Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія во 12-й де́нь.
Святы́хъ му́ченикъ Про́кла и Ила́рія и преподо́бнаго отца́ на́шего Михаи́ла Малеина́.

[ВЕЧЕРЪ,
На Го́споди воззва́хъ:] стихи́ры, гла́съ 1. Подо́бенъ: Небе́сныхъ чино́въ.

Растерза́нія пло́ти твоея́,* Про́кле, претерпѣ́лъ еси́,* вѣ́чную сла́ву прозря́, блаже́нне,* и ра́йское пребыва́ніе,* и свѣ́тъ невече́рній,* въ не́мже сы́й, моли́* и на́мъ просвѣти́тися, пою́щимъ тя́.

Якоже два́ свѣти́ла,* мíръ просвѣща́ете чуде́съ луче́ю,* страстоте́рпцы Госпо́дни, Ила́ріе и Про́кле,* омраче́ніе страсте́й отгоня́ще.* Тѣ́мже ва́съ воспѣва́емъ ра́достно,* пра́зднующе па́мять ва́шу.

Ины стихи́ры преподо́бнаго, гла́съ 5. Подо́бенъ: Преподо́бне о́тче.

Преподо́бне о́тче,* отъ ю́ности равноа́нгельное облобыза́лъ еси́ житіе́* и, мíра кра́сная, я́ко уме́ты, вмѣни́въ* и я́ко сѣ́нь, сла́вы вре́менныя,* не су́щія, отбѣ́глъ еси́,* сла́вы боже́ственныя не забыва́я.* Ея́же ны́нѣ причаща́ешися,* отве́ргся у́зъ до́лу плотски́хъ,* и предстоя́ Свѣ́ту трисо́лнечному,* и насыща́яся Христо́ва свѣтоли́тія.* Того́ моли́, Тому́ моли́ся всегда́* дарова́ти Це́ркви единомы́сліе,* ми́ръ и ве́лію ми́лость.

Преподо́бне о́тче,* сія́ніе умиле́нія, свѣти́льниче су́щимъ во тмѣ́ отча́янія,* незаходи́мая денни́ца,* покая́нія у́гль пречестны́й,* добродѣ́телей боже́ственный би́серъ* и ми́лостыня, свѣ́щникъ вели́къ моли́твамъ,* си́рымъ предста́телю и вдови́цамъ,* зако́нное пра́вило Це́ркве* и дѣ́тельный свѣти́льникъ воздержа́нія,* Христа́ моли́, Христо́ви моли́ся всегда́* дарова́ти Це́ркви единомы́сліе,* ми́ръ и ве́лію ми́лость.

Преподо́бне о́тче,* освяти́лся еси́ пре́жде рожде́нія,* я́коже Іеремíя свяще́ннѣйшій:* тебе́ бо ро́ждшей* Госпо́дня Ма́ти прорече́ тя да́ти пло́дъ,* и́же и да́нъ бы́ти е́й отъ пеле́нъ,* и провозвѣсти́ я́вѣ.* И прія́тъ а́біе мы́слію пра́вою,* житія́ мяте́жъ бѣжа́ща тя́, богому́дре,* и безмо́лвное житіе́ возлюби́вша,* е́же и проше́лъ еси́.* Яко песо́къ, собо́ри единообра́зныхъ* насади́лъ еси́ при исхо́дищахъ во́дъ Бо́жія Ду́ха.

Сла́ва, гла́съ 6:

Преподо́бне о́тче Михаи́ле, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ. Де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

На дре́вѣ Живо́тъ на́шъ зря́щи, Всенепоро́чная Богоро́дице, ви́сящъ, ма́терски рыда́ющи, вопія́ше: Сы́не Мо́й и Бо́же Мо́й, спаси́ любо́вію пою́щія Тя́.

На стихо́внѣ окто́иха. Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Михаи́ле, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ и вра́жію обличи́вый си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́ми же моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ или крестобогоро́диченъ:

Юница нескве́рная,* Юнца́ ви́дящи на дре́вѣ* пригвожда́ема во́лею,* рыда́ющи жа́лостнѣ,* увы́ Мнѣ́, вопія́ше,* люби́мѣйшее Ча́до!* Что́ Ти со́нмъ воздаде́ безблагода́рный евре́йскій,* хотя́ Мя́ обезча́дствовати* отъ Тебе́, Вселюбе́зне?

