Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 11-й де́нь.
Святы́я му́ченицы и прехва́льныя Евфи́міи, си́рѣчь предѣ́ла отце́въ. И преставле́ніе блаже́нныя Ольги, княги́ни Россíйскія, во свято́мъ креще́ніи нарече́нныя Еле́ны.

[ВЕЧЕРЪ,]
На Го́споди воззва́хъ.., стихи́ры на 6: Евфи́міи три́, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Ка́ко у́бо ме́ртвымъ естество́мъ* прехва́льная стоя́ше страстоно́сица дне́сь,* боже́ственный сви́токъ держа́щи,* сопроти́внымъ его́ не даю́щи,* отце́мъ же ввѣря́ющи.* О, му́ченице сла́вная, вселе́нныя похвало́,* спаса́й ны́нѣ моли́твами твои́ми* незы́блему Це́рковь Христо́ву.

Боже́ственныхъ оте́цъ собра́ніе,* вѣ́ры предѣ́лъ,* на твоя́ пе́рси полага́етъ,* его́же у́бо, пресла́вная, пріе́мши,* храня́щи Боже́ственную вѣ́ру непоколеби́му* и побѣжда́ющи вся́ку е́ресь,* посрамля́ющи лжесла́вныя засту́пники.* Тѣ́мже тя́ чти́мъ* и ублажа́емъ.

Ины стихи́ры Ольги, гла́съ 4. Подо́бенъ: Яко до́бля.

Яко со́лнце, возсія́ на́мъ* пресла́вная па́мять твоя́, Ольго богому́драя,* ма́ти князе́й Россíйскихъ,* Христо́ва мизи́ница,* апо́стольскимъ уче́ніемъ воспита́на,* возмогла́ еси́ на кумíры,* па́че же на діа́вола.* Си́лою Свята́го Ду́ха просвѣща́ема,* отъ тмы́ неразу́мія всю́ страну́* и лю́ди къ Бо́гу привела́ еси́,* Его́же моли́ о творя́щихъ твою́ па́мять.

Въ ра́зумѣ духо́вномъ,* и́мже посрами́ла еси́ врага́, прельсти́вшаго Еву,* и сего́ ору́жіе сломи́ла еси́,* богосажде́нный ра́й церко́вный создала́ еси́,* въ не́мже дре́во живо́тное — Кре́стъ, водрузи́ла еси́,* и трапе́зу Бо́жія бра́шна иму́щи,* исто́чникъ неисчерпа́емый кро́ве Христо́вы,* его́же пи́вши, нетлѣ́нна пребыва́еши,* за вся́ ны́ моля́щися при́сно.

Духо́вно возвесели́теся,* Россíйстіи концы́,* па́мять чту́ще Ольги богому́дрыя:* мо́лится бо вы́ну ко Христу́* съ чудотво́рцами и му́чениками,* помо́щницу иму́щи Святу́ю Богоро́дицу,* изба́витися отъ бѣ́дъ и печа́лей* вѣ́рою пою́щимъ ю́* и кла́няющимся ра́цѣ нетлѣ́ннаго ея́ тѣ́ла.

Сла́ва, гла́съ 6:

Одесну́ю Спа́са предста́ дѣ́ва, и страстоно́сица, и му́ченица Евфи́мія, одѣ́яна добродѣ́тельми побѣ́дными и преукра́шена еле́емъ чистоты́ и кро́вію страда́нія, и вопію́щи къ Нему́, ра́достно свѣщу́ держа́щи: въ воню́ благоуха́нія Твоего́ теко́хъ, Христе́ Бо́же, я́ко уя́звлена Твое́ю любо́вію а́зъ, не отлучи́ мене́, Женише́ небе́сный. Тоя́ моли́твами посли́ на́мъ, Всеси́льне Спа́се, ми́лости Твоя́.

И ны́нѣ, богоро́диченъ или́ крестобогоро́диченъ. Подо́бенъ: Все́ отло́жше.

Ору́жіе, я́коже рече́ Симео́нъ,* се́рдце Твое́ про́йде, Пречи́стая Влады́чице,* егда́ узрѣ́ла еси́ изъ Тебе́ Возсія́вшаго* неизрече́ннымъ сло́вомъ,* отъ беззако́нныхъ я́ко осужде́на,* возноси́ма на кре́стъ,* о́цтомъ и же́лчію напая́емаго,* ре́бра же пробода́ема,* и ру́цѣ и но́зѣ пригвожда́емы,* и рыда́ющи восклица́ше,* ма́терски вопію́щи:* что́ сіе́, Ча́до Сладча́йшее, но́вое та́инство?

На стихо́внѣ окто́иха.

Та́же глаго́лемъ припѣ́въ: Ди́венъ Бо́гъ во святы́хъ Свои́хъ, Бо́гъ Изра́илевъ.

И пое́мъ стихи́ру, гла́съ 8: Пѣ́сньми да почти́тся му́ченица Христо́ва: подоба́етъ бо вои́стинну е́й хвала́мъ сосло́віе, я́ко испле́тши вѣне́цъ своему́ верху́. Сія́ бо вои́стинну неукло́нна и тверда́, мно́гихъ мучи́телей суро́вства низложи́. Тѣ́мже и зовя́ше, ра́достно стра́ждущи: Ты́ ми бу́ди, Го́споди, по́мощь и не оста́ви мене́.

