Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 10-й де́нь.
Слу́жба Пресвятѣ́й Богоро́дицѣ, соверша́емая ра́ди чудотво́рныя Ея́ ико́ны, въ Коне́встѣй оби́тели.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 8, гла́съ 6:

Ста́немъ вси́ благоговѣ́йно и со стра́хомъ воспои́мъ вели́чія Бо́жія Ма́тере: Та́ бо хра́мъ одушевле́нный и престо́лъ, небе́съ простра́ннѣйшій, яви́ся Сопревѣ́чнаго Отцу́ Сло́ва; Та́ возрасти́ на́мъ дре́во жи́зни, всѣ́хъ Жи́знь во утро́бѣ нося́; То́ю обнови́шася до́льная и процвѣте́ язы́ковъ пусты́ня безпло́дная; То́ю украша́ется дѣ́вственныхъ ли́къ и сла́вится оби́тель сія́, чудесы́ озаря́ющися отъ свѣтоза́рныя святы́я ико́ны. [Два́жды.]

Кто́ Сія́, превы́ше херуви́мовъ и сла́внѣйшая серафи́мовъ, пѣснопѣ́нія на́шего Вино́вная? Сія́ Ма́ти Го́спода небе́сныхъ си́лъ, дарова́вшая во отра́ду скорбя́щимъ и отъ злы́хъ духо́въ томи́мымъ Сво́й святы́й лучеза́рный о́бразъ со Превѣ́чнымъ на рука́хъ Младе́нцемъ, Созда́телемъ всея́ тва́ри. Тѣ́мъ, я́ко та́йнѣ Послужи́вшей на́шего спасе́нія, благода́рственно воспѣва́емъ пра́зднственная. [Два́жды.]

Хва́лимъ тя́, свята́я Горо́ Аѳо́не, я́ко трудолю́бныма рука́ма свята́го Арсе́нія дарова́ла еси́ на́мъ боголѣ́пный о́бразъ Бо́га Сло́ва и Его́ Пречи́стыя Ма́тере, и́мже и Вели́кій Но́вградъ украша́ше себе́. Но се́ па́ки возврати́ся, идѣ́же бѣ́ пе́рвѣе, па́ки зри́мъ то́й во ото́цѣ Нева́ е́зера, па́ки свѣ́тло торжеству́емъ, весели́мся и ра́дуемся, во псалмѣ́хъ и пѣ́снехъ духо́вныхъ пра́зднующе. [Два́жды.]

Сла́ва, и ны́нѣ, гла́съ то́йже:

Кто́ не удиви́тся, Богоизбра́нная Дѣ́во, Твоему́ о на́съ всеблаго́му смотре́нію? Кто́ не воспое́тъ е́же къ на́мъ Твое́ ма́тернее благоутро́біе? Се́ на́мъ возврати́ся отъ предѣ́ловъ Нова́града чуде́съ исто́чникъ приснотеку́щій, всесвяты́й о́бразъ Тво́й и Твоего́ Сы́на Вседѣ́теля, и́мже украша́ется хра́мъ се́й и процвѣта́етъ оби́тель Твоя́. То́й бо всѣ́мъ вѣ́рнымъ излива́етъ благода́тныя струи́ богодѣ́йственно, цѣли́тельны душа́мъ и тѣлесе́мъ и веселя́щія се́рдце, печа́лію сокруше́нное. О, вои́стинну мѵ́ро излія́нное и́мя Твое́, Влады́чице, благово́ніе издаю́щее все́й тва́ри! Тѣ́мже Ти́ взыва́емъ: ра́дуйся, земноро́дныхъ ра́досте; ра́дуйся, упова́ніе на́ше, прибѣ́жище и спасе́ніе ду́шъ на́шихъ.

Вхо́дъ. Проки́менъ дне́. Чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 2:

Яко предъ киво́томъ Дави́дъ, собра́въ чи́ны, ликовствова́ше, ны́нѣ предъ Твое́ю, Богоро́дице, ико́ною ликовству́ютъ свяще́нныхъ собо́ри, и съ чи́нми а́нгелъ ца́ріе же и кня́зи, и все́ христоимени́тыхъ люде́й мно́жество досто́йно блажа́тъ Тя́, Ма́терь Бо́жію, и прославля́ютъ раболѣ́пно, и честву́ютъ, и покланя́ются, и мо́лятся Тебѣ́ по Бо́зѣ, да мíръ умири́ши въ Правосла́віи, ца́рскія ски́птры утверди́ши и спасе́ши отъ всѣ́хъ зо́лъ Твоя́ рабы́, я́ко еди́на Чи́стая и Благослове́нная.