Тропа́рь, гла́съ 8:

Въ тебѣ́, о́тче, извѣ́стно спасе́ся е́же по о́бразу: пріи́мъ бо кре́стъ, послѣ́довалъ еси́ Христу́ и, дѣ́я, учи́лъ еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй. Тѣ́мже и со а́нгелы сра́дуется, преподо́бне Михаи́ле, ду́хъ тво́й.


НА УТРЕНИ,
Еди́нъ кано́нъ окто́иха и святы́хъ два́, на 8.

Кано́нъ му́чениковъ. Творе́ніе Іо́сифово, гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Соедини́вшеся съ Бо́гомъ и боже́ственными заря́ми освѣща́еми при́сно, до́бліи страда́льцы, ду́шу мою́ просвѣти́те, пою́щу свѣтоно́сное и честно́е ва́ше страда́ніе умиле́ніемъ се́рдца, блаже́нніи.

Воспери́ ва́съ небе́сное жела́ніе, тѣ́мже вся́ кра́сная житія́, страда́льцы, вмѣни́сте уме́ты, манове́ньми къ Бо́гу обожи́вшеся и всю́ безбо́жную крѣ́пость смири́вше.

Огне́мъ Богонача́льныя вже́гшеся Тро́ицы, злоче́стія разжже́нія угаси́сте, му́дріи, кро́вными тече́ніи. Тѣ́мже исцѣле́ній чи́стыми одожде́ніи страсте́й на́шихъ скве́рну отмы́йте.

Безпеча́льную жи́знь, небе́сную сла́ву, ра́йское наслажде́ніе, свѣ́тъ мы́сленный, кра́сное ра́дованіе, му́ченицы, взыску́юще, лю́тая претерпѣ́сте треволне́нія до́блественнымъ умо́мъ.

Небе́сніи ли́цы ва́шему терпѣ́нію удиви́шася, му́дріи: біе́нія бо пло́ти, и многоплете́нныя му́ки, му́ченицы, доблему́дренно претерпѣ́сте, ра́дующеся и врага́ зло́бу сокруши́вше.

Богоро́диченъ: Ядъ уше́съ прама́тере Евы Гавріи́лъ, Тебѣ́ провозглаша́я, — ра́дуйся, — вои́стинну оттрясе́, Влады́чице: еди́на бо Ты́ Посѣка́теля зло́бы змíевы па́че ума́ же и сло́ва родила́ еси́.

Инъ кано́нъ преподо́бнаго, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Свѣтолу́чными мо́лніями Ду́ха освяща́емь и Того́ дохнове́ніемъ испо́лненъ, я́коже орга́нъ, преблаже́нне, оглаша́емь, души́ моея́ мра́къ отжени́ и пода́ждь ми́ сло́во по достоя́нію пѣ́ти тя́.

Роди́телей любве́ предпоче́лъ еси́ Содѣ́телеву, и теку́щаго житія́ — житіе́ равноа́нгельно, и мірскíя красоты́ — нетлѣ́нное вои́стинну украше́ніе всѣ́хъ Царя́, и́миже наслажда́ешися, ра́дуяся.

Восто́ка трисо́лнечнаго бы́лъ еси́ заря́ всесвѣ́тлая, трисія́ннымъ свѣ́томъ житія́ твоего́ земли́ все́ лице́ осія́ бога́тно и грѣха́ тму́, о́тче, разоря́я словесы́ твои́ми.

Богоро́диченъ: Клеща́, ю́же ви́дѣ Иса́ія Ду́хомъ, у́гль нося́щая, Ты́ издале́ча яви́лася еси́, у́гль Божества́ — Христа́ во чре́вѣ носи́вши, Пресвята́я неопа́льно и на объя́тіяхъ поноси́вши ма́ніемъ вся́ Нося́щаго.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Прему́дростію слове́съ боже́ственныхъ нему́дрыя обличи́лъ еси́ и терза́нія плотска́я крѣ́постію ду́ха претерпѣ́лъ еси́, Про́кле всеблаже́нне, му́чениче богодохнове́нне.