Сла́ва, гла́съ 6:

Одѣ́яна добродѣ́тельми и просвѣще́на по́мысломъ, мѵ́ро пролива́юши въ сердца́ вѣ́рныхъ, отъ восто́къ возсія́вши, я́ко звѣзда́ свѣ́тлая, и собо́ръ сотво́рши Свята́го Ду́ха прише́ствіемъ боже́ственныхъ оте́цъ, не преста́й о на́съ моля́щи ко Христу́, Евфи́міе всехва́льная, спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Лю́ди беззако́ннѣйшія, безъ пра́вды пригвожда́юща Тя́ на дре́вѣ, Дѣ́ва и Чи́стая Ма́ти Твоя́ зря́щи, я́коже Симео́нъ прорече́, утро́бою, Спа́се, уязвля́шеся.

Тропа́рь, гла́съ 4:

Агница Твоя́, Іису́се, Евфи́мія, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.

Или́ се́й тропа́рь, гла́съ то́йже:

Жениха́ твоего́ Христа́ возлюби́вши и свѣщу́ твою́ свѣ́тлу угото́вльши, добродѣ́тельми возсія́вши, всехва́льная Евфи́міе, тѣ́мъ возшла́ еси́ съ Ни́мъ на бра́къ, вѣне́цъ страда́нія отъ Него́ пріе́мши. Но отъ бѣ́дъ изба́ви на́съ, чту́щихъ вѣ́рою па́мять твою́.

Сла́ва, Ольги, гла́съ 1:

Крила́ми богоразу́мія впери́вши тво́й у́мъ, возлетѣ́ла еси́ превы́ше ви́димыя тва́ри, взыска́вши Бо́га и Творца́ вся́ческихъ, и, Того́ обрѣ́тши, па́ки рожде́ніе креще́ніемъ прія́ла еси́, дре́ва живо́тнаго наслажда́ющися, нетлѣ́нна во вѣ́ки пребыва́еши, Ольго присносла́вная.


НА УТРЕНИ,
Кано́нъ окто́иха еди́нъ [и святы́хъ два́, на 8.

Кано́нъ] святы́я Евфи́міи на 4, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Чи́стыми луча́ми Ду́ха облиста́ющи и мра́чную пре́лести тму́ разо́рши, но́щь разрѣши́ безмѣ́рныхъ зо́лъ мои́хъ и просвѣще́ніе ми́ пода́ждь, му́ченице страстоте́рпице прехва́льная.

Болѣ́зни плотскíя до́блественнѣ претерпѣ́ла еси́ и къ неболѣ́зненному ра́достно наслажде́нію, му́ченице, премину́ла еси́. Тѣ́мже молю́ тя: души́ моея́ болѣ́знь твои́ми моли́твами претвори́ и ко спасе́нію наста́ви.

Невѣ́сто честна́я, и чи́стая, и нескве́рная Царя́ Христа́, злы́я скве́рны души́ моея́ очи́сти, болѣ́знь мою́ исцѣли́, неисцѣ́льныя стра́сти уврачу́й се́рдца моего́, я́ко да восхвалю́ тя, спаса́емый.

Богоро́диченъ: Яже отъ земли́ до небе́съ дося́жуши лѣ́ствица небе́сная, по не́йже Бо́гъ Сло́во къ человѣ́комъ сни́де, Благослове́нная Чи́стая, несказа́нно чу́до, недомы́сленно видѣ́ніе, спаса́й къ Тебѣ́ прибѣга́ющія.

Кано́нъ Ольги, на 4, гла́съ 5:
Пѣ́снь 1.

Ирмо́съ: Велича́ваго фарао́на въ мо́ри потопи́вша со ору́жіемъ и вса́дники, Изра́иля же пресла́вно спа́сша и по су́ху прове́дша, пое́мъ Христа́, я́ко просла́вися.

Вели́чіе на́ше и похвала́ ты́ еси́, Ольго богому́драя: тобо́ю бо отъ и́дольскія ле́сти свободи́хомся. Ны́нѣ моли́ся за ро́ды и ро́ды, и́хже Бо́гу привела́ еси́, пою́щи Христа́, я́ко просла́вися.

Велича́ваго діа́вола изъ Россíи прогна́ла еси́, нечести́выя кумíры отню́дъ сокруши́вши, вся́ лю́ди отъ беззако́нія свободи́ла еси́, му́дростію науча́ющи пѣ́ти Христа́, я́ко просла́вися.

Че́рность грѣхо́вную ба́нею креще́нія отню́дъ отмы́ла еси́, Христа́ возлюби́ла еси́, Ему́же предстоя́щи, моли́ся за рабы́ твоя́, вѣ́рно сла́вящія тя́.

Богоро́диченъ: Иса́ія Тя́ же́злъ нарица́етъ, Пречи́стая, Дави́дъ же Тя́ — престо́лъ Госпо́день, Авваку́мъ — пріосѣне́нную го́ру, купину́ же Тя́ — Моисе́й, мы́ же Тя́ Ма́терь Бо́жію нарица́емъ.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Ря́снами я́ко златы́ми, тя́, страда́льческими біе́ніи одѣ́янну, дѣ́во, пребога́тое Сло́во ви́дѣвъ, въ небе́сная жили́ща безпло́тныхъ чино́въ ра́доватися приведе́.

Во благово́ніе, му́ченице, мѵ́ра, отъ Чи́стыя Возсія́вшаго, потекла́ еси́ усе́рдно, мѵ́ро Боже́ственныхъ исцѣле́ній мíру источи́ла еси́. Тѣ́мже вопію́: смра́дныя стра́сти се́рдца моего́ ны́нѣ отжени́.