Подъ кро́въ Тво́й, Влады́чице, прибѣга́емъ и, Твоему́ свято́му о́бразу припа́дающе, мо́лимъ Тя́: при́зри на ны́, грѣ́шныя рабы́ Твоя́, и изъ Тебе́ ро́ждшагося Христа́ Бо́га на́шего моли́, да препоя́шетъ на́съ съ высоты́ си́лою Свое́ю, е́же твори́ти всегда́ во́лю Его́ святу́ю, спаса́я ду́ши на́ша, я́ко Благоутро́бенъ.

Се́ блажи́мъ Тя́, ро́ди вси́, о Дѣ́во Всепѣ́тая, му́жи, и жены́, и вся́къ во́зрастъ благочести́выхъ, и Бо́гу освяще́нныхъ собо́ръ, во святѣ́мъ Твое́мъ хра́мѣ се́мъ: ико́ны бо Твоея́ чудесы́ удивля́еми, славосло́віе Тебѣ́ прино́симъ, его́же не отри́ни, Влады́чице, но, я́ко кади́ло благоуха́нія, пріими́, и я́ко же́ртву непоро́чную, во спасе́ніе ду́шъ на́шихъ.

Сла́ва, и ны́нѣ, гла́съ 8:

Отъ восто́ка возсія́ на́мъ Со́лнце пра́вды, Христо́съ, отъ восто́ка и о́бразъ Его́ съ Пречи́стою Ма́терію, я́ко луча́ пресвѣ́тлая, яви́ся и чуде́съ сія́ніемъ на́съ озари́, его́же ны́нѣ обстоя́ще, о празднолю́бцы, упраздни́мся отъ су́етныхъ помышле́ній и возведе́мъ о́ко у́мное къ сія́нію Свѣ́та присносу́щнаго, да досто́йно соверша́емъ пра́зднственная.

На стихо́внѣ стихи́ры, гла́съ 8:

Что́ Тя́ нарече́мъ, Безневѣ́стная? Зарю́ ли у́треннюю? изъ Тебе́ бо Со́лнце мы́сленное, Христо́съ, на́мъ возсія́; во́ду ли? ду́хомъ бо жа́ждущихъ напая́еши чуде́съ изли́тіемъ; ра́й ли сла́дости? Христо́съ бо Тя́ я́ко дре́во живо́тное дарова́, и на́мъ Пита́телтницу показа́, Его́же моли́ спасти́ ду́ши на́ша.

Сти́хъ: Слы́ши, Дщи́, и ви́ждь, [и приклони́ у́хо Твое́].

Досто́йно воспѣ́ти Тя́ недоумѣ́емъ, Дѣ́во Богоро́дице: па́че бо серафи́мовъ Твое́ и́мя превознесе́ся и па́че херуви́мовъ просла́вися. Тíи, не терпя́ще зрѣ́ти сла́вы Царя́ ца́рствующихъ, закрыва́юще ли́ца своя́, взыва́ютъ: свя́тъ, свя́тъ, свя́тъ Госпо́дь Савао́ѳъ. Ты́ же, Ду́хомъ Святы́мъ осѣне́нная, во чре́вѣ Свое́мъ вмѣсти́ла еси́ Невмѣсти́маго тва́рію, ко спасе́нію ду́шъ на́шихъ.

Сти́хъ: Кля́тся Госпо́дь Дави́ду и́стиною [и не отве́ржется ея́].

Ко́е принесе́мъ пѣснохвале́ніе или́ ко́ими Тя́ вѣнцы́ увязе́мъ, Дѣ́во Чи́стая? Твоего́ бо рождества́ та́инство и а́нгельскій ли́къ воспѣ́ти недоумѣ́етъ: ка́ко, Дѣ́ва су́щи, Ма́терь Бо́гу возмогла́ еси́ бы́ти и па́ки Дѣ́вою пребыва́еши? О, та́инства стра́ннаго! е́же предви́дѣвъ, Иса́ія возопи́: да́стъ Госпо́дь ва́мъ зна́меніе, се́ Дѣ́ва во чре́вѣ зачне́тъ и роди́тъ Сы́на Емману́ила.

