Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 9-й де́нь.
Свята́го священному́ченика Панкра́тія, епи́скопа Тавроменíйскаго.

[ВЕЧЕРЪ,
На Го́споди, воззва́хъ:] стихи́ры, гла́съ 2. Подо́бенъ: Егда отъ дре́ва.

Сло́вомъ отгоня́ лука́выя ду́хи зло́бы, соверши́лъ еси́ духо́вны лю́ди Ду́ха благода́тію, му́чениче Панкра́тіе, воздѣ́лая ни́ву си́хъ серде́чную и влага́я сѣ́мя боже́ственное, е́же Дѣ́лателю приноша́лъ еси́ небе́сному, моля́ о восхваля́ющихъ тя́ вѣ́рно.

За́падъ сія́ніи мы́сленными ты́ восто́къ содѣ́лалъ еси́, со́лнца нося́щъ Бо́жія позна́нія, отъ Дѣ́вы на́мъ па́че ума́ возсія́вшаго, и, заше́дъ страда́ніемъ, о́тче, возсія́лъ еси́ къ Свѣ́ту невече́рнему, идѣ́же, зерца́ломъ разрѣ́шшимся, зри́ши жела́емую добро́ту Подвигополо́жника твоего́, Панкра́тіе.

Сла́ва, и ны́нѣ, богоро́диченъ:

Еди́на Невмѣсти́маго Бо́га нетѣсномѣ́стно во чре́вѣ носи́ла еси́, Человѣ́ка бы́вша за бла́гость, Пресвята́я Богоневѣ́сто. Тѣ́мже молю́ Тя: утѣсня́ющихъ мя́ страсте́й измѣни́, я́ко да, тѣ́сную и пра́вую стезю́, ше́ствовавъ, дости́гну, я́же къ жи́зни, Дѣ́во, водя́щую.

Крестобогоро́диченъ:

Дре́ву кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до сла́дкое, почто́ оста́вилъ еси́ Мя́, ро́ждшую Тя́, еди́ну, Свѣ́те непристу́пный, Пребезнача́льнаго Отца́? Потщи́ся и просла́вися, я́ко да сла́ву получа́тъ Боже́ственную, и́же Боже́ственныя стра́сти Твоя́ сла́вящіи.

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодухнове́нне, въ видѣ́нія восхо́дъ: сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Панкра́тіе, моли́ Христа́ Бо́га спасти́ся душа́мъ на́шимъ.


[НА УТРЕНИ,]
Кано́нъ, гла́съ 1.

Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Пречестны́й ка́мень тя́ Це́рковь познава́етъ, Панкра́тіе, водруже́ніемъ слове́съ твои́хъ утвержда́ема при́сно, и сего́ ра́ди твою́ почита́емъ па́мять дне́сь.

Обнови́лъ еси́ ра́ломъ твои́хъ боже́ственныхъ слове́съ сердца́, Панкра́тіе, оляденѣ́вшая пе́рвѣе зловѣ́рія мгло́ю, плодоно́сна показа́лъ еси́ я́вѣ вѣ́ры ра́ди.

Еди́ницу тричи́сленную, соединя́ему въ то́жде естество́, возвѣща́я, погаси́лъ еси́ безбо́жія мглу́ и свѣтолу́чными уче́ніи лю́ди просвѣти́лъ еси́.

Богоро́диченъ: Изъ Тебе́ возсія́ Свѣтода́вецъ, просвѣща́я концы́, Іису́съ Госпо́дь, Чи́стая Влады́чице, Имже и́же во тмѣ́ и сѣ́ни свѣ́тъ ви́дѣша.

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Ду́хомъ утвержда́емь, лука́выя отгна́лъ еси́ ду́хи и трудо́мъ моли́твъ хра́мы разори́лъ еси́ и́дольскія, це́ркви возставля́я, досточу́дне.

Сѣчи́тельнымъ сло́вомъ твои́мъ посѣ́клъ еси́ злоче́стія, преподо́бне, те́рніе и насади́лъ еси́ душа́мъ спаси́тельная уче́нія добродѣ́телей, оби́лующа плодо́въ, свяще́нне.

Сосу́дъ обрѣ́тъ тя́, Боже́ственнаго Ду́ха чи́стыя зари́ пріе́млюща, верхо́вный учени́къ, къ за́паду посла́ безбо́жія изгна́ти мглу́, всече́стне.

Богоро́диченъ: Тя́, о́блакъ всесвѣ́телъ, ковче́гъ и ста́мну всезла́ту, простра́ннѣйшу небе́съ, и превознесе́нную лѣ́ствицу, Неискусобра́чная Дѣ́во, вѣ́рніи, ублажа́емъ.

