Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія во 12-й де́нь.
Пра́зднованіе Пресвятѣ́й Богоро́дицѣ, въ че́сть чудотво́рныя ико́ны Ея́, нарица́емыя «Троеру́чица».

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 1:

Пріиди́те, и́ноцы горы́ сея́, Го́ру мы́сленную, Пречи́стую Дѣ́ву Марíю и Богоро́дицу восхва́лимъ, и То́й велегла́сно возопіи́мъ: ра́дуйся, Горо́ свята́я та́инственная, въ жре́бій Себѣ́ го́ру сію́ избра́вшая, и обита́ющимъ здѣ́ покро́въ и заступле́ніе Свое́ обѣща́вшая.

Ра́дуйся, горо́ Аѳо́нская, въ жре́бій Цари́цы Небе́сныя избра́нная, и прише́ствіемъ Ея́ здѣ́ освяще́нная: сла́ва бо Госпо́дня на Тебѣ́ возсія́, и въ зна́меніяхъ и чудесѣ́хъ мно́зѣхъ прояви́ся во спасе́ніе ду́шъ на́шихъ.

Дне́сь и́ноковъ ли́цы, ра́достно соше́дшеся, торжеству́йте, прославля́юще верхо́вную Прави́тельницу на́шу Цари́цу Богоро́дицу, Яже Троеру́чною Свое́ю ико́ною я́ко Игу́менія вся́ поле́зная на́мъ устроя́етъ, и ду́ши на́ша къ Ца́рствію небе́сному неви́димо уготовля́етъ.

Сла́ва, и ны́нѣ, гла́съ то́йже:

О, Пресвята́я Богома́ти, и́ноковъ блага́я Наста́внице и Покрови́тельнице! Да́ждь на́мъ, насе́льникомъ земна́го жре́бія Твоего́, ненавѣ́тно небе́сную ше́ствовати стезю́, на Боже́ственная дѣя́нія на́съ укрѣпля́ющи, да Твои́мъ всемо́щнымъ заступле́ніемъ, грѣхо́внаго пути́ укло́ньшеся, присносу́щныя Боже́ственныя сла́вы о́бщницы бы́ти сподо́бимся.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

О, Всенепоро́чная Дѣ́во, ко́е Тебѣ́ благодаре́ніе принесе́мъ, я́ко го́ру сію́ отъ всея́ вселе́нныя въ жре́бій Себѣ́ избра́вши, въ насе́леніе и́нокомъ ю́ вдала́ еси́, и Троеру́чную Твою́ ико́ну во игу́мена мѣ́сто оби́тели Хиланда́рстѣй дарова́ла еси́.

Сти́хъ: Слы́ши, Дщи́, и ви́ждь, и приклони́ у́хо Твое́.

О, Пресвята́я Госпоже́ Влады́чице, не забу́ди на́съ, Твоя́ рабы́, но я́коже обѣща́лся еси́, подава́й на́мъ вся́ къ житію́ потре́бная, и Ца́рствія небе́снаго не лиши́ на́съ, Троеру́чныя ико́ны Твоея́ пра́здникъ соверша́ющія свѣ́тло.

Сти́хъ: Помяну́ и́мя Твое́ во вся́комъ ро́дѣ и ро́дѣ.

О, Всепѣ́тая Ма́ти, Троеру́чною Твое́ю ико́ною съ на́ми пребыва́ющая, приклони́ся на моле́ніе на́ше, и Сы́на Твоего́ умоля́ти о на́съ не преста́й, да изба́витъ жре́бій Тво́й и вся́ гра́ды и страны́ христіа́нскія отъ тру́са и гла́да, и отъ всѣ́хъ бѣ́дъ, грѣ́хъ ра́ди на́шихъ на ны́ находя́щія.

Сла́ва, и ны́нѣ, гла́съ 1:

Троеру́чнаго о́браза Твоего́, Влады́чице, соверша́юще пра́зднство, смире́нно вопіе́мъ Ти́, Препѣ́тая: потемне́нный грѣхми́ душе́вный о́бразъ на́шъ обнови́ти помози́ на́мъ, всемо́щными Твои́ми къ Бо́гу моли́твами.

Тропа́рь, гла́съ 4:

Троеру́чную Твою́, Богома́ти, ико́ну, треми́ изображе́нными на не́й рука́ми, та́йну Святы́я Тро́ицы образу́ющую, чудесы́ мно́гими просла́вила еси́. Тѣ́мже вопіе́мъ Ти́: я́коже дре́вле отсѣ́ченную ру́ку преподо́бнаго Іоа́нна Дамаскина́ исцѣли́ла еси́, та́ко и ны́нѣ душе́вныя и тѣле́сныя на́ша неду́ги исцѣли́, и отъ вся́кихъ бѣ́дъ изба́ви, да зове́мъ Ти́: ра́дуйся, Благода́тная, Троеру́чною ико́ною Твое́ю на́мъ помога́ющая.


НА ПОВЕЧЕРІИ,
Кано́нъ святы́хъ му́ченикъ Про́кла и Ила́рія. Творе́ніе Іо́сифово, гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Соедини́вшеся съ Бо́гомъ и боже́ственными заря́ми освѣща́еми при́сно, до́бліи страда́льцы, ду́шу мою́ просвѣти́те, пою́щу свѣтоно́сное и честно́е ва́ше страда́ніе умиле́ніемъ се́рдца, блаже́нніи.

Воспери́ ва́съ небе́сное жела́ніе, тѣ́мже вся́ кра́сная житія́, страда́льцы, вмѣни́сте уме́ты, манове́ньми къ Бо́гу обожи́вшеся и всю́ безбо́жную крѣ́пость смири́вше.

Огне́мъ Богонача́льныя вже́гшеся Тро́ицы, злоче́стія разжже́нія угаси́сте, му́дріи, кро́вными тече́ніи. Тѣ́мже исцѣле́ній чи́стыми одожде́ніи страсте́й на́шихъ скве́рну отмы́йте.

Безпеча́льную жи́знь, небе́сную сла́ву, ра́йское наслажде́ніе, свѣ́тъ мы́сленный, кра́сное ра́дованіе, му́ченицы, взыску́юще, лю́тая претерпѣ́сте треволне́нія до́блественнымъ умо́мъ.

Небе́сніи ли́цы ва́шему терпѣ́нію удиви́шася, му́дріи: біе́нія бо пло́ти, и многоплете́нныя му́ки, му́ченицы, доблему́дренно претерпѣ́сте, ра́дующеся и врага́ зло́бу сокруши́вше.

Богоро́диченъ: Ядъ уше́съ прама́тере Евы Гавріи́лъ, Тебѣ́ провозглаша́я, — ра́дуйся, — вои́стинну оттрясе́, Влады́чице: еди́на бо Ты́ Посѣка́теля зло́бы змíевы па́че ума́ же и сло́ва родила́ еси́.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Прему́дростію слове́съ боже́ственныхъ нему́дрыя обличи́лъ еси́ и терза́нія плотска́я крѣ́постію ду́ха претерпѣ́лъ еси́, Про́кле всеблаже́нне, му́чениче богодохнове́нне.

Распя́ту тебѣ́ бы́вшу, неми́лостивно повелѣ́ дра́ти тя́ безу́мный, къ Бо́гу душе́вныя о́чи простира́юща и терпѣ́ніемъ ти́ удобря́ема.

Сокруше́ніе удо́въ му́жески претерпѣ́лъ еси́, прему́дре, кро́вію же разжже́ніе безбо́жія погаси́лъ еси́, Про́кле, укрѣпля́емь Боже́ственною благода́тію.

