Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 11-й де́нь.
Слу́жба блаже́ннѣй Ольгѣ, княги́нѣ Ру́сской, во свято́мъ креще́ніи нарече́ннѣй Еле́нѣ.

[НА ВЕЛИЦѢЙ ВЕЧЕРНИ,]
Блаже́нъ му́жъ.., 1-й антифо́нъ. На Го́споди воззва́хъ: стихи́ры [на 8], гла́съ 4. Подо́бенъ: Яко до́бля.

Яко со́лнце, возсія́ на́мъ* пресла́вная па́мять твоя́, Ольго богому́драя,* ма́ти князе́й Ру́сскихъ,* Христо́ва мизи́ница,* апо́стольскимъ уче́ніемъ воспита́на,* возмогла́ еси́ на кумíры,* па́че же на діа́вола,* си́лою Свята́го Ду́ха просвѣща́ема,* отъ тмы́ неразу́мія всю́ страну́* и лю́ди къ Бо́гу привела́ еси́,* Его́же моли́ о творя́щихъ твою́ па́мять. [Два́жды.]

Въ ра́зумѣ духо́вномъ,* и́мже посрами́ла еси́ врага́, прельсти́вшаго Еву,* и сего́ ору́жіе сломи́ла еси́,* богосажде́нный ра́й церко́вный создала́ еси́,* въ не́мже дре́во живо́тное — Кре́стъ, водрузи́ла еси́,* и трапе́зу Бо́жія бра́шна иму́щи,* исто́чникъ неисчерпа́емый кро́ве Христо́вы,* его́же пи́вши, нетлѣ́нна пребыва́еши,* за вся́ ны́ моля́щися при́сно. [Два́жды.]

Духо́вно возвесели́теся, Ру́сскіи концы́,* па́мять чту́ще Ольги богому́дрыя:* моли́тся бо вы́ну ко Христу́* съ чудотво́рцами и му́чениками,* помо́щнину иму́щи Святу́ю Богоро́дицу,* изба́витися отъ бѣ́дъ и печа́лей* вѣ́рою пою́щимъ ю́* и кла́няющимся ра́цѣ нетлѣ́ннаго ея́ тѣ́ла. [Два́жды.]

Пріиди́те, христоимени́тіи лю́діе ру́сскіи,* возвели́чимъ во хвале́ніихъ прама́терь на́шу,* ве́лію му́дрость и му́жество показа́вшую,* сла́ву мíра презрѣ́вшую* и Христа́ Бо́га и́стиннаго па́че всѣ́хъ возлюби́вшую,* и та́ко къ не́й воззове́мъ:* О, пресла́вная уго́днице Христо́ва!* моли́ о лю́дехъ ру́сскихъ,* да ни ко́ими ко́зньми вра́жіими* отъ пра́выя вѣ́ры отвратя́тся* и въ благоче́стіи непоколеби́ми да пребу́дутъ. [Два́жды.]

Сла́ва, гла́съ 6:

Пріиди́те, ро́ди ру́сскіи, пѣ́сньми восхва́лимъ Ольгу прему́друю, пріиди́те, ра́зумомъ богатя́щіися, ра́зумъ сво́й въ послуша́ніе вѣ́ры приводи́ти отъ нея́ научи́теся, пріиди́те, му́жіе, че́сть женѣ́ пресла́внѣй возда́йте, пріиди́те, жены́, му́жеству ея́ вели́кому подража́йте, пріиди́те, владя́щіи, и уразумѣ́йте вся́ земна́я превосходя́щую сла́ву нетлѣ́нную, пріиди́те, вси́ вну́цы ея́, и въ де́нь ея́ свѣ́тло восторжеству́йте, мо́лится бо те́плѣ ко Го́споду, е́же просвѣти́ти ду́ши на́ша.

И ны́нѣ, богоро́диченъ догма́тъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́.

Судíй Изра́илевыхъ чте́ніе. [Главы́ 4 и 5.]