Распя́ту тебѣ́ бы́вшу, неми́лостивно повелѣ́ дра́ти тя́ безу́мный, къ Бо́гу душе́вныя о́чи простира́юща и терпѣ́ніемъ ти́ удобря́ема.

Сокруше́ніе удо́въ му́жески претерпѣ́лъ еси́, прему́дре, кро́вію же разжже́ніе безбо́жія погаси́лъ еси́, Про́кле, укрѣпля́емь Боже́ственною благода́тію.

Богоро́диченъ: Разрѣши́, Дѣ́во, соу́зъ зо́лъ мои́хъ, сосвяза́ющи мя́ любви́ изъ Тебе́ рожде́ннаго Сло́ва, Всенепоро́чная, и спаси́ мя, Влады́чице, моли́твами Твои́ми.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Возненави́дѣвъ отъ души́ сласте́й го́ресть и до́льнія возгнуша́вся сла́вы, мірска́го са́на во́лею по́ясъ отве́ргъ, су́щихъ на земли́ царе́й предпоче́тъ всѣ́хъ Царя́.

Отъ пеле́нъ освяще́нъ, отъ ложе́снъ избра́нъ яви́лся еси́: честнѣ́й бо ма́тери твое́й Ро́ждшая Христа́ обѣща́ да́ти тя́ и, я́ко освяще́нъ да́ръ, тя́ а́біе прія́тъ.

Мѵ́ромъ ты́ мы́сленнымъ ду́шу и у́мъ очи́стивъ и тѣ́ло а́лчбою истни́въ, всели́лъ еси́ Христа́, глаго́люща Сего́ имѣ́я въ себѣ́, и ходя́ща, и мíръ благоуха́юща.

Богоро́диченъ: Во утро́бѣ Твое́й, Чи́стая, Отцу́ сопресто́льное Сло́во все́лься, отъ чи́стыхъ Твои́хъ крове́й вопло́щся и ро́ждься, тва́рь очи́стивъ идолонеи́стовства кропле́ніемъ Своея́ кро́ве.

Конда́къ му́чениковъ, гла́съ 4. Подо́бенъ: Вознесы́йся.

Яко денни́ца звѣзда́, возсія́ му́чениковъ Про́кла и Ила́рія честно́е страда́ніе, предозаря́ющи на́съ чуде́съ свѣтлостьми́. Тѣ́мже пра́зднуемъ па́мять ва́шу: Христа́ Бо́га моли́те, да спасе́тъ ду́ши на́ша.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Ила́рія, вѣ́рніи, и сла́внаго Про́кла, страда́вшія тве́рдо и врага́ низложи́вшія, согла́сно почти́мъ, Христа́ велича́юще: сíи бо чудесы́ страсте́й мглу́ отго́нятъ, просвѣща́юще вѣ́рою къ ни́мъ притека́ющія.

Сла́ва, преподо́бнаго, гла́съ 8. Подо́бенъ: Прему́дрости.

Христо́въ а́гнецъ слове́сный, упасы́й на зла́цѣ добродѣ́телей преподо́бно о́вцы Госпо́дня, удивля́емь е́сть отъ а́нгелъ, му́жествомъ посрами́въ де́моны, въ человѣ́цѣхъ поживе́, я́ко безпло́тенъ. Тѣ́мже и Тро́ицѣ предста́ досто́йно, упра́вити ста́до моли́твами не престае́тъ. Къ нему́же возопіе́мъ: моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

И ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, Иже изъ Тебе́ воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Послѣ́дова твои́мъ словесе́мъ ве́щи тве́рдостное, и́бо кровоя́децъ возбраня́ше ити́ къ пре́днимъ, до́ндеже Христа́, всѣ́хъ еди́наго Го́спода, исповѣ́далъ еси́, Про́кле, Бо́га пресу́щна.

Непобѣди́мымъ дерзнове́ніемъ и до́блимъ умо́мъ, страстоте́рпче Про́кле, ста́лъ еси́ предъ суди́щемъ, воплоще́ніе велегла́сно проповѣ́дуя излія́вшаго Себе́ да́же до ра́біяго о́браза, Изба́вителя на́шего.