Богоро́диченъ: Разрѣши́, Дѣ́во, соу́зъ зо́лъ мои́хъ, сосвяза́ющи мя́ любви́ изъ Тебе́ рожде́ннаго Сло́ва, Всенепоро́чная, и спаси́ мя, Влады́чице, моли́твами Твои́ми.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Послѣ́дова твои́мъ словесе́мъ ве́щи тве́рдостное, и́бо кровоя́децъ возбраня́ше идти́ къ пре́днимъ, до́ндеже Христа́, всѣ́хъ еди́наго Го́спода, исповѣ́далъ еси́, Про́кле, Бо́га пресу́щна.

Непобѣди́мымъ дерзнове́ніемъ и до́блимъ умо́мъ, страстоте́рпче Про́кле, ста́лъ еси́ предъ суди́щемъ, воплоще́ніе велегла́сно проповѣ́дуя излія́вшаго Себе́ да́же до ра́біяго о́браза, Изба́вителя на́шего.

Безсту́дно у́бо гони́тель мудреце́мъ пока́зоваше му́къ ви́ды и ну́жднѣйшую сме́рть, непобѣди́мыя же ви́дя, дивля́шеся и, побѣжде́ніе зря́ свое́, не домышля́шеся.

Богоро́диченъ: Сокруше́нное преступле́ніемъ ру́къ Твои́хъ творе́ніе ущедря́я, Сло́ве, въ ложесна́ Неискусобра́чныя все́лься, и во двою́ существу́ прише́лъ еси́, нетлѣ́нія обновля́я пути́ вѣ́дущимъ Тя́.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ты́, Го́споди, крѣ́пость му́чениковъ и утвержде́ніе, Ты́, Свя́те, святы́хъ, непоколеби́мая стѣно́ стра́ждущихъ усе́рдно.

Жела́ніемъ боже́ственнымъ ду́шу опаля́я, терпѣ́лъ еси́, свѣща́ми опаля́емь, Про́кле преблаже́нне досточу́дне.

Огня́ то́чію ужаса́юся вѣ́чнаго, — взыва́лъ еси́, опаля́емь, му́чениче Про́кле, повелѣ́ніи мучи́теля и во́лею умерщвля́емь.

Богоро́диченъ: Кто́ мо́жетъ сказа́ти Твое́ та́инство, о Влады́чице Богоро́дице! Зижди́теля бо всѣ́хъ несказа́нно воплоти́ла еси́.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Ни о́гнь, ниже́ ра́ны, ни звѣ́ріе, ниже́ сме́ртное искуше́ніе, до́бліи, ва́съ разлучи́ти Бо́жія чи́стыя и непоро́чныя любве́ возмого́ша.

Зако́номъ хва́льнымъ не порабо́таетъ му́ченикъ вои́стинну до кро́ве му́жество, еди́нъ си́хъ сла́вяй Госпо́дь велича́етъ я́ко уго́дники.

Благопла́вно пучи́ну преше́дше лю́тыхъ му́къ, устреми́стеся къ боже́ственному приста́нищу, е́же о Христѣ́, страстоте́рпцы му́ченицы, присносу́щнаго наслажде́нія.

Богоро́диченъ: Се́, Дѣ́ва, — Иса́ія вопія́ше дре́вле, — Совѣ́та Ангела Вели́каго ражда́етъ, Емману́ила, Бо́га и Го́спода, и Спа́са ду́шъ на́шихъ.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Ила́рія, вѣ́рніи, и сла́внаго Про́кла, страда́вшія тве́рдо и врага́ низложи́вшія, согла́сно почти́мъ, Христа́ велича́юще: сíя бо чудесы́ страсте́й мглу́ отго́нятъ, просвѣща́юща вѣ́рою къ ни́ми притека́ющія.

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ и сло́ва, непреста́нно моли́ о воспѣва́ющихъ Тя́, пода́ти оставле́ніе грѣхо́въ на́шихъ всѣ́хъ и исправле́ніе житія́, вѣ́рою и любо́вію при́сно сла́вящимъ Тя́.

Крестобогоро́диченъ:

Зря́щи Тя́, Христе́, Всенепоро́чная Ма́ти ме́ртва на Крестѣ́ просте́рта, вопія́ше: Сы́не Мо́й, собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Тѣлеса́ ра́намъ преда́вше, любо́вію вопло́щшагося Сло́ва, му́ченицы, отъ Сего́ вѣне́цъ пра́вды прія́сте въ лѣ́поту.

Свѣ́томъ Боже́ственнымъ у́мъ просвѣ́щше, вѣ́рою муче́нія тму́ претеко́сте, вопію́ще, прехва́льніи: оте́цъ на́шихъ Бо́же, благослове́нъ еси́.

Тече́ніемъ твои́хъ усте́нъ медото́чныхъ слове́съ, преблаже́нне Про́кле, я́ко боже́ственнымъ исцѣле́ніемъ напоя́еши пою́щія: оте́цъ на́шихъ Бо́же, благослове́нъ еси́.

Си́лою Боже́ственною у́мъ укрѣ́пль, му́къ го́рькія ви́ды претерпѣ́лъ еси́, зовы́й, Ила́ріе: оте́цъ на́шихъ Бо́же, благослове́нъ еси́.

Богоро́диченъ: Яко вы́шши всѣ́хъ тва́рей, ражда́еши всѣ́хъ Зижди́теля, пребы́вши Дѣ́вою, Нескве́рная, Благослове́нная, еди́на при́сно Препросла́вленная.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

По мно́гихъ му́кахъ стрѣля́нію свирѣ́пый вра́гъ тя́ предае́тъ, отъ ни́хже ссѣца́емь, всехва́льный Про́кле, ра́дуяся, въ ру́цѣ Бо́жіи пре́далъ еси́ ду́хъ тво́й.

Уязви́ся честно́е тѣ́ло твое́ непреста́нными стрѣля́ніи, свя́те, и неисцѣ́льно уязви́ враги́ безпло́тныя, не пою́щія: благослови́те, вся́ дѣла́ Госпо́дня, Го́спода.

Просвѣща́емь заре́ю благода́ти, я́коже ка́мень, на земли́ валя́емь, сокруши́лъ еси́, Ила́ріе, утвержде́ніе пре́лести, поя́ въ крѣ́пости: благослови́те, вся́ дѣла́ Госпо́дня, Го́спода.

Ка́пли крове́й твои́хъ, поте́кше, нече́стія о́гнь угаси́ша, вѣ́рныя же напои́ша, пою́щія непреста́нно: благослови́те, вся́ дѣла́ Госпо́дня, Го́спода.

Богоро́диченъ: Вопло́щся отъ чи́стыхъ крове́й Твои́хъ, Бо́гъ, сотвори́вый и созда́вый мя́, Богороди́тельнице Влады́чице, обнови́ мíръ, вопію́щій: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Се́ свѣтоза́рная, и свяще́нная, и благонаро́читая му́ченикъ па́мять возсія́, всю́ зе́млю просвѣща́ющи, мра́къ зло́бы отъе́млющи, и о́блакъ душа́мъ отгоня́ющи, и исцѣле́ній благода́ть точа́щи.

Якоже два́ сосца́ духо́вна, пролива́юща исцѣле́ній млеко́, му́ченицы, вся́ка напитава́ете сердца́, го́ресть неду́говъ отгоня́ще и стра́сти лю́тыя исцѣля́юще. Тѣ́мже досто́йно блажи́ми есте́.