Ду́шу мою́, неду́гующую тлетво́рными страстьми́, и къ стремни́намъ пре́лести попо́лзшуюся, му́ченице прехва́льная, осѣне́ніи Боже́ственными исцѣли́ и утверди́ не побѣжда́тися.

Богоро́диченъ: Ра́дуйся, еди́на ро́ждши вся́ческихъ Го́спода; ра́дуйся, жи́знь исхода́таившая; ра́дуйся, пріосѣне́нная и несѣко́мая горо́, вѣ́рныхъ утвержде́ніе, еди́на Всенепоро́чная.

Инъ.

Ирмо́съ: Держа́вною руко́ю и си́льнымъ сло́вомъ не́бо и зе́млю сотвори́лъ еси́, ю́же Твое́ю кро́вію искупи́лъ еси́, Це́рковь Твою́, я́же о Тебѣ́ утвержда́ется, зову́щи: я́ко нѣ́сть свя́тъ, ра́звѣ Тебе́, Го́споди.

Держа́вною руко́ю, и му́дрыми словесы́, и си́льнымъ сло́вомъ учи́ла еси́ твоего́ сы́на зако́ну Христо́ву и лю́демъ возбрани́ла еси́ жре́ти и́доломъ, Ольго пресла́вная, въ па́мять твою́ ны́нѣ соше́дшеся, тебе́ прославля́емъ.

Ты́, я́ко пчела́, добру́ ра́зуму дале́че цвѣту́щія Христо́вы вѣ́ры взыска́ла еси́ и, я́ко поро́дный ме́дъ, креще́ніе въ Ца́рствующемъ гра́дѣ обрѣ́тши, твоему́ гра́ду и лю́демъ дарова́ла еси́, его́же вси́ насыще́ны го́рести грѣха́ отбѣга́ютъ.

Ве́сь похва́льный гла́съ и мольбу́ ти, Ольго, прино́симъ, тобо́ю бо Бо́га позна́хомъ, Ему́же ны́нѣ предстои́ши, проси́ ми́ра Импера́тору, и на пога́ныя побѣ́ды, и душа́мъ на́шимъ оставле́нія грѣхо́въ, пою́щимъ тя́, присноблаже́нная.

Богоро́диченъ: Прія́телище яви́лася еси́, Дѣ́во, непристу́пнаго Бо́га, тѣ́мъ Тя́ пою́тъ непреста́нно а́нгельстіи чи́ни, повину́ющеся Влады́цѣ. Ты́ бо родила́ еси́ Сло́во Отчее, Собезнача́льное, безъ отца́: О, чу́до! Святы́й бо Ду́хъ осѣни́ Тя.

Конда́къ Ольги, гла́съ 4. Подо́бенъ: Яви́лся еси́ дне́сь.

Воспое́мъ дне́сь Благодѣ́теля всѣ́хъ Бо́га, просла́вльшаго въ Россíи Ольгу богому́друю, да моли́твами ея́ пода́стъ душа́мъ на́шимъ грѣхо́въ оставле́ніе.

Та́же сѣда́ленъ Евфи́міи, гла́съ 8. Подо́бенъ: Прему́дрости.

Крове́й твои́хъ струя́ми, му́ченице Христо́ва, пото́пъ нечести́вымъ при́сно дѣ́йствуеши, всехва́льная, ту́чами же благода́тными слове́сныя ни́вы напая́ющи всегда́, въ ни́хже возрасти́ла еси́ кла́съ вѣ́ры. Тѣ́мъ пресла́вно и по сме́рти яви́лася еси́ о́блакъ, источа́ющъ живо́тное свидѣ́тельство, страстоте́рпице прехва́льная, моли́ся Христу́ Бо́гу согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, сѣда́ленъ Ольги, гла́съ 1. Подо́бенъ: Ка́мени запеча́тану.

Крила́ми богоразу́мія впери́вши тво́й у́мъ, возлетѣ́ла еси́ превы́ше ви́димыя тва́ри, взыска́ющи Творца́ вся́ческихъ, и, Того́ обрѣ́тши, па́ки порожде́ніе креще́ніемъ прія́ла еси́, и дре́ва живо́тнаго — Креста́ Христо́ва насла́ждшися, нетлѣ́нна во вѣ́ки пребыва́еши, Ольго преблаже́нная.

И ны́нѣ, богоро́диченъ:

Ру́цѣ Твои́ боже́ственніи, и́миже Созда́теля понесла́ еси́, Дѣ́во Пресвята́я, вопло́щшагося благосты́нею, просте́рши, умоли́ Его́ изба́вити на́съ отъ искуше́ній, и страсте́й, и бѣ́дъ, хва́лящихъ Тя́ любо́вію и вопію́щихъ: сла́ва Все́льшемуся въ Тя́, сла́ва Проше́дшему изъ Тебе́, сла́ва Изба́вльшему на́съ рождество́мъ Твои́мъ.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Себе́ сама́го пла́чу, житіе́ неиспра́влено имѣ́я всегда́, му́ченице сла́вная, помози́ ми и бу́дущаго суда́ свободи́.

Яже о́гнь единора́бный Боже́ственными одожде́ніи увяди́вши, огня́ мя свободи́ и вѣ́чнаго осужде́нія.

Дѣ́вства сосу́дъ, Ду́ха Свята́го жили́ще, Евфи́міе, вся́каго мя́ изба́ви сопроти́внаго вре́да хода́тайствомъ твои́мъ.

Богоро́диченъ: Милосе́рдія Твоего́ бе́здну призыва́ющу пода́ждь ми́, Яже Благосе́рдаго ро́ждшая и Спа́са всѣ́хъ, пою́щихъ Тя́.