Безсту́дно у́бо гони́тель мудреце́мъ пока́зоваше му́къ ви́ды и ну́жднѣйшую сме́рть, непобѣди́мыя же ви́дя, дивля́шеся и, побежде́ніе зря́ свое́, не домышля́шеся.

Богоро́диченъ: Сокруше́нное преступле́ніемъ ру́къ Твои́хъ творе́ніе ущедря́я, Сло́ве, въ ложесна́ Неискусобра́чныя все́лься, и во двою́ существу́ прише́лъ еси́, нетлѣ́нія обновля́я пути́ вѣ́дущимъ Тя́.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти́: си́лѣ Твое́й сла́ва, Человѣколю́бче.

Струя́ жи́зни твою́ мы́сль напои́ Боже́ственнаго Ду́ха дѣ́йствомъ, отню́дуже го́ресть сласте́й отри́нувши, боже́ственныя сла́дости напо́лнися. Еюже сы́тости непреста́нныя пріе́млющи, пое́тъ: си́лѣ Твое́й сла́ва, Человѣколю́бче.

Огнь искуше́ній и страсте́й пе́щь слеза́ми твои́хъ, о́тче, тече́ній и духо́вною бога́тною угаси́лъ еси́ росо́ю, соблю́дся неопале́нъ, опаля́емь бо любо́вію всѣ́хъ Царя́, ве́щная увяди́лъ еси́ жела́нія.

Умъ возне́съ къ житію́ небе́сному, плотско́е, о́тче, облегчи́лъ еси́, отягча́вшее ве́щи страсте́й, тѣ́мже Тро́ицѣ неукло́нно послужи́лъ еси́. Моисе́я же нра́въ и Иліино́ житіе́ подража́я, ви́дѣлъ еси́ Го́спода.

Богоро́диченъ: Вся́ добра́ Ты́ еси́, Чи́стая, бли́жняя моя́, — Сы́нъ Тво́й, Влады́чице, зове́тъ Тебѣ́, святѣ́йшу а́нгельскаго естества́ обрѣ́тъ Тя́, и багряни́цу тѣ́ла истка́ неизрече́нно отъ чи́стыхъ Твои́хъ крове́й, и сла́витъ Того́ сла́вящія.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ты́, Го́споди, крѣ́пость му́чениковъ и утвержде́ніе, Ты́, Свя́те, святы́хъ, непоколеби́мая стѣно́ стра́ждущихъ усе́рдно.

Жела́ніемъ боже́ственнымъ ду́шу опаля́я, терпѣ́лъ еси́, свѣща́ми опаля́емь, Про́кле преблаже́нне досточу́дне.

Огня́ то́чію ужаса́юся вѣ́чнаго, — взыва́лъ еси́, опаля́емь, му́чениче Про́кле, повелѣ́ніи мучи́теля и во́лею умерщвля́емь.

Богоро́диченъ: Кто́ мо́жетъ сказа́ти Твое́ та́инство, о Влады́чице Богоро́дице! Зижди́теля бо всѣ́хъ несказа́нно воплоти́ла еси́.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и къ свѣ́ту за́повѣдей Твои́хъ пути́ моя́ напра́ви, молю́ся.

Дрема́ніе уны́нія о́чи се́рдца твоего́ не покры́, но ума́ твоего́ и жела́нія боже́ственнаго жа́ломъ уязвля́емь, всено́щнымъ стоя́ніемъ и въ моли́твѣ терпѣ́лъ еси́, пло́ти не покрыва́я бро́ви. [Два́жды.]

Смиреному́дріе сожи́тельно имѣ́я отъ ю́ности, видѣ́ніи боже́ственными и поуче́ніи у́мъ просвѣща́я, льсти́ваго по́мысломъ не укра́лся еси́, но смире́нно имѣ́лъ еси́ мудрова́ніе.

Богоро́диченъ: Яко красну́ добро́тою, добродѣ́телей обрѣ́тъ Тя́ пала́ту, кра́сное Сло́во въ Твоя́ нетлѣ́нная ложесна́ всели́ся и изъ Тебе́ роди́тися неизмѣ́нно благоизво́ли, вѣ́рныхъ украша́я ли́ца.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Ни о́гнь, ниже́ ра́ны, ни звѣ́ріе, ниже́ сме́ртное искуше́ніе, до́бліи, ва́съ разлучи́ти Бо́жія чи́стыя и непоро́чныя любве́ возмого́ша.