Ка́плями крове́й свяще́нныхъ омочи́вше багряни́цу, пресла́вніи, и сію́ красно́ нося́ще, со Христо́мъ ца́рствуете всегда́, еди́нѣмъ Царе́мъ и Бо́гомъ на́шимъ, о мíрѣ моля́щеся.

Земля́ благослови́ся ва́шими кровьми́ и моще́й положе́ніемъ, перворо́дныхъ Це́рковь Ду́хомъ боже́ственнѣ свѣтлѣ́ется, въ не́йже съ му́ченики, я́ко му́ченицы, о мíрѣ моли́теся.

Богоро́диченъ: Свѣ́та жили́ще, Чи́стая, Твое́, Пречи́стая, бы́сть чре́во, Влады́чице, Тебе́ ра́ди Явльшагося въ ве́щи зри́мѣ тѣле́снѣй и вся́ су́щія во тмѣ́ Просвѣ́щша. Тѣ́мже Тя́ вѣ́рою ублажа́емъ.

Стихи́ры Про́кла и Ила́рія три́, гла́съ 1:

Многови́дныя му́ки претерпѣ́вша,* свѣтови́дныя вѣнцы́ прія́ста вку́пѣ,* Ила́ріе и Про́кле.* Тѣ́мже ва́шу всепра́зднственную па́мять* вѣ́рно сотворя́емъ,* моля́щеся прилѣ́жно,* е́же моли́ти о всѣ́хъ на́съ.

Растерза́нія пло́ти твоея́,* Про́кле, претерпѣ́лъ еси́,* вѣ́чную сла́ву прозря́, блаже́нне,* и ра́йское пребыва́ніе,* и свѣ́тъ невече́рній,* въ не́мже сы́й, моли́* и на́мъ просвѣти́тися, пою́щимъ тя́.

Сла́ва:

Якоже два́ свѣти́ла,* мíръ просвѣща́ета чуде́съ луче́ю,* страстоте́рпца Госпо́дня, Ила́ріе и Про́кле,* омраче́ніе страсте́й отгоня́ща.* Тѣ́мже вы́ воспѣва́емъ ра́достно,* пра́зднующе па́мять ва́шу.

И ны́нѣ: Досто́йно е́сть...



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ, стихи́ры на 8, гла́съ 1:

О, ди́внаго чудесе́! Ка́ко усѣ́ченную за благоче́стіе ру́ку избра́нника Бо́жія Іоа́нна, предъ ико́ною Твое́ю сле́зно моли́вшагося, во еди́ну но́щь чуде́сно исцѣли́ла еси́, Влады́чице, соверше́нное здра́віе тому́ пода́вши, я́ко то́кмо зна́къ червле́ный, во свидѣ́тельство сего́ чудесе́, на мѣ́стѣ усѣче́нія оста́ся. [Два́жды.]

Кто́ возглаго́летъ си́лы Твоя́, Влады́чице? Или́ кто́ исповѣ́сть вели́чіе чудесе́ Твоего́, е́же показа́ла еси́ во исцѣле́ніи десни́цы Іоа́нна преподо́бнаго, и́же, въ благода́рность за исцѣле́ніе, и въ па́мять бы́вшаго чудесе́, къ изображе́нію Твоему́ тре́тію сре́бряну руку́ приложи́, и сего́ ра́ди ико́на сія́ Троеру́чица нарече́ся, та́йну Святы́я Тро́ицы собо́ю образу́ющая.

Ко́ль ве́лія благода́ть си́лы Твоея́, ю́же отъ Бо́га прія́ла еси́, Влады́чице! Яко не то́кмо разли́чныя неду́ги врачу́еши, съ вѣ́рою Тя́ призыва́ющихъ, но и чуде́снѣйшая твори́ши: усѣ́ченную бо ру́ку Іоа́нна преподо́бнаго, къ соста́ву ея́ приложе́нную, ди́вно въ со́ннѣмъ видѣ́ніи исцѣли́ла еси́, и да́ръ витíйства духо́внаго тому́ дарова́ла еси́, я́ко Ма́ти Царя́ Всемогу́щаго.

Ины стихи́ры, гла́съ 3:

Пе́рвѣе оби́тель преподо́бнаго Са́ввы, и́же въ Палести́нѣ, украша́вшую, Троеру́чную Твою́, Богома́ти, ико́ну благоволи́ла еси́ вда́ти святи́телю Са́ввѣ, ю́же о́нъ во оте́чество свое́, страну́ Се́рбскую принесе́, я́ко да́ръ освяще́нъ, идѣ́же чудесы́ мно́гими ту́ просла́вила еси́, дарова́вши е́ю больны́мъ исцѣле́ніе, и въ бѣда́хъ разли́чныхъ ско́рое всепоможе́ніе. [Два́жды.]

Cтрану́ Се́рбскую Троеру́чною ико́ною Твое́ю освяти́вши, и мно́гія лю́ди къ покая́нію приве́дши, восхотѣ́ла еси́, Влады́чице, всегда́шнее е́й пребыва́ніе во Аѳо́нѣ устро́ити. Сего́ ра́ди повелѣ́ла еси́ на безслове́сное осля́ ю́ положи́ти, и безъ вожа́таго е́ пусти́ти, води́тельству Боже́ственнаго промышле́нія поручи́вши.

Ка́ко не диви́мся дѣ́йствію си́лы Твоея́, Влады́чице, я́ко безслове́сное осля́ во́ли Твое́й чуде́сно повину́ся, и ико́ну Твою́ Троеру́чную изъ Се́рбіи во Аѳо́нъ принесе́ ко врато́мъ оби́тели Хиланда́рскія, идѣ́же, промышле́ніемъ Твои́мъ, до ны́нѣ сохра́нно пребыва́етъ дѣ́йствующи зна́менія и чудеса́ пресла́вная, во спасе́ніе ду́шъ на́шихъ.

Сла́ва, и ны́нѣ, гла́съ 1:

Та́йну Пресвяты́я Тро́ицы образу́ющую, и благода́ти Тоя́ прича́стную Твою́ Богома́ти ико́ну, поклоне́ніемъ почита́юще, и [Тя́,] Пречи́стая прославля́емъ, я́ко Таи́нницу воплоще́нія Бо́га Сло́ва, Его́же моли́ о спасе́ніи ду́шъ на́шихъ.

Вхо́дъ. Проки́менъ дне́. [И чте́нія три́:

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.]

На литíи стихи́ры, гла́съ 4:

Приспѣ́ ны́нѣ де́нь свѣ́тлаго торжества́, пра́здникъ Троеру́чныя ико́ны Богома́тере: пріиди́те у́бо, и́ноковъ ли́цы и правосла́вныхъ совокупле́нія, духо́вно да торжеству́емъ, и Приснодѣ́вѣ уми́льно возопіе́мъ: спаса́й на́съ, Влады́чице, отъ вся́каго зла́ те́плыми Твои́ми къ Бо́гу моли́твами.

Гла́съ 1:

Всѣ́хъ святы́хъ Святѣ́йшая, и вся́кія тва́ри Честнѣ́йшая Богоро́дице Дѣ́во, мíра Влады́чице, спаси́ на́съ, пра́зднство Троеру́чныя ико́ны Твоея́ соверша́ющія, и отъ всѣ́хъ бѣ́дъ свободи́ Ма́терними Твои́ми къ Сы́ну моли́твами.