Инъ.

Ирмо́съ: Ду́хомъ Бо́жіимъ очи́щся проро́къ, дыха́ющимъ въ не́мъ, Авваку́мъ боже́ственный, боя́ся, глаго́лаше: внегда́ прибли́жатся лѣ́та, позна́нъ бу́деши, Бо́же, на спасе́ніе человѣ́ковъ.

Ду́хъ Бо́жій почи́ на тебѣ́, я́ко на Дево́рѣ проро́чицѣ дре́вле, Имже просвѣти́вшися, укрѣпля́ющи Влади́міра, разу́мнаго Сиса́ру — діа́вола низложи́ла еси́ въ сѣ́ти его́ креще́ніемъ, я́ко и Вара́комъ въ пото́цѣ Ки́ссовѣ пре́жде.

Быстринѣ́ подо́бящися, Ольго богому́драя, сокруше́ннымъ се́рдцемъ ста́ла, моля́щися къ Бо́гу, изба́вила еси́ ро́дъ твои́хъ люде́й отъ оскорбле́нія кумíрскаго и отъ плѣне́нія вра́жія свободи́ла еси́, Христа́ призыва́ющи на по́мощь на́шу.

Въ наро́читый де́нь свята́го твоего́ преставле́нія ра́достно пра́зднуемъ, пѣ́снь моле́бную Христу́ возсыла́юще, нетлѣ́ннымъ вѣнце́мъ вѣнча́вшему тя́, Ольго богому́драя: проси́ на́мъ оставле́нія грѣхо́въ, сла́вящимъ тя́ вѣ́рно.

Богоро́диченъ: Тя́, отъ ко́рене Іессе́ева процвѣ́тшую, Иса́ія я́коже прорече́, Христа́ — Цвѣ́тъ прозя́бшую, и Первонача́льнаго пло́тію носи́вшую, и Же́злъ Бо́жія Ду́ха, хва́лимъ Тя́, я́ко Бо́жію Ма́терь и Чи́стую Дѣ́ву.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Якоже посредѣ́ звѣ́здъ со́лнце многосвѣ́тло, му́ченице, просія́ла еси́ су́щимъ съ тобо́ю му́ченикомъ и мíръ страда́ніемъ озари́ла еси́. Но молю́ ти ся: омраче́нное мое́ се́рдце страсте́й мгло́ю, просвѣти́.

Неусы́пною моли́твою успи́, всехва́льная, душетлѣ́нныя се́рдца моего́ стра́сти, и бо́дрость боже́ственную пода́ждь ми́, лежа́щему на одрѣ́ уны́нія, лѣ́ности же сну́ порабоще́ну.

Лове́цъ лука́выхъ мя́ сѣ́ти запя́ша, я́коже пти́цу, и лю́тѣ уязви́хся, и рука́ми злы́ми ны́нѣ держи́мь е́смь. Избра́нная Госпо́дня голуби́це, помози́ ми и отъ си́хъ зло́бы исхити́.

Богоро́диченъ: Ма́тернее дерзнове́ніе, е́же къ Сы́ну Твоему́, иму́щи, Всечи́стая, сро́днаго промышле́нія, е́же о на́съ, не пре́зри, мо́лимся: я́ко Тя́ и еди́ну, христіа́не, ко Влады́цѣ очище́ніе ми́лостивно предлага́емъ.

Инъ.

Ирмо́съ: Сло́во Бо́жіе Всеси́льное, ми́ръ всему́ мíру посли́ и свѣ́томъ и́стиннымъ освѣща́я и просвѣща́я вся́, изъ но́щи Тя́ сла́вящія.

Яко голуби́ца цѣлому́дренная, на фи́никсъ добродѣ́телей возшла́ еси́, крилѣ́ свя́щеннѣ посре́бреннѣ иму́щи, и́миже возлетѣ́вши, въ ра́йстѣй пи́щи возгнѣзди́лася еси́, сла́вная Ольго.

О тебѣ́ поя́ше Соломо́нъ пре́жде: внѣ́ виногра́да ца́рская ма́слина процвѣте́; ты́ бо святы́й гре́знъ креще́ніемъ въ Россíи насади́ла еси́, творя́щи пло́дъ покая́нія, о не́мже Са́мъ Христо́съ весели́тся.

Умилосе́рдися, Влады́ко, на новопросвѣще́нныя лю́ди Твоя́, не преда́ждь на́съ въ ру́ки пога́ныхъ за мно́жество беззако́ній на́шихъ, но моли́твами наста́вницы на́шея Ольги изба́ви ны́ отъ вся́кія напа́сти.

Богоро́диченъ: Кропи́те вси́, я́коже пи́шется, о́блацы весе́лія, земны́мъ: Бо́жій бо Дѣ́тищь — Христо́съ, очища́яй мíръ отъ грѣхо́въ, воплоти́ся отъ Дѣ́вы и да́нъ бы́сть на́мъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Яже звѣре́й стремле́нія претерпѣ́вши крѣ́пко, звѣре́й мя́ мы́сленныхъ моли́твами твои́ми изба́ви, лю́то оскорбля́ющихъ мя́ и напа́дающихъ неща́дно на не́мощь мою́.

Повину́вшися и́гу Боже́ственному, покори́ла еси́ го́рдаго врага́, нога́ми же сокруши́ла еси́, отъ него́же у́бо исхити́, му́ченице страстоте́рпице, притека́ющаго къ покро́ву твоему́.