Зако́номъ хва́льнымъ не порабо́таетъ му́ченикъ вои́стинну до кро́ве му́жество, еди́нъ си́хъ сла́вяй Госпо́дь велича́етъ я́ко уго́дники.

Благопла́вно пучи́ну преше́дше лю́тыхъ му́къ, устреми́стеся къ боже́ственному приста́нищу, е́же о Христѣ́, страстоте́рпцы му́ченицы, присносу́щнаго наслажде́нія.

Богоро́диченъ: Се́, Дѣ́ва, — Иса́ія вопія́ше дре́вле, — Совѣ́та Ангела Вели́каго ражда́етъ, Емману́ила, Бо́га и Го́спода, и Спа́са ду́шъ на́шихъ.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Умертви́въ сла́сти, оживи́лся еси́ ду́хомъ, и, связа́въ крѣ́пкаго, сосу́ды расхи́тилъ еси́ его́, и благопотре́бнымъ добродѣ́телемъ прія́телища разшири́лъ еси́ уче́ніи твои́ми.

Малосло́віе лѣ́ностное ума́ отгна́въ, хлѣ́бъ живо́тный, и е́же ко изоби́лію, руко́ю и язы́комъ твои́мъ раздава́я, о́тче, сугу́бъ хотя́щимъ бы́лъ еси́.

Иже тала́нтъ отъ Бо́жія уче́нія обрѣ́тъ, я́ко сы́й боже́ственнымъ спѣ́хомъ возрасти́въ безъ мѣ́ры, гла́съ Влады́ки твоего́ слы́шиши ра́достенъ, къ лу́чшимъ зову́щь тя́.

Богоро́диченъ: Зако́нныхъ кромѣ́ въ Тебѣ́ Вы́шній вочеловѣ́чися, и, пло́ть непрело́жно я́влься, съ человѣ́ки поживе́, и къ небе́снѣй возвы́ситися стези́ хотя́щимъ показа́.

Конда́къ, гла́съ 2. Подо́бенъ: Тве́рдыя.

Плотску́ю тяготу́ утончи́лъ еси́ дѣ́лы, душе́вную же бы́стрость впери́лъ еси́ просвѣще́ніемъ, Михаи́ле, и яви́лся еси́ Тро́ицѣ жили́ще, Юже зря́, блаже́нне, я́сно, моли́ непреста́нно о всѣ́хъ на́съ.

Икосъ:

Моли́твъ неподви́жимый сто́лпъ, соверше́ніе любве́ го́рняго благоу́мія, умиле́нія бе́здна, не въ тре́тію ча́сть взя́тъ бы́лъ еси́ высоты́, но идѣ́же незаходи́мое Божество́ я́сно зря́тъ херуви́ми, и, си́ми видѣ́ніи сія́я, покланя́ешися, и сла́ву пребоже́ственную пріе́млеши, ото́нуду обожа́емь. Тѣ́мъ пѣ́ти тя́ досто́йно не возмога́емъ, про́симъ проще́нія, взыва́юще ку́пно: моли́ непреста́нно о всѣ́хъ на́съ.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Тѣлеса́ ра́намъ преда́вше, любо́вію вопло́щшагося Сло́ва, му́ченицы, отъ Сего́ вѣне́цъ пра́вды прія́сте въ лѣ́поту.

Свѣ́томъ Боже́ственнымъ у́мъ просвѣ́щше, вѣ́рою муче́нія тму́ претеко́сте, вопію́ще, прехва́льніи: оте́цъ на́шихъ Бо́же, благослове́нъ еси́.

Тече́ніемъ твои́хъ усте́нъ медото́чныхъ слове́съ, преблаже́нне Про́кле, я́ко боже́ственнымъ исцѣле́ніемъ напоя́еши пою́щія: оте́цъ на́шихъ Бо́же, благослове́нъ еси́.

Си́лою Боже́ственною у́мъ укрѣ́пль, му́къ го́рькія ви́ды претерпѣ́лъ еси́, зовы́й, Ила́ріе: оте́цъ на́шихъ Бо́же, благослове́нъ еси́.