Вси́ чи́стою со́вѣстію ико́нѣ Богома́тере припаде́мъ, вопію́ще отъ среды́ серде́чныя: Влады́чице Пресвята́я, спаси́ вся́ на́съ отъ гнѣ́ва и озлобле́нія, бѣ́дъ и паде́жей, я́ко Тебе́ стяжа́хомъ стѣ́ну и утвержде́ніе, Ты́ бо Троеру́чною Твое́ю ико́ною при́сно на́мъ помога́еши.

Побо́рниковъ правосла́вія при́сная Защи́тница и Покрови́тельница еси́, Богома́ти Пречи́стая, тѣ́мже и усѣ́ченную ру́ку Іоа́нна преподо́бнаго, мно́го писа́вшую въ защище́ніе почита́нія святы́хъ ико́нъ, чуде́сно исцѣли́ла еси́, и въ трудѣ́хъ по́стническихъ тому́ пособи́ла еси́. Въ подо́бныхъ трудѣ́хъ и на́мъ помага́ти потщи́ся, мо́лимся, да Тя́ при́сно сла́вимъ наде́жду ду́шъ на́шихъ.

Сла́ва, и ны́нѣ, гла́съ 8:

О, Ма́ти Всеми́лостивая, оби́тели Хиланда́рскія блага́я Игу́менія, всего́ же Аѳо́на верхо́вная Прави́тельнице и и́ноковъ Наста́внице и Покрови́тельнице, пода́ждь на́мъ си́лу и произволе́ніе, вся́ находя́щія на ны́ ско́рби и напа́сти благоду́шно претерпѣва́ти, и по́двигъ и́ноческій богоуго́дно сконча́ти, да благонаде́жно въ страну́ небе́сную пре́йдемъ, и та́мо лицезрѣ́нія Твоего́ наслади́мся, е́же и лико́мъ а́нгельскимъ любе́зно и сла́достно е́сть.

На стихо́внѣ стихи́ры, гла́съ 2:

Егда́ и́ноцы оби́тели Хиланда́рскія несогла́сіемъ въ избра́ніи смуще́ни бы́ша, тогда́ Ты́, Влады́чице, умире́нія ра́ди о́нѣхъ, благоволи́ла еси́ Сама́ бы́ти въ оби́тели и́хъ Настоя́тельницею и о житіи́ и спасе́ніи и́хъ благо́ю Попечи́тельницею.

Сти́хъ: Слы́ши, Дщи́, и ви́ждь, и приклони́ у́хо Твое́.

Егда́ и́ноцы Хиланда́рстіи разногла́сіемъ во избра́ніи игу́мена смуща́хуся, тогда́ Ты́, Всеблага́я, еди́ному отъ ни́хъ возвѣсти́ла еси́ во́лю Твою́, да не избира́ютъ себѣ́ игу́мена, но Троеру́чную Твою́ ико́ну да имѣ́ютъ себѣ́ во игу́мена, благослове́ніе на вся́ послуша́нія отъ Нея́ пріе́млюще.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Егда́ бра́тія оби́тели Хиланда́рскія возвѣще́ннѣй Тобо́ю еди́ному отъ ни́хъ во́ли Твое́й не е́мляху вѣ́ры, тогда́ Ты́, Богома́ти, Троеру́чную Твою́ ико́ну трикра́тно на игу́менстѣмъ мѣ́стѣ чуде́снѣ поставля́ла еси́, увѣря́ющи си́мъ нело́жно бы́ти возвѣще́ніе.

Сла́ва, и ны́нѣ, гла́съ 8:

Тебѣ́ припа́даемъ, Госпоже́, Троеру́чнѣй ико́нѣ Твое́й покланя́ющеся и уми́льно вопіе́мъ: я́коже и́ноки оби́тели Хиланда́рскія ми́лостивно пріе́млеши, благослове́ніе и́мъ на свято́е послуша́ніе подаю́щи, та́ко и на́съ, пра́зднство о́браза Твоего́ соверша́ющія, благослови́, и пода́ждь на́мъ вся́, къ житію́ и спасе́нію потре́бная, вку́пѣ же и наслѣ́дники небе́снаго Ца́рствія на́съ содѣ́лай, всемо́щнымъ Твои́мъ къ Бо́гу хода́тайствомъ.

Тропа́рь ико́нѣ Троеру́чицѣ, гла́съ 4:

Троеру́чную Твою́, Богома́ти, ико́ну, треми́ изображе́нными на не́й рука́ми, та́йну Святы́я Тро́ицы образу́ющую, чудесы́ мно́гими просла́вила еси́. Тѣ́мже вопіе́мъ Ти́: я́коже дре́вле отсѣ́ченную ру́ку преподо́бнаго Іоа́нна Дамаскина́ исцѣли́ла еси́, та́ко и ны́нѣ душе́вныя и тѣле́сныя на́ша неду́ги исцѣли́, и отъ вся́кихъ бѣ́дъ изба́ви, да зове́мъ Ти́: ра́дуйся, Благода́тная, Троеру́чною ико́ною Твое́ю на́мъ помога́ющая. [Три́жды.]


НА УТРЕНИ,
[На Бо́гъ Госпо́дь: Тропа́рь Богоро́дицы, два́жды. Сла́ва, и ны́нѣ, то́йже.]

По 1-мъ стихосло́віи сѣда́ленъ, гла́съ 1:

Ангелъ мно́жество на небеси́ Тебѣ́ Цари́цѣ слу́жатъ, мы́ же грѣ́шніи на земли́, предстоя́ще святѣ́й Троеру́чнѣй ико́нѣ Твое́й, велича́емъ Тя́, возвели́чившую ро́дъ на́шъ.

Сла́ва, и ны́нѣ, гла́съ 8:

Къ Тебѣ́, Пречи́стая, усе́рдно прибѣга́емъ, и предъ Троеру́чною Твое́ю ико́ною припа́дающе, по́мощи про́симъ: помози́ на́мъ настоя́щее вре́мя житія́ на́шего въ ми́рѣ и покая́ніи сконча́ти, и въ Ца́рствіе небе́сное невозбра́нный вхо́дъ получи́ти.

По 2-мъ стихосло́віи сѣда́ленъ, гла́съ 3:

Пѣ́сни благода́рственныя прино́симъ Ти́, Ма́ти Бо́жія, я́ко благоволи́ла еси́ Троеру́чною Твое́ю ико́ною съ на́ми пребыва́ти и благода́тію Ро́ждшагося отъ Тебе́ отъ вся́кихъ бѣ́дъ и прило́га чужда́го при́сно на́съ избавля́ти.

Сла́ва, и ны́нѣ, гла́съ 6:

Яко звѣзда́ многосвѣ́тлая ико́на Твоя́, Богоро́дице Дѣ́во, просвѣща́етъ на́съ благода́тію чуде́съ, и созыва́етъ дне́сь сла́вити и воспѣва́ти многопѣ́тое Твое́ и́мя, е́же лю́бящимъ Тя́ сла́дко и любе́зно е́сть. Тѣ́мже мо́лимъ Тя́, о Госпоже́ Пресвята́я: не оста́ви на́съ Твои́мъ заступле́ніемъ во вся́, па́че же въ ча́съ кончи́ны житія́ на́шего.

Поліеле́й.

Велича́ніе: Велича́емъ Тя́, Пресвята́я Дѣ́во, богоизбра́нная Отрокови́це, и чте́мъ Троеру́чный о́бразъ Тво́й, и́мже то́чиши исцѣле́нія, всѣ́мъ съ вѣ́рою притека́ющимъ.

Псало́мъ избра́нный: Помяни́, Го́споди, Дави́да, и всю́ кро́тость его́...

