Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 10-й де́нь.
Слу́жба на положе́ніе ри́зы, я́же е́сть хито́нъ, Вели́каго Го́спода Бо́га и Спа́са на́шего Іису́са Христа́.

ВЕЧЕРЪ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 1. Подо́бенъ: Всехва́льніи му́ченицы.

Хра́мъ Тво́й, Влады́ко,* Твою́ свяще́нную ри́зу* я́ко сокро́вище спасе́нія* и исцѣле́нія нося́,* освяща́етъ вся́,* и́же вѣ́рою притека́ющія* и Тя́ по до́лгу пою́щія всегда́,* упова́ніе душа́мъ на́шимъ* и тве́рдый покро́въ и держа́ва. [Три́жды.]

Держа́ва непобѣди́мая* на́мъ, христіа́номъ, дарова́ся —* ри́за Твоя́, Іису́се Спа́се на́шъ,* е́юже иноплеме́нныхъ язы́цы* при́сно побѣжда́ются,* и ми́ръ Це́ркви Твое́й, Христе́, осѣня́етъ.* Сего́ ра́ди вѣ́рою цѣлу́юще ю́,* покланя́емся Тебѣ́, Человѣколю́бче, и мо́лимъ* ча́сти сподо́бити на́съ святы́хъ Твои́хъ. [Два́жды.]

Сла́ва, и ны́нѣ, гла́съ 8:

Кресту́ Твоему́ Честно́му и ри́зѣ святѣ́й покланя́емся, Преблагíй, и любо́вію облобыза́емъ, сла́вяще Твое́ е́же па́че ума́ соше́ствіе, и безмѣ́рную ми́лость, и бога́тую благосты́ню, и́миже исцѣле́нія подава́еши боля́щимъ и спаса́еши человѣ́ческое естество́, содержи́мо бы́вшее во тмѣ́ прегрѣше́ній, я́ко Человѣколю́бецъ.

Вхо́дъ. Проки́менъ дне́. Чте́нія три́.

Исхо́да чте́ніе. [Глава 15.]

Поя́тъ Моисе́й сы́ны Изра́илевы отъ мо́ря Чермна́го и веде́ ты́я въ пусты́ню Су́ръ, и идя́ху три́ дни́ въ пусты́ни, и не обрѣта́ху воды́, да бы́ша пи́ли. Пріидо́ша же въ Ме́рру и не можа́ху пи́ти воды́ изъ Ме́рры, горька́ бо бѣ́; сего́ ра́ди нарече́ся и́мя мѣ́сту тому́: го́ресть. И ропта́ху лю́діе на Моисе́я, глаго́люще: что́ піе́мъ? Возопи́ же Моисе́й ко Го́споду, и показа́ ему́ Госпо́дь дре́во, и вложи́ то́е въ во́ду, и сладка́ бы́сть вода́. Та́мо положи́ ему́ Бо́гъ оправда́нія и суды́, и та́мо искуша́ше его́ и рече́: Аще слу́хомъ услы́шиши гла́съ Го́спода Бо́га твоего́, и уго́дная предъ Ни́мъ сотвори́ши, и внуши́ши за́повѣди Его́, и сохрани́ши вся́ оправда́нія Его́, вся́ку болѣ́знь, ю́же наведо́хъ на еги́птяны, не наведу́ на тя́. Азъ бо е́смь Госпо́дь, исцѣля́яй тя́. И пріидо́ша во Ели́мъ, и бя́ху та́мо двана́десять исто́чниковъ во́дъ, и се́дмьдесятъ сте́блій фи́никовыхъ, и ополчи́шася та́мо при вода́хъ. И воздвиго́шася отъ Ели́ма, и пріи́де ве́сь со́нмъ сыно́въ Изра́илевыхъ въ пусты́ню Си́нъ, я́же е́сть между́ Ели́момъ и между́ Си́ною.

При́тчей чте́ніе. [Глава́ 3.]