И приложи́ша сы́нове Изра́илевы сотвори́ти зло́е предъ Го́сподемъ, и Ао́дъ у́мре. И отдаде́ и́хъ Госпо́дь въ ру́ку Іави́на, царя́ Ханаа́нска, и́же ца́рствова во Асо́рѣ. И воево́да си́лы его́ Сиса́ра, и то́й живя́ше во Арисо́ѳѣ язы́ковъ. И возопи́ша сы́нове Изра́илевы ко Го́споду, я́ко де́вять со́тъ колесни́цъ желѣ́зныхъ бя́ше ему́ и то́й озло́би Изра́иля зѣло́ лѣ́тъ два́десять. И Девво́ра, жена́ проро́чица, жена́ Лафидо́ѳова, сiя́ судя́ше Изра́илю въ то́ вре́мя и сiя́ живя́ше подъ фи́никомъ Девво́ра между́ Ра́мою и между́ Веѳи́лемъ, въ горѣ́ Ефре́мли, и восхожда́ху сы́нове Изра́илевы къ не́й та́мо на су́дъ. И посла́ Девво́ра, и призва́ Вара́ка сы́на Авинее́мля изъ Кеде́са Нефѳали́мова, и рече́ къ нему́: не заповѣ́да ли тебѣ́ Госпо́дь, Бо́гъ Изра́илевъ, и по́йдеши въ го́ру Ѳаво́ръ и по́ймеши съ собо́ю де́сять ты́сящъ муже́й отъ сыно́въ Нефѳали́млихъ и отъ сыно́въ Завуло́нихъ, и приведу́ къ тебѣ́ въ водоте́чь Кисо́нь Сиса́ру воево́ду си́лы Іави́ни, и колесни́цы его́, и мно́жество [во́й] его́, и преда́мъ его́ въ ру́ки твоя́. И рече́ къ не́й Вара́къ: а́ще по́йдеши со мно́ю, пойду́, и а́ще не по́йдеши со мно́ю, не пойду́, я́ко не вѣ́мъ дне́, въ о́ньже благоустро́итъ Госпо́дь а́нгела со мно́ю. И рече́ Девво́ра къ нему́: иду́щи пойду́ съ тобо́ю, оба́че вѣ́ждь, я́ко не бу́детъ тебѣ́ сла́ва на пути́, въ о́ньже ты́ и́деши, поне́же въ ру́ку же́нску преда́стъ Госпо́дь Сиса́ру. И воста́ Девво́ра и по́йде съ Вара́комъ до Ка́диса. И воззва́ Вара́къ Завуло́на и Нефѳали́ма до Ка́диса, и поидо́ша вслѣ́дъ его́ де́сять ты́сящъ муже́й, и и́де съ ни́мъ Девво́ра. И Хаве́ръ Кине́й отлучи́ся отъ Ке́ны и отъ сыно́въ Іова́ва, у́жика Моисе́ова, и потче́ ку́щу свою́ подъ ду́бомъ почива́ющихъ, и́же е́сть при Кеде́сѣ. И возвѣсти́ша Сиса́рѣ, я́ко взы́де Вара́къ сы́нъ Авинее́мль на го́ру Ѳаво́ръ. И созва́ Сиса́ра вся́ колесни́цы своя́, де́вять со́тъ колесни́цъ желѣ́зныхъ, и вся́ лю́ди, и́же съ ни́мъ, отъ Арисо́ѳа язы́ковъ въ водоте́чь Кисо́нь. И рече́ Девво́ра къ Вара́ку: воста́ни, я́ко се́й де́нь, въ о́ньже предаде́ Госпо́дь Сиса́ру въ ру́ку твою́, зане́ Госпо́дь изы́детъ предъ тобо́ю. И сни́де Вара́къ съ горы́ Ѳаво́ръ, и де́сять ты́сящъ муже́й вслѣ́дъ его́. И сотре́ Госпо́дь Сиса́ру и вся́ колесни́цы его́ и ве́сь по́лкъ его́ о́стрiемъ меча́ предъ Вара́комъ. И сни́де Сиса́ра съ колесни́цы своея́ и побѣже́ нога́ми свои́ми. И Вара́къ гоня́й вслѣ́дъ колесни́цъ его́ и вслѣ́дъ полка́, да́же до дубра́вы язы́ковъ. И паде́ ве́сь по́лкъ Сиса́ринъ о́стрiемъ меча́, не оста́ся ни еди́нъ. И Сиса́ра убѣже́ нога́ми свои́ми въ ку́щу Іаи́ли, жены́ Хаве́ра Кине́ева: я́ко ми́ръ бя́ше между́ Іави́номъ царе́мъ Асо́рскимъ, и между́ до́момъ Хаве́ра Кине́ева. И изы́де Іаи́ль во срѣ́тенiе Сиса́рѣ и рече́ къ нему́: уклони́ся, господи́не мо́й, уклони́ся ко мнѣ́, не бо́йся. И уклони́ся къ не́й въ ку́щу, и покры́ его́ оде́ждею свое́ю. И рече́ Сиса́ра къ не́й: напо́й мя́ ма́ло воды́, я́ко возжажда́хъ. И отрѣши́ мѣ́хъ мле́чный, и напои́ его́, и покры́ его́. И рече́ къ не́й Сиса́ра: ста́ни во две́рехъ ку́щи, и бу́детъ, а́ще кто́ прiи́детъ къ тебѣ́, и вопро́ситъ тя́, и рече́тъ: е́сть ли здѣ́ му́жъ? и рече́ши: нѣ́сть. И взя́ Іаи́ль, жена́ Хаве́рова, ко́лъ ку́щный, и взя́ мла́тъ въ ру́ку свою́, и вни́де къ нему́ ти́хо, и водрузи́ ко́лъ во скра́нiи его́, и пронзе́ до земли́, и се́й, утру́ждся, спа́ше и и́здше. И се́ Вара́къ, гоня́й Сиса́ру. И изы́де Іаи́ль во срѣ́тенiе ему́ и рече́ ему́: прiиди́, и покажу́ тебѣ́ му́жа, его́же ты́ и́щеши. И вни́де къ не́й, и се́ Сиса́ра лежа́ше ме́ртвъ, и ко́лъ во скра́нiи его́. И покори́ Госпо́дь Бо́гъ въ то́й де́нь Іави́на, царя́ Ханаа́ня предъ сы́ны Изра́илевыми, и хожда́ше рука́ сыно́въ Изра́илевыхъ, ходя́щи, и ожесточи́ся на Іави́на, царя́ Ханаа́нска, до́ндеже истреби́ша его́. И воспѣ́ Девво́ра и Вара́къ, сы́нъ Авинее́мовъ, въ то́й де́нь, и рече́: внегда́ нача́ти вождо́мъ во Изра́или, въ произволе́нiи людíй, благослови́те Го́спода. Услы́шите, ца́рiе, и внуши́те, кня́зи, а́зъ Го́сподеви воспою́ и пою́ Бо́гу Изра́илеву. Го́споди, во исхо́дѣ Твое́мъ отъ Сіи́ра, внегда́ воздвиза́тися Тебѣ́ отъ села́ Едо́мова, земля́ потрясе́ся, и не́бо возмути́ся, и о́блацы иска́паша во́ду. Го́ры подвиго́шася отъ лица́ Го́спода Елои́, та́я Сина́ отъ лица́ Го́спода, Бо́га Изра́илева. Во дни́ Самега́ра, сы́на Ана́ѳова, во дни́ Іаи́ли, оскудѣ́ша путiе́, и идо́ша въ пути́ кри́вы, и идо́ша въ пути́ развраще́нны. Оскудѣ́ша живу́щiи во Изра́или, оскудѣ́ша, до́ндеже воста́ Девво́ра, до́ндеже воста́ ма́ти во Изра́или, избра́ша бо́ги но́вы, я́ко хлѣ́бъ я́ченъ, тогда́ воева́ша гра́ды князе́й, щи́тъ не яви́ся, ниже́ копiе́ въ четы́редесяти ты́сящахъ во Изра́или. Се́рдце мое́ на учине́нная во Изра́или, си́льнiи людíй, благослови́те Го́спода. Ѣздящiи на осля́техъ бѣ́лыхъ въ полу́дне, и сѣдя́щiи на суди́щи, и ходя́щiи на пути́ со́нмовъ, провѣща́йте. Гла́съ пле́щущихъ посредѣ́ веселя́щихся: та́мо дадя́тъ пра́вду. Го́споди, пра́вды укрѣпи́ во Изра́или: тогда́ разыдо́шася во гра́ды своя́ лю́дiе Госпо́дни. Воста́ни, воста́ни, Девво́ра; воста́ни, воста́ни, глаго́ли съ пѣ́снiю; воста́ни, Вара́че, и плѣни́ плѣ́нъ тво́й, сы́не Авинее́мль.