По поліеле́и сѣда́ленъ, гла́съ 2:

Пріиди́те, вѣ́рніи, духо́вно псало́мски да торжеству́емъ: приспѣ́ бо де́нь пра́зднства Троеру́чныя и многочуде́сныя ико́ны Богома́тере. Тѣ́мже ра́достно Ей возопіе́мъ: ра́дуйся, Еди́наго отъ Тро́ицы Христа́ Жизнода́вца пло́тію ро́ждшая; радуйся, на руку́ Твое́ю нетру́дно носи́вшая всю́ тва́рь Содержа́щаго, и стра́стію кре́стною ро́дъ человѣ́ческій отъ рабо́ты вра́жія Изба́вльшаго.

Сла́ва, и ны́нѣ, гла́съ то́йже:

О, Всепѣ́тая Ма́ти Дѣ́во, приклони́ся ми́лостивно къ моли́твамъ на́шимъ, предъ Пречи́стымъ Твои́мъ о́бразомъ приноси́мымъ дне́сь: покры́й на́съ Ма́тернимъ Твои́мъ покро́вомъ отъ вся́каго зла́, и защити́ отъ искуше́ній вра́жіихъ, да вси́ непреста́нно Тя́ велича́емъ.

Та́же степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Отры́гну се́рдце мое́ сло́во бла́го, глаго́лю а́зъ дѣла́ моя́ Царе́ви. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́ стихи́ра, гла́съ 6:

Егда́ Троеру́чный о́бразъ Тво́й на осля́ти чуде́сно во Аѳо́нъ принесе́нъ бы́сть ко врато́мъ оби́тели Хиланда́рскія, тогда́ и́ноцы въ срѣ́теніе того́ ра́достно изыдо́ша и боголѣ́пно въ собо́рный хра́мъ внесо́ша, воспѣва́юще вели́чія Твоя́, Богоневѣ́сто.

Кано́нъ Богоро́дицѣ на 14 [ирмосы́ по два́жды, тропари́ на 12], гла́съ 8:

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Проро́ческому пѣ́нію подража́ти хотя́, молю́ Тя́, Пречи́стая: пода́ждь ми́ ра́зумъ, да воспою́ Троеру́чныя ико́ны Твоея́ свѣ́тлое торжество́, во сла́ву Ро́ждшагося отъ Тебе́, и вку́пѣ съ Тобо́ю изображе́ннаго Христа́ Бо́га на́шего.

Проро́къ и богови́децъ Моисе́й, въ купинѣ́ пла́меннѣй Бо́га узрѣ́вый, и въ Чермнѣ́мъ мо́ри та́йну безсѣ́меннаго рождества́ и приснодѣ́вства Твоего́ усмотрѣ́вый, та́йно на́съ науча́етъ хвале́бную пѣ́снь Ро́ждшемуся отъ Тебе́ воспѣва́ти.

Проро́ческая рече́нія я́вѣ на Тебѣ́ сбы́шася, Пречи́стая: Ты́ бо Бо́га Сло́ва безсѣ́менно родила́ еси́, пребы́вши Дѣ́вою и по рождествѣ́ нетлѣ́ннѣмъ, и на́съ у́бо въ цѣлому́дріи и чистотѣ́ сохрани́, усе́рдно мо́лимся.

Проро́чески лани́ты слеза́ми омоча́я, взыва́емъ Ти́, Пресвята́я: пода́ждь на́мъ грѣхо́въ оставле́ніе и тѣ́ла здра́віе, и вся́ къ житію́ потре́бная, да возмо́жемъ ве́село пра́здновати Троеру́чныя Твоея́ ико́ны Боже́ственное прославле́ніе.

Проро́ковъ и апо́столовъ Ты́ еси́ похвала́, Пречи́стая, и всего́ человѣ́ческаго ро́да удобре́ніе: тѣ́мже пода́ждь и на́мъ Твои́мъ празднолю́бцемъ, до́брѣ и богоуго́днѣ житіе́ сіе́ сконча́ти, и Ца́рствіе небе́сное со всѣ́ми святы́ми наслѣ́довати.

Проро́ческимъ рече́ніямъ послѣ́дующе, сви́токъ чи́стъ имену́емъ Тя́, Дѣ́во, въ не́мже пе́рстомъ Отчимъ написа́ся Сло́во, отъ Тебе́ вопло́щшееся: Его́же моли́ въ кни́зѣ живо́тнѣй на́съ написа́ти, да Тя́ любо́вію прославля́емъ, Троеру́чнѣй ико́нѣ Твое́й покланя́ющеся.

Катава́сія: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Уподо́бльшася мя́ дѣ́лы неподо́бными ското́мъ безсмы́сленнымъ, па́ки возведи́ на первообра́зное досто́инство, Преблага́я Влады́чице, благода́тію Троеру́чнаго Твоего́ о́браза озари́вши.

Уподо́бися свята́я ико́на Твоя́, Влады́чице, купѣ́ли Силоа́мстѣй, па́че же и превзы́де ю́: та́ бо еди́ною въ лѣ́то еди́наго неду́жнаго исцѣлева́ше, сія́ же при́сно душе́вныя и тѣле́сныя неду́ги исцѣлева́етъ, притека́ющихъ къ не́й съ вѣ́рою.

Подо́бно блу́дному сы́ну злѣ́ расточи́хъ бога́тство души́ моея́, но къ Тебѣ́, Пречи́стая, предъ Троеру́чною Твое́ю ико́ною смире́нно молю́ся: помози́ мнѣ́ па́ки расточе́нное собра́ти, и благода́тно обогати́[ти]ся.

Подо́біе исцѣле́нныя Тобо́ю руки́ своея́ содѣ́лавъ уго́дникъ Тво́й Іоа́ннъ, къ ико́нѣ Твое́й, Влады́чице, приложи́, да не забве́на бу́детъ па́мять сего́ чудесе́, за е́же вси́ вѣ́рніи Тя́ прославля́ютъ.

Подо́бнѣ свято́му Іоа́нну и мы́, грѣ́шніи, взыва́емъ Ти́, Пречи́стая: исцѣли́ я́звы ду́шъ и тѣле́съ на́шихъ многомо́щною Твое́ю къ Бо́гу моли́твою, да непоколеби́ми пребу́демъ отъ всѣ́хъ навѣ́тъ вра́жіихъ, въ правосла́віи и благоче́стіи крѣ́пко утвержда́ющеся.

Подоба́ше Тебѣ́, я́ко Ма́тери Царя́ всемогу́щаго, не то́кмо на небеси́, но и на земли́ отъ всѣ́хъ христіа́нскихъ родо́въ просла́вленнѣй бы́ти. Сего́ ра́ди чуде́съ Творе́цъ и въ Троеру́чнѣй Твое́й ико́нѣ Тя́ Засту́пницу на́шу ди́вно просла́ви.

Катава́сія: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Сѣда́ленъ, гла́съ 3:

Троеру́чнымъ Твои́мъ о́бразомъ благоволи́ла еси́, Богома́ти, въ оби́тели Хиланда́рстѣй Игу́меніею бы́ти, и всея́ горы́ Аѳо́нскія верхо́вною Прави́тельницею нарещи́ся. Сего́ ра́ди мо́лимъ Тя́, Пречи́стая: не лиши́ Ма́терняго Твоего́ попече́нія и на́съ, соверша́ющія дне́сь сея́ ико́ны свѣ́тлое торжество́, да Тя́ при́сно въ пѣ́снехъ велича́емъ.