Сы́не, не пренебрега́й наказа́нія Госпо́дня, ниже́ ослабѣва́й, отъ Него́ облича́емый. Его́же бо лю́битъ Госпо́дь, наказу́етъ, біе́тъ же вся́каго сы́на, его́же пріе́млетъ. Блаже́нъ человѣ́къ, и́же обрѣ́те Прему́дрость, и сме́ртенъ, и́же увѣ́дѣ ра́зумъ. Лу́чше бо Сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, не сопротивля́ется Ей ничто́же лука́вое, благоразу́мна е́сть всѣ́мъ лю́бящимъ Ю, вся́кое же честно́е недосто́йно Ея́ е́сть. Долгота́ бо житія́ и лѣ́та жи́зни въ десни́цѣ Ея́. Въ шу́ицѣ же Ея́ бога́тство и сла́ва, изъ у́стъ Ея́ исхо́дитъ пра́вда, зако́нъ же и ми́лость на язы́цѣ но́ситъ. Путіе́ Ея́ — путіе́ добры́, и вся́ стези́ Ея́ съ ми́ромъ. Дре́во живота́ е́сть всѣ́мъ держа́щимся Ея́ и восклоня́ющимся на Ню́, я́ко на Го́спода, тверда́.

Проро́чества Иса́іина чте́ніе. [Глава́ 60.]

Та́ко глаго́летъ Госпо́дь: отве́рзутся врата́ твоя́, Іерусали́ме, вы́ну де́нь и но́щь и не затворя́тся, е́же ввести́ къ тебѣ́ си́лу язы́ковъ и цари́ и́хъ ведо́мыя. Язы́цы бо и ца́ріе, и́же тебѣ́ не порабо́таютъ, поги́бнутъ, и язы́цы запустѣ́ніемъ запустѣ́ютъ. И сла́ва Лива́нова къ тебѣ́ пріи́детъ, въ кипари́сѣ, и пе́вкѣ и ке́дрѣ вку́пѣ, просла́вити мѣ́сто свято́е Мое́, и мѣ́сто но́гъ Мои́хъ просла́влю. И по́йдутъ къ тебѣ́, боя́щеся, сы́нове смири́вшихъ тя́ и прогнѣ́вавшихъ тя́ и покло́нятся слѣдо́мъ но́гъ твои́хъ вси́ прогнѣ́вавшіи тя́, и нарече́шися гра́дъ Госпо́день, Сіо́нъ Свята́го Изра́илева, за е́же бы́ти тебѣ́ оста́влену и возненави́дѣну, и не бѣ́ помога́яй тебѣ́. И положу́ тя въ ра́дость вѣ́чную, весе́ліе родо́мъ родо́въ. И изсе́ши млеко́ язы́ковъ, и бога́тство царе́й снѣ́си, и разумѣ́еши, я́ко Азъ Госпо́дь, спаса́яй тя́ и избавля́яй тя́, Бо́гъ Изра́илевъ.

На литíи стихи́ры, гла́съ 4. Самогла́сны:

Гра́дъ Москву́, почита́ющій Тя́, Спа́се, и по до́лгу сла́вящій, огражда́еши, Человѣколю́бче, и лю́ди ри́зою боже́ственною Твое́ю отъ безбо́жныхъ иноплеме́нникъ, отъ гла́да же, и тру́са, и междоусо́бныя бра́ни при́сно, и боля́щимъ исцѣле́нія подава́еши, приходя́щимъ съ вѣ́рою, и́же земны́хъ не́мощь свѣ́дый, Го́споди, сла́ва Тебѣ́.

Ри́зу Твою́ боже́ственную, Влады́ко Христе́, дарова́лъ еси́ гра́ду Твоему́ Москвѣ́, бога́тство неотъе́млемое, покро́въ же, и сла́ву, и необори́мую стѣ́ну, и исцѣле́ній сокро́вище, и чуде́съ исто́чникъ приснотеку́щь, приста́нище же спаси́тельное обурева́емымъ всегда́. Сего́ ра́ди пое́мъ Ти́: Го́споди, сла́ва Тебѣ́.

Почерпи́те, человѣ́цы, спасе́ніе душа́мъ и исцѣле́ніе тѣлесе́мъ, ра́ка бо всѣ́мъ дне́сь предлежи́тъ, въ не́йже положи́ся архіере́йскими рука́ми честна́я ри́за Христа́ Бо́га на́шего, е́же е́сть хито́нъ, источа́ющи на́мъ чуде́съ струи́ оби́льно, и отмыва́ющи серде́цъ омраче́нія, и страсте́й отъе́млющи скве́рну Боже́ственною благода́тію.