Сла́ва, и ны́нѣ, гла́съ 4:

Да весели́тся пусты́ня и да цвѣте́тъ, я́ко кри́нъ: сла́ва Лива́нова даде́ся е́й и Карми́лова, се́ бо зри́мъ вси́ сла́ву Госпо́дню и высоту́ Бо́жія Ма́тере, въ чудесѣ́хъ о́браза свята́го блиста́ющую, его́же не терпя́ще зрѣ́ти, ужаса́ются де́мони и бѣ́гаютъ отъ человѣ́къ, жего́ми су́ще невеще́ственнымъ огне́мъ, о́бразъ святы́й осѣня́ющимъ. Мы́ же, благоговѣ́йно лобыза́юще, со стра́хомъ и любо́вію Первообра́знѣй соверша́емъ пѣснопѣ́ніе.

На благослове́ніи хлѣ́бовъ тропа́рь, гла́съ 1:

Возсія́ на́мъ, я́ко со́лнце свѣтоза́рное отъ восто́ка въ велелѣ́піи, Твоя́, Влады́чице, ико́на, озаря́ющи чуде́съ сія́ніемъ пресла́вно всѣ́хъ, вы́ну приходя́щихъ къ не́й съ вѣ́рою и любо́вію, и моля́щихся усе́рдно Твоему́, е́же о Сы́нѣ Твое́мъ и Бо́зѣ, вели́чію. Сла́ва Бо́гу, Арсе́ніемъ сію́ да́вшему на́мъ, сла́ва возврати́вшему отъ Нова́града, сла́ва дѣ́йствующему то́ю всѣ́мъ исцѣле́нія. [Три́жды.]




НА УТРЕНИ,
[На Бо́гъ Госпо́дь: тропа́рь Богоро́дицы, три́жды.]

По 1-й стихоло́гіи сѣда́ленъ, гла́съ 4:

Боже́ственными заря́ми просвѣти́ и вѣ́рою утверди́, Всенепоро́чная Дѣ́во, пою́щихъ Тя́ у́мы, да вси́ любо́вію торжеству́емъ, сла́вяще во псалмѣ́хъ къ на́мъ о́браза Твоего́ прише́ствіе и Тя́, я́ко Засту́пницу христіа́нъ, моля́ще спасти́ рабы́ Твоя́ отъ вся́кія бѣды́, наста́вити на пу́ть блаже́нныя жи́зни и сохрани́ти отъ хотя́щихъ погуби́ти ду́ши на́ша.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 3:

Блаже́нна еси́ въ ро́дѣхъ родо́въ, Богоблаже́нная Дѣ́во Богоро́дице, я́ко о́бразъ Тво́й святы́й, а́ки о́блакъ росоно́сный, отъ небе́съ посла́ся на́мъ, и́же цѣле́бныя во́ды благода́тно всѣ́мъ излива́етъ и сердца́ ра́дости исполня́етъ. Тѣ́мъ Тя́ сла́вимъ, су́щую чуде́съ Вино́вницу, и мо́лимся Ти́ умиле́нно: моли́, Влады́чице, изъ Тебе́ вопло́щшагося Христа́ Бо́га, да спасе́тъ Тобо́ю ду́ши на́ша, я́ко Благоутро́бенъ.

Сла́ва, и ны́нѣ, то́йже.

По поліеле́и припѣ́въ:

Досто́йно е́сть велича́ти Тя́, Богоро́дице, [честнѣ́йшую херуви́мъ и сла́внѣйшую безъ сравне́нія серафи́мъ].

Псало́мъ избра́нный: Бо́же, су́дъ Тво́й царе́ви да́ждь...

Та́же сѣда́ленъ, гла́съ 4:

Яко многосвѣ́тлая звѣзда́, отъ Аѳо́нскія Горы́ ико́на Твоя́, Богоро́дице, возсія́, и въ Новѣ́градѣ не сокры́ся ея́ сія́ніе, но се́ ны́нѣ всѣ́хъ на́съ озаря́етъ, во хра́мѣ Твое́мъ свѣ́тло пра́зднующихъ, одержи́мыхъ же скорбьми́ и лю́тыми злострада́ніи покрыва́етъ благода́тію Сы́на Твоего́, со Отце́мъ и Святы́мъ Ду́хомъ сла́вимаго, спаса́ющаго ро́дъ человѣ́ческій.

Сла́ва, и ны́нѣ, то́йже.

Степе́нна, 1-й антифо́нъ 4-го гла́са. Проки́менъ, [гла́съ 4]: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе... Ева́нгеліе отъ Луки́, зача́ло 4.

По 50-мъ псалмѣ́ стихи́ра, гла́съ 6:

Да ра́дуется съ на́ми все́ вы́шнихъ ликостоя́ніе и да игра́етъ вся́ тва́рь, да веселя́тся собо́ри вѣ́рныхъ, я́ко всѣ́хъ Зижди́теля Ма́терь, Цари́ца су́щи небесе́ и земли́, явля́етъ на́мъ неизрѣче́нное благоутро́біе цѣле́бными Своего́ о́браза чудеса́ми, подаю́щи слѣпы́мъ прозрѣ́ніе, возставля́ющи разсла́бленныя, свобожда́ющи отъ злы́хъ духо́въ томи́мыя и спаса́ющи въ ми́рѣ ду́ши на́ша.