Сла́ва, и ны́нѣ, то́йже.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Богоно́сный Іоа́ннъ Дамаски́нъ, Тобо́ю, Влады́чице, чуде́сно исцѣле́нный, Ду́хомъ Святы́мъ просвѣти́вся, счи́ни мно́гая похва́льная Тебѣ́ пѣснопѣ́нія и предъ Троеру́чною Твое́ю ико́ною до конца́ живота́ своего́ Ро́ждшемуся отъ Тебе́ Христу́ Бо́гу воспѣва́ше: сла́ва си́лѣ Твое́й, Го́споди.

Богоно́снаго Са́ввы оби́тель Троеру́чною ико́ною многолѣ́тно украша́шеся, и по́мощію Твое́ю, Влады́чице, отъ всѣ́хъ ско́рбныхъ обстоя́ній мно́гажды избавля́шеся. Тѣ́мже и Ро́ждшемуся отъ Тебе́ взыва́ше: сла́ва си́лѣ Твое́й, Го́споди.

Богоно́сніи отцы́ оби́тели Са́ввы Освяще́ннаго, изволе́ніемъ Твои́мъ, Влады́чице, Троеру́чную Твою́ ико́ну вда́ше на благослове́ніе святи́телю се́рбскому Са́ввѣ. Иже, путеше́ствуя съ не́ю по мо́рю и су́ши, взыва́ше Просла́вльшему Тя́: сла́ва си́лѣ Твое́й, Го́споди.

Богоно́снаго Са́ввы па́ства, прія́вши Троеру́чную Твою́, Богома́ти, ико́ну, я́ко драго́е сокро́вище, и сподо́бльшеся отъ нея́ благода́тныхъ дарова́ній и чуде́сныхъ исцѣле́ній, взыва́ше: сла́ва си́лѣ Твое́й, Го́споди.

Богоно́сніи Твои́ ру́цѣ простри́, Влады́чице, ко Христу́ Бо́гу на́шему, и умоли́ Его́ изба́вити отъ паде́ній грѣхо́вныхъ и вся́каго зла́ соверша́ющихъ пра́зднство Троеру́чнаго о́браза Твоего́, да зове́мъ вси́ къ Держи́мому на объя́тіяхъ Твои́хъ: сла́ва си́лѣ Твое́й, Го́споди.

Богоно́сныхъ муже́й послѣ́дующе рече́ніемъ, Богоро́дицу и Приснодѣ́ву Тя́ имену́емъ, Пречи́стая, и въ Троеру́чнѣй Твое́й ико́нѣ вѣ́рно Тя́ почита́юще, Тро́ицѣ Пребоже́ственнѣй вопіе́мъ: сла́ва си́лѣ Твое́й, Го́споди.

Катава́сія: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Утренюетъ ду́хъ на́шъ къ Тебѣ́, Влады́чице, зане́ Троеру́чныя Твоея́ ико́ны пра́зднство сотворя́емъ и вопіе́мъ: озари́ у́мъ на́шъ, Богома́ти, благода́тію отъ Тебе́ возсія́вшаго Свѣ́та, и наста́ви на́съ на стезю́ жи́зни.

Утренюютъ предъ Пречи́стымъ Твои́мъ о́бразомъ, Влады́чице, вси́ боля́щіи и скорбя́щіи, и пріе́млютъ благовре́менну по́мощь: сея́ у́бо не лиши́ и на́съ, моля́щихся Тебѣ́, и наста́ви на стезю́ жи́зни.

Утра свѣтлѣ́йшій е́сть о́бразъ Тво́й, Влады́чице, трема́ рука́ма, на не́мъ зри́мыми, та́йну Святы́я Тро́ицы изобразу́ющій, ду́ши же и тѣлеса́ Боже́ственною благода́тію врачу́ющій и просвѣща́ющій. Сего́ ра́ди любе́зно тому́ вси́ покланя́емся.

Утренюютъ, Богома́ти, предъ Троеру́чнымъ Твои́мъ о́бразомъ и́ноцы оби́тели Хиланда́рскія, пріе́млюще отъ него́, я́ко отъ игу́мена благослове́ніе на дневны́я послуша́нія: и на́съ у́бо, Пречи́стая, благослови́, и си́лы на́ша укрѣпи́, е́же твори́ти дѣла́ на́ша во сла́ву Бо́жію.

Утру свѣ́тлаго дне́, разгоня́ющему тму́ нощну́ю, подо́бна е́сть Троеру́чная Твоя́ ико́на, Влады́чице Богоро́дице, разгоня́ющая мра́къ скорбе́й и печа́лей, притека́ющихъ къ не́й съ вѣ́рою, и предъ не́ю моля́щихся Тебѣ́: у́бо и на́шъ грѣхо́вный мра́къ разжени́, Пречи́стая, и наста́ви на стезю́ жи́зни.

Утро просвѣти́вый сія́ніемъ со́лнечнымъ, Зижди́тель тва́ри, и во утро́бѣ Твое́й, Пречи́стая, пло́ть Себѣ́ Созда́вый, То́й ико́ну Твою́ Троеру́чную чудесы́ ди́вными просла́ви, дарова́въ ю́ на́мъ цѣле́бъ исто́чникъ, и въ ну́ждахъ благовре́менну по́мощь: сего́ ра́ди любе́зно сію́ почита́емъ.

Катава́сія: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Превзыдо́ша главу́ мою́ беззако́нія моя́, но къ кому́ прибѣ́гну въ бѣ́дствіи мое́мъ, то́кмо къ Тебѣ́, Пречи́стая. Ты́ мя́ возведи́ изъ ро́ва зо́лъ мои́хъ, и поста́ви на тве́рдѣмъ вѣ́ры ка́мени стопы́ моя́, да ктому́ не подви́жуся, и Тобо́ю спа́сся, просла́влю мно́гую и неизрече́нную Твою́ ко мнѣ́ ми́лость.

Превзыдо́ша мно́гія Твоя́ къ на́мъ щедро́ты, Дѣ́во, мно́гая на́ша беззако́нія: Ты́ бо, не помяну́вши на́ша непра́вды, Троеру́чную Твою́ ико́ну на́мъ дарова́ла еси́ въ по́мощь и защище́ніе отъ всѣ́хъ находя́щихъ на ны́ зо́лъ. Сего́ ра́ди Тебѣ́ предъ то́ю смире́нно и благода́рно покланя́емся.

Превзы́де и препобѣди́ мно́гое Твое́, Богома́ти, милосе́рдіе мно́гое мірско́е нече́стіе: и́бо мно́зи грѣ́шницы Твои́мъ къ Бо́гу хода́тайствомъ изъ нече́стія во благоче́стіе преложи́шася, и спасе́ни бы́ша. Тѣ́мже спаси́ и на́съ, покланя́ющихся Троеру́чному о́бразу Твоему́.

Превозшла́ еси́, Пречи́стая, вся́ у́мная созда́нія святы́нею и чистото́ю, и сего́ ра́ди сподо́билася еси́ бы́ти Ма́терію Сы́на Бо́жія, Иже ико́ну Твою́ Троеру́чную, я́коже и и́ны мно́гія просла́ви ди́вными чудесы́, во спасе́ніе и избавле́ніе на́ше содѣва́емыми.

Превозшла́ еси́ уста́вы естества́, Пречи́стая, безсѣ́менно Бо́га Сло́ва ро́ждши, тѣ́мже и свята́я ико́на Твоя́ па́че естества́ чудодѣ́йствуетъ, источа́ющи здра́віе душа́мъ и тѣлесе́мъ на́шимъ.