Сла́ва, и ны́нѣ, гла́съ 6:

Одѣя́йся свѣ́томъ, я́ко ри́зою, на́гъ на судѣ́ стои́тъ и въ лани́ту ударе́ніе пріе́млетъ отъ ру́къ, я́же созда́, беззако́нніи лю́діе на Крестѣ́ пригвозди́ша Го́спода сла́вы. Тогда́ и завѣ́са церко́вная распаде́ся, со́лнце поме́рче, не терпя́ зрѣ́ти Бо́гу досажда́ему, Его́же трепе́щутъ вся́ческая. Тому́ поклони́мся, глаго́люще: долготерпѣли́ве Го́споди, сла́ва Тебѣ́.

На стихо́внѣ стихи́ры, гла́съ 4. Подо́бенъ: Яко до́бля.

Во гла́сѣхъ воскли́кнемъ,* пѣ́сньми воспои́мъ,* Кре́стъ Честны́й облобыза́юще,* и къ нему́ возопіи́мъ:* Кре́сте преблаже́нне,* освяти́ на́ша ду́ши и тѣлеса́* си́лою Твое́ю* и отъ вся́каго вре́да сопроти́вна* соблюди́ неврежде́нны* благоче́стно покланя́ющіяся Тебѣ́.

Сти́хъ: Бо́гъ же, Ца́рь на́шъ пре́жде вѣ́ка,* содѣ́ла спасе́ніе посредѣ́ земли́.

Приступи́вше, человѣ́цы,* почерпи́те неистоща́емыя во́ды,* Креста́ благода́тію пролива́емы.* Се́ предложи́ма, зри́тся ны́нѣ* и ри́за Христа́ Бо́га на́шего,* дарова́нія исто́чникъ,* напое́на кро́вію боже́ственною Влады́ки всѣ́хъ,* одѣ́ющаго не́бо о́блаки,* Иже въ сію́ облещи́ся изво́ливый,* Го́споди, сла́ва Тебѣ́.

Сти́хъ: Возноси́те Го́спода Бо́га на́шего* и покланя́йтеся подно́жію но́гу Его́, я́ко свя́то е́сть.

Це́ркве утвержде́ніе,* царе́й держа́ва,* мона́шествующихъ похвало́ и спасе́ніе,* ты́ еси́, Кре́сте всече́стне.* Тѣ́мже покланя́емся тебѣ́ се́рдцемъ и душе́ю* и просвѣща́емся дне́сь ри́зою боже́ственною,* ю́же плотска́го ра́ди соше́ствія Своего́* поноси́ти изво́лившему Христу́ Бо́гу на́шему* и честно́ю Кро́вію Свое́ю обагри́вшему.

Сла́ва, и ны́нѣ, гла́съ 8:

Пре́жде Честна́го Твоего́ Креста́ во́иномъ руга́ющимся Тебѣ́, Го́споди, у́мная во́инства дивля́хуся: обложи́лся бо еси́ вѣнце́мъ поруга́нія, зе́млю живописа́вый цвѣ́ты, багряни́цею поруга́нія одѣ́ялся еси́, о́блаками одѣва́яй тве́рдь. Таковы́мъ бо смотре́ніемъ разумѣ́ся Твое́ благоутро́біе, Христе́, ве́лія Твоя́ ми́лость, сла́ва Тебѣ́.

Тропа́рь, гла́съ 4:

Дне́сь притеце́мъ, вѣ́рніи, къ боже́ственнѣй и цельбоно́снѣй ри́зѣ Спаси́теля на́шего Бо́га, благоизво́лившаго сію́ пло́тію носи́ти и на Крестѣ́ святу́ю Свою́ кро́вь излія́ти, е́юже искупи́ на́съ отъ рабо́ты вра́жія. Тѣ́мъ, благодаря́ще, вопіе́мъ Ему́: спаси́ Правосла́внаго Импера́тора на́шего [и́мярекъ], и архіере́евъ, и гра́дъ, и вся́ лю́ди, честно́ю Твое́ю ри́зою защити́ и спаси́ ду́ши на́ша, я́ко Человѣколю́бецъ.


НА УТРЕНИ,
[На Бо́гъ Госпо́дь: Тропа́рь пра́здника три́жды.]

По 1-й стихоло́гіи сѣда́ленъ, гла́съ 6:

Дне́сь проро́ческое испо́лнися сло́во, се́ бо покланя́емся на мѣ́сто, идѣ́же стоя́стѣ но́зѣ Твои́, Го́споди, и, дре́во спасе́нія вкуси́вше, грѣхо́вныхъ страсте́й свобо́ду улучи́хомъ моли́твами Богоро́дицы, еди́не Человѣколю́бче.