Іуди́ѳи чтеніе. [Глава 13.]

Оста́ся же Іуди́ѳъ еди́на въ шатрѣ́ и Олофе́рнъ пове́рженъ на ло́жи свое́мъ, бя́ше бо преиспо́лненъ вино́мъ. И рече́ Іуди́ѳъ рабѣ́ свое́й, да стои́тъ внѣ́ ло́жницы ея́ и да смо́тритъ исхо́да ея́, я́коже по вся́къ де́нь, рече́ бо, я́ко изы́ти и́мать на моли́тву свою́ и Ваго́ю глаго́ла по словесе́мъ си́мъ. И отыдо́ша вси́ отъ лица́ ея́, и ни еди́нъ оста́ся въ ло́жницѣ отъ ма́ла да́же до вели́ка. И ста́вши Іуди́ѳъ при одрѣ́ его́, рече́ въ се́рдцы свое́мъ: Го́споди Бо́же всея́ си́лы, при́зри въ ча́съ се́й на дѣла́ ру́къ мои́хъ ко возвыше́нiю Іерусали́ма, я́ко ны́нѣ́ вре́мя помоществова́ти наслѣ́дiю Твоему́ и соверши́ти начина́нiе мое́ ко сокруше́нiю враго́въ, и́же воста́ша на на́съ. И приступи́вши къ сто́лпнику одра́, и́же бя́ше у главы́ Олофе́рновы, сня́тъ ме́чь его́ съ него́, и, прибли́жившися ко одру́, взя́ въ го́рсть власы́ главы́ его́ и рече́: укрѣпи́ мя, Го́споди Бо́же Изра́илевъ, въ де́нь се́й. И уда́ри въ вы́ю его́ два́жды си́лою сво́ею, и отъя́ главу́ его́ отъ него́, и отвали́ тѣ́ло его́ отъ посте́ли, и отъя́ завѣ́су отъ столпо́въ, и по ма́лѣ изы́де, и предаде́ рабы́ни свое́й главу́ Олофе́рнову. И вложи́ ю́ въ мѣше́цъ снѣ́дей свои́хъ. И изыдо́стѣ о́бѣ ку́пно по обы́чаю своему́ на моли́тву, и прошедшѣ по́лкъ, обыдо́стѣ де́брь о́ную, и взыдо́стѣ на го́ру Ветилу́и, и прiидостѣ ко врато́мъ ея́. И рече́ Іуди́ѳъ издале́ча стрегу́щимъ на вратѣ́хъ: отве́рзите ны́нѣ, отве́рзите врата́, съ на́ми Бо́гъ, Бо́гъ на́шъ, сотвори́ти еще́ крѣ́пость во Изра́или и си́лу на враги́, я́коже и дне́сь сотвори́. И бы́сть я́ко услы́шаша му́жiе гра́да того́ гла́съ ея́, потща́шася сни́ти ко врато́мъ гра́да своего́ и созва́ша ста́рцевъ гра́да. И стеко́шася вси́ отъ ма́ла да́же до вели́ка, я́ко па́че ча́янiя бѣ́ имъ, е́же прiити́ е́й, и отверзо́ша врата́ и воспрiя́ша и́хъ, и, вже́гше о́гнь во свѣще́нiе, окружи́ша и́хъ. Она́ же рече́ къ ни́мъ гла́сомъ вели́кимъ: хвали́те Бо́га, хвали́те, хвали́те Бо́га, Иже не отста́ви ми́лости Своея́ отъ до́му Изра́илева, но сокруши́ враги́ на́шя руко́ю мое́ю въ но́щь сiю́. И, изъе́мши главу́ изъ мѣшца́, показа́, и рече́ и́мъ: се́ глава́ Олофе́рна, вождонача́лника си́лы Ассу́рскiя, и се́ завѣ́са, за не́юже лежа́ше во пiя́нствахъ свои́хъ, и порази́ его́ Госпо́дь руко́ю же́нскою. И жи́въ е́сть Госпо́дь, Иже сохрани́ мя въ пути́ мое́мъ, и́мже ходи́хъ, я́ко прельсти́ его́ лице́ мое́ въ па́губу его́, и не сотвори́ грѣха́ со мно́ю во оскверне́нiе и срамоту́. И ужасо́шася вси́ лю́дiе зѣло́, и, па́дше, поклони́шася Бо́гу, и рѣ́ша единоду́шно: благослове́нъ еси́, Бо́же на́шъ, уничто́живый въ день се́й враги́ людíй Твои́хъ. И рече́ е́й Озíя: благослове́на ты́ еси́, дщи́, Бо́гомъ Вы́шнимъ па́че всѣ́хъ же́нъ, я́же на земли́, и благослове́нъ Госпо́дь Бо́гъ, Иже созда́ небеса́ и зе́млю, Иже упра́ви тя́ на сокруше́нiе главы́ кня́зя враго́въ на́шихъ. Яко не отста́нетъ наде́жда твоя́ отъ се́рдца человѣ́къ, помина́ющихъ крѣ́пость Бо́жiю, да́же до вѣ́ка, и да сотвори́тъ тебѣ́ сiя́ Бо́гъ въ возноше́нiе вѣ́чное, е́же посѣща́ти тя́ во благи́хъ, за е́же не пощадѣ́ла еси́ души́ твоея́ смире́нiя ра́ди ро́да на́шего, но посо́бствовала еси́ паде́нiю на́шему, въ правотѣ́ ходи́вши предъ Бо́гомъ на́шимъ. И рѣ́ша вси́ лю́дiе: бу́ди, бу́ди.

При́тчей чте́ніе. [Глава́ 31.]

Жену́ до́блю кто́ обря́щетъ, дража́йши е́сть ка́менія многоцѣ́ннаго такова́я. Дерза́етъ на ню́ се́рдце му́жа ея́: такова́я до́брыхъ коры́стей не лиши́тся. Дѣ́лаетъ бо му́жу своему́ блага́я во все́ житіе́. Обрѣ́тши во́лну и ле́нъ, сотвори́ благопотре́бную рука́ма свои́ма.