Прошла́ еси́, му́ченице, лю́тое му́къ волне́ніе и ко приста́нищу жи́зни пра́вѣ дости́гла еси́. Тѣ́мже въ пучи́нѣ сласте́й житія́ обурева́ема спаси́ мя.

Богоро́диченъ: Да изба́вимся отъ лю́тыхъ прегрѣше́ній моли́твами Твои́ми, Богороди́тельнице Чи́стая, и да улучи́мъ, Пречи́стая, Бо́жіе сія́ніе изъ Тебе́ неизрече́нно воплоще́ннаго Сы́на Бо́жія.

Инъ.

Ирмо́съ: Въ Це́рковь небе́сную святу́ю Твою́ да пріи́детъ моли́тва моя́, вопію́ Ти, я́ко Іо́на, изъ глубины́ се́рдца морска́го: отъ грѣ́хъ мои́хъ возведи́ мя, молю́ся Тебѣ́, Го́споди.

Ре́вность Свята́го Ду́ха въ се́рдцы пріе́мши, оте́ческое зловѣ́ріе возненави́дѣла еси́, и, Христа́ и́стиннаго Бо́га взыска́вши, ча́до свѣ́та яви́лася еси́, и съ пе́рвенцы святы́хъ на небесѣ́хъ лику́еши.

Но́вая учени́ца Христо́ва въ Россíи яви́лася еси́, обходя́щи гра́ды и се́ла, кумíры сокруша́ющи и лю́ди уча́щи еди́ному Бо́гу покланя́тися, Его́же моли́ за пою́щія тя́.

О, богоблаже́нная Ольго, помоли́ся за твоя́ ча́да къ Бо́гу: ми́ръ неподви́жимый Импера́тору на́шему испроси́ и на́мъ отпуще́ніе грѣхо́въ, при́сно тя́ прославля́ющимъ.

Богоро́диченъ: Позна́вше Тобо́ю неопи́санное Сло́во Бо́жіе, Сы́на Единоро́днаго Вседержи́телева, вопіе́мъ Ти́, земнíи: ра́дуйся, благослове́нная Богоро́дице, упова́ніе ду́шъ на́шихъ.

Конда́къ, гла́съ 6. Подо́бенъ: Еже о на́съ.

По́двиги во страда́льчествѣ, по́двиги въ вѣ́рѣ положи́ла еси́ те́плѣ за Христа́, Жениха́ твоего́. Но и ны́нѣ я́коже е́реси и враго́въ шата́ніе подъ но́ги правосла́вныхъ царе́й покори́ти моли́ Богоро́дицею, я́же отъ шести́сотъ три́десяти богоно́сныхъ оте́цъ предѣ́лъ пріе́мшая и храня́щая, всехва́льная.

Икосъ:

Что́ твои́хъ страда́ній, или́ что́ исправле́ній, или́ что́ твоего́ дѣ́вства, или́ житія́ непоро́чнаго твоего́? Ты́ бо возвесели́ла еси́ Отца́, я́ко Сы́ну, уневѣ́стившися и Ду́ху Свято́му себе́ украси́вши. Кто́ довлѣ́етъ къ си́мъ? Кто́ глаго́лати ны́нѣ возмо́жетъ, коли́ки тя́ осіява́ютъ добродѣ́тели незаходи́мы? Яко отъ восто́ка бо гро́бу возсія́вшу, всѣ́мъ сія́еши и лучи́ пуща́еши на земли́, и въ мо́ри, и во всю́ подсо́лнечную, освѣща́еши и благоуха́еши концы́. Тѣ́мже и сви́токъ, вве́ренный отъ шести́сотъ и три́десятихъ богоно́сныхъ оте́цъ, предѣ́лъ пріе́мши, сохрани́ла еси́, всехва́льная.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Кровьми́ пла́мень пре́лести погаси́ла еси́, богому́драя страстоте́рпице, вря́щими, тѣ́мже погаси́ пе́щь смире́ннаго моего́ тѣлесе́, моли́твъ твои́хъ одожде́ньми.

Увы́, душе́ моя́ всеокая́нная! Согрѣша́ющи и не ка́ющися, ка́ко Судіи́ стра́шному надѣ́ешися предста́ти? Потщи́ся Го́споду возопи́ти: Бо́же, очи́сти мя́.

Отроко́мъ тріе́мъ подо́бящися, попра́ла еси́ о́гнь, богому́драя отрокови́це, тѣ́мже нестерпи́маго огня́ и пла́мене мя́ вѣ́чнаго изба́ви, прибѣга́ющаго въ покро́въ тво́й.

Богоро́диченъ: Во всего́ человѣ́ка обле́кся Всенепоро́чный, кромѣ́ грѣха́, изъ чре́ва Твоего́, Чи́стая, про́йде Плотоно́сецъ, Его́же моли́ вѣ́рою Тя́ чту́щія спасти́.

Инъ.

Ирмо́съ: Пла́мень пе́щный порабо́тиша благочести́віи о́троцы, тѣ́мъ свы́ше ороси́ я́, гото́вы пали́мы по естеству́, но па́че естества́ му́жески поя́ху: благослове́нъ еси́, Го́споди, на престо́лѣ Сла́вы Ца́рствія Твоего́.

Подо́бно Іуди́ѳи сотвори́ла еси́, посредѣ́ кумíрскихъ тѣли́щъ вше́дши, тѣ́хъ нача́льника сокруши́ла еси́ и демоноче́тцы посрами́ла еси́, вся́ же лю́ди научи́ла еси́ въ чистотѣ́ вопи́ти Христу́: благослове́нъ еси́, Го́споди, на престо́лѣ Сла́вы Ца́рствія Твоего́.