Сла́ва, и ны́нѣ, то́йже.

И чте́ніе въ толково́мъ Ева́нгеліи, отъ Матѳе́я, зача́ло 112: Тогда́ во́ини иге́моновы, пріе́мше Іису́са на суди́ще...

По 2-й стихоло́гіи сѣда́ленъ, гла́съ 8:

На Крестѣ́ Тя́ возвы́шена ви́дѣвши со́лнце, незаходи́маго Со́лнца, Христе́, стра́хомъ помрачи́ся а́біе, земля́ же поколеба́ся, ка́меніе тре́петомъ распада́шеся, и церко́вная раздра́ся завѣ́са, и ме́ртвіи отъ гробо́въ воста́ша, славосло́вяше стра́шное и Боже́ственное схожде́ніе еди́наго Тебе́ Бо́га на́шего.

Сла́ва, и ны́нѣ, то́йже.

И чте́ніе въ толково́мъ Ева́нгеліи, отъ Ма́рка, зача́ло 67.

Посе́мъ поліеле́й, та́же припѣ́въ:

Велича́емъ Тя́, Живода́вче Христе́, и почита́емъ вси́ боже́ственныя ри́зы Твоея́ честно́е положе́ніе.

Псало́мъ избра́нный Воздви́женію: [Суди́, Го́споди, оби́дящіи мя́...]

По поліеле́и сѣда́ленъ, гла́съ 6:

На дре́во кре́стное, Спа́се, за милосе́рдіе ми́лости возне́слся еси́ и, въ ре́бра пробо́дься копіе́мъ, раздра́лъ еси́ согрѣше́ній рукописа́ніе лю́тое, я́ко Всеси́ленъ Бо́гъ. Тѣ́мже Твое́ неизглаго́ланное, Сло́ве, смотре́ніе пое́мъ благоче́стно.

Сла́ва, и ны́нѣ, то́йже.

Чте́ніе въ Лукѣ́ [толкова́го Ева́нгелія], зача́ло 111.

Степе́нна, 1-й антифо́нъ 4-го гла́са. Проки́менъ, гла́съ 4: Раздѣли́ша ри́зы Моя́ себѣ́* и о оде́жди Мое́й мета́ша жре́бій. Сти́хъ: Да́ша въ снѣ́дь Мою́ же́лчь и въ жа́жду Мою́ напои́ша Мя́ о́цта. Вся́кое дыха́ніе... Ева́нгеліе Матѳе́я, зача́ло 112: Во вре́мя о́но, во́ини пое́мше Іису́са на суди́ще...

По 50-мъ псалмѣ́ стихи́ра, гла́съ 6:

Совлеко́ша съ Мене́ ри́зы Моя́ и облеко́ша Мя́ въ ри́зу червле́нную, возложи́ша на главу́ Мою́ вѣне́цъ отъ те́рнія и въ десну́ю Мою́ ру́ку вда́ша тро́сть, лице́ же Мое́ не отврати́хъ отъ заплева́нія, суди́щу Пила́тову предста́хъ и распя́тіе претерпѣ́хъ за мірско́е спасе́ніе.

Кано́нъ со ирмосы́ на 14, гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Отве́рземъ уста́, человѣ́цы, и язы́къ уясни́мъ въ наро́читый де́нь пра́здника на́шего, положе́ніе боже́ственныя ри́зы Христа́ Бо́га на́шего свѣ́тло сла́вяще.

Сказа́ти хотя́ Свою́ благода́ть Вы́шній и прія́тъ ра́бій о́бразъ на́съ ра́ди, на увѣре́ніе естества́ человѣ́ческаго честну́ю ри́зу Свою́ вѣ́рнымъ дне́сь дарова́.

Ри́зу Твою́ честну́ю, Христе́, дарова́лъ еси́ на́мъ, свяще́нное огражде́ніе, вся́кое сопроти́вныхъ настоя́ніе при́сно побѣжда́ющую си́лою духо́вною.

Богоро́диченъ: Воздви́жена ви́дящи, е́же на Крестѣ́ Твое́ долготерпѣ́ніе, рыда́ше Тебе́ Ро́ждшая, зову́щи: ка́ко суди́мь ви́дится, хотя́й всѣ́мъ суди́ти сла́вы Госпо́дь?