Богоро́диченъ: Яко вы́шши всѣ́хъ тва́рей, ражда́еши всѣ́хъ Зижди́теля, пребы́вши Дѣ́вою, Нескве́рная, Благослове́нная, еди́на при́сно Препросла́вленная.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Сѣ́мя пріе́мъ въ се́рдцы за́повѣдей Бо́жіихъ па́че стори́цъ, и ты́сяща пло́дъ прине́слъ еси́ кла́съ боже́ственный — мона́ховъ, вопію́щихъ: благослове́нъ Бо́гъ оте́цъ на́шихъ.

Ду́ха сосу́дъ Пресвята́го яви́шася устнѣ́ твои́ и я́коже наводне́ніи язы́къ честна́я уче́нія, Тро́ицѣ согла́сно зову́щимъ: благослове́нъ Бо́гъ оте́цъ на́шихъ.

Богоро́диченъ: Безъ сѣ́мене всели́ся во чре́во Твое́ созда́вый мя́, и изъ Тебе́ плотоно́сецъ Бо́гъ и Человѣ́къ про́йде, не во двѣ́ раздѣли́ся ѵпоста́си, ни смѣше́нія подъя́тъ, отце́въ Бо́гъ благослове́нный.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

По мно́гихъ му́кахъ стрѣля́нію свирѣ́пый вра́гъ тя́ предае́тъ, отъ ни́хже ссѣца́емь, всехва́льный Про́кле, ра́дуяся, въ ру́цѣ Бо́жіи пре́далъ еси́ ду́хъ тво́й.

Уязви́ся честно́е тѣ́ло твое́ непреста́нными стрѣля́ніи, свя́те, и неисцѣ́льно уязви́ враги́ безпло́тныя, не пою́щія: благослови́те, вся́ дѣла́ Госпо́дня, Го́спода.

Просвѣща́емь заре́ю благода́ти, я́коже ка́мень, на земли́ валя́емь, сокруши́лъ еси́, Ила́ріе, утвержде́ніе пре́лести, поя́ въ крѣ́пости: благослови́те, вся́ дѣла́ Госпо́дня, Го́спода.

Ка́пли крове́й твои́хъ, поте́кше, нече́стія о́гнь угаси́ша, вѣ́рныя же напои́ша, пою́щія непреста́нно: благослови́те, вся́ дѣла́ Госпо́дня, Го́спода.

Богоро́диченъ: Вопло́щся отъ чи́стыхъ крове́й Твои́хъ, Бо́гъ, сотвори́вый и созда́вый мя́, Богороди́тельнице Влады́чице, обнови́ мíръ, вопію́щій: благослови́те, вся́ дѣла́ Госпо́дня, Го́спода.

Инъ.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Иже пренепостижи́мую Госпо́дню красоту́ ели́ко жела́ніе бя́ше, во пло́ти зря́ ума́ свѣ́тлостію, ны́нѣ пе́рсть оста́вль и къ небеси́ до конца́ пресели́вся, предъ лице́мъ предстои́ши Тро́ицы, зовы́й: лю́діе, превозноси́те Го́спода во вся́ вѣ́ки.

Многоцѣ́нный тебѣ́ вѣне́цъ, по́двигъ сконча́вшу, и́же на де́моны, Влады́ка подаде́, зла́та свѣтлѣ́йши и би́сера краснѣ́йши, ца́рства и безсме́ртія, о отче, сія́я па́че со́лнца, зове́ши: лю́діе, превозноси́те Го́спода во вся́ вѣ́ки.

О, сла́дкаго язы́ка твоего́, и́мже прему́дро улови́лъ еси́ поглоще́нныя враго́мъ льсти́вымъ! И ко измѣне́нію боже́ственному премѣни́лъ еси́, водрузи́въ единообра́зно сѣ́ни, я́ко песо́къ, и зовя́ непреста́нно: свяще́нницы, благослови́те, лю́діе, превозноси́те Го́спода во вся́ вѣ́ки.