На литíи стихи́ры, гла́съ 1:

Дне́сь созыва́ется къ весе́лію вся́ Ру́сская земля́, наста́ бо па́мять прама́тере на́шея, ко свѣ́ту Христо́вы вѣ́ры на́съ приве́дшія, и пу́ть спасе́нія на́мъ показа́вшія, и благострое́нію держа́вы на́шея нача́ло положи́вшія.

Сла́ва, гла́съ 6:

Дне́сь да торжеству́емъ, бра́тіе, и да пра́зднуемъ па́мять святы́я Ольги, не пѣ́сньми то́кмо прама́терь на́шу сла́вяше, но и дѣ́лы христіа́нскими сла́ву Го́сподеви воздаю́ще, отри́немъ про́чее язы́ческое нра́ва на́шего и нечести́вое житія́ на́шего отве́ржемъ, да не до конца́ прогнѣ́вается Человѣколю́бецъ Госпо́дь грѣ́хъ ра́ди на́шихъ.

И ны́нѣ, богоро́диченъ, гла́съ то́йже:

Творе́цъ и Изба́витель [мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 8. Подо́бенъ: О, пресла́внаго чудесе́!>

О, пресла́внаго чудесе́!* жено́ю па́дшій ро́дъ человѣ́ческій* Жено́ю возставля́етъ пречу́дно Человѣколю́бецъ Госпо́дь* и въ послѣ́дняя лѣ́та жену́ посыла́етъ* на обраще́ніе ро́да ру́сскаго,* Ольгу пресла́вную,* ея́же креще́ніемъ нача́ло полага́етъ* просвѣще́нію страны́ Ру́сскія* во спасе́ніе ду́шъ на́шихъ.

Сти́хъ: Бли́зъ Госпо́дь всѣ́мъ, призыва́ющимъ Его́,* всѣ́мъ, призыва́ющимъ Его́ во и́стинѣ.

Ра́дуйся, гра́дѣ богоспаса́емый Кíеве,* всѣ́мъ конце́мъ земли́ на́шея* свѣ́тъ Христо́въ источи́вый* и пе́рвую уго́дницу въ не́й показа́вый,* Ольгу пречестну́ю;* ра́дуйся, Вышегра́де, наслѣ́діе ея́ честно́е;* ра́дуйся, же́нъ ру́сскихъ сосло́віе,* похвалу́ на́шу да́вшее* во спасе́ніе ду́шъ на́шихъ.

Сти́хъ: Во́лю боя́щихся Его́ сотвори́тъ,* и моли́тву и́хъ услы́шитъ, и спасе́тъ я́.

Возвесели́ся, непло́дная Ру́сская земле́,* лику́й, нечревоболѣ́вшая:* ны́нѣ ражда́еши ча́до твое́ —* Еле́ну блаже́нную,* та́ же призове́тъ ко Го́споду отца́ на́шего Васи́лія* и подража́ти себѣ́ приведе́тъ ли́ки уго́дниковъ Его́,* по́двиги свои́ми просла́вити иму́щихъ* гра́ды и де́бри твоя́,* во спасе́ніе ду́шъ на́шихъ.

Сла́ва, гла́съ то́йже:

Ве́лія сла́ва твоя́, и па́мять твоя́ съ похвала́ми, Ольго прему́драя, тщету́ и́доловъ презрѣ́вши и и́стину ева́нгельскую уразумѣ́вши, въ сѣди́нахъ у́мъ тво́й Христу́ въ послуша́ніе плѣни́ла еси́ и всѣ́мъ родо́мъ ру́сскимъ пу́ть и́стинный живота́ показа́ла еси́, моли́ о на́съ Еди́наго Человѣколю́бца.

И ны́нѣ, богоро́диченъ, гла́съ то́йже:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Тропа́рь, гла́съ 1:

Крила́ми богоразу́мія впери́вши тво́й у́мъ, возлетѣ́ла еси́ превы́ше ви́димыя тва́ри, взыска́вши Бо́га и Творца́ вся́ческихъ, и, Того́ обрѣ́тши, па́ки рожде́ніе креще́ніемъ прія́ла еси́, дре́ва живо́тнаго наслажда́ющися, нетлѣ́нна во вѣ́ки пребыва́еши, Ольго присносла́вная.


НА УТРЕНИ,
[На Бо́гъ Госпо́дь: Тропа́рь святы́я, два́жды. Сла́ва, и ны́нѣ, богоро́диченъ: Гавріи́лу вѣща́вшу...]

По 1-мъ стихосло́віи сѣда́ленъ, гла́съ 3:

Вои́стинну въ жена́хъ мудрѣ́йшею показа́лася еси́, Ольго сла́вная, ле́сть язы́ческую отве́ргши, и во Христа́ вѣ́ровавши, и Влади́міра къ тому́ подви́гши; не забу́ди у́бо, я́ко прама́ти, на́съ, недосто́йныхъ ча́дъ твои́хъ, и утверди́ въ правовѣ́ріи и благоче́стіи богоуго́дными твои́ми моли́твами. [Два́жды.]

Сла́ва, и ны́нѣ, богоро́диченъ:

Зло́бою ожестѣ́вшая сердца́ на́ша умягчи́, Дѣ́во Пречи́стая, печа́ли на́ша утоли́, я́ко мно́ги ско́рби у Креста́ Сы́на Твоего́ претерпѣ́вшая, и проше́нія на́ша услы́ши, я́ко Блага́я Скоропослу́шница.

По 2-мъ стихосло́віи сѣда́ленъ, гла́съ 4:

Отъ Го́спода стопы́ человѣ́ку исправля́ются; тѣ́мъ и тебе́, свята́я Ольго, напра́ви сердца́ Испыту́яй и утро́бы къ Ца́рствію небе́сному, его́же да не лиши́тъ и на́съ моли́твами твои́ми. [Два́жды.]

Сла́ва, и ны́нѣ, богоро́диченъ:

Упова́ніе христіа́нъ непосты́дное и стѣно́ необори́мая, Влады́чице Богоро́дице, не отри́ни моле́ній къ Тебѣ́ прибѣга́ющихъ, но, я́ко Блага́я, заступи́ и поми́луй на́съ.