Похва́льными цвѣ́ты, а́ки ца́рскій вѣне́цъ, богому́дрѣй твое́й главѣ́ въ па́мять твою́ прино́симъ, ю́же Христо́съ нетлѣ́ніемъ вѣнча́, Ольго досточу́дная, моли́ся за твое́ ста́до, изба́витися отъ вся́каго зла́ вопію́щимъ: благослове́нъ еси́, Го́споди, на престо́лѣ Сла́вы Ца́рствія Твоего́.

Лива́нскую ли го́ру нарече́мъ тя́? На тя́ бо роса́ небе́сная сни́де. Или́ Фисо́нъ рѣку́, добрѣ́йшій сапфи́ръ, ка́мень честны́й, Влади́міра иму́щую, и́мже просвѣти́ся Россíйская земля́? Но моли́теся за ны́, взыва́юще: благослове́нъ еси́, Го́споди, на престо́лѣ Сла́вы Ца́рствія Твоего́.

Богоро́диченъ: Киво́тъ позлаще́нъ Тя́ Ду́хомъ имену́емъ, спа́сшую мíръ отъ пото́па разу́мнаго, Дѣ́во, спаси́ на́съ, на Тя́ бо надѣ́емся и къ Тебѣ́ прибѣга́емъ, отча́янныя въ пучи́нѣ отъ грѣ́хъ и напа́стей изба́ви, вопію́щія: благослове́нъ еси́, Го́споди, на престо́лѣ Сла́вы Ца́рствія Твоего́.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Украси́вшися, сла́вная, му́ками тѣле́сными, Сло́ву кра́сному чи́сто обручи́лася еси́, соблю́дшему тя́ нетлѣ́нну. Тѣ́мже истлѣ́вша мя́ страстьми́ вся́кими кра́сна покажи́ и́скреннимъ покая́ніемъ, я́ко да при́сно тя́ ублажу́, я́ко благу́ю предста́тельницу.

Сви́токъ Бо́жій бы́сть се́рдце твое́, нося́ зако́нъ Бо́жій, напи́санъ Ду́хомъ, и сви́токъ ввѣ́рила еси́ правосла́вія, му́ченице честна́я. Тѣ́мже молю́: лука́вое письмо́, дѣви́це, зо́лъ мои́хъ раздра́вши, въ кни́зѣ написа́ти мя́ моли́, чи́стая, спасе́нныхъ.

Зако́номъ уме́рши естества́, па́че естества́ кро́ви отъ умерщвле́на источа́еши тѣ́ла, жи́зни на́шея борца́ си́ми, честна́я, умертви́вши и вѣ́рнымъ живоно́сное здра́віе да́руюши. Сего́ ра́ди вопію́ ти: умерщвле́нную ду́шу мою́ воскреси́.

Богоро́диченъ: Тя́, Чи́стую и непоро́чную, Дѣ́ва, жела́ющи, непоро́чно и ду́шу и тѣ́ло соблюде́, страсте́й разгорѣ́нія терпѣ́ніемъ опа́льши, искуше́ніе же мно́гихъ претерпѣ́вши му́къ, и ны́нѣ въ небе́сныхъ селе́ніихъ лику́етъ, съ Тобо́ю веселя́щися во вся́ вѣ́ки.

Инъ.

Ирмо́съ: Крѣ́пцы о́троцы тріе́ су́ще, си́лою обо́лкшеся Святы́я Тро́ицы, улови́ша и побѣди́ша халде́и, и ди́вно измѣни́ся естество́: ка́ко о́гнь въ ро́су прелага́шеся? Безъ туги́ я́ сохрани́, я́ко пелена́ми. О, пролія́вый му́дрость на всѣ́хъ дѣ́лѣхъ Твои́хъ Бо́же, Тя́ превозно́симъ во вѣ́ки.

Крѣпка́, я́ко льви́ца, си́лою Свята́го Ду́ха оболче́на, еди́на устреми́ся всю́ду истерза́ти кумíры, и ди́вно на небеси́ и на земли́: ка́ко жена́ пре́жде Бо́га познава́етъ, е́юже испе́рва всему́ ро́ду паде́ніе бы́сть? То́ю же ны́нѣ спасе́ни, пое́мъ: О, пролія́вый му́дрость на всѣ́хъ дѣ́лѣхъ Твои́хъ Бо́же, Тя́ превозно́симъ во вѣ́ки.

Прему́дрость Бо́жія пре́жде о тебѣ́ написа́ла е́сть: се́ еси́ до́брая моя́ и прекра́сная, и поро́ка нѣ́сть въ тебѣ́. Бле́скъ лица́ твоего́, я́ко мѵ́ра обоня́ніе, назна́меноваше твое́, Ольго, креще́ніе, е́же посредѣ́ кумíрскія ле́сти на тебѣ́ обоня́ Христо́съ и всѣ́хъ на́съ отъ смра́да де́монского къ покая́нію ми́лостію Свое́ю приве́лъ е́сть.

Помяни́ мене́, госпоже́ Ольго, убо́гаго твоего́ раба́, окра́деннаго отъ врага́ и согрѣши́вшаго па́че человѣ́къ, и помоли́ся Христу́ пода́ти ми́ проще́ніе о всѣ́хъ согрѣше́ніихъ, я́же нечу́вственно содѣ́яхъ, окая́нный, да покая́ніемъ вопію́: О, пролія́вый му́дрость на всѣ́хъ дѣ́лѣхъ Твои́хъ Бо́же, Тя́ превозно́симъ во вѣ́ки.