Кано́нъ Богоро́дицы настоя́щаго пра́здника со ирмосо́мъ на 14: ирмо́съ по два́жды, тропари́ на 12. [Гла́съ 4.]

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Сія́ніе сла́вы Отчія, Сы́й отъ Свѣ́та, Свѣ́те Присносу́щный, озари́, молю́, у́мъ и се́рдце мое́, Іису́се, и напо́лни мя́ Ду́ха, да воспою́, ра́дуяся, Тебе́ Ро́ждшія ди́вная чудеса́.

Пою́ се́рдцемъ и усты́ не дре́внюю злату́ю ста́мну, въ не́йже бѣ́ ма́нна, но пою́ Дѣ́ву Богоро́дицу, носи́вшую Христа́ во чре́вѣ, и сла́влю Тоя́ о́браза богосоверша́емая чудеса́.

Ты́, по Соломо́ну, исто́чникъ вертогра́да и кла́дязь воды́ жи́вы, истека́ющія отъ Лива́на, о Ма́ти Жениха́ Це́ркве, отъ ико́ны бо Твоея́, Влады́чице, благода́тныя струи́ при́сно на на́съ лію́тся.

Се́рдце на́ше привлекла́ еси́, Дѣ́во Чи́стая, и та́йнымъ о́браза Твоего́ благолѣ́піемъ, и боголѣ́пными о́наго чудеса́ми. Тѣ́мже, пою́ще, мо́лимъ Тя́: и на́ша ду́ши благообра́зны содѣ́лай, Влады́чице.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Якоже богооте́цъ дре́вле предъ Бо́жіимъ киво́томъ ликова́ше, си́це Арсе́ній изъ Аѳо́на со о́бразомъ Киво́та одушевле́ннаго, въ мы́сленнѣмъ ликовствова́ніи гряды́й въ Россíю, моля́шеся Первообра́знѣй, да чту́щихъ Ю вѣ́чныя сла́вы сподо́битъ.

Якоже но́вая луна́, яви́ся на Россíйстѣй тве́рди Твоя́, Влады́чице, ико́на, озаря́ющи су́щія во тмѣ́ и приводя́щи ко свѣ́ту богоразу́мія. И на́съ, грѣ́шныхъ, мо́лимъ Тя́ со слеза́ми, спаси́ отъ тмы́ неразу́мія и Твоя́ пѣвцы́ вѣ́чныя сла́вы сподо́би.

Утверди́, просла́ви, вознеси́ ро́гъ вѣ́рнаго Импера́тора на́шего, вѣ́рныхъ Помо́щнице, оби́тель сію́, и вся́ гра́ды, и страны́ въ ми́рѣ сохрани́ и всѣ́хъ, лю́бящихъ сла́вити честны́й о́бразъ Тво́й, вѣнце́въ сла́вы сподо́би.

Расто́ргни плени́цы на́шихъ грѣхопаде́ній, изба́ви отъ ро́ва стра́стнаго житія́ и да́руй свобо́ду рабо́мъ Твои́мъ, Богоро́дице, да сконча́емъ про́чее живота́ на́шего въ ми́рѣ и покая́ніи, упова́юще наслѣ́дити вѣ́чную сла́ву.

Сѣда́ленъ, гла́съ 4:

Исполне́ніе зако́на и проро́ковъ ро́ждшая, Христа́ Бо́га, испо́лни ра́дости и весе́лія всѣ́хъ, чту́щихъ святу́ю ико́ну Твою́, Влады́чице, да, свѣ́тло дне́сь пра́зднующе, Тя́ ра́достно воспое́мъ и любо́вію и́мя Твое́ просла́вимъ, я́ко Ты́ еси́ еди́на отъ всѣ́хъ родо́въ избра́нная, Благослове́нная и Препросла́вленная.

Сла́ва, и ны́нѣ, то́йже.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Зря́ще на Твою́, Богороди́тельнице, ико́ну, мо́лимъ Тя́, я́ко Ма́терь Свѣ́та Незаходи́маго: отжени́ отъ на́съ мра́къ страсте́й Того́ свѣ́тлостію, да, просвѣ́щшеся, воспое́мъ: сла́ва си́лѣ Твое́й, Го́споди.