Велича́ніе:

Велича́емъ тя́, блаже́нная и равноапо́стольная княги́не Ольго, и чте́мъ святу́ю па́мять твою́, и́долы попра́вшую и мно́гія лю́ди ру́сскія святы́мъ креще́ніемъ просвѣти́вшую.

Псало́мъ избра́нный: Блаже́нъ му́жъ...

По поліеле́и сѣда́ленъ, гла́съ 5:

Досто́йно равноапо́стольныя цари́цы и́менемъ нарече́на еси́, блаже́нная, о́ной бо, Кре́стъ Христо́въ прилѣ́жно взыска́вшей, подража́ла еси́, Христа́ Бо́га и́стиннаго взыска́вши и Кре́стъ Того́ на себе́ возло́жши, Его́же моли́ и́го благо́е Креста́ понести́ и на́мъ, грѣхи́ обремене́ннымъ, и упова́ніе небе́сное улучи́ти. [Два́жды.]

Сла́ва, и ны́нѣ, богоро́диченъ:

Отны́нѣ ублажа́тъ Мя́ вси́ ро́ди, — рекла́ еси́, Пречи́стая Дѣ́во, отъ пра́ведныя Елисаве́тъ цѣлова́ніе пріе́мши; тѣ́мъ у́бо и мы́ отъ оте́цъ на́шихъ, я́ко Богоро́дицу и Ма́терь Свѣ́та, Тя́ пѣ́ти научи́хомся.

Степе́нна, 1-й антифо́нъ 4-го гла́са. Проки́менъ, гла́съ 4: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ. Стихъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Вся́кое дыха́ніе... Ева́нгеліе отъ Матѳе́я, зача́ло 104.

По 50-мъ псалмѣ́ стихи́ра, гла́съ 6:

Провозвѣ́стницу вѣ́ры и ко спасе́нію путеводи́тельницу богоизбра́нную, Ольгу прему́друю восхва́лимъ и пѣ́сньми почти́мъ святу́ю па́мять ея́, мо́лится бо со всѣ́ми святы́ми земли́ на́шея о спасе́ніи ду́шъ на́шихъ.

Кано́нъ [Богоро́дицы со ирмосо́мъ на 6 и и святы́я на 8], гла́съ 5.

Пѣ́снь 1.

Ирмо́съ: Велича́ваго фарао́на въ мо́ри потопи́вша со ору́жіемъ и вса́дники, Изра́иля же пресла́вно спа́сша и по су́ху прове́дша, пое́мъ Христа́, я́ко просла́вися.

Вели́чіе на́ше и похвала́ ты́ еси́, Ольго богому́драя: тобо́ю бо отъ и́дольскія ле́сти свободи́хомся. Ны́нѣ моли́ся за ро́дъ и ро́ды, и́хже Бо́гу привела́ еси́, пою́щи Христа́, я́ко просла́вися.

Велича́ваго діа́вола изъ оте́чества прогна́ла еси́, нечести́выя кумíры отню́дъ сокруши́вши, вся́ лю́ди отъ беззако́нія свободи́ла еси́, му́дростію науча́ющи пѣ́ти Христа́, я́ко просла́вися.

Че́рность грѣхо́вную ба́нею креще́нія отню́дъ отмы́ла еси́, Христа́ возлюби́ла еси́, Ему́же предстоя́щи, моли́ся за рабы́ твоя́, вѣ́рно сла́вящія тя́.

Богоро́диченъ: Иса́ія Тя́ же́злъ нарица́етъ, Пречи́стая, Дави́дъ же Тя́ — престо́лъ Госпо́день, Авваку́мъ — пріосѣне́нную го́ру, купину́ же Тя́ — Моисе́й, мы́ же Тя́ Ма́терь Бо́жію нарица́емъ.

Пѣ́снь 3.

Ирмо́съ: Держа́вною руко́ю и си́льнымъ сло́вомъ не́бо и зе́млю сотвори́лъ еси́, ю́же Твое́ю кро́вію искупи́лъ еси́, Це́рковь Твою́, я́же о Тебѣ́ утвержда́ется, зову́щи: я́ко нѣ́сть свя́тъ, ра́звѣ Тебе́, Го́споди.

Держа́вною руко́ю, и му́дрыми словесы́, и си́льнымъ сло́вомъ учи́ла еси́ твоего́ сы́на зако́ну Христо́ву и лю́демъ возбрани́ла еси́ жре́ти и́доломъ, Ольго пресла́вная, въ па́мять твою́ ны́нѣ соше́дшеся, тебе́ прославля́емъ.

Ты́, я́ко пчела́, добру́ ра́зуму дале́че цвѣту́щія Христо́вы вѣ́ры взыска́ла еси́ и, я́ко поро́дный ме́дъ, креще́ніе въ Ца́рствующемъ гра́дѣ обрѣ́тши, твоему́ гра́ду и лю́демъ дарова́ла еси́, его́же вси́ насыще́ны го́рести грѣха́ отбѣга́ютъ.

Похва́льный гла́съ и мольбу́ ти, Ольго, прино́симъ, тобо́ю бо Бо́га позна́хомъ, Ему́же ны́нѣ предстои́ши, проси́ ми́ра оте́честву, и на пога́ныя побѣ́ды, и душа́мъ на́шимъ оставле́нія грѣхо́въ, пою́щимъ тя́, присноблаже́нная.

Богоро́диченъ: Прія́телище яви́лася еси́, Дѣ́во, непристу́пнаго Бо́га, тѣ́мъ Тя́ пою́тъ непреста́нно а́нгельстіи чи́ни, повину́ющеся Влады́цѣ. Ты́ бо родила́ еси́ Сло́во Отчее, Собезнача́льное, безъ отца́: О, чу́до! Святы́й бо Ду́хъ осѣни́ Тя.

Сѣда́ленъ, гла́съ 3:

По́двигъ тво́й чте́мъ, блаже́нная, ди́вна бо крѣ́пость ду́ха твоего́, въ не́мощи тѣлесе́ я́вльшаяся; язы́ческую ле́сть презрѣ́вши, дерзнове́нно вѣ́ру проповѣ́дала еси́ Христо́ву, о́бразъ на́мъ подаю́щи ре́вности о Го́сподѣ. [Два́жды.]