Катава́сія: Отве́рзу уста́ моя́...

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Влады́ко сы́й по существу́, соедини́лся еси́ рабо́мъ пло́тію и, на́ше дѣ́тельствуя разли́чно спасе́ніе, Христе́, е́же и ны́нѣ промышля́я, Твое́ю боже́ственною ри́зою на́мъ чудодѣ́йствуеши.

Пло́тію на́съ ра́ди явле́йся на земли́, боже́ственныя ри́зы Твоея́ приближе́ніемъ на́съ освяти́лъ еси́, е́йже покланя́ющеся, Христе́, Тя́ воспѣва́емъ.

Живо́те ѵпоста́сный, ны́нѣ вкуси́лъ еси́ сме́рти плотскíя, е́юже живо́тъ источи́лъ еси́ ме́ртвымъ, воста́ніемъ Твои́мъ, Христе́, ны́нѣ же, я́ко животу́ хода́тая, ри́зу Твою́ боготѣле́снаго одѣя́нія пода́лъ еси́ на́мъ.

Богоро́диченъ: Изъ Тебе́, Дѣ́во, обновле́ніе я́вѣ яви́ся, вои́стинну Бо́гъ, пло́тію ражда́емь, и на Кре́стъ возвыша́емь, низлага́я де́моны, Богора́дованная Влады́чице.

Сѣда́ленъ, гла́съ 4. Подо́бенъ: Вознесы́йся.

Сше́дый съ небесе́ за милосе́рдіе ми́лости, Благоутро́бне Спа́се, пло́ти Твоея́ пресвяты́я дне́сь боже́ственную ри́зу гра́ду, чту́щему Тя́, и лю́демъ христоимени́тымъ, сокро́вище пода́лъ еси́, я́ко тве́рдое всеору́жіе, отъ нея́же почерпа́юще освяще́ніе, сію́ вѣ́рою те́плѣ вси́ почита́емъ.

Сла́ва, и ны́нѣ, то́йже.

И чте́ніе во Іоа́ннѣ евангели́стѣ толково́мъ: Во́ини же егда́ распя́ша Іису́са...

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы, воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Яко многоцѣ́нное сокро́вище стяжа́въ, Христе́, чту́щій Тя́ гра́дъ Москва́ ри́зу Твою́, Влады́ко, вѣ́рою облобыза́етъ и благода́ть пріе́млетъ.

Ви́дите чу́дная, вси́ лю́діе, и духо́вно ны́нѣ возвесели́теся, Христа́ пою́ще, дарова́вшаго на́мъ, я́ко многоцѣ́нное бога́тство, боже́ственныя пло́ти Своея́ одѣя́ніе.

Боговидѣ́нія сла́вы дре́вле сѣно́вно, Твои́хъ за́днихъ сподо́бися ви́дѣти Моисе́й, просія́въ. Мы́ же, но́вый Изра́иль, ны́нѣ лице́мъ въ лице́, Твою́ честну́ю ри́зу, Изба́вителя на́шего, ви́димъ я́сно.

Богоро́диченъ: Раздра́ся рукописа́ніе Ада́мово копіе́мъ прободе́ну Ти́, Влады́ко, — Богоро́дица вопія́ше, у Креста́ предстоя́щи, Го́споди, и болѣ́зненно восклица́ющи.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Просвѣти́ся дне́сь правосла́вныхъ со́нмище, ерети́ческій же по́лкъ да посрами́тся, покланя́емую ви́дя боже́ственную ри́зу Твою́, Влады́ко, пло́тію на́мъ я́вльшагося.

Ты́, Влады́ко, на́мъ, Твои́мъ рабо́мъ, дарова́лъ еси́ утвержде́ніе, ри́зу боговочеловѣ́ченія Твоего́ Боже́ственное огражде́ніе, и душа́мъ спасе́ніе, и тѣлесе́мъ исцѣле́ніе.

Воспле́щемъ дне́сь рука́ми и воскли́кнемъ гла́сомъ хвале́нія Го́сподеви: се́ бо вои́стинну пріи́де и яви́ся, вся́ озаря́я вѣ́рныя боже́ственныя ри́зы положе́ніемъ.

