́снь 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, [и и́мя Госпо́дне призову́.]


Моли́твы ко Пресвятѣ́й Богоро́дицѣ:

Моли́тва пе́рвая:

О, Пресвята́я Госпоже́ Влады́чице Богоро́дице, ве́ліе чу́до свято́му Іоа́нну Дамаски́ну яви́вшая, я́ко вѣ́ру и́стинную и наде́жду несумнѣ́нную показа́вшему! Услы́ши на́съ, грѣ́шныхъ, предъ чудотво́рною Твое́ю ико́ною усе́рдно моля́щихся и прося́щихъ Твоея́ по́мощи: не отри́ни моле́нія сего́ мно́гихъ ра́ди прегрѣше́ній на́шихъ, но, я́ко Ма́ти милосе́рдія и щедро́тъ, изба́ви на́съ отъ болѣ́зней, скорбе́й и печа́лей, прости́ содѣ́янныя на́ми грѣхи́, испо́лни ра́дости и весе́лія всѣ́хъ, чту́щихъ святу́ю ико́ну Твою́, да ра́достно воспое́мъ и любо́вію просла́вимъ и́мя Твое́, я́ко Ты́ еси́ отъ всѣ́хъ родо́въ избра́нная и благослове́нная во вѣ́ки вѣко́въ. Ами́нь.

Ина моли́тва:

О, Пресвята́я и Преблагослове́нная Дѣ́во Богоро́дице Марíе! Припа́даемъ и покланя́емся Тебѣ́ предъ свято́ю Троеру́чною ико́ною Твое́ю, воспомина́юще пресла́вное чу́до Твое́ исцѣле́ніемъ усѣче́нныя десни́цы преподо́бнаго Іоа́нна Дамаскина́ отъ ико́ны сея́ явле́нное, его́же зна́меніе доны́нѣ ви́димо е́сть на не́й во о́бразѣ тре́тія руки́, къ изображе́нію Твоему́ приложе́нныя. Мо́лимся Ти́ и про́симъ Тя́, всеблагу́ю и всеще́друю ро́да на́шего Засту́пницу: услы́ши на́съ, моля́щихся Тебѣ́, и я́коже блаже́ннаго Іоа́нна, въ ско́рби и болѣ́зни къ Тебѣ́ возопи́вшаго, услы́шала еси́, та́ко и на́съ не пре́зри, скорбя́щихъ и болѣ́знующихъ ра́нами страсте́й многоразли́чныхъ и къ Тебѣ́ отъ души́ сокруше́нныя и смире́нныя усе́рдно прибѣга́ющихъ. Ты́ зри́ши, Госпоже́ Всеми́лостивая, не́мощи на́ша, озлобле́ніе на́ше, ну́жду, потре́бу на́шу въ Твое́й по́мощи и заступле́ніи, я́ко отвсю́ду враги́ окруже́ни есмы́ и нѣ́сть помога́ющаго, ниже́ заступа́ющаго, а́ще не Ты́ умилосе́рдишися о на́съ, Влады́чице. Ей, мо́лимъ Ти ся, вонми́ гла́су болѣ́зненному на́шему и помози́ на́мъ святооте́ческую правосла́вную вѣ́ру до конца́ днíй на́шихъ непоро́чно сохрани́ти, во всѣ́хъ за́повѣдехъ Госпо́днихъ неукло́нно ходи́ти, покая́ніе и́стинное о грѣсѣ́хъ на́шихъ всегда́ Бо́гу приноси́ти и сподо́битися ми́рныя христіа́нскія кончи́ны и до́браго отвѣ́та на стра́шнѣмъ судѣ́ Сы́на Твоего́ и Бо́га на́шего, Его́же умоли́ за на́съ ма́тернею моли́твою Твое́ю, да не осу́дитъ на́съ по беззако́ніемъ на́шимъ, но да поми́луетъ на́съ по вели́цѣй и неизрече́ннѣй ми́лости Свое́й. О, Всеблага́я! Услы́ши на́съ и не лиши́ на́съ по́мощи Твоея́ держа́вныя, да, Тобо́ю спасе́ніе получи́вше, воспое́мъ и просла́вимъ Тя́ на земли́ живы́хъ и ро́ждшагося отъ Тебе́ Искупи́теля на́шего Го́спода Іису́са Христа́, Ему́же подоба́етъ сла́ва и держа́ва, че́сть и поклоне́ніе, ку́пно со Отце́мъ и Святы́мъ Ду́хомъ всегда́, ны́нѣ и при́сно и во вѣ́ки вѣко́въ. Ами́нь.

Источникъ: Мине́я Ию́ль. Ча́сть втора́я. — М.: Издательскій совѣтъ Русской Православной Церкви, 2002. — С. 47-62.

/ Къ оглавленію раздѣла /


Наверхъ / Къ титульной страницѣ

0