Сла́ва, и ны́нѣ, богоро́диченъ:

Иже неизрече́нно отъ чи́стыхъ крове́й Твои́хъ Воплоти́выйся престо́лъ угото́ва во чре́вѣ Твое́мъ, Пречи́стая Отрокови́це, Юже вси́ ро́ди, я́ко Богоро́дицу, досто́йно сла́вятъ.

Пѣ́снь 4.

Ирмо́съ: Ду́хомъ Бо́жіимъ очи́щся проро́къ, дыха́ющимъ въ не́мъ, Авваку́мъ боже́ственный, боя́ся, глаго́лаше: внегда́ прибли́жатся лѣ́та, позна́нъ бу́деши, Бо́же, на спасе́ніе человѣ́ковъ.

Ду́хъ Бо́жій почи́ на тебѣ́, я́ко на Девво́рѣ проро́чицѣ дре́вле, Имже просвѣти́вшися, укрѣпля́ющи Влади́міра, разу́мнаго Сиса́ру — діа́вола низложи́ла еси́ въ сѣ́ти его́ креще́ніемъ, я́ко и Вара́комъ въ пото́цѣ Ки́ссовѣ пре́жде.

Быстринѣ́ подо́бящися, Ольго богому́драя, сокруше́ннымъ се́рдцемъ ста́, моля́щися къ Бо́гу, изба́вила еси́ ро́дъ твои́хъ люде́й отъ оскорбле́нія кумíрскаго и отъ плѣне́нія вра́жія свободи́ла еси́, Христа́ призыва́ющи на по́мощь на́шу.

Въ наро́читый де́нь свята́го твоего́ преставле́нія ра́достно пра́зднуемъ, пѣ́снь моле́бную Христу́ возсыла́юще, нетлѣ́ннымъ вѣнце́мъ вѣнча́вшему тя́, Ольго богому́драя: проси́ на́мъ оставле́нія грѣхо́въ, сла́вящимъ тя́ вѣ́рно.

Богоро́диченъ: Тя́, отъ ко́рене Іессе́ева процвѣ́тшую, Иса́ія я́коже прорече́, Христа́ — Цвѣ́тъ прозя́бшую, и Первонача́льнаго пло́тію носи́вшую, и Же́злъ Бо́жія Ду́ха, хва́лимъ Тя́, я́ко Бо́жію Ма́терь и Чи́стую Дѣ́ву.

Пѣ́снь 5.

Ирмо́съ: Сло́во Бо́жіе Всеси́льное, ми́ръ всему́ мíру посли́ и свѣ́томъ и́стиннымъ освѣща́я и просвѣща́я вся́, изъ но́щи Тя́ сла́вящія.

Яко голуби́ца цѣлому́дренная, на фи́никсъ добродѣ́телей возшла́ еси́, крилѣ́ свя́щеннѣ посре́бреннѣ иму́щи, и́миже возлетѣ́вши, въ ра́йстѣй ку́щи возгнѣзди́лася еси́, сла́вная Ольго.

О тебѣ́ поя́ше Соломо́нъ пре́жде: внѣ́ виногра́да ца́рская ма́слина процвѣте́; ты́ бо святы́й гре́знъ креще́ніемъ въ Руси́ насади́ла еси́, творя́щи пло́дъ покая́нія, о не́мже Са́мъ Христо́съ весели́тся.

Умилосе́рдися, Влады́ко, на новопросвѣще́нныя лю́ди Твоя́, не преда́ждь на́съ въ ру́ки пога́ныхъ за мно́жество беззако́ній на́шихъ, но моли́твами наста́вницы на́шея Ольги изба́ви ны́ отъ вся́кія напа́сти.

Богоро́диченъ: Кропи́те вси́, я́коже пи́шется, о́блацы весе́лія, земны́мъ: Бо́жій бо Дѣ́тищь — Христо́съ, очища́яй мíръ отъ грѣхо́въ, воплоти́ся отъ Дѣ́вы и да́нъ бы́сть на́мъ.

Пѣ́снь 6.

Ирмо́съ: Въ Це́рковь небе́сную святу́ю Твою́ да пріи́детъ моли́тва моя́, вопію́ Ти, я́ко Іо́на, изъ глубины́ се́рдца морска́го: отъ грѣ́хъ мои́хъ возведи́ мя, молю́ся Тебѣ́, Го́споди.

Ре́вность Свята́го Ду́ха въ се́рдцы пріе́мши, оте́ческое зловѣ́ріе возненави́дѣла еси́, и, Христа́ и́стиннаго Бо́га взыска́вши, ча́до свѣ́та яви́лася еси́, и съ пе́рвенцы святы́хъ на небесѣ́хъ лику́еши.

Но́вая учени́ца Христо́ва въ Руси́ яви́лася еси́, обходя́щи гра́ды и се́ла, кумíры сокруша́ющи и лю́ди уча́щи еди́ному Бо́гу покланя́тися, Его́же моли́ за пою́щія тя́.

О, богоблаже́нная Ольго, помоли́ся за твоя́ ча́да къ Бо́гу: ми́ръ неподви́жимый оте́честву на́шему испроси́ и на́мъ отпуще́ніе грѣхо́въ, при́сно тя́ прославля́ющимъ.

Богоро́диченъ: Позна́вше Тобо́ю неопи́санное Сло́во Бо́жіе, Сы́на Единоро́днаго Вседержи́телева, вопіе́мъ Ти́, земнíи: ра́дуйся, благослове́нная Богоро́дице, упова́ніе ду́шъ на́шихъ.

Конда́къ, гла́съ 4. Подо́бенъ: Яви́лся еси́ дне́сь.

Воспое́мъ дне́сь Благодѣ́теля всѣ́хъ Бо́га, просла́вльшаго въ Россíи Ольгу богому́друю, да моли́твами ея́ пода́стъ душа́мъ на́шимъ грѣхо́въ оставле́ніе.

Икосъ:

Христіа́нъ житія́ ви́дящи и непотре́бство язы́ческое уразумѣва́ющи, си́це въ себѣ́ рекла́ еси́, Ольго богому́драя: О, бе́здна прему́дрости и бла́гости всѣ́хъ Творца́! Ка́ко утаи́лся еси́ отъ мене́ досе́лѣ? Ка́ко возмогу́ и́долы отны́нѣ чти́ти? Никто́же бо, сла́дкаго вкуси́въ, восхо́щетъ го́рькаго, сего́ ра́ди, а́ще и въ ста́рости, призови́ мя, Свята́я Тро́ице, и пода́ждь ми́ грѣхо́въ оставле́ніе.