Ты́ ти́хое обурева́емымъ, Богоро́дице, приста́нище, Ты́ ра́дость печа́лію погруже́ннымъ, боля́щимъ Ты́ исцѣле́ніе и покро́въ всѣ́мъ, къ Тебѣ́ прибѣга́ющимъ, Влады́чице, еди́на Чи́стая и Благослове́нная.

Не надѣ́емся на кня́зи, ни на сы́ны человѣ́ческія, но все́ на́ше упова́ніе на Твоего́ Сы́на, Богоро́дице, возлага́емъ, и вѣ́руемъ непрело́жно, я́ко То́й е́сть спасе́ніе на́ше, и не постыди́мся.

Тя́, Богоневѣ́сто Чи́стая, недосто́йніи раби́, сла́вимъ, лобыза́юще бре́нными устна́ми о́бразъ Тво́й святы́й, и Тебѣ́ мо́лимся со слеза́ми: спаси́ на́съ отъ лю́тыхъ грѣхопаде́ній, да изба́вимся отъ вѣ́чныя му́ки.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Неисповѣди́мое чуде́съ мо́ре вѣ́мы Тя́, Богоро́дице: па́че бо ума́ и сло́ва о́ными Ты́ просла́вилася еси́. Тѣ́мъ ны́нѣ, я́ко Ма́терь Бо́жію, въ пѣ́снехъ Тя́ сла́вимъ, раби́ Твои́, благода́рственно.

Ди́вный въ чудесѣ́хъ Бо́гъ, ди́венъ и во святы́хъ Свои́хъ, Тобо́ю безъ сравне́нія ди́венъ показа́ся, Богоро́дице, я́ко во утро́бѣ Твое́й вмѣсти́тися благоволи́ и сотвори́ Тя́ честнѣ́йшую и сла́внѣйшую серафи́мовъ.

Тобо́ю возстаю́тъ разсла́бленніи, неду́гующіи исцѣля́ются, слѣпíи прозира́ютъ, отъ бѣсо́въ томи́міи свобожда́ются, ра́дуйся, Исто́чниче дарова́ній, Богоблагода́тная Дѣ́во.

Сло́во Отчее Ѵпоста́сное ро́ждшая, Дѣ́во Пренепоро́чная, изба́ви отъ безслове́сія ду́шу раба́ Твоего́ и да́руй ми́ сле́зы серде́чныя, да ны́нѣ плаче́вныя пролію́ струи́, пре́жде не́жели пости́гнетъ пла́чъ неутѣ́шный.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Свѣ́тлый составля́етъ ли́къ ико́на Твоя́, Влады́чице, къ не́йже мы́ взира́юще, се́рдцемъ и устна́ми благослови́мъ, пое́мъ и велича́емъ Твое́ къ на́мъ ма́тернее благоутро́біе и ку́пно отъ Тебе́ ро́ждшагося Бо́га сла́вимъ.

Торжеству́юще ны́нѣ ра́достно во хра́мѣ Твое́мъ, Пречи́стая, и Твоему́ припа́дающе честно́му о́бразу, мо́лимъ Тя́ умиле́нно: сотвори́ на́съ досто́йны бы́ти ли́ка пра́зднующихъ въ торжествѣ́ избра́нныхъ Сы́на Твоего́ рабо́въ.

Да рыда́ютъ де́мони, жего́ми су́ще невеще́ственнымъ огне́мъ отъ святы́я ико́ны Дѣ́вы Чи́стыя, и да бѣжа́тъ отъ человѣ́къ въ бе́здну, и́мъ угото́ванную, мы́ же, веселя́щеся, въ пѣ́снехъ Богоро́дицу велича́емъ.

Живоно́сный Исто́чниче, Богоро́дице Дѣ́во, зно́емъ страсте́й пали́мую ду́шу мою́ напо́й благода́тными струя́ми Сы́на Твоего́ и услади́ го́ресть се́рдца моего́ зрѣ́ніемъ свята́го о́браза Твоего́.

Конда́къ, гла́съ 8:

Препросла́вленная Вы́шняго Ма́терь созыва́етъ къ пѣснопѣ́нію на́съ Своего́ о́браза прише́ствіемъ отъ Нова́града и возбужда́етъ зрѣ́ніемъ того́ на по́двигъ, побѣжда́ти сопроти́вныхъ си́лу, и къ Не́й, я́ко на́шея ра́дости вино́внѣй, пѣ́ти: ра́дуйся, Невѣ́сто неневѣ́стная.