Богоро́диченъ: Не пре́зри, Дѣ́во, Твои́хъ ра́бъ мольбы́, о Тебѣ́ бо хва́лимся, Твое́ ма́лое ста́до мы́ есмы́, потщи́ся въ заступле́ніе на́ше и изми́ ны́ отъ вра́гъ на́шихъ, уще́дри зна́ющія Тя́ Ма́терь Бо́жію и Сы́ну Твоему́ вопію́щія: О, пролія́вый му́дрость на всѣ́хъ дѣ́лѣхъ Твои́хъ Бо́же, Тя́ превозно́симъ во вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Да Твою́ добро́ту свѣ́тлую, прехва́льная, у́зритъ, Влады́ко, добро́ту презрѣ́ тѣлесе́ и мíра, любо́вію зову́щи: Женише́, Сло́во Отчее, лице́ Твое́ покажи́ ми многорачи́тельное, его́же Боже́ственными добро́тами уя́звлена е́смь.

Утреневала еси́ ко Иже изъ чре́ва Отча пре́жде денни́цы Возсія́вшему и свѣ́тъ была́ еси́, со́лнца мно́жае облиста́ющи. Тѣ́мже мя́ просвѣти́, вопію́, Евфи́міе сла́вная, помраче́ннаго де́монскими лука́выми прило́ги.

Тре́петенъ быва́ю, пріе́мъ во умѣ́ стра́шное суди́ще: дѣя́нія бо стяжа́хъ, вводя́щая мя́ въ лю́тыя му́ки. Яже му́ки го́рькія, му́ченице, претерпѣ́вшая твоего́ ра́ди Рачи́теля, осужде́нія мя́ го́рькаго свободи́.

Боже́ственный вои́стинну сла́вій, и́же ве́сну небе́сную дости́гши, чи́стая ла́стовице, кра́сная го́рлице всехва́льная, голуби́це удобре́ная, лю́тыхъ обстоя́ніи на́съ спаси́ и Бо́жія сла́вы улучи́ти сподо́би.

Богоро́диченъ: Просвѣти́, две́ре свѣ́та, о́чи се́рдца моего́, молю́ся, я́ко да не усну́ въ сме́рть безбо́жныхъ дѣя́ній, да вѣ́рою Тя́ воспою́, да велича́ю Тя́, а́нгеловъ похвало́, и му́ченикъ свяще́нныхъ честно́е сосло́віе.

Инъ.

Ирмо́съ: Изъ Еде́ма изы́де ро́дъ на́шъ пра́бабы ра́ди Евы, при́званъ же Тобо́ю, ро́ждшею на́мъ но́ваго Ада́ма — Христа́, во двою́ естеству́, Дѣ́во Чи́стая. Взыгра́ся Ада́мъ пра́дѣдъ, я́ко избы́въ пе́рвыя кля́твы, мы́ же Тобо́ю хва́лящеся, я́ко Тебе́ ра́ди Бо́га позна́хомъ, и Тебе́ велича́емъ.

Весели́ся, Ево прароди́тельнице, и́же бо, тя́ прельсти́въ, изъ Еде́ма изведе́, ны́нѣ же попра́нъ е́сть твои́мъ исча́діемъ. Се́ бо Ольга, живо́тное дре́во — Кре́стъ Христо́въ, въ Россіи́ водрузи́, и́мже всѣ́мъ вѣ́рнымъ ра́й отве́рзеся, мы́ же хва́лящеся, я́ко тоя́ ра́ди Бо́га позна́хомъ, со Влади́міромъ сію́ велича́емъ.

Жену́ по естеству́ нарица́емъ тя́, но па́че си́лы же́нскія подви́глася еси́. Тмы́ твоего́ зла́та истощи́ла еси́, да Христо́въ зако́нъ и учи́теля пріобря́щеши, и́мже просвѣти́ла еси́ зе́млю Россíйскую, мы́ же тобо́ю хва́лящеся, я́ко тебе́ ра́ди Бо́га позна́хомъ, съ му́ченики тя́ велича́емъ.

Зако́на наста́внице чи́стая и учи́тельнице вѣ́ры Христо́вы, пріими́ похвалу́ отъ ра́бъ недосто́йныхъ и моли́тву о на́съ сотвори́ къ Бо́гу, че́стно творя́щихъ твою́ па́мять, да отъ напа́стей, и бѣ́дъ, и печа́лей, и лю́тыхъ грѣхо́въ свободи́мся, еще́ же и му́къ, жду́щихъ на́съ, изба́ви, мо́лимся ти́, тебе́ непреста́нно велича́ющіи.

Богоро́диченъ: Се́ Це́рковь, се́ две́рь, се́ Бо́жія гора́ свята́я, се́ же́злъ и сосу́дъ зла́тъ, се́ исто́чникъ печа́танъ, се́ ра́й святы́й но́ваго Ада́ма, се́ престо́лъ стра́шный, се́ Ма́ти Бо́жія Пречи́стая, Засту́пница всѣ́хъ на́съ, пою́щихъ Ю.

Свѣти́ленъ. Подо́бенъ: Жены́, услы́шите.

Стра́нно, и пресла́вно, и вели́кое чудодѣ́йство, лю́діе, просла́вите вси́: ка́ко по сме́рти сви́токъ всесвѣ́тлая Евфи́мія пріе́мши сохрани́ и побѣдоно́сцы показа́ правосла́вныя отцы́ въ Халкидо́нстѣмъ гра́дѣ.