Пѣ́снь 7.

Ирмо́съ: Пла́мень пе́щный порабо́тиша благочести́віи о́троцы, тѣ́мъ свы́ше ороси́ я́, гото́вы пали́мы по естеству́, но па́че естества́ му́жески поя́ху: благослове́нъ еси́, Го́споди, на престо́лѣ Сла́вы Ца́рствія Твоего́.

Подо́бно Іуди́ѳи сотвори́ла еси́, посредѣ́ кумíрскихъ тѣли́щь вше́дши, тѣ́хъ нача́льника сокруши́ла еси́ и демоноче́тцы посрами́ла еси́, вся́ же лю́ди научи́ла еси́ въ чистотѣ́ вопи́ти Христу́: благослове́нъ еси́, Го́споди, на престо́лѣ Сла́вы Ца́рствія Твоего́.

Похва́льными цвѣ́ты, а́ки ца́рскій вѣне́цъ, богому́дрѣй твое́й главѣ́ въ па́мять твою́ прино́симъ, ю́же Христо́съ нетлѣ́ніемъ вѣнча́, Ольго досточу́дная, моли́ся за твое́ ста́до, изба́витися отъ вся́каго зла́ вопію́щимъ: благослове́нъ еси́, Го́споди, на престо́лѣ Сла́вы Ца́рствія Твоего́.

Лива́нскую ли го́ру нарече́мъ тя́? На тя́ бо роса́ небе́сная сни́де. Или́ Фисо́нъ рѣку́, добрѣ́йшій сапфи́ръ, ка́мень честны́й, Влади́міра иму́щую, и́мже просвѣти́ся Ру́сская земля́? Но моли́теся за ны́, взыва́ющія: благослове́нъ еси́, Го́споди, на престо́лѣ Сла́вы Ца́рствія Твоего́.

Богоро́диченъ: Киво́тъ позлаще́нъ Тя́ Ду́хомъ имену́емъ, спа́сшую мíръ отъ пото́па разу́мнаго, Дѣ́во, спаси́ на́съ, на Тя́ бо надѣ́емся и къ Тебѣ́ прибѣга́емъ, отча́янныя въ пучи́нѣ отъ грѣ́хъ и напа́стей изба́ви, вопію́щія: благослове́нъ еси́, Го́споди, на престо́лѣ Сла́вы Ца́рствія Твоего́.

Пѣ́снь 8.

Ирмо́съ: Крѣ́пцы о́троцы тріе́ су́ще, си́лою обо́лкшеся Святы́я Тро́ицы, улови́ша и побѣди́ша халде́и, и ди́вно измѣни́ся естество́: ка́ко о́гнь въ ро́су прелага́шеся? Безъ туги́ я́ сохрани́, я́ко пелена́ми. О, пролія́вый му́дрость на всѣ́хъ дѣ́лѣхъ Твои́хъ Бо́же, Тя́ превозно́симъ во вѣ́ки.

Крѣпка́, я́ко льви́ца, си́лою Свята́го Ду́ха оболче́на, еди́на устреми́ся всю́ду истерза́ти кумíры, и ди́вно на небеси́ и на земли́: ка́ко жена́ пре́жде Бо́га познава́етъ, е́юже испе́рва всему́ ро́ду паде́ніе бы́сть? То́ю же ны́нѣ спасе́ни, пое́мъ: О, пролія́вый му́дрость на всѣ́хъ дѣ́лѣхъ Твои́хъ Бо́же, Тя́ превозно́симъ во вѣ́ки.

Прему́дрость Бо́жія пре́жде о тебѣ́ написа́ла е́сть: се́ еси́ до́брая моя́ и прекра́сная, и поро́ка нѣ́сть въ тебѣ́. Сія́ніе лица́ твоего́, я́ко мѵ́ра обоня́ніе, назна́меноваше твое́, Ольго, креще́ніе, е́же посредѣ́ кумíрскія ле́сти на тебѣ́ обоня́ Христо́съ и всѣ́хъ на́съ отъ смра́да де́монского къ покая́нію ми́лостію Свое́ю приве́лъ е́сть.

Помяни́ мене́, госпоже́ Ольго, убо́гаго твоего́ раба́, окра́деннаго отъ врага́ и согрѣши́вшаго па́че человѣ́къ, и помоли́ся Христу́ пода́ти ми́ проще́ніе о всѣ́хъ согрѣше́ніихъ, я́же нечу́вственно содѣ́яхъ, окая́нный, да покая́ніемъ вопію́: О, пролія́вый му́дрость на всѣ́хъ дѣ́лѣхъ Твои́хъ Бо́же, Тя́ превозно́симъ во вѣ́ки.

Богоро́диченъ: Не пре́зри, Дѣ́во, Твои́хъ ра́бъ мольбы́, о Тебѣ́ бо хва́лимся, Твое́ ма́лое ста́до мы́ есмы́, потщи́ся въ заступле́ніе на́ше и изми́ ны́ отъ вра́гъ на́шихъ, уще́дри зна́ющія Тя́ Ма́терь Бо́жію и Сы́ну Твоему́ вопію́щія: О, пролія́вый му́дрость на всѣ́хъ дѣ́лѣхъ Твои́хъ Бо́же, Тя́ превозно́симъ во вѣ́ки.

Пѣ́снь 9.

Ирмо́съ: Изъ Еде́ма изы́де ро́дъ на́шъ пра́бабы ра́ди Евы, при́званъ же Тобо́ю, ро́ждшею на́мъ но́ваго Ада́ма — Христа́, во двою́ естеству́, Дѣ́во Чи́стая. Взыгра́ся Ада́мъ пра́дѣдъ, я́ко избы́въ пе́рвыя кля́твы, мы́ же Тобо́ю хва́лящеся, я́ко Тебе́ ра́ди Бо́га позна́хомъ, и Тебе́ велича́емъ.

Весели́ся, Ево прароди́тельнице, и́же бо, тя́ прельсти́въ, изъ Еде́ма изведе́, ны́нѣ же попра́нъ е́сть твои́мъ исча́діемъ. Се́ бо Ольга, живо́тное дре́во — Кре́стъ Христо́въ, въ Руси́ водрузи́, и́мже всѣ́мъ вѣ́рнымъ ра́й отве́рзеся, мы́ же хва́лящеся, я́ко тоя́ ра́ди Бо́га позна́хомъ, со Влади́міромъ сію́ велича́емъ.