Икосъ:

Ка́ко отве́рзу бре́нная уста́ и воспою́ Не́бо одушевле́нное, Дѣ́ву Марíю, отъ Нея́же на́мъ возсія́ Со́лнце мы́сленное, Христо́съ, просвѣща́яй вся́каго человѣ́ка? Недоумѣ́етъ бо у́мъ мо́й, безгла́сіемъ язы́къ связу́ется. Но къ чуде́съ вино́внѣй Тоя́ ико́нѣ зря́ще, а́нгельски воспое́мъ, глаго́люще: ра́дуйся, неистощи́мое сокро́вище благода́ти; ра́дуйся, чуде́съ неизслѣ́димая пучи́но; ра́дуйся, всѣ́мъ вѣ́рнымъ боже́ственное услажде́ніе; ра́дуйся, скорбя́щимъ всера́достное весе́ліе; ра́дуйся, оби́димымъ ско́рое избавле́ніе; ра́дуйся, въ жите́йстѣмъ мо́ри спаси́тельное окормле́ніе; ра́дуйся, обурева́емымъ страстьми́ ти́хое приста́нище; ра́дуйся, ору́жіе, во бра́ни мы́сленнѣй проти́вныя поража́ющее; ра́дуйся, мо́лніе, попаля́ющая діа́вола; ра́дуйся, врачевство́, болѣ́зни вся́ исцѣля́ющее; ра́дуйся, мѵ́ро благово́нное всему́ мíру; ра́дуйся, горо́, вся́ осѣне́нная Божество́мъ; ра́дуйся, Дѣ́во, всѣ́хъ благи́хъ вино́вная вѣ́рнымъ. Ра́дуйся, Невѣ́сто неневѣ́стная.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Не тва́ри преклоня́емъ колѣ́на, падо́ша бо истука́ни, но Тебѣ́, во огни́ Спа́сшаго дѣ́ти роди́вшая; Тебѣ́ и, о́бразъ Тво́й лобыза́юще, мо́лимся: спаси́ ны отъ огня́ страсте́й, отъ бѣ́дъ и напа́стей руко́ю отце́въ Бо́га Благослове́ннаго.

Кумірослуже́нія у́мнаго изба́ви мя́, Богоро́дице, истребля́ющи отъ души́ стра́стная помышле́нія, и се́рдца моего́ олта́рь освяти́ всегда́ и́мени Сы́на Твоего́, Го́спода Іису́са, да воспою́ Ему́: отце́въ Бо́же, благослове́нъ еси́.

Похвалу́ свято́му Арсе́нію составля́етъ и на́съ, ра́бъ Твои́хъ, радостотвори́тъ чудотво́рная Твоя́, Влады́чице, ико́на, ея́же ра́ди ны́нѣ мы́ торжеству́емъ и Тя́ въ пѣ́снехъ, Всепѣ́тая, велича́емъ, сла́вяще отце́въ Бо́га Благослове́ннаго.

Испо́лни, о Дѣ́во Благода́тная, благи́ми Твою́ оби́тель и вся́кому гра́ду и странѣ́ потре́бная свы́ше низпосыла́й: Ты́ бо еси́ Ма́терь небесе́ и земли́ Царя́ и вся́ отъ Него́, ели́ка про́сиши, воспріе́млеши въ по́льзу рабо́мъ Твои́мъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Въ пещи́ о́троки ороша́етъ дре́вле и посредѣ́ огня́, о, чудесе́! сохраня́етъ неопа́льно Сы́нъ Тво́й, Дѣ́во Богоотрокови́це, и ны́нѣ Тя́, Ма́терь Свою́, чуде́съ твори́тельну показу́етъ. Тѣ́мже Тя́ чти́мъ и превозно́симъ и́мя Твое́ во вѣ́ки.

Рачи́теліе чистоты́, пусты́нное сосло́віе, мона́шествующіи ли́цы, воспо́йте похва́льная Дѣ́вѣ Чи́стѣй, Богоизбра́ннѣй и, зря́ще ве́ліе чуде́съ сокро́вище, ико́ну Ея́ святу́ю, превозноси́те и́мя Дѣ́вы во вѣ́ки.

Тріѵпоста́снаго Божества́ Еди́нъ Сы́й отъ Тебе́, Богоблагода́тная, воплоти́ся и Тя́ глави́зну спасе́нія на́шего показа́, тѣ́мже спаси́, мо́лимъ Тя́ со слеза́ми, пою́щихъ и превознося́щихъ и́мя Твое́ во вѣ́ки.