Богоро́диченъ:

Прему́дрость Ѵпоста́сную, и Сло́во Пресу́щное, и Врача́ тѣле́съ и ду́шъ ро́ждшая, гное́нія и я́звы души́ моея́ исцѣли́, лю́тыя и лѣ́тныя, и се́рдца моего́ уста́ви болѣ́зни, Дѣ́во.

На хвали́техъ стихи́ры на 4, гла́съ 3. Самогла́сны:

Страстоте́рпческое торжество́, вѣ́рніи, богому́дреннѣ соверша́емо ви́дяще, чу́дному въ совѣ́тѣхъ Бо́гу на́шему, благода́рственно пѣ́ніе воспои́мъ. Ибо неви́димую держа́ву сопроти́вныя си́лы въ же́нскомъ естествѣ́ побѣди́ и Боже́ственную Свою́ си́лу въ не́мощи соверши́въ до́брыя му́ченицы, тоя́ моли́твами спаса́етъ ду́ши на́ша. [Два́жды.]

Истины ча́шу отъ свои́хъ крове́й страда́льческихъ прехва́льная му́ченица Христо́ва поче́рпши и сію́ всегда́ предлага́ющи Це́ркви, въ не́йже церко́вный Пита́тель, прему́дрости гла́сомъ созыва́етъ, глаго́лющи: почерпи́те пи́во воскресе́нія свидѣ́тельное, невѣ́рныхъ отгони́тельное и страсте́й очисти́тельное, благочести́вымъ же душа́мъ храни́тельно, Спа́су зову́щимъ: напои́вый на́съ пото́комъ пи́щи духо́вныя, спаси́ ду́ши на́ша.

Иже кро́вію Христо́вою ду́шу зна́менавшіи въ де́нь избавле́нія, кро́вь святу́ю, отъ му́ченическаго исто́чника кипя́щу на́мъ, съ весе́ліемъ духо́внымъ проро́чески почерпе́мъ, живото́чныхъ страсте́й Спа́совыхъ и присносу́щныя сла́вы образодѣ́тельно. Тѣ́мже Ему́ возопіи́мъ: прославля́емый во святы́хъ Твои́хъ, Го́споди, прехва́льныя Твоея́ страстоте́рпицы моли́твами спаси́ ду́ши на́ша.

Сла́ва, гла́съ 8:

Вся́къ язы́къ да подви́жется къ похвале́нію прехва́льныя Евфи́міи, ве́сь ро́дъ и во́зрастъ вся́къ, ю́ноши и дѣ́вы, Христо́ву дѣ́ву и му́ченицу похвала́ми вѣнча́емъ: зако́нно бо му́жествовавши и сла́бость же́нскую отве́ргши страда́льческими болѣ́зньми мучи́теля врага́ низложи́, небе́снымъ же и боже́ственнымъ вѣнце́мъ украси́вшися, мо́лится Жениху́ и Бо́гу дарова́ти на́мъ ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Тя ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, —* Ча́до сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый милосе́рдіемъ Твои́мъ?

На стихо́внѣ окто́иха.

Та́же глаго́лемъ припѣ́въ: Въ це́рквахъ благослови́те Бо́га, Го́спода отъ исто́чникъ Изра́илевыхъ.

И пое́мъ стихи́ру, гла́съ 8: Ра́дуйся, предѣ́ле вѣ́ры. Ра́дуйся, законоположе́ніе святы́хъ оте́цъ, богоневѣ́сто. Ра́дуйся, тве́рдое храни́ло на́мъ, вѣ́рнымъ. Ра́дуйся, сла́во Це́ркве Христо́вы. Ра́дуйся, дѣ́въ сто́лпе одушевле́нный. Ра́дуйся, ми́рная мѵрополо́жнице сла́вная, ея́же ра́ди вѣ́рнымъ источа́еши исцѣле́нія, му́ченице прехва́льная.

Сла́ва, гла́съ 1:

Дне́сь ли́цы оте́честіи, всехва́льная, собра́вшеся Христа́ ра́ди, сви́токъ тебѣ́ прино́сятъ правосла́вныя вѣ́ры, его́же пріи́мши въ честны́я твоя́ ру́ки, храни́ши до сконча́нія. Тѣ́мже и человѣ́къ ликостоя́нія, соше́дшеся, твое́ страда́ніе почита́емъ, вопію́ще благоче́стно: ра́дуйся, всехва́льная, я́же же́нское естество́ въ му́жеское преложи́вши ополче́ніе. Ра́дуйся, прехва́льная, я́же правосла́вную и отцы́ пре́данную вѣ́ру неврежде́нну сохра́ньши. Ра́дуйся, моля́щаяся о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Всехва́льніи му́ченицы.

Своего́ Агнца* Агница и Непоро́чная Влады́чица* на Крестѣ́ я́ко ви́дѣ,* зра́ка не иму́ща, ниже́ добро́ты,* увы́ Мнѣ́, рыда́ющи, глаго́лаше,* гдѣ́ добро́та Твоя́ за́йде, Сладча́йшій?* гдѣ́ благолѣ́піе,* гдѣ́ благода́ть блиста́ющая* о́браза Твоего́,* Сы́не Мо́й любе́знѣйшій?


НА ЛИТУРГІИ,

Блаже́нна окто́иха, на 4. И Евфи́міи, пѣ́снь 3-я, на 4. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. Аллилу́ія, гла́съ 6: Терпя́, потерпѣ́хъ Го́спода, и вня́тъ ми́, [и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Луки́, зача́ло 33. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 109 об. – 118 об.

/ Къ оглавленію раздѣла /


Наверхъ / Къ титульной страницѣ

0