Жену́ по естеству́ нарица́емъ тя́, но па́че си́лы же́нскія подви́глася еси́. Тмы́ твоего́ зла́та истощи́ла еси́, да Христо́въ зако́нъ и учи́теля пріобря́щеши, и́мже просвѣти́ла еси́ зе́млю Ру́сскую, мы́ же тобо́ю хва́лящеся, я́ко тебе́ ра́ди Бо́га позна́хомъ, съ му́ченики тя́ велича́емъ.

Зако́на наста́внице чи́стая и учи́тельнице вѣ́ры Христо́вы, пріими́ похвалу́ отъ ра́бъ недосто́йныхъ и моли́тву о на́съ сотвори́ къ Бо́гу, че́стно творя́щихъ твою́ па́мять, да отъ напа́стей, и бѣ́дъ, и печа́лей, и лю́тыхъ грѣхо́въ свободи́мся, еще́ же и му́къ, жду́щихъ на́съ, изба́ви, мо́лимся ти́, тебе́ непреста́нно велича́ющіи.

Богоро́диченъ: Се́ Це́рковь, се́ две́рь, се́ Бо́жія гора́ свята́я, се́ же́злъ и сосу́дъ зла́тъ, се́ исто́чникъ печа́танъ, се́ ра́й святы́й но́ваго Ада́ма, се́ престо́лъ стра́шный, се́ Ма́ти Бо́жія Пречи́стая, Засту́пница всѣ́хъ на́съ, пою́щихъ Ю.

Свѣти́ленъ:

Свѣ́томъ благода́ти Бо́жіей просвѣще́нная, свѣти́льникъ вѣ́ры и́стинныя во оте́чествіи свое́мъ возжгла́ еси́, Ольго богому́драя, и о́бразъ подала́ еси́ отцу́ на́шему Влади́міру, и́мже и мы́ отъ тмы́ невѣ́дѣнія къ Свѣ́ту Христо́ву приведо́хомся. [Два́жды.]

Сла́ва, и ны́нѣ, богоро́диченъ:

Во тмѣ́ беззако́ній су́щіи и нечистото́ю грѣхо́вною оскверне́нніи, Тя́ Путеводи́тельницу къ Свѣ́ту невече́рнему и́мамы; тѣ́мъ и мою́ окая́нную ду́шу къ небе́снѣй чистотѣ́ возведи́ всеси́льнымъ предста́тельствомъ Твои́мъ, Дѣ́во Пречи́стая.

На хвали́техъ стихи́ры [на 4], гла́съ 3:

Восхва́лимъ, о бра́тіе,* Спа́са на́шего и Го́спода* за превели́кая благодѣя́нія Его́:* То́й бо, Человѣколю́бецъ сы́й,* въ се́рдцѣ прама́тере на́шея Ольги* вложи́ о́гнь любве́ Боже́ственныя* и по не́й въ земли́ на́шей* яви́ сѣ́янія Своего́ плоды́ пребога́тыя:* въ князе́хъ на́шихъ — къ Ца́рствію го́рнему вожди́ неле́стныя,* во архіере́ехъ — наста́вники му́дрыя ко спасе́нію* и во вся́комъ ли́цѣ преподо́бныхъ — столпы́ вѣ́ры и благоче́стія,* и́хже моли́твами спаса́етъ отъ сме́рти ду́ши на́ша. [Два́жды.]

Воспо́йте Го́сподеви пѣ́снь но́ву,* дубра́вы и до́ли земли́ Ру́сскія,* въ па́мять наста́вницы на́шея,* и воскли́кните Бо́гу гла́сомъ ра́дованія,* го́ры и хо́лми, и́дольскими же́ртвами дре́вле оскверни́вшіися* и поги́бели оте́цъ на́шихъ служи́вшіи,* ны́нѣ же росо́ю благода́ти Творца́ Своего́ окропи́вшіися,* и Кресто́мъ Сы́на Его́ осѣне́нніи,* и спокло́ншіися съ на́ми Спаса́ющему ду́ши на́ша.

По грѣхо́мъ на́шимъ умно́жишася въ на́съ безу́мніи,* и́же не то́кмо глаго́лютъ въ сердца́хъ свои́хъ — нѣ́сть Бо́гъ,* но и проповѣ́дуютъ на́мъ уче́нія поги́бельная и развраще́нная,* малоду́шныя отъ Святы́я Це́ркве отторга́ющая,* оба́че отъ си́хъ, моли́твами блаже́нныя Ольги,* да спасе́тъ Госпо́дь ду́ши на́ша.

Сла́ва, гла́съ 8:

О, ма́ти на́ша возлю́бленная! Рцы́ на́мъ, ка́ко благода́тію Вы́шняго вся́ ко́зни вра́жія препобѣди́ла еси́, да и мы́, тобо́ю науче́нніи, иску́сни яви́мся спаса́ти ду́ши на́ша.

И ны́нѣ, богоро́диченъ:

Богоро́дице, Ма́ти Безневѣ́стная, Ты́ на́мъ прибѣ́жище и си́ла, Ты́ еси́ упова́ніе на́ше и стѣна́ неруши́мая, не отве́ржи на́съ отъ Твоего́ лица́, но моли́ Сы́на Твоего́ и Бо́га на́шего, да спасе́тъ Тобо́ю ду́ши на́ша.

Славосло́віе вели́кое. [Ектеніи́ и отпу́стъ.]



НА ЛИТУРГІИ,

Блаже́нна отъ кано́на святы́я, пѣ́снь 3-я и 6-я. Проки́менъ, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Апо́столъ къ Кори́нѳяномъ, зача́ло 181. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ. Ева́нгеліе отъ Луки́, зача́ло 33. Прича́стенъ: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ.

Источникъ: Пече́рская Минíа. [Ча́сть втора́я.] — Кíевъ: Въ тѵпогра́фіи Кíево-Пече́рскія Ла́ѵры, 2007. — С. 206-222.

/ Къ оглавленію раздѣла /


Наверхъ / Къ титульной страницѣ

0