Въ премíрномъ лику́ющи свѣ́тѣ, не пре́зри на́съ, до́лу су́щихъ во тмѣ́ земнѣ́й, но, ли́комъ Свои́мъ призира́ющи, при́зри и ма́тернимъ благоутро́біемъ на рабы́ Твоя́ и свѣ́томъ Сы́на Твоего́, Влады́чице, отжени́ отъ на́съ мра́чныя прило́ги лука́ваго.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Ра́дости вино́вна Ты́ еси́ и торжества́ на́шего, Богоро́дице, ико́на бо Твоя́ озаря́етъ смы́слъ на́шъ къ славосло́вію и возбужда́етъ пѣ́ти Тебѣ́: ра́дуйся, храни́тельнице на́ша; ра́дуйся, тве́рдое огражде́ніе и спасе́ніе ду́шъ на́шихъ.

Собери́ разстоя́щая во еди́но, ми́ръ мíрови ро́ждшая, правосла́віе утверди́ непоколеби́мо и всѣ́хъ на́съ соблюди́ непреткнове́нныхъ бы́ти во исповѣ́даніи Сы́на Твоего́, я́ко еди́на вѣ́рныхъ Помо́щница.

Тя́, еди́ну въ жена́хъ Благослове́нную, мы́, грѣ́шніи, пою́ще, мо́лимъ: изба́ви на́съ, Пречи́стая, отъ страсте́й грѣхо́вныхъ благода́тію Сы́на Твоего́ и укрѣпи́ ны́ въ за́повѣдехъ Его́ ходи́ти вре́мя про́чее непоро́чно, я́ко да спасе́мъ въ ми́рѣ ду́ши на́ша.

Се́рдцемъ мои́мъ горя́, пою́ Дѣ́ву Богоотрокови́цу и недоумѣва́юся, благоволи́тъ ли пѣ́нію усте́нъ грѣ́шника? Но, о Влады́чице Всеблага́я, смире́нно молю́ Тя: пріими́ сію́ же́ртву хвале́нія раба́ Твоего́.

Свѣти́ленъ:

Кто́ Сія́, проница́ющая, а́ки у́тро, добра́, я́ко луна́, избра́нна, я́ко со́лнце? Сія́ хра́мъ одушевле́нный Небе́снаго Царя́, Сія́ пала́та Сло́ва, Сія́ еди́на Чи́стая и Благослове́нная Ма́терь Бо́жія, Юже, пою́ще, велича́емъ. [Три́жды.]

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Да́лъ еси́ въ зна́меніе смотре́нія о рабѣ́хъ Твои́хъ о́бразъ Твоея́ Ма́тере, Го́споди, на не́мже и Са́мъ, Человѣколю́бче, боголѣ́пно изображе́нъ еси́. Къ нему́ бо чу́вственно взира́юще, отво́димъ у́мъ на́шъ отъ злы́хъ и су́етныхъ мечта́ній и, Твои́мъ раче́ніемъ воскриля́еми, Твое́ и́мя при́сно вообража́емъ, Іису́се Всеси́льне, Спа́се ду́шъ на́шихъ.

Хра́мъ одушевле́нный Небе́снаго Царя́ Христа́, Тя́, Пречи́стая, вѣ́дуще, во хра́мъ Тво́й прибѣга́емъ, и, о́бразъ свѣтопода́тельный ви́дяще, къ Тебѣ́ припа́даемъ, Влады́чице, и се́рдцемъ сокруше́ннымъ мо́лимъ Тя́ о спасе́ніи всѣ́хъ на́съ моли́ти Сы́на Твоего́, Христа́ Человѣколю́бца, Спа́са ду́шъ на́шихъ.

Па́ки на́мъ яви́ся, я́коже пресвѣ́тлая звѣзда́, ико́на Твоя́, Влады́чице, ю́же отъ Аѳо́нскія Горы́ святы́й Арсе́ній свои́ма ста́рческима рука́ма принесе́ и на́мъ оста́ви, ча́домъ свои́мъ, да тою́ просвѣща́емся, пое́мъ и сла́вимъ Тя́, я́ко Ма́терь Сы́на Бо́жія, Іису́са Человѣколю́бца, Изба́вителя ду́шъ на́шихъ.

Богохрани́мый о́строве, ра́дуйся, ра́дуйся, хра́ме Госпо́день, я́ко о́бразъ чуде́съ Дѣ́лателя Бо́га Сло́ва и Пречи́стыя Его́ Ма́тере вну́трь тебе́ чудодѣ́йствуетъ па́че ума́ и сло́ва и всѣ́хъ на́съ ра́дости исполня́етъ. Сего́ ра́ди, вопію́ще, сла́вимъ Христа́ Человѣколю́бца, Искупи́теля ду́шъ на́шихъ.