Превзы́де сла́ва Твоя́, Богома́ти, вся́ ри́торская благохвале́нія, зане́ безчи́сленна су́ть чудеса́ отъ святы́хъ Твои́хъ ико́нъ, во спасе́ніе на́ше содѣва́емая. Сего́ ра́ди Троеру́чнѣй Твое́й ико́нѣ свѣ́тлое пра́зднство соверша́емъ, и ве́село взыва́емъ: ра́дуйся, Дѣ́во, христіа́нъ похвало́.

Катава́сія: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Конда́къ, гла́съ 8:

Аще и на безслове́снѣмъ осля́ти Троеру́чная Твоя́ ико́на во Аѳо́нъ принесе́ся, но то́ю въ оби́тели Хиланда́рстѣй же́злъ игу́менскій прія́ла еси́, тѣ́мже вси́ и́ноцы Святы́я горы́ верхо́вную Игу́менію свою́ Тя́ нарица́ютъ и приле́жно взыва́ютъ: спаси́ на́съ, Богома́ти, Ма́терними Твои́ми къ Бо́гу моли́твами.

Икосъ:

Іоа́нна преподо́бнаго исцѣле́ніе руки́, и́ноковъ же Хиланда́рскихъ прекраще́ніемъ несогла́сія обра́довала еси́, Влады́чице, тѣ́мже мо́лимъ Тя́, Всеблага́я: обра́дуй и на́съ, душе́вно и тѣле́сно стра́ждущія, и ми́ръ благода́тный пода́ждь на́мъ, да Тебѣ́ хвале́бно взыва́емъ: ра́дуйся, Цѣли́теля ду́шъ и тѣле́съ на́шихъ ро́ждшая; ра́дуйся, си́лу а́дову Рождество́мъ Твои́мъ попра́вшая; ра́дуйся, Еди́наго отъ Пресвяты́я Тро́ицы безсѣ́менно воплоти́вшая; ра́дуйся, пре́жде отринове́нное на́ше естество́ Бо́гу прибли́жившая; ра́дуйся, ико́нами Твои́ми при́сно на́мъ благодѣ́ющая; ра́дуйся, Троеру́чною Твое́ю ико́ною на́мъ помога́ющая; ра́дуйся, моли́твамъ на́шимъ вне́млющая; ра́дуйся, и спаси́ на́съ Ма́терними Твои́ми къ Бо́гу моли́твами.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Подража́тели и ревни́тели благоче́стія Іоа́нна преподо́бнаго сотвори́ ны́, Влады́чице, да съ ни́мъ и со о́троки, въ пещи́ Вавило́нстѣй за благоче́стіе подвиза́вшимся, всегда́ пое́мъ: благослове́нъ Бо́гъ оте́цъ на́шихъ.

Подража́тель тріе́хъ отроко́въ, по́мощію Твое́ю, Богома́ти, бы́сть святи́тель Са́вва, и́же пренесе́нію и прославле́нію Троеру́чныя Твоея́ ико́ны усе́рдно послужи́, и научи́ вопи́ти: благослове́нъ Бо́гъ оте́цъ на́шихъ.

Подража́юще блу́днаго сы́на, злѣ́ расточи́вшаго оте́ческое наслѣ́діе, и пока́явшеся, и мы́ зове́мъ Тебѣ́, Богоро́дице Дѣ́во, предъ Троеру́чнымъ Твои́мъ о́бразомъ: согрѣши́хомъ, беззако́новахомъ, непра́вдовахомъ; прости́ на́съ, Влады́чице, и вся́кія му́ки изба́ви, Сы́ну Твоему́ зову́щія: благослове́нъ Бо́гъ оте́цъ на́шихъ.

Подража́юще смире́нному мытаре́ву гла́су, взыва́емъ къ Тебѣ́, Влады́чице: ми́лостива на́мъ бу́ди и не отри́ни на́съ отъ лица́ Твоего́, но сподо́би Троеру́чному Твоему́ о́бразу любе́зно поклони́тися, и прису́щею тому́ Боже́ственною благода́тію освяти́тися.

Подража́тели бы́ти отце́мъ преподо́бнымъ, посто́мъ и моли́твою Бо́гу благоугоди́вшимъ, помози́ на́мъ, Влады́чице, да со о́нѣми Вопло́щшемуся отъ Тебе́, Еди́ному отъ Пребоже́ственныя Тро́ицы, со Отце́мъ и Ду́хомъ при́сно пое́мъ: благослове́нъ еси́, Бо́же оте́цъ на́шихъ.

Подража́тельница милосе́рдія Бо́жія су́щи, Пречи́стая Дѣ́во, на вся́ ро́ды христіа́нскія излива́еши милосе́рдіе Твое́, и Троеру́чною Твое́ю ико́ною мно́га благодѣя́нія подае́ши рабо́мъ. Сего́ ра́ди любо́вію сію́ честву́емъ, Тебе́ Саму́ю, на не́й изображе́нную почита́юще.

Катава́сія: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Въ пещи́ искуше́ній и бѣ́дъ су́щіи, къ Тебѣ́ же, Богома́ти, предъ Троеру́чною Твое́ю ико́ною припа́дающіи, ороше́ніе духо́вное пріе́млютъ, его́же не лиши́ и на́съ, со о́троки вседѣ́тельную прему́дрость Христа́ воспѣва́ющія: благослови́те вся́ дѣла́ Госпо́дня Госпо́да.

Пе́щь пла́мене по́хотнаго угаси́, Влады́чице, росо́ю моли́твъ Твои́хъ, да неопа́льни отъ него́ пребы́вше, Ро́ждшемуся отъ Тебе́ Спа́су ду́шъ на́шихъ воспое́мъ: благослови́те вся́ дѣла́ Госпо́дня Го́спода, и превозноси́те Его́ во вѣ́ки.

Въ пещи́ о́троки невреди́мы сохрани́вый, То́й и ложесна́ Твоя́ дѣ́вственная неврежде́нна сохрани́, безсѣ́менно отъ Тебе́, Пречи́стая, рожде́йся, и Тя́ Предста́тельницу на́шей ху́дости показа́. Тѣ́мже, Тобо́ю спаса́еми, Твоего́ Троеру́чнаго о́браза пра́здникъ соверша́юще, взыва́емъ: благослови́те вся́ дѣла́ Госпо́дня Госпо́да.

Пе́щи огня́ гее́нскаго въ бу́дущемъ вѣ́цѣ изба́ви на́съ, Влады́чице, съ любо́вію Троеру́чнаго о́браза Твоего́ торжество́ соверша́ющія, и Христу́ вопію́щія: благослови́те вся́ дѣла́ Госпо́дня Госпо́да.

Въ пещи́ искуше́ній и бѣ́дъ опаля́емыя ороси́, Богома́ти, струя́ми Твоего́ милосе́рдія, да посра́мятся врази́ на́ши, и да разумѣ́ютъ, я́ко Ты́ еди́на еси́ Помо́щница по все́й вселе́ннѣй, вопію́щимъ: благослови́те вся́ дѣла́ Госпо́дня Госпо́да.

Въ пещи́ Вавило́нстѣй, и въ пла́мени купины́ неопали́мыя преображе́нная, Пречи́стая Дѣ́во, росо́ю моли́твъ Твои́хъ изба́ви на́съ о́гненнаго запале́нія, мо́лніи же и гро́ма, и вся́кія ины́я бѣды́, да спа́сшеся Тобо́ю отъ всѣ́хъ си́хъ, благода́рственно воспое́мъ: благослове́нная Ты́ въ жена́хъ, Пречи́стая, и Пло́дъ чре́ва Твоего́ благослове́нъ.

Катава́сія: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Пѣ́снь 9.