Сѣда́ленъ, гла́съ 4. Подо́бенъ: Яви́лся еси́ дне́сь.

Благоче́стія побо́рникъ, побѣдоно́сецъ, свяще́нне Панкра́тіе, показа́вся, на небесѣ́хъ со безпло́тными ны́нѣ предстои́ши Го́сподеви, моли́ спасти́ся на́мъ.

Сла́ва, и ны́нѣ, богоро́диченъ:

Те́плое заступле́ніе су́щимъ въ бѣда́хъ, и помо́щницу на́шу, и къ Бо́гу премѣне́ніе, Еюже тли́ изба́вихомся, Богоро́дицу, вѣ́рніи, ублажа́емъ.

Крестобогоро́диченъ:

На дре́вѣ ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ла еси́: увы́ Мнѣ́, ка́ко заше́лъ еси́, Свѣ́те Мо́й безлѣ́тный?

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ — позна́ешися, внегда́ пріити́ вре́мени — пока́жешися. Сла́ва си́лѣ Твое́й, Го́споди.

Огне́мъ Утѣ́шителя огнедохнове́ненъ я́влься, ле́сть попали́лъ еси́, Панкра́тіе му́дре, и, возсія́въ, я́ко свѣ́щникъ, въ мо́ри потопля́емымъ невѣ́дѣнія, ко приста́нищемъ Боже́ственныя вво́диши во́ли.

Отъ Ка́мене некраесѣко́ма Пе́тръ напои́вся и насы́щся, я́ко и́ну тя́ посыла́етъ рѣку́, оляденѣ́вшія напои́ти ду́ши, богому́дре, и нече́стія рѣ́ки изсуши́ти тече́ніемъ боже́ственнаго проповѣ́данія.

Глаго́лъ твои́хъ вѣща́ніе излія́ся, му́дре, сія́ніемъ просвѣща́емь ра́зума Христо́ва. Тѣ́мже и е́ллинская му́дрость обуи́ся, и зло́бы мудре́цъ сожже́ся, му́чениче святи́телю Панкра́тіе.

Житіе́ твое́, боже́ственными блиста́яся добро́тами, вся́ омрачи́ де́монская стремле́нія и, разори́въ тму́ безбо́жія, сы́ны дне́ показа́, любо́вію твои́мъ уче́ніемъ покори́вшіяся.

Богоро́диченъ: Воплоща́ема Сло́ва во двою́ существу́, Отрокови́це, и хотѣ́ніи, родила́ еси́, Чи́стая, восхо́ды сказа́вшаго пресла́вно спасе́нія ле́стію порабоще́ннымъ, Чи́стая Дѣ́во Всепѣ́тая.

Пѣ́снь 5.

Ирмо́съ: Тво́й ми́ръ да́ждь на́мъ, Сы́не Бо́жій, ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Чуде́съ показа́ніи улови́лъ еси́ лю́ди, сло́вомъ же тре́бища разори́лъ еси́ и созда́лъ еси́, свяще́нне, церкве́й добро́ты во обновле́ніе человѣ́комъ.

Кровьми́ обагри́лъ еси́ оде́жду свяще́нную, кро́вь же де́монскую изсуши́лъ еси́ и побѣдоно́сецъ возше́лъ еси́ къ небеси́, побѣ́ды пріи́мъ вѣне́цъ.

Разсѣ́деся предъ лице́мъ твои́мъ хра́мъ и́дольскій, две́рь же отве́рзеся язы́комъ, и даде́ся благода́ть Боже́ственная вѣ́рныхъ въ сердца́, священнотаи́нниче о́тче.

Богоро́диченъ: Яко до́ждь, во утро́бу Твою́ сни́де Христо́съ, Чи́стая, и ту́чи изсуши́ многобо́жія, и изведе́ богоразу́мія во́ду су́щимъ въ пла́мени ле́стнѣмъ.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Облагодати́въ тво́й у́мъ и просвѣти́въ бога́тно, Іису́съ, просвѣще́ніе всѣ́хъ и Бо́гъ, сло́вомъ твои́мъ безслове́сія лю́ди изба́ви.

Священнодѣ́йствовавъ Бо́жіе Ева́нгеліе, му́дре, боже́ственная уче́нія запеча́тствовавъ свѣ́тло кро́вію, священнотаи́нниче му́чениче Панкра́тіе.

Кропле́ній и́дольскихъ и крове́й скве́рныхъ изба́вилъ еси́ лю́ди и, поже́рся, я́коже а́гнецъ, Панкра́тіе, же́ртва жива́ Бо́гу прине́слся еси́.

Богоро́диченъ: Соуда́влена прило́ги непло́дныхъ помышле́ній, возведи́ къ свѣ́ту спасе́нія и жи́зни, Всенепоро́чная, Яже Спа́са Христа́ ро́ждшая.