Сла́ва, и ны́нѣ, гла́съ 8:

Облакомъ небе́снымъ дне́мъ, но́щію же столпо́мъ о́гненнымъ путевожда́ше дре́вле Бо́гъ въ пусты́ни Изра́иля; на́мъ же вмѣ́сто си́хъ дарова́ святу́ю ико́ну Твою́, Влады́чице, па́че огня́ и о́блака сія́ющую не свѣ́томъ чу́вственнымъ, но свѣ́томъ чуде́съ преесте́ственныхъ, озаря́ющимъ на́ша душе́вная чу́вства и къ не́бу пра́вый пу́ть показу́юшимъ. Сла́ва Тебѣ́, Небе́сный Отче, сла́ва Тебѣ́, Единоро́дный Сы́не, сла́ва Тебѣ́, Ду́ше Святы́й: Тро́ице Свята́я, сла́ва Тебѣ́.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 3, [пѣ́снь] Богоро́дицы: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, [се́ бо отны́нѣ ублажа́тъ Мя́ вси́ ро́ди]. Апо́столъ ко Евре́емъ, зача́ло 320. [Аллилу́ія, гла́съ 8: Слы́ши, Дщи́, и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи.] Ева́нгеліе отъ Луки́, зача́ло 54. Прича́стенъ: Ча́шу спасе́нія пріиму́ и и́мя Госпо́дне призову́.


Моли́тва ко Пресвятѣ́й Богоро́дицѣ.

О, Всеми́лостивая Госпоже́ Дѣ́во Богоро́дице! Вонми́ смире́нному моле́нію моему́ и сокруше́нно ны́нѣ предстоя́щаго о́бразу Твоему́ услы́ши гла́съ. Вѣ́мъ бо, о, Содѣ́теля моего́ Ма́ти, я́ко Ты́ предста́тельство христіа́нъ непосты́дное и хода́тайство ко Творцу́ непрело́жное. Вѣ́мъ и сіе́, я́ко беззако́нія моя́ превзыдо́ша главу́ мою́ и, я́ко бре́мя тя́жкое, отяготѣ́ша на мнѣ́, и уже́ нѣ́смь досто́инъ ви́дѣти высоту́ небе́сную, ниже́ воззрѣ́ти ко престо́лу сла́вы Сы́на Твоего́ и Бо́га на́шего, но досто́инъ му́къ и вѣ́чнаго осужде́нія. Сего́ ра́ди къ Тебѣ́ (со предстоя́щими ку́пно) припа́даю, Тя́ прошу́ умиле́нно, къ Тебѣ́ со слеза́ми взыва́ю: сотвори́ къ Нему́ ма́тернее Свое́ моле́ніе, да не отве́ржетъ на́съ, грѣ́шныхъ, отъ лица́ Своего́, но, я́ко Ми́лостивъ, да прости́тъ на́мъ согрѣше́нія на́ша во́льная и нево́льная, на пу́ть спасе́нія наставля́я на́съ и свы́ше си́лою укрѣпля́я къ творе́нію за́повѣдей Свои́хъ святы́хъ. Да сохрани́тъ на́съ отъ собла́зновъ мíра, отъ вожделѣ́ній грѣхо́вныхъ, отъ ко́зней діа́вольскихъ и отъ нападе́нія ви́димыхъ враго́въ. Да благослови́тъ дѣла́ ру́къ на́шихъ, подава́я оби́тели се́й, и вся́кому гра́ду и странѣ́ оби́ліе бла́гъ земны́хъ. И храня́ здра́віе, и утвержда́я ски́петръ Благочести́вѣйшаго Импера́тора на́шего [и́мярекъ], да сотвори́тъ на́мъ дни́ бла́ги и безмяте́жны, да огради́тъ ми́ромъ Це́рковь Свою́ святу́ю и разстоя́щая да соедини́тъ то́й, я́ко Бла́гъ Госпо́дь, Долготерпѣли́въ и Многоми́лостивъ, отъ всея́ тва́ри со Отце́мъ и Святы́мъ Ду́хомъ сла́вимый во вѣ́ки вѣко́въ. Ами́нь.

Источникъ: Слу́жба Пресвятѣ́й Богоро́дицѣ, соверша́емая ра́ди чудотво́рныя Ея́ ико́ны, въ Коне́встѣй оби́тели. — Тисне́ніе второ́е. — СПб.: Сѵнода́льная Тѵпогра́фія, 1897. — С. 3-30.

/ Къ оглавленію раздѣла /


Наверхъ / Къ титульной страницѣ

0