Богоро́диченъ: Пло́тію, Его́же родила́ еси́, Сы́на, Богора́дованная, я́ко ви́дѣ на дре́вѣ воздви́жена, пла́чемъ испо́лнися и долготерпѣ́нію Его́ дивля́шеся вои́стинну, тѣ́мже велича́ше Его́ схожде́ніе.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Ме́ртвымъ живо́тъ возсія́, слѣпы́мъ же свѣ́тъ прише́ствова, немощны́мъ лю́тѣ врачевство́ отве́рзеся, и всѣ́мъ спасе́ніе дне́сь прибли́жися.

Вода́мъ Тя́ животеку́щій исто́чникъ вѣ́мы, Влады́ко, и почита́емъ боже́ственную ри́зу Твою́, отъ нея́же исцѣле́нія всегда́, вѣ́рніи, почерпа́емъ.

Стра́нствуетъ вся́къ ра́зумъ, живоно́сныя пло́ти Твоея́ ви́дя боже́ственное одѣя́ніе и просвѣще́ніе источа́ющее покланя́ющимся Тебѣ́.

Богоро́диченъ: Приста́нище бу́ди ми́, Всенепоро́чная, въ пучи́нѣ лю́тыхъ пла́вающему, я́же бѣ́дствующую всю́ тва́рь Рождество́мъ Твои́мъ, Богороди́тельнице, спасла́ еси́.

Конда́къ, гла́съ 4:

Одѣя́ніе нетлѣ́нія, спаси́тельнаго цѣле́нія всѣ́мъ человѣ́комъ, Влады́ко, дарова́лъ еси́, Твое́ боже́ственное сокро́вище — честну́ю ри́зу, я́же е́сть хито́нъ, е́юже живоно́сную и святу́ю пло́ть вочеловѣ́ченія Твоего́ одѣ́яти благоволи́лъ еси́. Сію́ жела́ніемъ пріе́млюще, свѣ́тло пра́зднуемъ, стра́хомъ же и любо́вію, я́ко Благода́телю воспѣва́юще, зове́мъ Ти́, Христе́: сохрани́ въ ми́рѣ Благовѣ́рнаго Импера́тора на́шего [и́мярекъ], и архіере́евъ, и вся́ лю́ди, по вели́цѣй Твое́й ми́лости.

Икосъ:

О, пресла́внаго чудесе́! Каково́ Бо́жіе дарова́ніе Россíйстѣй земли́ дарова́ся? Ри́за, е́юже безгрѣ́шный Госпо́дь одѣ́емь, сію́ неблагода́рніи лю́діе отъ да́льныхъ стра́нъ, я́ко да́ръ нѣ́кій, въ ца́рствующій гра́дъ Москву́ принесо́ша. Тогда́ у́бо ю́ благовѣ́рный ца́рь Михаи́лъ со отце́мъ свои́мъ Филаре́томъ патріа́рхомъ, не я́ко зе́мленъ да́ръ, но я́ко небе́сную жи́знь, вели́кимъ жела́ніемъ и со свидѣ́тельствомъ духо́внымъ ра́достно прія́ша и боголѣ́пнымъ поклоне́ніемъ Влады́цѣ Христу́ Бо́гу на́шему благода́рственная хвале́нія возда́ша, си́це глаго́люще: сла́ва Ти́, Го́споди, я́ко премно́гія ра́ди бла́гости Твоея́ Россíйскую страну́ на́шу назира́еши; сла́ва Ти́, Влады́ко, я́ко благи́мъ сокро́вищемъ святы́ни Твоея́ держа́ву, ю́же да́лъ еси́ на́мъ, обогаща́еши; сла́ва Ти́, Святы́й, я́ко боготѣле́сную Твою́ ри́зу на спасе́ніе на́мъ дарова́лъ еси́, по вели́цѣй Твое́й ми́лости.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Вся́къ гра́дъ ра́дуется, пра́зднуя вѣ́рно съ но́вымъ Сіо́номъ, ца́ріе и кня́зи, бога́тіи и убо́зіи, я́вльшуся дне́сь боже́ственному Твоему́, Христе́, одѣя́нію свѣтода́тельными исцѣле́ніи.

Черто́гъ Бо́жій избра́нный, въ честнѣ́мъ се́мъ черто́зѣ вѣ́рою ри́зу Твою́, Влады́ко, положе́ну архіере́йскими освяще́нными рука́ми, ю́же почита́емъ, я́ко благочести́вый покро́въ.