Конда́къ, гла́съ 4. Подо́бенъ: Яви́лся еси́.

Свѣ́тлая тавроменíомъ, Панкра́тіе, звѣзда́ показа́лся еси́ и священнострада́лецъ яви́лся еси́ за Христа́, Ему́же ны́нѣ предстоя́, моли́ за чту́щія тя́, блаже́нне.

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́ я́ко еди́нѣми усты́ поя́ху и благословля́ху, глаго́люще: благослове́нъ Бо́гъ оте́цъ на́шихъ.

Кро́вію крести́лся еси́ твое́ю, Панкра́тіе, пе́рвѣе въ водѣ́ крести́въ лю́ди, и ко Христу́ преше́лъ еси́, ра́дуяся; съ ни́миже водворя́яся, прича́стіемъ обожа́ешися свѣ́тло при́сно, преблаже́нне.

Сла́ностію погруже́нныя лю́тыхъ у́дицею твои́хъ слове́съ возве́лъ еси́, свяще́нне, и моли́твъ чи́стымъ одожде́ніемъ му́тную изсуши́лъ еси́ зловѣ́рія глубину́, священнотаи́нниче Христо́въ.

Ка́мень тя́ вои́стинну неразсѣ́дный основа́ніе положи́ и степе́нь недви́жимь, свяще́нный священнояви́тель Це́ркве, въ не́йже сокруша́ется вся́ка зло́ба, му́дре, младе́нствующаго врага́.

Богородиченъ: Чистѣйшу едину Тя обрѣтъ, Всенепорочная, Слово, Пречистая, Божіе, изъ Твоего чрева порождся, вѣрныя очища́етъ скве́рны, Богоневѣ́сто, прибы́вшія на́мъ отъ невоздержа́нія зо́лъ.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Огне́мъ изнуря́емь разли́чныхъ искуше́ній, невреди́мъ пребы́лъ еси́, изостри́въ у́мъ свѣ́тлыми видѣ́ніи, яви́лся еси́, му́дре, ме́чь, посѣка́я ве́щь многобо́жія.

Лю́ди приводя́ въ ра́зумъ Христо́въ, зна́менія и чудеса́ твори́лъ еси́ я́вѣ, предглаго́ля хотя́щая бы́ти, я́ко проро́къ Бо́жій, Утѣ́шителя, богому́дре, дохнове́ньми.

Образъ Зижди́теля показу́я лю́демъ, во́лею Иже поноси́, соединя́яся на́мъ, зна́менія и си́лы тѣ́мъ сотворя́еши, многобо́жія де́рзость отгоня́.

Богоро́диченъ: Яко до́ждь, во утро́бу Твою́ сни́де Христо́съ и всю́ напои́ тва́рь, вои́стинну, изсуши́въ, Дѣ́во, му́тныя рѣ́ки идолонеи́стовства, еди́ный Благодѣ́тель.

Пѣ́снь 9.

Ирмо́съ: Живопріе́мный исто́чникъ приснотеку́щій, свѣтоно́сный свѣти́льникъ благода́ти, хра́мъ одушевле́нный, сѣ́нь пречи́стую, небесе́ и земли́ простра́ннѣйшую, Богоро́дицу, вѣ́рніи, велича́емъ.

Свѣтолу́чными Петра́ сія́ніи просвѣ́щся душе́ю и мы́слію, я́ко звѣзда́ многосвѣ́тлая, къ за́паду дости́глъ еси́, просвѣща́я уче́ніи заше́дшія въ невѣ́дѣнія, Панкра́тіе, глубину́.

Ико́нную че́сть преходя́щу въ первообра́зную ты́ вѣ́дый, всю́ду честну́ю поставля́лъ еси́, сла́вне, Іису́са и Бо́га на́шего ико́ну, ка́пищемъ де́монскимъ на потребле́ніе.

Свѣтоно́сное твое́ сіе́ торжество́ гра́дъ и собо́ръ сотворя́етъ, ра́дуяся, чу́дный Панкра́тіе, тя́ вѣ́рно почита́юще. Ихже благослови́ти я́ко па́стырь не преста́й, о всѣ́хъ моли́тву творя́.

Богоро́диченъ: Пощади́ на́съ, пою́щія Тя́, Го́споди, отъ Дѣ́вы несказа́нно рожде́йся, напа́стей избавля́я, и страсте́й, и скорбе́й моли́твами Ея́ Твоя́ рабы́, я́ко Благодѣ́тель и еди́нъ Человѣколю́бецъ.

Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 85 об. – 89.

/ Къ оглавленію раздѣла /


Наверхъ / Къ титульной страницѣ

0