Богоро́диченъ: Умерщвле́нный жа́ломъ всепа́губнымъ зміи́нымъ, еди́на, Живода́вца Бо́га ро́ждшая, Дѣ́во, оживи́ла еси́. Его́же прилѣ́жно моли́ воста́нія страсте́й утиши́ти, любо́вію пою́щихъ: свяще́нницы, благослови́те, лю́діе, превозноси́те Его́ во вся́ вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Се́ свѣтоза́рная, и свяще́нная, и благонаро́читая му́ченикъ па́мять возсія́, всю́ зе́млю просвѣща́ющи, мра́къ зло́бы отъе́млющи, и о́блакъ душа́мъ отгоня́ющи, и исцѣле́ній благода́ть точа́щи.

Якоже два́ сосца́ духо́вна, пролива́юща исцѣле́ній млеко́, му́ченицы, вся́ка напитава́ете сердца́, го́ресть неду́говъ отгоня́ще и стра́сти лю́тыя исцѣля́юще. Тѣ́мже досто́йно блажи́ми есте́.

Ка́плями крове́й свяще́нныхъ омочи́вше багряни́цу, пресла́вніи, и сію́ красно́ нося́ще, со Христо́мъ ца́рствуете всегда́, еди́нѣмъ Царе́мъ и Бо́гомъ на́шимъ, о мíрѣ моля́щеся.

Земля́ благослови́ся ва́шими кровьми́ и моще́й положе́ніемъ, перворо́дныхъ Це́рковь Ду́хомъ боже́ственнѣ свѣтлѣ́ется, въ не́йже съ му́ченики, я́ко му́ченицы, о мíрѣ моли́теся.

Богоро́диченъ: Свѣ́та жили́ще, Чи́стая, Твое́, Пречи́стая, бы́сть чре́во, Влады́чице, Тебе́ ра́ди Явльшагося въ ве́щи зри́мѣ тѣле́снѣй и вся́ су́щія во тмѣ́ Просвѣ́щша. Тѣ́мже Тя́ вѣ́рою ублажа́емъ.

Инъ.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Дне́сь вся́ земля́ пріи́де, проповѣ́дающи Христо́во боже́ственное и́мя, пресла́вную и боже́ственную па́мять твою́ торжеству́я: ты́ бо онебеси́лъ еси́ ю́ монахообра́зными уче́ньми и уясни́лъ еси́ а́нгельскимъ ревну́ющія чино́мъ.

Освѣти́ша мо́лніи твои́хъ чуде́съ вся́ концы́, моля́щимъ бо ся вѣ́рою ра́ка твоя́ источа́етъ исцѣле́нія. И тебе́ у́бо и́мать не́бо, земля́ же земну́ю сѣ́нь тѣ́ла, ю́же пре́жде гро́ба истни́вшуюся воздержа́ніемъ твои́мъ.

Зе́мленъ у́мъ не мо́жетъ свѣ́тъ о́нъ разумѣ́ти, пресвѣ́тлый и пренеизглаго́ланный Тро́ическій, его́же ны́нѣ прія́лъ еси́, и́мже и обожа́емь я́вѣ. Помина́ющихъ тя́, преблаже́нне, помяни́, Тро́ицѣ Святѣ́й предстоя́.

Богоро́диченъ: Яви́хомся жи́зни боже́ственныя отпаде́ни дре́ва ра́ди разу́мнаго; Ты́ же родила́ еси́ жи́зни дре́во — Христа́ Бо́га, и́же отъ а́довыхъ те́мныхъ жили́щъ изведе́ и къ неотъе́млемѣй введе́ жи́зни пою́щія Тя́.

Свѣти́ленъ. Подо́бенъ: Не́бо звѣзда́ми.

Ангельскаго житія́ жела́я, удали́лъ еси́ себе́ всѣ́хъ кра́сныхъ житія́, всели́лся еси́ во дво́рѣхъ за́повѣдей Госпо́днихъ и со а́нгелы ра́дуешися.

Богоро́диченъ: Яже отъ Бо́га мíрови пода́ннымъ благи́мъ Ты́ вина́ еси́, Богоро́дице, но и ны́нѣ ми́лостивна сотвори́ о о́бщемъ спасе́ніи благопремѣ́ннаго Бо́га.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 119 – 125 об.

/ Къ оглавленію раздѣла /


Наверхъ / Къ титульной страницѣ

0