Обновля́ется вся́къ, приступа́яй вѣ́рою и святы́й облобыза́яй ковче́гъ, держа́щій Твою́, Влады́ко Христе́, свѣтови́дную оде́жду.

Скве́рны вся́кія душе́вныя чисти́тельна е́сть Твоя́, Влады́ко Христе́, боже́ственная оде́жда, покрыва́ющая живоно́сное и пречи́стое тѣ́ло Твое́.

Свяще́нницы, въ пра́вду облецы́теся вси́, и преподо́бніи, возра́дуйтеся свѣ́тло: се́ бо дарова́ на́мъ свѣ́тъ Христо́съ, святы́я пло́ти Своея́ оде́жду, душа́мъ и тѣлесе́мъ во спасе́ніе.

Богоро́диченъ: Богороди́тельнице Дѣ́во, Тебе́ чту́щій гра́дъ гла́да, и тру́са, и озлобле́нія вся́каго спаса́й, и язы́ческаго нахожде́нія, и сопроти́внаго вре́да.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Соверше́нъ Сы́й по существу́ Бо́гъ, и Человѣ́къ ви́дѣнъ бы́сть соверше́нъ, спаса́я по обоему́ Своя́ вои́стинну сво́йства: я́ко Бо́гъ бо, богочеловѣ́ческій о́бразъ увѣря́я, и боже́ственныя пло́ти Своея́ ри́зу на́мъ, я́ко стѣ́ну и покро́въ, дарова́лъ е́сть.

Вознеси́ ро́гъ, Бо́жій Сло́ве, исповѣ́дающихъ Тя́, Бо́га и Человѣ́ка, и боже́ственнѣй ри́зѣ Твое́й покланя́ющихся, е́юже исцѣле́ніе всѣ́мъ вѣ́рнымъ дарова́ся, и упраздни́ пога́нская шата́нія невѣ́дущихъ Твоея́ си́лы Боже́ственныя.

Свѣ́тится Твоя́ собо́рная и апо́стольская Це́рковь положе́ніемъ ри́зы Твоея́: сла́вы бо свѣ́тъ на́мъ дарова́лъ еси́, Христе́, боже́ственныя пло́ти Твоея́ одѣя́ніе, е́юже на́съ просвѣти́ во спасе́ніе, мы́ же вѣ́рою и любо́вію сію́ почита́емъ.

Богоро́диченъ: Ви́дѣвши усну́вша на дре́вѣ Христа́, всѣ́мъ бо́дрость подава́ющаго боже́ственную и спаси́тельную, Ма́ти Всенепоро́чная восклица́ніемъ пла́каше и взыва́ше: что́ сіе́ но́вое чу́до? Обновля́яй вся́ умира́етъ хотя́.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Пое́мъ Бо́гу пѣ́снь благода́рную, изво́лившему бога́тство превели́кое на́мъ пода́ти, стѣ́ну необори́мую и небла́зненное утвержде́ніе, боже́ственныя пло́ти Своея́ одѣя́ніе, е́же чту́ще, вѣ́рніи, велича́емъ.

О, па́че ума́ чуде́съ Твои́хъ, Го́споди, я́же сотвори́лъ еси́ на́мъ, на Тя́ надѣ́ющимся! Якоже бо имѣ́вый неизрече́нное рождество́, та́ко стра́нно всѣ́мъ показа́лъ еси́ боже́ственныя пло́ти Твоея́ ри́зу, ко исцѣле́нію и просвѣще́нію чту́щимъ Тя́.

Предложи́ся ны́нѣ честна́я ра́ка, держа́щи боже́ственную ри́зу Изба́вителя на́шего Христа́, и, я́ко исто́чникъ свѣ́та, зарю́ исцѣле́ній испуща́ющи, и тму́ неду́говъ отгоня́ющи, ю́же любо́вію цѣлу́емъ.

Богоро́диченъ: Просвѣти́, Чи́стая, любо́вію чту́щихъ и велича́ющихъ Тя́, и разруши́ стра́сти на́ша, Отрокови́це, и бу́рю укроти́, и лука́ваго собла́зны отъ среды́ отжени́, ага́рянская ча́да Ты́, Богоро́дице, покори́ Благочести́вому Импера́тору на́шему [имярекъ] моли́твами Твои́ми.