Ирмо́съ: Велича́емъ Тя́, Всенепоро́чную Ма́терь Христа́ Бо́га на́шего, Юже осѣни́ Ду́хъ Святы́й.

Вопло́щшагося отъ Тебе́, и съ Тобо́ю на ико́нѣ изображе́ннаго Христа́ Бо́га на́шего, Пречи́стая Дѣ́во, моли́, плотски́хъ страсте́й на́съ изба́вити, я́ко да нескве́рнымъ се́рдцемъ и усты́, Тя́, Богоро́дице, велича́емъ.

Въ пло́ти мое́й ви́жду и́нъ зако́нъ, вою́ющь проти́ву зако́на ума́ моего́, и плѣня́ющь мя́. Тѣ́мже смире́нно къ Тебѣ́, Богома́ти, взыва́ю: ра́ди Троеру́чныя Твоея́ ико́ны, помози́ мнѣ́ побѣди́ти зако́нъ грѣхо́вный, и пло́ть порабо́тити ду́ху, да Тя́ непреста́нно велича́емъ.

Во пло́ти безпло́тныхъ житію́ подража́вшимъ, отце́мъ преподо́бнымъ, ревнова́ти помози́ ми, Влады́чице, сла́бую во́лю и немощно́е произволе́ніе мое́ на сіе́ укрѣпля́ющи, да Тя́, Помо́щницу мою́, при́сно велича́ю.

Пло́ть и мíръ презрѣ́вшія и во святы́й жре́бій Тво́й усе́рдно прише́дшія, не оста́ви, Влады́чице, Свои́мъ держа́внымъ покро́вомъ и заступле́ніемъ, но помози́ на́мъ крѣ́пко стоя́ти проти́ву неви́димаго бори́теля, и́щущаго поги́бели ду́шъ на́шихъ, да Тя́, Засту́пницу на́шу, при́сно велича́емъ.

Плотоуго́дія твори́ти въ по́хотехъ не попусти́ на́мъ, Богома́ти, но мѣ́рною стезе́ю воздержа́нія руководи́ на́съ къ Ца́рствію небе́сному, и та́мо сподо́би узрѣ́ти пресвѣ́тлое лице́ Твое́, Троеру́чный Тво́й о́бразъ ны́нѣ созерца́ющихъ, и любе́зно тому́ покланя́ющихся.

Плотска́го мудрова́нія бра́нь лю́тую отжени́ отъ насе́льниковъ земна́го жре́бія Твоего́, Пресвята́я Дѣ́во, и жи́знь на́шу въ ми́рѣ и тишинѣ́ упра́ви, подаю́щи вся́, я́же къ житію́ и спасе́нію потре́бная, да Тя́ при́сно велича́емъ.

Катава́сія: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Свѣти́ленъ:

Троеру́чныя Твоея́ ико́ны пра́зднество сотворя́юще, Богома́ти, смире́нно Тя́ мо́лимъ: тріе́хъ враго́въ, пло́ти, мíра и діа́вола изба́ви на́съ; вся́ бо Тебѣ́ возмо́жна су́ть, я́ко Ма́тери Царя́ Всемогу́щаго.

Сла́ва, и ны́нѣ:

Пріими́ моле́ніе на́ше, Пречи́стая Богоро́дице, сохрани́ и заступи́ отъ вся́каго зла́, и не отри́ни на́съ отъ Своего́ честна́го о́браза: Тя́ бо и́мамы Моли́твенницу те́плу, и Покро́въ неруши́мый, Святы́я же горы́ и оби́тели сея́ вели́кую Похвалу́ и Утвержде́ніе.

На хвали́техъ стихи́ры на [4], гла́съ 2:

Пріиди́те, лю́діе, духо́вно возвесели́мся: созва́ бо на́съ Свята́я Богоро́дица, Троеру́чныя Своея́ ико́ны пра́зднество сотвори́ти, и е́ю мно́гія ми́лости на́мъ яви́ти: боля́щимъ исцѣле́ніе пода́ти, немощны́мъ здра́віе дарова́ти, и вся́ я́же къ житію́ и спасе́нію поле́зная благовре́меннѣ устро́ити.

Пріиди́те, и́ноковъ ли́цы, духо́вно возвесели́мся о честнѣ́мъ пра́здницѣ Влады́чицы на́шея Богоро́дицы, благíя на́шея Засту́пницы: Она́ бо Троеру́чною Свое́ю ико́ною на́съ утѣша́етъ, и я́ко верхо́вная Игу́менія, о потре́бныхъ къ житію́ на́шему промышля́етъ, и спасе́ніе вѣ́чное на́мъ устроя́етъ.

Троеру́чнымъ Твои́мъ о́бразомъ, Влады́чице Богоро́дице, оби́тель Хиланда́рская хва́лится, иму́щи ту́(ю) во игу́мена, его́ ра́ди пріе́млетъ отъ Тебе́ вся́ блага́я. Иноцы же горы́ Аѳо́нскія, Твоего́ земна́го вертогра́да, прославля́ютъ Тя́, благу́ю Наде́жду христіа́нъ, и держа́вную Засту́пницу всѣ́хъ, съ вѣ́рою къ Тебѣ́ прибѣга́ющихъ.

Ка́ко Тя́ раби́ Твои́, Богоро́дице, досто́йно восхва́лимъ, я́ко Троеру́чною Твое́ю ико́ною, съ Предвѣ́чнымъ Младе́нцемъ, духо́вно на́съ весели́ши, и отъ всѣ́хъ бѣ́дъ ми́лостиво спаса́еши, и поле́зная на́мъ всегда́ да́руеши.

Сла́ва, и ны́нѣ, гла́съ 8:

Та́инство отъ вѣ́ка сокрове́нное, во́лею Бо́жіею прояви́вшая, и Еди́наго отъ Тро́ицы воплоти́вшая, Пречи́стая Дѣ́во, Троеру́чную Твою́ ико́ну горѣ́ Аѳо́нстѣй въ покро́въ и защище́ніе дарова́ла еси́, и подо́біями ея́ мно́гія страны́ правосла́вныя, гра́ды и оби́тели украси́ла, и тѣ́ми то́ки чуде́съ и исцѣле́ній излива́еши вѣ́рнымъ. Тѣ́мже благода́рственно и хвале́бно вопіе́мъ Ти́: ра́дуйся, непристу́пнаго Божества́ селе́ніе, и на́ше съ Бо́гомъ примире́ніе, и отъ всѣ́хъ бѣ́дъ избавле́ніе.

Славосло́віе вели́кое, [ектеніи́] и отпу́стъ.

Зна́менаются же бра́тія отъ іере́я святы́мъ еле́емъ, и пое́мъ стихи́ру самогла́сну пра́здника, ю́же хо́щетъ екклисіа́рхъ.


НА ЛИТУРГІИ,

Блаже́нна отъ кано́на, пѣ́снь 3-я и 6-я, на 8. На вхо́дѣ: Тропа́рь пра́здника. Сла́ва, и ны́нѣ, конда́къ. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ ко Евре́емъ, зача́ло 320. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе отъ Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.

Источникъ: Жички и Студенички минеј за јул. / [Приредио епископ жички Хрисостом]. — Краљево: Епархија Жичка: Манастир Жича: [Студеница]: Манастир Студеница, 2007. — Стр. 131-154.

/ Къ оглавленію раздѣла /


См. также сайтъ «Но́вый Се́рблякъ — богослуже́бныя послѣ́дованія святы́мъ Се́рбскаго ро́да».


Наверхъ / Къ титульной страницѣ

0