Свѣти́ленъ:

Се́рдца моего́ стру́пы, отъ мно́гихъ грѣхо́въ прозя́бшія, ми́ исцѣли́, Спа́се, я́ко душа́мъ и тѣлесе́мъ Вра́чь, и, подая́ прося́щимъ прегрѣше́ній проще́ніе и неду́говъ всѣ́хъ исцѣле́ніе, отъ честны́я Твоея́ и боготѣле́сныя ри́зы благода́ти сподо́би, я́ко Бла́гъ и Всеми́лостивъ.

Сла́ва, и ны́нѣ, то́йже.

На хвали́техъ стихи́ры на 4, гла́съ 4. Подо́бенъ: Яко до́бля.

Зако́ну Творца́* отъ ученика́ купи́ша беззако́нніи* и, я́ко законопресту́пника,* Того́ Пила́тову суди́щу предста́виша, зову́ще:* распни́, Иже въ пусты́ни си́мъ Маннода́вшаго.* Мы́ же, Христе́, страсте́мъ Твои́мъ* и честнѣ́й ри́зѣ покланя́ющеся,* вѣ́рою, Спа́се, зове́мъ:* поми́луй на́съ. [Два́жды.]

Живоно́сная Твоя́ ре́бра,* я́ко изъ Еде́ма исто́чникъ источа́ющая,* Це́рковь Твою́, Христе́,* я́ко слове́сный напая́етъ ра́й,* отсю́ду раздѣля́яся, я́ко въ нача́ла, въ четы́ре Ева́нгелія,* мíръ напая́я, тва́рь веселя́.* Тѣ́мъ вси́ притека́емъ,* покланя́ющеся святѣ́й ри́зѣ Твое́й,* вѣ́рою зову́ще:* Спа́се, поми́луй на́съ.

Распина́ему Тебѣ́, Христе́,* вся́ тва́рь, ви́дящи, трепета́ше,* основа́нія земли́ поколеба́шася* стра́хомъ держа́вы Твоея́.* Во́ини же тогда́ ри́зы Твоя́ раздѣли́ша себѣ́* и о имати́смѣ Твое́й мета́ша жре́бія,* ю́же ны́нѣ предложе́ну зря́ще, вѣ́рніи,* стра́хомъ и любо́вію зове́мъ:* тоя́ ра́ди, Спа́се, поми́луй на́съ.

Сла́ва, и ны́нѣ, гла́съ 5:

Избавле́ніе цѣ́ну вели́кую, пречи́стую кро́вь Твою́ изво́лилъ еси́ да́ти на́съ ра́ди, безгрѣ́шне Христе́ мо́й, всѣ́мъ хотя́й спасе́ніе получи́ти. Тѣ́мже воспѣва́емъ Твое́ сла́вное хотѣ́ніе и, покланя́ющеся, чти́мъ копіе́, и гу́бу, и тро́сть, съ си́ми же святу́ю и честну́ю ри́зу Твою́, ю́же на боготѣле́снѣй пло́ти Твое́й на́съ ра́ди, грѣ́шныхъ, носи́лъ еси́, и́миже да́руеши всѣ́мъ на́мъ нетлѣ́ніе и жи́знь, просвѣще́ніе и ве́лію ми́лость.

Славосло́віе вели́кое. И ектеніи́. И отпу́стъ. И ча́съ пе́рвый. И коне́чный отпу́стъ.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, гла́съ 7: Возноси́те Го́спода Бо́га на́шего* и покланя́йтеся подно́жію но́гу Его́, я́ко свя́то е́сть. Сти́хъ: Госпо́дь воцари́ся, да гнѣ́ваются лю́діе. Апо́столъ къ Кори́нѳяномъ, зача́ло 125: Бра́тіе, сло́во кре́стное погиба́ющимъ... Аллилу́ія, гла́съ 1: Помяни́ со́нмъ Тво́й, его́же стяжа́лъ еси́ испе́рва. Сти́хъ: Бо́гъ же, Ца́рь на́шъ пре́жде вѣ́ка, содѣ́ла спасе́ніе посредѣ́ земли́. Ева́нгеліе Ма́рка, зача́ло 67: Во вре́мя о́но, во́ини ведо́ша Іису́са вну́трь двора́... Прича́стенъ: Зна́менася на на́съ [свѣ́тъ лица́ Твоего́, Го́споди].

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 92 – 98 об.

/ Къ оглавленію раздѣла /


Наверхъ / Къ титульной страницѣ

0